Akostu

Moone ipontu piili soochuneya mu yoorepa yeela: (1) Awookololowa annahoolela makacamiho. (2) Yehova onnanaakiha mmakacamiho ahu. Yehova oneerano hai yeela? Mukhalelo mmoha ori moorweela wa onikhaviherya okhalano moonelo woophwanelela vooloca sa okumi ahu mmukhalelo yoola wa ichu. Yehova onnanroromeliha wi nnahaala okhalano okumi woohakalaliha vaavaa nnamurumeelaahu yoowo. Naamwi hiihaa, owo hanaroromeliha wi hinikhalano makacamiho mookumini. (Yes. 66:14) Yehova onnaniceenyerya otikitheryeya mu omwaahiyu, vaavaa nneeraahu nikhaleno okumi owo onachuneiye—okumi woohimala ni woohakalaliha. (2 Ako. 4:16-18) Niweheryaka, Yehova onahaala onikhaviherya wi ntitelele omurumeela yoowo nihiku nnihiku moohipwacha makacamiho. (Wiik. 3:22-24) Tiheeni nnahuseryaahu orweela mu sootakiherya sa alapeli oororomeleya a Yehova akhalai ni a mmahiku ahu? Nnanwerya ohoolela makacamiho oohiwehereryeya. Nyenya vaavaa nnamuroromelaahu Yehova, owo ilukuluku soothene onahaala onikhaviheryaka.—Sal. 55:22. w23.04 ipaax. 14-15 ipara. 3-4

Nnanwerya ohuserya orweela mu yootakiherya ya Yosefe ni Mariya, yaawo yaari ooreheryeya owiiwelela alamuleli, naamwi waakhala woovila wa yaawo weerano eyo. (Luka 2:1-6) Moone yaweeha ya wiiwelela yaahoolenlaaya vaavaa Mariya aarupanleiye. Mwene o Roma Akustu aahitikitherya nlamulo wi achu oothene ekookele mu ipooma saya wi yarepeliwe. Mwawiihiiha, Yosefe ni Mariya yaaphwanela oya o Petelehemu, mukwaha wa ikiloometru opwaha 150 yeecaka mu mphiro waasaren’yemo miyoko ni mikhuruwela. Mukwaha yoole hiwaahaala okhala wookhweya, xaxaxa wa Mariya yoowo aarino erukulu ya miyeeri 9. Hanka waakhanle wi erukulu yaahinyahuwa variyari va mukwaha? Akhweya awo yaatepa wuukhuwa ni okumi wa Mariya ni wa mwaana, yoowo aahaala okhala Mesiya omwaahiyu. Waakhanle wi awo yaanachuna, nla naari nthowa naahaala oweeriha ohiiwelela nlamulo. Yosefe ni Mariya hiyaatikitheren’ye mu wuukhuwa waya. Awo yaahiiwelela nlamulo. Yehova aahireeliha wiiwelela waya. Mariya aahiphiya mookhapeleleya o Petelehemu, voocharela aahimuyara mwaana yoowo aarino okumi waphaama nave aahikhaviherya mu waakhwanela wa yooloherya ya Mpiipiliyani!—Mik. 5:2. w23.10 epaax. 8 epara. 9; epaax. 9 ipara. 11-12

Hanka wakhala wi munnakhala awuukhuwa vooloca sa ovaha maakhulo? Enamukhala yookhaviherya wiirehererya phaama. (Mas. 21:5) Wakhala wi moosuwela phaama yeeyo enahaala othokororyiwa mmithukumano, onahaala okhala wookhweya ovahererya maakhulo. Yooleeliherya ekina ori ovahererya maakhulo ookhuveya. (Mas. 15:23; 17:27) Hamukhala awuukhuwaxa wakhala wi munnavahererya maakhulo ookhuveya. Vaavaa munavahereryaanyu maakhulo ookhuveya mmasu anyu, munnooniherya wi mohiirehererya phaama nave wi mohiiwexexa phaama yeeyo enathokororyiwa. Hanka wakhala wi nyuwaano moheererya opharihela ikina sa sooleeliherya seiha nyenya naamwi hiihaa munnatitelela okhala awuukhuwa vooloca sa ovahererya maakhulo? Muroromele wi Yehova onnavaha esisapo wiilipixerya munapakaanyu wi mpake yeeyo munaweryaanyu. (Luka 21:1-4) Opaka owetha wanyu henataphulela weera ichu opwaha vaavaa munawerelaanyuvo. (Afi. 4:5) Mutikitherye soolakelela seiho munahaalaanyu owerya waakhwaniherya, nave mumveke Yehova murima woomaaleleya. Woopaceryani, yoolakelela munaphwanelaanyu otikitherya ori ovaha maakhulo ookhuveya. w23.04 epaax. 21 ipara. 6-8

Murummwa Paulo oonilikanyiha ni anakhoco yaawo evyakihiwe ni ewanre ntakhara ekhoco. Achu anaweherya wi nakhoco akhale ooreheryeya owaniha mu elukuluku vyakala enakhumelelaaya ekhoco. Ela tho emohamoha wa hiyaano. Ninnatitelela okhala ooreheryeya ntakhara nihiku na Yehova moorweela wa owara yawiisaakihano ya nroromelo ni osivela ni kapasete a ewehereryo. Yawiisaakihano yaanakhapelela murima wa nakhoco. Nroromelo ni osivela sinnakhapelela murima ahu woosiphela. Iho inahaala onikhaviherya otitelela omurumeela Muluku ni omuchara Yesu. Nroromelo ninnanlekecha wi Yehova onahaala onreeliha vaavaa nnamwaavyaahu ni murima ahu woothene. (Ahe. 11:6) Nroromelo nnamuniceenyerya wi ntitelele okhala oororomeleya wa Muhooleli ahu, Yesu, naamwi eyo evolowelaka ovilela makacamiho. Nnanwerya oteka nroromelo vaavaa nnahoolelaahu makacamiho a okumi, nivareryaka sootakiherya sa achu a mmahiku ahu, yaawo yaavilenle moororomeleya moohipwacha wiikariwa naari makacamiho a ikhorowa. Nave nnanwerya osepa muraakho wa wiithukumanyerya naatakiheryaka yaale anakhweiha okumi aya wi ekuhe soochuna sa Omwene mu nipuro noopacerya. w23.06 epaax. 10 ipara. 8-9

