Febrero

Noé xkeman kichijchiuaya se akajli. Ika yejon, kipiaya tlaneltokas itech Jehová niman kichiuas “ijkon ken okinauatijkej”. ¿Kenon otlamito? Yejon akajli tlen okichijchiuj okimakixti Noé niman ichanejkauan. Noijki, pampa otlaneltokak itech itlayekanalis Jehová, okipaleui manochiua se kuajli tajtli. Kuajli okinmachti inkoneuan niman okinmakak se kuajli neskayotl, itlaj tlen ouijtika katka ipan yejon tonaltin achto ika yejkos Apachiuilistli (Gén. 6:5). Tla tejua titajtli, ¿kenon uelis tikchiuas ijkon ken mitstlajtlanilia Jehová? Xkaki Jehová. Xkauili mamitspaleui tikimiskaltis mokoneuan itech tlen kijtoua iTlajtol niman ikalpan. Kemantika, maski tajtin miyek kichiuaj ipampa inkoneuan, sekimej kikauaj Jehová. San ika, tajtin akin melak onokojtilijkej ika tlen melauak maajsi ipan inyojlo inkoneuan, uelis kuajli nomachiliskej. Noijki, uelis kichiaskej ika ajsis se tonajli ijkuak inkoneuj uajnokuepas itech Jehová. w18.03 30 párrs. 10, 11

¿Kemantika tiknekiyaj kuajli titeseliskej san ika otikmachilijkej ika xtiueliskiaj? Kanaj san tipinauij niman techmojtia xtikmatiskej itech tlenon inuan titlajtoskej niman kuakon makochisnekikan. Noijki, kanaj tikpiyaj achijtsin tomin niman tikneltokaj ika xkeman uelis tiktemakaskej tlen oksekimej ipan tlanechikojli kema uelij. San ika, noneki tikilnamikiskej ika tochan xnoneki melak matento ika tlen patioj. San noneki kuajli matlaojonia niman matlachipaujkan, niman matikchiuakan kuajli manomachilikan akin techontlajpaloskej. Xtlaj kipiya techajmanas, pampa tlen yemelak ueyi kijtosneki yejua ika matikimititikan ika tikintlasojtlaj akin tikinseuiyaj tochan. Matikilnamikikan ika melak kuajli tla tajmanaj intech akin otechtlajpalotoj (Filip. 2:4). Miyekej kuelitaj tlajtoskej itech innemilis. Niman ijkuak san sekan imiuan tinemij, ijkuakon uelis melak kuajli tikinkakiskej. Se tlayekanketl kijkuiloua: “Nikinnotsas tokniuan itech tlanechikojli mauajlakan nochan nechpaleuiya kuajli manikinmasikamati niman manikimixmati, niman ueli nikmati kenon okixmatkej tlen melauak”. Tla tajmanaj intech akin techuajtlajpalouaj, kuajli matikmatstokan ika tinochimej techyolpaktis yejon tonajli. w18.03 17 párrs. 15-17

Tajtin akin kichiuaj ken Cristo kinekij kinpaleuiskej inkoneuan makitlapejpenikan kichiuaskej tlen kuajli. Tla kinteltiaj ika inkoneuan manoapolaktikan, maski xtlaj kintsakuilia, uelis ijtlakauis ken nouikaj iuan Jehová (Sant. 4:17). San ika, ken kinamiki, tajtin kinekij kuajli kimatstoskej ika achto noapolaktiskej inkoneuan, yemelak kuajli makimatikan tlenon noneki kichiuas se inomachtijkauj Cristo. Sekimej tlayekankej ipan circuito kinmajmana ika kimixmatij telpokamej akin ikipiyaj 20 xiuitl akin inchanejkauan Teixpantijkej niman ok xnoapolaktiaj. Miyekej intech yejuamej yauej tlanechikoltin, ontenojnotsaj niman nomachiliaj ika iteixpantijkauan Jehová. Maski ijkon, kanaj onka itlaj, tlen kichiua maka manosentemakakan itech Jehová niman manoapolaktikan. ¿Tleka panoua yejon? Kemantika, tajtin yejuamej akin yokimijlikej ika manochiakan. w18.03 8 párrs. 1, 2

Noneki tikmatiskej kenon yejua, kenon tlanemilia niman tlenon kichiua niman ijkon tikixkopinaskej Cristo. Yejua melak kitejtemouaya nochipa nouikas iuan toTajtsin. Tikchiuaskej ken Jesús kichiua matonisiuikan itech Jehová. Yejua ika, melak noneki matiuelikan matitlanemilikan ken Jesús. ¿Tlenon techpaleuis matikpiyakan “itlamachilis Cristo”? Inomachtijkauan Jesús okitakej imilagros, okikakej itlamachtiluan, okitakej kenon nouikaya imiuan nochimej tlaltikpakchanejkej, niman okitakej kenon kitlakamatiya itlajtolyekanalisuan toTajtsin (Hech. 10:39). Melauak ika tejuamej xueli tikitaj Jesús. San ika, Jehová ika itlasojtlalis yotechmakak Evangelios niman ijkon matikasikamatikan kenon katka Jesús. Ijkuak tikpouaj niman titlanemiliaj itech tlen kijtoua Mateo, Marcos, Lucas niman Juan tomachtiaj kenon tlanemiliaya Jesús. Yejuin techpaleuis matinemikan ken Cristo onen niman matitlanemilikan ken yejua otlanemili (1 Ped. 2:21; 4:1). w18.02 22 párrs. 15, 16

