Mmuhusihe Mwaninyu Omurumeela Yehova
“Kinnovekani wi mutxhu a Muluku . . . anlèle etxhu yawera ni mwana ola onahawela oyariwa.”—AMUTHORIHA 13:8.
MACIPO: 88, 120
MUNII MMUKHAVIHERYE HAI MWANINYU OCHARA YOOTAKIHERYA YA YESU YA . . .
osivela?
wiiyeviha?
miruku?
1. Tiheeni Manuwe eenreiye vaavaa aaleeliweiye wi aahaala omuyara mwaana?
MANUWE ni mwaariye yaanasuwela wi hiyaahaala omuyara mwaana. Nihiku nimoha, munkeelo a Yehova aamuleela mwaara a Manuwe wi aahaala omuyara mwaana a mwaamulopwana. Eyo yaari yootikhiniha! Vaavaa aamulenleiye iyawe, owo aatepa ohakalala. Nave tho aahuupuwelela mwawiiseela vooloca sa yeeyo Yehova aaweheryeiye wa yene ntoko tiithi. Yaahaala owerya hai omuhusiha mwanaya omusivela Yehova ni omurumeela yoowo eniiha achu ancipale mu Isarayeli yeera ichu soonanara? Manuwe aamveka Yehova wi amurumihe munkeelo awe wanaawiili ariki: “Pwiya, kinnovekani wi mutxhu a Muluku mmuruminhanyu arwe Wili-wili ni anlèle etxhu yawera ni mwana ola onahawela oyariwa.”—Amuthoriha 13:1-8.
2. Tiheeni munaphwanelaanyu omuhusiha mwaninyu, nave munii mweereno hai? (Moone ekaaxa “Oohuserya Anyu a Piipiliya Oochuneyaxa.”)
2 Waakhanle wi nyuwaano mwa tiithi, munniiwexexa phaama moonelo wa Manuwe. Nyuwaano tho mookhalano murici wa omuhusiha mwaninyu omusuwela ni omusivela Yehova. (Masiposipo 1:8) Mmalapelo a echoko, munaphwanela otitelela omuhusiha sa Yehova ni Piipiliya. Munaphwanela weera sincipale ohiya pahiru omuhuserya Piipiliya ni mwaninyu isumana soothene. (Mwaalakhanye Malamulo 6:6-9.) Echu taani ekina enahaala wookhaviheryaani omuhusiha omusivela ni omurumeela Yehova? Mmwaha yoola, nnahaala othokororya yootakiherya ya Yesu. Naamwi Yesu ahaari tiithi, munanwerya ohuserya orweela wa mukhalelo aahusinheiye ni waavyakiha oohuserya awe. Yesu aanaasivela nave aari awiiyeviha. Nave tho aakhalano miruku, ela ti wi, owo aaniiwexexa moonelo aya nave aanasuwela mukhalelo wa waakhaviherya. Hankooni vano nthokororye mukhalelo wa omutakiherya Yesu.
MMUSIVELE MWANINYU
3. Arummwa a Yesu yaasuwela hai wi owo aanaasivela?
3 Wiiliwiili Yesu aanaaleela oohuserya awe wi aanaasivela. (Mwaalakhanye Yohani 15:9.) Owo aanamaliha elukuluku ni yaawo. (Marko 6:31, 32; Yohani 2:2; 21:12, 13) Tahi wi Yesu pahiru aari muhusiha aya; owo tho aari nthamwene aya. Mwawiihiiha hiyaarino minikwa wi Yesu aanaasivela. Tiheeni munahuseryaanyu orweela wa Yesu?
