Ontopolwa 25
Oto Hogolola Uuyuni waSatana Nenge Onkalelo Ompe yaKalunga?
1. Oshike tashi ulike kutya ngoye omwaambidhidhi gwonkalelo ompe yaKalunga?
ONGOYE OMWAAMBIDHIDHI gwonkalelo ompe yuuyuki yaKalunga, nowa hala ye ya? Ongoye omuniita naSatana, nowa hala uuyuni we u hule po? Eyamukulo lyoye otashi vulika, Eeno, komapulo ngaka gaali. Ihe osha gwana ngaa? Iilonga yoye ohayi tsu ngaa kumwe noohapu dhoye? Ngele ngoye owi itaala onkalelo ompe yaKalunga, omikalo dhonkalamwenyo yoye otadhi ke shi holola.—Mateus 7:21-23; 15:7, 8.
2. (a) Oolye ooyene yaali mboka tatu vulu okulongela? (b) Oshike tashi holola ngoka tse tu li aapiya nenge aapika ye?
2 Uushili owo mboka kutya omikalo dhonkalamwenyo yoye otadhi vulu okunyanyudha owala gumwe gwooyene yaali. Ngoye oto longele owala Jehova Kalunga nenge Satana Ondiaboli. Ekotampango lyOmbimbeli otali tu kwatha oku shi uva ko nawa. Otali ti: “One kamu shi shi, sho tamu igandja komuntu, mu ninge aakalele ye yokuvulika, ano one aakalele yaangoka tamu vulika kuye . . . ?” (Aaroma 6:16) Ngoye oto vulika kulye? Ngoye oto longo ehalo lyalye? Kashi na oshilonga kutya eyamukulo lyoye olya tya ngiini, ngele ngoye oho ende noondjila dhaa na uuyuki, ito vulu okulongela Kalunga kashili, Jehova.
UUYUNI WASATANA OSHIKE?
3. (a) PaMbimbeli, olye omupangeli guuyuni? (b) Ongiini Jesus a holola megalikano kutya opu na eyooloko pokati kuuyuni naalongwa ye?
3 Jesus okwa luku Satana “omupangeli guuyuni mbuka.” Nomuyapostoli Johannes okwa ti kutya “uuyuni auhe owa kala muuwinayi.” (Johannes 12:31; 1 Johannes 5:19) Ndhindhilika kutya Jesus okwa holola megalikano kuKalunga kutya aalongwa ye kaye shi oshitopolwa shuuyuni waSatana. Ye okwa ti: “Otandi ya galikanene, [aalongwa ye] itandi galikanene uuyuni, . . . Oyo yaa shi yomuuyuni, ngaashi nangame ndaa shi gwomuuyuni.” (Johannes 17:9, 16; 15:18, 19) Mushika osha yela kutya Aakriste yashili ye na okuyooloka ko kuuyuni.
4. (a) MuJohannes 3:16, okoolye uutumbulilo “uuyuni” tau ulike? (b) “Uuyuni” oshike hoka aalanduli yaKristus ye na okuyooloka ko?
4 Ihe Jesus okwa popi shike sho ye a ti “uuyuni”? MOmbimbeli uutumbulilo “uuyuni” oolumwe otau ti owala uuntu waapuhe. Kalunga okwa tumine Omwana gwe okugandja omwenyo gwe iikulila kuuyuni mbuka owo uuntu. (Johannes 3:16) Ihe Satana okwi iteekitha oshitopolwa oshinenenene shuuntu kuKalunga. Ano uuyuni waSatana owo uulipamwe waantu ya hanganithwa mboka yi iyoolola ko nenge ye li kondje yehangano lyaKalunga li wetike. Osho uuyuni mbuka kuwo Aakriste yashili ye na okukala ya yooloka ko.—Jakob 1:27.
5. Oshike shi li oshitopolwa sha simana shuuyuni, nongiini sha thanekwa mOmbimbeli?
5 Uuyuni waSatana—uulipamwe waantu ye ya hanganithwa—owa thikama miitopolwa yi ili noyi ili mbyoka yi imanga kumwe. Oshitopolwa sha simana osho elongelokalunga lyiifundja. MOmbimbeli omalongelokalunga giifundja oga thanekwa ngaashi “ohonda onene” nenge omuhondelwa gwedhina “Babilon onene.” Oye uukwaniilwa wuuyuni, ngaashi sha hololwa kuushili mbuka kutya ye oku na “uukwaniilwa kombanda yaakwaniilwa ayehe yevi.” (Ehololo 17:1, 5, 18) Ihe oshike tashi ulike kutya Babilon Onene oyo uukwaniilwa womalongelokalunga guuyuni?