Yeuejkaui, ijkuak kemach opeuj nemij tlaltikpakchanejkej, tlakamej niman siuamej akin chikauak otlaneltokakej okixmatkej toTajtsin ika yeyi tlemach: kitaskej tlen yejua okichijchiuj, kinkakiskej oksekimej akin kimojkaitayaj toTajtsin, niman kitaskej tlateochiualistin tlen kiseliayaj ijkuak kitlakamatiyaj itlanauatiluan niman itlajtolyekanalisuan (Is. 48:18). Pampa Noé okitak nochi tlen toTajtsin okichijchiujka, okitak miyek tlen kiteititiaya ika toTajtsin melauak nemi, noijki okitak miyek ikualneskayouan, niman “ika ipoder xkeman tlamis” (Rom. 1:20). Ika yejon, yejua melak itech otlaneltokak. Kuajli tikmatstokej ika ichanejkauan okimachtijkej. Itaj, akin itoka katka Lamec, se itech yejuamej, yejua katka se tlakatl akin tlaneltokaya niman otlakat ijkuak Adán ok nemiya. Oksekimej ichanejkauan katkaj Matusalén, akin iabuelo, niman Jared, akin ika yexpa iabuelo, niman akin omik 366 xiuitl sakin ika Noé onemiko (Luc. 3:36, 37). Maski san kenon, tlen Noé ouel, oajsik ipan iyojlo niman okiyolmapeuj makitekichiuili toTajtsin (Gén. 6:9). w18.02 9 párrs. 4, 5

Ijkuak se tokniuj noso tochanejkauj yejua akin kijtoua noso kichiua tlen melak techyolkokoua, yejon melak tekoko. Matiknemilikan ika xtiuelij tikilkauaj tlen opanok. ¿Miyek xiujtin tikualantinemiskej ipampa yejon? ¿Noso tiktlakamatiskej tlen kijtoua Biblia ika nimantsin matikyektlalikan tlen opanok? Tla melak touejkauaj tikyektlaliskej itlaj, sakin melak ouijtika yes tikchiuaskej. ¿Tlenon mitspaleuis tikyektlalis? Kachtopa, xchiuili teoyotl Jehová ika nochi moyojlo niman xtlajtlanili mamitspaleui kuajli iuan xtlajto tokniuj. Xkilnamiki ika yejua noijki nouika iuan toTajtsin niman ika toTajtsin kitlasojtla (Sal. 25:14). Jehová kimititia itlasojtlalis akin iuan nouikaj niman kichia ika tejuamej noijki ijkon matikchiuakan (Prov. 15:23; Mat. 7:12; Col. 4:6). Sakin, kuajli xnemili tlenon tikijtos. Maka nimantsin xnemili ika yejon tokniuj kinekiya mitschiuilis tlen xkuajli. Niman xseli ika kanaj tejua otitlapaleui maonia yejon tlauejli. w18.01 10 párrs. 15, 16

Tlaltikpakchanejkej xkiteititiaj tlasojtlalistli, san ika, akin kiueyichiuaj Jehová kiteititiaj tlasojtlalistli tlen melauak inpampa oksekimej. Yejuin nochipa ijkon youajnochiujtia. Jesús okijto ika tlanauatiltin tlen melak ueyi kijtosnekij itech tlanauatijli tlen okimakakej Moisés kachtopa katka tiktlasojtlas toTajtsin, niman ika ome tikintlasojtlas oksekimej (Mat. 22:38, 39). Noijki okijto ika akin yemelak kichiuaj ken Cristo kimixmatiskiaj pampa notlasojtlaskiaj semej iuan oksekimej (Juan 13:35). Niman hasta kintlasojtlaskiaj intlauelikniuan (Mat. 5:43, 44). Jesús melak okintlasojtlak oksekimej. Oyaj ipan miyek kalpamej tenojnotstinemiya itech kuajli tlajtoltin itech iTekiuajyo toTajtsin. Okinpajti akin xtlachiayaj, akin “uilatsitsintin” katkaj, akin kipiayaj lepra niman akin xtlakakiyaj niman hasta okinyoliti akin yomijkaj (Luc. 7:22). Niman hasta okitemakak inemilis ipampa nochimej tlaltikpakchanejkej. Jesús melak kuajli okiteititi itlasojtlalis iTajtsin. Aman, iteixpantijkauan Jehová itech nochi tlaltikpaktli kixkopinaj Jesús niman kintlasojtlaj oksekimej. w18.01 29, 30 párrs. 11, 12

