Nroromelo​—Mukhalelo Onalipiha

NROROMELO nookhalano owerya otokweene. Ntoko yootakiherya, naamwi Satana eereryaka opaka soothene wi ananarihe onthamwene ahu ni Muluku, nroromelo nookhalano owerya wa ‘oshipiha mavaka oovarela a mulipa oonanara.’ (Éfe. 6:16) Ni nroromelo, nnanwerya ovootha makacamiho matokotoko yaawo anakhala ntoko mwaako. Yesu aahaaleela oohuserya awe: “Mwaarino nroromelo ntoko mwaammiso wa mustarta, mwii munaamuloca wa mwaako ola, muriki: ‘Ovinyevo, oye vale,’ owo ovinyavo.” (Mat. 17:20) Woona wi nroromelo mukhalelo mmoha onawerya oolipiha onthamwene ahu ni Yehova, nnaphwanela waalikhela makoho ala anacharela: Nroromelo tiheeni? Mukhalelo wa murima ahu onavolowela hai nroromelo nahu? Nni nlipihe hai nroromelo nahu? Taani nnaphwanelaahu omuroromela?—Aro. 4:3.

NROROMELO TIHEENI?

Nroromelo nnavolowela ohiya pahiru weemererya yeeyo Piipiliya onaloceiye. Ophiyerya wi “minepa soonanara sinnaroromela tho [wi Muluku ookhala nave ] inathukumela!” (Tiy. 2:19) Vano, nroromelo tiheeni?

Piipiliya onaloca wi sookhalavo mikhalelo miili sa nroromelo. Yoopacerya, “nroromelo ti osuwela wi ichu nnaweheryaahu ti seeparipari.” (Ahe. 11:1a) Wakhala wi mookhalano nroromelo, munnaroromela ni murima woothene wi ichu soothene Yehova ororomelinheiye ti seeparipari nave wi sinahaala waakhwanela. Ntoko yootakiherya, Yehova aahaaleela Aisarayeli ariki: “Hamunawerya omwarya waataana kipankaaka ni othana naari ni ohiyu wi ohiile naari ohishe. Hiihaatho, honawerya omwarya waataana waka kipankaaka nnamuteko aka Tavite wi ahitholowe.” (Yer. 33:20, 21) Apwanne montoko woova wi nsuwa nnahaala omaala okhuma nave nikhale mmeekuni, eyo yeerihaka wi othana ni ohiyu ohikhalevo? Waakhanle wi hamunakhwa minikwa ni malamulo a maphacuwelo yaawo aneeriha wi nsuwa nrukureryeke mu nipuro naaya noophwanelela, apwanne munnaphwanela okhwa minikwa vooloca sa Mpatuxa a ichu seiya wi hani aakhwaniherye soororomeliha sawe? Mweeparipari hooye!—Isa. 55:10, 11; Mat. 5:18.

Yanaawiili, nroromelo ori “wooniherya wi ichu seiyo nihinoonaahu sookhala.” Nroromelo nnalociwa wi “wooniherya” wa ichu ihinooneya ni miitho nave eri seeparipari. (Ahe. 11:1b) Mmukhalelo taani? Mwaanyiherye wi mwaana ohookohaani, ‘Munasuwela hai wi echeku yookhala?’ Naamwi muhintonko woona echeku, nyuwo mwaahaala omukhaviherya mwaana woona mathowa anooniherya wi echeku yookhala—ntoko omumula, ocikinyeya wa miri naari manasi, ni ikina. Vaavaa mwaana onalekecheyeiye ni yawooniherya, owo onneemererya yawooniherya ya yeeyo eri yoohooneya wa yoowo. Moolikana, nroromelo nnathipeleya mu sawooneya soolipa.—Aro. 1:20.

