Enero

Pampa tinemij ipan itlamiyan tonaltin, akin xkuakualtin “noskaltiaj ken xiujtli” (Sal. 92:7). Yejua ika, xtechmojkatlachialtia ika miyekej xok kitlakamatij itlanauatiluan toTajtsin. Aman tej, ¿kenon uelis tiyeskej “ken on kokonej yejuan xnomatij kichiuaj on tlen xkuajli”, niman noijki tikchiuaskej “ken on tlakamej yejuan yochijchikajkej”? (1 Cor. 14:20). Tiknextiaj tlanankilistli ipan tlaxelojli tlen aman tikitstokej, kampa kiteneua ika “akin kitejtemouaj Jehová ueliskej kasikamatiskej nochi”, kijtosneki, kasikamatiskej nochi tlen noneki tlen ika kiyolpaktiskej. Yejuin tlanemilijli noijki tiknextiaj ipan Proverbios 2:7, 9, kampa kijtoua ika Jehová “kejyeua tlamachilistli tlen tepaleui niman kimaka akin melajki”. Kuakon, akin yolmelaujkej uelij kasikamatij “melajkayotl, tlen kuajli niman tlen xkuajli, tlen melaktik kuajli nochiua”. Noé, Daniel niman Job ouel okipixkej yejon tlamachilistli (Ezeq. 14:14). Ikalpan toTajtsin noijki ijkon ipan nochiua. Niman tejua, ¿yotiuel tikasikamati nochi tlen noneki tlen ika tikyolpaktis Jehová? Tla kuajli tikixmati toTajtsin yejon tlen melak mitspaleuis. w18.02 8 párrs. 1-3

Xakaj kipiya kichiualtis se akin nomachtijtika manoapolakti, nion itajuan, nion akin kimachtijtika itech Biblia, nion se tokniuj ipan tlanechikojli. Nion Jehová xkichiua yejon (1 Juan 4:8). Tlen kema, noneki ika ijkuak tikmachtiskej tlen melauak, kuajli tikititiskej ika melak noneki manouika iuan Jehová. Tlen noneki kiyolmapeuas manoapolakti yejua ika kitlasojtla tlen melauak niman ika kineki nemis ken akin kichiuaj ken Cristo (2 Cor. 5:14, 15). ¿Kech xiuitl noneki kipiyas akin kineki noapolaktis? Xnotlajtlani se xiuitl, pampa xnochimej san noijki kiskaltiaj intlaneltokil. Tonajli ijkuak yakaj noapolaktia melak teyolpakti. San ika, ijkuakon noijki noneki titlanemilis itech nochi tlen nonekis timokojtilis niman ijkon tikchiuas tlen otikijto ijkuak otimosentemakak itech toTajtsin. Inomachtijkauan Cristo noneki maka sa “ma kinoyaxkatikan innemilis, yej ma kimaktilikan on yejuan impampa omik niman onoketsteu ipan itlalkon” (2 Cor. 5:15; Mat. 16:24). w18.03 6, 7 párrs. 14-17

¿Ouijtika tikitaj kuajli titeseliskej? Tla kema, kuakon kanaj yotopolouilijkej tipakiskej imiuan tokniuan niman tikinpiyaskej akin ueliskia kuajli imiuan touikaskej nochipa. Tla kuajli titeseliaj techpaleuis maka toselti matomachilikan. Kuakon, ¿tlenon uelis kichiuas ika yakaj maka kuajli mateseli? Matikitakan seki tlen techtsakuilia. Matiknemilikan yejuin: akin tiktekichiuiliaj Jehová melak miyek tikchiuaj niman miyek tekitl tikpiyaj. Ika yejon, sekimej kanaj kimachiliaj ika xkipiyaj tiempo niman xkipiyaj kojtilistli tlen ika kuajli teseliskej. Tla ijkon topan nochiua, kanaj nonekis tikitaskej kenon tikxelouaj totiempo. ¿Uelis tikpatlaskej itlaj tlen techkauilis matikpiyakan tiempo niman kuakon uelis tikinnotsaskej tokniuan tochan noso imiuan tiaskej ijkuak yejuamej technotsaskej? Biblia kijtoua ika maka matikilkauan kuajli titeseliskej. Xtopopolouaj tla tokojtiliaj tinemiskej iuan tokniuan, yejuin itlaj tlen noneki tikchiuaskej. Melauak, kanaj nonekis maka matiuejkauikan ipan seki tlen tikchiuaj tlen xmelak noneki. w18.03 16 párrs. 13, 14

Itech nochimej tlaltikpakchanejkej akin yonenkej, ¿akinon yokiteititi ika melak noyekana ika iespíritu santo toTajtsin? Kema, Jesús. Itech nochi inemilis niman itenojnotsalis, yejua okiteititi ika kinekiya kixkopinas iTaj, Jehová. Itech ken tlanemiliaya, tlen kimachiliaya niman tlen kichiuaya, okiteititi ika noyekanaya ika itlanauatiluan niman ika tlen kinekiya Jehová (Juan 8:29; 14:9; 15:10). Xtlanemili itech tlen teotlajtoketl Isaías okijto itech iteiknelilis Jehová, niman noijki xtlanemili itech tlen Marcos okijto itech tlen okimachili Jesús (Is. 63:9; Mar. 6:34). ¿Tikchiuaj ken Jesús niman tikimikneliaj akin noneki makinpaleuikan? Jesús noijki melak onokojtili tenojnotsas niman temachtis kuajli tlajtoltin. Tla ijkon tikchiuaj, tikteititiaj ika toyekanaj ika iespíritu santo toTajtsin. w18.02 21 párr. 12

