Yupu
11 Sofari o Nama, aahaakhula ariki:
2 “Apwanne masu oothene yaala hekhalano naakhulo,
Naari apwanne oloca vancipale onnamweeriha muchu okhalano rasawu?
3 Apwanne sooloca sanyu soohikhalano mphurelo inanweeriha achu omaala?
Apwanne haavo oni oosameleeni wanthowa na masu anyu oophuca?
4 Tiwi munnaloca muriki: ‘Yeeyo kinahusihaaka ti yeeparipari,
Nave kiri aweela murima vamiithoni va Muluku.’
5 Waamukhala phaama Muluku aalonce
Nave aahunle iyano sawe wi awaakhuleeni!
6 Hiihaa, owo aahaala owuupululelaani sawiiphiini sa miruku,
Tiwi miruku soophara muteko iri mmikhalelo soohiyanahiyana.
Nave mwaahaala wiiwexexa wi Muluku onnacuwala soohesa sanyu ikina.
7 Wakhweya nyuwo munanwerya osuwela ichu sawiiseela sa Muluku
Naari osuwela soothene vooloca sa* Aikuru Soothene?
8 Iho* sinnarakama opwaha erimu. Tiheeni munaweryaanyu opaka?
Iho ti sawiixa opwaha Mahiye.* Tiheeni munaweryaanyu osuwela?
9 Ti soorakamaxa opwaha elapo
Nave ti sawunnuwaxa opwaha ephareya.
10 Wakhala wi Muluku oovira nave amphara muchu amukeriha nipuro noothoriha,
Taani onawerya omuhiiha?
11 Tiwi, owo onnasuwela vaavaa achu anakhalaaya oowoka.
Vaavaa onooneiye sootakhala, apwanne owo hanapwacha?
12 Nto muchu oohilapa muru pahiru onahaala wiiwexexa
Wakhala wi puuru a mutakhwani oomuyara muchu,
13 Pahiru waakhanle wi moorehererya murima anyu
Ni wookolola matata anyu wa yoowo!
14 Murapelihe matata anyu wa yeeyo eri yoonanara munapakaanyu,
Nave muheemererye wi ohookololowa omake mmixakalani mwanyu.
15 Hiihaa, munarwa mviiha muru anyu muhuuliwe muru;
Munamukhala oohicikinyeya, muhoovaka.
16 Tiwi munarwa mucuwala makacamiho anyu,
Muni munuupuwela seiho ntoko maahi oorweela avinre.
17 Okumi anyu onarwa waarya opwaha othana mitiya;
Ophiyerya tho epiiphi eni ekhale ntoko wooxiixelo.
18 Nyuwo mukaamuroromela ntakhara yookhalavo ewehereryo,
Munamvareryaka voorukurerya nave munamukonaka mookhapeleleya.
19 Munamukonaka ahikhanlevo oni ootutuxeeni,
Nave achu ancipale anamwaavyaka ophwanya mahala vamiithoni vanyu.
20 Nto miitho a achu oonanara murima anamukuvya;
Awo hephwanyaru nipuro noochawelavo,
Nave ewehereryo aya pahiru oni okhale okhwa.”