Diciembre

Itech tonaltin tlen tlajtoua Biblia, melak panouaya ika yakaj kinnotsaya oksekimej matlakuatij ichan pampa ijkon kimititiaya ika kinekiya kuajli imiuan nemis niman imiuan nouikas (Gén. 18:1-8; Juec. 13:15; Luc. 24:28-30). Niman tejuamej, ¿akinomej melak noneki matikinnotsakan mauiyan tochan? Akin miyekpa imiuan toitaj, tokniuan ipan tlanechikojli. Noneki touikaskej imiuan akin yolmelaujkej niman kuajli tinemiskej imiuan, pampa ijkuak yejkos tonaltin tlen ouijtika nonekis intech topaleuiskej. Kanaj nonekis tikinseuiskej tokniuan tlayekankej ipan circuito niman tokniuan akin kiseliaj se tlamachtijli tlen kitemaka ikalpan toTajtsin noso akin ontlapaleuiyaj kampa kalchijchiuaj. Noijki, ijkuak tlaixpoliui, sekimej tokniuan iuan inchanejkauan noneki kanon nokauaskej hasta ijkuak kinyektlaliliskej inkal. Xkipiya tiknemiliskej ika san uelis teseuiskej akin ueyi inkal niman tlaojonka inchan. Niman, kanaj yejuamej miyekpa ijkon yokichiujkej. ¿Uelis titeseuiskej maski xueyi tokal noso xmiyek tlen tikpiyaj? w18.03 15 párr. 6; 16 párr. 9

¿Kenon ueli nokuiteua akin uetsi? Xsan iselti kichiua, ueli nokuiteua pampa iespíritu toTajtsin kipaleuiya (Filip. 4:13). Moselti timoteltis noijki noteneua ipan itlakilyo yejon espíritu, tlen melak nouika iuan sa no tejua timomelajkatlalis. Noijki noneki tikchiuaskej teoyotl, tomachtiskej Biblia niman titlanemiliskej. San ika ¿tlenon uelis tikchiuas tejua tla tikita ouijtika timomachtis Biblia noso xtikuelita timomachtis? Maka xmajmana. Jehová mitspaleuis melak xneki tikixmatis iTlajtol, tla tejua tijkauilia (1 Ped. 2:2). Kachtopa, xtlajtlanili mamitspaleui tiuelis sa no tejua timomelajkatlalis niman ijkon timomachtis iTlajtol. Sakin, xchiua ijkon ken otiktlajtlanili. Kanaj uelis tipeuas ika achijtsin. Niman ika yolik, tikmachilis ika timomachtis xouijtika niman hasta tikuelitas, noijki mitsyolpaktis ijkuak titlanemilis itech kualtsitsintin itlanemililuan Jehová (1 Tim. 4:15). w18.03 29 párrs. 5, 6

Achto ika noapolaktis se akin nomachtijtika itech Biblia kipiya kixmatis tlen melauak itech toTajtsin, tlen kineki kichiuas niman tlen yokichiuj ika techmakixtis (1 Tim. 2:3-6). Tlen kixmatis, kichiuas makipiya tlaneltokijli tlen kipaleuis makikajkaua makichiua tlen xkuelita Jehová niman noijki makitlakamati itlanauatiluan tlen melajkej (Hech. 3:19). Melauak, toTajtsin xkiselia yakaj akin itech nosentemaka niman noijki ok kichiujtika tlen xkuajli (1 Cor. 6:9, 10). San ika, akin nomachtijtika itech Biblia xsan noneki makitlakamati itlanauatiluan toTajtsin. Noijki kipiya ika yas tlanechikoltin, tenojnotsas niman temachtis (Hech. 1:8). Ijkuak yokichiuj nochi yejon, akin nomachtijtika itech Biblia uelis iselti kichiuilis teoyotl Jehová kampa kijlis ika itech nosentemaka, niman sakin, noapolaktis imixpan oksekimej. w18.03 6 párr. 12

¿Tleka Jehová okitlapejpeni María niman ijkon manochiua inan Jesús? Pampa yejua noyekanaya ika iespíritu santo toTajtsin. Yejua ijkon okiteititi itech tlajtoltin tlen ika okiueyiteneuj Jehová ijkuak okimitato ichanejkauan Zacarías niman Elisabet (Luc. 1:46-55). Tlen okijto María okiteititi ika melak kitlasojtlaya itlajtol toTajtsin niman ika kuajli kixmatiya Tlajkuiloltin ika Hebreo (Gén. 30:13; 1 Sam. 2:1-10; Mal. 3:12). Noijki, matikitakan ika yejua niman José, maski yononamiktijkaj, xonotekakej hasta ijkuak onemiko Jesús. Yejuin kijtosneki ika omemej kachtopa kitejtemouayaj kichiuaskej tlen toTajtsin kinekiya xijkon ken kitejtemoskej kichiuaskej tlen kineki intlalnakayo (Mat. 1:25). Itech xiujtin tlen opanokej, María kuajli okitak tlen kichiuaya Jesús. María melak kineltokaya tlen Jehová okijtoka kichiuas itech Mesías. Melak techpaleuis tiknemiliskej kenon tikixkopinaskej María niman ijkon kachtopa tikchiuaskej tlen toTajtsin kineki niman itlanauatiluan. w18.02 21 párr. 11

