Mapacereryo ni Yoolakelela ya Othela
“Vano Apwiya Muluku yàhi: ‘Tahi yorèra wi mulopwana akhaleke mekheiye. Kinammupatuserya mukhaviherye awe.’”—MAPHATXUWELO 2:18.
MWAAHAALA WAAKHULA HAI?
Ntakhara heeni enalociwaaya wi othela yoovaha ya Muluku?
Mwaahaala othariha hai mwaha wa othela ovinyerya elukuluku ya Atamu ophiyerya mmahiku a Yesu?
Tiheeni enahaala omukhaviherya Mukristu osuwela wi ohaakhwanela othela naari otheliwa?
1, 2. (a) Othela opacenrye hai? (b) Mulopwana ni muthiyana oopacerya tiheeni yaasuwenlaaya vooloca sa othela? (Moone eruku yoopacerya.)
TAHI yoonanara achu othela. Nyenya othela opacenrye hai, nave tiivi eri yoolakelelaaya? Osuwela yeela enahaala onikhaviherya okhalano moonelo woophwanela vooloca sa othela ni mareeliho aya. Muluku ampatusa mulopwana oopacerya, Atamu nave aamvaha murici wa waachuwa asinama. Atamu aanawoona asinama oothene wi yaari apiili apiili, “nto mwa seiha hàrivo mukhaviherya olikana ni mulopwana.” Mwawiihiiha Muluku aamuruuhela Atamu ikhove itokweene, nave aakusa eparari wa yoowo nave ampakano muthiyana. Yehova aamuruuha muthiyana wa Atamu, nave akhala mwaariye. (Mwaalakhanye Maphatxuwelo 2:20-24.) Ntoko noonnaahu, othela yoovaha ya Muluku.
2 Iyaakha sincipale ohoolo waya, Yesu aahuuluulela yeeyo Yehova aalonceiye o Emaca ya Eteni: “Tivanto mulopwana tonereiye ahiye atithinya ni amannya ni aphitàne ni mwariye, nave oweli awo eni ekhale mutxhu mmoharu.” (Mateu 19:4, 5) Woona wi Muluku aakunse eparari ya Atamu wi ampakeno muthiyana oopacerya, mutheli owo aaphwanela osuwela wi oopiili yaari mwiili mmoha. Yehova hanachuna wi mulopwana ni muthiyana ehiyane naari waaceya.
OTHELA MAKUPA A YOOLAKELELA YA YEHOVA
3. Tiivi yaari yoolakelela yookhweleya ya othela?
3 Atamu aari oohakalala ni mwaariye, yoowo aamvanheiye nsina na Hava. Owo aari mukhaviherye awe. Atamu vamoha ni Hava yaahaala okhala oohakalala ntoko mutheli. (Maphatxuwelo 2:18) Yoolakelela yookhweleya ya othela waari osareiha elapo ni achu. (Maphatxuwelo 1:28) Anamwane aasilopwana ni aasithiyana yaahaala waasivelaka asitiithi aya, nave voocharela yaahaala waahiya wi yathele ni otheliwa wi epaceryihe imusi saya. Achu yaahaala osareya veelaponi ni weeriha okhala parataiso.
4. Tiheeni yeeren’ye ni mutheli oopacerya?
4 Othela woopacerya waapahuwa vaavaa Atamu ni Hava yahaamwiiwelenlaaya Yehova. “Enowa yele ya khalai” Satana Musaserya, yanwoka Hava nave yaamuleela wi alya yawiima ya “mwiri yole onasuweliha yaphama ni yonanara” waahaala omvahe nsuweliho navameekhaaya. Satana aaloca tho wi eereiye alye yawiima eyo, yaahaala omweeriha olakelela yeeyo eri yaphaama ni yoonanara. Hava hoonihenrye ncicimiho wa Atamu yoowo aari muhooleli a emusi vaavaa aalakelenleiye olya yawiima ahipacenre omuleela. Nave Atamu haamwiiwelenle Muluku vaavaa eemerenryeiye yawiima moorweela wa mwaariye.—Wupulula 12:9; Maphatxuwelo 2:9, 16, 17; 3:1-6.
5. Tiheeni nnahuseryaahu orweela wa mukhalelo Atamu ni Hava yamwaakhunlaaya Yehova?
5 Vaavaa Yehova aakonheiye, Atamu aamurunela mwaariye. Owo aaloca: “Muthiyana mmukun’hanyu vamoha ni miyo t’okivan’he yawima eyo, nave miyano kilya.” Hava, aarunela enowa wi tiyanwonke. (Maphatxuwelo 3:12, 13) Atamu ni Hava hiyeemerenrye yoocheka aya, nave Yehova aahaathoriha alipa oomwaryeya yaale. Yootakiherya aya yoolopola wa hiyo! Wi othela okhumelele phaama, alopwana ni athiyana anaphwanela omwiiwelela Yehova ni weemererya murici mu saweera saya.
6. Mwaahaala othariha hai yoorepa ya Maphatxuwelo 3:15?
6 Moohipwacha yeeyo Satana aapankeiye o Eteni, Yehova oheeriha wi achu ekhaleno ewehereryo yoomwaahiyu. Ewehereryo eyo enaphwanyeya mu yooloherya yoopacerya ya Piipiliya. (Mwaalakhanye Maphatxuwelo 3:15.) Yooloherya eyo yaahooniherya wi Satana aahaala opahuliwa ni “nloko [naari evyo]” ya “muthiyana.” Soopatusiwa sincipale soomunepani sawookololowa inarumeela wirimu sookhalano onthamwene waphaama ni Muluku. Iho sinakhala ntoko mwaara a Yehova. Owo aahaala omurumiha mmoha a nikhuuru nenlo na soopatusiwa wi ‘amphoreihe’ naari omutolosa Musaserya. Evyo eyo yaahaala weeriha wi achu awiiwelela ewerye opuha yeeyo mutheli oopacerya oyeleenleiye. Achu awiiwelela yaahaala okhalano ekari ya okhalano okumi woohimala veelaponi yavathi, hiiha ntoko Yehova aalaihenryeiye.—Yohani 3:16.
7. (a) Tiheeni eneereya mu othela ovinyerya vaavaa Atamu ni Hava yaamwaryen’yaaya? (b) Tiheeni Piipiliya onaloceiye sa alopwana athenle ni athiyana atheliwe?
7 Omwaryeya wa Atamu ni Hava waavolowela othela waya ni othela wa achu oothene. Ntoko yootakiherya, Hava ni athiyana oothene yaahaala okhalakano wiicela otokotoko variyari va oyara. Athiyana yaahaala waachunaka vancipale asiiyaya, nyenya alopwana yaahaala waalamulelaka asaaraya, ikwaha ikina waahoosa ntoko nnoonelaahu olelo. (Maphatxuwelo 3:16) Yehova onaweherya wi alopwana athenle ehooleleke imusi moosivela, nave onaweherya tho wi athiyana atheliwe yaacicimiheke asiiyaya. (Éfeso 5:33) Vaavaa mutheli onalapeiye vamoha, makacamiho mancipale ananwerya osepiwa.
OTHELA OVINYERYA ELUKULUKU YA ATAMU OPHIYERYA ELUKULUKU YA MAAHI MANCIPALE
8. Tuuvi ori mwaha wa othela ovinyerya elukuluku ya Atamu ophiyerya elukuluku ya Nowa?
8 Ehaakumve okhwa, Atamu ni Hava yaakhalano anamwane aasilopwana ni aasithiyana. (Maphatxuwelo 5:4) Mwanaya oopacerya, Kayini, ohoolo waya aamuthela ni muhima awe. Lameke mwaana a Kayini aari mulopwana oopacerya onaromoliwa Mpiipiliyani aarino athiyana eeli. (Maphatxuwelo 4:17, 19) Ovinyerya elukuluku ya Atamu ophiyerya elukuluku ya Nowa, yaariwo achu vakhaani yaamulapela Yehova. Achu akina yaawo oororomeleya yaari Apele, Enoki, Nowa ni emusi awe. Piipiliya onnaloca wi mweelukuluku ya Nowa, “àna a Muluku yàhona wi anamwane àsithiyana a atxhu yàri òrèra, nave yàhathanla yale yàtxhunnaya.” Nyenya iwo waari omwareya, nave ankeelo ale ni asaaraaya yaakhalano anamwane yaawo yaari oonanara yiichaniwa Anefilimu. Variyari va elukuluku yeele, “mwelaponi atxhu yànvira ekhalaka ònanara murima” nave “mupuwelo aya ni otxhuna waya wàri opaka sonanara mahiku othene.”—Maphatxuwelo 6:1-5.