Kanaj otimoapolakti ijkuak san tikonetl katka. Maski ijkon, xtikmati tlen tlaueltin uelis tikimixnamikis tlayekapan. Itlaj tlen mitspaleuis tiyolmelaujkanemis maski san tlenon tikixnamikis yejua tla tikilnamiki ika ijkuak otimosentemakak itech Jehová otikijto ika tikchiuas nochi tlen mitstlajtlanilis. Yejuin kijtosneki ika yotikmakak motlajtol akin Tekiuaj itech tlen onka ika tiktekichiuilis maski san tlenon mapano, maski tla motajuan noso akin inuan timouika kikajkauaskej (Sal. 27:10). Maski san tlenon mopan panotos, uelis tiktlajtlanilis Jehová ika mamitspaleui tikpiyas chikaualistli tlen ika tikchiuas tlen otikijto ijkuak otimosentemakak (Filip. 4:11, 12). Jehová kineki ika tejua iuan xmouika. San ika, nonekis timokojtilis niman ijkon iuan timouikas, niman titekitis ika tikpiyas momakixtilis. Ijkon kijtoua Filipenses 2:12: “Xmotekimakatiakan itech nemomakixtilis ikan yolyemanilistli niman nemojtijli”. Kuakon, noneki kuajli tiknemilis tlenon tikchiuas niman ijkon tiktlajpiyas ken timouika iuan Jehová niman itech tiyolmelaujkanemis maski onias miyek tlauejli. Niman maka san tikonilkauas. Xkilnamiki ika hasta akin miyek xiuitl yokitekichiuilijkaj toTajtsin okichiujkej tlen xkuajli. w17.12 24 párrs. 4, 6, 7

Tiktlasojkamatij ika Jehová techkauilia matitlapaleuikan itech ueyi tekitl tlen kichiujtika Tekiuajyotl ipan yejuin tonaltin. Yejua techijlia ika, tla tikchiuaj, tikseliskej tlateochiualistin (Mal. 3:10). Niman yejua yokijto ika akin kuelita kitemakas kuajli onkisas ipan inemilis (Prov. 11:24, 25). Noijki, kichiuas matipakikan, pampa “más paki on yejuan kitemaka xken on yejuan kiselia” (Hech. 20:35). Niman xsan yejon, noijki tikpiyaj kualtsin tekitl, pampa ika totlajtoluan niman tlen tikchiuaj uelis tikinmachtiskej tokoneuan niman akin kemach nomachtijtokej itech kenon yejuamej noijki uelis kitemakaskej tlen kipiyaj niman kiseliskej miyek tlateochiualistin. Nochi tlen tikpiyaj ualeua itech Jehová. Tikmakaskej itech tlen tikpiyaj kiteititia ika tiktlasojtlaj niman ika tiktlasojkamatij nochi tlen yokichiuj topampa. Ijkuak kalpan Israel okitemakak tlen kipiaya niman ijkon nochijchiuas teopan, “kalpan melak oyolpak pampa okitemakakej yejuin uentin tlen intech okis” (1 Crón. 29:9). Tejuamej noijki matikmachilikan yejon pakilistli tlen tikpiyaj ijkuak tikmakaj Jehová itech tlen yejua yotechmakak. w18.01 21 párrs. 18, 19

Yoliuilistli ipan iluikak nochiuaskia seki tonaltin sakin ijkuak itekiuajtitos Cristo. Tlapejpeniltin akin ok yoltoskej ipan tlaltikpaktli ijkuak nochiujtos ueyi tlajyouilistli kinuikaskej ipan moxtli (1 Tes. 4:13-17; Mat. 24:31). Nochimej nimantsin kintlalnakayopatlaskej “ken ijkuak se san ualijkopi”, ijkuak sa ika nochi “trompeta kipitsaskej” (1 Cor. 15:51, 52). Miyekej akin kichiuaj ken Cristo ipan yejuin tonaltin niman melajkanemij xtlapejpeniltin nion xkinnotsaj matekiuajtitij iuan Cristo ipan iluikak. Yejuamej kichiaj matlami yejuin xkuajli tlaltikpaktli ipan “itonal Jehová”. Xakaj uelis kimatis kemanon yejkos yejon tonajli, san ika, miyek onka tlen techititia ika iyejkotika (1 Tes. 5:1-3, TNM). Sakin, onias se yoliuilistli tlen tlamantik yes. Melak miyekej tlaltikpakchanejkej yoliuiskej niman nemiskej ipan Xochitlalpan. Ijkuakon, kichiaskej xok tlajtlakolejkej yeskej niman xok keman mikiskej. w17.12 11 párr. 15; 12 párrs. 18, 19