6, 7. (a) Oshike tashi ulike kutya Babilon Onene oyo uukwaniilwa welongelokalunga? (b) Ekwatathano lini po omalongelokalunga giifundja ge na nomapangelo gopolitika?
6 Oshoka okwa tiwa kutya “aakwaniilwa ayehe yevi” ya ‘hondele’ naye, Babilon Onene itayi vulu okukala uukwaniilwa wopolitika yuuyuni. Nomolwashoka “aahalithi” yevi oya kala omuthika kokule nokunika uuthigwa pehanagulo lye, yo itayi vulu okukala uukwaniilwa wuuyuni wokuhalithila. (Ehololo 17:2; 18:15) Ihe kutya yo uukwaniilwa womalongelokalunga shili, oshi wetike melombwelo lyOmbimbeli: “Kuumpulile woye iigwana ayihe ya hongololwa.”—Ehololo 18:23.
7 Niishewe, shoka tashi ulike kutya Babilon Onene oyo uukwaniilwa womalongelokalunga, osho ekwatathano lyayo ‘noshilikama.’ MOmbimbeli iilikama ya tya ngaaka otayi thaneke omapangelo gopolitika. (Daniel 8:20, 21) Okwa tiwa Babilon Onene oya kuutumba “koshilikama oshitiligane . . . shi na omitse heyali nooniga omulongo.” Ano yo oya kambadhala okunwetha mo “oshilikama” shika nenge epangelo ndika lyuuyuni. (Ehololo 17:3) Nosha tseyika apuhe kutya okuza mondjokonona ayihe omalongelokalunga oga vundakana nopolitika nolundji oga lombwele omapangelo shoka shi na okuningwa. Yo oyi na shili “uukwaniilwa kombanda yaakwaniilwa ayehe yevi.”—Ehololo 17:18.
8. Oshike shi li natango oshitopolwa sha simana shuuyuni waSatana, nongiini sho sha thanekwa mOmbimbeli?
8 Omapangelo ngaka gopolitika oga ninga natango oshitopolwa sha simana shuuyuni waSatana. Ngaashi twa mono nale, go oga thanekwa mOmbimbeli ngaashi iilikama. (Daniel 7:1-8, 17, 23) Emoniko ndyoka lya nyolwa komuyapostoli Johannes, otali holola kutya omapangelo ngaka ga fa iilikama, otaga mono oonkondo dhago kuSatana: “Ongame nda mono, mefuta mwa anduka mo oshilikama shi na ooniga omulongo nomitse heyali, . . . ihe oshikoko shiyaka oshe shi pa epangelo lyasho.” (Ehololo 13:1, 2; 12:9) Euliko ekwawo kutya omaukwaniilwa nenge omapangelo ngano oge li oshitopolwa shuuyuni waSatana, osho uushili kutya Satana okwa makele Jesus mokugandja kuye omaukwaniilwa ngano. Satana ka li ta vulu oku shi ninga ando haye kwa li te ga pangele.—Mateus 4:8, 9, KB.
9. (a) Ongiini oshitopolwa shilwe shuuyuni waSatana tashi hokololwa mEhololo 18:11? (b) Otashi longo shike notashi humitha komeho shike, shoka tashi ulike kutya Satana oku li po konima yasho?
9 Ishewe oshitopolwa sha simana shuuyuni waSatana osho onkalelo yomahalitho guunalwiho nomathininiko, hoka Ehololo 18:11 tali ulike ngaashi “aahalithi.” Onkalelo ndjika yomahalitho otayi pendutha ehalo lyokwiihola mwene maantu okumona iinima mbyoka tayi longwa kuyo, nokuli nando yo inaye yi pumbwa notashi vulika taa kala hwepo mokwaa yi na. Pethimbo tuu mpono onkalelo yomahalitho guunalwiho otayi ndumbile iikulya miigandhi, ihe otayi sitha aantu omamiliyona kondjala molwashoka itaa vulu okulanda iikulya. Kombinga onkwawo, iikondjitho mbyoka tayi vulu okuhanagula po uuntu auhe, otayi hambulwa nokulandithwa po omolwiihohela. Pamwe nomalongelokalunga giifundja nomapangelo gopolitika, onkalelo yomahalitho yaSatana otayi humitha komeho ano okwiihola, iilonga yomuyonena niita iihalwithi.