WI NIKHALENO NROROMELO NNAPHWANELA OVAHA ESISAPO EPARIPARI

Woona wi nroromelo nnathipeleya mu sawooneya, muchu wi akhaleno nroromelo onaphwanela “osuwela yeeparipari.” (1 Tim. 2:4) Nyenya ela tahi yawaakhwanela. Murummwa Paulo oorepa: “Ni murima muchu onnaroromela.” (Aro. 10:10) Muchu hanaphwanela pahiru weemererya eparipari nyenya onaphwanela ovaha esisapo. Eerano yeela, owo onamuceenyeryeya wooniherya nroromelo, eyo ti wi opaka ichu mwawiiwanana ni eparipari. (Tiy. 2:20) Naamwi muchu arino sawooniherya sinalekecha, wakhala wi hanathamalela eparipari mmurimani mwawe onamukhooca soororomeliha ohusenreiye wi akhwaaniherye soochuna sa mwiili awe. (2 Ped. 3:3, 4; Yuda 18) Ti nthowa nene mu ilukuluku sakhalai, oothene yoonne sootikhiniha hiyoonihenre nroromelo. (Nam. 14:11; Yoh. 12:37) Munepa waweela wa Muluku oniimiha nroromelo pahiru mwa achu yaale anasivela yeeparipari.—Gal. 5:22; 2 Tes. 2:10, 11.

TAVITE UNNUWINHE HAI NROROMELO NOOLIPA?

Mwa yaawo yaarino nroromelo noolipa aari Mwene Tavite. (Ahe. 11:32, 33) Naamwiihiiha, tahi wi achu oothene aveemusini ya Tavite yaahooniherya nroromelo. Ntoko yootakiherya, mu ekwaha emoha Eliyape, munna a Tavite yoowo aari mutokweene, aahiyeleela nroromelo vaavaa aamunyemunleiye Tavite achunaka owana ni Koliyati. (1 Sam. 17:26-28) Haavo muchu oyariwe ni nroromelo nave haavo onarava nroromelo wa asitiithi awe, nyenya nroromelo na Tavite naarwenle mu onthamwene yoowo aareiyeno ni Muluku.

Mu Salumu 27, Tavite onnooniherya mukhalelo owo aawenryeiye okhalano nroromelo noolipa. (Ever. 1) Tavite aahuupuwelela saweereya sawe sakhalai ni mukhalelo Yehova aamukhavihenreiye ni amwiicani awe. (Iver. 2, 3) Owo aahithamalela mwawiiseela marehereryo a Yehova ntakhara malapelo. (Ever. 4) Tavite aanamulapela Muluku vamoha ni akhwaawe oororomeleya mu tapernaakulu. (Ever. 6) Owo aanaloca mwawiiseela ni Yehova mu nivekelo. (Iver. 7, 8) Tavite aanachuna tho ohusihiwa mu iphiro sa Yehova. (Ever. 11) Nroromelo naari noochuneyasa wa Tavite ophiyerya okoha: “Ti woowi kaahaalaaka okhalawo waakhanle wi nkaano nroromelo?”—Ever. 13. (NWT).

MUKHALELO WA OLIPIHA NROROMELO NANYU

Nyuwo munanwerya okhalano nroromelo Hiiha ntoko Tavite wakhala wi munnatakiherya muupuwelo ni sookhovelela seiyo sooniheryiwe mu Salumu 27. Woona wi nroromelo nnathipeleya mu masuwelelo awaakhwanela, vaavaa munahuseryaanyu Masu a Muluku ni soolaleeryiwa sinathipeleya Mpiipiliya, onamukhala wookhweya okhalano mukhalelo yoowo wa yawiima ya munepa waweela wa Muluku. (Sal. 1:2, 3) Mmalihe elukuluku muupuwelelaka vaavaa munahuseryaanyu. Waakhala wi ninnuupuwelela mu yeeyo nnahuseryaahu, omuthamalela wahu Yehova onamwaaceereryeya. Vaavaa omuthamalela wanyu Yehova onakhalaaya wawiiseela, nyuwo munamulakelela wooniherya nroromelo moorweela wa omulapela yoowo mmithukumano sa muloko ni olokoha ewehereryo anyu wa akina. (Ahe. 10:23-25) Navetho, ninnooniherya nroromelo vaavaa nnatitelelaahu ‘ovekela moohihiyererya ni ohivela.’ (Luka 18:1-8) Mwa yeeyo, “muvekele moohihiyererya” wa Yehova, muroromele wi ‘yoowo onnoothokororyaani.’ (1 Tes. 5:17; 1 Pet. 5:7) Nroromelo ninnaneeriha weeravo echu, nave saweera sahu, sinnalipihatho nroromelo nahu.—Tiy. 2:22.

