MIRUKU SAKHALAI NTAKHARA OKUMI WA OLELO

Okhurumuwela moomalela

NLAKIHERYO NA MPIIPILIYANI: “Mukhale . . . nave mulevelelaneke nakhalavo nthowa ni mukhwinyu. Ntoko Apwiya olevelenlayani, ni nyuwotho mwaleveleleke akhwinyu.”—Kolosi 3:13.

Eyo enataphulela eheeni? Mpiipiliyani, yoocheka enalikanyihiwa ni evaale nave okhurumuwela onalikanyihiwa ni ohithokororya evaale. (Luka 11:4) Muteko mmoha wa otholathola wooloca wi mu Soorempwa, nsu na Ekiriki ntaphuleliwe, “okhurumuwela” nnataphulela “ocuwala evaale, moorweela wa ohiveka okookiheryiwa.” Mwawiihiiha vaavaa nnathanlaahu omukhurumuwela muchu yoowo onichekenle, hinnachuna okookiheryiwa echu vyakala. Okhurumuwela wahu woomalela henataphulela wi ninneemererya yoocheka naari ohithokororya yoonanara nipakeliwaahu. Ohiya yeeyo, pahiru nnalakelela ohikuha mathowa, naamwi nrino “nthowa ni mukhwihu.”

Apwanne ennaphariheleya olelo? Ntoko achu oohiphaameya, oothene hiyo ninnacheka. (Aroma 3:23) Mwawiihiiha, ti yamiruku okhalano mathitimanelo a waakhurumuwela akina, nthowa nawi moohipwacha olekela wa elukuluku nnahaala ochuna wi enikhurumuwele. Mwa yeeyo, vaavaa nnakhurumuwelaahu, ninnaphura tho. Mwawiihai?

Vaavaa nnakhapelelaahu esara ni mathowa—ni ohilevelela—nnamwiiphoreiha. Moonelo yoowo woonanara onanwerya onaakha ohakalala, okukuca okumi ahu ni onikumiherya makacamiho. Owo onanwerya onanariha okumi. Mwaha orempwe mu Eyornali ya Amerika College of Cardiology, ni Dr. Yoichi Chida ni muhusiha a psicologia Andrew Steptoe, ariye: “Otholathola wa hiihaano onnooniherya wi esara ni okuha mathowa onnatannya EM [ereca ya murima].”

Mmakupa aphaama, muthokororye mphurelo wa okhurumuwela. Vaavaa nnaakhurumuwelaahu akina moomalela, ninnakhapelela wiiwanana, murecele, ni onthamwene. Echu yookhweleyaxa, ninnooniherya wi nnamutakiherya Muluku, yoowo onakhurumuwela moomalela soocheka sa achu acharunwe nave onaweherya wi neereno emohamoha.—Marko 11:25; Éfeso 4:32; 5:1.