Ipan yejuin tonaltin, melak ueyi tekitl tikimiskaltis kokonej (2 Tim. 3:1-5). Kokonej ijkuak uajtlakatij xkimatij tlen kuajli noso tlen xkuajli, pampa ok xkimajmachtiaj intlamachilis. Yejuin nochiua ika “melajkatlalilistli” (Rom. 2:14, 15). Se tlaixmatki itech Biblia kijtoua ika tlajtojli griego tlen notlajtolkuepa “melajkatlalilistli” noijki uelis noijtos ken “imiskaltilis kokonej” niman teasikamachiltia ijkuak kiskaltiaj se konetl niman ijkon manochiua se kuajli tlakatl. Kokonej akin kinmelajkatlaliaj ika tlasojtlalistli kuajli nomachiliaj. Kasikamatij ika maski uelij kitlapejpeniskej tlen kichiuaskej onka kampa noneki noteltiskej, niman kimatij ika nochi tlen kichiuaj uelis kinpaleuis noso kimijtlakos. Ika yejon, tajtin melak noneki makitejtemokan itlayekanalis Jehová niman ijkon kimiskaltiskej inkoneuan. Matikilnamikikan ika tlanemililtin itech kenon tajtin noneki kimiskaltiskej inkoneuan nopapatlatiuj. San ika, ijkuak tajtin kikakij toTajtsin, xnoneki miyekpa notlajtoltijtoskej kenon kimiskaltiskej inkoneuan nion noyekanaskej itech ken tlanemiliaj tlaltikpakchanejkej. w18.03 30 párrs. 8, 9

Telpochtli noso ichpochtli, tla yotimoapolakti sa no tejua noneki timomakixtis, maski tla ok tichanti iuan motajuan. ¿Tleka melak noneki xkilnamiki yejuin? Pampa tikixnamikis niman tikmachilis tlen yeuejkaui xtikmachiliaya ijkuak ok xtitelpochtli katka. Se ichpochtli ijkin okineskayoti: “Miyekpa, ijkuak san tikonetl, xmitspajsolos ika pampa tiiteixpantijkauj Jehová xouel otijkua se pastel ipan kaltlamachtijli ijkuak yakaj okajxilti xiuitl. San ika, ijkuak timoskaltis niman ueyiya ika tiknekis timotekas iuan yakaj, noneki melak kuajli tikmatstos ika tiktlakamatis itlanauatiluan toTajtsin yejon tlen melak kuajli”. Akin noapolaktiaj ijkuak iuejueyimej noijki kixnamikij tlen nion xkichiayaj ika makitlatlata intlaneltokil. Uelis yejuin yes itech innamiktilis, intekiyo noso ika kualoj. Yemelak, maski san kech xiuitl matikpiyakan, tinochimej tikixnamikij tlen kitlatlata tomelajkanemilis itech Jehová (Sant. 1:12-14). w17.12 24 párrs. 4, 5

Xmiyekej yotlajyouijkej ijkon ken David, okse akin nouikaya iuan toTajtsin. San ika, David xokinokauili ika tlen kikualaniaya makixpolo. Okijkuilo: “Xkaua kualankayotl niman xtlalkaui tlauelitalistli, maka xtlauelmiki niman maka tikonchiuas tlen xkuajli” (Sal. 37:8). Se tlen ika noneki tijkauaskej kualankayotl yejua pampa ijkon tikixkopinaj Jehová, akin “xkichiua matiktlaxtlauakan ijkon ken yotitlajtlakojkej” (Sal. 103:10). San ika, tijkauas kualankayotl noijki techpaleuiya ipan totlalnakayo. Pampa kualankayotl uelis kichiuas matlejko topresión, maka kuajli matijyotikan, niman noijki kijtlakoua toyeltsin, toijti niman páncreas. Ijkuak tikualanij, miyekpa xkuajli ken titlanemiliaj. Niman sakin tla yototlaueltijkej uelis melak uejkaujtipan tajmantoskej. Niman noijki, Biblia kijtoua ika “se yojlotl yolseujki kimaka nemilistli tlalnakayotl” (Prov. 14:30). Kuakon, ijkuak se tokniuj techyolkokoua, ¿tlenon techpaleuis iuan matikyektlalikan tlen opanok? Tla tikchiuaj itlajtolyekanalisuan Biblia. w18.01 10 párrs. 14, 15

Yejuin tlajtoltin xkijtosnekij ika David xkeman mikiskia noso ika xontlamiskia ipan Seol, tlen kineskayotia kampa noseuijtokej akin yomijkej. ITlajtol toTajtsin kuajli techijlia ika David oueuentsintiak, omik niman “okitokakej kampa iUeyikalpan David” iuan iuejkachanejkauan (1 Rey. 2:1, 10). Kuakon, ¿itech akinon tlajtoua Salmo 16:10? Yopanoka seki semanas ika omijka niman oyoliujka Jesús ijkuak apóstol Pedro okinmachti itech Salmo 16:10 miyekej judíos niman oksekimej akin onochiujkaj judíos (Hech. 2:29-32, TNM). Okimijli itlaj tlen akin kikaktoyaj kuajli kimatiyaj: ika David omijka niman okitokakaj. Sakin okijto ika David “okajsikamat tlinon nochiuas” niman “otlajtoj itech ika Cristo yoliuis niman noketsteuas ne ipan itlalkon”. Ken ompa noijtoua, yejon xakaj okijto tla xmelauak. Pampa kuajli kiteititisnekiya tlen kijtotoya, Pedro okiteneuj itlajtoluan David ipan Salmo 110:1 (Hech. 2:33-35). Ken okintlanemililti okinpaleui nochimej makineltokakan ika Jesús “toTeko niman yejua Cristo” (Hech. 2:36). Nochimej okiselijkej ika Salmo 16:10 onochiuj ijkuak okiyolitijkej Jesús. w17.12 10 párrs. 10-12