9. Tiheeni Yehova aaweerenleiye achu oonanara mmahiku a Nowa, nave nnaphwanela ohuserya eheeni wa yeeyo yeeren’ye?
9 Yehova aaloca wi aahaala oruuha maahi mancipale veelaponi wi yaatolose achu oothene oonanara. “Noé namalaleya a wokolola,” aahaaleela achu vooloca sa orwa wa Maahi Mancipale. (2 Pedro 2:5) Nyenya awo hiyanwiriyanne Nowa, nthowa nawi yaari ooweiwa ni ikumi saya, ophitaanyerya othela. Yesu oolikanyiha elukuluku ya Nowa ni yawihu. (Mwaalakhanye Mateu 24:37-39.) Olelo, achu ancipale hanawiriyana michaka saphaama sa Omwene wa Muluku. Ninnalaleerya michaka seiyo ehaakumve elapo ela yoonanara otolosiwa.Tiheeni nnahuseryaahu orweela wa elukuluku ya Maahi Mancipale? Niheemererye wi ichu ntoko othela ni okhalano anamwane ikhale sookhweleyaxa wa hiyo ophiyerya ocuwala wi nihiku na Yehova nri vakhiviru.
OTHELA OVINYERYA ELUKULUKU YA NOWA OPHIYERYA MAHIKU A YESU
10. (a) Mu sookhovelela sincipale achu anoona hai ocapaheya? (b) Aparahamu ni Sara avanhe hai yootakiherya yaphaama mu othela waya?
10 Nowa ni anamwane awe araru, muchu ti muchu a yaawo aarino muthiyana mmoha. Nyenya, emanle Maahi Mancipale, alopwana ancipale hiyaakhalano muthiyana mmoha. Mu sookhovelela sincipale, ocapaheya waakhala wawunlaana nave waanapaka makupa a sookhovelela sa malapelo. Vaavaa Aparahamu ni Sara yaathamenlaaya o Kanani, awo yaakhala variyari va achu yaahooniherya ncicimiho mu othela. Yehova aatolosa ipooma sa Sotoma ni Komora nthowa nawi achu yaari oocapaheya. Aparahamu aari oohiyana ni achu yaawo. Owo aari muhooleli aphaama a emusi, nave Sara oovaha yootakiherya yaphaama ya muthiyana awiiwelela. (Mwaalakhanye 1 Pedro 3:3-6.) Aparahamu aaheeriha wi mwanawe Isaki amuthele muthiyana aamulapela Yehova. Nave Isaki aaheerano emohamoha wa mwanawe Yakopo, yoowo anaawe yaari makholo a mahimo 12 a Isarayeli.
11. Nlamulo na Mose naakhapelela hai Aisarayeli?
11 Ohoolo waya, Yehova aapaka nlakano ni nloko na Isarayeli. Owo aahaavaha Nlamulo na Mose, nenlo naakhaviherya alopwana ni athiyana mu omulapela waya Yehova. Ntoko yootakiherya, yaakhalavo malamulo vooloca sa sookhovelela sa othela, ophitaanyerya waaceya, nave Aisarayeli yaawatiheryiwa othelana ni alapeli atheru. (Mwaalakhanye Malamulo 7:3, 4.) Vaavaa yaakhumelelaaya makacamiho matokotoko mu othela, atokweene yaanavaha nikhaviheryo. Yaakhalavotho malamulo vooloca sa okhala oohiroromeleya, nrima, ni ehace. Ohiyana waaneemereryiwa, nyenya yaakhalavo malamulo yaakhapelela othela woothene. Ntoko yootakiherya, mulopwana aanaphwanela omuhiya mwaariye nthowa na “etxhu yohimusivela.” (Malamulo 24:1) Piipiliya hanathariha yeeyo yaakhala “etxhu yohimusivela,” nyenya mulopwana haaphwanela opharihela soohesa sankhaani wi amuhiye mwaariye.—Onamukutxho 19:18.
MUKHALE OOROROMELEYA WA OOTHELANAANYU
12, 13. (a) Alopwana akina mmahiku a Malakiya yaakhaliha hai asaaraya? (b) Olelo, wakhala wi muchu oopatisiwa onnamuhiya oothelana awe, tisivi sinahaala okhala sookhumelela?
