Mutakiherye Olipa Murima ni Miruku sa Yesu

“Nari muhimonne munnamusivela; yowo nari muhimvaryaka hihano, munaroromelanyu.”​—1 PET. 1:8.

MWAHAALA WAAKHULA HAI?

Tiheeni enahaala wookhaviheryaani wiikhapelela mu ephiro ya ovuluwa?

Munii mmutakiherye hai Yesu mu wooniherya olipa murima?

Munii mmutakiherye hai Yesu mu wooniherya miruku?

1, 2. (a) Nnii niwerye ovuluxiwa mwawiihai? (b) Tiheeni enahaala onikhaviherya wiikhapelela mu ephiro ya ovuluxiwa?

VAAVAA naakhanlaahu oomuchara a Kiristu, naavolowa mmukwaha. Mukwaha yoowo onahaala onikeriha wookumi wa veelaponi yavathi naari wa wirimu. Yesu aaloca: “Yowo ólipiha wolipiha ophiyerya omakutchuwelo [wa okumi awe naari wa mukhalelo ola wa ichu], yowo anarwa-avuluwa.” (Mat. 24:13) Aai, wakhala wi nohiikhalelaru oororomeleya nnahaala ovuluxiwa. Nyenya variyari va mukwaha, nnaphwanela wiikasopa wi nihikhale awuukhuwa naari orimeela. (1 Yoh. 2:15-17) Nnii niwerye hai wiikhapelela mmukwaha ahu?

² Yootakiherya ahu, Yesu, ohooniherya ephiro ene. Mukhalelo wa okumi awe woorempwa Mpiipiliyani. Moorweela wa ohuserya miyaha seiyo, ninnamusuwela phaama Yesu. Ninnaphiyerya omusivela ni omuroromela. (Mwaalakhanye 1 Petro 1:8, 9.) Muupuwele wi murummwa Petro aaloca wi Yesu oonihiyerya yootakiherya wi nichareke inaani sawe vakhivirukhiviru. (1 Pet. 2:21) Wakhala wi ninnachara inaani sawe, nnahaala ophwanya “yoolakelela” ya nroromelo nahu​—ovuluxiwa.a Mmiyaha ivirale, noothokororya mikhalelo sa ochara yootakiherya ya Yesu ya wooniherya wiiyeviha ni oleva. Hankooni vano nthokororye mukhalelo nnahaalaahu ochara inaani sawe mu wooniherya olipa murima ni miruku.

YESU TOOLIPA MURIMA

3. Olipa murima tiheeni, nave nnaphwanya mwawiihai?

³ Olipa murima ori ororomela yoowo onanilipiha ni onanikhaviherya. Okhala oolipa murima onalociwa ntoko “ovilela makacamiho,” “wiikhalelaru mu yeeyo eri yaphaama,” ni “ohoolela makacamiho ni nroromelo.” Olipa murima oneeca vamoha ni woova, ewehereryo ni osivela. Mwawiihai? Omoova Muluku onnanivaha olipa murima wi nivoothe omoova muchu. (1 Sam. 11:7; Masi. 29:25) Ewehereryo yeeparipari ennanikhaviherya woona opwaha sookacamiha samutano ni ovootha omwaahiyu moolipa murima. (Sal. 27:14) Osivela onnaneeriha wooniherya olipa murima naamwi ephitaanyeryaka woopopiha okumi. (Yoh. 15:13) Ninnaphwanya oolipa murima moorweela wa omuroromela Muluku ni ochara inaani sa Mwanawe.​—Sal. 28:7.