4. Munii mooniherye hai wi munnaasivela anamwane anyu? (Moone eruku yoopacerya.)
4 Mmuleele mwaninyu wi munnamusivela, nave mooniherye wi owo toochuneya wa nyuwaano. (Masiposipo 4:3; Tito 2:4) Samuwele yoowo onakhala o Australiya, ooloca: “Kaaryaaka mwaana, Apapa yaanakihusiha mahiku oothene empharihelaka Liivuru Aka a Miyaha sa Piipiliya. Awo yaanaakhula makoho aka oothene, yaanakikhupaarela, nave yaanakilaanya nayaaka okona. Ohoolo waya, kaatikhina vaavaa kaasuwenlaaka wi Apapa aka hiyaaphuiwale mu emusi yeeyo yaarino yookhovelela ya okhupaarela! Naamwi hiiha, awo yaahiilipixerya wooniherya okisivela waya. Ntoko yookhumelela, kaahaataana ni yaawo nave kaaniisoona okhala ookhapeleleya.” Mwaakhaviherye anamwane anyu wiisoona mmukhalelo yoola moorweela wa oloca, “kinnoosivelaani.” Mwaakhupaareleke. Mmaliheke elukuluku muchekulaka, mulyaaka nave muthataka ni yaawo.
5, 6. (a) Tiheeni Yesu enreiye nthowa na waasivela oomuchara awe? (b) Mmukhalelo taani munaphwanelaanyu waalaka anamwane anyu?
5 Yesu aaloca: “Yale kinàkhwelaka, kinnàsamela ni kinnàlaka.”a (Moone masu a vathi.) (Wupulula 3:19) Ntoko yootakiherya, ikwaha sincipale oohuserya awe yaanaakhulana vooloca sa taani aari mutokweene. Yesu aathokororya mwaha yoowo nave moopixa murima aanaalopola ikwaha sincipale. Nyenya owo aari eepewe, nave aanaweherya elukuluku nnipuro noophwanelela wi awookolole.—Marko 9:33-37.
6 Nthowa na waasivela anamwane anyu, moosuwela wi munaphwanela owookolola. Vakina vaya pahiru waatharihela mathowa aneeriha wi echu ekhale yaphaama naari yoonanara ennaakhaviherya. Nyenya hanka wakhala wi nlelo haniiwelela? (Masiposipo 22:15) Muhuserye orweela wa Yesu. Moopixa murima, mutitelele waahusiha orweela wa waahoolela, waavyakiha ni owookolola. Muthanle elukuluku nnipuro noophwanelela wi mwaahusihe, nave mweereno yeeyo mweepewe. Murokora mmoha a Afrika Oohico awiichaniwa Elaine onnuupuwela mukhalelo asitiithi awe yaamookololaaya. Awo yaanathariha echu yaaweheryaaya wa yoowo. Wakhala wi aaloca wi yaahaala omulaka nthowa na ohiiwelela, ti yeeyo yeeraaya. Nyenya owo onnaloca: “Hiyitonko okilaka ni esara naari ehilonce mathowa ene.” Nthowa na yeeyo, owo aanoona wi asitiithi awe yaanamusivela.
KHALANI AWIIYEVIHA
7, 8. (a) Tiheeni oohuserya a Yesu yaahusenryaaya orweela wa mavekelo awe? (b) Tiheeni anamwane anyu anahaalaaya ohuserya orweela wa mavekelo anyu?
7 Ehalaka vakhaani wi Yesu aphariwe ni wiiphiwa, owo aavekela wa Tiithi awe: “Abbà, Tithi, hiyavo ohinaweryawe, vihanvo ekahi ela wa miyano! Nto ohereye okhwela waka, nto okhwela wà.”b (Moone masu a vathi.) (Marko 14:36) Muupuwele mukhalelo oohuserya a Yesu yenraaya vaavaa yaawiriyannaaya naari ohuserya nivekelo nawe. Yaahoona wi naamwi aari oophaameya, owo aaveka nikhaviheryo wa Tiithi awe. Mwawiihiiha, yaahuserya wi awo tho anaphwanela okhala awiiyeviha ni omuroromela Yehova.