12 Mmahiku a mulipa miririmo Malakiya Ayuta ancipale yaathenle yaanapharihela mikhalelo soothene wi yaahiye asaaraya. Alopwana yaawo yaahiya asaaraya wi yaamuthele mwali naari muthiyana ahaamulapela Yehova. Variyari va elukuluku ya Yesu, Ayuta nlelo yaanaahiya asaaraya “nthowa na itxhu sothene.” (Mateu 19:3) Yehova aaniica omwalana yoowo wahaakhalano mathipelo.—Mwaalakhanye Malakiya 2:13-16.
13 Olelo, ohiroromeleya mu othela honeemereryiwa variyari va achu a Yehova, nave honeereya mwawunlaana. Vano nkamwaanyiheryeeni Mukristu oopatisiwa othenle naari otheliwe, onapaka mararuwo nave amuhiya oothelana awe wi athelane ni mukina. Wakhala wi muchu owo hacharunwe, onahaala wiikariwa wi muloko okhale waweela. (1 Korinto 5:11-13) Muchu owo onaphwanela okhalano “sawima inarwa wa orukunusa . . . murima” ahaakumve weemereryiwa wanawiili mmulokoni. (Luka 3:8; 2 Korinto 2:5-10) Hinaavovo nlamulo vooloca sa elukuluku enaphwanela ovira wi muchu owo akookiheryiwe mmulokoni. Nyenya, akhweya enamuchuneya ovira eyaakha emoha naari sincipale wi namacheka ooniherye wi mweeparipari oocharuwa wi akookiheryiwe wanawiili mmulokoni. Nave naamwi hiiha, muchu owo nlelo onahaala ‘wemela o munyukhuni wothoriherya wa Muluku.’—Aroma 14:10-12, Nlakano Nahihano; mmoone Mulipeleli a 1 a Fevereru a 1980 ipaaxina 31-32 (a ekunya).
OTHELANA AKRISTU PAHIRU
14. Tiivi yaari yoolakelela ya Nlamulo?
14 Aisarayeli yaaniiwelela Nlamulo na Mose opwaha iyaakha 1.500. Nlamulo nahaakhaviherya achu a Muluku mmakhalelo mancipale. Ntoko yootakiherya, naahaavaha achu a Muluku malakiheryo yaakhaviherya omaliha makacamiho a emusi, nave nahaahoolela ophiyerya elukuluku ya Mesiya. (Galasya 3:23, 24) Vaavaa Yesu aakhwileiye, Nlamulo naamala nave Muluku aapaka marehereryo mavyaani. (Ahebri 8:6) Mwawiihiiha ichu ikina seemereryiwa mu Nlamulo na Mose hiseemereryiwa wa Akristu.
15. (a) Mmuloko Weekristu, tinivi nnaphwanela okhala nlakiheryo na othela? (b) Tiheeni Mukristu onaphwaneleiye othokororya vaavaa onuupuweleiye omwalana?
15 Nihiku nimoha Afarisi yaamukoha Yesu vooloca sa othela. Yesu aawaakhula wi Muluku aahiweemererya Aisarayeli ohiyana mu Nlamulo na Mose naamwi eyo yahaari yeeyo Owo aachuneiye woopaceryani. (Mateu 19:6-8) Naakhulo na Yesu naahooniherya wi nlakiheryo noopacerya na Muluku vooloca sa othela naaphwanela vano okhala nlakiheryo na Akristu. (1 Timóteo 3:2, 12) Ntoko “mutxhu mmoharu,” mutheli onaphwanela okhala vamoha. Omusivela waya Muluku ni osivelana waya onaphwanela owaataaniha. Yoowo onamuhiya oothelana awe ohiri nthowa na mararuwo hataphunwe wi athele wanawiili. (Mateu 19:9) Akhweya muchu onamulakelela omulevelela oothelana awe ocharunwe. Ti yeeyo yeeren’ye vaavaa mulipa miririmu Oseya aamulevelenleiye mwaariye Komer yoowo aapaka mararuwo, hiiha ntoko Yehova aalevelenleiye Aisarayeli oocharuwa. (Oseya 3:1-5) Mwawaacererya, wakhala wi muchu oosuwela wi oothelana awe ooraruwa nave eemererya okonano, eyo enataphulela wi omulevelela oothelana awe. Vamiithoni va Muluku, muchu owo haanono ekari ya omwalana ni othelana ni muchu mukina.
