EPULO 5
Mbela oshi li ngaa pandunge tu itaale shoka Ombiimbeli tayi ti?
Mbela owa lombwelelwe nale iifundja kombinga yomuntu gwontumba? Tashi vulika wu uva yalwe taye mu popi nenge taya hokolola shoka a ti. Otashi vulika shi ku ningithe wu kale wu mu tonde. Ihe ngele sho we ke mu tseya nawa, owe ke shi mona kutya nani iinima mbyoka wu uva kombinga ye kayi shi yoshili. Aantu oyendji nayo ohaya lombwelathana iifundja kombinga yOmbiimbeli nohaya pengitha oohapu dhayo.
Aalongwantu oyendji inaya simaneka Ombiimbeli. Mbela owu shi kutya omolwashike? Oshoka ihaye yi uvu ko nawa nenge shoka ya popya ohaye shi uvu ko pambambo, nohaya ti kutya anuwa itashi tsu kumwe nuunongononi. Omathimbo gamwe aanongononi ohaya ti Ombiimbeli oya puka thiluthilu. Mbela shono oshoshili ngaa?
Sho wa lesha okambo haka, kwa li mbela wa kumwa okutseya kutya shoka Ombiimbeli ya popya otashi tsu kumwe niinima yopaunongononi? Aantu oyendji ohaya kala ya kumwa. Ohaya kala nokuli ya kumwa okutseya kutya Ombiimbeli inayi popya iinima yimwe mbyoka hayi longwa momalongelokalunga ogendji. Pashiholelwa, omalongelokalunga gamwe ohaga longo aantu kutya Ombiimbeli otayi ti aniwa Kalunga okwa shita iinima ayihe meni lyoowili 24 muule womasiku 6. Ihe paushili wo wene, Ombiimbeli inayi popya nando osha shi li ompinge naashoka aanongononi taya tengeneke kombinga yomimvo ndhoka iinima mewangandjo nenge evi lya kala ko.a
Natango shoka Ombiimbeli ya popya paufupi kombinga yankene Kalunga a shiti iinima ayihe yi na omwenyo kombanda yevi, osha pa aanongononi ompito ye shi konakone noye ete po sha kombinga yasho. Ombiimbeli otayi ti kutya iinima ayihe yi na omwenyo oya shitwa kuKalunga ‘pamaludhi’ gayo gi ili nogi ili. (Genesis 1:11, 21, 24) Otashi vulika oohapu ndhoka itaadhi tsu kumwe nomalongo gamwe gaanongononi, ihe kadhi li ompinge nuumbangi wopaunongononi mboka wa konakonwa, e taku monika kutya owoshili. Ondjokonona yiinima yopaunongononi otayi ulike kutya omalongo ngoka ohage ya po e taga kwishi, ihe oshili ihayi hulu po, opo hayi kala.
Opu na aantu oyendji haya kala inaaya hala okukonakona Ombiimbeli, molwaashoka ya lulilwa komalongelokalunga. Oye wete lela uufudhime, uulingilingi nosho wo uutondwe mboka wu li momalongelokalunga. Mbela oshi li ngaa mondjila tu pe Ombiimbeli uusama, omolweihumbato ewinayi lyayamwe mboka haya ti kutya ohaye yi konakona? Aanongononi oyendji mboka ye na iikala nomitima omiwanawa, ihaya kala ye uvitile ombili omukalo moka aantu yamwe mboka ye na onyanya noye tonde aantu yomihoko dhilwe haya longitha elongo lyoevolusi ya humithe komeho uukwamuhoko. Mbela oshi li ngaa mondjila tu pangule elongo lyoevolusi shi ikolelela kiikala yaantu ya tya ngawo? Otashi ka kala pandunge wu konakone shoka elongo lyoevolusi tali ti noku li yelekanitha nuumbangi mboka wu li po.
Otatu ku indile wo nangoye wu konakone Ombiimbeli. Otashi vulika wu ka kale wa hala okutseya nkene ya yooloka ko thiluthilu kiinima yimwe mbyoka hayi longwa komalongelokalunga ogendji. Pehala lyokuhumitha komeho iita nosho wo omiyonena ndhoka hadhi longelwa aantu yomihoko dhontumba, Ombiimbeli otayi ti kutya mboka haya longele Kalunga kaye na okuya kiita nokukala ye na uutondwe mboka hawu ningitha aantu ya longe omiyonena. (Jesaja 2:2-4; Mateus 5:43, 44; 26:52) Pehala lyokuhumitha komeho uulaadhi wa pitilila nosho wo okwiitaala miinima kuu na uushili muyo, Ombiimbeli otayi ti kutya otwa pumbwa uumbangi, opo tu kale tu na eitaalo lyashili notwa pumbwa oondunge dhokuyoolola, opo tu longele Kalunga. (Aaroma 12:1; Aahebeli 11:1) Pehala yi tu te ye omukumo kaatu kale tu na omaipulo, Ombiimbeli otayi tu tsu omukumo tu konge omayamukulo gomapulo omahokithi nomadhigu ngoka aantu haya pula.
Pashiholelwa, mbela owi ipulile nale to ti: ‘Ngele Kalunga oko e li, omolwashike e etha uukolokoshi wu kale po?’ Ombiimbeli otayi gandja eyamukulo kepulo ndyoka nokugalwe ogendji momukalo tagu mbilipaleke.b Otatu ku ladhipike wu tsikile okukonga oshili. Oto vulu okumona omayamukulo gomondjila, taga mbilipaleke noge shi okuuviwa ko, ga kankamena kuumbangi washili. Omayamukulo ngoka oge li paushili, ihe inage ya po owala ohaluka kugo gene.
a Opo wu mone uuyelele owundji tala okambo Was Life Created? ka nyanyangidhwa kOonzapo dhaJehova.
b Tala ontopolwa 11 yembo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova.