Ireferensia Inaphwanyeya va Yoochariha ya Muthukumano Okumi ni Muteko Ahu Weekristu
4-10 A MARSU
MUHAKHU WA MASU A MULUKU | AROMA 12-14
“Enataphulela Eheeni Wooniherya Osivela Weekristu”
(Aroma 12:10) Mukhwelaneke mukina ni mukhwaawe nniphwanya. Muukhuweleke ocicimihana.
it-1 epaax. 59
Osivela Otokweene
Osivela wa onna (Gr., phi·la·del·phiʹa, mmasu makina, “omusivela munna”) yoowo onaphwanela okhalavo variyari va anna mmuloko Weekristu. (Aro 12:10; Ahe 13:1; moone tho 1Ped 3:8.) Mwawiihiiha, waataana variyari va anna mmulokoni onaphwanela okhala woolipa, hiiha ntoko eneereyaaya ni amusi ahu. Naamwi anna a mmulokoni yooniheryaka osivela ovinyerya khalai, awo annaceenyeryiwa otitelela waaceererya osivela waya.—1Tes 4:9, 10.
Masu a Ekriki phi·loʹstor·gos, yaawo anataphulela “okhalano osivela woohimala,” anaphariheliwa wa muchu yoowo opanke onthamwene woolipa ni muchu mukina. Mathipelo a osivela woohimala ntoko yoola ti, sterʹgo, masu yaawo wiiliwiili anaphariheliwa wi ethoonyerye onthamwene woophacuwano, ntoko variyari va achu a echoko emoha. Murummwa Paulo aahaaceenyerya Akristu wi yunnuwihe mukhalelo yoola wa osivela. (Aro 12:10) Paulo tho aaloca wi mahiku ookuchula achu yaahaala okhala “oohikhoveleleya” (Gr., aʹstor·goi) nave achu a mukhalelo yoowo anaphwanela okhwa.—2Tim 3:3; Aro 1:31, 32.
(Aroma 12:17-19) Muhimukookiherye muchu yoonanara yeeyo owerenleiyeni. Mwaavyeke weera yaphaama vamiithoni va achu oothene. 18 Wa nyuwo aneene, mweereryeke okhala mmureceleni ni achu oothene. 19 Oosiveliwa, muhinleke ikuhu, nto mmuhiyerye Muluku esara, ntakhara woorempwa wi: ‘Wunla ekuhu ti waaka, kinarwa kaakookiherya,’ Apwiya tanaloca.
w09 15/10 epaax. 8 epara. 3
“Mweereryeke Okhala Mmureceleni ni Achu Oothene”
Mwaalakhanye Aroma 12:17. Paulo ooloca wi vaavaa nnakhalihiwaahu moonanara hannaphwanela okookiherya yoonanara. Ochariha miruku seiha ti woochuneya xaxaxa variyari va ichoko seiho akina ahinamurumeela Yehova. Ntoko yootakiherya, Mukristu yoowo orino oothelana awe ohiri Namoona akhweya onaphwanela ovilela wi ahikookiherye masu oophuca a oothelana awe. Hiyaavo echu yaphaama enakhumelela wakhala wi ‘ninninla ikuhu.’ Moohiyana, eyo enamwaaceererya mwaha.
w07 1/7 ipaax. 24-25 ipar. 12-13
“Muhimukookiherye Muchu Yoonanara Yeeyo Owerenleiyeni”
Miruku soocharela sa Paulo vooloca sa mukhalelo wa waakhaliha achu a okhwipi ni mpuwa mwa muloko ti iha: “Muhimukookiherye muchu yoonanara yeeyo owerenleiyeni.” Masu ala, yookhumelela yoophwanelela ya yeeyo owo aalonceiye woopaceryani, ariki: “Wiicaneno yoonanara.” Mwawiihiiha, muchu aahaala owerya hai oloca wi onniicanano yoonanara, aniiha aakookiheryaka akina yoonanara? Weerano yeeyo yaahaala okhala yoohiyana ni osivela “woohiwoka.” Voocharela Paulo aaloca: “Mwaavyeke weera yaphaama vamiithoni va achu oothene.” (Aro 12:9, 17) Nni nipharihele hai miruku seiha?