¿Kenon uelis tikixkopinaskej ken tlaneltokaya niman tetlakamatiya Job? Maski san tlenon tikixnamikiskej, nochipa matiktejtemokan tiktekichiuiliskej Jehová, niman melak matitlaneltokakan itech, niman matiktlakamatikan ika nochi toyojlo. Tejuamej melak miyek tikpiyaj, xijkon ken Job, tlen ika kinamiki ijkon matikchiuakan. Xnemili: Miyek tikmatij itech Satanás niman itech tlen kichiua (2 Cor. 2:11). Ipampa tlen ijkuiliujtika ipan amoxtli Job, tejuamej tikmatij tleka toTajtsin kitekauilia maonia tlajyouilistli. Noijki, teotlajtojli tlen okijto Daniel techasikamachiltia ika iTekiuajyo toTajtsin tlayekanas ipan nochi tlaltikpaktli niman Jesucristo yejua tlayekanketl (Dan. 7:13, 14). Niman tikmatstokej ika yejuin Tekiuajyotl kichiuas maka sa maonia tlajyouilistli. Tlen ipan onochiuj Job noijki techmachtia ika noneki matikimiknelikan tokniuan akin tlajyouijtokej. Ken Job, kemantika kanaj sekimej nion xkinemiliskej tlen kijtoskej (Ecl. 7:7). San ika, maka matiknemilikan tlen xkuajli intech. Melak kuajli tla tikteititiaj tlamachilistli niman titeikneliaj. Ijkin, tikixkopinaj Jehová, toTaj akin tetlasojtlani niman teikneliani (Sal. 103:8). w18.02 6 párr. 16; 7 párr. 19, 20

Sekimej peuaj noueyimatij pampa kuajli nesij, miyekej kimixmatij, uelij tlatsotsonaj, kojtikej noso pampa kinueyikaitaj. David kipiaya nochi yejuin niman maski ijkon nochipa yolyemanki katka. Se neskayotl, ijkuak okimikti Goliat, tekiuaj Saúl okijli ika ueliskia nonamiktis iuan ichpoch. San ika, David okinankili: “¿Akinon nejua [...] niman ijkon maninochiua imon tekiuaj?” (1 Sam. 18:18). Amanin, itekipanojkauan Jehová tokojtiliaj tiyeskej yolyemankej ijkon ken David. Melak techmojkatlachialtia tikmatiskej ika Jehová yolyemanki maski yejua akin Ueyixtika. Xsan tikauilmatij yejuin tlen techijlia toTajtsin: “Xmopantlantikan ikan teiknelilistli, ikan kuajlilistli, ikan yolyemanilistli, ikan kuajli tenotsalistli itlaj ika, niman ikan ijyouilistli” (Col. 3:12). Noijki, tikmatij ika “on yejuan tetlajsojtla xnexikolej, niman xnoueyiteneua nion noueyimati” (1 Cor. 13:4). Tlaltikpakchanejkej kinekiskej kinisiuiskej Jehová ijkuak kitaskej ika akin tiktekichiuiliaj tiyolyemankej. w18.01 28 párrs. 6, 7

Uelis nonekis tomintsin ipan itlaj tlen yononemili nochiuas (Hech. 4:34, 35; 1 Cor. 16:2). Kanaj totlanechikol kinemilijtika kichijchiuas se yenkuik Kajli kampa Tosentlaliaj. Noso kanaj techtomiliskej ika noneki tomintsin tlen ika notlaxtlauas se ueyi tlanechikojli kampa tosentlaliaj noso tikinpaleuiskej tokniuan sakin ika opanok itlaj tlen tlaixpoloua. Tomintsin tlen tiktemakaj noijki ika nopaleuiyaj misioneros, precursores especiales, tlayekankej ipan circuito, niman tokniuan akin tekitij ipan oficina kampa noyekanaj nochi sucursales, niman ipan sucursales itech nochi tlaltikpaktli. Tinochimej uelis tikpaleuiskej tekitl tlen kichiujtika Jehová ipan yejuin itlamiyan tonaltin. Miyek itech tomintsin tlen notemaka xnomati akinon kitemaka, pampa tikontlajkalij ipan cajas kampa notlalia tomin tlen onka ipan Kajli kampa Tosentlaliaj noso tiktitlanij itech jw.org. Kanaj tiknemiliskej ika pampa xmiyek kech tiktemakaj xueyi tlapaleuiya. San ika, miyek itech tomintsin tlen notemaka amanin xualeua itech tlen ueyi notemaka, tlen xmiyekej kichiuaj, ualeua itech tlen achijtsin notemaka, niman tlen miyekej kichiuaj. w18.01 19 párrs. 10, 11

Nochimej akin kichiuaj ken Cristo melak noneki manoapolaktikan niman ijkon nomakixtiskej (Mat. 28:19, 20, TNM). Ijkuak otimoapolakti tejua otikijto kema ijkuak omitstlajtoltijkej: “Ipampa imikilis Jesucristo, ¿yotimoyolkuep itech motlajtlakoluan niman yotimosentemakak itech Jehová niman ijkon tikchiuas tlen Yejua kineki?”. Moapolaktilis oteasikamachilti ika yotimosentemakak, tlen kijtosneki ika otikmakak Jehová motlajtol ika tiktlasojtlas niman tikchiuas kachtopa ipan monemilis tlen yejua kineki. Tiktlalis monemilis ipan imauan Jehová nochipa yes tlen melak kuajli otikchiuj. Yejuin ijkon pampa, ¿tlenon okse uelis tiktlapejpenis? Tla xtiktekichiuilia Jehová, kuakon Satanás mitsyekantos. Niman yejua nion xkineki xmomakixti. Yejua kineki xtlakamati niman ijkon maka xpaleui itekiuajyo Jehová niman xpolo motlamachialis ika tinemis nochipa. Xtlanemili itech tlateochiualistin tlen yotikinseli pampa otimosentemakak niman otimoapolakti. Aman ika yotikmakak Jehová monemilis, uelis kuajli tikmatstos niman tikijtos: “Jehová nouan nemi; xninomojtis. ¿Tlenon uelis nexchiuilis tlakatl?” (Sal. 118:6). Xonka okse ijkon ueyi tlateochiualistli ken tinemis iuan toTajtsin niman ika yejua mamitsseli. w17.12 23, 24 párrs. 1-3

Kemantika panos ika oksekimej tokniuan kichiuaskej noso kijtoskej tlen techkualanis niman kemantika tejuamej tikinkualaniskej. Yejuin uelis melak techtlatlatas. Ken ipan okseki, Jehová techkauilia matikteititikan tomelajkanemilis niman matiuelikan matitekitikan san sekan inuan itekipanojkauan akin itech yonosentemakakej niman akin yejua kintlasojtla maski tlajtlakolejkej. Jehová kitekauilia ika itekipanojkauan makixnamikikan tlen kintlatlata, ijkon ken ipan onochiuj José. Ijkuak telpochtli katka, okuikakej Egipto pampa itlakpaikniuan kinexikolitayaj niman okinemakakej ken tlakeuajli (Gén. 37:28). Tikmatstokej ika toTajtsin okiyolkoko kitas kenon José, akin iuan nouikaya niman yolmelaujki katka, kitlajyouiltiayaj. San ika, xonokalakti, nion ijkuak okitlajtlakoltijkej ika okiyejyeko kichiualtis isiuauj Potifar iuan manoteka niman nion ijkuak okitsajkej. San ika ¿toTajtsin san okikauj José? Ka. Biblia techijlia ika “Jehová okichiuj san tlenon yejua kichiuaskia kuajli makisati” (Gén. 39:21-23). w18.01 9, 10 párrs. 12-14

Tla yakaj techtlajtoltiskia tlenon tikueyiitaj itech tlen tikneltokaj, tikmatstokej ika tikteneuaskiaj ika Jehová yejua Tlachijchiujketl niman ika otechmakak tonemilis. Noijki tikijtoskiaj ika titlaneltokaj itech Jesucristo, akin omik ipampa totlajtlakoluan. Niman kanaj noijki tikijtoskiaj ika tlayekapan tinemiskej nochipa ipan se Xochitlalpan. San ika ¿tikteneuaskiaj yoliuilistli? Maski tla tejuamej tikneltokaj ika timakisaskej itech ueyi tlajyouilistli niman tinemiskej nochipa ipan tlaltikpaktli, tikpiyaj miyek tlen ika tikueyiitaskej yoliuilistli. Yejuin tlamachtijli melak ueyi kijtosneki. Tla Jesús xyoliuiskia, yejua xtekiuajtijtoskia aman niman nion xtlaj kijtosnekiskia tlen titemachtiaj itech itekiuajyo (1 Cor. 15:12-19). San ika, tejuamej kuajli tikmatstokej ika kema oyoliuj, niman titlajtouaj itech yejuin tlamachtijli (Mar. 12:18; Hech. 4:2, 3, TNM; 17:32; 23:6-8). w17.12 8 párrs. 1, 2

Fariseos san kitayaj tlen okichiujka akin tlajtlakole niman xtlen onkatka ipan iyojlo. Matikitakan tlen opanok ijkuak Jesús otlakuato ichan Mateo. Fariseos okintlajtoltijkej inomachtijkauan Jesús: “¿Tlika on nemotemachtijkau tlakua inuan on yejuan tlacobrarouaj  ika on impuestos niman inuan on oksekimej tlajtlakolejkej?”. Jesús otlanankili: “Para on yejuan xkualoj xkimpoloua on tepajtijketl, pero on yejuan kualoj kemaj. Xuiyan niman kuajli xkajsikamatitikan tlinon kijtosneki yejua in Yektlajkuilojli ijkuak ijkin kijtoua: ‘Nejua nikneki teiknelilistli amo tla yej nenkinuentlaliskej on yolkej’. Ijkon kemaj nenkimatiskej ika nejua xoniuajlaj para nikinnotsas on yejuan yolmelajkej, yej para nikinnotsas on yejuan tlajtlakolejkej” (Mat. 9:9-13). ¿Kintlapopoluitoya Jesús akin tlajtlakouaj? Ka, xijkon. Yejua kinekiya manoyolkuepakan. Niman itech yejuin melak tlajtouaya ijkuak tenojnotsaya (Mat. 4:17). San ika, Jesús kipiaya tlamachilistli niman kimatiya ika sekimej itech yejuin “tlakamej yejuan tlacobrarojkej  ika on impuestos niman on oksekimej yejuan tlajtlakolejkej” kinekiyaj nopatlaskej. Xoyajka ichan Mateo san otlakuato. Yej, miyekej itech yejuamej kitokayaj Jesús (Mar. 2:15). Teajman ika miyekej fariseos xkimitayaj oksekimej ken Jesús kimitaya. w17.11 13 párr. 2; 16 párr. 15

Tinochimej tikmachiliaj ika se tlateochiualistli tinemiskej ipan tlanechikojli tlen kiyekana Cristo. Tomachtiskej iTlajtol toTajtsin ipan tlanechikoltin niman topaleuiskej semej iuan oksekimej ika tlasojtlalistli niman teiknelilistli, techpaleuiyaj maka matikixtenpolokan tlen tikchiaj. Maski ijkon, kemantika itlaj tlen xkuajli onasikamat uelis kichiuas maka kuajli manomachilikan tokniuan. Tla xtikinyektlaliaj yejuin tlaueltin, uelis kichiuas matikualantinemikan (1 Ped. 3:8, 9). ¿Tlenon uelis tikchiuaskej niman ijkon tlen otechkualani maka matechtsakuili tikseliskej tlen tikchiaj? Pablo okimijli colosenses: “Dios mechtlajsojtla niman yomechtlajpejpenij. Yejua ika, tej, xmopantlantikan ikan teiknelilistli, ikan kuajlilistli, ikan yolyemanilistli, ikan kuajli tenotsalistli itlaj ika, niman ikan ijyouilistli. Xpiakan ijyouilistli iuan oksekimej, niman xmotlapojpoluikan tla yakaj mechtlauelkuitia” (Col. 3:12, 13). w17.11 27 párrs. 7, 8

Ijkuak se israelita temiktiaya, san ika, xpampa kinekiya kichiuas, nonekiya cholos itech se kalpan kampa nopaleuiayaj, niman kampa ipuerta kalpan “kimijlis tlen opanok tlayekankej”. Yejuamej nonekiya kuajli kiseliskej. Seki tonaltin sakin, nonekiya kititlaniskej kampa otemiktijka niman ijkon tlayekankej itech yejon kalpan makitlajtlakolmakakan (Núm. 35:24, 25). Tla yejuamej kitayaj ika yemelak xsan okinek otemikti, kikauiliayaj manokuepa kalpan kampa nopaleuiayaj. ¿Tleka temiktijketl nonekiya tlajtos inuan tlayekankej? Pampa yejuamej nonekiya kipiyaskej chipauak kalpan Israel niman kipaleuiskej temiktijketl makiseli iteiknelilis Jehová. Se akin ixtlamatki itech Biblia otetomili ika, tla akin temiktiaya xtlajtouaya inuan tlayekankej, kinotejtemouiliaya makimiktikan pampa xonopaleui itech tlen toTajtsin kimakatika ika manomanaui. Tla xnopaleuiaya ipan yejuin kalpamej, yejon tetlakuepiltijketl ipampa yestli ueliskia kimiktis. w17.11 9 párrs. 6, 7

Jehová akin kinyekana akin tlaixnamikij ok kitlajpiya niman kiyolchikaua ikalpan ika iluikaktekitkej ijkon ken opanok ipan itonaluan Zacarías (Mal. 3:6; Heb. 1:7). Ijkuak itech xiuitl 1919, Israel tlen iyaxka toTajtsin okimakixtijkej itech Ueyixtika Babilonia, tlaneltokijli tlen melauak xnoteltia ika ueyixtiuj maski chikauak kixnamikij akin kitlauelitaj (Apoc. 18:4). Pampa iluikaktekitkej techtlajpiyaj, xkipiya ika techmojtis ika tlaneltokijli tlen xmelauak oksejpa makitelti ikalpan toTajtsin (Sal. 34:7). Xsan yejon, kuajli tikmatstokej ika itekipanojkauan toTajtsin itech nochi tlaltikpaktli ok ika nochi toyojlo tiktekichiuiliskej toTajtsin. Akin tlaixnamikij itech Jehová touan nemij. Ijkuak ipan ueyi tlajyouilistli techixnamikiskej, iluikaktekitkej kintlajpiyaskej itekipanojkauan toTajtsin, niman kinpopoloskej akin kixnamikij iueyitlayekanalis Jehová (2 Tes. 1:7, 8). ¡Melak teyolpakti yes yejon tonajli! w17.10 28 párrs. 10, 11

Tla se tochanejkauj kikixtiaj itech tlanechikojli noso yejua kijtoua ika xok kineki yes iteixpantijkauj Jehová, melak techyolkokoua, yeskia kentla itlaj techtlalaktilijtoskiaj ipan toyojlo. ¿Tlenon uelis tikchiuaskej tla panoua yejuin? Melak noneki matikchiujtokan tlen technisiuiya itech toTajtsin. Tla tiknekij machikaujto totlaneltokil, kipiya ika nochipa tikpouaskej Biblia, toyektlaliskej niman tiaskej tlanechikojli, tikisaskej tontenojnotsaskej niman tiktlajtlaniliskej toTajtsin matechmaka kojtilistli tlen ika titlaxikoskej (Jud. 21). Niman, ¿tlenon uelis tikchiuaskej tla pampa toyolkokouaj tikchiuaj yejuin san pampa yotomatkej? Maka matisiauikan. Matikchiuakan miyek ipan itekiyo Jehová, pampa yejuin techpaleuis matikinyekanakan totlanemililuan niman tlen tikmachiliaj. Matikitakan tlenon ipan onochiuj akin okijkuilo Salmo 73. Yejua opeuj tlanemilia ken xkinamiki, yejuin okichiuj melak manoyolajmana. San ika, ijkuak san otlanemili ipan itekiyo Jehová okipaleui makiyektlali ken tlanemiliaya (Sal. 73:16, 17). Tikchiuaskej yejon noijki techpaleuis. w17.10 16 párrs. 17, 18

