Setempuru

Muluku omvaha owerya Yesu wa orehererya makacamiho oothene a achu. Vaavaa Yesu aapankeiye sootikhiniha, aahooniherya wi ookhalano owerya wa orehererya makacamiho oothene yaawo nihinahaalaahu owerya omaliha mukhatiihu. Ntoko yootakiherya, owo ookhalano owerya wa onitaphula wa yeeyo enatannya makacamiho aachu oothene—soocheka nramvaahu seiho inakumiherya ireca ni okhwa. (Mat. 9:1-6; Aro. 5:12, 18, 19) Sootikhiniha sawe sohooniherya wi owo onanwerya openuxa “ireca sa mukhalelo woothene” ophiyerya tho waaviiha mookhwani achu. (Mat. 4:23; Yoh. 11:43, 44) Owo tho ookhalano owerya wa omaaliha echeku yawuupa ni ovootha minepa sootakhala. (Mar. 4:37-39; Luka 8:2) Ti yoolipiha osuwela wi Yehova omvaha Mwanawe owerya yoola! Nnanwerya ororomela wi mareeliho a omwaahiyu vathi va olamulelo wa Muluku anahaala waakhwanela. Sootikhiniha Yesu opankeiye ntoko muchu veelaponi yavathi sinnanihusiha wi owo onahaala opaka sincipale opwaha vaavaa ntoko Mwene a Omwene wa Muluku wirimu. w23.04 epaax. 3 ipara. 5-7

Wakhala wi munakhala mmuloko yoowo orimo alaleeryi ancipale nave munoona wi wiiliwiili hamunathanliwa, akhweya munanwerya ochuna ohiya ovahererya maakhulo. Nyenya muhihiye weererya ovaha maakhulo. Murehererye maakhulo mancipale ntakhara mithukumano soothene. Wakhala wi himuthanliwe woopaceryani wa yoohuserya, nlelo munahaala okhalano ikari sa ovahererya maakhulo vaavaa muthukumano oneecaaya. Vaavaa muniirehereryaanyu ntakhara Yoohuserya ya Mulipeleli, muupuwele mukhalelo iparakrafo iniiwananaaya ni muru wa mwaha. Mmukhalelo yoola, munanwerya ovahererya maakhulo aphaama variyari va yoohuserya. Mwawaaceererya, munanwerya wiirehererya phaama wi mvahe maakhulo mu iparakrafo seiho sinavuwiha miyaha sawiiseela iri soovila othariha. Ntakhara heeni? Nthowa nawi akhweya achu ancipale hanaviiha miwono mu iparakrafo seiho. Tiheeni munaphwanelaanyu weera wakhala wi hamunawerya ovaha maakhulo naamwi mweerenrye mmithukumano mincipale? Mmuleele muhooleli ihaakumve mithukumano ni omuleela nikoho taani mwaahaalaanyu osiveliwa ovaha naakhulo. w23.04 ipaax. 21-22 ipara. 9-10

Yosefe aari ooreheryeya opharihela ohoolela wa Yehova, nave eyo yaahimweeriha okhala mulopwana aphaamaxa. Mu ikwaha raru, owo aahaakhela sooleeliherya soorweela wa Muluku vooloca sa echoko awe. Mu ikwaha soothene, owo aahiiwelela mwawaakuveya, naamwi eyo yaavolowela opaka matorokelo matokweene. (Mat. 1:20; 2:13-15, 19-21) Moorweela wa ochariha ohoolela wa Muluku, Yosefe aanamukhaviherya Mariya nave aanamukhapelela yoowo. Mwaanyiherye mukhalelo ichu Yosefe aapakeiye yaamweerihaaya Mariya omusivela ni omucicimiha vancipale yoowo! Alopwana nyu muthenle, munanwerya omutakiherya Yosefe moorweela wa waavya ikano inathipeleya Mpiipiliyani vooloca sa okhapelela echoko anyu. Vaavaa munapharihelaanyu ekano yeela, naamwi evolowelaka opaka matorokelo, munnooniherya osivela wa amwaarinyu nave munnalipiha othela wanyu. Murokora mmoha onakhala o Vanuatu, yoowo otheliwe mu iyaakha opwaha 20, ooloca: “Vaavaa aiyaka anaavyaaya ni opharihela ohoolela wa Yehova, kinnaacicimiha vancipale yaawo. Kinniisoona okhala ookhapeleleya nave kinnaroromela soolakelela anapakaaya.” w23.05 epaax. 21 epara. 5

Ayuta yaakoonke o Papulu yaaphwanela okhala “muloko waweela” wa Muluku aya. (Malam. 7:6, PMM) Nyenya, ela hiyaataphulela wi, wa Ayuta yaawo hiyaaphwanela opaka matorokelo wi emuhakalalihe Yehova. Ayuta ancipale yaayariwe o Papulu, akhweya yaahikhovelela mukhalelo wa wuupuwela wa Apapulu vooloca sa ichu ni meecelo aya. Iyaakha sincipale ohoolo waya, Ayuta oopacerya emanle okookela o Isarayeli, Mulamuleli Nehemiya aahitikhiniheya nthowa na osuwela wi anamwane yaayariwe o Isarayeli hiyaahusenryeru elocelo ya Ayuta. (Malam. 6:6, 7; Neh. 13:23, 24) Vano ti mwawiihai anamwane yaala yaahaalaaya ohuserya omusivela ni omulapela Yehova woona wi awo hiyaawerya oloca Ehepiri, elocelo yeeyo yaaphariheliwe wi erempwe Masu a Muluku? (Estr. 10:3, 44) Mwawiihiiha, Ayuta yaale yaaphwanela opaka matorokelo matokweene, nto waahaala okhala wookhweya opaka matorokelo yaawo o Isarayeli, weiwo malapelo aweela yaakookiheryiwaaya vakhaani-vakhaani.—Neh. 8:8, 9. w23.05 epaax. 15 ipara. 6-7