Woopaceryani, mu ekaarata awe wa Akristu o Korinto, Paulo aarepa vooloca sa wiikariwa yoowo arummwa yaakumannaayano. Owo aaloca: “[Hiyaano] ntheteiwe ntoko echu yoothatiwano vamiithoni wa elapo yavathi, nari wa ankeelo nari tho wa achu. . . . Naaphuciwaka, ninnareeliha; niikariwaka, ninnavilela. Naalociwaka moonanara, ninnakhula mwaphaama.” (1 Kor 4:9-13) Moolikana, Akristu eeparipari olelo annooniwa ni achu a elapo yoothene. Vaavaa achu yaawo ananirukurerya anoonaaya miteko sahu saphaama nnapharaahu naamwi neereliwaka soonanara, akhweya eyo enanweeriha ochuna owiriyana michaka sahu.—1 Ped 2:12.
(Aroma 12:20, 21) Ohiya yeeyo, Mwiicani aa avoliwa etala, omvahe yoolya; akhala ni nthanana, omvahe maahi oowurya. Hiiha onamuukelela makhala a mooro va muru. 21 Muhivoothiwe ni yoonana nto ni yaphaama muvoothe yoonanara eyo.
w12 15/11 epaax. 29 epara. 13
Mukhurumuwelaneke Mukina ni Mukhwaawe
Vakina vaya, akhweya munanwerya omukhaviherya muchu yoowo oweerenleni yoonanara ocicimiha meecelo Eekristu. Murummwa Paulo aarepa: “Mwiicani aa avoliwa etala, omvahe yoolya; akhala ni nthanana, omvahe maahi oowurya. Hiiha onamuukelela makhala a mooro va muru. Muhivoothiwe ni yoonana nto ni yaphaama muvoothe yoonanara eyo.” (Aro 12:20, 21) Mukhalelo anyu woomaaleleya variyari va yoonanara, onanwerya omaaliha owali otokweene ni ocicimiherya makupa aphaama a achu. Moorweela wa wooniherya omoriwa ikharari—ophiyerya tho okhala eepewe—wa muchu yoowo oneerenle yoonanara, nyuwaano munanwerya omukhaviherya ohuserya iparipari sa Mpiipiliyani. Moohipwacha mukhalelo taani, naakhulo nanyu naphaama ninnamvaha muchu owo ekari ya woona meecelo aphaama nyuwaano munooniheryaanyu.—1 Ped 2:12; 3:16.
Mphwanye Muhakhu Woomunepani
(Aroma 12:1) Wanthowa nenla, asinnaka, kinnoovekaani mwa ikharari sa Muluku, wi nveleele miili anyu okhala mukucho mukumi, waweela woomuhakalaliha Muluku, ti omulapa wanyu Muluku weeparipari moophwanelela.
lvs ipaax. 76-77 ipar. 5-6
Nni Nthanle Hai Mathatelo Ahu?
Echu eri yoothene nneeraahu mu ekumi ahu, ennavolowela omulapa wahu Yehova. Paulo aathariha yeela vaavaa aalonceiye ariki: “Mveleele miili anyu okhala mukucho mukumi, waweela woomuhakalaliha Muluku.” (Aro 12:1) Yesu aaloca: “Waakhweleke Apwiya Muluku aa ni murima aa woothene, ni okumi aa woothene, ni miruku aa yoothene, ni owerya waa woothene.” (Mar 12:30) Elukuluku yoothene nnachuna omvaha Yehova yeeyo eri yaphaama. Elukuluku ya Aisarayeli, vaavaa achu yamveleelaaya mwaaxinama ntoko mukucho wa Yehova, yaachuneya wi akhale mwaaxinama aphaama. Wakhala wi mwaaxinama owo haakhanle phaama, Muluku haahaala weemererya mukucho owo. (Onam 22:18-20) Mmukhalelo mmohamoha, mathamalelo ahu ananwerya okhala ooheemereryeya wa Yehova. Mwawiihai?
Yehova onnanleela: “Mukhaleke aweela ntakhara miyo tho ka aweela.” (1 Ped 1:14-16; 2 Ped 3:11) Pahiru Yehova onahaala weemererya malapelo ahu wakhala wi awo taweela naari oohiriipiheya. (Malam 15:21) Yehova heemererya malapelo ahu wakhala wi ninnapaka ichu seiho owo oniiceiye, ntoko ocapaheya, nlala, naari ichu inavolowela masololo. (Aro 6:12-14; 8:13) Nyenya tho malapelo ahu heni emuhakalalihe Yehova wakhala wi mathatelo ahu annavolowela ichu seiha. Iho inahaala weeriha wi malapelo ahu ekhale ooriipiheya naari oheemereryiwa wa Yehova nave enanwerya onanariha onthamwene ahu ni yoowo.
(Aroma 13:1) Achu oothene yaacicimiheryeke asitokweene anlamula; vawi hiwaavo owerya woolamula ohinarweela wa Muluku, nave yaawo arivovo athoonyiwe ti Muluku.
w08 15/6 epaax. 31 epara. 4
Miyaha sa Vasulu Sinarweela mu Ekaarata wa Aroma
13:1—Nthowa taani enalociwaaya wi alamuleli “arivovo athoonyiwe ti Muluku”? Awo athoonyiwe ti Muluku nthowa nawi owo onneemererya wi awo ekhalevo, mmukhalelo mukina, olamula waya waaloheryiwa ni yoowo. Ela ennooneya orweela mwa yeeyo Piipiliya onaloceiye vooloca sa alamuleli ancipale oohiyanahiyana.
11-17 MARSU
MUHAKHU WA MASU A MULUKU | AROMA 15-16
“Mumveke Yehova Nlipiho ni Ovilela”
(Aroma 15:4) Soorempwa soothene sakhalayi saarepeliwe wi inihusiheke, wi niwehereryeke saphaama, nivahiwe ovilela, nlipihiwe ni soorempwa seiyo.
“Mwinleke ni Yawo Aninla”
Yaweereya ya othanana wa Yesu elukuluku ya okhwa wa Lasaro, yaweereya emoha wa sincipale sinaphwanyeya mu Masu a Muluku. Ela henantikhiniha, woona wi “sothene iri mwa Sorempwa sa Muluku irepeliwe wi inihusihe wi, nivilelaka ni nihakalalaka ni masu a nlivru na Muluku, nikhaleno owehererya.” (Aro 15:4) Wakhala wi munnathanana, munanweryatho ophwanya nihakalaliho neeparipari orweela wa soorempwa ntoko iha inacharela:
▪ “Apwiya ari vakhiviru va yale awiniwa murima, annavulusa atxhu awotxeya.”—Sal 34:19, 20.
▪ “Sotxhuna saka sakhala sintxipale, mahakalaliho anyu annakiriryiha murima.”—Sal 94:19.
▪ “Yowo ene Yesu Kristu Pwiya ahu, ni Muluku Tithihu onikhwenle ni mwa ikharari sawe onivan’heiye nihakalaliho nohimala ni oweherya otokotoko, ehakalalihe mirima sanyu ni yolipiheni.”—2 Tes 2:16, 17.
(Aroma 15:5) Muluku yoowo onanivaha ovilela, onanlipiha, oovaheeni murima wa weemereryana ntoko Yesu ori Kristu
“Nyenya Ovilela Okhaleno Muteko Aya Wophameya”
Mumveke Yehova wi oolipiheni. Yehova ti “Muluku òvilela ni òhakalaliha.” (Aro 15:5) Owo pahiru toniiwexexa phaama mukhalelo ahu, moonelo ni muyareriwo ahu. Mwawiihiiha owo oosuwela phaameene yeeyo nnachunaahu wi nivilele. Piipiliya onii: “Annera otxhuna wa yale anatxitximiha, annawiriyana wupuwela waya, nave annàvulusa yawo.” (Sal 145:19) Nyenya, Muluku onahaala waakhula hai mavekelo ahu ntakhara ovilela ni onilipiha?
