Wunnuwiha Mavyakelo Ahu Mmuteko wa Olaleerya—Mpaceryihe Ochekula Onahaala Oweerihaani Olaleerya

Yesu aawerya olaleerya wa muthiyana aari Musamariya nthowa nawi aapaceryiha ochekula ni yoowo. Nni nunnuwihe hai mavyakelo ahu a opaceryiha ochekula ni achu nihaasuwenlaahu?

• Mukhale oonthamwene nave mwaalociheke achu. Naamwi aavelavenle, Yesu aapaceryiha ochekula pahiru moorweela wa oveka maahi oowurya. Mwawiihiiha, nyuwaano munanwerya opaceryiha ochekula moorweela wa omwenyerya nave voocharela akhweya muloce ichu ntoko, epwila naari echu yeeren’ye hiihaanoru. Muupuwele wi yoolakelela ahu ori opaceryiha ochekula, mwawiihiiha, muloce echu enahaala otannya murima wa mulipa oowiriyana. Wakhala wi muchu owo hanaakhula echu, muhiceecheye. Mweererye ochekula ni muchu mukina. Mumveke Yehova olipa murima.—Neh 2:4; Saw 4:29.

• Mwaavye ekari eri yoothene wi mulaleerye michaka saphaama, nto muhiiniwe murima. Mweerihe wi ochekula wanyu oye vahoolo mmukhalelo waphaama. Wakhala wi moomukhinyererya, muchu owo hanii achune owiriyana naari waakhula echu. Muhiceecheye wakhala wi ochekula woomala muhaakumve ovaha onamoona. Wakhala wi munnoova nthowa na wuupuwela wi munachuna olaleerya, mpacerye ochekula muhirino yoolakelela ya ovaha onamoona. [Moonihe exilema 1 nave muthokororye ni alipa oowiriyana.]

• Mwaavye ekari ya ovaha onamoona, moorweela wa oloca nroromelo nanyu, eyo enanwerya omweeriha mulipa oowiriyana okhalano nchuno na osuwela sincipale. Yesu aaloca ichu sootikhiniha seiho saamweerinhe muthiyana ole opaka makoho. Nave vaavaa aakhuleiye makoho a muthiyana, owo aapaceryiha olaleerya michaka yaphaama. [Moonihe exilema 2 nave muthokororye ni alipa oowiriyana, nave tho voocharela moonihe exilema 3 ni muthokororye.]