Wiihiiha mavyakelo a ovareryela miyoonelo ni saweera sa muchu mukhateiye. Ti woochuneya wi onceenyerye okhwaaniherya soolakelela sahu, xaxaxa wakhala wi yoolakelela eyo ti yoovila naari hinaano nchuno na waakhwaniherya. Muupuwele wi wiihiiha onnapaka makupa a sawiima sa munepa, mwawiihiiha, mumveke Yehova munepa waweela wi wookhaviheryeeni wunnuwiha mukhalelo yoola woochuneya. (Luka 11:13; Aka. 5:22, 23) Muhiweherye mikhalelo soophaameya. Mu elapo yeela, mwawooneya hinrwa nikhalano mikhalelo soophaameya. Wakhala wi ninnawehererya mikhalelo seiho, akhweya hinrwa naakhwaniherya soolakelela sahu. Akhweya nnamuyeleela nchuno nthowa nawi ti woovila waakhwaniherya soolakelela sahu. Waakhanle wi ela enneereya ni nyuwaano, apwanne mwanwerya orehererya ni oraceeliha ni soolakelela ikhaani? Waakhanle wi yoolakelela anyu ori wunnuwiha mukhalelo wammoori woomunepani, munoona hai opacerya wooniherya yoowo vakhaani-vakhaani? Waakhanle wi yoolakelela anyu ori omwaalakhanya Piipiliya anteero, munoona hai opacerya waalakhanya iversikulu savakhaani mu elukuluku yavakhaani? w23.05 epaax. 29 ipara. 11-13

Variyari va mahiku yaala ookuchula, Yehova onnapharihela marehereryo awe wi atitelele ovahererya ohoolela wi anikhaviherye oothene ahu otitelela weeca mu “Mphiro Waweela.” (Yes. 35:8; 48:17; 60:17, PMM) Nnanwerya oloca wi vaavaa muchu oneemereryeiye omuhuserya Piipiliya, onnakhalano ekari ya onyikala mu “Mphiro Waweela.” Akina annapaka mukwaha mukhaani mu mphiro yoowo mu elukuluku vakhaani nave voocharela annakhumamo. Akina ari oolakelela weeca mummo ophiyerya weiwo onaakerihayawo. Vano onaakeriha woowi? Wa yaale arino ewehereryo ya oya wirimu, “Mphiro Waweela” onaakeriha “mparataiso a Muluku” wirimu. (Wup. 2:7) Wa yaale arino ewehereryo ya waakhela elapo yavathi, mphiro yoowo onaakeriha mu ophaameya omakuchuwelo wa Olamulelo wa Iyaakha 1.000. Waakhanle wi munnapaka mukwaha mu mphiro yoola olelo, muhiweheru muculi. Nave muhikhumemo ophiyerya mukwaanxe moomalela mukwaha anyu mu elapo evyaani! w23.05 epaax. 17 epara. 15; epaax. 19 ipara. 16-18

Vaavaa munuupuwelaanyu ichu soothene Yehova opankeiye wa nyuwaano, munahaala wooniherya othamalela nave tho munahaala ochuna oveleela okumi anyu wa yoowo. (Sal. 116:12-14) Piipiliya onnamwiichana Yehova mookwakwaleya ntoko namavaha a “yamahala yoothene yaphaama ni yoovaha yoothene yoophaameya.” (Tiy. 1:17) Etokweene wa soovaha seiya ori mukucho wa mwanawe Yesu. Pahiru muupuwele! Woopola woheeriha okhala wooweryeya wi nyuwaano mukhaleno onthamwene wawaacameleya ni Yehova. Nave owo ohoovahaani ewehereryo ya okhala okhala wookhala. (1 Yoh. 4:9, 10) Wiiveleela wa Yehova ori mukhalelo mmoha wawooniherya othamalela osivela yoowo Yehova oonihenryeiye, ophitaanyerya tho ni mareeliho makina oothene yaawo Yehova oovanheiyeni.—Malam. 16:17; 2 Ako. 5:15. w24.03 epaax. 5 epara. 8

Vaavaa nnoonaahu meecelo aphaama ekukuceyaka mmahiku ahu yaala, ninniisoona ntoko Loti. Owo “aari oothananaxa wa nthowa na meecelo awuuliha muru a achu ootakhala murima,” tiwi owo aanasuwela wi Tiithi ahu awirimu onniica mukhalelo yoola woonanara. (2 Pet. 2:7, 8) Omoova ni omusivela Muluku saahimukhaviherya Loti okhooca meecelo oonanara a achu yaamurukurenrye. Hiyaano tho nrukureryiwe ni achu yaawo ahinacicimiha meecelo aphaama a Yehova. Naamwiihiiha, nnanwerya okhala aweela mmeecelo, wakhala wi nootitelela omusivela Muluku ni ohuserya omoova yoowo mmukhalelo waphaama. Wi neereno yeela, nookhalano nikhaviheryo na Yehova. Owo onnampharihela liivuru a Masiposipo wi aniceenyerye. Akristu oothene, alopwana ni athiyana, amiravo ni awunnuwelavo, ananwerya ohuserya vancipale orweela mu omuhuserya liivuru yoola. Wakhala wi ninnamoova Yehova, ninnasepa weemererya mupuwelo woonanara. w23.06 epaax. 20 ipara. 1-2; epaax. 21 epara. 5