(Aroma 15:13) Muluku yoowo onanivaha owehererya, oosareiheeni ohakalala woothene ni murecele mmuroromelaka yoowo, wi owehererya wanyu waaceereryeye, mu owerya wa munepa waweela.
w14 15/6 epaax. 14 epara. 11
“Waakhweleke Apwiya Muluku aa”
Yehova onnanivaha ewehereryo yeeyo enanivaha “ohakalala woothene ni murecele” (Aro 15:13) Ewehereryo yeela ennanikhaviherya ovootha saweeha sa nroromelo. Wa awoocihiwa yaawo anatitelela ‘okhala oororomeleya ophiyerya okhwa enarwa echuweliwa ni okumi woohimala.’ (Wup 2:10) Achu yaawo arino ewehereryo ya okhala veelaponi yavathi yaawo eni etitelele okhala oororomeleya anahaala waakhela mareeliho oohimala mu Parataiso veelaponi yoothene. (Luka 23:43) Nnoona hai soowehererya seiha? Hinnakhalano ohakalala ni murecele, vamoha ni omusivela Yehova yoowo ori Mulipa Oovaha “yamahala yoothene yawaakhwana”?—Tiy 1:17.
Mphwanye Muhakhu Woomunepani
(Aroma 15:27) Yeeyo yaahaahakalaliha, vawi aakhalano mankaawu ni aweela murima yaale. Vawi ahuukano ni amalapo samahala sa munepa, onnaphwanela tho waakhaviherya ni sa mmwiilini voomulapa Muluku.
w89 1/12 epaax. 24 epara. 3
“Kinii Koone Osivela Wanyu Waari Weeparipari”
Asinnawe yaawo yaahaari Ayuta moohikhwa minikwa yaakuxeya murima omukhaviherya. Opwaha soothene awo yaakhalano “mankaawu” xaxaxa ni Akristu a o Yerusalemu. Tahi waari o Yerusalemu weiwo saakhummaayawo michaka yaphaama ophiyerya saaphwanya yaawo yaahaari Ayuta? Paulo onnaloca: “Vawi ahuukano ni amalapo samahala sa munepa, onnaphwanela tho waakhaviherya ni sa mmwiilini voomulapa Muluku.”—Aro 15:27.
(Aroma 16:25) Acicimihiwe Muluku, yoowo orino ikuru sa wootikitheryaani mwa michaka yaphaama kinlaleeryaaka sa Yesu Kristu. Michaka yeela ennuupulula soovitheya sakhalayikhalayi.
it-3 epaax. 320 epara. 5
Osuwela Echu Ehaakumve Weereya, Othupanyeryiwa
Mesiya, naari Kristu, aahaala okhala muyareriwo orweela wa yoowo achu oothene eekhaikhai, a imusi soothene veelaponi yavathi, yaahaalaaya waakhela mareeliho. (Map 3:8, 14) Oromoliwa woopacerya wa “muyareriwo” yoola weeren’ye Atamu ni Eva emanle ocheka mu emaca ya Eteni, nyenya ahaakumve oyariwa Apele. (Map 3:15) Ela yeeren’ye echu ya iyaakha 4.000 ehaakumve wuupululiwa “soovitheya sakhalayikhalayi” seiho saamuthoonya Mesiya yoowo ori “muyareryiwo.” Mwawiihiiha, ovinyerya ‘khalayikhalayi’ ela yaakuhiwa weephiini.”—Aro 16:25-27; Éfe 1:8-10; 3:4-11.
18-24 A MARSU
MUHAKHU WA MASU A MULUKU | 1 KORINTO 1-3
“Nyuwaano Mwa Muchu Oomwiilini Naari Mwa Muchu Oomunepani?”
(1 Korinto 2:14) Muchu ohirino Munepa, haneemererya ichu inarweela wa Munepa wa Muluku, onoona wi ti soololo. Chiri, hanawerya osuwela seiye vawi inavareriwa mwa Munepa.
w18.02 epaax. 17 ipar. 4-5
Enataphulela Eheeni Okhala Muchu Oomunepani?