Grupo akin Tlayekana ipan ikalpan toTajtsin nokojtilia kitekitiltis tomintsin ika melajkayotl niman tlamachilistli (Mat. 24:45). Yejuin tokniuan kichiuaj teoyotl niman kuajli kinemiliaj kenon kitekitiltiskej (Luc. 14:28). Miyek xiujtin sakin, apóstol Pablo okinechiko tomin tlen ika kinpaleuiskiaj tokniuan itech Judea niman kuajli okitak ika akin kixeloskiaj manoyekanakan “ken kitocaroua xsan ixpan toTeko, yej no imixpan on tlakamej” (2 Cor. 8:18-21). Ipan yejuin tonaltin, ikalpan toTajtsin noyekana ika inneskayo Esdras niman Pablo. Ika yejon kuajli kiteijlia kenon notekitiltis niman nopopolos tomintsin tlen noselia (Esd. 8:24-33). Ikalpan toTajtsin kitejtemoua kenon xkipopolos miyek tomin niman okitak kenon kitsolos tekitl. Ijkon, tomintsin tlen tiktemakaj, tlen melak ueyi kijtosneki, melak kuajli ken notekitiltia. w18.01 19, 20 párrs. 12, 13

Tlasojtlalistli niman teiknelilistli techpaleuiskej matotlapopoluikan semej iuan oksekimej. Se neskayotl, tla techyolkokoua tlen okijto noso okichiuj se tokniuj, matikyejyekokan tikilnamikiskej ijkuak tejuamej otikijtokej noso otikchiujkej itlaj tlen yakaj okikualani. Yemelak, tiktlasojkamatij intlasojtlalis niman inteiknelilis tokniuan akin otechtlapopoluijkej ijkuak otopopolojkej (Ecl. 7:21, 22). Niman melak tiktlasojkamatij iueyi teiknelilis Jesús tlen yokiteititi pampa san sekan yokinsentlali akin melauak kiueyichiuaj toTajtsin. Tinochimej tiktlasojtlaj sa no yejua toTajtsin, tikteijliaj sa no yejua tlajtoltin niman tikixnamikij sa noijki tlaueltin. Tla tikintlasojtlaj tokniuan, tla tikimikneliaj niman totlapopoluiyaj semej iuan oksekimej, titlapaleuiskej san sekan matinemikan ken ikniujtin, niman tiktejtemoskej tikseliskej nemilistli tlen tikchiaj. Nexikojli uelis kichiuas maka matikselikan tlen tikchiaj. Biblia kipiya neskayomej tlen kiteititiaj ika melak teijtlakoua. Se neskayotl, Caín okinexikolitak ikniuj Abel niman okimikti. Coré, Datán niman Abiram okinexikolitakej Moisés niman okixnamijkej. Niman tekiuaj Saúl okinexikolitak David pampa kuajli onkisaya ipan tlen kichiuaya, niman okiyejyeko kimiktis. w17.11 27 párrs. 9, 10

Tlayekankej akin temelajkatlaliaj kipiya kuajli kitaskej tla tokniuj akin okichiuj se ueyi tlajtlakojli yonoyolkuep noso ka. Yejuin kemantika ouijtika tikitas. Yejuamej kipiya kitaskej kenon tlanemilia, tlenon kimachilia itech tlen okichiuj niman tlenon onka ipan iyojlo (Apoc. 3:3). Akin tlajtlakoua san uelis kititiskej teiknelilistli tla yemelak yonoyolkuep. Jehová niman Jesús ueli kitaj tlen onka ipan toyojlo, san ika, tlayekankej ka. Ika yejon, ¿kenon uelis kitaskej tla yakaj yemelak yonoyolkuep? Kachtopa, kipiya kitlajtlaniliskej toTajtsin tlamachilistli niman asikamatilistli (1 Rey. 3:9). Ika ome, kipiya kitekitiltiskej Biblia niman toamatlajkuiloluan tlen techmaka tekitketl yolmelauak niman ijkon kitaskej tla kajmana tlen ipan panos noso tla kajmana tlen xkuajli okichiuj ixpan toTajtsin, tlen kijtosneki yemelak timoyolkuepas (2 Cor. 7:10, 11, TNM). Kipiya kitaskej tlenon kijtoua iTlajtol toTajtsin itech tlenon kimachiliaj, kenon tlanemiliaj niman kenon nemij akin yemelak yonoyolkuepkej niman akin xnoyolkuepaj. w17.11 17 párrs. 16, 17

Ipan yejuin tonaltin, amoxtin, películas niman tlen nesi ipan televisión kipanoltiaj ken itlaj tlen kuajli niman uelis noselis. San ika, tlen yemelak, xtitetlakamatis kichiua maka kuajli manemi se familia, kampa tomachtiaj ken sakin touikaskej iuan oksekimej. Yejuin melak ijkon panoua, niman yeuejkaui ijkon yonasikamat. Xkonnemili yejuin, yeuejkaui ipan Grecia, tla se tlakatl kimailiaya intajuan, kuakon kikuiliayaj tlen kipiaya. Intlanauatil romanos kijtouaya ika tikmailis motaj san noijki ken titemiktis. Ipan Tlajkuiloltin ika Hebreo niman noijki ika Griego kinnauatiaj kokonej makintlakaitakan intajuan (Éx. 20:12; Efes. 6:1-3). Pampa aman nochiuiyan xok kinekij tetlakamatiskej, ¿tlenon ueliskej kichiuaskej tekoneuan niman ijkon xkinmauas yejuin? Tlanemiliskej itech tlen intajuan yokichiujkej inpampa. Noijki, tla kasikamatij ika Jehová, akin toTaj, yejua akin kineki matitetlakamatikan, kuakon yejuamej tetlakaitaskej. Ijkuak telpokamej kuajli tlajtouaj itech intajuan, kinpaleuiyaj oksekimej telpokamej noijki makintlakaitakan intajuan. w18.01 29 párrs. 8, 9

