Liivuru Anaawiili a Matharihelo
11 Vaavaa Rehopowamu aaphin’yeiye o Yerusalemu, mwawaakuveya aahithukumanya echoko ya Yuta ni echoko ya Penxami, anakhoco oovyakihiwa ncikhwi nsana nimoha ni makhumi mathanu namararu* wi ewane ni Isarayeli ni omukookiherya omwene Rehopowamu. 2 Mwawiihiiha, Semaiya muchu a Muluku eeparipari, aahaakhela masu oorweela wa Yehova awi: 3 “Omuleele Rehopowamu, mwaana a Solomoni ni mwene o Yuta, hiihaa ntoko Isarayeli oothene o Yuta ni o Penxami oriki: 4 ‘Yehova ooloca ariki: “Muhiyewo okhoconi wi nwane ni asinninyu. Mmoha ti mmoha akookele owannyawe, woona wi ti miyaano keerinhe wi yeela yeereye.”’” Awo yaahiiwelela masu a Yehova nave yaakooka; hiyaakelewo owana ni Yeropowamu.
5 Rehopowamu aakhala o Yerusalemu nave alipiha ipooma so Yuta. 6 Mwa yeeyo, aamulipiha, Petelehemu, Etami, Tekowa, 7 Pete-suri, Soko, Atulami, 8 Kati, Maresa, Sifi, 9 Atorayimi, Lakixi, Aseka, 10 Sora, Aiyaloni ni Heporoni. Ipooma seiha saalipihiwe o Yuta ni o Penxami. 11 Ohiya yeeyoru, aalipiha ipooma soolipihiwa aahelakamo ahooleli akhoco, ahelakamo yoolya, makhurwa ni eviinyu, 12 nave akuhakamo mu ipooma soothene iyaakiho itokweene ni mavaka; aaheeriha okhala soolipa. Nave Yuta ni Penxami aatitelela olamuleliwa ni yoowo.
13 Alipa a mukucho ni Alevi yaawo yaakhala makupa oothene o Isarayeli yaahihiya miceche saya nave ekhala makupa a Rehopowamu. 14 Alevi yaahihiya mapuro aya oolyihamo mihuwo ni miceche saya nave eya o Yuta ni o Yerusalemu, woona wi Yeropowamu ni anaawe yaahaahiiha orumeela ntoko alipa a mukucho ntakhara Yehova. 15 Mwawiihiiha, Yeropowamu aahaathanla alipa amukucho awe ene mmapuro oocukhuwa, wi enalapela masololo yaalikana ni ipuri vamoha ni asaana amope aapankeiye. 16 Nave mahimo oothene a Isarayeli, yaawo yaalakelenle mmurimani mwaya omwaavya Yehova, Muluku a Isarayeli, yaahaachara alipa a mukucho ni Alevi nave yaahiya o Yerusalemu wi yavaheke mikucho wa Yehova, Muluku a makholo aya. 17 Mu iyaakha raru, awo yaalipiha olamulelo wo Yuta nave yaamukhaviherya Rehopowamu mwaana a Solomoni woona wi awo yaaneeca mu ephiro ya Tavite ni ya Solomoni mu iyaakha raru.
18 Mwawiihiiha, Rehopowamu aamuthela Malati mwaana a mwaamuthiyana a Yeremoti, mwaana a Tavite ni a Apiyayeli, mwaana a mwaamuthiyana a Eliyapi, mwaana a Yese. 19 Moovira wa elukuluku owo aamuyarela anamwane ala: Yewusi, Semariya, ni Sahamu. 20 Voocharela, owo aamuthela Maka, musulwa a Apusalawu. Ohoolo waya owo aamuyarela anamwane ala: Apiya, Atai, Sisa ni Selemoti. 21 Rehopowamu aanamusivela Maka, musulwa a Apusalawu, waapwaha asaariye akina oothene ni asimpwana awe; owo aakhalano asaariye khumi nathanu nararu* ni asimpwana awe makhumi mathanu nammoha,* nave aakhala tiithi a anamwane aasilopwana makhumi meeli ni athanu nararu* ni aasithiyana makhumi mathanu nammoha.* 22 Mwawiihiiha, Rehopowamu aamuthanla Apiya mwaana a Maka, ntoko mutokweene ni muhooleli a asinnawe, woona wi owo aanachuna omweera mwene. 23 Nyenya Rehopowamu aaheerano ichu mwa miruku nave aahaarumiha* akina a anamwane awe mmakupa oothene o Yuta ni o Penxami, mu ipooma soothene soolipihiwa, nave aahaavaha soolya sincipale ni a waavyerya athiyana ancipale.