4. Yesu oonihenrye olipa murima mwawiihai “véri va ahusiha” mu empa ya Muluku? (Moone eruku yoopacerya.)

⁴ Arino iyaakha 12 sa oyariwa, Yesu aahiikhalelaru wa yeeyo yaari yaphaama. Moone yeeyo yeeren’ye vaavaa owo aareiye “mumpa ya Muluku, arikimkilathi véri va ahusiha.” (Mwaalakhanye Luka 2:41-47.) Ahusiha yaale hiyaasuwenle pahiru Nlamulo na Moose nyenya tho yaasuwela sookhovelela sa achu seiyo saananariha nlamulo nlo. Nyenya Yesu haari oomaala; owo ‘ahakoha’tho makohano.’ Chiryene tahi wi aapaka makoho eenamwane. Nnanwerya omwaanyiherya Yesu apakaka makoho ootikhiniha yaawo yaaweerinhe ahusiha ale okiraathi ni othokororya. Nyenya waakhanle wi ahusiha ale yaaheererya omukacamiha Yesu moorweela wa ompakela makoho oowalamela, awo yaahaala opwata. Ti nthowa nene alipa oowiriyana oothene​—ophitaanyerya ahusiha​—yaaraaya ‘otikhina ni osuwelasha wawe, ni wakhula wawe’​—waakhula waavuwiha eparipari ya Masu a Muluku!

5. Mmikhalelo taani Yesu oonihenryeiye olipa murima variyari va orummwa wawe?

⁵ Variyari va orummwa wawe, Yesu aahooniherya olipa murima mmikhalelo soohiyanahiyana. Moolipa murima aahaalokoha ahooleli a malapelo wi yaanaahuweliha achu ni mahusiheryo atheru. (Mat. 23:13-36) Owo aatitelela okhooca ovoloweliwa ni elapo. (Yoh. 16:33) Aatitelela olaleerya moohipwacha okhinyererya wa amwiicani. (Yoh. 5:15-18; 7:14) Ikwaha piili, moolipa murima aaheeliha empa ya Muluku awiikarakamo yaale yaaphotowela malapelo mwemmo.​—Mat. 21:12, 13; Yoh. 2:14-17.

6. Yesu oonihenrye hai olipa murima mu nihiku nookuchula na okumi awe veelaponi yavathi?

⁶ Mweelukuluku ya makacamiho, otakiherya olipa murima wa Yesu onnalipiha nroromelo. Muthokororye olipa murima oonihenryeiye mu nihiku nookuchula na okumi awe veelaponi yavathi. Aanasuwela marehereryo a yoole aya omutumiha. Naamwi hiiha, va Paskha, Yesu aaloca wa Yuuta: “Yeyo onéra, akuviha wera.” (Yoh. 13:21-27) Mu emaca ya Cetsemane, moolipa murima Yesu aahiisooneiha wa anakhoco yaawo yaaruule omphara. Naamwi okumi awe waari va yawoopiha, owo aahiisooneiha wi awaakihe oohuserya awe. (Yoh. 18:1-8) Vaavaa aakohiweiye o Sineetrio, moolipa murima aaheemererya wi owo aari Kiristu Mwaana a Muluku, naamwi asuwelaka wi namukucho ole aavya nthowa wi iiphiwe. (Mar. 14:60-65) Yesu aakhapelela ororomeleya wawe ophiyerya okhwa va mwiri woohooxa. Mu omumula wawe wawiicela ni wookuchula, owo aakhuwela: “Sookutchuwa!”​—Yoh. 19:28-30.

MUTAKIHERYE OLIPA MURIMA WA YESU

7. Amiravo nyu, munoona hai vooloca sa weerela onamoona nsina na Yehova, nave munii mooniherye hai olipa murima?

⁷ Nnii nimutakiherye hai Yesu mu wooniherya olipa murima? Oxikola. Amiravo nyu, vaavaa muniisooneihaanyu ntoko Namoona a Yehova munnooniherya olipa murima, naamwi ekumiheryaka oruwaniwa ni anaxikola naari akina! Mmukhalelo yoowo munnooniherya wi munnacicimiha weerela onamoona nsina na Yehova. (Mwaalakhanye Salmo 86:12.) Akhweya munnakhinyereryiwa weemererya othatuwa ntoko echu yeeparipari. Nyenya mookhalano mathowa oophwanelela a ororomela nihusiheryo na Piipiliya na opatuxiwa. Mpharihele eproxura A Origem da Vida​—Cinco Perguntas Que Merecem Resposta wi mvahe naakhulo noolekecha wa yaale anachuna osuwela “nthowa na oweheryerya wiwo ori mwa nyuwo.” (1 Pet. 3:15) Mwamala munahaala ophwanya ohakalala onarweela wa osuwela wi moovuwiha eparipari ya Masu a Muluku.