Ipan yejuin tonajli, se akin kichiua ken Cristo niman yokichiuj se ueyi tlajtlakojli noneki kitejtemos makipaleuikan tlayekankej itech tlanechikojli. ¿Tleka melak noneki makichiua? Kachtopa, pampa Jehová yejua akin kijtoua ipan iTlajtol ika tlayekankej makinpaleuikan akin otlajtlakojkej (Sant. 5:14-16). Ika ome, pampa tlayekankej yokintlalijkej makinpaleuikan tlajtlakolejkej akin yonoyolkuepkej oksejpa kuajli manemikan iuan toTajtsin niman makikajkauakan tlajtlakojli (Gál. 6:1; Heb. 12:11). Niman ika yeyi, pampa tlayekankej kintlaliaj niman kinmachtiaj makinpaleuikan tlajtlakolejkej akin yonoyolkuepkej maka sa melak manoyolkokokan niman maka sa melak manotekipachokan. Jehová kijtoua ika tlayekankej kentla yeskiaj “kampa nopaleuiyaj ijkuak ajakakiyaui” (Is. 32:2). ¿Xmelak ika nochi yejuin techititia iteiknelilis toTajtsin? Miyekej itekipanojkauan toTajtsin melak yonoyolseuijkej ijkuak otlajtokej inuan tlayekankej niman okiselijkej intlapaleuilis. w17.11 10 párrs. 8, 9

Maski matechyolkoko, xkipiya ika tiktejtemoskej touikaskej iuan se tochanejkauj akin yokikixtijkej itech tlanechikojli, ika teléfono, ika mensajes, ika amatlajkuiloltin, nion ika programas tlen kitekitiltiaj Internet noso redes sociales. Maka keman matikpolokan tlamachialistli. Tlasojtlalistli kichia nochi tlemach, niman ika yejon ok tikpiyaj tlamachialistli ika manokuepakan akin okikaujkej Jehová (1 Cor. 13:7). Tla tikitaj ika se nisiuj tochanejkauj peua kipatla ken tlanemilia, uelis tiktlajtlaniliskej toTajtsin ika Biblia makimaka chikaualistli niman makiseli yejuin tlen kiyoleujtika makichiua: “Xuajmokuepa notech” (Is. 44:22). Jesús okijto ika kipiya melak tiktlasojtlaskej xsan ijkon ken tikintlasojtlaj totlaltikpakikniuan. Yejua kineltokaya ika inomachtijkauan yolchikaujkej yeskiaj niman ijkon melajkanemiskiaj maski inchanejkauan kimixnamikiskiaj. Tla imiuan tochanejkauan tikpiyaj tlauejli pampa tikchiuaj ken Cristo, matiktejtemokan itlapaleuilis Jehová niman ijkon tikimixnamiskej tlaueltin (Is. 41:10, 13). Matikmatstokan ika Jehová niman Jesús pakij topampa niman ika techteochiuaskej pampa timelajkanemij. ¿Xmelak ika yejuin melak techyolpaktia? w17.10 16 párrs. 19-21

Ijkuak yakaj tikitaj tlajyouiya pampa iueyi noso kualo, tikikneliaj. Tiktlajtlaniliaj Jehová mauajla iTekiuajyo niman ijkon makipopolo kokolistli niman ika tiueuentsintiaj. Pampa xiyejko yejon tonajli, tikchiuaj nochi tlen tiuelij niman tikinpaleuiyaj akin kinpoloua. Se tlajkuilojketl okijto tlen ipan onochiuj inan, akin kipiaya kokolistli itoka Alzheimer. Se tonajli, inan xouel oajsik tlatenko. Ijkuak kiyejyekouaya tlachipauas, omemej tokniuan siuamej akin miyekpa ikonitayaj otlatetepinijkej ipan puerta. Ijkuak okitakej tlenon yopanoka, yejuamej okijlikej tla kipaleuiskej. Siuatsintli okijto: “Melak nipinaui, san ika, maski”. Kuakon okipaleuijkej, okichijchiuilijkej se té niman opeuj iuan nonotsaj. Ikoneuj melak okitlasojkamat yejon hasta okijto ika nokixtilia isombrero ixpan tokniuan pampa kichiuayaj tlen tenojnotsayaj. Ijkuak tikimikneliaj akin iuejueyimej niman akin kualoj, ¿techyolmapeua matikchiuakan nochi tlen tiueliskej ika tikinpaleuiskej? (Filip. 2:3, 4). w17.09 9 párr. 5; 12 párr. 14

Kipiya ika tiknektoskej tikchiuaskej tlen kuajli inpampa oksekimej “san ichtaka”, noso maski oksekimej xkimatiskej (Mat. 6:1-4). Noijki noneki matikintlakaitakan oksekimej (Rom. 12:10). Jesús okitemakak se kuajli neskayotl ijkuak okimikxipajpak itlatitlankauan (Juan 13:3-5, 12-15, TNM). Yejuamej san ouelkej kuajli okasikamatkej tleka Jesús okichiuj yejon ijkuak okiselijkej espíritu santo (Juan 13:7). Tejuamej kipiya melak tokojtiliskej tiyolyemankej yeskej ijkon ken Jesús niman tikintlakaitaskej oksekimej. ¿Kenon? Xtoueyimatiskej ipampa kech otomachtijkej, ika tlen tikpiyaj noso ipampa tekitl tlen tikpiyaj ipan ikalpan Jehová (Rom. 12:3). Niman xtikinnexikolitaj akin kinuelitiliaj tekitl tlen kichiuaj, tipakij inpampa, maski tla tiknemiliaj ika noijki technamikiya yejon tlakaitalistli, maski san achijtsin, ipampa tlen onochiuj. w17.10 9 párrs. 9, 10

Miyekej tokniuan yokitakej ika kitekitiltiskej iTlajtol toTajtsin ijkuak tenojnotsaj melak ueli kinpaleuiya tlaltikpakchanejkej. Se neskayotl, se tokniuj kontlajpalouaya se tlakatl akin iueyi katka niman kipiaya miyek xiujtin ika kinpouaya torevistas. Niman se tonajli, xsan okikauili Amatl Tekakistilijketl tlen kemach yokiska, noijki okinemili kipouilis se tlaxelojli tlen nesiya ipan yejon revista. Okipouili 2 Corintios 1:3, 4, kampa kijtoua ika Jehová “yejua techiknelijtikaj niman nochipa techyoltlalijtikaj”, niman ika yejua noijki “techyoltlalia ipan nochi on tlin techpajsoloua”. Yejuin melak oajsik ipan iyojlo, niman okitlajtlanili tokniuj oksejpa makipouili yejon tlaxeloltin. Sakin, okijli ika yejua niman isiuauj melak kinpolouaya makinyolseuikan niman ika kinekiyaj okseki kixmatiskej itech Biblia. Ken tikitaj, tiktekitiltiskej iTlajtol toTajtsin ijkuak titenojnotsaj kichiua maajsi ipan inyojlo (Hech. 19:20). w17.09 25, 26 párrs. 9, 10

Ijkuak Satanás okixnamik Jehová, kanaj okinkualani sekimej akin kimelajkatekichiuiliaj toTajtsin ne ipan iluikak. Jehová kimatiya ika kipiaya itlaj kichiuas ipampa ken okixnamijkej, san ika, xonokauili makiyekana tlen kimachiliaya. Kuajli okinemili tlen kichiuas niman ken nonekiya. Yejua nochipa “xnimantsin kualani”, niman yokinankili Satanás ken kinamiki (Éx. 34:6; Job 2:2-6). ¿Tleka yokikauili mapano miyek tonaltin? Pampa xkineki yakaj mapopoliui, kineki ika “nochimej ma noyolpatlakan” (2 Ped. 3:9). Jehová techmaka melak kuajli neskayotl ika xkipiya san totoka tiktlapejpeniskej itlaj tikchiuaskej, noneki kuajli tiknemiliskej tlen tikijtoskej noso tikchiuaskej. Ijkuak nonekis tiktlapejpeniskej itlaj tlen ueyi kijtosneki, matoteltikan niman kuajli matiknemilikan, noijki matiktlajtlanilikan Jehová tlamachilistli niman ijkon tikchiuaskej noso tikijtoskej tlen kinamiki (Sal. 141:3). Tla itlaj tikchiuaj ijkuak xika toyojlo tinemij, uelis techyekanas tlen tikmachiliaj. Ika yejon, miyekej noyolkokouaj pampa okichiujkej noso okijtokej itlaj tlen nion xokinemilijkej (Prov. 14:29; 15:28; 19:2). w17.09 4 párrs. 6, 7

¿Kijtosneki yejuin ika ueyi teopixki Josué nochiuas tekiuaj? Ka. Yejua xuelis nochiuas tekiuaj pampa xualeua itech ichanejkauan tekiuaj David. Ika kitlaliliaj corona san kineskayotia itlaj tlen ipan nochiuas sakin se tekiuaj niman teopixki akin itoka “Itsmolini”. ¿Akinon yejuin? ITlajtol toTajtsin kuajli teititia ika yejua Jesucristo (Is. 11:1). Jesús yejua tekiuaj niman ueyi teopixki, niman kinyekana iluikaktekitkej akin tlaixnamikij ipampa Jehová. Chikauak tekiti niman ijkon tlaltikpaktli tlen temojti maka itlaj kichiuilis ikalpan toTajtsin (Jer. 23:5, 6). Xok uejkauis, kintlanis nochi uejueyimej kalpamej niman ijkon kipaleuis iueyitlayekanalis Jehová niman kinmanauis itekipanojkauan (Apoc. 17:12-14; 19:11, 14, 15). San ika, kachtopa ika yejkos yejon tonajli, Jesús noso “Itsmolini” kipiya ika kichiuas se ueyi tekitl. w17.10 28, 29 párrs. 12-14

¿Tlenon tikchiuaskiaj tla totlaken melak yotsokuilouak niman yomoloniak? ¿Xmelak ika nimantsin tokixtiliskiaj? Noijki ijkon, melak noneki nimantsin matiktlakamatikan tlanauatijli ika noneki matijkajkauakan tlen Jehová kitlauelita. Ipan itonaluan Pablo, okimijli akin kichiuayaj ken Cristo: “Xkajkauakan nochi yejua in tlajtlamach”. Yejua okiteneuj se tlajtlakojli: auilnemilistli (Col. 3:5-9). Ijkuak Biblia tlajtoua itech auilnemilistli, kijtosneki ijkuak notekaj noso okseki tlen kichiuaj akin san sekan nemij niman xnonamiktiaj ixpan tekiuajkej, noijki ompa kalaki ijkuak omemej tlakamej noso omemej siuamej ijkon kichiuaj. Pablo okimijli akin kichiuaj ken Cristo ika makipopolokan nochi tlen xkuajli tlen intech onka. Yejuin techasikamachiltia ika kipiya tiktekitiltiskej nochi tokojtilis niman ijkon tikpopoloskej nochi ileuilistli itech auilnemilistli. Maski ouijtika, kema uelis nochiuas. w17.08 18 párrs. 5, 6

