Owoka! Onarwa Omala?

PANAYIOTA unnunwe o evilivili ya Metiteraneo. Owo aanakhaviherya ipartitu vaavaa aareiye namwali. Ohoolo waya aakhala mutokweene a epartitu emoha mu epooma aakhaleiyewo. Aanaya empa ni empa wi aveke nikhaviheryo wa epartitu awe. Moovira wa elukuluku, Panayiota aakhulumuwa. Achu a epartitu yiichanana ntoko asinthamwene, nyenya yaakhalano nrima, nthalu, owanawana ni wiirumiha.

Taniyeli aaphuiwale ni emusi yaacicimiha malapelo. Owo aahoona owoka wa ahooleli a malapelo yaawo yaahapaliwa ophiyerya wiiya sooveleela sa ekerexa, nave yaahusiha wi muchu oocheka onahaala weeyeliwa mu cukucha a mooro.

Yeferi aamaliha elukuluku yincipale mu okumi awe ampakaka nakoso ni achu a ilapo sookhopela yaawo yeeca ni apophoro a Estatu Unitu. Owo onnuupuwela ilukuluku alipa a nakoso yoothaaya elocaka ni alamuleli. Awo yaanaloca echu vyakala wi ewerye weemereryiwa ompaka nakoso.

Sookhalavo saweereya sincipale ntoko seiya. Owoka ti wawunlaana olelo mmakhalelo mancipale a okumi ntoko, mmiyaha sa elapo, mmalapelo ni mu anakoso. Masu awi “owoka” anarweela mmasu a Ekiriki emwaahaka namaloca naari mulipa aweera eteyaturu yoowo onanwara maskara. Moovira wa elukuluku, masu ala annaphariheliwa wa muchu yoowo onaawoka akina wi iphwanyerye.

Owoka onnatannya esara, ni okuha mathowa wa yaale anavoloweliwa. Achu yaawo anahooxeya ni owoka, anniikoha: “Owoka! Onarwa omala?” Ninnathamalela woona wi Masu a Muluku annanikhaviherya ororomela wi onahaala omala.

MULUKU NI MWANAWE ANOONA HAI OWOKA

Mwawiiwanana ni Piipiliya, owoka opacenrye ni yoopatuxiwa yoohooneya yoomunepani, ohiya ni achu. Omapacereryo wa okhala wa achu, Satana Musaserya aapharihela enowa ntoko maskara nave aahiiseera muchu aphaama wi amuhuwelihe muthiyana oopacerya, Haava. (Maphatxuwelo 3:1-5) Ovinyerya elukuluku yeeyo, achu annakhuwa omuchu aya weeparipari yaawokaka akina wi yiiphwanyerye.

Vaavaa Aisarayeli akhalai yaapakaaya malapelo oowoka, ikwaha sincipale Muluku aanaalopola vooloca sa sookhumelela sene. Moorweela wa mulipa a miririmu Yesaya, Yehova aaloca ariki: “Atxhu ala annakàtxamela wi ekitxitximihe. Nto anakitxitximiha pahi ni masu, oniha murima aya ori otxiwene wa miyano.” (Isaiya 29:13) Vaavaa awo yaahiwelelaaya, Muluku aaneemererya wi amalapo emwarye nipuro na malapelo a Aisarayeli vamoha ni epooma ya Yerusalemu. Woopaceryani Apaapulu yaamutoloxa Yerusalemu mu 607 E.E.K. nave voocharela anakhoco a Roma mu 70 E.K. Chiryene, Muluku hanasiveliwa ni owoka.

Moohiyana, Muluku ni Mwanawe aannasiveliwa ni achu eekhaikhai. Ntoko yootakiherya, omapacereryo wa muteko wa Yesu, mulopwana mmoha awiichaniwa Natanayeli aamwaacamela. Vaavaa Yesu aamonneiye, aaloca: “Moneni mutxhu èparipari a Israél; mwa yowo hiwamo owoka.” (Yohani 1:47) Natanayeli aaniichaniwa tho Partolomeyo, nave aari variyari va arummwa 12 a Yesu.​—Luka 6:13-16.