Tla tikiskaltiaj tlasojtlalistli niman teiknelilistli ipan toyojlo xnimantsin titenexikolitaskej. Itlajtol toTajtsin kijtoua: “Tlasojtlalistli teijyouiya niman yolkuajli. Tlasojtlalistli xnexikole” (1 Cor. 13:4). Kipiya tikitaskej tlen panoua ijkon ken kita Jehová niman ijkon xtijkauiliskej ika nexikojli manoneluayoti ipan toyojlo. Noneki tikitaskej tlanechikojli ken se tlalnakayotl kampa san sekan tinemij iuan tokniuan. Yejuin techpaleuis matikinmasikamatikan, ijkon ken kijtouaj yejuin tlajtoltin: “Ijkuak se parte kiselia tetlakaitalistli, nochimej on oksekimej no pakij” (1 Cor. 12:16-18, 26). Kuakon, ijkuak tikitaskej ika oksekimej kiseliaj tlateochiualistin, xtikinnexikolitaskej, tejuamej inuan tiyolpakiskej. Matitlanemilikan itech Jonatán, se ikoneuj tekiuaj Saúl. Yejua xonoxiko pampa Jehová okitlapejpenijka David matekiuajti sakin. Xsan yejon, Jonatán okititi David tlasojtlalistli niman teiknelilistli, niman okiyolchikauj niman okipaleui (1 Sam. 23:16-18). ¿Uelis tikchiuaskej ijkon ken yejua? w17.11 27 párrs. 10, 11

Jehová okinek manotlali Tlanauatijli ipan itlajtol, Biblia, niman ijkon matechpaleui. Yejua xkineki san matitlanemilijtokan itech nochi tlen ompa kijtoua, yejua kineki matikasikamatikan niman matikchiuakan “tlen más ueyi kijtosneki”, kema, tlajtolyekanalistin tlen itech nokixtia Tlanauatijli (Mat. 23:23). Itlanauatil Moisés kipiya “nochi on tlaixmachilistli niman nochi on tlen melauak” itech Jehová niman itlajtolyekanalisuan tlen melajkej (Rom. 2:20). Se neskayotl, kalpamej kampa nopaleuiayaj kinmachtia tlayekankej mateyolkuitikan “ika melauak melajkayotl”. Noijki tinochimej techmachtia matoititikan “se iuan okse tlasojtlalistli tlen xtekaua niman teiknelilistli” (Zac. 7:9). Maski xok tiktlakamatij Tlanauatijli, melajkayotl niman teiknelilistli ok melak ueyi kijtosnekij ixpan Jehová, pampa yejua xnopatla. ¡Melak ueyi tlateochiualistli tiktekichiuiliskej toTajtsin! Ika yejon, matikixkopinakan ikualneskayouan niman itech matopaleuikan. w17.11 13, 14 párrs. 2, 3; 17 párrs. 18, 19

Tokniuan akin temachtiaj ipan tlanechikojli noneki kuajli kitaskej ika Biblia yejua tlen kiyekana intlamachtil (Juan 7:16). Xmotlajpiya ika ijkuak titlajtos itech tlen inpan onochiuj oksekimej, neskayomej noso ken tiktetomilia motlamachtil maka makichiuakan ika manoilkauakan tlaxeloltin tlen tikinpoua. Noijki, xkilnamiki ika xsan noijki kijtosneki tikpouas Biblia niman titemachtis ika Biblia. Kema, tla melak miyek tlaxeloltin tikinpoua, miyekej akin mitskakij nion xkimilnamikiskej. Ika yejon, kuajli xkintlapejpeni tlaxeloltin niman maka san totoka intech xpapanotiuj, xkinpoua, xkintoma, xtlali se neskayotl niman xkijto kenon tikchiuaskej (Neh. 8:8). Noijki xkita kenon notlajtolnamikij. San ika, tlen melak noneki tikchiuas, yejua tiktlajtlanilis Jehová mamitspaleui niman ijkon titemachtis kualtsin tlamachtiltin tlen uajlauej ipan iTlajtol (Esd. 7:10). w17.09 26 párrs. 11, 12

Ipan xiuitl 537 i.x.x 1 ikalpan toTajtsin melak pakiya. Tsauktoyaj ipan Babilonia 70 xiujtin, san ika aman yomakiskaj niman kinekiyaj nokuepaskej Jerusalén niman oksejpa konchijchiuaskej teopan niman ompa kueyichiuaskej toTajtsin. Sakin, ipan 536 opeuj kichijchiuaj teopan. Opanok 16 xiujtin, kuakon onotelti ika kichijchiujtoyaj teopan. Ononek Jehová makimilnamikti israelitas ika maka sa kachtopa makitejtemokan tlen yejuamej kinekiyaj. Kuakon ipan xiuitl 520 i.x.x 1, Jehová okititlan teotlajtoketl Zacarías makimilnamiktiti ikalpan tleka okimakixtijka itech Babilonia. Techtlanemililtia ika tokayotl Zacarías kijtosneki “Jehová Yotlailnamik”. Yejuin kanaj okichiuj ika israelitas matlanemilikan itech itlaj tlen melauak niman ueyi kijtosneki: maski yejuamej yokilkaujkaj nochi tlen Jehová yokichiujka inpampa, yejua xokimilkauj (Zac. 1:3, 4). ToTajtsin ika tlasojtlalistli yokimijlika ika kinpaleuiskia oksejpa makiueyichiuakan ika tlen melauak. San ika, noijki kuajli okimijli ika san kiseliskia makiueyichiuakan tla kichiuayaj ika nochi inyojlo. w17.10 21, 22 párrs. 2, 3

