Yehova Ooniroromeliha wi Elapo Enahaala Okhala Parataiso

1. Muchaka taani mulipa a miririmu Yesaya aalonceiye wa Aisarayeli akhwaawe?

MULIPA a miririmu Yesaya olonce wi Yehova ‘Muluku a eparipari.’ Mu Ehepiri, masu awi ‘eparipari’ enataphulela ‘aamen.’ (Yes. 65:16, PMM, enoota) Masu awi ‘Aamen’ enataphulela “ekhale hiihaa” naari “chiryene.” Vaavaa masu awi ‘aamen’ enaphariheliwaaya Mpiipiliyani wi emuloce Yehova naari Yesu enooniherya wi echu vyakala eparipari. Mwawiihiiha, michaka sa Yesaya wa Aisarayeli saari sookwakwaleya: Yeeyo Yehova onaroromeliheiye, ilukuluku soothene ti yeeparipari. Yehova ohooniherya wi ela eparipari moorweela wa waakhwaniherya soororomeliha sawe soothene.

2. Ntakhara heeni nnaphwanelaahu ororomela soolaiherya sa Yehova vooloca sa omwaahiyu ahu, nave makoho taani nnahaalaahu othokororya?

² Apwanne nnahaala tho ororomela wi soororomeliha sa Yehova vooloca sa omwaahiyu sinahaala waakhwanela? Waacamela iyaakha 800 evinre elukuluku ya Yesaya, murummwa Paulo oothariha ntakhara heeni soororomeliha sa Muluku siraaya seeparipari ilukuluku soothene. Paulo ooloca: “Muluku harwa ootha.” (Ahe. 6:18) Hiihaa ntoko ehime emohamoha ehinavahaaya maahi aphaama ni maahi a maakha, Yehova Ehime ya eparipari, owo hanootha. Mwawiihiiha, nnanwerya ororomela moomalela ichu soothene Yehova olonceiye, ophitaanyerya soororomeliha sawe soothene ntakhara omwaahiyu ahu. Mmwaha yoola, nnahaala othokororya makoho ala: Tiheeni Yehova ororomelinheiye onivaha omwaahiyu? Ni mukhalelo taani Yehova onaniroromeliheiye wi soororomeliha sawe sinahaala okhala seeparipari?

TIHEENI YEHOVA ONAROROMELIHEIYE?

3. (1) Yoororomeliha taani alapeli a Muluku anasiveliwaayano vancipale? (Wupulula 21:3, 4) (2) Ti mwawiihai akina anaakhulelaaya vaavaa nnaaleelaahu yoororomeliha yeela?

³ Yoororomeliha nnahaalaahu othokororya ti echu yeeyo alapeli a Muluku anasiveliwaayano orukurerya elapo. (Mwaalakhanye Wupulula 21:3, 4.) Yehova oororomeliha wi enahaala ophiya elukuluku yeeyo ‘oneeraaya ohikhalevo okhwa, naari tho othanana, naari wunla, naari sawiicela.’ Ancipale a hiyo ninnapharihela muchaka yoola wa Mpiipiliyani wooreera vooloca sa okumi Mparataiso vaavaa nnaalaleeryaahu akina. Ti mwawiihai achu akina anaakhulelaaya vaavaa nnaaleelaahu sa yoororomeliha yeela? Awo ennaloca: “Eyo ti yaphaamaxa, nyenya nkineemererya wi enahaala weereya.”

4. (1) Tiheeni Yehova aasuwenleiye nave ororomelinheiye? (2) Ohiya pahiru onivaha yoororomeliha, echu taani ekina Yehova eenreiye?

⁴ Eparipari wi vaavaa aamveerenleiye murummwa Yohani orepa sa yoororomeliha ya okumi Mparataiso, Yehova aahisuwela wi olelo naahaala waaleelaka achu akina sa yoororomeliha yeela vaavaa nnalaleeryaahu michaka sa Omwene. Yehova tho aahilaiherya wi ancipale yaahaala woonaka yoororomeliha yeela ntoko ‘ichu ivyaani’ soovila weemereryiwa. (Yes. 42:9; 60:2, BNM; 2 Ako. 4:3, 4) Mwawiihiiha, ti mwawiihai nnahaalaahu waakhaviherya akina—vamoha ni hiyaano—ororomela wi nnahaala waakhela mareeliho anatharihiwa mu Wupulula 21:3, 4? Tahi wi pahiru Yehova opanke yoororomeliha yeela, nyenya tho oovahererya mathowa ananeeriha ororomela wi enahaala weereya. Mathowa taani owo ovaherenryeiye?