Tlen tikixnamikij amanin, noijki okixnamik teotlajtoketl Miqueas. Yejua onen ijkuak xkuajli tekiuaj Acaz tekiuajtitoya. Ipan yejon tonaltin, melak yotlaijtlakaujka niman tlaltikpakchanejkej melak youelkaj kichiuaj tlen xkuajli (Miq. 7:1, 2). Miqueas kimatiya ika xueliskia kipatlas tlen panotoya. Tla titlaneltokaj ijkon ken Miqueas okichiuj, tiknektoskej tikchiaskej ika Jehová makichiua tlen yokijto. Uelis tikasikamatiskej yejuin tla titlanemiliaj ipan se tlakatl akin tsauktika niman sa kichia makimiktikan. Maski xkineki mayejko yejon tonajli, xuelis itlaj kichiuas, kipiya ika kichias. Tejuamej xijkon, pampa tikmatij ika Jehová yokijto techmakas nemilistli tlen xkeman tlamis niman kichiuas ijkuak kimelaua. Ika nochi toyojlo tiknekij tikchiaskej makichiua yejuin. Techyekanaj yejuin tlajtoltin: “Uelis nenkixikoskej nochi tlajtlamach ikan miyek ijyouilistli niman pakilistli” (Col. 1:11, 12). Jehová kiyolkokoskia tla tejuamej titlajtlatouaj ika yejua uejkaui niman san ika totlauel titlamachiaj (Col. 3:12). w17.08 4 párrs. 6, 7

¿Kenon uelis tikseliskej itlapaleuilis Jehová? Noneki kuajli iuan touikaskej. Yejuin uelis panos tla tochiuaj tiyolyemankej (Sof. 2:3). Akin yolyemankej kichiaj ika Jehová makiyektlali tlen xkuajli nochiua niman makipopolo tlen kintlajyouiltia. Jehová kiselia tlen kichiuaj akin yolyemankej. San ika, noijki toTajtsin “komintlajkali akin xkuakualtin ipan tlajli” (Sal. 147:6b). Yejuin tlajtoltin kakistij chikauak. Tla tiknekij tikseliskej itlasojtlalis Jehová tlen xtekaua niman maka makualani touan, noneki tiktlauelitaskej tlen kitlauelita (Sal. 97:10). Se neskayotl, noneki matiktlauelitakan auilnemilistli. Yejuin kijtosneki ika kipiya tiktlalkauiskej nochi tlen uelis kichiuas matiauilnemikan, ken tikmauisoskej kampa auilnemilo (Sal. 119:37; Mat. 5:28). Yejuin uelis melak ouijtika yes, san ika, tla tochikauaj tikpiyaskej itlateochiualis Jehová. San titetlaniskej ipan yejuin tla tiktlajtlaniliaj itlapaleuilis Jehová. Kuakon, noneki tiktlajtlaniliskej Jehová matechpaleui. w17.07 19, 20 párrs. 11-13

Ika tlemach tlen tikpiyaj okse ken uelis tikteititiskej tlamachilistli, ken ijkuak tiuelij tikinpaleuiyaj oksekimej. Sekimej tokniuan kipiyaj tomintsin, san ika, xuelij kichiuaj chikauak itekiyo toTajtsin nion xuelij yauej ontlapaleuiskej okse país. Maski ijkon, uelis kuajli nomachiliskej pampa tomin tlen kitemakaj kinpaleuiya oksekimej tokniuan akin kitekichiuiliaj toTajtsin. Ika tomintsin tlen tiktemakaj titlapaleuiyaj manochijchiuakan niman manoxelokan amatlajkuiloltin. Noijki ijkon titlapaleuiyaj manotenojnotsa kampa melak xtlaj tlen ika nopanoltiskej niman miyekej kikakij itech toTajtsin. Miyek xiujtin, ipan países ken Congo, Madagascar niman Ruanda, tokniuan kipiya ika kitlapejpeniskej tla kikouaskej tlen kikuaskej noso kinkouaskej biblias, niman kemantika patiojkej ijkon kech kitlanij ipan se semana noso se metstli. San ika, tomintsin tlen kitemakaj miyekej tokniuan yokichiuj nochiuiyan “san se ijki ma onya”. Ipampa yejuin, ikalpan Jehová yokitlajtolkuep niman yokinmakak biblias nochimej familias niman akin nomachtijtokej itech Biblia akin kinekij kixmatiskej Jehová (2 Cor. 8:13-15). w17.07 9 párr. 11

Tlen ipan onochiuj Job uelis techyolseuis pampa teititia ika tlatlatalistin xkijtosnekij ika Jehová kualani touan. Ijkuak tikixnamikij tlatlatalistin, tiueliskej tikpaleuiskej iueyitlayekanalis Jehová. Ijkuak titlaxikouaj, tikyolpaktiaj Jehová niman totlamachialis itech tlen tikchiaj chikaui (Rom. 5:3-5). Tlen ipan onochiuj Job techititia ika Jehová melak tetlasojtla niman teiknelia (Sant. 5:11, TNM). Tla tikpaleuiyaj iueyitlayekanalis Jehová, yejua techteochiuas. Tikmatiskej yejuin techpaleuis titlaxikoskej ika “ijyouilistli niman pakilistli” (Col. 1:11). Tikmatstokej ika uelis ouijtika yes titlanemiliskej itech manoteititi ika san Jehová melauak kinamiki tlayekanas ijkuak tikpiyaj tlaueltin. Ika yejon, nochipa noneki matoilnamiktikan ika melak ueyi kijtosneki tikpaleuiskej iueyitlayekanalis toTajtsin maski san tlenon matikixnamikikan. w17.06 26 párrs. 15, 16