Moothananiha, moohipwacha nchuno naari nceenyeryo nryaahuno, nnanwerya ohoolela mikhalelo sookookiherya oculi. Ntoko yootakiherya, “ichu soohiwehereryeya” akhweya inanwerya omaliha elukuluku naachunaahu wi niilipixerye waakhwaniherya soolakelela sahu. (Ekl. 9:11, TNM) Akhweya ninnahoolela nikacamiho nnanceecheiha ni omaliha ikuru sahu. (Mas. 24:10) Woona wi na achu oohiphaameya, nnanwerya opaka soohesa seiho sinahaala weeriha okhala woovila wa hiyaano waakhwaniherya soolakelela sahu. (Aro. 7:23) Naari akhweya nnamwiisoona okhala oovelavela. (Mat. 26:43) Tiheeni enahaala onikhaviherya ovootha sooceecheiha? Muupuwele wi sookookiherya muculi henataphulela wi muri muhesa. Piipiliya onnaloca wi nnanwerya ohoolela mikhalelo soovila naari makacamiho mwawuuluulela. Nyenya owo tho oohiya mookwakwaleya wi nnanwerya ovootha. Moorweela wa otitelela weererya waakhwaniherya soolakelela sanyu, naamwi muhoolelaka makacamiho, munnamooniherya Yehova wi munnachuna omuhakalaliha yoowo. Yehova onnahakalala vancipale vaavaa onawooneiyeeni mutitelelaka wiilipixerya wi mwaakhwaniherye soolakelela sanyu! w23.05 epaax. 30 ipara. 14-15

Piyoneero onanwerya omukhaviherya mmiravo ohuserya mukhalelo wa waakhaliha achu a mukhalelo woothene. Nave tho mukhalelo wa opharihela ikhorowa seiyo onaphwanyeiye ni ohinananariha mwaapure mwaapure. (Afi. 4:11-13) Mukhalelo mmoha waphaama wa opacerya muteko wa elukuluku yoothene ori okhala piyoneero ookhaviherya. Muteko wa opiyoneero onanwerya ohula ikari sa milako mikina mmuteko wa elukuluku yoothene, ntoko yootakiherya, orumeela mmuteko wa oteka naari okhala Petelita. Munna ori oothene mmulokoni onnaphwanela okhalano yoolakelela ya ophwanelela wi aarumeele anna ni arokora ntoko mutokweene a muloko. Piipiliya olonce wi alopwana yaawo aniilipixerya wi ephwanelele murici yoola, anniilipixerya ntakhara “muteko waphaama.” (1 Tim. 3:1) Yoopacerya, munna onaphwanela toko ophwanelela wi arumeele ntoko murummwa oorumeela. Arummwa oorumeela annaakhaviherya atokweene waakhapelela anna mmulokoni mmikhalelo soohiyanahiyana. Nave atokweene hiiha tho ntoko arummwa oorumeela, alapeli awiiyeviha yaawo analapa ntakhara anna ni arokora nave tho alaleeryi amvai. w23.12 epaax. 28 ipara. 14-16

Mwene Yosiya aari mmiravo vaavaa aapacenryeiye omwaacamela Yehova. Owo aanachuna opaka sincipale vooloca sa Yehova ni opaka yoochuna awe. Nyenya mwene yoola aari mmiravo, ilukuluku soothene okumi awe hiwaari wookhweya. Mu elukuluku yeele, achu ancipale yaalapela amuluku atheru, nave Yosiya aanaphwanela okhala oolipa murima wi awerye waakiha malapelo eeparipari. Nave ti yeeyo ene eenreiyeno! Owo haarinono naari mano iyaakha 20 sa oyariwa vaavaa aapacenryeiye otoloxa malapelo atheru. (2 Math. 34:1, 2) Naamwi nyuwaano muri mmiravo, munanwerya omutakiherya Yosiya ni ohuserya sincipale vooloca sa Yehova ni mikhalelo Sawe sootikhiniha. Ti yeeyo enahaala oweerihaani ochuna wiiveleela wa Yehova. Nyenya, ti mwawiihai yoolakelela yeela enahaalaaya ovolowela okumi anyu? Luka yoowo opatisiwe arino iyaakha 14, ooloca: “Ovinyerya hiihaano, kinahaala okuha muteko wa Yehova mu nipuro noopacerya mu okumi aka nave kinahaala wiilipixerya wi kihakalalihe murima awe.” (Mar. 12:30) Munanwerya ororomela wi munahaala oreelihiwa vancipale wakhala wi moolakelela weerano yeeyo! w23.09 epaax. 11 ipara. 12-13