YEHOVA OONIROROMELIHA WI SOOROROMELIHA SAWE SINAHAALA WEEREYA

5. Mathowa taani nryaahuno a ororomela yoolaiherya ya Muluku vooloca sa Parataiso nave ti woowi nnahaalaahu ophwanya?

⁵ Ninnaphwanya mathowa a ororomela yoororomeliha ya Yehova ya onivaha Parataiso mu iversikulu inacharela. Ninnaalakhanya: “Yoole aakiranthe vamunyukhuni aahi: ‘Nkoona! Kinnapaka ichu soothene ivyaani.’ Owo tho aahi: ‘Orepe, ntakhara masu yaala toororomeleya ni eeparipari.’ Owo tho aakileela: ‘Ala aheereya! Miyaano ka Alfa ni Omeka, oopacerya ni ookuchula.’”—Wup. 21:5, 6.

6. Ntakhara heeni soororomeliha sinaphwanyeya mu Wupulula 21:5, 6 sinnalipiha nroromelo nahu mu yoororomeliha ya Muluku?

⁶ Ntakhara heeni michaka seiya sa Mpiipiliya sinnalipiha ororomela wahu yoororomeliha ya Muluku? Mu iversikulu seiha, yeeyo Yehova onapakeiye enanwerya olikanyihiwa ni waasinaara etukumentu yeeyo enaniroromeliha wi owo moohikhwa minikwa onahaala waakhwaniherya yoororomeliha awe.b Yoororomeliha ya Muluku enaphwanyeya mu Wupulula 21:3, 4. Nyenya, mu iversikulu 5 ni 6, ninnamphwanyamo asinatura a Yehova yoowo onaniroromeliha wi yoororomeliha awe ti yeeparipari. Vano hankooni noone mwawiiseela masu Yehova opharihenleiye mu yoororomeliha awe.

7. Echu taani eri yavameekhaaya wa masu oohulela a yoororomeliha ya Muluku nave ntakhara heeni eparipari yeela ti yoochuneya?

⁷ Yoororomeliha ya Muluku enapacerya ni masu ala oohulela: “Yoole aakiranthe vamunyukhuni aahi.” (Wup. 21:5) Masu yaala tavameekhaaya nthowa nawi ela ekwaha emoha ya ikwaha raru Yehova mwaneene onaloceiye mu liivuru a Wupulula. Mwawiihiiha, yoororomeliha ela, nivahereryiwe ohiya ni munkeelo oowerya naari mano ni Yesu yoowo aaviihiwe mookhwani, nyenya ni Yehova mwaneene! Eparipari yeela ennooniherya wi nnanwerya ororomela moomalela yeeyo owo olonceiye voocharela. Ntakhara heeni? Nthowa nawi Yehova ‘hanootha.’ (Titu 1:2) Mwawiihiiha, masu yaawo nnaalakhanyaahu mu Wupulula 21:5, 6 chiryene anahaala waakhwanela.

“NKOONA! KINNAPAKA ICHU SOOTHENE IVYAANI”

8. Ti mwawiihai Yehova onacicimiheryeiye yoororomeliha awe? (Yesaya 46:10)

⁸ Voocharela, nnahaala othokororya masu awi: “Nkoona!” (Wup. 21:5) Masu a Ekiriki ataphuleliwe “nkoona!” annaphariheliwa wiiliwiili mu liivuru a Wupulula. Ereferensiya emoha yoothariha wi masu yaala annaphariheliwa ntoko “mukhalelo wa omuleela mulipa a waalakhanya wi akhale oomaaleleya wi awiriyane phaama yeeyo enahaala olociwa voocharela.” Tiheeni Muluku aalonceiye voocharela? Owo aahi: “Kinnapaka ichu soothene ivyaani.” Eparipari wi Yehova onahaala opaka matorokelo yaala omwaahiyu, nyenya woona wi owo onnaroromela moomalela wi onahaala waakhwaniherya yoororomeliha awe, olonce ntoko wi onnapaka matorokelo yaawo hiihava.—Mwaalakhanye Yesaya 46:10.

9. (1) Masu awi “kinnapaka ichu soothene ivyaani” enaahiwa miteko taani piili sa Yehova? (2) Tiheeni enahaala weereya ni “erimu” ni “elapo yavathi” sikhanle?