Ipan yejuin tonajli, miyekej kinemiliaj ika noneki kipiyaskej nochi tlen kemach kistika ken tlakentli, teléfonos, computadoras niman okseki tlemach. Kachtopa kitejtemouaj miyek tlemach tlen patioj, pampa kinemiliaj ika tomin niman tikpiyas miyek tlemach melak ueyi kijtosneki xijkon ken itlaj okse. Tejua akin tikchiua ken Cristo, ¿tlenon tikita melak ueyi kijtosneki? Xmotlajtolti: “¿Uejkaujtipan san nitlanemilia itech carros tlen yenkuik kistokej noso tlakentli tlen kemach kistika niman nion xninomachtia achtopa nias ipan tlanechikoltin? ¿Melak miyek tlen nikchiua mojmostla niman xok niuejkaui ijkuak nikchiua teoyotl noso nikpoua Biblia?”. Tla xtotlajpiyaj, uelis peuas tiktlasojtlaskej miyek tlemach tlen uelis tikpiyaskej niman uelis tikitaskej ika yejon melak ueyi kijtosneki xijkon ken totlasojtlalis itech Cristo. Noneki titlanemiliskej itech itlajtoluan Jesús tlen nesi itech tlaxelojli tlen aman tikitstokej. Jesús okimelajkaijto ika “xakaj ueli kintekichiuilia omemej tekomej”. Noijki okijto: “Xakaj uelis kitekichiuilis Dios niman no kinotekimakas on tomin”. Kuakon xuelis tikmakas Jehová nochi tlen tiueli niman noijki san tiktejtemojtinemis tlemach tlen uelis tikpiyas (Mat. 6:24). Pampa titlajtlakolejkej, noneki nochipa tikmapeuaskej “on xkuajli toeleuilis”. Se itech yejuin tiknekis kachtopa tiktejtemos miyek tlemach tlen patioj (Efes. 2:3). w17.05 25, 26 párrs. 15, 16

Pampa titlajtlakolejkej, tejuamej kentla tiyeskiaj yejon kontin tlachijchiujtin ika sokitl. San ika, tlen titenojnotsaj ijkon ken itlaj tlen melak patioj pampa uelis kichiuas matikpiyakan nemilistli tejuamej niman akin techkakij. Pablo, itlatitlankauj Cristo, onochikauj kinmachtis oksekimej itech iTekiuajyo toTajtsin (Rom. 1:14, 15; 2 Tim. 4:2). Pampa kitlasojtlaya tenojnotsas okipaleui nochipa matenojnotsa maski melak okitlaueltokakej (1 Tes. 2:2). ¿Kenon uelis tikixkopinaskej itlasojtlalis Pablo itech tenojnotsalistli? Se ken okiteititi Pablo ika kitlasojtlaya tenojnotsas ijkuak nochipa kitejtemouaya kenon kinnojnotsas oksekimej. Ijkon ken Pablo niman akin kachtopa okichiujkej ken Cristo, tejuamej noijki noneki titenojnotsaskej techajchan, kampa nemij miyekej niman san kanon kampa uelis nemiskej tlaltikpakchanejkej (Hech. 5:42; 20:20). Matiktejtemokan kenon uelis tikinnojnotsaskej miyekej tlaltikpakchanejkej. Niman tla tiuelij, matochiuakan precursores auxiliares noso regulares. Noso uelis tomachtiskej okse tlajtojli, tiaskej oksekan tontlapaleuiskej noso hasta tiaskej ipan okse país (Hech. 16:9, 10). w17.06 10, 11 párrs. 8, 9

Miyek tlen xkuajli nochiua ipan yejuin tlaltikpaktli ipampa seki organizaciones niman xipampa san se tlaltikpakchane. Onka organizaciones ika tlaneltokiltin akin kinkajkayauaj miyekej tlaltikpakchanejkej. Se neskayotl, yejuamej xkijtouaj akinon yemelak toTajtsin, yejuamej kijtouaj ika Biblia xuelis itech titlaneltokaskej niman tekajkayauaj itech tlen ipan nochiuas tlaltikpaktli niman tlaltikpakchanejkej. Xkuakualtin tekiuajkej kichiuaj ika maonia guerras, makintlauelitakan akin oksekan ualeuaj niman kintlayouiltiaj akin xkipiyaj tlen ika nopanoltiskej. Yejon tekiuajkej melak yonotomintijkej niman kipiyaj kojtilistli pampa techikoitaj niman nokauiliaj makintomintlaxtlauilikan. Uejueyimej empresas tlen san kitejtemouaj kipiyaskej miyek tlemach noijki melak yokijtlakojkej tlaltikpaktli. Yejuamej xkinmakaj tlaltikpakchanejkej tlen kinamiki kiseliskej niman ika yejon san sekimej melak yonotomintijkej. ITlajtol toTajtsin kijtoua ika kichiuas ika tekiuajkej itech yejuin tlaltikpaktli niman iorganizaciones mapopoliuikan, niman noijki kinpopolos nochimej akin intech nemij niman kixnamikij iTekiuajyo toTajtsin (Jer. 25:31-33). w17.04 12 párrs. 7, 8