10, 11. (a) Oshike ishewe shi li endhindhiliko lyuuyuni waSatana? (b) Omalondodho gOmbimbeli geni po taga keelele evundakano mwaashino?
10 Uulipamwe waantu ya hanganithwa kohi yaSatana Ondiaboli owa kolokosha nowa nyata shili. Owo uuniita noompango dhaKalunga dhuuyuki, nowu udha omalongitho ga nyata gi ili nogi ili. Ano endhindhiliko ekwawo lyuuyuni waSatana olyo uukakombwiilitha nomikalo dha nyata dhawo. Omolwashoka aayapostoli Paulus naPetrus ya londodha Aakriste okuyanda omalongitho omawinayi gaapagani.—Aaefeso 2:1-3; 4:17-19; 1 Petrus 4:3, 4.
11 Omuyapostoli Johannes okwe shi thindi wo kutya Aakriste oye na okukotoka molwomahalo ga puka nomikalo dha nyata dhuuyuni. Ye okwa nyola: “Inamu kala mu hole uuyuni noshaa shoka sha kala mo. Oongoka e hole uuyuni, ohole yaHe kayi mo muye. Oshoka shaa shoka sha kala muuyuni, ongashika okahalu konyama nokahalu komeho nokwiitangela kuuyamba, oombino inayi za muHe, aawe, omuuyuni.” (1 Johannes 2:15, 16) Omulongwa Jakob okwa ti kutya ‘ngele opu na gumwe a hala okukala kuume kuuyuni, ota ningi omuniita naKalunga.’—Jakob 4:4.
NKENE ITAAKU KALWA OSHITOPOLWA SHUUYUNI
12, 13. (a) Ongiini Jesus a holola kutya Aakriste ye na okukala muuyuni? (b) Ongiini tashi vulika okukala muuyuni ihe hakukala oshitopolwa shawo?
12 Omanga uuyuni waSatana u li po, Aakriste oye na okukala muwo. Jesus okwe shi holola wo sho ye a galikana kuHe: “Itandi galikana, u ya kuthe mo muuyuni.” Nopo nduno Jesus a gwedha ko okupopya kombinga yaalanduli ye: “Oyo yaa shi yomuuyuni.” (Johannes 17:15, 16) Ongiini tashi vulika okukala muuyuni waSatana ihe nando ongeyi ku shi oshitopolwa shawo?
13 Eeno, ngoye ou li mokati kaantu mboka taa ningi uulipamwe waantu ya hanganithwa wonena. Maantu mbaka omwa kwatelwa aahondeli, aantu aanalwiho naalongi yuuwinayi yamwe yi ili. Ngoye oho longo pamwe nayo, ho yi pamwe nayo kosikola, ho lile pamwe nayo noho longo iinima yimwe yi ili pamwe nayo. (1 Aakorinto 5:9, 10) Ou na nokuli okukala u ya hole, ngaashi Kalunga e ya hole. (Johannes 3:16) Ihe Omukriste gwashili ke hole nando iinima yuukolokoshi mbyoka hayi longwa kaantu. Ye iha kutha nando omadhiladhilo, iilonga nenge omalalakano gawo gonkalamwenyo. Ye ke na oshitopolwa shasha moonyata dhawo dhomalongelokalunga nodhopolitika. Nonando e na okulonga olundji muuyuni womahalithilo molwokwiihupitha, ihi idhopo momalongitho goongeshefa ngoka inaagu uka; niihohela yiikwamaliko hayo wo elalakano lye enene lyonkalamwenyo. Oshoka ye omwaambidhidhi gwonkalelo ompe yaKalunga, ye oha yanda eendathano ewinayi lyaamboka ye li aayambidhidhi yuuyuni waSatana. (1 Aakorinto 15:33; Epsalmi 1:1; 26:3-6, 9, 10) Onkee ano ye oku li muuyuni waSatana ihe nando ongeyi ke shi oshitopolwa shawo.