Tlaixmatkej akin nomachtiaj ken titlanemiliaj, kijtouaj ika titeiknelis uelis kichiuas matipaktokan niman kuajli matouikakan iuan oksekimej. Niman ijkuak tikinpaleuiyaj akin tlajyouiyaj, tomachiliaj ika toyojlo niman kichiua matiknemilikan tlen kuajli, xtoselti tomachiliaj niman xmiyek tiknemiliaj tlen xkuajli. Kuajli nesi ika titeiknelis melak tepaleuiya. Tla tikintlasojtlaj oksekimej niman tikitiliaj kenon tikinpaleuiskej, tikpiyaskej totlamachilis chipauak pampa tikmatstoskej ika tikchiujtokej tlen Jehová kineki. Niman yejuin texchiuas kuajli tajtin, kuajli teueuentsitsintin niman kuajli tlasoikniujtin. Xsan yejon, akin teiknelianimej, noijki kinpaleuiyaj niman kinyolchikauaj ijkuak kinpoloua (Mat. 5:7; Luc. 6:38). Melauak, xsan titeikneliaj pampa techpaleuiya. Tikchiuaj pampa tiknekij tikixkopinaskej niman tikueyichiuaskej Jehová, akin itech ualeua tlasojtlalistli niman teiknelilistli (Prov. 14:31). w17.09 12 párrs. 16, 17

Ijkon ken Jesús okitokayotijkej tekiuaj niman ueyi teopixki, noijki okinauatijkej makiyektlali “iteopan Jehová”. Ipan 1919, okichiuj yejuin tekitl ijkuak okimakixti ikalpan toTajtsin itech Ueyixtika Babilonia niman okiyektlali tlanechikojli. Noijki okitlali se “tekitketl” yolmelauak “niman kipia kuajli itlamachilis” akin kiyekanas tekitl itech ken toTajtsin yokitlali manoueyichiua ipan tlaltikpaktli (Mat. 24:45). Jesús noijki tekititika ika kichipaua ikalpan toTajtsin niman kipaleuijtika makitekichiuili Jehová ken yejua kuelita (Mal. 3:1-3). Ijkuak Tekiuajtis Mil Xiuitl, Jesús niman 144,000 tekiuajkej niman teopixkej kinpaleuiskej tlaltikpakchanejkej akin yolmelaujkej maka sa makichiuakan tlen xkuajli. Ijkuak panos yejuin, ipan tlaltikpaktli san nemiskej akin kiueyichiuaj Jehová ipan tlaltikpaktli chipauak. Ipan yejon tonajli tlamis ika noyektlalis tlaneltokijli tlen melauak. w17.10 29 párrs. 15, 16

Tla se akin xsan okinek otemikti kinekiya makiknelikan, nonekiya nimantsin itlaj kichiuas niman cholos itech se kalpan kampa nopaleuiayaj tlen nisiuj onkatka (Jos. 20:4). San ueliskia makisaskia tla nimantsin ajsiya ipan yejon kalpan niman ompa nokauaya hasta ijkuak mikiskia ueyi teopixki. Yejuin kijtosnekiskia kikauas miyek tlemach, ken itekiyo, ken nemiya ichan, niman ika ueliya miyekan kistinemiya. Maski ijkon, yejuin tlen kikauaskia kipaleuiskia. Ipan yejuin tonajli, akin tlajtlakoua niman noyolkuepa noijki kipiya ika itlaj kichiuas niman ijkon toTajtsin makikneli. Kipiya kuajli kikajkauas tlajtlakojli tlen kichiujtika, san ika, noijki kipiya kitlalkauis nochi tlen uelis kichiuas matlajtlako. Tla tejuamej noijki tikchiuaj nochi tlen tiuelij ika tijkajkauaskej se ueyi tlajtlakojli, tikititiskej Jehová ika melak techajmana tlen topan nochiujtika niman ika xtiknemiliaj ika nimantsin techiknelis (2 Cor. 7:10, 11). w17.11 10, 11 párrs. 10, 11