Vaavaa murummwa Paulo aarempeiye ekaarata yeela, muloko wo Tesalonika hiwaamalinhe eyaakha emoha vaavaa waatikitheryiwaaya. Atokweene a muloko yoole hiyaarinono mavyakelo nave akhweya yaanapaka soohesa. Naamwiihiiha, awo yaanaphwanela ocicimihiwa. Vaavaa yoohoosa etokotoko enaacamelaaya, akhweya nnahaala ochuna pahiru nikhaviheryo na atokweene a vanipuroni wi enivahe ohoolela opwaha yoowo ananivahereryaaya hiihava. Moohipwacha yeeyo eni yeereye, hankooni ntitelele okhapelela mavyakelo ahu a wuupuwela, ohiya otikitheryeya mu ohiphaameya waya, nyenya ntikitheryeyaka mu eparipari yawi Yehova, orweela wa Kristu onnaahoolela alopwana yaala oororomeleya. Hiihaa ntoko kapasete onakhapeleleiye muru wa nakhoco, ewehereryo ahu ya ovuluxiwa ennakhapelela muupuwelo ahu. Ninnawerya woona wi ichu seiyo elapo yeela enavahaaya tahi echweenevo. (Afi. 3:8) Ewehereryo ahu ennanikhaviherya otitelela okhala oororomeleya ni awiithipela. w23.06 ipaax. 11-12 ipara. 11-12

Yaale ananwiriyana “muthiyana ori mulolo” anaphwanela olakelela waakhanle wi anahaala weemererya naari hooye nwopelo owo onapakeiye. Nookhalano mathowa aphaama a osepa ocapaheya. “Muthiyana ori mulolo” oni: “Maahi awiiyiwa tawi vyaa.” (Mas. 9:17) Taavi ari “maahi awiiyiwa”? Piipiliya onnalikanyiha okonihana wa achu athelanne ni maahi ooriiryela. (Mas. 5:15-18) Mulopwana ni muthiyana yaawo athelanne mwawiiwanana ni nlamulo anneemereryiwa okonihana. Nto “maahi awiiyiwa” ari oohiyanaxa vancipale. Awo ananwerya olikanyihiwa ni ocapaheya naari okonihana wooheemereryiwa. Achu yaawo anacapaheya, wiiliwiili anneererya wiipithiha wa akina, hiihaa ntoko mpava oneereryeiye wiiya ahooniwe ni muchu. Nave vaavaa achu anoonaaya wi haavo onahaala osuwela wa yeeyo eenraaya, “maahi” yaawo “awiiyiwa” ananwerya okhala ntoko wi toosivaxa. Yoohesa etokweene wuupuwela hiihaa! Yehova onnoona soothene, hiyaavo eri “yoosiva” wa yeeyo. Moohiyana, oyeleela onthamwene ni Yehova eri echu yoothananihaxa.—1 Ako. 6:9, 10. w23.06 epaax. 22 ipara. 7-9

Tiheeni munaphwanelaanyu weera wakhala wi mohoona wi hamunavekela okhumela vathi va murima, naari wi hamunasiveliwa ni muteko woolaleerya ntoko mweerelaanyu khalai? Muhiphiyerye makuchuwelo wi nyuwaano mooyeleela munepa wa Yehova. Ntoko muchu oohiphaameya, muupuwelo anyu onanwerya otorokeya moovira wa elukuluku. Wakhala wi mvai anyu woopacerya ovukuwa, muupuwele vooloca sa yootakiherya ya murummwa Paulo. Naamwi eereryaka omutakiherya Yesu, Paulo aanasuwela wi, ikwaha ikina, haahaala okhalano nchuno noolipa na opaka yeeyo aachuneiye weera. Paulo aari oolakelela waakhwaniherya muteko awe woolaleerya moohipwacha mukhalelo aahaaleiye wiisoona mu elukuluku yeeyo. Mmukhalelo mmohamoha, muheemererye wi miyoonelo sanyu soohiphaameya soopakiheeni soolakelela ntakhara nyuwaano. Mukhale oolakelela weera yeeyo eri yaphaama, moohipwacha mwaahichunne weerano yeeyo. Wakhala wi nyuwaano mootitelela weerano yeeyo eri yaphaama, moovira wa elukuluku miyoonelo sanyu inanwerya otorokeya.—1 Ako. 9:16. w24.03 ipaax. 11-12 ipara. 12-13

Nnanwerya wooniherya osivela wahu wa anna ni arokora ahu, moorweela wa ohula murima ahu wa oothene. (2 Ako. 6:11-13) Ancipale a hiyo nnakhala mmiloko seiho arimo anna ni arokora a mapuro oohiyanahiyana nave arino omuchu woohiyanahiyana. Nnanwerya olipiha osivela wahu ntakhara oothene yaawo, ntikitheryeyaka mmikhalelo saya saphaama. Vaavaa nnahuseryaahu owoona akina ntoko Yehova onawooneiye, ninnooniherya wi ninnaasivela. Osivela onahaala okhala woochuneya variyari va yoohooxa etokotoko. Vaavaa yoohooxa etokotoko enahaalaaya opacerya, ti woowi nnahaalaahu ophwanyawo okhapelela? Muthokororye mukhalelo Yehova aahusinheiye achu awe weera vaavaa yaaryaaya awuukhuwa nthowa na ohipheliwa ni Apaapulu: “Muloko aka nyu, haweni mwiipithe, mwiiwalele mpa mwanyu! Mukhale mwemmo elukuluku tonto, ophiyerya evinre esara ya Apwiya.” (Yes. 26:20, PMM) Enakhala wi masu yaala annaphariheleya tho wa hiyaano nnahaala ohoolela yoohooxa etokotoko. w23.07 ipaax. 6-7 ipara. 14-16