14. Okelombwelo lyOmbimbeli lini po to ka vulika ngele wa hogolola onkalelo ompe yaKalunga?
14 Ongiini kungoye? Owa hala okukala oshitopolwa shuuyuni waSatana? Nenge oto hogolola onkalelo ompe yaKalunga? Ngele oto hogolola onkalelo ompe yaKalunga, oto kala wa yooloka ko kuuyuni, sha kwatela mo omalongelokalunga gawo giifundja. Oto ka vulika kelombwelo: “Zeni mo muyo [Babilon Onene], one aantu yandje.” (Ehololo 18:4) Ihe okuza muBabilon Onene, uukwaniilwa wuuyuni womalongelokalunga giifundja, osha kwatela mo oshindji shi vulithe owala okuteya ekwatathano nomahangano gomalongelokalunga giifundja. Otashi ti wo kutya omuntu ke na okukala e na sha niituthi yomalongelokalunga yuuyuni.—2 Aakorinto 6:14-18.
15. (a) Pehala lyevalo lyaJesus, Aakriste oya lombwelwa okudhimbulukwa shike? (b) Oshike tashi holola kutya Jesus ka li ta vulu okuvalwa pokufu ku na uutalala owindji? (c) Omolwashike 25 Desemba lya hogololwa ngaashi esiku lyokudhanwa evalo lyaJesus?
15 Okrismesa oyo oshituthi sha simana nena shelongelokalunga. Ihe ondjokonona otayi holola kutya yo kayi shi oshituthi shoka sha dhanwa kAakriste yotango. Jesus okwa lombwele aalanduli ye okudhimbulukwa eso lye, havalo lye. (1 Aakorinto 11:24-26) Niishewe esiku 25 Desemba halyo esiku Jesus a valwa. Shika itashi vulika, oshoka Ombimbeli otayi holola kutya pethimbo lyokuvalwa kwe, natango aasita oya li miihwa uusiku. Yo kaya li ando ya kala hwiya methimbo lyokufu taku lokwa noku na uutalala. (Lukas 2:8-12) The World Book Encyclopedia otali yelitha molwashike 25 Desemba lya hogololwa li kale esiku lyokudhanwa evalo lyaJesus: “Aantu yomuRoma oya kala nale ye li dhana ngaashi Oshituthi shaSaturnus, edhano lyevalo lyetango.”
16. (a) Oshituthi oshikwawo sha simana shelongelokalunga inaashi za mUukriste oshini po? (b) Omolwomatompelo omawanawa geni po Aakriste yashili ihaa dhana Okrismesa nOpaasa?
16 Opaasa oyo oshituthi shimwe sha simana shelongelokalunga. Ihe nayo wo inayi dhanwa kAakriste yotango. Niishewe oya za miituthi yaa shi yopakriste. The Encyclopædia Britannica otali ti: “MEtestamendi Epe inamu ulikwa nando edhano lyoshituthi shOpaasa.” Oshi na ngaa shili oshilonga kutya Opaasa nOkrismesa kayi shi iituthi yopakriste noya za shili maagalikani yiimenka? Omuyapostoli Paulus okwa londodha kevundakano koshili niifundja, nokwa ti kutya nokuli “okantaku okashona taka pitha ondombo ayihe.” (Aagalati 5:9) Ye okwa ti kAakriste yamwe yotango kutya oya li ya puka okudhimbulukwa omasiku ngoka ga li ga dhanwa kohi yompango yaMoses nonando ga dhimwa po kuKalunga molwAakriste. (Aagalati 4:10, 11) Osha simana unene ngiini kAakriste yashili nena okwiikaleka kokule niituthi mbyoka Kalunga inaa lombwela yi dhimbulukwe noya za momalongelokalunga giifundja!
17. (a) Oshike sha puka komasiku gomafudho ngoka taga simaneke aalumentu ya simana nenge iigwana? (b) Ongiini Ombimbeli tayi holola ondjila ndjoka yi na okweendwa kAakriste?
17 Omasiku gamwe gomafudho guuyuni otaga simaneke aalumentu ya simana. Nagamwe gi ili otaga simaneke nenge taga yele iigwana nenge omahangano guuyuni. Ihe Ombimbeli otayi londhodha twaa gandje esimaneko alihe kaantu okugalikana kuyo nenge okwiinekela momahangano gopantu okweeta po iinima mbyoka tayi vulu okulongwa owala kuKalunga. (Iilonga 10:25, 26; 12:21-23; Ehololo 19:10; Jeremia 17:5-7) Ano omasiku gomafudho ngoka taga simaneke omulumentu nenge ehangano lyopantu, itaga tsu kumwe nando nehalo lyaKalunga, nAakriste yashili itaa ka kutha ombinga mugo.—Aaroma 12:2.