Yesu aanamaliha elukuluku ni oomuchara awe, nave aanaahusiha mukhalelo Muluku onuupuweleiye. Awo hiyaaphwanela okhala oowoka. Yesu aahaasamela ahooleli a malapelo yaawo yaari oowoka avahaka yoolopola. Muthokororye owoka waya.

Awo yaanapaka “saphama” saya vanlakani. Yesu aahaaleela alipa oowiriyana awe: “Muhereke saphama sanyu vamithoni va atxhu, . . . ntoko aneraya anawisotherye.” Owo aahaaleela wi yamahala aya ekhaleke “yawitiha,” naari ya wiipithiha. Awo yaaphwanela ovekelaka weephiini, ohiya ochuna wooniwa ti akina. Eyo yaahaala weeriha wi malapelo aya ekhale eeparipari ni aweemereryeya vamiithoni va Muluku.​—Mateu 6:1-6.

Awo yaanaakuvela waakaaha. Yesu aahi: “Nawisotherye we! Opacerye ovihamo ekhukulu eri mmithoni mwà, vanonto onerawe woneke wi ovihemo ekokhola mmithoni mwa mukhwa-à.” (Mateu 7:5) Vaavaa muchu onaakaaheiye soohesa sa akina aniiha arino soohesa itokweene, muchu owo onnakhuwa omuchu awe weeparipari. Nyenya, eparipari ti yawi “atxhu othene àtxheka ni àthoiwa ovuwa wa Muluku.”​—Aroma 3:23.

Awo yaanakhapelela mathowa. Mu ekwaha emoha, Afarisi ni achu a muloko wa Herote yaamwaacamela Yesu empakela nikoho vooloca sa musokho. Echunaka omphara ni masu, awo yaaloca wa Yesu: “Muhusiha, nòsuwela wi ori a eparipari, onahusiha epariparyene mphiro wa Muluku.” Voocharela yaampakela nikoho: “Ninnaphwanela oliva musokho wa Sésar?” Yesu aahaakhula: “Munakererya hai, anawisotherye nyu?” Moophwanelela Yesu aawiichana ntoko anawiisootherye naari alipa oowoka nthowa nawi tahi wi yachuna osuwela naakhulo na nikoho naya, nyenya yaachuna omphara “Yesu mmalotxeloni mwawe.”​—Mateu 22:15-22.

Vaavaa muloko Weekiristu waapaken’yaaya mu Pentekoste a 33 E.K., achu a mmulokoni yaanaloca eparipari nave yaari oororomeleya. Akiristu yaaniilipixerya wi ehikhale oowoka. Ntoko yootakiherya, murummwa Petro aahaaceenyerya Akiristu akina okhalano “wiwelela . . . okhwelana wonna ohirivo wisotherya.” (1 Pedro 1:22) Murummwa Paulo aahaaceenyerya tho asinthamwene awe a muteko okhalano “okhwela onarwela wa murima wawela, wa nlèlo na murima waphama, ni wa nroromelo nohisotherya.”​—1 Timóteo 1:5.

IKURU SA MASU A MULUKU

Mahusiheryo a Yesu ni a arummwa awe aakhalano ikuru hiihaano ntoko yaaryaayano mu nsana noopacerya. Alocaka sa yeela, murummwa Paulo aarepa: “Nsu na Muluku nrino ekumi ni owerya. Nri nawetha opwaha nsipatxa nrino orele wu ni wu, ninnavolowa ophiyerya okawanya mupuwelo ni munepa, ophiyerya onakumanelamo makhuva, ni mpuwa wa makhuva, nave ninnathalela sokhwela ni sawupuwela sa murima.” (Ahebri 4:12) Osuwela mahusiheryo a Piipiliya ni okhala mwawiiwanana ni yaawo, ennaakhaviherya achu ancipale ohikhala oowoka nto okhala oororomeleya. Muthokororye saweereya sa achu araru aromoliwe woopaceryani.