Musuweliwe ntoko muchu oophimelela. Mwiipakele makoho: ‘Apwanne achu anakoona ntoko muchu oophimelela, oohaakeelela miyaha ni ootumerya? Naari wi achu anakoona ntoko muchu ookhinyererya, awiikusererya naari awiikhoma? Naari wi kinnaawiriyana akina ni weerano soochuna saya vaavaa inakhalaaya soophwanelela?’ Vaavaa nnooniheryaahu ophimelela, nnamutakiherya Yehova ni Yesu. Ophimelela onaphitaanyerya okhala awaakuveya vaavaa mikhalelo sahu sinatorokeyaaya. Matorokelo yaala ananwerya weereya moohiwehereryeya. Nnanwerya wiiceliwa moohiweheryeya. Naari wi makacamiho oohiwehereryeya a ophwanya ikhorowa naari makacamiho a ipoliitika mmapuro nnakhalaahuwo inanwerya waakanyerya okumi ahu moomalela. (Ekl. 9:11) Ophiyerya wi matorokelo a murici mmarehereryo ananwerya oneeha. Hiyaano nnanwerya wiikhoveleliha ni mikhalelo mivyaani wakhala wi ninnachariha ichu xexe inacharela: (1) weemererya wi ichu sootorokeya, (2) otikitheryeya mu omwaahiyu, ohiya mu ichu sivinre, (3) woona ichu soothene saphaama mu okumi anyu, nave (4) opaka ichu ntakhara akina. w23.07 ipaax. 21-22 ipara. 7-8

Mulipa a miririmu Taniyeli aari mmiravo vaavaa aakuxiweiye ni Apapulu wi akhale kapuro o Papulu, elapo yeeyo yaari ocai ni Yerusalemu, weiwo aaphwiiwaleiyewo. Nyenya mwawooneya, Taniyeli aahaatikhiniha ahooleli o Papulu. Awo yoona ichu ‘saari sawooneya,’ wi Taniyeli aari ‘oohirakala ni oophwaneliwa,’ nave wi aarwa mu emusi yoochuneya. (1 Sam. 16:7, PMM) Mwawiihiiha, awo yaahimuvyakiha wi arumeeleke mu empa ya mwene. (Tan. 1:3, 4, 6, PMM) Yehova aanamusivela Taniyeli nthowa na mukhalelo wa okumi mmiravo yoola aathanlileiye okhalano. Mweeparipari, vaavaa Yehova aalonceiye wi Taniyeli aari ntoko Nowa ni Yupu, owo akhweya aarino iyaakha 20 sa oyariwa. Naamwiihiiha, Yehova aanamoona Taniyeli okhala awookololowa ntoko Nowa ni Yupu, yaawo yaamurumenle yoowo moororomeleya mu iyaakha sincipale. (Map. 5:32; 6:9, 10; Yupu 42:16, 17; Esek. 14:14) Nave Yehova aatitelela omusivela Taniyeli mu ekumi awe yoothene yoohakalaliha.—Tan. 10:11, 19. w23.08 epaax. 2 ipara. 1-2

Vaavaa munalakelelaanyu othuma empa nyuwaano mwaahaala osiveliwa waalikhela mwanene mikhalelo soothene sa empa anyu ya omwaahiyu. Hiyaano nnanwerya opaka echu yoolikana vaavaa nnamwaalakhanyaahu ni omuhuserya Piipiliya. Wakhala wi pahiru munamwaalakhanya mwawaakuveya, munahaala ohuserya pahiru mahusiheryo ari mathipelo a mu soorempwa, seiho siri “ichu soopacerya sa masu aweela a Muluku.” (Ahe. 5:12) Ohiya yeeyo, ntoko eneereyaaya ni empa, mvolowe “mpuwa” wi mwaalikhele mikhalelo soothene. Mukhalelo mmoha waphaama wa omuhuserya Piipiliya ori woona mukhalelo makupa makina a michaka sawe iniiwananaaya. Mwiilipixerye wi mwiiwexexe ohiya pahiru iparipari seiho muneemereryaanyu, nyenya tho ntakhara heeni muneemereryaanyu seiho. Wi niiwexexe moomalela Masu a Muluku, nnaphwanela ohuserya iparipari sa Mpiipiliyani sawiixeela. Murummwa Paulo aahaalopola anna ni arokora awe Eekristu wi ehuserye masu a Muluku mwamvai wi ewerye “wiiwexexa mwawaakhwanela tuuvi ori oruku, orekama, weemela ni wiixa” wa eparipari. Mwawiihiiha, awo yaahaala otitelela okhala ‘oothipeleya ni ootikitheryeya’ munroromelo naya. (Aef. 3:14-19) Nnaphwanela weerano emohamoha. w23.10 epaax. 18 ipara. 1-3