Akhweya nyuwaano moohoolela waakaahiwa wa achu a emusi anyu, naari wi mohiilipixerya wi muhiye ichu ikina soomwiilini ntoko waavya muhakhu wi mukuhe mu nipuro noopacerya Omwene wa Muluku. (Mat. 6:33) Wakhala wi ti hiihaa, muroromele wi Yehova oosuwela soothene moonihenryaanyu mmuteko awe. (Ahe. 6:10) Mwawooneya, nyuwaano moolawiha masu eeparipari a Yesu awi: “Haavo ohin’ye empa awe, naari asinnawe, naari arokorawe, naari amama awe, naari apapa awe, naari anamwane awe, naari imaca sawe, vanthowa naka ni vanthowa na michaka saphaama oni ahaakhele opwaha ikwaha nsana hiihaano, mu elukuluku yeela, ipa, asinnawe, arokorawe, asimamaawe, anamwanaawe, imaca sawe, ni wiikariwa, nave muhoolo, ekumi yoohimala.” (Mar. 10:29, 30) Mareeliho yaawo munaakhelaanyu matokweenexa ni eeparipari opwaha wiilipixerya yoowo mwaapakaanyu.—Sal. 37:4. w24.03 epaax. 9 epara. 5

Vaavaa Akristu o Yuteya yaahoolenlaaya etala etokweene, anna a muloko wo Antiyokeya yaalakelela wi “mmoha ti mmoha mwawiiwanana ni owerya wawe, eveleele nikhaviheryo wa anna yaakhala o Yuteya.” (Saw. 11:27-30) Naamwi anna yaavoloweliwe ni etala ekhalaka ocaiwene, Akristu o Antiyokeya yaari oolakelela waakhaviherya yaawo. (1 Yoh. 3:17, 18) Hiyaano tho nnanwerya wooniherya niphwanya olelo vaavaa nniiwaahu wi annihu akina aavoloweliwa ni ipahu. Nnanwerya waakhulela mwawaakuveya—akhweya naakohaka atokweene a mmuloko waakhanle wi nnanwerya okhaviherya muteko, naari opaka sooveleela ntakhara muteko wa elapo yoothene, naari moorweela wa waavekelela yaawo avoloweliwe woona wi ananwerya ochuna nikhaviheryo wi yaakhwaniherye soothowa saya soochuneya. Vaavaa Mwene ahu, Yesu Kristu, onarweiye wi athorihe, onaphwanela oniphwanya nooniheryaka niphwanya wi aniwope ‘ovolowa mu Omwene.’—Mat. 25:34-40. w23.07 epaax. 4 ipara. 9-10; epaax. 6 epara. 12

Yesu aahitakiherya ophimelela wa Yehova. Owo aarummwale veelaponi wi alaleerye wa “ipucepuche soorimeela sa nloko na Aisarayeli.” Nyenya owo aahooniherya ophimelela vaavaa aakhwaaniheryeiye murici yoola. Mu ekwaha emoha, muthiyana yoowo ahaari Muisarayeli aahimveka wi owo ampenuxe mwanawe amwaamuthiyana yoowo ‘aatepa ohooxiwa ti nsololo.’ Yesu aahooniherya niphwanya nave aahimpenusa mwanawe. (Mat. 15:21-28) Muthokororye yootakiherya ekina. Omapacereryo wa orummwa awe, Yesu aahiloca: “Yoole oni akikhooce . . . , miyo tho kinahaala omukhooca.” (Mat. 10:33) Apwanne owo aahimukhooca Petru, yoowo aamukhoonce ikwaha raru? Hooye. Yesu aanasuwela wi Petru aacharuwa wa yeeyo aapankeiye nave wi aari muchu oororomeleya. Amanle ooviihiwa mookhwani, Yesu aahooneya wa Petru nave mwawooneya owo aahimuroromeliha wi aahimukhurumuwela nave aanamusivela. (Luka 24:33, 34) Yehova Muluku ni Yesu Kristu awo toophimelela. Hanka vooloca sa hiyo? Yehova anaweherya wi nikhale oophimelela. w23.07 epaax. 21 ipara. 6-7

Tiheeni nnaphwanelaahu oloca wa akina wi naaroromelihe wi ela enahaala weereya? Yoopacerya, Yehova tonapaka yoororomeliha eyo. Liivuru a Wupulula onnathariha: “Yoole aakiranthe vamunyukhuni aahi: ‘Nkoona! Kinnapaka ichu soothene ivyaani.’” Owo ookhalano miruku, owerya ni nchuno wi aakhwaniherye yoororomeliha awe. Yanawiili, Yehova oosuwela wi yeeyo onaloceiye mweeparipari enahaala weereya. Ni mathowa aphaama ooloca: “Masu yaala toororomeleya ni eeparipari. . . . Ala aheereya!” Yaneeraru, hiyaavo enahaala omuhiiha Yehova okhwaaniherya yeeyo opacenryeiye, ti nthowa nene owo olonceiye: “Miyaano ka Alfa ni Omeka.” (Wup. 21:6) Yehova onahaala wooniherya wi Satana mulipa awootha nave hawerya ohiiha waakhwanela wa yookhwela Awe. Mwawihiiha vaavaa muchu onaloceiye: “Apwanne chiryene eyo enahaala weereya?” mmwaalakhanyerye ni omutharihela Wupulula 21:5, 6. Muloce mukhalelo Yehova onooniheryeiye wi onahaala waakhwaniherya yoororomeliha awe.—Yes. 65:16. w23.11 epaax. 7 ipara. 18-19