8 Anamwane anyu anahaala ohuserya echu orweela wa mavekelo anyu. Mweeparipari, nyuwaano hamunavekela pahiru wi mwaahusihe anamwane anyu. Nyenya vaavaa anawiriyanaaya mavekelo anyu, anahaala ohuserya omuroromela Yehova. Mmavekelo anyu mumveke Yehova wi aakhaviherye anamwane anyu, nyenya tho mveke wi ookhaviheryeeni. Ana, yoowo onakhala o Prasili onnaloca: “Vaavaa yaaphacuwaaya makacamiho ntoko wiiceliwa wa amunna, asitiithi aka yaanamveka Yehova wi aakhaviherye ovilela ni okhalano miruku wi epake soolakelela saphaama. Mu ilukuluku soovilaxa, awo yaanaperekha makacamiho mmatani mwa Yehova. Ntoko yookhumelela, kaahuserya omuroromela Yehova.” Vaavaa anamwane anyu aniiwaaya mumvekaka Yehova wi oovaheeni olipa murima wi mulaleerye wa mwaacamani naari wi mutokweene anyu a muteko aweemereryeeni oya o muthukumano wa muceche, awo annoona wi munnaroromela nikhaviheryo na Yehova, nave ananhuserya weerano emohamoha.
9. (a) Yesu aahusinhe hai oohuserya awe okhala awiiyeviha ni oohikhala nrima? (b) Wakhala wi muri awiiyeviha ni oohikhala nrima, tiheeni anamwane anyu anahaalaaya ohuserya?
9 Yesu aahaaleela oohuserya awe wi ekhale awiiyeviha ni oohikhala nrima, nave tho owo aavaha yootakiherya yaphaama. (Mwaalakhanye Luka 22:27.) Oohuserya awe yaahoona wi owo aanawetha omurumeela Yehova ni waakhaviherya akina, nave yaahuserya weerano emohamoha. Nyuwaano tho munanwerya waahusiha anamwane anyu moorweela wa yootakiherya anyu. Debbie, yoowo orino anamwane apiili onnaloca: “Nkinakhalano nrima nthowa na elukuluku iyaka onamaliheiye ni akina ntoko mutokweene. Koosuwela wi mweelukuluku emusi ahu enachunaaya nikhaviheryo na iyaka, owo onahaala okhaviherya.” (1 Timóteo 3:4, 5) Yootakiherya ya Debbie ni iyawe Pranas, yaavolowenle hai emusi aya? Pranas onnaloca wi anamwane aya yaanasiveliwa okhaviherya mmithukumano sa ekulucu. Yaanahakalala, yaakhalano asinthamwene aphaama, nave yaanasiveliwa okhala ni anna ni arokora aya. Vano oothene a veemusini annamurumeela Yehova mmuteko wa elukuluku yoothene. Wakhala wi muri awiiyeviha ni oohikhalano nrima, nyuwaano munaahusiha anamwane anyu wi esiveliweke waakhaviherya akina.
MUKHALE A MIRUKU
10. Yesu aapharihenle hai miruku vaavaa achu o Kalileya yaaruulaaya emwaavyaka?
10 Yesu aakhalano miruku soophaameya. Yesu hoona pahiru yeeyo achu yeeraaya, aanoona tho mathowa yaaweeriha weerano yeeyo. Owo aanawerya waalakhanya mirima saya. Ntoko yootakiherya, mweelukuluku ekina achu a Kalileya yaarwa emwaavyaka. (Yohani 6:22-24) Owo aahoona wi nthowa ntokweene naaweerinhe ophiya, hiwaari wi enwiriyane ahusihaka, nyenya yaachuna olya. (Yohani 2:25) Yesu aasuwela muupuwelo aya weeparipari. Moopixa murima owo aawookolola atharihaka matorokelo yaaphwanelaaya opaka.—Mwaalakhanye Yohane 6:25-27.
11. (a) Munii mwiiwexexe hai moonelo wa anamwane anyu vooloca sa olaleerya? (b) Munii mwaakhaviherye hai wi esiveliweke olaleerya?
11 Naamwi muhiweraka waalakhanya mirima, munanwerya okhalano miruku. Ntoko yootakiherya, mweererye wiiwexexa ti mwawiihai anamwane anyu anoonaaya vooloca sa olaleerya. Mwiikohe: ‘Apwanne anamwane aka annasiveliwa ni olaleerya naari akhweya anasiveliwa ni elukuluku ya wiichuuwa wi elye naari ewurye echu?’ Wakhala wi mohoona wi anamwane anyu hanasiveliwa ni olaleerya, mwaakhaviherye wi esiveliwekeno. Mwaavahe miteko mikhaani anaweryaaya ophara wi yiisoone okhala a mphurelo.