Ijkuak Satanás otlajto iuan Eva, okiteititisnek ika kinekiliaya tlen kuajli. San ika, yejua kichiujtoya ika ome ixayak niman san itech tlanemilijtoya (Gén. 3:4, 5). Okse akin ijkon okichiuj yejua Ahitofel, akin san kiteititisnekiya ika nouikaya iuan tekiuaj David, san ika, okikauj ijkuak okitak ika oksekan ueliskia nopaleuis (2 Sam. 15:31). Ipan yejuin tonaltin, akin kixnamikij tlen melauak kinekij kixeloskej tlanechikojli niman kiminotsaj sekimej “ikan inkualtsin tlajtol” niman kintlaneltokiltiaj ika yemelak kintlasojtlaj. San ika, tlen yemelak, san kitejtemouaj tlen yejuamej kinekij (Rom. 16:17, 18). Tlasojtlalistli tlen san ika titekajkayauas itlaj tlen tepinajti. Yakaj uelis kinkajkayauas tlaltikpakchanejkej, san ika, Jehová xuelis kikajkayauas. Jesús okijto ika akin kichiuaj ken akin kipiyaj ome inxayak, yejuamej melak tlajyouiskej (Mat. 24:51). Ika yejon matotlajtoltikan: “¿Nikpiya tlasojtlalistli tlen melauak, xsan notech nitlanemilia niman nion xnitekajkayaua?”. w17.10 8 párrs. 6-8

Ijkuak yakaj tikpouiliaj Biblia, kentla tijkauilijtoskiaj Jehová makinojnotsa. Se tlaxelojli tlen kuajli yonotlapejpeni kipiya miyek kojtilistli xijkon ken tlen miyek tejuamej uelis tikijtoskej (1 Tes. 2:13). Ika yejon, matotlajtoltikan: “Ijkuak nitenojnotsa, ¿nikyejyekoua niktepouilis Biblia nochipa ijkuak niueli?”. Melauak, xsan noneki matikinpouilikan Biblia akin tikinnojnotsaj. Ijkon ken panouaya ipan kachtopa siglo, amanin miyekej xkasikamatij tlen kijtoua Biblia. Yejua ika, xkipiya tiknemiliskej ika yokasikamat se tlaxelojli san pampa yotikonpouilijkej. Tiktetomiliaj noso miyekpa tikijtouaj tlajtoltin tlen ueyi kijtosnekij. Ijkon, iTlajtol toTajtsin uelis ajsis ipan intsontekon niman ipan inyojlo akin techkakij (Luc. 24:32). w17.09 25 párrs. 7, 8

Akin kichiuaj ken Cristo noneki makimiknelikan imikniuan niman oksekimej (Juan 13:34, 35). “Titeiknelis” uelis kijtosnekis ika “titlajyouis iuan akin tlajyouiya”. Kuakon kijtosneki tikmachilis ika noneki tikinpaleuis akin kixnamikij tlen ouijtika. Matikitilikan kenon tikchiuaskej. Miyekej tokniuan teititiaj ika kimikneliaj akin tlajyouiyaj pampa otlaixpoliuj kampa chantij. Itekitkauan toTajtsin kimixmatij nochiuiyan ika tepaleuiyaj ijkuak panoua yejuin (1 Ped. 2:17). Ipan xiuitl 2011, se tokniuj siuatl akin ualeua Japón, chantiya kampa otlaixpolo tlalolinalistli niman mar tlen onajkok niman okis. Yejua okijto ika melak okiyolseui kitas ika miyekej tokniuan kinyektlalijtoyaj kaltin niman Kajli kampa Tosentlaliaj, akin ualeuayaj Japón niman intech okseki países. Okijkuilo: “Nochi tlen nopan opanok, okichiuj manikita ika Jehová techtlasojtla, niman ika iteixpantijkauan totlasojtlaj. Miyekej tokniuan ipan nochi tlaltikpaktli kichiujtokej teoyotl topampa”. w17.09 11 párrs. 12, 13

¿Tleka noneki matiuelikan matoteltikan toselti? Matikitakan ome tleka noneki. Kachtopa, akin uelij kiteltiaj tlen kimachiliaj xkipiyaj miyek uejueyimej tlaueltin. Noijki, xkintekiyomaka nouikaskej inuan oksekimej niman xsan kuajkualanij, xnajmantokej niman xmelak noyolkokouaj. Ika ome, tikxikos tlatlatalismej niman tikinteltis ileuilistin tlen xkuakualtin, yejua tlen noneki niman ijkon toTajtsin techselis. Tlajtlakojli tlen okichiujkej Adán niman Eva teititia ika yemelak ijkon (Gén. 3:6). Ijkon ken yejuamej, miyekej melak tlajyouijtokej pampa xonoteltijkej inselti. Tejuamej akin titlajtlakolejkej xtiuelij toteltiaj toselti ken noneki. Jehová kimati ika akin tiktekichiuiliaj tokojtiliaj iuan toxikouaj tlen xkuajli tiknekij, niman yejua kineki techpaleuis (1 Rey. 8:46-50). w17.09 3, 4 párrs. 3, 4

Kachtopa ipan Sudáfrica xkinkauiliayaj iteixpantijkauan Jehová akin kipiayaj okse color manosentlalikan san sekan. Maski ijkon, se domingo 18 itech diciembre 2011, ipantsin 78,000 iteixpantijkauan Jehová, akin ualeuayaj miyekan itech Sudáfrica niman okseki países inisiuj, okitemiltijkej se estadio tlen onka Johannesburgo kampa onosentlalijkej, niman okikakej tlamachtijli itech toTajtsin. Se akin tlayekanaya kampa onosentlalijkej okijto: “Xkeman nikitaya melak miyekej tlaltikpakchanejkej makichiuakan tlen kuajli. Nochimej kuajli onotlakentijkej. Niman kuajli otlachipaujkej kampa onosentlalijkej. San ika, tlen melak nechmojkatlachialtia ika nemejuamej xnemochikoitaj”. Yejuin tlen kijtouaj akin xiteixpantijkauan Jehová, teititia ika tokniuan itech nochi tlaltikpaktli xijkon ken oksekimej (1 Ped. 5:9). ¿Tleka xijkon tikchiuaj ken oksekimej? Pampa ika itlapaleuilis iTlajtol toTajtsin niman iespíritu santo, tokojtiliaj niman ijkon tikpatlaj tonemilis niman “aman yo[tik]selijkej nemilistli yejuan yenkuik” (Col. 3:9). w17.08 17, 18 párrs. 2, 3