⁹ Vano hankooni nthokororye masu oocharela anaphwanyeya mu Wupulula 21:5: “Kinnapaka ichu soothene ivyaani.” Ela enataphulela eheeni? Mu ekapitulu yeela ya Mpiipiliyani, masu yaala enaloca miteko miili sa Yehova—otoroka ni orehererya. Yoopacerya, tiheeni Yehova onahaaleiye otoroka? Mu Wupulula 21:1, ninnaalakhanya: “Erimu yakhalai ni elapo yavathi yakhalai saavira.” “Erimu yakhalai” enaahiwa olamulelo wa epoliitika yoowo onahooleliwa ni Satana vamoha ni masololo awe. (Mat. 4:8, 9; 1 Yoh. 5:19) Ntoko enalociwaaya Mpiipiliyani, “elapo yavathi” enanwerya olociwa sa achu anakhala mummo. (Map. 11:1; Sal. 96:1) Mwawiihiiha, “elapo yavathi yakhalai” enahimmwa achu ootakhala a mmahiku ahu. Yehova hani eeremoona orehererya pahiru “erimu” ni “elapo yavathi” ekhanle, ohiya yeeyo, owo onahaala otoloxa moomalela. Owo onahaala otoroka erimu ni elapo yavathi sikhanle wi atikitherye “erimu evyaani ni elapo yavathi evyaani”—ela tiwi, olamulelo ovyaani ni achu awookololowa.

10. Tiheeni Yehova onahaaleiye weeriha okhala evyaani?

¹⁰ Mu Wupulula 21:5 ninnaalakhanya voocharela yeeyo Yehova olonceiye vooloca sa ichu onahaaleiye opaka ivyaani. Moone wi Yehova halonce: “Kinnapaka ivyaani ichu soothene. Ohiya yeeyo, owo olonce: “Kinnapaka ichu soothene ivyaani.” Yehova onahaala otatuxa elapo yavathi ni achu wi ekhale avyaani, aweerihaka okhala oophaameya. Ntoko Yesaya olohenryeiye, Yehova onahaala weeriha wi elapo yoothene yavathi ekhale yooreera ntoko emaca ya Eteni. Nave onahaala oneeriha okhala avyaani, anipenuxaka oothene ahu moomalela. Oorakala, oohoona ni oohiiwa anahaala openuxiwa, ophiyerya wi yaale akhwile, anahaala oviihiwa mookhwani ni okookela okhala akumi.—Yes. 25:8; 35:1-7.

“MASU YAALA TOOROROMELEYA NI EEPARIPARI. . . . ALA AHEEREYA!”

11. Nlamulo taani ni nthowa taani Yehova amvanheiye Yohani?

¹¹ Echu taani Yehova olonceiye wi anooniherye wi nnanwerya omuroromela yoowo? Yehova aahiloca wa Yohani: “Orepe, ntakhara masu yaala toororomeleya ni eeparipari.” (Wup. 21:5) Yehova oovaha sincipale ohiya pahiru nlamulo na ‘orepa.’ Owo tho oovaha nthowa. Owo oriye: “Ntakhara masu yaala toororomeleya ni eeparipari”—ela tiwi, masu a Muluku toororomeleya nave annaakhwanela. Ninnamuthamalela vancipale Yohani nthowa na wiiwelela nlamulo na ‘orepa.’ Ntoko yookhumelela, ninnawerya waalakhanya vooloca sa yoororomeliha ya Muluku ya onivaha Parataiso ni wuupuwelela mareeliho ootikhiniha nnahaalaahu waakhela omwaahiyu.

12. Ntakhara heeni Yehova aanwerya oloca ni mathowa aphaama: “Ala aheereya!”

¹² Tiheeni Muluku olonceiye voocharela? “Ala aheereya!” (Wup. 21:6) Vano Yehova onnaloca soothene itharihiwe vooloca sa Parataiso ororomelihiwe ntoko wi soheereya. Owo onanwerya oloca hiihaa ni mathowa aphaama nthowa nawi hiyaavo enamuhiiha waakhwaniherya yoolakelela awe. Nyenya Yehova ooloca echu ekina enaniroromeliha wi yoororomeliha awe moohikhwa minikwa enahaala waakhwanela. Echu taani yeeyo?