Jehová, akin “kita tlenon onka ipan toyojlo”, ueli kita akinon yemelak tejuamej, niman yejua okititi iknelilistli Acab (Prov. 17:3). Ijkuak ichanejkauan Nabot niman akin iuan nouikayaj okikakej ika ichanejkauan Acab xok kintlajyouiltiskiaj hasta ijkuak yejua mikiskia, kanaj onotlatlatak intlaneltokil itech toTajtsin. San ika, yolyemanilistli ueliskia kinpaleuis maka makipolokan intlaneltokil. ¿Tleka? Pampa inyolyemanilis, kinkauiliskia ok makiueyichiuakan Jehová, niman matlaneltokakan ika toTajtsin xkeman uelis kichiuas tlen xkinamiki (Deut. 32:3, 4). Ika tlayekapan, ichanejkauan Nabot toTajtsin kinteochiuas ika oksejpa kimitaskej akin kintlasojtlaj ijkuak yoliuiskej. Ijkuak yejuin panos, Nabot niman ikoneuan inpan nochiuas tlen yemelak kinamiki (Job 14:14, 15; Juan 5:28, 29). Se akin yolyemanki kimati ika “toTajtsin akin melauak teyolkuitis itech nochi tlen yonochiuj, noijki itech tlen iyantika, tla kuajli noso xkuajli” (Ecl. 12:14). Jehová kuajli kimati tlen panoua tlen tejuamej nion xtikmatij. Ika yejon, yolyemanilistli techpaleuis maka matikpolokan totlaneltokil itech Jehová. w17.04 22, 23 párrs. 8, 9

Ipampa tlen xkuajli nochiua ipan tlaltikpaktli, miyekej tokniuan yokikaujkej inchan. Yejuin uelis yes melak maouijtika. San xnemili nochi tlen noneki nomachtiskej. Se yenkuik tlajtojli, tlen nochiua, ken kitlaxtlauaskej impuestos niman facturas, ken yaskej kaltlamachtijli niman hasta ken kimiskaltiskej inkoneuan. ¿Uelis tikinpaleuiskej ika ijyouilistli niman tlakaitalistli tokniuan akin kixnamikij yejuin tlen ouijtika? (Filip. 2:3, 4). Kemantika tekiuajkej uelis kichiuaskej ika maouijtika nonisiuiskej itech se tlanechikojli tokniuan akin kikauaj inchan. Seki organizaciones tlen kipiyaj tekiuajkej kinmojtiaj tokniuan ika xok kinpaleuiskej. Yejuamej kanaj uelis kimijliskej ika xok kinkauiliskej machantikan ipan yejon país tla yejuamej xkiseliaj tekitl tlen xkinkauilis mauiyan tlanechikoltin. Pampa yejuamej nomojtiaj niman kimachiliaj ika xok nesi kenon kichiuiliskej, sekimej kiseliaj yejon tekitl. Ika yejon noneki melak totoka matikinnextikan tokniuan akin kikauaj inchan ijkuak yejkoj. Yejuamej noneki kitaskej ika tejuamej tajmanaj inpampa. Tla tajmanaj inpampa niman tikinpaleuiyaj, uelis tikchiuaskej machikaui intlaneltokil (Prov. 12:25). w17.05 5 párrs. 9, 10

Ijkuak Jesús nemiya ipan tlaltikpaktli, okitetomili kenon yeskia “ijkuak itlamis tlajtlamach ken nochiua ipan tlaltikpaktli”. Se neskayotl, yejua okijto ika miyekej “xok kipiaskej tetlajsojtlalistli intech oksekimej” (Mat. 24:3, TNM). Judíos ipan kachtopa siglo kijtouayaj ika yejuamej katkaj ikalpan toTajtsin. San ika, xok kipiayaj tlasojtlalistli itech toTajtsin. San ika, miyekej akin kichiuayaj ken Cristo ipan yejon tonaltin xkichiuayaj ken oksekimej. Yejuamej chikauak “tenojnotsayaj” itech Jesucristo, kitlasojtlayaj toTajtsin, akin imiuan tlaneltokayaj niman akin ok xkixmatiyaj tlen melauak. Yejuamej kipiayaj ueyi intlasojtlalis (Hech. 2:44-47; 5:42). Teyolkoko tikijtoskej ika nemiyaj sekimej akin kichiuayaj ken Cristo akin xok kipiayaj intlasojtlalis. ¿Kenon tikmatij yejuin? Akin kachtopa kichiuayaj ken Cristo niman chantiyaj Éfeso Jesús okimijli: “Xok ti[te]tlajsojtla ken achtoj oti[te]tlajsojtlak” (Rev. 2:4). Kanaj ijkon opanok pampa akin chanejkej Éfeso niman kichiuayaj ken Cristo opeuj tlanemiliaj ken tlaltikpakchanejkej akin chantiyaj inyeualiyan akin san kinajmanaya tlen yejuamej kinekiyaj (Efes. 2:2, 3). w17.05 15, 16 párrs. 1-3

Jefté katka se yolchikauak tlayekanketl niman tlaixnamijketl. Ana katka se siuatl yolyemanki akin kipaleuiaya iueuentsin niman kitlajpiaya ichan. Jefté niman Ana okiueyichiujkej Jehová. San ika, onkatka itlaj tlen san noijki okichiujkej. Yejuamej okijlikej Jehová itlaj kichiuaskej, niman kema okichiujkej intlajtol. Ipan yejuin tonajli, tinochimej akin tiktlapejpeniaj tikijliskej Jehová itlaj tikchiuaskej uelis tomachtiskej se kuajli neskayotl itech yejuamej. Biblia kijtoua ika uelis tikijliskej Jehová itlaj tikchiuaskej ken tikmakaskej se tetlayokolijli, peuas tiktekichiuiliskej san yejua noso xtikchiuaskej seki tlemach. Xakaj kipiya ika kichiualtiskej makijto itlaj kichiuas. San ika, ijkuak se kitlapejpenia kijtos itlaj kichiuas, Jehová kita ika yejon tlen yokijto kichiuas melak ueyi kijtosneki niman noneki kichiuas itlajtol. Biblia kijtoua ika tikijtos itlaj tikchiuas melak ueyi kijtosneki san noijki ken tiktemakas motlajtol. Ijkuak se kitemaka itlajtol, kijtosneki yemelak kichiuas noso yemelak xkichiuas itlaj (Gén. 14:22, 23; Heb. 6:16, 17). w17.04 3 párrs. 1, 2