Biblia kijtoua ika titlamachias, se kualneskayotl tlen techmaka toTajtsin ika iespíritu santo; tla toTajtsin xtechpaleuiskia, tlaltikpakchanejkej akin titlajtlakolejkej xuelis tikteititiskiaj yejuin kualneskayotl. Yejuin se tetlayokolijli tlen techmaka toTajtsin. Niman ijkuak titlamachiaj tikititiaj Jehová niman noijki tlaltikpakchanejkej ika tikintlasojtlaj. Ijkuak nimantsin tosiajkauaj, kichiua ika maka sa matikintlasojtlakan oksekimej, san ika, tla titlamachiaj, tikchikauaj yejon tlasojtlalistli (1 Cor. 13:4; Gál. 5:22). Ijkuak titlamachiaj noijki tikteititiaj okseki kualneskayomej tlen melak nonekij. Se neskayotl, titlamachias ika yolseuilistli kijtosneki tikijyouis niman tikixnamikis tlen ouijtika, san ika, xtikpolos mopakilis (Col. 1:11; Sant. 1:3, 4). Noijki kijtosneki titlajyouis, xtimokuepiltis niman tiyolmelaujkanemis maski san tlenon mapano. Biblia noijki techijlia matikasikamatikan ika kipiya titlamachiaskej. Yejuin se ueyi tlamachtijli tlen tiuelij ipan Santiago 5:7, 8. w17.08 4 párr. 4

Telpochtli, tikmatstokej ika tikasikamati ika noneki kuajli tiknemilis kanon tias tonpaxalos ijkuak ok xitoneua. Tonemilis yeskia kentla kanaj tonpaxalos, niman ijkuak titelpokamej ijkuakon noneki tiknemiliskej kanon tiaskej. Melauak, tiknemilis tlenon tikchiuas tlayekapan uelis tikmachilis ouijtika. San ika, xmoyolchikauakan. Yejon tlen kijtoua Jehová itech tlaxelojli tlen aman tikitstokej. Jehová mitsyolchikaua xnemili ika tlamachilistli tlen tikchiuas ika tlayekapan (Ecl. 12:1; Mat. 6:20). Yejua kineki ika tejua xyolpaki. Uelis tikitas ika yejuin melauak ipampa tlen tikita, tlen tijkaki niman nochi tlen tikuelilia tlen melak kualtsin yokichijchiuj. Xtlanemili noijki itech kenon techtlajpiya yejua niman techmachtia melak kuajli matinemikan. Xnemili itech tlen kimijlia akin kimapeuaj itlajtolpaleuilisuan: “Onenkitlapejpenijkej tlen xnechyolpaktia”. Noijki kijtoua: “¡Xkitakan! Notekipanojkauan pakiskej, san ika, nemejuamej nenpinauiskej. ¡Xkitakan! Notekipanojkauan tsajtsiskej ika pakilistli pampa kuajli onias inyojlo” (Is. 65:12-14). Ijkuak ika tlamachilistli tiktlapejpeniaj tlen tikchiuaskej ipan tonemilis, tikueyichiuaj Jehová (Prov. 27:11). w17.07 22 párrs. 1, 2

ToTajtsin akin kimati nochi itech sitlalimej, noijki kimati kanon tinemij, kenon tomachiliaj niman tlenon techpoloua mojmostla. ToTajtsin Jehová xsan najmana totechkopa, noijki techasikamati niman kipiya kojtilistli tlen ika techpaleuis itech tlen tikixnamikij (Sal. 147:5). Kemantika uelis tomachiliskej ika melak ouijtika tlen tikixnamiktokej niman ika xok tiuelij tiaskej ika tlayekapan. San ika, toTajtsin kasikamati tlen xtiuelij tikchiuaj niman “kilnamiki ika titlachijchiujtin ika tlalpoktli” (Sal. 103:14). Pampa titlajtlakolejkej, uelis topopoloskej miyekpa ika itlaj. Tikmatij ika tinochimej toyolkuepaj itech itlaj tlen otikijtokej, itech se xkuajli ileuilistli tlen tikpiyaj kemantika noso ijkuak tikileuiyaj tlen oksekimej kipiyaj. Maski Jehová xijkon ipan nochiua ken tejuamej, yejua kuajli techasikamati (Is. 40:28). Kemantika yotikitakej kenon Jehová yotechpaleui ika ikojtilis matikixnamikikan se tlatlatalistli (Is. 41:10, 13). w17.07 18, 19 párrs. 6-8