Piipiliya onnanivahererya sootakiherya sincipale sa achu yaari oopixa murima. Munoona hai opaka marehereryo a ohuserya ni otholathola vancipale vooloca sa yaawo? Ntoko yootakiherya, Tavite aahitepa okhala mmiravo vaavaa aathanliweiye wi akhale mwene oomwaahiyu o Isarayeli nave owo aanaphwanela owehererya iyaakha sincipale ophiyerya akhanleene mwene. Yootakiherya ekina ti ya Siimiyoni ni Ana. Awo yaamurumeela Yehova moororomeleya vaavaa yaawehereryaaya moopixa murima orwa wa Mesiya. (Luka 2:25, 36-38) Vaavaa munayaanyu ohuserya ichu seiha, mweererye waakhula makoho ala anacharela: “Tiheeni yaamukhavihenrye muchu yoola okhala oopixa murima? Ntakhara heeni okhala oopixa murima waaryaaya waphaama wa muchu yoola? Ti mwawiihai kinahaalaaka omutakiherya?” Nyuwaano tho munanwerya ohuserya ni achu yaale yahoonihenrye opixa murima. (1 Sam. 13:8-14) Vaavaa munahuseryaanyu sootakiherya iha, mwiikohe: ‘Ntakhara heeni muchu ola hoonihenrye opixa murima? Ichu taani soonanara seeren’ye nthowa na yeeyo?’ w23.08 epaax. 25 epara. 15

Murummwa Petru aari oororomeleya, owo heemerenrye wi echu naari muchu amuhiihe omuchara Yesu. Ntoko yootakiherya, ekwaha emoha owo aahooniherya ororomeleya wawe vaavaa oomuchara yaahiiwexenxaaya echu Yesu aalonceiye. (Yoh. 6:68) Nave ancipale yaamuchara Yesu yaahihiya weerano yeeyo nave hiyaachunneru oweherya wi Yesu atharihe yootaphulela aya. Nyenya Petru henreno yeeyo. Owo aari oororomeleya nave aahiloca wi pahiru Yesu aahikhalano “masu a ekumi yoohimala.” Yesu aanasuwela wi Petru ni arummwa akina yaahaala omuhiya. Naamwiihiiha, Yesu aahiloca wa Petru wi aanasuwela wi owo aahaala otitelela okhala oororomeleya. (Luka 22:31, 32) Yesu aanasuwela wi “munepa onnakhwela, nto mwiili ti wooceecheya.” (Mar. 14:38) Wa nthowa nenla, Yesu haamuhin’ye murummwa awe oosiveliwa, naamwi owo aakhoonce wi aahimusuwela yoowo. Nave amanle oviihiwa mookhwani, Yesu aahooneya wa Petru; mwawooneya ari meekheiye. (Mar. 16:7; Luka 24:34; 1 Ako. 15:5) Nave ela yaahimulipiha vancipale Petru, yoowo aari oothananaxa nthowa na yeeyo aapankeiye! w23.09 epaax. 22 ipara. 9-10

Muluku onnalevelela soocheka sa yaale arino nroromelo mwa yoowo. Owo onnalevelela moomalela nave hanuupuwelela soohesa sa muchu yoowo. (Sal. 32:1, 2) Wa yene, muchu yoola tawookololowa nave haano nihoonya wa nthowa na nroromelo nawe. Eparipari wi Aparahamu, Tavite ni alapeli akina oororomeleya a Yehova yaahiichaniwa awookololowa, naamwiihiiha, awo yaahititelela okhala oohiphaameya ni oocheka. Nyenya nthowa na nroromelo yaaryaayano,Yehova aanawoona ntoko hiyaarino nihoonya, xaxaxa aawaalikanyihaka ni yaale yahaamulapela. (Aef. 2:12) Mu ekaarata awe wa Aroma, murummwa Paulo oothariha wi nnaphwanela okhalano nroromelo wakhala wi ninnachuna okhala nthamwene a Muluku. Mwawiihiiha, hiiha ntoko Aparahamu ni Tavite, wakhala wi nookhalano nroromelo mwa Yehova nnanwerya tho okhala asinthamwene awe. w23.12 epaax. 3 ipara. 6-7

Olelo, Akristu oothene aakhalano ekari ya omvaha mukucho Yehova epharihelaka elukuluku ni sookhalano saya wi ekhaviherye soochuna sa Omwene wa Muluku. Nnanwerya wooniherya esisapo ekari ahu ya omulapela Yehova moorweela wa opaka owetha wahu mmuteko awe. Murummwa Paulo onnathariha mikhalelo soohiyanahiyana sa malapelo ahu nihinaphwanelaahu ohiya mukhwipi. (Ahe. 10:22-25) Eyo enaphitaanyerya omwaacamela Yehova mu nivekelo, olaleerya, othukumana ni muloko ni waalipiha akina ‘xaxaxa vaavaa nnoonaahu nihiku na Yehova naacamelaka.’ Makupa ookuchula a liivuru a Wuupulula, munkeelo a Yehova onnaloca ikwaha piili wi acicimiherye, ariki: “Omulapeke Muluku!” (Wup. 19:10; 22:9) Nihirwe ncuwale eparipari ela yawiiseela yoomunepani vooloca sa empa etokweene yoomunepani ya Yehova ni ekari yavameekhaaya nryaahuno ya omulapela Muluku ahu mutokweene! w23.10 epaax. 29 ipara. 17-18