Muchu oomwiilini onuupuwela hai? Muchu oomwiilini onakhalano muupuwelo weelapo, yoowo onatikitheryeya mu minkhela sa nrima. Paulo oothariha muupuwelo yoola ntoko “munepa yowo onerano hihano mwa anamwane óhiwelela.” (Éfe 2:2, Nlakano Nahihano) Muupuwelo yoola onnaavolowela achu ancipale waatakiherya yaale ari vakhiviru vaya. Awo pahiru anapaka yeeyo anoonaaya okhala yaphaama wa yaawo, ehipwanche malakiheryo a Muluku. Muchu oomwiilini naari muupuwelo woomwiilini, onuupuwela xaxaxa ichu soomwiilini nave wiiliwiili onuupuwela wi miteko sawe, ikhorowa, naari ophwanelela wawe ti sookhweleya opwaha echu ekina.
Muchu oomwiilini wiiliwiili onapaka ichu seiyo Piipiliya oniichaneiye “miteko sonanara sa mwili.” (Gal 5:19-21) Mu ekaarata yoopacerya ya Paulo wa Akristu o Korinto, owo aahiromola ichu ikina seiyo achu oomwiilini anapakaaya. Awo haniiwananiheya, anneererya waakawanya achu, annaaceenyerya akina omwaryeya, annasomelana, hanacicimiha ohoolela, nave anneeriha yoolya ni owurya okhala ichu sookhweleya mu ikumi saya. Muchu oomwiilini hanavilela vaavaa oneehiweiye opaka echu yoonanara. (Masi 7:21, 22) Yuta aahiloca wi achu oomwiilini annaphiyerya oyeleela munepa wa Yehova.—Yuda 18, 19.
(1 Korinto 2:15, 16) Nto yoowo ori a Munepa onnavarerya ichu soothene nave vaiye hanawerya ovareryiwa ti muchu. 16 Taani osuwenle muupuwelo a Apwiya, wi anaahusiha yaawo? Nto nrino muupuwelo a Kristu.
Enataphulela Eheeni Okhala Muchu Oomunepani?
Moohiyana ni muchu oomwiilini, muchu oomunepani onnakhapelela phaama onthamwene awe ni Muluku. Owo onniiseemereryiha wi ahooleliweke ni munepa waweela wa Muluku nave onniilipixerya omutakiherya Yehova. (Éfe 5:1) Owo onnapaka soothene wi ahuserye mukhalelo Yehova onuupuweleiye ni woona ichu hiiha ntoko Yehova. Muluku muchu eeparipari wa yene. Moohiyana ni muchu oomwiilini, muchu oomunepani onnacicimiha malakiheryo a Yehova mmakupa oothene a okumi awe. (Sal 119:33; 143:10) Owo hanapaka “miteko sonanara sa mwili” nyenya onniilipixerya wunnuwiha “sawima sa Munepa.” (Gal 5:22, 23) Wi ntharihe sikina vooloca sa yootaphulela ya okhala muchu oomunepani, muupuwele sa yoolikanyiha ela: Muchu osuwenle ompaka nakoso oniichaniwa muchu orino muupuwelo wa ompaka nakoso, nave muchu yoowo chiryene onakhapelela omulapela wawe Muluku oniichaniwa muchu orino muupuwelo woomunepani.
Enataphulela Eheeni Okhala Muchu Oomunepani?
Nni niwerye hai omutakiherya Kristu? 1 Korinto 2:16 onnathariha wi ninnachuna okhalano “mupuwelo wa Kristu.” Aroma 15:5 onnanuupuserya wunnuwiha “merelo [ntoko] a Yesu Kristu.” Wi nikhale ntoko Kristu, nnaphwanela ohuserya mukhalelo uupuweleiye, meerelo awe ni moonelo awe. Yesu aanakhapelela vancipale onthamwene awe ni Muluku opwaha echu ekina. Mwawiihiiha okhala ntoko Yesu onneeriha okhala oolikana ni Yehova. Ti nthowa nene oryaaya wookhweleya ohuserya wuupuwela hiiha ntoko Yesu.