8. Mathowa taani nryaahuno wi nlaleerye moolipa murima?

⁸ Mu orummwa wahu. Ntoko Akiristu eeparipari, ti woochuneya oloca “monyesererya mwa Apwiya [Yehova].” (Saw. 14:3) Mathowa taani nryaahuno wi nlaleerye moolipa murima? Hiyaano noosuwela wi yeeyo nnalaleeryaahu ti yeeparipari ntakhara wi enarweela Mpiipiliyani. (Yoh. 17:17) Ninneemererya wi “nalipa-muteko akhwawe a Muluku” nave wi nookhalano nikhaviheryo na munepa waweela. (1 Akor. 3:9; Saw. 4:31) Ninniiwexexa wi moorweela wa ovaha onamoona mwamvai, ninnooniherya omurumeela wahu Yehova ni omusivela mwaacamani ahu. (Mat. 22:37-39) Nakhala oolipa murima, hanikhala oomaala. Moohiyana, nnakhala oolakelela wuupulula sawootha sa malapelo seiyo inuumiha miitho aachu ntakhara eparipari. (2 Akor. 4:4) Nave nnahaala otitelela olaleerya michaka yaphaama moohipwacha ovaanya, oruwaniwa naari wiikariwa.​—1 Ates. 2:1, 2.

9. Nnii nooniherye hai olipa murima mmakacamiho?

⁹ Mmakacamiho. Omuroromela Muluku onnanivaha nroromelo ni olipa murima wi nivilele sawuukhula. Vaavaa oosiveliwa ahu onakhweiye, hiyaano ninnathanana, nyenya hannayeleela ewehereryo. Ni nroromelo ninnamwaavya “Muluku a ohakaryarya wothene” wi anilipihe. (2 Akor. 1:3, 4; 1 Ates. 4:13) Vaavaa nniiceliwaahu, hiyaano ninnasooseya, nyenya hannakookela muculi. Ninnakhooca oloola woothene ohiniiwanana ni malakiheryo a Piipiliya. (Saw. 15:28, 29) Vaavaa nnakhalaahu awuukhuwa, ‘murimáhu onanwerya oniványa,’ nyenya nthowa na omuroromela wahu Muluku yoowo “ori vakhiviru va yawo a murima wophweya,” hiyaano hannakhulumuwa.b​—1 Yoh. 3:19, 20; Sal. 34:18.

YESU TAMIRUKU

10. Miruku tiheeni, nave mulapeli a Yehova a miruku onaloca nave oneera ichu mwawiihai?

¹⁰ Miruku ori muupuwelo waphaama​—owerya ohiyaniha yaphaama ni yoonanara ni othanla meecelo a miruku. (Ahe. 5:14) Miruku inatharihiwa ntoko “owerya wuupuwelela phaama mmiyaha soomunepani.” Mulapeli a miruku onnaloca nave onneerano ichu mmikhalelo inamuhakalaliha Muluku. Muchu yoowo onnathanla masu anaakhaviherya akina ohiya waaphoreiha. (Masi. 11:12, 13) ‘Tòpisa murima.’ (Masi. 14:29, BNM) Owo “onasya ephiro yaphama,” uumelelaka meecelo aphaama mu ephiro awe ya okumi. (Masi. 15:21) Nnii niwerye hai okhalano miruku? Nnaphwanela ohuserya Masu a Muluku ni opharihela yeeyo nnahuseryaahu. (Masi. 2:1-5, 10, 11) Xaxaxa ti ya mphurelo othokororya yootakiherya ya Yesu, muchu a miruku aakhanlevo.