16. Tiheeni Yesu olonceiye sa ociye?
16 Yesu oothariha wi wa Akristu eeparipri, mararuwo mukhalelo mmoharu wa omwalana. Voocharela owo ahaaloca “yawo evahiwe” ohithela. Yesu aaloca: “Yowo anawerya wakhela ela ákhele.” (Mateu 19:10-12, NN) Ancipale annathanla ohithela nthowa nawi anachuna omurumeela Yehova ehirino wuukhuwa, nave awo anaphwanela othamaleliwa ntakhara yoolakelelaaya!
17. Tiheeni enahaala omukhaviherya Mukristu osuwela wi ohaakhwanela othela naari otheliwa?
17 Tiheeni enii emukhaviherye muciye olakelela othela naari otheliwa? Owo onaphwanela wooniherya wi onniinanela ociye awe. Murummwa Paulo ooloca phaama sa ociye. Nyenya owo tho aaloca: “Nto wi etxawe metxelo a pure, mulopwana ti mulopwana athele.” Paulo aahaaceererya: “Nto yahinawerya yeyo, athele nari etheliwe. Ti yaphama othela, ohiya weyela murima.” Muchu onanwerya olakelela othela wi asepe okhalano nchuno ntokweene na opaka sa mwiikho yeeyo yaahaala omweeriha oceha naari ocapaheya. Nyenya aciye anaphwanela othokororya mukhalelo aya wi yoone waakhanle wi chiryene aakhalano iyaakha soophwanela wi ethele naari etheliwe. Paulo ooloca: “Akhala mulopwana omwakamenle mwali, onà wi òhunnuwa nave yakhweleyaka wera hiha, ere onupuweleiye, hanatxheka. Ethelihiwe.” (1 Korinto 7:2, 9, 36; 1 Timóteo 4:1-3) Muchu owo hanaphwanela oceenyeryiwa othela nthowa nawi ookhalano nchuno ntokweene na opaka sa mwiikho yeeyo ancipale anakumanaayano variyari va omiravo aya. Akhweya owo hinnunwe wi awerye ohoolela phaama mirici sa othela.
18, 19. (a) Othela Weekristu onaphwanela weereya hai? (b) Tiheeni enahaala othokororyiwa mmwaha onacharela?
18 Othela Weekristu onaphwanela weereya mulopwana ni muthiyana oopatisiwa yaawo anamusivela Yehova ni murima aya woothene. Awo tho anaphwanela osivelana vancipale wi ewerye omaliha elukuluku yincipale vamoha. Yehova onahaala waareeliha nthowa na wiiwelela ekano ya othela “mwa Apwiya pahi.” (1 Korinto 7:39) Nave tho othela waya onahaala okhumelela phaama wakhala wi aatitelela wiiwelela ekano ya Piipiliya.
19 Olelo, nnakhala mu “mahiku òmaliherya,” nave achu ancipale haanono mikhalelo sinachuneya wi othela okhumelele phaama. (2 Timóteo 3:1-5) Mmwaha onacharela, nnahaala othokororya malakiheryo a esisapo a Piipiliya yaawo enii yaakhaviherye Akristu okhalano othela woohakalala ni onakhumelela phaama moohipwacha makacamiho anakumanaayano. Eyo enahaala waakhaviherya weeca mu ephiro ya ekumi yoohimala.—Mateu 7:13, 14.
[Yooleeliherya va epaaxina 4]
Wi othela okhumelele phaama, alopwana ni athiyana anaphwanela omwiiwelela Yehova ni weemererya murici mu saweera saya
[Ekaaxa va epaaxina 8]
MASU ATHARIHIWE
Mulopwana oosivela onnatakiherya moonelo wa Yesu Kristu. Mwawiihiiha mulopwana onakhala eepewe ni ooleva, hanakhala oohooxa naari oopwaalu. Wiiliwiili onamukhaliha mwaariye mwa ncicimiho, mweepewe, ni moosivela. Yehova omvaha mulopwana murici wa okhala muhooleli a emusi. Onnavahererya soothowa sa emusi, ntoko yoolya, yoowara, ni wookhalavo. Owo tho okhalano murici wa ohoolela malapelo ni opaka soolakelela
Muthiyana oocicimiha onnooniherya ncicimiho olamulelo wa Muluku moorweela wa wiiwanana ni iyawe. Owo onnaloca yeeyo onuupuweleiye ni moonelo awe, nyenya vaavaa oneereiyeno hiiha, owo onnacicimiha ohoolela yoowo Yehova omvanheiye iyawe. Naamwi ahisiveliwaka ni soolakelela sa iyawe, onniilipiserya okhaviherya wakhala wi sinniiwanana ni malamulo a Muluku