Oothene ahu nnaphwanela ‘otitelela osivelanaka mukina ni mukhwaawe.’ Mwawiihiiha, ti woochuneya wuupuwelelaka masu a Yesu olonceiye wi “osivela wa ancipale onahaala oriirya.” (Mat. 24:12) Yesu haalonce wi oohuserya awe ancipale yaahaala ohiya wooniherya osivela. Nyenya, nnaphwanela otitelela wiiwehererya, wi nihivoloweliwe ni othowa wa osivela wa elapo yeela enirukurenrye. Ni yeela mmuupuweloni, hankooni nthokororye nikoho nla noochuneya: Tiheeni enahaala onikhaviherya woona wakhanle wi osivela wahu wa annihu ti woolipa? Mukhalelo mmoha wa osuwela waakhanle wi osivela wahu ti woolipa ori moorweela wa waalikhela mukhalelo nnaakhulelaahu mikhalelo sammoori sa okumi ahu. (2 Ako. 8:8) Mmoha wa mikhalelo seiha wootharihiwa ni murummwa Petru: “Opwaha ichu soothene, mukhaleno osivela weeparipari wa mukina ni mukhwaawe, woona wi osivela onnakhuneela waaca wa soocheka.” (1 Pet. 4:8) Mwawiihiiha, sooceecheiha ni ohiphaameya wa akina onanwerya wooniherya waakhanle wi osivela wahu wa yaawo ti woolipa. w23.11 ipaax. 10-11 ipara. 12-13

Wakhala wi ninnathanla wooniherya osivela wa anna akina mmulokoni nave nihinooniherya wa akina, hanniiwelela nlamulo na Yesu. Eparipari wi nnanwerya okhala awaacameleya ni achu akina hiihaa ntoko Yesu aareiye ni arummwa akina. (Yoh. 13:23; 20:2) Nyenya murummwa Petru onnanuupuxerya wi niilipixerye wi nikhaleno “osivela wa onna”—osivela ori woolipa ntoko yoowo orivovo variyari va echoko. (1 Pet. 2:17) Petru ohooniherya wi ti woochuneya ‘osivelanaka mukina ni mukhwaawe mweeparipari ni murima woothene.’ (1 Pet. 1:22) Mu yoorepa yeela, osivela “weeparipari” onataphulela wooniherya osivela wa muchu naamwi okhalaka woovila wooniherya osivela wa muchu yoowo. Ntoko yootakiherya, tiheeni mwaahaalaanyu weera waakhanle wi munna naari murokora ohooroxaani naari woonyeenyeihaani mmukhalelo wammoori? Muupuwelo ahu woopacerya akhweya onahaala okhala omukookiherya yoonanara, ohiya omooniherya osivela. Nyenya Petru aahihuserya ni Yesu wi mukhalelo yoowo wa waakhulela honamuhakalaliha Yehova. (Yoh. 18:10, 11) Petru oorepa: “Muhikookiheke yoonanara ni yoonanara naari oruwana ni oruwana. Ohiya yeeyo, mwaareeliheke yaawo.” (1 Pet. 3:9) Wakhala wi mookhalano osivela weeparipari wa anninyu munahaala okhala oreera murima ni oothene. w23.09 ipaax. 28-29 ipara. 9-11

Ninnakhala ootikhiniheya woona wi mu elukuluku vakhaani mwaana onnakhala mutokweene. Nave eyo yeereya, enakhala ntoko wi yeeren’ye mukhataaya ni mwawaakuveya. Nyenya wunnuwa mmukhalelo woomunepani ti woohiyana. (1 Ako. 13:11; Ahe. 6:1) Wi muchu akhaleno onthamwene woolipa ni Yehova, owo onaphwanela wiilipixerya. Ohiya yeeyoru, owo tho onamuchuna nikhaviheryo na munepa waweela wi awerye okhalano mikhalelo saphaama, wunnuwiha mavyakelo ni wiirehererya ntakhara mirici sa omwaahiyu. (Mas. 1:5) Yehova aapatunxe achu wi ekhale mulopwana ni muthiyana. (Map. 1:27) Ti yawooneya wi alopwana ni athiyana toohiyana mwiili nyenya tho awo toohiyana mmikhalelo mikina. Ntoko yootakiherya, Yehova ohaapaka alopwana ni athiyana ni mirici soohiyanahiyana, nave ohaavaha mmoha ti mmoha mavyakelo yaawo anaakhaviherya waakhwaniherya mirici saya.—Map. 2:18. w23.12 epaax. 18 ipara. 1-2

Apwanne Yesu aanachuna wi akina ephariheleke nsina na Atiithi awe? Moohikhwa minikwa. Ahooleli akina a malapelo yeemererya wi oromola nsina na Muluku waari ohikhalano ncicimiho, nyenya Yesu hantonko weemererya wi yookhovelela eyo ehirino mathipelo mu soorempwa emuhiihe ocicimiha nsina na Atiithi awe. Mu ekwaha emoha, Yesu aahimpenuxa mulopwana yoowo aarino masololo aakhala mu elapo ya Xerasene. Achu yaahitepa omoova Yesu nave emveka wi akhumemo mu elapo aya. (Mar. 5:16, 17) Naamwiihiiha, Yesu aachuna wi achu yaale esuwele nsina na Muluku. Mwawiihiiha owo aahimuleela mulopwana yoowo aampenunxeiye wi aaleele achu ohiya yeeyo owo aampakenleiye nyenya yeeyo Yehova aapankeiye wa yene. (Mar. 5:19) Nlelo Yesu onachuna wi—nsina na Atiithi awe nsuweliwe mu elapo yoothene! (Mat. 24:14; 28:20) Vaavaa nnapakaahu makupa ahu mmukhalelo yoola, ninnamweeriha mwene ahu Yesu Kristu okhala oohakalala. w24.02 epaax. 10 epara. 10