Jehová technauatia matikinmakakan tokniuan seki tlen tikpiyaj (1 Juan 3:17). San ika, kipiya ika tikchiuaskej pampa kisa itech toyojlo. Matotlajtoltikan: “¿San kuajli nikinselia akin inuan ninouika niman akin niknemilia ueyixtokej ipan tlanechikojli? ¿Nikinnotsa san akin niknemilia ika sakin yejuamej itlaj kichiuaskej nopampa? ¿Noso nikita kenon uelis nikinmakas tlen nikpiya tokniuan akin xkuajli nikinmixmati noso xuelis nechkuepiliskej?” (Luc. 14:12-14). Matiknemilikan ika se tokniuj noneki makipaleuikan pampa xkuajli okitlapejpeni tlen kichiuas noso yakaj akin xkeman techtlasojkamachilia itech tlen yotikchiujkej ipampa. Ijkuak ijkon panos, matikilnamikikan tlen kijtoua tlaxelojli tlen aman tikitstokej. Tla toyekanaj ika yejuin tlaxelojli kichiuas matipakikan, pampa ijkuak tiktemakatoskej tlen tikpiyaj tikchiuaskej ika toyojlo (Hech. 20:35). w17.10 9 párr. 12

Isiuauj Potifar okuelitak José pampa “melak kualtsin nesiya niman kualtsin tlachiaya”, niman miyekpa okiyejyeko kichiualtis iuan maauilnemi. San ika, José xokichiuj tlen kichiualtiayaj. Niman ijkuak siuatl okajsik ipan itlaken pampa kinekiya iuan manoteka, yejua ocholoj. ¿Tlenon tiuelij itech ineskayo José? Techmachtia ika tla tiknekij tiktlakamatiskej itlanauatiluan toTajtsin, kanaj kemantika nonekis ticholoskej itech se tlatlatalistli (Prov. 1:10). Ijkuak xiiTeixpantijkauan katkaj, sekimej tokniuan melak tlakuanimej katkaj noso melak tlaoniyaj, tlachichinayaj, kitekitiltiayaj drogas noso auilnemiyaj. Niman maski yonoapolaktijkej ok uelis kemantika kintlatlatas yejuin. Tla yejuin topan nochiua, kipiya toteltiskej niman titlanemiliskej itech kenon tla xtikteltiaj tlen tiknemiliaj, kijtlakos ken touikaj iuan Jehová. Matikyejyekokan matikitakan tlenon uelis tikixnamikiskej ijkuak uajnesiskej tlatlatalismej, niman noijki kenon tikinmapeuaskej (Sal. 26:4, 5; Prov. 22:3). Niman tla kemantika tikixnamikij se tlatlatalistli, matiktlajtlanilikan Jehová tlamachilistli niman matechpaleui matoteltikan toselti niman ijkon matikxikokan. w17.09 4, 5 párrs. 8, 9

Uelis kuajli touikaskej iuan Jehová ijkuak toxelouaj itech ken notekitiltia tomin niman tikchiujtokej nochi tlen tiuelij ika tiktejtemoskej melauak “riquezas”. Yejuin tlen okichiuj Abrahán akin yeuejkaui onen niman okipix chikauak itlaneltokil. Pampa kinekiya nouikas iuan Jehová, okitlakamat, okikauj ueyikalpan Ur niman san nokajkaltijtinemiya (Heb. 11:8, 9). Yejua kimatiya ika melauak “riquezas” ualeuaj itech Jehová. Ika yejon, xkeman okiyejyeko notomintis, pampa tla kichiuaskia teititiskia ika xkipiaya itlaneltokil (Gén. 14:22, 23). Sakin, Jesús okijli se telpochtli akin kipiaya tomin makipiya chikauak itlaneltokil: “Tla tikneki nochi ika tikuajli tlakatl yes, xuiya mochan, niman xnamaka on tlen tikpia niman on tomin xkinmaka on mayankej. Tla ijkon tikchiuas, tikpias riquezas ne iluikak. Niman kemaj xuajla niman xuiya nouan” (Mat. 19:21). Yejon telpochtli xkipiaya itlaneltokil ken Abrahán, san ika, sekimej kema yokiteititijkej nochi intlaneltokil itech Jehová. w17.07 10 párr. 12

Sakin ijkuak Abrahán okipanaui atentli Éufrates, opanok 430 xiujtin hasta ijkuak “iuejkakoneuan” onokuepkej se kalpan tlen chantiskiaj ipan yejon tlajli (Éx. 12:40-42; Gál. 3:17). Abrahán xokitak nochi tlen toTajtsin yokijlika kichiuas, maski ijkon okinek tlamachias ika yolseuilistli pampa tlaneltokaya ipan Jehová (Heb. 11:8, 10, TNM). ¿Tiknemiliaj kenon melak pakis ijkuak yoliuis ipan xochitlalpan? Melak kimojkatlachialtis kitas nochi tlen Biblia kijtoua itechkopa niman intechkopa ichanejkauan. Noijki melak kiyolpaktis kasikamatis ika okichiuj se ueyi tekitl itech tlen Jehová okijto itechkopa se tekoneuj tlen uajlaskia. Melauak, yejua kitas ika nochi kuajli otlamito, maski ouejkauj otlamachiak. w17.08 5, 6 párrs. 10, 11