MOONIHERYE NROROMELO MWA YESU

Mu ohiyu ahaakumve okhwa, Yesu aahaaleela oohuserya awe: “Mmuroromele Muluku, mukiroromelo tho miyo.” (Yoh. 14:1) Mwawiihiiha nnaphwanela tho wooniherya nroromelo ohiya pahiru mwa Yehova nyenya tho mwa Yesu. Muni mooniherye hai nroromelo mwa Yesu? Hankooni nthokororye mikhalelo miraru.

Mukhalelo woopacerya, mooneke yawoopola ntoko yoovaha ya Muluku wa nyuwo. Murummwa Paulo ooloca: “Kamukumi, nto tahi yoomi ene, ti Kristu ori mukumi mwa miyo.” (Gal. 2:20) Vaavaa munooniheryaanyu nroromelo mwa Yesu, munneemererya wi yawoopola enaphariheleya wa nyuwo, ti mathipelo a oleveleliwa soocheka sanyu, yoovahakaani ewehereryo ya ekumi yoohimala, nave yawooniherya etokweene yawi Yehova onnoosivelaani. (Aro. 8:32, 38, 39; Éfe. 1:7) Ela enamookhaviheryaani ohikhalano moonelo woonanara vooloca sa nyuwo mukhatiinyu.—2 Tes. 2:16, 17.

Mukhalelo wanaawiili, mmwaacamele Yehova mu nivekelo mmathipelo a mukucho wa Yesu. Wa nthowa na yawoopola, nnanwerya ovekela wa Yehova “nihoovaka wi naakheliwe phaama ni omoreliwa ikharari, nikhaviheryiwaka mu elukuluku yoophwanelela.” (Ahe. 4:15, 16; 10:19-22) Ovekela onnalipiha yoolakelelaahu ya ovootha saweeha ntakhara ocheka.—Luka 22:40.

Mukhalelo Waneeraru, omwiiwelela Yesu. Murummwa Yohani oorepa: “Muchu onamuroromela mwaana owo ookhalano okumi woohimala. Nto yoowo onakhooca omwiiwelela mwaana, harwa oona okumi, vawi esara ya Muluku enamukhalaru mwa yoowo.” (Yoh. 3:36) Moone wi murummwa Yohani oohiyaniha wooniherya nroromelo ni ohiiwelela. Mwawiihiiha, nyuwo munnooniherya nroromelo mwa Yesu vaavaa munamwiiwelelaanyu. Nyuwo munnamwiiwelela Yesu moorweela wa ochariha “nlamulo na Kristu,” eyo tiwi, soothene seiye ohusinheiye ni olamulenleiye. (Gal. 6:2) Nyuwo tho munnamwiiwelela Yesu moorweela wa ochariha ohoolela yoowo onavahereryeiye orweela wa “namuteko oororomeleya ni amiruku.” (Mat. 24:45) Moorweela wa omwiiwelela Yesu, munamukhalano ikuru wi nvilele ni makacamiho matokotoko.—Luka 6:47, 48.

“MULIPIHANEKE NI WIINNUWIHANA MU NROROMELO NAWEELASHA”

Mu ekwaha emoha, mulopwana mmoha aahikhuwela wa Yesu: “Kinnaroromela! Kikhaviheryeni ni ohiroromela waka.” (Mar. 9:24) Owo aahikhalano nroromelo vakhaani, nyenya mulopwana ola mwawiiyeviha aahisuwela wi aanachuna nroromelo nawaaca. Moolikana ni mulopwana yoola, oothene ahu mmukhalelo wammoori nnamuchuna nroromelo nawaaca. Nave oothene ahu nnanwerya olipiha nroromelo nahu hiihaano. Ntoko noonnaahu, ninnalipiha nroromelo nahu, vaavaa nnaalakhanyaahu Masu a Muluku ni wuupuwelela yaawo, awo anamunikhaviherya wunnuwiha omuthamalela wahu Yehova. Nroromelo nahu tho nnahaala winnuwa wakhala wi hiyo vamoha ni akhwiihu a munroromeloni, ninnamulapela Yehova, ninnalokoha vanlakani ewehereryo ahu, nave ninnatitelela ovekela. Opwaha yeeyo, vaavaa nnalipihaahu nroromelo nahu, ninnaakhela mareeliho matokweene. Masu a Muluku annanceenyerya: “Anna oosiveliwa, mulipihaneke ni winnuwihana mu nroromelo naweelasha . . . mwiikhapelele meekhiinyu mu osivela wa Muluku.”—Yuda 20, 21.