11. Yesu oonihenrye hai miruku mmalocelo awe?

¹¹ Yesu aahooniherya miruku mu soothene aaloceiye ni eereiye. Mmalocelo awe. Owo aapharihela miruku vaavaa aalaleeryeiye michaka yaphaama, athanlaka “masu a ikharari” yaawo yaahakalaliha oowiriyana awe. (Luka 4:22; Mat. 7:28) Wiiliwiili aanapharihela Masu a Muluku​—aalakhanyaka naari aromolaka soorepa wi avuwihe mwaha awe. (Mat. 4:4, 7, 10; 12:1-5; Luka 4:16-21) Yesu tho aanathariha Soorempwa, eerakano yeeyo mmukhalelo waatannya mirima sa alipa oowiriyana awe. Amanle oviihiwa mookhwani, vaavaa aaloceiye ni oohuserya apiili mu ephiro ya Emau, yene ‘ahathoriherya m’sorepiwa sothe sene sa Yowo mekhiye.’ Ohoolo waya oohuserya awo yaaloca: “Murima’hu hewári woviha mpuwa mwahu manki . . . án’thorihenryiye sorepiwa?”​—Luka 24:27, 32.

12, 13. Sootakiherya taani inooniherya wi Yesu aari oopisa murima ni oophimelela?

¹² Mmukhalelo awe. Miruku saamukhaviherya Yesu ovareryela mukhalelo awe emweerihaka okhala “òpisa murima.” (Masip. 16:32, BNM) Aari “awiyeviha m’murima.” (Mat. 11:29) Ikwaha soothene aari oopisa murima ni oohuserya awe moohipwacha soohesa saya. (Mar. 14:34-38; Luka 22:24-27) Aahiikhalelaru oomaaleleya eereliwaka yoohikhala ekhaikhai.​—1 Pet. 2:23.

¹³ Miruku tho saamukhaviherya Yesu okhala oophimelela. Owo aanoona ohoolo opwaha masu a Nlamulo na Moose; aakhapelela munepa wa Nlamulo nave aanakhala mwawiiwanana ni nenlo. Ntoko yootakiherya, muthokororye yaweereya mu Marko 5:25-34. (Mwaalakhanye.) Muthiyana aakhuma nikhami aahaavya ovira variyari va muloko waachu, aaphara yoowara ya Yesu, nave aapenuwa. Mwawiiwanana ni Nlamulo owo aari ooriipiheya, mwawiihiiha haaphwanela omphara muchu. (Onam. 15:25-27) Nyenya Yesu​—yoowo aasuwenle wi “solimela sa malamulo” saaphitaanyerya “omorela ikharari ni nroromelo”​—haamusamenle muthiyana ole nthowa na ophara yoowara awe. (Mat. 23:23) Ohiya yeeyo, mweepewe owo aaloca: “Mwana mwamuthiana we, nroromelo ná nihovulusha weyo. Rowa mmurecheleni, okhale ópenuwa yawukhulá.” Echu yootannya murima woona wi miruku sa Yesu saamweeriha wooniherya epewe!

14. Tiheeni Yesu aathanlileiye weera, nave ikhapelenle mu ephiro yeeyo mwawiihai?

¹⁴ Mukhalelo wa okumi awe. Yesu aahooniherya miruku mu othanla mukhalelo wa okumi ni wuumelela yoowo. Owo aahiiveleela mu olaleerya michaka yaphaama, apakaka okhala muteko awe. (Luka 4:43) Yesu tho aahiikhalelaru mu ephiro yeeyo, apakaka soolakelela seiyo samweerinhe wiikhapelela mmuteko ophiyerya omakuchuwelo. Aalakelela okhalano okumi yookhweya wi awerye ovaha elukuluku ni ikuru sawe mu olaleerya. (Luka 9:58) Owo aasuwela ochuneya waya waavyakiha akina yaawo yaahaala oyano vahoolo muteko owo amanle okhwa. (Luka 10:1-12; Yoh. 14:12) Aahaaroromeliha oomuchara awe wi aahaala okhaviheryaka muteko yoola “ophiyerya okutchuwa wa elukuluku ya vathi vano.”​—Mat. 28:19, 20.

