Nsina na Yehova, Nnataphulela Eheeni wa Yesu?

1-2. (1) Tiheeni Yesu aapankeiye mu ohiyu ahaakumve okhwa? (2) Makoho taani nnahaalaahu waakhula mu yoohuserya yeela?

OHALAKA vakhaani oxekuwavo, naneexexe a 14 a Nisani, eyaakha ya 33 E.K., Yesu aahala vakhaani otumihiwa, ophariwa, othorihiwa, ohooxiwa ni wiiphiwa. Owo iiha amalinhe olya Yoolya ya Apwiya mu esaala yoosulu ni oohuserya awe oororomeleya. Emanle olya yoolya yeela yavameekhaaya, Yesu aahaavaha oohuserya awe malakiheryo awe ookuchula wi aarehererye ni waalipiha yaawo. Nave elukuluku vakhaani awo ehaakumve opwaha, Yesu aaheemela nave aapaka nivekelo nawiixeelaxa. Murummwa Yohani oorepa nivekelo nenla nave nnanwerya ophwanya nenlo mu Yohani ekapitulu ya 17.

² Tiheeni Yesu uukhuweiyeno vaavaa aapankeiye nivekelo nenla? Ti mwawiihai nivekelo nenla nnanikhaviheryaaya wiiwexexa yeeyo yaari yoochuneyaxa wa Yesu vaavaa aareiye veelaponi yavathi? Hankooni noone maakhulo a makoho yaala.

“KOHAASUWELIHA YAAWO NSINA NANYU”

3. Tiheeni Yesu aalonceiye vooloca sa nsina na Yehova nave tiheeni owo aachuneiye oloca? (Yohani 17:​6, 26)

³ Mu nivekelo nawe, Yesu aahi: “Kohaasuweliha yaawo nsina nanyu.” Ti yawooneya wi ola waari mwaha woochuneyaxa wa Yesu woona wi owo aahiloca yeela mu ikwaha piili. (Mwaalakhanya Yohani 17:​6, 26.) Tiheeni Yesu aachuneiye oloca? Apwanne owo aahusiha oohuserya awe wi tinivi naari nsina na Muluku? Oohuserya a Yesu yaari Ayuta. Mwa yeeyo, awo yaahisuwela wi nsina na Muluku ti Yehova. Nsina nenla, ninnaphwanyeya mu Soorempwa sa Eheepri waacamela ikwaha 7 miili. Mwawiihiiha, yeeyo Yesu aapankeiye, hiwaari oloca wi nsina na Muluku ti Yehova. Mweeparipari, owo aahusinhe yeeyo nsina nenla nneemelelaaya. Yesu aahaakhaviherya oohuserya awe omusuwela phaama Yehova, ophitaanyerya yoolakelela Awe ntakhara elapo yavathi ni achu, yeeyo Owo aapankeiye, yeeyo aahaaleiye opaka ni mikhalelo Sawe. Pahiru Yesu taahaala owerya ohusiha phaama soothene seiha nthowa nawi owo taamusuwenle phaama Yehova opwaha muchu mukina vyakala.

4-5. (1) Mphwanaphwanihe mukhalelo nsina na muchu nnaweryaaya okhala noochuneyaxa wa hiyo. (2) Ntakhara heeni nsina na Yehova naahikhalano yootaphulela etokweenexa wa oohuserya a Yesu?

⁴ Mwaanyiherye wi mmuloko anyu ookhalamo mutokweene mmoha oniichaniwa Tavite nave owo meetiku yoowo nyuwo mmusuwenlaanyu. Voocharela, nihiku nimoha munniiceliwa nave munnachimakela oxipitale, yeeyo munna owo onalapeiyewo nave owo onnavuluxa okumi anyu. Vano, munnamusivela vancipale munna owo nave vaavaa muniiwaanyu vooloca sa nsina nawe, nyuwo munnuupuwela yeeyo oweerenleiyeni. Nlelo Tavite mutokweene yoowo mmusuwenlaanyu mu iyaakha sa muculi, nyenya owo tho meetiku yoowo ovulunxe okumi anyu.

⁵ Mmukhalelo mmohamoha, oohuserya a Yesu yaasuwela nsina na Yehova. Nto wa nthowa na muteko woolaleerya wa Yesu, nsina nenla naahikhalano yootaphulela etokweenexa wa yaawo. Ntakhara heeni? Nthowa nawi Yesu aanooniherya omuchu wa Atiithi awe mu soothene aaloceiye ni aapakeiye. Mwawiihiiha, oohuserya yaanawerya ‘omusuwela’ phaama Yehova moorweela wa owiriyana mukhalelo Yesu aahusiheiye ni ovareryela mukhalelo owo aakhaliheiye achu.—Yoh. 14:9; 17:3.

“NSINA NANYU, NENLO MUKIVANHAANYU”

6. Tiheeni Yesu aachuneiye oloca vaavaa aalonceiye wi aavahiwa nsina na Yehova? (Yohani 17:​11, 12)

⁶ Mu nivekelo nawe, Yesu aapaka yooveka ntakhara oohuserya awe ariki: “Mwaakhapelele yaawo wa nthowa na nsina nanyu, nenlo mukivanhaanyu.” (Mwaalakhanye Yohani 17:​11, 12.) Apwanne ela enataphulela wi nsina na Yesu naahaala okhala Yehova? Hooye. Yesu aalonce nsina na Yehova ntoko “nsina nanyu.” Mwawiihiiha, ti yawooneya wi Yesu haaphiyenrye wiisiichana Yehova. Vano, ntakhara heeni Yesu aaloca wi nsina na Muluku aavahiwe yoowo? Yoopacerya, Yesu aari aweemelela ni Namichaka a Yehova. Owo aarwiile mu nsina na Atiithi awe nave aahipaka miteko sootikhiniha mu nsina naya. (Yoh. 5:43; 10:25) Ohiya yeeyoru, nsina na Yesu nnataphulela “Yehova ti Nivuluxo.” Mwawiihiiha, nsina na Yehova ninniiwanana ni nsina na Yesu.

7. Mphwanaphwanihe mukhalelo Yesu aaloceiye mu nsina na Yehova.

⁷ Wi niiwexexe phaama, hankooni nuupuwelele niphwanaphwaniho nla: Murummwa, muchu yoowo onamweemelela mulamuleli ni onaloca mu nsina nawe. Mwawiihiiha, masu a murummwa aakhalano ikuru ni owerya omohamoha wa masu a mulamuleli. Mmukhalelo mmohamoha, Yesu onamweemelela Yehova nave onaloca mu nsina Nawe.—Mat. 21:9; Luka 13:35.

8. Mmukhalelo taani nsina na Yehova naaraaya mwa Yesu naamwi owo ahaakumve orwa veelaponi yavathi?

⁸ Piipiliya onnamwiichana Yesu ntoko “Nsu” nthowa nawi, Yehova ampharihenle Yesu wi avahererye sooleeliherya wa ankeelo ni wa achu. (Yoh. 1:​1-3) Woonaru, munkeelo yoowo Yehova aampharihenleiye wi aakhapelele Aisarayeli vaavaa yaaryaaya mutakhwani, aari Yesu. Vaavaa Yehova aalamulenleiye Aisarayeli omwiiwelelaka munkeelo yoole, owo tho aahaaleela mathowa ene ariki: “Yoowo onrwa mu nsina naka.”a (Mwaalakhanye Mukwaha 23:​20, 21, PMM.) Yehova aalonce yeela woona wi Yesu ti yoowo onamweemelela nave onaakiha ni weeliha nsina na Atiithi awe.

“TIITHI MUCICIMIHE NSINA NANYU”

9. Esisapo taani Yesu aavaheiye nsina na Yehova?

⁹ Ntoko noonnaahu, nsina na Yehova ti yaari echu yoochuneyaxa wa Yesu, naamwi owo ahaakumve orwa veelaponi yavathi. Nave vaavaa aareiye veelaponi yavathi, soothene Yesu aapakeiye saanooniherya mukhalelo nsina na Yehova naaryaaya noochuneyaxa wa yoowo! Omakuchuwelo wa muteko awe woolaleerya, Yesu aamveka Yehova ariki: “Tiithi mucicimihe nsina nanyu.” Mu elukuluku yeeyo, Atiithi awe yaahaakhula ni nsu noovuwa, nenlo naakhala ntoko etari. Yehova aahi: “Koocicimiha nenlo nave kinarwa kicicimiha tho.”—Yoh. 12:28.

10-11. (1) Yesu aaciciminhe hai nsina na Yehova? (Moone tho eruku.) (2) Ntakhara heeni nsina na Yehova ninnaphwanela ocicimihiwa ni waakihiwa?

¹⁰ Yesu tho aacicimiha nsina na Atiithi awe. Mwawiihai? Mukhalelo mmoha waari moorweela wa oloca mikhalelo sootikhiniha sa Atiithi awe ni ichu itokweene seiho anapakaaya. Nyenya yeelaru hiyaakhwana. Yesu aaphwanela wooniherya wi soothene Yehova onapakeiye ti sawookololowa nave wi nsina nawe ti naweela.b Yesu aahooniherya mukhalelo ela yaaryaaya yoochuneya vaavaa aahusinheiye oomuchara awe nivekelo na ntakiheryo. Owo aahi: “Atiithihu muri wirimu, nsina nanyu neelihiwe.”—Mat. 6:9.

¹¹ Vano, ntakhara heeni nsina na Yehova nnaphwanelaaya weelihiwa ni waakihiwa? Ti nthowa nawi, mu emaca ya Eteni, Satana aamphuca Yehova Muluku nave aaloca sawootha vooloca sa yoowo. Satana aalonce wi Yehova nawoothe nave wi owo aamukhwatiiherya Atamu ni Eva echu yaphaama. (Map. 3:​1-5) Satana tho ooniherya wi mukhalelo Yehova onapakeiye ichu tahi waphaama. Wa nthowa na sawootha seiha Satana olonceiye, achu akhweya ananwerya wuupuwela moonanara mukhalelo Yehova Muluku oryeiye. Ohoolo waya, mmahiku a Yupu, Satana aahiwootherya yaale anamurumeela Yehova wi awo aneerano yeeyo ni mathowa oohiphwanelela. Owo tho aahiwootherya achu wi hiyaahaala omusivelaka Yehova mweeparipari nave wi hiyaahaala otitelela omurumeelaka yoowo mu ilukuluku soovila. (Yupu 1:​9-11; 2:4) Moovira wa elukuluku, aahaala osuwanyeya taani ori nawoothe, waakhanle wi ti Yehova naari Satana.

“KINNAVAHA EKUMI AKA”

12. Wa nthowa na osivela nsina na Yehova, Yesu aareheren’ye weera eheeni?

¹² Wa nthowa na omusivela wawe Yehova, Yesu aachuna opaka soothene aaweryeiye wi eelihe ni waakiha nsina na Yehova. Ophiyerya tho wi owo aari ooreheryeya okhwa wi ooniherye wi Yehova taweela nave wi mukhalelo Owo oneereiyeno ichu ti waphaamaxa.c Mwawiihiiha, Yesu aahi: “Kinnavaha ekumi aka.” (Yoh. 10:​17, 18) Achu apiili oophaameya oopacerya, Atamu ni Eva, yaamurukunuwela Yehova nave yaakhala mmakupa a Satana. Moohiyana ni yaawo, Yesu aari ooreheryeya orwa veelaponi yavathi ni wooniherya osivela yoowo aaryeiyeno ni Atiithi awe. Owo aaheerano yeeyo moorweela wa omwiiwelela Yehova mmikhalelo soothene sa okumi awe. (Ahe. 4:15; 5:​7-10) Owo aahititelela okhala oororomeleya Ekumi awe yoothene, ophiyerya owo wiiphiwa va mwiri woohooxiwavo. (Ahe. 12:2) Mmukhalelo yoola owo aahooniherya osivela wawe wa Yehova ni wa nsina Nawe.

13. Ntakhara heeni Yesu aari muchu oophwanelela wooniherya wi Satana aari nawoothe? (Moone tho eruku.)

¹³ Soothene Yesu opankeiye, sohooniherya wi nawoothe ene ti Satana, ohiya Yehova! (Yoh. 8:44) Yesu aamusuwela phaameene Yehova, ompwaha muchu mukina vyakala aakhanle. Wakhanle wi saakhalavo iparipari sawootha seiyo Satana aamootheryeiye Yehova, Yesu aahaala osuwela seiho. Nto hiyaavo yawootha emoharu mano yaari yeeparipari. Mwawiihiiha, Yesu aatitelela okhala aweemeleleya aakihaka nsina na Yehova. Naamwi yaakhalaka ntoko wi Yehova aarimmunyanyala, Yesu aaheemererya okhwa ohiya waarukunuwela Atiithi awe oosivela.—Mat. 27:46.d

“KOOMALIHA MUTEKO YOOWO MUKIVANHAANYU”

14. Yehova ochuwenle hai ororomeleya wa Yesu?

¹⁴ Mu nivekelo nenlo Yesu aapankeiye ohiyu ahaakumve okhwa, owo aahi: “Koomaliha muteko yoowo mukivanhaanyu wi kiphare.” Yesu aanaroromela wi Yehova aahaala omuchuwela wa nthowa na ororomeleya wawe. (Yoh. 17:​4, 5) Nave Yesu aaheerano phaama mu waaroromela Atiithi awe. Yehova haaweemerenrye wi owo atitelele okhala mmahiye. (Saw. 2:​23, 24) Yehova aahimviiha Yesu mmahiye nave aahimvaha nipuro navasuluxa, wirimu. (Afi. 2:​8, 9) Moovira wa elukuluku, Yesu aakhala Mwene a Omwene wa Muluku. Nave tiheeni Omwene owo onahaalaaya weera? Yesu oonivaha naakhulo mu nikupa nanaawiili na nivekelo na ntakiheryo, ariki: “Omwene anyu orwe. Okhwela wanyu weereye, ntoko wirimu, hiihaa tho vathi va.”—Mat. 6:10.