Mphwanye Muhakhu Woomunepani
(1 Korinto 1:20) Ori woowi namiruku? Ori woowi namarepa? Ori woowi namakoha a elukuluku yeela ya mutano? Chiri Apwiya aatatusha okhala ololo miruku sa elapo yeela ya vathi.
it-3 epaax. 480 epara. 1
Miruku
Achu a elapo epharihelaka miruku saya annaakhooca mahala a Muluku moorweela wa Kristu, miruku seiho inooneya okhala ololo; mamwene aya, naamwi akhweya yaari mamwene oowerya ni oothoriha phaama milacu, awo ‘yaamuthomeya va [mwiri] Apwiya a ncicimiho.’ (1Kor 1:18; 2:7, 8) Nyenya Muluku, onnooniherya wi miruku sa elapo ti sa ololo, moorweela wa owuuliha muru achu yaawo anooniwa okhala a miruku ni opharihela miruku seiho awo anoonaaya wi ti sa “ololo wa Muluku,” vamoha ni achu yaawo awo anawoonaaya okhala ‘alolo, ooceecheya, ni oohihuserya’ wi aakhwanihe yookhwela Awe. (1Kor 1:19-28) Paulo aawuupuxerya Akristu o Korinto wi miruku “sa elukuluku yeela ya mutano [ni] yaale analamula elukuluku yeela” sinahaala otatuxiwa ohikhala echweenevo; mwawiihiiha, miruku iha hisaapaka makupa a michaka soomunepani sa murummwa Paulo. (1Kor 2:6, 13) Owo aahaalopola Akristu o Kolosi wi ehiphariwe ni “miruku soowoka satheru [phi·lo·so·phiʹas, naari: osivela miruku] sookhovelela satheru sa achu.”—Kol 2:8; moone iciciri 20-23.
(1 Korinto 2:3-5) Kari ni nyuwo ooceecheya ene, koovaka, kithukumelakasha. 4 Michaka aka ni olaleerya waka hiwaari wa masu a miruku soolekecha, nto waari wa wooniherya ikuru mwa Munepa 5 wi muhiroromeleke miruku soomuchu, nto ikuru sa Muluku.
w08 15/7 epaax. 27 epara. 6
Miyaha sa Vasulu Sinarweela mu Ekaarata wa Akorinto
2:3-5. Alaleeryaka o Korinto, nenlo naari nipuro na miruku sa achu, Paulo akhweya aaniikoha waakhanle wi aahaala owerya waalekecha yaale yanwiriyana. Nyenya owo heemerenrye wi oceecheya naari woova vyakala akhweya aahaaleiye okhalano omweerihe ohaakhwaniha muteko wa olaleerya yoowo aavahiweiye ni Muluku. Mmukhalelo mmohamoha, niheemererye wi mikhalelo soohisuwanyeya inihiihe olaleerya michaka saphaama sa Omwene wa Muluku. Ni nroromelo noolipa, nnanwerya omveka Yehova nikhaviheryo hiiha ntoko Paulo enreiye.
25-31 A MARSU
MUHAKHU WA MASU A MULUKU | 1 KORINTO 4-6
“Miropo Vakhaani, Sinnaruruvaliha Ephepa Yoothene”
(1 Korinto 5:1, 2) Chiri yoovuwa wi mwa nyuwo aakhalamo mararuwo. Mararuwo ene yaawo, ahineereyaru mwa amalapo, ophiyerya mmoha a mwa nyuwo anakonano amwaara apaapaawe! 2 Opwaha mummo munniikushererya! Hiwoopwanenleni othanana wi mmwiikaremo mmulokoni yoowo eenreno yeeyo?
(1 Korinto 5:5-8) aveleeliwe wa Saataana muchu yoowo awiihiihaa wi sa mwiili itoloshiwe wi munepa awe ovulushiwe nihiku na Apwiya. 6 Wiithamala wanyu horeenre. Hamusuwenle wi miropo vakhaani, sinnaruruvaliha ephepa yootheene yaweetheiwa? 7 Mwiireerihe voovihavo miropo sakhalayi, wi mukhale ephepa yahiihaano ehirino miropo, ntoko chiri mukhalenlaanyu. Ti wi, Kristu epucepuche ahu ya Paskha, oohitiwa aheleliwa mukucho. 8 Wanthowa nenla nilye efesta, tahi ni miropo sakhalayi, miropo sa soonanara ni sootakhala, nto ni iphaawu sohiheliwa miropo, iphaawu soohiwoka ni seeparipari.