MUTAKIHERYE MIRUKU SA YESU

15. Nnii nooniherye hai miruku mmalocelo ahu?

¹⁵ Muthokororye mukhalelo mukina nnaweryaahu omutakiherya Yesu. Mmalocelo ahu. Mu ochekula wahu ni akhwiihu a nroromelo, ninnapharihela masu yaawo anateka ohiya anamwarya. (Aef. 4:29) Vaavaa nnalocaahu ni akina sa Omwene wa Muluku, ninnareeriha masu ahu ni “mwapa.” (Akol. 4:6) Ninniilipixerya osuwela soothowa ni soochuna sa anamakhala nave ninnathanla masu ahu mwawiiwanana ni seiyo. Ninnasuwela wi masu a ikharari annawerya ohula mikhora​—sa mirima. Mwawaacererya, vaavaa nnatharihaahu soororomela sahu, ninnampharihela Piipiliya. Mwawiihiiha, ninnampharihela ntoko olamulelo nave ninnamwaalakhanya wakhala wooweryeya. Ninnasuwela wi muchaka wa Piipiliya ti wakuruxa opwaha echu vyakala nnaweryaahu oloca mukhatiihu.​—Ahe. 4:12.

16, 17. (a) Nnii nooniherye hai okhala oohaakuvela onanariwa ni oophimelela? (b) Nnii niikhapelele hai mu orummwa wahu?

¹⁶ Mmukhalelo ahu. Miruku sinnanikhaviherya ovareryela mukhalelo ahu eneerihaka okhala “óhákuva onanariwa.” (Yak. 1:19) Vaavaa akina ananiphucaaya, ninnaavyaavya osuwela yeeyo eri oculi wa masu ni saweera saya. Miruku seiyo inahala okukuca esara ni onikhaviherya “olevelela sotxhekeliwa.” (Masi. 19:11, BNM) Miruku tho sinnanikhaviherya okhala oophimelela. Mwawiihiiha, ninnakhala oophimelela wa yeeyo nnaweheryaahu wa akhwiihu a nroromelo, nuupuwelaka wi annakumana ni makacamiho akhweya nihiniwexexaahu phaama. Ninnawiriyana moonelo aya nave ninnachariha wakhala woophwanelela.​—Afil. 4:5.

¹⁷ Mmukhalelo wa okumi ahu. Ntoko oomuchara Yesu, ninnasuwela wi hinaano ekari etokweenexa opwaha ophara muteko wa olaleerya michaka yaphaama. Ninnuumelela mukhalelo yoowo moorweela wa opaka soolakelela inanikhaviherya wiikhapelela mu orummwa wahu. Ninnalakelela okuha ichu soomunepani va nipuro noopacerya ni okhalano okumi wookhweya wi niwerye wiiveleela mmuteko woochuneyaxa makuchuwelo ehaakumve ophiya.​—Mat. 6:33; 24:14.

18. Nnii niikhaleleru hai mu ephiro ahu ya ovuluxiwa, nave tiivi eri yoolakelela anyu?

¹⁸ Apwanne tahi yoohakalaliha othokororya mikhalelo saphaama sa Yesu? Mwaanyiherye mphurelo nnahaalaahu ophwanya wakhala wi noohuserya mikhalelo sawe mikina ni osuwela mukhalelo nnahaalaahu okhala oolikana ni yoowo. Mwa yeeyo, hankooni nikhale oolakelela ochara inaani sawe vakhiviru khiviru. Neerakano yeeyo, nnahaala wiikhalelaru mu ephiro ahu ya ovuluxiwa nave nnahaala waataana ni Yehova, Yoowo Yesu aamutakihenryeiye moophaameya.

[Masu a vathi]