Se tokniuj akin otlakat Sri Lanka niman chanti oksekan, pampa ipan ipaís kipiya se kajli niman se kaltlajli, kinkauilia tokniuan ompa makipanoltikan tlanechikoltin niman uejueyimej tlanechikoltin, niman ompa manokauakan tokniuan akin chikauak tekitij. Maski yejuin patioj kisa, ijkon kinpaleuiya tokniuan akin xkipiyaj tomin. Oksekan kampa xueli titenojnotsaj pampa tekiuajkej xtekauiliaj, tokniuan kintekitiltiaj inkaluan niman ompa kinpanoltiaj tlanechikoltin. Ipampa yejuin, miyekej precursores niman tenojnotskej akin xkipiyaj miyek tomin ueli kipiyaj kanon nosentlaliskej niman xkitlaxtlauaj. Se tokniuj siuatl akin yonomat kitemaka itomintsin ika tlapaleuis manochiua tekitl itech Tekiuajyotl kimachilia ika ipan miyek xiujtin yokiseli ueyi tlateochiualistli pampa kuelita kitemakas tlen kipiya. Yejua kijtoua: “Nikita ika ijkuak ninochikaua niktemakas tlen nikpiya, nechpaleuiya ninochikauas nikintlapopoluis oksekimej, niteijyouis niman nikselis tlen teyolkokoua niman tlajtolpaleuilistin”. w17.07 9 párrs. 9, 10

Tla Job sakin ika yolik okasikamatstia tleka okixnamik tlatlatalistin, kanaj kemantika onotlajtolti tleka toTajtsin okikauili melak matlajyoui. Tla Job ijkon otlanemili, yejua ouel okilnamik tlen Jehová yokijlika. Yejuin ueliskia kiyolseuis niman kipaleuis matlanemili ken kinamiki (Sal. 94:19, nota). Tla titlanemiliaj itech tlen ipan onochiuj Job, uelis techpaleuis matikpatlakan ken titlanemiliaj niman uelis techyolseuis. Amoxtli Job nopoua iuan tlen Jehová okinek manoijkuilo niman ijkon “nochi tlen ye uejkaui onijkuiloj ipan on Yektlajkuilojli, onijkuiloj para techmachtia. Onijkuiloj para ma tikpiakan totlamachalis itechkopa on ijyouilistli niman teyoltlalilistli yejuan techmaka on Yektlajkuilojli” (Rom. 15:4). Yejuin techmachtia ika tla melak titlanemiliaj itech totlaueluan, tikilkauaskej titlanemiliskej itech yejuin: manoteititi ika san Jehová melauak kinamiki tlayekanas. Ijkon ken Job, tikteititiaj ika tikpaleuiyaj iueyitlayekanalis Jehová ijkuak tiyolmelaujkanemij itech maski tikixnamikij tlen melak ouijtika ipan tonemilis. w17.06 24 párr. 9; 25 párrs. 13, 14

Jesús kimatiya ika inomachtijkauan nonekiya manoseuikan. Se neskayotl, ijkuak melak chikauak yotenojnotskaj, yejua okimijli tlen kijtoua tlaxelojli tlen aman tikitstokej. Ijkuak toyolpaktiaj techpaleuiya matoseuikan niman kuajli matomachilikan. San ika, ipan tonemilis noneki kuajli matikitakan ika maka melak ueyi kijtosnekis toyolpaktiskej. Ipan kachtopa siglo, miyekej kipiayaj yejuin tlanemilijli: “Ma titlakuakan niman ma tatlikan, pampa mostla timikiskej” (1 Cor. 15:32). Ipan yejuin tonajli, miyekej noijki ijkon tlanemiliaj. ¿Tlenon uelis techpaleuis matikmatikan tla tikitaj yolpaktilistli ken kinamiki noso ka? Uelis tikchiuaskej yejuin. Matiktlapejpenikan se semana niman matikijkuilokan kech horas tikchiuaj itekiyo Jehová. Sakin uelis tikijkuiloskej kech horas tipanouaj ipan yejon semana ika toyolpaktiaj, ken ijkuak tauiltiaj, tikitaj televisión noso ipan videojuegos. Ijkuak tikitaskej kech otiuejkaujkej ipan yejuin ome, tikitaskej tla noneki tikpatlaskej itlaj (Efes. 5:15, 16). w17.05 24 párrs. 11-13

Ipan neskayotl, yejon tlakatl tlen Jesús okiteneuj, okinexti se perla tlen melak tlasojti. Yejuin tlakatl melak kinekiya yejuin perla niman hasta okinemakak nochi tlen kipiaya niman ijkon kikouas. ¿Uelis tiknemiliskej kenon ixpan yejua melak tlasojtiya yejon perla? Tlen melauak itech iTekiuajyo toTajtsin ijkon ken yejon perla tlen melak tlasojti. Tla melak tiktlasojtlaj Tekiuajyotl ijkon ken yejon tlakatl akin kitlasojkaitaya perla, tiknekiskej tiktemakaskej nochi tlen nonekis niman ijkon tikpaleuiskej Tekiuajyotl (Mar. 10:28-30). Matitlajtokan itech Zaqueo, yejua okipix miyek tomin pampa kinkajkayauaya tlaltikpakchanejkej niman ijkon kinkuiliaya intomin (Luc. 19:1-9). San ika, se tonajli Zaqueo okikak Jesús ijkuak tlajtouaya itech Tekiuajyotl. Yejua melak okuelitak tlen okikak niman okinek kipatlas nochi inemilis. Yejua okijto: “Xkaki, noTeko, on tlen nikpia tlajkotipan nikinmakas on yejuan mayankej. Niman tla yakaj onikajkayajka para ouel oniktlachtekilij, naupa sa no ijki nikuepilis on kech onikichtekilijka”. Zaqueo okinkuepili tomin akin yokinkuilijka niman okikauj ika kileuis tomin. w17.06 10 párrs. 3-5