12. (a) Yesu aaloponle oohuserya awe ntakhara eheeni? (b) Ntakhara heeni olopola iwo waari woochuneya?
12 Mukhalelo taani mukina Yesu aapharihenleiye miruku? Aanasuwela wi yoocheka emoha yaahaala okeriha mu yoocheka ekina, nave aahaalopola oohuserya awe vooloca sa yeela. Ntoko yootakiherya, oohuserya yaanasuwela wi okonihana woohiphwanelela yaari yoocheka. Nyenya Yesu aahaalopola sa yeeyo yaahaala okeriha mu yoocheka yeela. Owo aaloca: “Mutxhu ole onan’weha muthiyana amukhwelaka, òraruwano mmurimani mwawe. Nitho nà nolopwana notxhekihaka, wosolà ni rihelà worakamawo.” (Mateu 5:27-29) Oohuserya a Yesu yaakhala variyari va achu ootakhala a Roma yaawo yaasiveliwa ni mathatelo yaawo yooniherya okonihana woohiphwanela ni malocelo oonanara. Mwawiihiiha, Yesu moosivela aahaalopola oohuserya awe wi esepe echu yaahaala waahiiha opaka yeeyo eri yaphaama.
13, 14. Munii mwaakhaviherye hai anamwane anyu osepa mathatelo oonanara?
13 Ntoko tiithi, mpharihele miruku wi nwaakihe anamwane anyu wi ehipake echu enahaala omuthananiha Yehova. Moohiciha, olelo anamwane ari mu yawoopiha ya woona epwitikiri ni miyaha mikina soohiphwanelela. Munaphwanela waaleela anamwane anyu wi oweha miyaha soohiphwanela ti yoonanara. Nyenya yookhalavo echu ekina yaweera wi nwaakihe anamwane anyu. Mwiikohe: ‘Apwanne anamwane aka aasuwela ntakhara heeni woona epwitikiri ti yawoopiha? Tiheeni yaahaala oweeriha ochuna woona iruku seiyo? Khwino kinneeriha wi ekhale ootaphuwa oloca ni miyaano sa mwaha vyakala, wi ekiveke nikhaviheryo wakhala wi aheehiwa woona epwitikiri?’ Naamwi anamwane eri akhaani, muloce: “Wakhala wi wohoona echu mu interneti enaweeriha okhalano nchuno na opaka sa mwiikho, kinnooveka wi okileele. Ohoovelele naari ohuuliwe muru okiveka nikhaviheryo. Miyaano kinnachuna wookhaviherya.”
14 Vaavaa munathanlaanyu mathatelo, muupuwele tho wi munaphwanela ovaha yootakiherya yaphaama wa anamwane anyu. Pranas, yoowo oromoliwe woopaceryani, ooloca: “Munanwerya oloca ichu sincipale, nyenya mwaninyu onahaala woona yeeyo muneeraanyu nave onahaala wootakiheryaani.” Wakhala wi munnathanla phaama macipo, aliivuru ni ixilema, munahaala omukhaviherya mwaninyu weera emohamoha.—Aroma 2:21-24.
YEHOVA ONAMOOKHAVIHERYAANI
15, 16. (a) Ntakhara heeni munaphwanela ororomela wi Yehova onahaala wookhaviheryaani waahusiha anamwane anyu? (b) Tiheeni nnayaahu othokororya mmwaha onacharela?
15 Tiheeni yeeren’ye vaavaa Manuwe aamvenkeiye Yehova wi amukhaviherye okhala tiithi aphaama? “Muluku àhiwa nivekelo na [Manuwe].” (Amuthoriha 13:9) Nyu asitiithi, Yehova onahaala owiriyana tho mavekelo anyu. Owo onamookhaviheryaani waahusiha anamwane anyu. Onamookhaviheryaani wooniherya osivela wanyu, okhala awiiyeviha ni okhalano miruku.