Tlajtojli “xchipauak”, tlen Biblia kiteneua, yejua se tlajtojli tlen miyek kijtosneki, xsan tlajtoua itech tlen tsokuiltik ken auilnemilistli. Se neskayotl, uelis noijki kijtosnekis titlachichinas noso tipokis, noso tikamanalos itech tlen tsokuiltik (2 Cor. 7:1, TNM; Efes. 5:3, 4). Noijki kijtosneki tlen tsokuiltik se kichiua ijkuak xakaj kita, ken kiamapouas noso kitas auilnemilistli. Yejuin tlemach uelis kichiuas yakaj manomajmatoka. Akin yonomatkej kitaskej auilnemilistli kiueyiliaj inileuilis itech yejuin. Kuakon yejuin kichiua ika san nochipa makinemilijtokan notekaskej iuan yakaj. Sekimej ixtlamatkej kijtouaj ika akin yonomatkej kitaskej auilnemilistli noijki ijkon nomachiliaj ken akin notlaliliaj drogas noso konij alcohol. Kuakon, xtechmojkatlachialtia ika melak teijtlakoua tikitas auilnemilistli. Seki ken teijtlakoua yejua ika kichiua melak mapinauikan, xkuajli tekitij, xueli pakij iuan inchanejkauan, nokauaj iuan imixnamik niman hasta nomiktiaj. w17.08 19 párrs. 8, 9

Ijkuak salmista opeuj tlanemilia itech kenon israelitas onokuepkej Jerusalén, yejua onokuikati yejuin itech Jehová. Melak okiyolchikauj salmista kimatis ika toTajtsin kichikaujtoya ipuertas ueyikalpan niman kintlajpiyas itekipanojkauan. Kanaj kemantika tikixnamikiskej tlen ouijtika tlen kichiua matokuaajmanakan. San ika, Jehová uelis techmakas tlamachilistli niman ijkon tikmatiskej tlen tikchiuaskej. Salmista okijto ika toTajtsin “kititlani itlanauatil ipan tlajli; itlajtol melak totoka notlaloua”. Sakin ijkuak okijto ika Jehová “kititlani nieve ken ichkatl; yejua kisemoyaua seuktli ijkon ken tlikonextli” niman “yejua kontlajkali tesiujtli tlatsintlan”, salmista otetlajtolti: “¿Akinon uelis kixikos kech sesek?”. Niman noijki okijto ika Jehová “kititlani itlajtol niman kichiua mapatikan” (Sal. 147:15-18). ToTajtsin akin kipiya nochi tlamachilistli niman nochi ueli kichiua ueli kiteltia seuktli niman tesiujtli. Kuakon, yejua uelis techpaleuis maski san tlenon tikixnamikiskej. w17.07 20 párrs. 14, 15

Ken tlayekana Jehová melak kuajli niman kimelaua matikpaleuikan ika nochi toyojlo. ¿Tleka? Pampa Jehová okichijchiuj nochi tlen onka. Ika yejon, yejua kinamiki makinyekana nochimej ipan iluikak niman ipan tlaltikpaktli. Satanás xtlaj okichijchiuj. Ika yejon, yejua nion achijtsin xkinamiki matlayekana. Satanás niman kachtopa tlakatl niman siuatl oteixnamijkej ijkuak xokiselijkej iueyitlayekanalis Jehová (Jer. 10:23). ¿Kinamikiya makimapeua itlayekanalis Jehová yakaj akin okichijchiujkej pampa ueli kitlapejpenia tlen kichiuas? Ka. Yakaj akin ueli kitlapejpenia tlen kichiuas kikauilia makitlapejpeni tlen kichiuas, san ika, xkinamiki makixnamiki Akin otlachijchiuj, Jehová. Kuajli nesi ika ijkuak se kixnamiki toTajtsin xkuajli kitlapejpenia tlen kichiuas. Tejuamej noneki Jehová matechyekana. w17.06 27, 28 párrs. 2-4

Tla tiktlasojkaitaj totenojnotsalis, tochiuaskej ijkon ken Pablo niman xtijkauaskej ika titenojnotsaskej maski ijkuak techtlaueltokaskej (Hech. 14:19-22). Se neskayotl, itech xiuitl 1930 niman 1944, tokniuan ipan Estados Unidos melak okintlaueltokakej. San ika, xokikajkaujkej tenojnotsaskej. Ijkuak tekiuajkej okiyejyekojkej kinteltiskej tokniuan oyajkej ipan tribunal niman miyekpa otetlankej. Ipan xiuitl 1943, tokniuj Nathan H. Knorr otlajto itech se ken otetlankej ipan Tribunal Supremo de Estados Unidos. Yejua okijto ika xueliskia panos yejuin tla tokniuan kikajkauaskiaj ika tenojnotsaskej. Kema, totlasojtlalis itech tenojnotsalistli kichiuas ika maka matikajkauakan titenojnotsaskej maski techtlaueltokaj. Ijkuak tiktlasojkaitaj totenojnotsalis, xsan tajmanaskej itech kech horas tikchiuaj ipan se metstli. Tajmanaskej ika tikchiuaskej nochi tlen tiueliskej niman ijkon kuajli tiktetomiliskej “yejon kuajli tlajtoltin itech iueyiteiknelilis toTajtsin” (2 Tim. 4:5). w17.06 11, 12 párrs. 11, 12