Yehova aapanke yoororomeliha yeela wa Aparahamu vaavaa owo areiyeno iyaakha 75. Apwanne Aparahamu aahoona yeela yaakhwanelaka? Mmakupa aya aayi. Emanle olapuwa muhice Eufrati ewehenrye iyaakha 25, Aparahamu aahoona oyariwa wa mwanawe Isaki. Ela yaari yootikhiniha etokweene nave iyaakha 60 ohoolo waya, owo aahoona oyariwa wa asulwaawe, Esawu ni Yakopo. (Ahe. 6:15) Nyenya Aparahamu hantonko woona muyareriwo awe okhalaka mutokweene nave waakhelaka elapo yoororomelihiwa. Naamwiihiiha, mulopwana yoola oororomeleya ilukuluku soothene aakhalano onthamwene woolipaxa ni Mpatuxa awe. (Tiy. 2:23) Vaavaa Aparahamu onahaaleiye oviihiwa mookhwani, owo onahaala ohakalala voosuwela wi, wanthowa na nroromelo nawe ni opixa murima, maloko oothene a veelaponi yaahireelihiwa! (Map. 22:18) Tiheeni nnahuseryaahu? Akhweya hinoona soororomeliha soothene sa Yehova saakhwanelaka phaama hiihaano. Nyenya wakhala wi noopixa murima, hiihaa ntoko Aparahamu, nnanwerya olekecheya wi Yehova onamunireeliha hiihaano ni mu elapo evyaani ororomelinheiye.—Mar. 10:29,30. w23.08 epaax. 24 epara. 14

Vaavaa Mwene Usiya aareiye mmiravo, owo aari awiiyeviha. Owo aahihuserya “omoova Muluku” eeparipari. Usiya aakhwile arino iyaakha 68, nave mmakupa a okumi awe aahireelihiwa ni Yehova. (2 Math. 26:1-4) Usiya aahitoloxa maloko mancipale a amwiicani nave aahimweeriha Yerusalemu okhala nipuro nookhapeleleya. (2 Math. 26:6-15) Moohikhwa minikwa, Usiya aahitepa ohakalala ni ichu aapankeiye nnikhaviheryo na Yehova. (Ekl. 3:12, 13) Mwene Usiya aahikhovelela waaleela akina yeeyo awo yaaphwanelaaya opaka. Apwanne ela yaahimweeriha wuupuwela wi aaphwanela weera soothene aachuneiye? Nihiku nimoha, Usiya aahivolowa mu empa ya Muluku nave aaheererya opaha mukucho va altare, echu yeeyo mamwene yahaaphwanelaaya weera. (2 Math. 26:16-18) Mulipa a Mukucho Mutokotoko Asariya aaheererya omookolola, nyenya Usiya aahitepa onyeenyeya. Moothananiha, Usiya haatitelenle okhala oororomeleya wa Yehova nave aahilakiwa ni mareca. (2 Math. 26:19-21) Ichu saahala okhala soohiyana waakhanle wi Usiya aatitelela okhala awiiyeviha! w23.09 epaax. 10 ipara. 9-10

Naamwi aari Mukristu oothanliwa, murummwa Petru aaphwanela owaniha ni sooceecheiha sawe. Mu eyaakha ya 36 E.K., Muluku aahimurumiha Petru wa Korneliyu, yoowo ahaari Muyuta. Voocharela Korneliyu aahithanliwa ni munepa waweela, nave yaahikhala yookwakwaleya wi “Muluku haano nthalu” nave wi amalapo, naari wi, yaale yahaari Ayuta yaanwerya tho opaka makupa a muloko Weekristu. (Saw. 10:34, 44, 45) Emanle yeela, Petru aahipacerya olya ni achu yahaari Ayuta, echu yeeyo owo aahintonkweiye opaka khalai. Nyenya, Akristu akina yaari Ayuta nlelo yoona wi Ayuta ni yaawo yahaari Ayuta hiyaaphwanela olyaaka vamoha. Nave vaavaa Akristu akina yuupuwela hiihaa yaakelaaya o Antiyokeya, Petru aahihiya olya ni anna yaawo yahaari Ayuta, woonaru nthowa nawi aanoova waanyeenyeiha Akristu yaari Ayuta. Murummwa Paulo aahoona wi Petru aari nawiisootherye nave aahimookolola ohoolo wa achu oothene. (Aka. 2:13, 14) Naamwi aapanke yoohesa yeela, Petru haahinʼye otitelela orehererya mukhalelo awe. w23.09 epaax. 22 epara. 8

Woonaru mohoona wi munnaphwanela orehererya mukhalelo wammoori mu okumi anyu, muheemererye wi eyo yooceecheiheeni. “Apwiya taphaama,” nave awo anahaala wookhaviheryaani opaka matorokelo oochuneya. (1 Pet. 2:3) Murummwa Petru ooniroromeliha: “Muluku . . . onarwa aakhwaniherya ovyakihiwa wanyu. Owo onarwa ootikitheryaani, owo onarwa oolipihaani.” Woopaceryani, Petru oona wi haaphwanela okhala ni Yesu. (Luka 5:8) Nyenya nnikhaviheryo noosivela na Yehova ni Yesu, Petru aahivilela ni otitelela okhala oohuserya a Yesu. Yookhumelela ene yaari wi Yehova aaheemererya wi Petru avolowe “mu Omwene woohimala wa Apwiya ahu ni Mvuluxa Yesu Kristu.” (2 Pet. 1:11) Ala yaari mareeliho matokweene! Wakhala wi hiihaa ntoko Petru, nyuwaano hamunavelavela nave munneemererya ovyakiha wa Yehova, munahaala tho waakhela mareeliho a okumi woohimala. Mmukhalelo yoola, munahaala waakhwaniherya “yoolakelela ya nroromelo nanyu, ori ovuluxiwa wanyu.”—1 Pet. 1:9. w23.09 epaax. 31 ipara. 16-17