15. Echu taani ekina Yesu onahaaleiye opaka?

¹⁵ Moohilekela, Yesu onahaala owana ni amwiicani a Muluku ni waatoloxa achu oonanara murima mu Armaketo. (Wup. 16:​14, 16; 19:​11-16) Voocharela, Yesu onahaala omurihela Satana mu “nlici nawiixa,” mwemmo Satana oneereiye ahiweryeke opaka tho echu, ntoko wi orimukhwa. (Wup. 20:​1-3) Yesu onahaala okookiherya murecele veelaponi yavathi ni waakhaviherya achu okhala oophaameya variyari va Omwene awe wa Iyaakha Miili. Owo tho onahaala waaviiha achu mookhwani ni weeriha elapo yoothene okhala parataiso. Wookuchulani, yookhwela ya Yehova enahaala waakhwanela!—Wup. 21:​1-4.

16. Wamala Olamulelo wa Iyaakha Miili, okumi onahaala okhala hai?

¹⁶ Ti mwawiihai okumi onahaalaaya okhala omanle Olamulelo wa Iyaakha Miili? Yoocheka ni ohiphaameya sinahaala ocakanela. Hokhala woochuneya achu ovekaka nikhurumuwelo wa soocheka saya. Hokhala tho woochuneya wa achu woopola naari mano mukhaviheryi, naari mulipa a mukucho wi ekhale asinthamwene a Yehova. Wookuchulani, ‘mwiicani ookuchula oni amalihiwe ti okhwa [yoowo otannyiwe ni Atamu]’. Mmahiye hokhalamo echu, nave alipa ookhwa enamviihiwamo. Oothene veelaponi enahaala okhala oophaameya!—1 Ako. 15:​25, 26.

17-18. (1) Tiheeni enahaala weereya omakuchuwelo wa Olamulelo wa iyaakha Miili? (2) Tiheeni Yesu onahaaleiye opaka omakuchuwelo wa Olamulelo awe? (1 Akorintu 15:​24, 28) (Moone tho eruku.)

¹⁷ Echu ekina yavameekhaaya enahaala weereya omakuchuwelo wa Olamulelo wa Iyaakha Miili. Echu taani yeeyo? Haavo tho onahaala okhwaaka minikwa wi Yehova, Muluku aweela ni awookololowa. Mwawiihai? Mu emaca ya Eteni, Satana aamootherya Yehova wi hanaalamulela achu moosivela nave wi owo nawoothe. Mwawiihiiha, omakuchuwelo wa Olamulelo wa iyaakha Miili, mukhalelo wa Yehova onahaala weelihiwa. Opwaha soothene, owo onamooniherya wi Tiithi awiirimu oosivelaxa.

¹⁸ Vookuchulani, mu ekwaha emoha wa soothene, enahaala wooneya wi sawootha sa Satana ti satheru. Olamulelo awe wamala, tiheeni Yesu onahaaleiye weera? Apwanne owo onahaala ochariha yootakiherya ya Satana ni ommwareela Yehova? Hooye! (Mwaalakhanye 1 Akorintu 15:​24, 28.) Yesu onahaala waakookiherya Olamulelo Atiithi awe. Owo onahaala wiiwelelaka Olamulelo wa Yehova. Chiryeene, moohiyana ni Satana, Yesu ori ooreheryeya ohiya soothene wa nthowa na omusivela wawe Yehova.

19. Nsina na Yehova nnataphulela eheeni wa Yesu?

¹⁹ Yehova aakhalano mathowa oophwanelela a omvaha nsina Nawe Yesu! Nave Yesu aweemelela moophaameya Atiithi awe. Vano, nsina na Yehova nnataphulela eheeni wa Yesu? Nnataphulela soothene wa yoowo. Ophiyerya wi Yesu oovaha okumi awe ntakhara nsina nenla. Nave omakuchuwelo wa Olamulelo wa Iyaakha Miili, owo onahaala waakookiherya soothene Atiithi awe. Nni ncharihe hai yootakiherya ya Yesu? Nnahaala woona naakhulo mu yoohuserya enacharela.