Akin kinpaleuiskej tajtin noneki nochipa kinyolchikauaskej kokonej makintlakaitakan intajuan. Yejuamej uelis kichiuaskej yejuin ijkuak kuajli tlajtoskej itech tajtin niman kitlakaitaskej ika tajtin kipiyaj tekitl ika kinmachtiskej inkoneuan. Noijki, akin tepaleuiyaj noneki maka kichiuaskej itlaj tlen kinmasikamachiltis tlen xkuajli tokniuan noso oksekimej niman tlen uelis nesis ken xchipauak nemilistli (1 Ped. 2:12). Maski tajtin uelis kintlajtlaniliskej oksekimej makinpaleuikan, ok yejuamej intekiyo kinmachtiskej tlen melauak. Noijki noneki kitstoskej kenon oksekimej tokniuan kinpaleuiyaj inkoneuan. Tajtin, xtlajtlanilikan itlapaleuilis Jehová, niman xchiuakan nochi tlen nenueliskej (2 Crón. 15:7). Kachtopa melak xmajmanakan ipampa ken nouikaj nemokoneuan iuan Jehová niman maka san itech tlen nenkinekij. Xchiuakan nochi tlen nenueliskej niman ijkon iTlajtol toTajtsin maajsi ipan inyojlo nemokoneuan. Nochipa xnemilikan ika nemokoneuan uelis nochiuaskej itekipanojkauan Jehová. w17.05 14 párrs. 19, 20

Xnemili yejuin: ome tlakamej okitlajtlakoltijkej se tlakatl itech tlen melak xkuajli. Tlen yejuamej okijtokej se tlakajkayaualistli katka. San ika, yejon tlakatl okitlajtlakoltijkej niman okimiktijkej. Xkonemili kenon onomachilijkej akin melak kinekiyaj melajkayotl ijkuak okitakej kenon yejuin tlakatl akin xkipiaya tlajtlakojli niman ikoneuan kinmiktiayaj ika temej. Yejuin xsan itlaj tlen nonemilia opanok. Yemelak ijkon ipan onochiuj se kuajli itekipanojkauj Jehová itoka Nabot, akin onen ijkuak tlanauatiaya tekiuaj Acab (1 Rey. 21:11-13; 2 Rey. 9:26). Ijkuak tekiuaj Acab okijli Nabot ika kinekiya kikouilis itlal noso kipatilis ika okse melak kuajli tlajli kampa noijki notoka uva, Nabot xokinek. ¿Tleka? Nabot xokinek kichiuas tlen kijliaya tekiuaj Acab pampa yejon kixnamikiya tlanauatijli tlen Jehová okinmakaka israelitas ika maka kinemakaskej tlen kinpanoltiliayaj inchanejkauan (Lev. 25:23; Núm. 36:7). Kuajli nesi ika Nabot kitlakamatiya Jehová. w17.04 21 párr. 1; 22 párr. 4

¿Akinomej ok nemiskej ijkuak xkuakualtin tlaltikpakchanejkej popoliuiskej? Jehová techijlia: “Akin yolmelaujkej nemiskej ipan tlaltikpaktli, niman nochipa ipan chantiskej”. Noijki techijlia: “Akin yolmelaujkej nemiskej ipan tlaltikpaktli, niman nochipa ipan chantiskej” (Sal. 37:11, 29). ¿Akinomej “yolmelaujkej”? Tlaltikpakchanejkej akin yolyemankej akin nomachtiaj itech Jehová niman kitlakamatij. Noijki “yolmelaujkej” pampa kinekij kichiuaskej tlen toTajtsin kijtoua ika kuajli. Ipan yejuin tlaltikpaktli, nemij miyekej xkuakualtin tlaltikpakchanejkej xijkon ken yolmelaujkej. San ika, ipan yenkuik tlaltikpaktli, san nemiskej tlaltikpakchanejkej akin yolmelaujkej, niman yejuamej kichiuaskej tlaltikpaktli manokuepa se xochitlalpan. w17.04 11 párrs. 5, 6

“Tetlajsojtlalistli itech Dios” techyolmapeua matikimititikan tlasojtlalistli tokniuan, niman yejuin melak noneki ijkuak kixnamikij tlajyouilistli (1 Juan 3:17, 18). Se neskayotl, ijkuak akin kichiuayaj ken Cristo ipan kachtopa siglo ipampa apistli kinpolouaya tlen kikuaskej ipan Judea, tokniuan ipan tlanechikojli okinpaleuijkej (Hech. 11:28, 29). Noijki Pablo niman Pedro, itlatitlankauan Cristo, okinyolchikaujkej tokniuan ika kuajli makinselikan oksekimej (Rom. 12:13; 1 Ped. 4:9). Kuakon, pampa techyolchikauaj matikimititikan iknelilistli tokniuan akin ualeuaj oksekan ijkuak techuajtlajpalouaj, tikasikamatij ika melak noneki matikimititikan iknelilistli tokniuan akin kixnamikij tlajyouilistli noso kintlaueltokaj ipampa intlaneltokil. San kemach, melak miyekej iteixpantijkauan Jehová ononek kikauaskej inchan pampa onka guerra niman kintlaueltokaj ipan este de Ucrania. Teyolkoko tikijtoskej ika sekimej okinmiktijkej. San ika, miyekej tokniuan akin ocholojkej kuajli okinselijkej ipan inchan tokniuan ipan oksekan itech Ucrania niman Rusia. Tokniuan akin chantij ipan yejuin ome países xokinejkej tlapaleuiskej ipan guerra, xokichiujkej ken oksekimej tlaltikpakchanejkej, niman ok tenojnotsayaj ika chikaualistli “kuajli tlajtojli” (Juan 15:19; Hech. 8:4). w17.05 4, 5 párrs. 6, 7