Tla melak tiktlasojtlaj Jehová, techpaleuis matikintlakamatikan itlanauatiluan, matitlaxikokan niman matiktlauelitakan tlen xkuajli (Sal. 97:10). San ika, Satanás niman nochi tlen kiyekana kiyejyekouaj kipopoloskej totlasojtlalis itech toTajtsin. Tlaltikpakchanejkej xkitaj tlasojtlalistli ken noneki. Miyekej “tsotsokamej” noso san yejuamej notlasojtlaj, niman xkitlasojtlaj toTajtsin (2 Tim. 3:2). Yejuamej san tlanemiliaj itech “xkuajli eleuilistli yejuan tonakayo kipia, niman on tlen xkuajli yejuan tikixpakaitaj, niman nochi on tlajtlamach tlen tikpiaj yejuan kichiua para yejua ika ma titoueyimatikan” (1 Juan 2:16). Pablo, itlatitlankauj Cristo, okimelajkaijto tlenon uelis panos tla kachtopa tikchiuaj tlen tejuamej tiknekij: “Tla tikomatstikaj on tlajtlamach yejuan motlalnakayo kineki, sa no yejua mitsmiktis”. ¿Tleka? Pampa akin kichiuaj yejon nochiuaj itlauelikniuan toTajtsin (Rom. 8:6, 7). Tlaltikpakchanejkej akin san tlanemiliaj itech kenon kipiyaskej tomin noso auilnemiskej ontlamij ika miyek ajmantli (1 Cor. 6:18; 1 Tim. 6:9, 10). w17.05 16 párrs. 5, 6

Tokniuan akin kikauaj inchan xkipiya ika kitlajtlaniskej miyek, yejuamej noneki kitlasojkamatiskej tlen kichiuaj oksekimej inpampa. Yejuin uelis kichiuas ika tokniuan akin temakaj mapakikan. San ika, melak noneki ika akin kikauaj inchan sakin san yejuamej makitakan ken nopanoltiskej. Tla kichiuaj yejuin, kuajli nomachiliskej niman kuajli nouikaskej imiuan tokniuan (2 Tes. 3:7-9). Maski ijkon, akin kikauaj inchan kinpoloua matikinpaleuikan. Xnoneki matikpiyakan miyek tomin niman ijkon tikinpaleuiskej akin kikauaj inchan. Totiempo niman totlasojtlalis yejon tlen melak kinpoloua. Se neskayotl, tejua uelis tikimititis kenon uelis kajsiskej carro noso kenon kikouaskej tlen kikuaskej tlen xmelak patioj. Tejua noijki uelis tikimititis kenon uelis kinextiskej tlen kinpaleuis ika manopanoltikan, ken se máquina de coser noso ken kitekitiltiskej itlaj tlen ika nochijchiua se kajli. San ika, melak noneki matikinpaleuikan kuajli manomachilikan ipan tlanechikojli. Tla tiueli xkinuika ipan tlanechikoltin. Noijki uelis tikimijlis kenon noneki tenojnotsaskej kampa motlanechikol tenojnotsa niman uelis imiuan titenojnotsas. w17.05 5, 6 párrs. 11, 12

Miyekej san tlanemiliaj itech tlen kinekij niman tlen ika noyolpaktiskej. Ika yejon ouijtika kitaskej ken kinamiki tlemach tlen uelis kipiyaskej (1 Cor. 2:14). Pampa xtlanemiliaj ken noneki, melak ouijtika kitlapejpeniskej tlen kuajli itech tlen xkuajli (Heb. 5:11-14). Kanaj xueli noteltiaj inileuilis itech tlemach tlen uelis kipiyaskej. Ijkuak ikipiyaj seki tlemach, melak kinekij kipiyaskej okseki (Ecl. 5:10). San ika, onka itlaj tlen uelis tikchiuaskej niman ijkon tikpopoloskej yejuin tlanemilijli. ¿Tlenon? Tikpouaskej nochipa iTlajtol toTajtsin, yejuin techpaleuis maka ok matiknekikan kachtopa tiktejtemoskej miyek tlemach tlen patioj. Jesús otlanemili itech tlamachilistli tlen ualeua itech Jehová, niman yejuin okipaleui makimapeua itlatlatalisuan Satanás (Mat. 4:8-10). Ipan yejuin tonajli, noijki ijkon, tla xtiknekij kachtopa tiktejtemoskej miyek tlemach tlen patioj, noneki tikchiuaskej ipan tonemilis tlamachilistli tlen ualeua itech Jehová. Ijkon tikititiskej Jesús ika yejua melak tiktlasojtlaj xijkon ken tlemach tlen uelis tikpiyaskej. w17.05 26 párr. 17