Liivuru Anaawiili a Matharihelo
10 Rehopowamu aahiya o Sikemi, woona wi Isarayeli oothene aakele o Sikemi wi ampake yoowo okhala mwene. 2 Vaavaa Yeropowamu, mwaana a Nepati aasuwenleiye sa yeela, mwawaakuveya aakookawo o Yikuputu (Yeropowamu nlelo aari o Yikuputu woona wi aarimuchawa wa nthowa na mwene Solomoni.) 3 Voocharela, awo yaalamulela wi iichaniwe; nave Yeropowamu ni Isarayeli oothene yaaya wa Rehopowamu nave eloca eriki: 4 “Apapa anyu aheeriha nipisi nahu okhala noowalamela. Nto wakhala wi mooveiha muteko woowalamela, ni weeriha okhala nooveyaxa nipisi noolimela nenlo apapa anyu anteexinhaaya, hiyaano nnamoorumeelaani.”
5 Mwawiihiiha, owo aaloca ariki: “Mukooke yavira mahiku mararu.” Mwawiihiiha, achu yaarowa. 6 Voocharela, mwene Rehopowamu aahaakoha alopwana awunnuwelavo* yaawo yaarumeenle ntoko anamiruku a Solomoni, apapa awe, elukuluku yaaraaya mukumi. Owo ahaakoha: “Miruku taani munavahaanyu wi kiwaakhule achu ala?” 7 Awo yaamwaakhula eriki: “Wakhala wi muri aphaama ni achu ala, mweera yeeyo anachunaaya, ni waavaha naakhulo noophwanelela, awo anamukhala alapeli anyu ilukuluku soothene.”
8 Mwawiihiiha, owo aakhooca miruku sa alopwana awunnuwelavo* nave aakoha amiravo yaawo unnunweiyeno vamoha nave vano yaari akhaviheryi awe. 9 Owo aahaakoha yaawo: “Miruku taani munakivahaanyu? Niwaakhule hai achu ala alonce ni miyaano eriki: ‘Mweerihe nipisi okhala nooveyaxa nenlo apapa anyu aanteexinhaaya’?” 10 Amiravo yaawo unnunweiyeno vamoha yaamwaakhula: “Wa achu yaawo alonce eriki: ‘Apapa anyu aheeriha nipisi nahu okhala noolimela, nto nyuwo mweerihe okhala nooveyaxa,’ nyuwaano munaphwanela waaleela muriki: ‘Naaphe* aka yoola onahaala okhala mutokweenesa opwaha eyuunu ya apapa aka. 11 Apapa aka yaahookuheryaani nipisi noolimela, nto miyaano kinahaala weeriha nlo okhala noolimelaxa. Apapa aka yaanoohooxaani ni miwaxuxo, nto miyaano kinahaala woohooxaani ni miwaxuxo sa miiwa.’”
12 Yeropowamu ni achu oothene yaaya wa Rehopowamu mu nihiku naneeraru, hiihaa ntoko mwene aalonceiye ariki: “Mukooke yavira mahiku mararu.” 13 Nto mwene aawaakhula yaawo moowali. Mwawiihiiha, Mwene Rehopowamu aakhooca miruku sa alopwana awunnuwelavo.* 14 Acharihaka miruku sa amiravo, owo aaloca: “Kinahaala weeriha wi nipisi nanyu nikhale noolimelaxa, nave kinahaala waaceererya nikhale noolimelaxa. Apapa aka oohonxeeni ni miwaxuxo, nto miyaano kinahaala woohooxaani ni miwaxuxo sa miiwa.” 15 Mwa yeeyo, mwene haawiiwelenle achu, woona wi yeeyo yeereya yaatannyiwa ni Muluku eeparipari, wi yaakhwanela masu yaawo Yehova aalonceiye wa Yeropowamu mwaana a Nepati, moorweela wa Aiya Musilonita.
16 Woona wi mwene haachunne waawiriyana achu, Isarayeli oothene aahiloca wa mwene ariki: “Tiheeni nryaahuno ni Tavite? Hinaano yoohiyeryiwa ni mwaana a Yese! Mmoha ti mmoha akookeleke wa amuluku awe, weyo Isarayeli! Vano othokororyeke empaa ene, weyo Tavite.” Mwa yeeyo, Isarayeli oothene aakookela mmawannyawe.*
17 Nto Rehopowamu aatitelela waalamulela Aisarayeli yaawo yaakhala mu ipooma so Yuta.
18 Voocharela, Mwene Rehopowamu aahimurumiha Hatoramu, yoowo aahoolela achu yaalapa muteko wawimphareliwa, nto Aisarayeli yaahimvonya maluku ophiyerya okhwa. Mwene Rehopowamu aawerya owela ekaaro awe nave achawela o Yerusalemu. 19 Mwawiihiiha, Aisarayeli yaamwareela echoko ya Tavite, nave annatitelela hiihaa ophiyerya olelo.