Panayiota aahoona okumi awe otorokeyaka opacerya vaavaa aawompwaleiye oya mmuthukumano mu Empa ya Omwene ya Anamoona a Yehova. Haavo aapaka ichu wi aatikhinihe akina. Owo onnaloca: “Kaahoona osivela weeparipari ni opwachana mukina ni mukhwaawe. Nkintonko woona osivela yoowo variyari va iyaakha kaakhaviheryaaka epartitu.”

Panayiota aapacerya omuhuserya Piipiliya nave aaya vahoolo ophiyerya opatisiwa. Eyo yeeren’ye iyaakha 30 muculi. Vano owo onnaloca: “Nkaaphwannye yoolakelela ya ekumi vaavaa kaayaaka empa ni empa kivekaka nikhaviheryo wa epartitu aka, nyenya kiphwannye vaavaa kaapacenryaaka olaleerya Omwene wa Muluku​—yoowo onahaala oruha elapo ya ekhaikhai.”

Taniyeli aanaya vahoolo mmuloko Weekiristu nave aavahiwa mirici. Miyakha vakhaani ohoolo waya, aapaka yoohesa nave muupuwelo awe waanamuukhula. Owo aaloca: “Kuupuwelaka owoka yoowo konnaaka mu ekerexa aka ya khalai, kaalakelela ohiya mirici saka sa mmulokoni. Nkaachuna oweeriha Akiristu akina wuupuwela wi miyaano kaari echu eniiha kihiri.”

Moohakalaliha, amanle opaka matorokelo, Taniyeli aahoona wi aanaphwanela okookela mirici sawe sa mmuloko ni muupuwelo waphaama, nave wanaawiili aaheemererya mirici mmulokoni. Ororomeleya yoola onnaphwanyeya variyari va yaale anamurumeela Muluku ehirino owoka. Awo annahuserya “ovihamo ekhukulu” mmiithoni mwaya wi ewerye ‘ovihamo ekokhola’ mmiithoni mwa anna aya.

Yeferi, yoowo aamalinhe elukuluku yincipale mu anakoso, oriye: “Vaavaa kaamuhuseryaaka Piipiliya, kaahoona wi nkaaphwanela okhala namatumiha awootha kilocaka echu vyakala wi keemereryiwe ompaka nakoso. Muupuwelo aka waavoloweliwa ni yoorepa ya Piipiliya ya Masiposipo 11:1, yeeyo enanleela wi ‘Apwiya annamuthanya mutxhu orino mphimo wowoka.’” Aai, moohiyana ni yaale yaampakenle Yesu nikoho na oliva musokho, Yeferi aahuserya okhala oororomeleya ni Akiristu akina ophitaanyerya yaale yahaari Akiristu.

Macikhwi macikhweene a Anamoona a Yehova elapo yoothene, anniilipixerya opharihela yeeyo anahuseryaaya Mpiipiliya. Annawetha ‘onwara mutxhu musyani opatusiwe ntoko mwa Muluku n’wokololani ni morèrani murima onarwa wa eparipari.’ (Éfeso 4:24) Ninnooceenyeryaani wi mwaasuwele phaama Anamoona a Yehova, soororomela saya ni mukhalelo anahaalaaya wookhaviheryaani ohuserya vooloca sa elapo evyaani Muluku ororomelinheiye. Mwemmo onahaala okhalano “wokololowa” nave owoka oneeraaya ohikhalemo.​—2 Pedro 3:13.

[Yooleeliherya va epaaxina 29]

Akiristu eeparipari aakhalano “okhwela onarwela wa murima wawela, wa nlèlo na murima waphama, ni wa nroromelo nohisotherya.”​—1 TIMÓTEO 1:5