Musakala wakhalai waahikhalano n’yate—nenlo naari vanlakani vene nrukureryiwe ni ekintaale, nave naari nipuro nenlo alipa a mukucho yaapharaayavo miteko saya. Altare mutokotoko a muchove aakhala van’yateni, vamoha ni epasiya ya muchove yaarimo maahi yeeyo alipa a mukucho yaapharihelaaya wi yiiseelihe ehaakumve ophara muteko waweela. (Muk. 30:17-20; 40:6-8) Olelo, Akristu oothanliwa oohalela annarumeela moororomeleya mu n’yate nri makupa ampuwa a empa ya Muluku yoomunepani veelaponi. Ophwanyiwa wa epasiya etokotoko ya maahi ennawuupuxerya awo, hiiha ntoko Akristu oothene, wi etitelele okhala aweela mmeecelo ni omunepani. Vano ti woowi “muloko mutokweene” onavahaayawo malapelo aya? Murummwa Yohani aahoona muloko “weemenle vamiithoni wa munyukhu” yeeyo eneemelela n’yate na makupa a vaate veelaponi, nave mu nipuro nenlo awo “annamulapela [Muluku] muteko waweela othana ni ohiyu.” (Wup. 7:9, 13-15) Ekari etokweene opaka makupa a marehereryo a Yehova mmalapelo aweela! w23.10 epaax. 28 ipara. 15-16

Mukhalelo mmoha wa Yehova onivaha owerya ori moorweela wa atokweene a mmulokoni. (Yes. 32:1, 2) Mwawiihiiha, vaavaa munakhalaanyu awuukhuwa, mwaaleele atokweene a mmulokoni sawuukhula sanyu. Muheererye okhooca nikhaviheryo na atokweene vaavaa anavahaaya. Aapharihelaka atokweene, Yehova onanwerya woolipihaani. Ewehereryo enathipeleya Mpiipiliyani ya ekumi yoohimala moohipwacha waari mparataiso veelaponi yavathi naari mu Omwene wa wirimu, enanwerya tho onsareiya ikuru. (Aro. 4:3, 18, 19) Ewehereryo ahu ennanikhaviherya ovilele ni makacamiho, olaleerya michaka saphaama ni waakhwaniherya murici vyakala nryaahuno mmulokoni. (1 Ate. 1:3) Yaari ewehereryo emohamoha yeela yaamulipinhe murummwa Paulo. Owo ‘aahikacamiheya, aahihaleeliheya, aahiikariwa’ nave aaniisoona wi ‘aahuuwihiwa.’ Nave mu ikwaha sincipale, aahala vakhaani okhwa. (2 Ako. 4:8-10) Paulo aahikhalano ikuru aachuneiye wi avilele nthowa nawi aahitikitheryeya mu ewehereryo awe. (2 Ako. 4:16-18) Paulo aatikitheryeya mu omwaahiyu. Ewehereryo awe ya ekumi yoohimala wirimu yaari ‘etokweene yoopwahaxa,’ opwaha saweeha aakumaneiyeno. Paulo aanuupuwelela ewehereryo yeela, nave ntoko yookhumelela, owo aanoona okhala ‘ooreheryeya nihiku ti nihiku.’ w23.10 ipaax. 15-16 ipara. 14-17

Vaavaa munavekelaanyu, moone yaari elukuluku yoophwanelela wi Yehova oovaheeni yeeyo munavekaanyu. Akhweya ninnoona wi ninnachuna naakhulo nawaakuveya wa yooveka ahu. Nyenya mweeparipari, Yehova oosuwela elukuluku yoophwanelela wi anikhaviherye. (Ahe. 4:16) Vaavaa sooveka sahu sihinaakhuliwaaya mwawaakuveya, nnanwerya wuupuwela wi naakhulo na Yehova ti nawi ‘Hooye.’ Nyenya naakhulo nnanwerya okhala ‘Nlelo hooye.’ Ntoko yootakiherya, mmiravo aavekela wi apenuwe wa ereca awe. Nyenya nlelo haapenunwe wa ereca awe. Waakhanle wi Yehova mootikhiniha ampenuxa, Satana aahaala oloca wi munna ole pahiru aatitelenle omurumeela Yehova nthowa nawi aahipenuxiwa. (Yupu 1:9-11; 2:4) Mwawaaceererya, Yehova ooniroromeliha wi oothene anahaala openuxiwa wa ireca saya omwaahiyu. (Yes. 33:24; Wup. 21:3, 4) Ophiyerya elukuluku yeeyo, hannaphwanela oweherya openuxiwa mootikhiniha. Mwawiihiiha, munna ole aanwerya omveka Yehova wi amvahe ikuru ni murecele wampuwa wi ovilela naamwi iiceliwaka ni otitelela omurumeela Muluku moororomeleya. w23.11 epaax. 24 epara. 13