18. (a) Iinima yini po ya longwa kaantu oku yi simaneka nenge oku yi isizimikila? (b) Ompango yaKalunga otayi ti ngiini kombinga yesimaneko lyoshinima?
18 Iinima oyindji oya longwa nale nelalakano kutya aantu ye yi simaneke nenge ye yi galikane. Yimwe po yomuyo oya longwa moshiyela nenge moshiti. Yimwe yi ili oya longwa melapi, e tashi vulika kuyo taku hondjelwa nenge taku thanekwa efano lyasha shi li megulu nenge shi li kombanda yevi. Otashi vulika oshigwana shi tote po ompango ndjoka tayi ti kutya ayehe ye na okusimaneka oshinima sha tya ngaaka. Ihe ompango yaKalunga otayi ti kutya aapiya ye kaye na oku shi ninga. (Eksodus 20:4, 5; Mateus 4:10) Aapiya yaKalunga oya ningile ngiini monkalo ya tya ngaaka?
19. (a) Omukwaniilwa gwaBabilon okwa lombwele ayehe okuninga shike? (b) Aakriste ye na okulandula oshiholelwa shoolye?
19 MuBabilon oshikulu, Omukwaniilwa Nebukadnesar okwa ningitha efano enenenene lyoshingoli nokwa lombwele ayehe oku li isizimikila. ‘Omuntu ngoka itee shi ningi,’ ye osho a ti, ‘ota ka umbilwa meziko lyomulilo gwa tiligana.’ Ombimbeli otayi tu tseyithile kutya aagundjuka Aaheberi yatatu, Sadrak, Meshak naAbednego, oya tindi okuninga shoka omukwaniilwa a ti. Omolwashike? Omolwashoka egalikano lyawo olya kwatelwa mo mwaashoka, negalikano lyawo olya li owala tali pewa Jehova. Kalunga okwa hokwa shoka ya ningi nokwe ya hupitha mondjahi yomukwaniilwa. Dhoshili, Nebukadnesar okwa dhimbulula kutya aapiya mbaka yaJehova kaya li oshiponga shasha kOshilongo, nomolwashoka ye a ningi po ompango okugamena emanguluko lyawo. (Daniel 3:1-30) Ino kuminwa nando uudhiginini waalumentu aagundjuka mbaka? Oto ka holola tuu kutya ngoye owa gama shili konkalelo ompe yaKalunga mokuvulika koompango adhihe dhaKalunga?—Iilonga 5:29.
20. Omikalo dhini po Satana ta longitha oku tu teyitha oompango dhaKalunga kombinga yomikalo dhelalathano?
20 Nokuli Satana ina hala nando tse tu longele Jehova. Ye okwa hala tse tu mu longele. Ano ye ota kondjo shili oku tu ningitha tu longe ehalo lye, oshoka ye oku shi shi kutya tse otatu ningi aakalele nenge aapiya yaanguka tatu vulika kuye. (Aaroma 6:16) Mokulongitha omikalo dhi ili nodhi ili, sha kwatela mo ooradiomuzizimba, ookino, omikalo dhimwe dhoondanisa nomambo inaaga yogoka, Satana ota humitha ko elalathano pokati kaamboka inaaya hokana, osho wo tuu eyonondjokana. Omikalo dha tya ngaaka ohadhi ningwa dhi kale dhi hokitha, nenge nokuli dha fa dhu uka. Ihe shika osho eteyo lyoompango dhaKalunga. (Aaheberi 13:4; Aaefeso 5:3-5) Nomuntu ngoka ta yono komikalo dha tya ngaaka, muushili wo wene ye ota holola kutya okwa gama kuuyuni waSatana.
