Nkene tu na okulongitha uuvidio wu nasha nokukonakona Ombiimbeli

Otu na uuvidio une wu nasha nokukonakona Ombiimbeli, mboka tatu vulu okulongitha muukalele. Kehe kamwe oka nyanyangidhwa nelalakano lyashike?

• 

  Okavidio Omolwashike wa pumbwa okukonakona Ombiimbeli? (hoka okale) oka nyanyangidhwa ka kwathele aantu ya kale ye na ohokwe mOmbiimbeli kutya nduno oye li melongelokalunga lini. Otaka ladhipike aantu ya konge omayamukulo mOmbiimbeli gomapulo ngoka ga simanenena monkalamwenyo, noka gandja oshiholelwa shankene omapulo gamwe ga yamukulwa mOmbiimbeli. Oka yelitha wo nkene omuntu ta vulu okupula ekonakonombiimbeli.

• 

  Okavidio Omolwashike wa pumbwa okukonakona Ombiimbeli? (hoka okafupi) oka faathana naahoka okale, ihe haka okafupi. Otashi vulika ka kale ekwatho enene miitopolwa moka mu na aantu kaaye na lela ethimbo lyokupopya.

• 

  Okavidio Mbela Ombiimbeli ohayi konakonwa ngiini? oka nyanyangidhwa ka kwathele aantu ya kale ye na ohokwe mekonakonombiimbeli lyetu ndyoka hatu ningi naantu oshali, noka yamukula omapulo gamwe ngoka aantu tashi vulika ye na kombinga yalyo, mwa kwatelwa wo nkene ye na okupula ekonakonombiimbeli.

• 

  Okavidio Owa manguluka okukonakona Ombiimbeli, oka nyanyangidhwa nelalakano ka ulukilwe aakonakonimbiimbeli. Nonando okavidio haka oke li pepandja etiyali lyembo Kala nonkalamwenyo ombwanawa sigo aluhe, otaka vulu okuulukilwa omuntu, uuna tamu kundathana mokambo Kala nonkalamwenyo ombwanawa sigo aluhe. Oka ngonga iinenenima yomembo naashoka omukonakoni a tegelela oku ki ilonga.

Nonando okavidio kehe oka nyanyangidhwa nelalakano lyako, kehe kamwe otaka vulu okuulukilwa nenge okutuminwa aantu, uuna tashi wapa. Aauvithi otaya ladhipikwa ya kale ye wu shi nawa nankene ye na oku wu longitha muukalele.