Sansawu aahipaka yoohesa etokweene, nyenya owo haahin’ye otitelela omurumeela Yehova. Owo aahaavya ekari wi apake yookhwela ya Yehova, naari wi, owana ni Afilisti. (Amut. 16:28-30, PMM) Sansawu aavekela wa Yehova ariki: “Mukilipihe miyo wi kinle ikuhu khuluwi ni aFilisti.” Yehova aahaakhula nivekelo na Sansawu, nave wanaawiili, aahimvaha ikuru moopwaha mphimo mmukhalelo wootikhiniha. Ni yeela, Sansawu aawerya owiipha Afilisti ancipale mu elukuluku yeele opwaha yaawo aawiiphaleiye mu okumi awe woothene. Eparipari wi Sansawu aahoolela mikhalelo soovila wa nthowa na soohesa sawe, nto owo haahin’ye weererya opaka yookhwela ya Yehova. Emohamoha enameereya tho ni hiyaano. Wakhala wi noopaka yoocheka nave nlakiwa naari n’yeleela mirici sahu, hannaphwanela ohiya omurumeela Yehova. Muupuwele ela: Yehova harwa anihiya. (Sal. 103:8, 9) Naamwi nihesaka, nnanwerya otitelela ophariheliwa ni Yehova, hiihaa ntoko Sansawu. w23.09 epaax. 6 ipara. 15-16

Ela enataphulela wi vaavaa munavilelaanyu munneemereryiwa ni Yehova. Eyo henataphulela wi vaavaa munahoolelaanyu soohooxa naari makacamiho makina Yehova onnahakalala ni yeeyo. Yehova onaweemereryaani nyuwaano, ohiya makacamiho. Ovilela wanyu tonaruuha mukhalelo wa weemereryiwa. Ala mareeliho ootikhiniha! (Sal. 5:12) Muupuwele wi Aparahamu aahivilela moohipwacha saweeha nave Yehova aahihakalala vancipale nthowa na yeeyo. Yehova aahimoona ntoko nthamwene nave aahimweera awookololowa. (Map. 15:6; Aro. 4:13, 22) Emohamoha enanwerya weereya ni hiyaano. Weemereryiwa yoowo nnaakhelaahu wa Yehova honarweela wa ichu seiho nnaweryaahu opaka mmuteko wa Yehova, naari mano mmirici sahu. Yehova onaneemererya nthowa nawi ninnavilela moororomeleya. Nave moohipwacha iyaakha sahu, mikhalelo sahu naari mavyakelo, oothene ahu nnanwerya ovilela. Apwanne mu elukuluku yeela munnavilela nikacamiho vyakala? Waakhanle wi aai, muupuwele wi munnamweeriha Yehova okhala oohakalala. Vaavaa nnasuwelaahu wi nookhalano weemereryiwa ni Yehova, ewehereryo yeeyo nryaahuno wi owo onahaala waakhwaniherya soothene ororomelinheiye ennakhala yoolipa. w23.12 epaax. 11 ipara. 13-14

Mukristu onaphwanela osuwela ochekula phaama ni akina. Mulopwana onasuwela ochekula phaama onnawiriyana moomaaleleya nave onnawerya wiiwexexa muupuwelo ni miyoonelo sa akina. (Mas. 20:5) Owo tho onanwerya wiiwexexa ovuwa wa nsu naya, mukhalelo wa ethoi ni malocelo aya. Nyuwaano hamuwerya ohuserya soothene iha wakhala wi hamunamaliha elukuluku ni akina. Wakhala wi munachekula ni achu mpharihelaka ikhankoonya, ntoko murumihelanaka emaili naari michaka, eyo enahaala ovukula mavyakelo anyu a ochekula ni akina moonanaka. Mwawiihiiha, mwaavyeke ikari sa ochekula ni achu akina moonanaka. (2 Yoh. 12) Munna awiichwelavo onaphwanela osuwela wiikhapelela mukhateiye ni achu a veechokoni vawe. (1 Tim. 5:8) Ti waphaama ohuserya ichu seiyo sinahaala wookhaviheryaani ophwanya muteko. (Saw. 18:2, 3; 20:34; Aef. 4:28) Mwaavye okhalano mukhalelo wa muchu onalapa moowetha nave ohinahiyererya yeeyo opacenryeiye. Wakhala wi moheerano yeeyo, onanwerya okhala wookhweyaxa owerya ni otitelela okhala va muteko. w23.12 epaax. 27 ipara. 12-13

Vaavaa Piipiliya onaloceiye sa “nihiku na Yehova,” onaloca sa elukuluku yeeyo Yehova onahaaleiye waathoriha amwiicani awe ni waavuluxa achu awe. Khalai, Yehova aahilaka maloko makina. (Yes. 13:1, 6; Ese. 13:5; Sof. 1:8) Mmahiku ahu, “nihiku na Yehova” nnahaala opacerya ni ohiphela wa Papulu Mutokotoko, nave nnahaala okuchula ni ekhoco ya Armaketo. Wi nivuluxiwe mu “nihiku” nenlo, hiyaano nnaphwanela wiirehererya hiihaano. Yesu oohusiha wi nnaphwanela ohiya pahiru wiirehererya ntakhara, “yoohooxa etokotoko” nyenya tho otitelela okhala ‘ooreheryeya’ ntakhara eyo. (Mat. 24:21; Luka 12:40) Mu ekaarata awe yoopacerya yooveereliwa wa Atesalonika, murummwa Paulo aahipharihela maphwanaphwaniho mancipale wi aakhaviherye Akristu otitelela okhala oorehereya ntakhara nihiku ntokweene na othoriha wa Yehova. Paulo aasuwela wi nihiku na Yehova hinaahaala ophiya mu elukuluku yeele. (2 Ate. 2:1-3) Naamwiihiiha, aahaalopola annawe okhala awiirehererya ntakhara nihiku nenlo ntoko wi naahaala ophiya mu nihiku noocharela, nave hiyaano tho nnanwerya opharihela ekano awe. w23.06 epaax. 8 ipara. 1-2