(1 Korinto 5:13) Ahiri a mmulokoni, Muluku tani aathorihe. Mummalihe oonanara yoola mwa nyuwo.
it-2 epaax. 116
Miropo
Murummwa Paulo aapharihela masu yaala oosiphela vaavaa aalamulenleiye anna a muloko Weekristu wo Korinto wi emwiikaremo mmulokoni mulopwana yoowo aari oocapaheya, vaavaa owo aalonceiye ariki: “Hamusuwenle wi miropo vakhaani, sinnaruruvaliha ephepa yootheene yaweetheiwa? Mwiireerihe voovihavo miropo sakhalayi, wi mukhale ephepa yahiihaano ehirino miropo, ntoko chiri mukhalenlaanyu. Ti wi, Kristu epucepuche ahu ya Paskha, oohitiwa aheleliwa mukucho.” Voocharela, owo aaloca yootaphulela ya masu awi “miropo”: “Wanthowa nenla nilye efesta, tahi ni miropo sakhalayi, miropo sa soonanara ni sootakhala, nto ni iphaawu sohiheliwa miropo, iphaawu soohiwoka ni seeparipari.” (1Kor 5:6-8) Mu yoorepa ela, Paulo onapharihela yootaphulela ya Ifesta sa Ipau Soohiheliwa Miropo Ayuta yaapakaaya, yeeyo yaacharela ni nihiku na Paskha. Hiiha ntoko miropo sinaruruvalihaaya ephepa yoothene, muloko tho, ntoko mwiili mmoha, onnakhala wooriipiheya vamiithoni va Yehova, wakhala wi hiikariwe mmulokoni muchu yoowo onapaka ichu sooriipiheya. Anna o Korinto yaanaphwanela weeravo echu wi eviihemo “miropo” veeri vaya, hiiha ntoko Aisarayeli yahaaphwanelaaya okhalano miropo owannyaya mmahiku a efesta.
it-3 epaax. 545
Satana
Onataphulela eheeni ‘oveleeliwa wa Satana muchu yoowo wi sa mwiili itoloshiwe’?
Aavahaka anna o Korinto sooleeliherya vooloca sa yeeyo yaaphwanelaaya opaka ni munna mmoha a mmulokoni, yoowo aacapaheya ni mwaara a apapa awe, Paulo aarepa: “Aveleeliwe wa Saataana muchu yoowo awiihiihaa wi sa mwiili itoloshiwe.” (1Kor 5:5) Nla naari nlamulo na omwiikara muchu owo mmuloko, ni ohikhalano onthamwene ni yoowo. (1Kor 5:13) Omveleela wa Satana waataphulela omwiikara mmulokoni ni okhala a elapo yeeyo Satana oreiye muluku ni mulamuleli. Mulopwana ola, ntoko “miropo vakhaani” mu “ephepa yootheene,” aari “mwiili,” naari makupa a mwiili a mmulokoni; vano moorweela wa omwiikara muchu ola oocheka, muloko ni mawuupuwelo oomunepani yahaala otolosha “mwiili” veeri vaya. (1Kor 5:6, 7) Mmukhalelo mmohamoha, Paulo aamveleela wa Satana Humeneyo ni Aleshantiri, woona wi awo yaakhooca nroromelo naya.—1Tim 1:20.