16 Woona wi Yehova onahaala wookhaviheryaani waahusiha anamwane anyu eri akhaani, owo tho onahaala wookhaviheryaani waavyakiha vaavaa eneeraaya ekhale amiravo. Mmwaha onacharela nnahaala woona ti mwawiihai yootakiherya ya Yesu ya osivela, wiiyeviha ni miruku enahaalaaya wookhaviheryaani omuvyakiha mmiravo wi amurumeele Yehova.
[Masu a vathi]
a Piipiliya onnahusiha wi osamela onataphulela ohoolela, ovyakiha, wookolola ni olaka wakhala woochuneya. Asitiithi anaphwanela olaka mweepewe ohiya eri oonyeenyeya.
b Mmahiku a Yesu, mwaana aanamwiichana tiithi awe ni nsu Abba. Nsu nenla nooniherya osivela ni ncicimiho.—The International Standard Bible Encyclopedia.
[Eruku va epaaxina 10]
Mpharihele ekootiku ela wi mphwanye yoohoolel
[Eruku va epaaxina 10]
Oohuserya Anyu a Piipiliya Oochuneyaxa
VAAVAA nnahuseryaahu ni achu, wiiliwiili ninnampharihela liivuru Piipiliya Onahusiha Eheeni Chiryene? wi naakhaviherye omusuwela Yehova ni osuwela iparipari sa Mpiipiliyani. Ninnamuhuserya liivuru ‘Mwikhapelele mu Osivela wa Muluku’ wi naakhaviherye wunnuwiha omusivela waya Yehova ni malakiheryo awe.
Anamwane anyu oohuserya anyu a Piipiliya oochuneyaxa. Awo annachuna ohuserya sa Yehova, omusivela ni wiiwexexa yeeyo onaweheryeiye wa yaawo. Mwawiihiiha, mwaahusihe anamwane anyu liivuru Piipiliya Onahusiha ni liivuru ‘Osivela wa Muluku’ naamwi oothelana anyu ahimurumeelaka Yehova. (Masiposipo 6:20) Mpharihele yoohoolela enaphwanyeya mu jw.org wi mwaakhaviherye anamwane anyu wuupuwelela miyaha sa liivuru Piipiliya Onahusiha ni mukhalelo wa opharihela.—Muye va ENSINOS BÍBLICOS > ADOLESCENTES.c (Moone masu a vathi.)
[Nsu na vathi]
c Asitiithi munaphwanela olakelela wi mmoha a nyuwo aapharihele aliivuru yaala amuhusihaka mwaana mmoha mweelukuluku ekina ohiya ya malapelo a echoko.
[Ekaaxa va epaaxina 12]
MASU ATHARIHIWE
Mwaasivele anamwane anyu: Mwaaleele anamwane anyu wi munnaasivela. Nwooniherye wi awo toochuneya wa nyuwaano. Mmalihe elukuluku ni yaawo muchekulaka, mulyaaka nave muthataka. Vaavaa munaalakaanyu, mweereno moopixa murima ni mweepewe.
Khalani awiiyeviha: Vaavaa munavekelaanyu ni anamwane anyu, mumveke Yehova wi ookhaviheryeeni. Awo anahaala woona wi munnamuroromela Yehova, nave anahaala ohuserya weera emohamoha. Wakhala wi himwaano nrima nave munnawetha omurumeela Yehova ni waakhaviherya akina, munahaala tho waahusiha anamwane anyu okhala awiiyeviha.
Mukhale a miruku: Muhikhale ooteteiwa pahiru ni yeeyo anamwane anyu aneeraaya nyenya mathowa ene. Mweererye wiiwexexa moonelo aya weeparipari. Muupuwele mikhalelo saahaala weeriha wi okhale woovila weera yaphaama, nave mwaakhaviherye osepa mikhalelo seiyo. Musuwele wi yootakiherya anyu ennaavolowela anamwane anyu.