Ninnareelihiwa mweeparipari moorweela wa opaka makupa mmarehereryo a Yehova variyari va mahiku yaala ookuchula ni oovila. Ovinyerya vaavaa mikhalelo sa elapo sinaamviraaya sinanaraka, Yehova onnanivahererya emusi yawiiwanana yoomunepani ya anna ni arokora. (Sal. 133:1) Owo onnanikhaviherya okhalano emusi yoohakalalihaxa ni yoolipa. (Aef. 5:33–6:1) Nave owo onnanivaha wiiwexexa ni miruku seiyo nnachunaahu wi nikhaleno murecele weeparipari wa mpuwa. Mwawiihiiha, nnaphwanela olapa mwakuru wi ntitelele omurumeelaka Yehova moororomeleya. Ntakhara heeni? Nthowa nawi ikwaha ikina nnanwerya onyeenyeya nthowa na ohiphaameya wa akina. Nave tho nnanwerya okhalano nikacamiho wa ovilela soohesa sahu, xaxaxa wakhala wi noopaka soocheka imohamoha mu ikwaha sincipale. Nnaphwanela ovilela mmuteko wa Yehova (1) vaavaa nthamwene a munroromelo onannyenyeiheiye, (2) vaavaa oothelana ahu onannyeenyeiheiye, ni (3) vaavaa nnakhalaahu oonyeenyeya wa hiyo mukhatiihu. w24.03 epaax. 14 ipara. 1-2

Wiiliwiili, nyuwaano munahaala wiiwaka saweereya sa anna ni arokora yaawo yaalakelenle opaka sincipale mmuteko aya wa Yehova. Akhweya awo yaahivolowa mu Exikola ya Alaleeryi a Omwene naari othaamela weiwo waariwo othowa otokweene. Waakhanle wi mikhalelo sanyu sinnaweemereryaani, ela yoolakelela yaphaama munaphwanelaanyu okhalano. Achu a Yehova annaavyaavya mikhalelo wi yaacererye muteko aya woolaleerya. (Saw. 16:9) Hanka wakhala wi nyuwaano hiihaano hamunawerya weerano yeeyo? Muhuupuwele wi nyuwaano muri oohiphwanelela. Echu eri yoochuneya, eri wi nyuwaano mutitelele ovilela. (Mat. 10:22) Muhicuwale ovaha esisapo ya omurumeela Yehova mwawiiwanana ni mavyakelo anyu ni mikhalelo sanyu. Ola mukhalelo mmoha woochuneya wi mutitelele omuchara Yesu mmanle opatisiwa.—Sal. 26:1. w24.03 epaax. 10 epara. 11

Tiithi ahu a wirimu ooniroromeliha onikhurumuwela soocheka sahu wakhala wi noocharuwa. (Sal. 86:5) Mwawiihiiha, wakhala wi noocharuwa mweeparipari wa soocheka seiyo nipankaahu, nnanwerya ororomela wi Yehova onaloca eparipari—owo oonikhurumuwela. Muupuwele wi Yehova tahi ookhinyererya naari oowalamela. Owo harwa aniveka yeeyo nihinaweryaahu opaka. Owo onnavaha esisapo wa soothene nnapakaahu ntakhara yoowo, wakhala wi nneerano yeeyo nipakaka owetha wahu. Ohiya yeeyoru, muupuwelele sootakiherya sa Mpiipiliyani sa yaale amurumeenle Yehova ni okumi aya woothene. Mmuupuwele murummwa Paulo. Owo aahiilipixerya mwa mvai mu iyaakha sincipale, eecaka ikilomeetru sincipale nave atikitheryaka miloko. Mwawiihiiha, vaavaa mikhalelo sawe saamukwatelenlaaya opaka makupa mmuteko woolaleerya, apwaanne owo aahiyeleela weemereryiwa ni Muluku? Hooye. Owo aahititelela opaka yeeyo aaweryeiye, nave Yehova aahimureeliha. (Saw. 28:30, 31) Mmukhalelo mmohamoha, yeeyo nnaweryaahu omvaha Yehova, enanwerya okhala yoohiyana ikwaha ikina. Nyenya echu eri yoochuneya wa yoowo ari mathowa ananeeriha weerano yeeyo. w24.03 epaax. 27 ipara. 7, 9

Moorweela wa nivekelo nawe wa Yehova, Yesu ootikitherya yootakiherya wi oohuserya awe echariheke. Mu orummwa awe woothene, owo aanavekela wiiliwiili. Owo aanaavya elukuluku wi avekele woona wi aanatepa oweiwa nave aanarukureryiwa ni achu ancipale. (Mar. 6:31, 45, 46) Owo aanavinya oyaaka nooxa wi awerye okhalano elukuluku meekheiye wi avekele. Mu ekwaha emoha, owo aahivekela mu ohiyu woothene ahaakumve opaka yoolakelela yoochuneya. (Luka 6:12, 13) Nave owo aahivekela mwawuuluulela mu ohiyu ahaakumve okhwa vaavaa aatikithereyeiye mu waakhwaniherya nikupa noovila na murici awe veelaponi. (Mat. 26:39, 42, 44) Yootakiherya ya Yesu ennanihusiha wi moohipwacha mukhalelo nryaahu ooweiwa, nnaphwanela waavyaka elukuluku wi nivekele. Hiihaa ntoko Yesu, nnaphwanela waavyaka elukuluku wi nivekeleke—akhweya ovinya oyaaka nuuxa naari ohiyu. Vaavaa nneeraahuno yeela, ninnamooniherya Yehova wi ninnathamalela yamahala yeela yoochuneya. w23.05 epaax. 3 ipara. 4-5