“MIYAANO KA ALFA NI OMEKA”

13. Ntakhara heeni Yehova olonceiye: “Miyaano ka Alfa ni Omeka”?

¹³ Ntoko elociwaaya woopaceryani, Yehova mwaneene ooloca ikwaha raru mu sawoona sa Yohani. (Wup. 1:8; 21:5, 6; 22:13) Mu sawoona soothene, Yehova aahiloca echu emohamoha: “Miyaano ka Alfa ni Omeka.” Alfa eleetera yoopacerya mu Ekiriki nave omeka eleetera yookuchula. Moorweela wa oloca “miyaano ka Alfa ni Omeka,” Yehova onnanikhaviherya wiiwexexa wi owo apacerya echu, onahaala okwaaxa.

14. (1) Ti liini Yehova aalonceiye “Alfa” nave ti liini owo onahaaleiye omuloca “Omeka”? (2) Yoororomeliha taani enaphwanyeya mu Mapacereryo 2:1-3?

¹⁴ Yehova amanle ompatuxa Atamu ni Eva, Owo aahooniherya yookhwela awe yoopacerya ntakhara achu ni elapo yavathi. Yoorepa ya Mpiipiliyani ennathariha: “Muluku aahaareeliha ii: ‘Murelanesha, musareye elapo ya vathi nave muhooleleke.’” (Map. 1:28, PMM) Mu elukuluku yeele, Yehova mwakuru aahiloca “Alfa.” Owo mookwakwaleya aahooniherya yoolakelela awe: Yaahaala ophiya elukuluku yeeyo muyareriwo woophaameya ni wawiiwelela wa Atamu ni Eva waahaalaaya osareya veelaponi yavathi ni otatuxa eyo okhala parataiso. Mu elukuluku yeeyo yoomwaahiyu, enahaala okhala ntoko wi Yehova onaloca “Omeka.” Amanle okwaaxa opatuxa “erimu ni elapo ya vathi ni soothene sa mwemmo,” Yehova aavaha yoororomeliha. Eyo enaphwanyeya mu Mapacereryo 2:1-3, PMM. (Mwaalakhanye.) Yehova aahitikitherya nihiku naneethanu napiili ntoko naweela wa yene. Ela enataphulela eheeni? Yehova aahiroromeliha wi aahaala waakhwaniherya yookhwela awe ntakhara achu ni elapo yavathi aahihenseru. Eyo yaahaala waakhwanela moomalela omakuchuwelo wa nihiku naneethanu napiili.

15. Ntakhara heeni Satana akhweya aanuupuwela wi aanwerya omuhiiha Yehova waakhwaniherya yookhwela awe?

¹⁵ Emanle Atamu ni Eva ommwareela Muluku, awo yaahikhala alipa oocheka nave yaahaaraviha yoocheka ni okhwa muyareriwo awe. (Aro. 5:12) Nthowa na yeela, yooneya ntoko wi Satana aahinanariha yookhwela ya Muluku ya osareiha elapo yavathi ni achu oophaameya ni awiiwelela. Apwanne Satana aahiwerya omuhiiha Yehova waakhwaniherya yoororomeliha awe? Akhweya Satana uupuwela wi Yehova hi awerye waakhwaniherya yoororomeliha awe. Akhweya owo uupuwela wi Yehova aahaala omwiipha Atamu ni Eva ni ompatuxa mutheli muvyaani oophaameya wi aakhwaniherye yookhwela Awe ntakhara achu. Nyenya waakhanle wi Muluku oheerano yeeyo, Musaserya aahaala oloca wi owo nawoothe. Ntakhara heeni? Nthowa nawi, ntoko elociwaaya mu Mapacereryo 1:28, Yehova aalonce wa Atamu ni Eva wi muyareriwo aya waahaala osareya veelaponi yavathi.

16. Ntakhara heeni Satana aanwerya wuupuwela wi Yehova haano owerya?

¹⁶ Echu taani ekina akhweya Satana uupuwenleiye wi Yehova aahaala opaka? Akhweya Satana uupuwela wi Yehova aahaala weemererya wi Atamu ni Eva yaayare anamwane oohiphaameya yaawo yahaahaala owerya okhala oophaameya. (Ekl. 7:20; Aro. 3:23) Mmukhalelo yoola, Musaserya aahaala oloca wi Yehova haano owerya. Ntakhara heeni? Nthowa nawi hiyaahaala waakhwanela yookhwela ya Muluku, eyo tiwi, muyareriwo woophaameya ni wawiiwelela wa Atamu ni Eva osareya veelaponi yavathi.