Mu eyaakha ya 1978, epereetiyu yoorakamaxa yaahitekiwa o Tokiyu, Xapau. Achu yaavarerya yaanakoha mukhalelo yaahaalaaya okophola nthowa na amwaacikinye yeereya wiiliwiili mu epooma yeele. Wi epereetiyu yeele ekophole, tiheeni alipa ooteka yaapankaaya? Alipa ooteka yaahipaka marehereryo ntakhara epereetiyu yeele wi ekhale yoolipa, yoophwanelela wi evilele ni amwaacikinye. Akristu ari ntoko epereetiyu yeele. Mmukhalelo taani? Mukristu onaphwanela okhala oophimelela variyari va othipeleya ni ophwanelela. Owo onaphwanela okhala oolipa ni oohicikinyeya vaavaa onavolowelaaya waakiha meecelo ni malamulo a Yehova. Owo ori ‘oorehereya wiiwelela’ nave haneemererya wi echu vyakala emuhiihe. Mmakupa makina, owo onaphwanela okhala ‘ooleva,’ naari awaakuveya vaavaa mikhalelo ineemereryaaya naari onakhalaaya woochuneya. (Tiy. 3:17) Mukristu yoowo ohusenrye okhalano moonelo woophimelela onahaala osepa okhala muchu ookacamiha naari ootumerya. w23.07 epaax. 14 ipara. 1-2

Yesu aaphwanela ovootha saweeha sa Satana, ophitaanyerya ohiphela wawooneya wa ororomeleya wawe wa Muluku. (Mat. 4:1-11) Satana aari oolakelela omweeriha Yesu ocheka wi ahikhale oophwanelela oliva woopola. Variyari va muteko awe veelaponi, Yesu aahivilela saweeha ikina. Amwiicani awe yaanamwiikara ophiyerya wi yaaneererya omwiipha. (Luka 4:28, 29; 13:31) Owo aaphwanela ovilela ni soohesa sa oomuchara awe. (Mar. 9:33, 34) Vaavaa aathorihiweiye, owo aahihooxiwa ni onyemuliwa. Voocharela, aahiiphiwa mmukhalelo wawiicelaxa ni wawuuliha muru. (Ahe. 12:1-3) Owo aanaphwanela ovilela meekheiye makupa awe ookuchula a saweeha, ohirivo okhapelela wa Yehova. (Mat. 27:46) Mweeparipari, Yesu oohooxeya vancipale wi avahererye woopola. Apwanne hannoona osivela wawiixeela wa Yesu vaavaa nnuupuwelaahu mukhalelo olemveiye okumi awe ntoko mukucho wa woopola ntakhara hiyaano? w24.01 ipaax. 10-11 ipara. 7-9

Opixa murima onnanikhaviherya okhalano onthamwene waphaama ni akina. Owo onnanikhaviherya okhala oomaaleleya vaavaa akina analocaaya. (Tiy. 1:19) Ohiya yeela, opixa murima onanwerya onikhaviherya okhalano murecele ni akina. Wakhala wi na achu oopixa murima, naamwi vaavaa nnakhalaahu oonyeenyeya hinnahaala opaka echu yoopacerya enarwa mmuupuweloni mwahu ni oloca echu yeeyo yaahaala omphoreiha muchu mukina. Nave tho hinnahaala waakhulela moowali vaavaa muchu mukina onaneereleiye yoonanara, ohiya weererya wunla ikuhu, nnaphwanela ‘otitelela ovilelana mukina ni mukhwaawe ni olevelelana mukina ni mukhwaawe’. (Ako. 3:12, 13) Opixa murima tho onahaala onikhaviherya vaavaa nnachunaahu opaka soolakelela. Ohiya opaka echu vyakala enanirweela mmuupuweloni, nnaphwanela okumiha elukuluku wi noone mikhalelo nryaahuno, neerano hiihaa nnanwerya opaka soolakelela saphaama. Ntoko yootakiherya, wakhala wi ninnaavya muteko, nnahaala weemererya muteko onahaala okhumelela woopaceryani. Nyenya, wakhala wi naachu oopixa murima, nnanwerya weemela ni wuupuwela ti mwawiihai muteko onahaalaaya ovolowela emusi ahu ni onthamwene ahu ni Yehova. Nyenya wakhala wi naachu oopixa murima, nnawerya opaka soolakelela saphaama. w23.08 epaax. 22 ipara. 8-9

Wakhala wi munniisoona okhala ooceecheya nthowa na mathitimanelo anyu a yoocheka, wuupuwelela soororomeliha mpankaanyu ntakhara Yehova vaavaa mwiiveleenlaanyu wa yene, enahaala olipiha yoolakelela anyu ya otitelela ovilela saweeha. Mwawiihai? Vaavaa muniiveleelaanyu wa Yehova, nyuwaano munniikhooca mukhatiinyu. Eyo enataphulela wi nyuwaano munnathanla okhooca soochunachuna ni soolakelela sanyu seiho saahaala omuhiciha Yehova. (Mat. 16:24) Mwawiihiiha, vaavaa munahoolelaanyu yaweeha, himuchuna omaliha elukuluku yincipale muupuwelelaka echu yaweera. Muni mweereke mulakelenle woosiilo ene yeeyo munahaalaanyu weera—wi mutitelele okhala oororomeleya. Nyuwaano munamutitelela okhala oolipa ni yoolakelela ya omuhakalaliha Yehova. Mmukhalelo yoowo, munamukhala ntoko Yupu. Naamwi aahoolenle saweeha soovilaxa, owo aaheemererya sookhumelela sene: “Nkirwa kihiya ororomeleya waka!”—Yupu 27:5. w24.03 epaax. 9 ipara. 6-7