(1 Korinto 5:9-11) Kihoorepelaani mu ekaaratha yeele wi muhipwesheherane ni achu ooraruwa. 10 Nto nkilonce sa ooraruwa eelapo yeela ya vathi, nari anrima, nari awiiya, nari awaalapa amuluku atheru. Waari hiihaa, waayokhweleya wi mvinyemo mweelaponi muumu. 11 Vano kinnoorepelaani wi muhipwesheheraneno muchu aweeriwa munna mmulokoni, ooraruwa, anrima, awaalapa amuluku atheru, ooloca moonanara, oohapaliwa, nari awiiya. Awiihiiha muhilyeekeno.
lvs epaax. 241, yooleeliherya
Wiikariwa Mmulokoni
Wakhala wi muchu yoowo opanke yoocheka etokotoko hanacharuwa nave hanachuna ochariha ohoolela wa Yehova, owo hanaphwanela otitelela opaka makupa a muloko. Owo onaphwanela wiikariwa mmulokoni. Wakhala wi muchu ohiikariwa mmulokoni, ninnahiya okhala ni yoowo nave tho ninnahiya olocano. (1 Kor 5:11; 2 Yoh 9-11) Marehereryo yaala a owiikara yaale ahinacharuwa, annaakiha nsina na Yehova vamoha ni muloko. (1 Kor 5:6) Wiikariwa mmulokoni tho yoolaka yeeyo enawerya omukhaviherya muchu ochenke wiiwexexa wi onaphwanela ohiya weera yoonanara wi awerye okookela wa Yehova.—Luka 15:17.
▸ Mwaha 3, eparakrafo 19
Mphwanye Muhakhu Woomunepani
(1 Korinto 4:9) Kinaanyiherya wi Muluku ooneera hiyo arummwa, achu ookuchulela, aalakhanyeryiwe okhwa. Ntheteiwe ntoko echu yoothatiwano vamiithoni wa elapo ya vathi, nari wa ankeelo nari tho wa achu.
w09 15/5 epaax. 24 epara. 16
Ankeelo—“Minepa Soorummwa Waalapa ni Waakhaviherya Achu”
Vaavaa aniikariwaaya, Akristu anakhala ‘ntoko echu yoothatiwano vamiithoni wa ankeelo.’ (1 Kor 4:9) Ni ohakalala otokweene, Ankeelo annoona ororomeleya wahu nave tho annatepa ohakalala vaavaa anamoonaaya mulipa oocheka acharunwe. (Luka 15:10) Ankeelo annoona meecelo aphaama a athiyana Eekristu. Piipiliya onnooniherya wi “muthiyana onnaphwanela olamulelaka muru awe, wanthowa na ankeelo.” (1 Kor 11:3, 10) Chiryene, ankeelo annahakalala owoona athiyana Eekristu vamoha ni akapuro oothene a Muluku a veelaponi yavathi, yiiwelelaka malamulo atikitheryiwe vooloca sa ohoolela. Wiiwelela wuuwu yawuupuxerya wa anamwane yaala a Muluku a wirimu.
(1 Korinto 6:3) Hamusuwenle wi nnarwa naathoriha ankeelo? Nki hayi sookumi yoola?
it-2 epaax. 674
Nlamulo
Nlamulo Avahiwe Ankeelo. Ankeelo, yaawo ari avasuluxa waapwaha achu, anniiwelela malamulo a Muluku. (Ahe 1:7, 14; Sal 104:4) Ophiyerya tho wi Yehova omvaha Satana malamulo nave ichu ikina Satana hanawerya opaka woona wi Yehova hamweemerenrye opaka. (Yobi 1:12; 2:6) Variyari va mwaha woovila, Mikayeli, Munkeelo Mutokweene, aahisuwela nave aacicimiha ophwanelela wa Yehova ntoko Muthoriha a Elapo Yoothene, vaavaa aalonceiye ni Musaserya ariki: “Apwiya yoosamele.” (Yuda 9; mulikanyihe ni Zak 3:2.) Yehova Muluku, oheeriha wi ankeelo oothene emucicimiheke ni omwiiwelela Yesu Kristu. (Ahe 1:6; 1Ped 3:22; Mat 13:41; 25:31; Fil 2:9-11) Mwawiihiiha, moorweela wa nlamulo na Yesu, munkeelo mmoha aarumihiwa wa Yohani ntoko namichaka. (Wup 1:1) Nyenya mu 1 Korinto 6:3, murummwa Paulo onnaaloca anna oomunepani a Kristu ntoko oothanliwa wi yaathorihe ankeelo, mwawooneya masu ala anataphulela wi anna awo anahaala okhaviherya mu othorihiwa wa minepa soonanara.