17. Mukhalelo taani Yehova oreherenryeiye waakaaha wa Satana ni mutheli oopacerya nave ni yookhumelela taani enahaala okhalavo? (Moone tho eruku.)

¹⁷ Satana akhweya haanyihenryeru yeeyo Yehova aahaaleiye opaka. Yehova aahikhalano mukhalelo waphaamaxa wa orehererya nikacamiho wi aakhwaniherye yookhwela awe, naamwi Satana, Atamu ni Eva yaammwarenle. (Sal. 92:5) Yehova aaheemererya wi Atamu ni Eva ekhaleno anamwane, nave Yehova aaheeriha wi masu awe ekhala eeparipari. Owo hanootha. Nave wakhala wi Yehova ooloca wi onahaala weerano echu vyakala, hiyaavo enahaala omooceeliha. Owo ohooniherya wi yookhwela awe yaahaala waakhwanela, moorweela wa ovahererya ‘muyareriwo’ yoowo aahaala waavuluxa anamwane awiiwelela a Atamu ni Eva. (Map. 3:15; 22:18, BNM) Muyareriwo owo waahaala ovaha okumi ntoko yawoopola wi aavuluxe achu, Satana hantonko oweherya makuchuwelo yaala! Ntakhara heeni? Nthowa nawi mukucho wa woopola onathipeleya mu osivela ohinakota. (Mat. 20:28; Yoh. 3:16) Satana haano mukhalelo yoola, owo tanrima. Mwa yeeyo, tiheeni enahaala weereya ni marehereryo a mukucho wa woopola? Omakuchuwelo wa Olamulelo wa Iyaakha Ncikhwi, muyareriwo woophaameya wa Atamu ni Eva onahaala okhala mparataiso veelaponi yavathi —hiihaa ntoko Yehova aachuneiye woopaceryani. Mu elukuluku yeeyo, Yehova onahaala wi “Omeka.”

MUKHALELO TAANI NNALIPIHAAHU OROROMELA WAHU YOOROROMELIHA YA YEHOVA YA ONIVAHA PARATAISO?

18. Soororomeliha taani raru Muluku onanivaheiye? (Moone ekaaxa “Mathowa Mararu wi Nroromele Soororomeliha sa Yehova.”)

¹⁸ Mmwaha yoola, noothokororya mathowa yaawo enanlekecha wi elapo enahaala okhala parataiso. Tiheeni nnaphwanelaahu oloca wa akina wi naaroromelihe wi ela enahaala weereya? Yoopacerya, Yehova tonapaka yoororomeliha eyo. Liivuru a Wupulula onnathariha: “Yoole aakiranthe vamunyukhuni aahi: ‘Nkoona! Kinnapaka ichu soothene ivyaani.’” Owo ookhalano miruku, owerya ni nchuno wi aakhwaniherye yoororomeliha awe. Yanawiili, Yehova oosuwela wi yeeyo onaloceiye mweeparipari enahaala weereya. Ni mathowa aphaama ooloca: “Masu yaala toororomeleya ni eeparipari. . . . Ala aheereya!” Yaneeraru, hiyaavo enahaala omuhiiha Yehova okhwaaniherya yeeyo opacenryeiye, ti nthowa nene owo olonceiye: “Miyaano ka Alfa ni Omeka.” Yehova onahaala wooniherya wi Satana mulipa awootha nave hawerya ohiiha waakhwanela wa yookhwela ya Yehova.

19. Vaavaa achu anakhwaaya minikwa wa yoororomeliha ya Muluku ya Parataiso, tiheeni munaphwanelaanyu weera?

¹⁹ Muupuwele wi vaavaa munaaleelaanyu achu vooloca sa yoororomeliha ya Yehova, nyuwaano munnalipiha omuroromela wanyu yoowo. Ekwaha yoocharela muneeraanyu mwaalakhanye yoororomeliha yootannya murima ya Parataiso onoorwa ntoko enatharihiwaaya mu Wupulula 21:4, nave owo aloca: “Apwanne chiryene eyo enahaala weereya,” tiheeni mwaahaalaanyu weera? Munoona hai omwaalakhanyerya ni omutharihela iversikulu 5 ni 6? Muloce mukhalelo Yehova onooniheryeiye wi onahaala waakhwaniherya yoororomeliha awe.—Yes. 65:16.