Yehova, “Muluku a osivela” ori ni hiyo! (2 Ako. 13:11) Owo onnakhala awuukhuwa ni mmoha ti mmoha a hiyo. Ninnalekecheya wi ‘nri ooriciwa mu osivela wawe woororomeleya.’ (Sal. 32:10, PMM) Vaavaa nnuupuwelaahu vooloca sa mukhalelo owo onooniheryeiye osivela wawe ntakhara hiyo, ninniisoona awaacameleya wa yoowo. Nnanwerya omwaacamela owo mootaphuwa ni oloca mukhalelo nnachunaahu osivela wawe. Nnanwerya omuleela sawuukhula sahu soothene nroromelaka wi owo onnaniiwexexa nave ori oorehereya wi anikhaviherye. (Sal. 145:19) Hiihaa ntoko mooro onanikhaviheryaaya mu nihiku nooriirya, osivela tho wa Yehova onnanikhaviherya. Naamwi osivela wa Yehova ori wooweryaxa, owo tho ti wawiikhalelaru. Mwawiihiiha, munnaakheliwa mu osivela woohimala wa Yehova. Nave voocharela nnaphwanela waakhulela osivela wawe nlocaka: “Kinnaasivela Apwiya” Yehova!—Sal. 116:1, PMM. w24.01 epaax. 31 ipara. 19-20

Yesu aahipaka sincipale ohiya pahiru waaleela achu wi nsina na Muluku ti Yehova. Ayuta yaawo Yesu aalaleeryeiye, yaahisuwela nsina na Muluku, nave Yesu taapaceryinhe ‘owuupululela Yaawo.’ (Yoh. 1:17, 18) Ntoko yootakiherya Soorempwa sa Ehepiri, sinnaloca wi Yehova ta ikharari ni aniphwanya. (Muk. 34:5-7) Yesu oohiya yeeyo mookwakwaleya mu niphwanaphwaniho na mwaana oomwaryeya. Vaavaa nnaalakhanyaahu vooloca sa tiithi yoowo onamoona mwanawe ari ocai, achimakaka wi amphwanye ni omukhupaarela, amulevelelaka moomalela, hiyaano ninnakhalano moonelo wookwakwaleya vooloca sa ikharari ni niphwanya na Yehova. (Luka 15:11-32) Yesu oonooniherya mukhalelo weeparipari wa Atiithi awe. w24.02 epaax. 10 ipara. 8-9

Yehova onnaalipiha ni waahakararya yaale ari awiiniwa murima. Nni niwerye hai omutakiherya Yehova mu okhalano niphwanya ni waahakararya akina? Mukhalelo mmoha wa weerano yeeyo ori moorweela wa winnuwiha mikhalelo mmurimani mwahu seiho iniiwanana ni ovaha nihakararyo. Tiivi iri ikina sa mikhalelo seiho? Tiheeni enahaala onikhaviherya otitelela okhalano osivela yoowo nnachunaahu wi ‘ntitelele ohakararyana mukina ni mukhwaawe’ nihiku ti nihiku? (1 Ate. 4:18) Nnaphwanela wunnuwiha mikhalelo ntoko okhupanyeryana, osivela wa onna ni oreera murima. (Ako. 3:12; 1 Pet. 3:8) Ti mwawiihai mikhalelo seiya inahaalaaya onikhaviherya? Vaavaa nnakhalaahuno niphwanya wa annihu nave nnuukhuwaxa ni yaawo, nnamukhalano nchuno ntokweene na waahakararya vaavaa awo anahooxeyaaya. Hiiha ntoko Yesu olonceiye, “eyano enaloca ichu seiho isaren’ye mmurimani. Muchu aphaama, onnakumiha ichu saphaama.” (Mat. 12:34, 35) Waahakararya anna ni arokora ahu, mweeparipari mukhalelo mmoha woochuneya wa wooniherya osivela wa yaawo. w23.11 epaax. 10 ipara. 10-11

Ti woochuneya oveka nikhaviheryo wakhala wi ninnachuna wiiwexexa sooloherya sa Mpiipiliyani. Muupuwele niphwanaphwaniho nla: Mwaanyiherye wi munaxekurya nipuro nenlo muhintonkwaanyu ophiyawo, nyenya muri ni nthamwene yoowo osuwenle phaama nipuro nenlo. Owo oosuwela phaameene nipuro muryaanyuvo ni weiwo mphiro ori woothene onayaayawo. Moohikhwa minikwa, nthamwene yoowo onamookhaviheryaani vancipale. Mmukhalelo woolikana, Yehova ori ntoko nthamwene yoowo. Yehova oosuwela phaameene makupa taani a sooloherya nryaahuvo ni yeeyo enahaala weereya omwaahiyu. Mwawiihiiha, wakhala wi ninnachuna wiiwexexa sooloherya sa Mpiipiliya, nnaphwanela okhala awiiyeviha ni oveka nikhaviheryo na Yehova. (Tan. 2:28; 2 Pet. 1:19, 20) Hiihaa ntoko asitiithi anachunaaya wi anamwene aya ekhale phaama, Yehova onachuna wi anamwane awe ekhaleno omwaahiyu woohakalaliha. (Yer. 29:11) Nyenya, moohiyana ni asitiithi oomwiilini, Yehova oosuwela yeeyo enahaala weereya omwaahiyu, nave owo hanahesa. Ti nthowa nene Yehova ohin’yeiye sooloherya Mpiipiliyani. Mwawiihiiha, nnanwerya osuwela woosiilo wi ichu soochuneyaxa inahaala weereya.—Yes. 46:10. w23.08 epaax. 8 ipara. 3-4