21. Omalongitho gamwe geni po taga ka holola kutya omuntu okwa hogolola uuyuni waSatana?
21 Opu na wo omalongitho gamwe ngoka ga ningithwa kuuyuni waSatana ga kale taga tuntula ihe otaga kondjitha oompango dhaKalunga. Limwe olyo uunkolwe. (1 Aakorinto 6:9, 10) Ekwawo elongitho lyiingangamithi ngaashi epangwe noheroin molweinyanyudho, osho wo elongitho lyomakaya. Iinima mbino oyo oshiponga molutu noya nyata. Elongitho lyayo olyo lela eteyo lyelombwelo lyaKalunga kutya “tu iyogeni oshidhe kehe noshonyama noshombepo.” (2 Aakorinto 7:1) Ehilo lyomakaya nalyo oshiponga molwuukolele waantu mopepi mboka ye na okufudhila mo olwithi, ano omuhili ota teya wo ompango yaKalunga ndjoka tayi ti kutya Omukriste e na okuhola omuntu omukwawo.—Mateus 22:39.
22. (a) Ombimbeli otayi ti ngiini kombinga yombinzi? (b) Omolwashike etulwo lyombinzi lya faathana lela ‘nokulya’ ombinzi? (c) Oshike tashi holola kutya ‘eidhiliko lyombinzi’ otashi ti kutya ku na oku yi tula mo nando molutu lwoye?
22 Niishewe elongitho lyaakuhe miitopolwa yi ili noyi ili yuuyuni olyo okulya ombinzi. Iinamwenyo mbyoka inaayi za ombinzi nawa ohayi liwa po nenge ombinzi ohayi ndhindololelwa musha okulongithwa miikulya. Ihe Oohapu dhaKalunga otadhi indike aantu okulya ombinzi. (Genesis 9:3, 4; Levitikus 17:10) Ongiini kombinga yetulwo lyombinzi? Aantu yamwe otaa ludhike kutya omuntu ngoka a tulwa ombinzi, ina “lya” shili ombinzi. Ihe kashi shi shoshili kutya ngele omuvu ita vulu okutula mo iikulya kokana, ndohotola olundji ota lombwele a paluthwe pamukalo tuu ngoka gwetulwo lyombinzi? Ombimbeli otayi tu lombwele kutya tu na “okwiidhilika . . . ombinzi.” (Iilonga 15:20, 29) Otashi ti ngiini? Ngele ndohotola te ku lombwele kutya u na okwiidhilika iikunwa yoalkoholi, otashi ti owala kutya ku na oku yi tula mo kokana ihe oto vulu oku yi tapela mo shu ukilila momithipa? Shivalelwe! Osho wo ngawo ‘eidhiliko lyombinzi’ otashi ti kutya omuntu waahe yi tule mo nando molutu lwoye.
23. (a) Ngoye ou na okukutha etokolo lini po? (b) Oshike tashi ka holola etokolo ndyoka ngoye wa ningi?
23 Ou na okuulikila Jehova kutya owa hogolola onkalelo ye ompe noku shi nando oshitopolwa shuuyuni mbuka. Otashi pumbwa etokolo. Etokolo ndyoka u na okuninga olyo okulongela Jehova nokulonga ehalo lye. Ito vulu okutengukila paali ngaashi Aaisrael yamwe yonale. (1 Aakwaniilwa 18:21) Oshoka ngoye ou na okudhimbulukwa kutya ngele ito longele Jehova, nena oto longele Satana. Ngoye otashi vulika to ti kutya owa hogolola onkalelo ompe yaKalunga, ihe eihumbato lyoye otali ti ngiini? Ngele to gama konkalelo ompe yaKalunga, u na okuyanda omalongitho agehe ngoka taga pangulwa kuKalunga naangoka itaaga ka kala mo monkalelo ye ompe yuuyuki.
[Picture on page 209]
Uuyuni oshike mbono Jesus inaa galikanena nomuwo aalongwa ye yaa shi oshitopolwa?
[Pictures on page 211]
MOmbimbeli omalongelokalunga giifundja oga thanekwa ngaashi ohonda ya kolwa, nepangelo lyuuyuni hoka yo ya londa ngaashi oshilikama
Uukakombwiilitha owo endhindhiliko kuuyuni waSatana. Onkalelo yomahalitho guunalwiho nayo wo oyi li oshitopolwa shawo sha simana
[Picture on page 213]
Jesus ka li ta vulu okuvalwa meti 25 Desemba, oshoka pethimbo lyokuvalwa kwe aasita oya li natango pamwe niimuna yawo miihwa uusiku
[Picture on page 214]
Aapiya yaKalunga oya tindi okugalikana efano ndyoka lya dhikwa komukwaniilwa. Oto ka ninga ngiini monkalo ya faathana?