Mvarerye masu awi “woomiineliwa” mu yoorepa ya olelo. Ereferensiya emoha ennathariha ntoko “murwe wa hiyaano ntoko muhice.” Ola mukhalelo wakuru wi otharihiwe waaca wa osivela wa Yehova ntakhara oothanliwa! Oothanliwa aasuwela wi ‘annasiveliwa ni Muluku.’ (Yuta 1) Murummwa Yohani aahooniherya mukhalelo iisooneiye vaavaa aarempeiye: “Moone osivela yoowo Atiithi ansivenlaayano, ophiyerya weeriwa anamwane a Muluku!” (1 Yoh. 3:1) Apwanne Yehova onaasivela pahiru oothanliwa? Hooye, Yehova onnansivela oothene ahu. Teevi eri yawooniherya etokweene ya osivela wa Yehova? Mukucho wa woopola. Moorweela wa yoowo, Yehova ohooniherya osivela wawaaca opwaha echu ekina! —Yoh. 3:16; Aro. 5:8. w24.01 epaax. 28 ipara. 9-10

Iversikulu seiha sinnaloca mikhalelo mikina saamweerinhe Tavite ovootha woova wawe: Naamwi okumi awe waari va yawoopiha, owo aanuupuwela vooloca sa yeeyo Yehova aahaaleiye opaka ntakhara yene. Tavite aahisuwela wi Yehova aahaala omoopola mu elukuluku yoophwanelela. Opwaha soothene, Yehova aahiloca wi Tavite ahaala okhala mwene oocharela o Isarayeli. (1 Sam. 16:1, 13) Wa Tavite, soothene Yehova aaroromelinheiye saahaakhwanela phaameene. Tiheeni Yehova ororomelinheiye opaka wa nyuwo? Hannaweherya wi owo anikhapelele mmakacamiho ahu oothene. Naamwiihiiha, moohipwacha saweeha taani munahoolelaanyu mu elapo yeela, Yehova onahaala omaliha seiho mu elapo evyaani enoorwa. (Yes. 25:7-9) Mweeparipari, Mpatuxa ahu ookhalano ikuru sawaakhwanela wi aaviihe ookhwa, anipenuxe wa sawiicela ni waatoloxa alipa awaakaaha oothene.—1 Yoh. 4:4. w24.01 epaax. 6 ipara. 12-13

Muupuwele ntakhara heeni nyuwaano mwiiveleenlaanyu ni mpatisiwa. Nyuwaano mwaaheerano yeela nthowa nawi mwaanachuna omuhakalaliha Yehova. Muupuwele yeeyo yoolekencheni wi mwaaphwanya eparipari. Mwaamusuwela Yehova. Nave mwaalakelela omulapa Tiithi anyu a wirimu. Nroromelo nanyu naahunnuwa nave naahiweerihaani ocharuwa. Osivela wanyu ntakhara Yehova waahooceenyeryaani ohiya opaka soonanara nave mpacerya weera ichu seiho sinamusivela Muluku. Mwaahiisoona okhala ootaphuwa vaavaa mwaasuwenlaanyu wi Muluku ohookhurumuwelaani. (Sal. 32:2) Nyuwaano mwapacerya ophwanyeya mmithukumano ni okawana ni akina ichu sootikhiniha seiho mwaahuseryaanyu. Ntoko Mukristu awiivelela ni oopatisiwa vano munneeca mu ephiro ya okumi, muri oolakelela weecaka mummo okhala wookhala. (Mat. 7:13, 14) Nyuwaano mutitelele okhala olipa, mu omurumela Yehova, ni okhala ohichikinyeya mu wiiwelela malamulo awe. w23.07 epaax. 17 epara. 14; epaax. 19 epara. 19

Muupuwelelaka vooloca sa nivekelo nanyu na wiiveleela wa Yehova, nyuwaano munanwerya ophwanya ikuru wi nwerye ovilela mu yaweeha eri yoothene. Ntoko yootakiherya, apwanne mwaampacerya omooseelela mwaara a mwaneene? Mweeparipari hooye! Moopaka nlakano ni Yehova wi himwaahaala weerano echu ntoko yeeyo. Mwawiihiiha, nyuwaano munamoopowa wa makacamiho yaawo mwaahaalaanyu ohoolela ni miyoonelo soohiphwanelela imanle iho otikitheryeya. Munahaala ‘orapela’ “ephiro ya oonanara murima.” (Mas. 4:14, 15) Wuupuwelela yootakiherya ya Yesu enanwerya onikhaviherya, owo aari oolakelela omuhakalaliha Tiithi awe, hiihaa ntoko Yesu, mukhale oolakelela omwiiwelela Muluku yoowo mwiiveleenlaanyu. (Mat. 4:10; Yoh. 8:29) Eparipari ti yawi, saweeha sinnoovahaani ekari yawooniherya wi muri oolakelela “otitelela omuchara” Yesu. Va weerano yeela, munaphwanela ororomela wi Yehova onamookhaviheryaani. w24.03 ipaax. 9-10 ipara. 8-10