Noviembre

Sa no tejuamej tomelajkatlaliskej noijki kijtosneki tiueliskej tikyekanaskej ken touikaj niman ken titlanemiliaj. San ika, xtiuajueltiuej yejon ijkuak tiuajtlakatij, kuakon noneki tomachtiskej ijkon tikchiuaskej. Ijkuak tajtin ika ijyouilistli miyekpa kinmachtiaj inkoneuan “ipan on melajkatlalilistli de innemilis niman ikan machtilistli” tlen ualeua itech Jehová, kinpaleuijtokej manochiuakan tlamachilisejkej niman mauelikan sa no yejuamej manomelajkatlalikan (Efes. 6:4). Noijki ijkon panoua iuan akin kixmatij Jehová ijkuak iuejueyimej. Maski kanaj achijtsin uelij sa no yejuamej nomelajkatlaliaj, ok xchikaujkej ipan intlaneltokil. San ika, ijkuak peuaj notlaliliaj “yenkuik nemilistli” niman nokojtiliaj kixkopinaskej Cristo, peuaj tlanemiliaj ken akin chikauak itlaneltokil (Efes. 4:23, 24). Tomelajkatlaliskej sa no tejuamej melak noneki ijkuak tikchikauaj totlaneltokil. w18.03 29 párrs. 3, 4

Jehová niman ikalpan technotsaj matiakan tlanechikoltin. Niman tejuamej tiknekij ika nochimej akin yauej ipan Kajli kampa Tosentlaliaj kuajli manomachilikan (Rom. 15:7). Yejuin melak ueyi kijtosneki ijkuak yakaj kachtopa yauj ipan totlanechikol. Jehová noijki yokinots, kuakon noneki tikchiuaskej ika kuajli manomachili, maski san kenon manesi noso san kenon manotlakenti (Sant. 2:1-4). Tla tikitaj ika nion se tokniuj xkonnotsa, ¿tiueliskiaj tejuamej tiknotsaskej niman touan manotlali? Tikmatstokej ika yejua kitlasojkamatis matikpaleuikan makitstiuj kanon tiauej itech totlamachtiluan niman makinnexti tlaxeloltin ipan Biblia. Tikchiuaskej yejuin se ken tiktlakamatij yejuin tlajtoltin: “Kuajli xkinselikan on yejuan mechtlajpalouaj”. Ijkuak tokniuan itech okseki tlanechikoltin, tlayekankej ipan circuito, niman kemantika tokniuan akin ualeuaj itech se sucursal techuajmakaj se tlamachtijli ipan Kajli kampa Tosentlaliaj, techkauilia kuajli matiteselikan (3 Juan 5-8). Kuakon uelis tikinnotsaskej touan matlakuakan noso itlaj makonikan. ¿Tleka xtikchiua yejuin ijkuak yakaj techuajtlajpalos? w18.03 15 párrs. 5, 7

Matikilnamikikan aman se tlakatl judío akin kintlaueltokaya akin kichiuayaj ken Cristo. Yejua otlakat ipan se kalpan tlen yonosentemakaka itech toTajtsin. San ika, judíos yokipolojkaj ken kuajli nouikayaj iuan Jehová pampa xokitlakamatkej. Yejon tlakatl kitlakamatiya nochi tlen kichiuayaj judíos. San ika, ipan iluikak, Jesús okuajmakak se tlanauatijli. Yejuin okichiuj ika yejuin tlakatl makiseli itlapaleuilis Ananías, se akin kichiuaya ken Cristo, kuakon onotelkets niman okiapolaktijkej (Hech. 9:17, 18, TNM; Gál. 1:14). Yejon judío sakin okixmatkej ken Pablo, itlatitlankauj Cristo. Matikitakan ika onoapolakti ijkuak okasikamat itekiyo Jesús ipan tlen toTajtsin kineki kichiuas (Hech. 22:15, 16, TNM). Itlaj ijkon panoua aman imiuan akin nomachtiaj Biblia, maski tla telpokamej noso iuejueyimej. w18.03 5, 6 párrs. 9-11

Kachtopa matitlajtokan itech Jacob. Noijki ken aman, inemilis Jacob ouijtika katka. Ikniuj, akin itoka katka Esaú, okinek kimiktis. Niman xsan yejon, imontaj okiyejyeko kikajkayauas niman melak kitekitiltis. San ika, maski iyeualiyan nemiyaj akin noyekanayaj ika iileuilis intlalnakayo, Jacob onoyekan ika iespíritu santo toTajtsin (1 Cor. 2:14-16, TNM). Yejua kineltokaya tlen Jehová okijlika Abrahán, niman kuajli okintlajpix inchanejkauan, akin toTajtsin kintekitiltiskia niman ijkon kichiuas tlen kineki (Gén. 28:10-15). Itlajtoluan Jacob niman tlen okichiuj okiteititijkej ika kipatiojkaitaya itlanauatiluan toTajtsin niman tlen kinekiya kichiuas. Se neskayotl, ijkuak okinemili ika Esaú kixnamikiskia, Jacob okijli toTajtsin: “Xnechmakixti, nimitstlatlaujtilia [...]. Tejua yotikijto: ‘Nejua melauak nimitschiuilis tlen kuajli, niman nikchiuas ika mochanejkauan manochiuakan ken xajli tlen onka ipan mar’” (Gén. 32:6-12). Ken onen Jacob kuajli okiteititi ika kineltokaya tlen Jehová okijlika. w18.02 20 párrs. 9, 10

Inemilis Job melak onopatlak. Achto ika kixnamikis tlatlatalistli, yejua akin melak ueyixtoya “itech nochimej akin chantij ipan este” (Job 1:3). Yejua miyek tomin kipiaya, miyekej kixmatstoyaj niman melak kitlakaitayaj (Job 29:7-16). Maski ijkon, Job xonoueyimat nion xokinemili ika xnonekiya tlaneltokas itech toTajtsin. Matikitakan ika Jehová okitokayoti “notekipanojkauj”. Satanás kuajli okitak kenon kitlajyouiltis Job niman ijkon makinemili ika toTajtsin kitlajyouiltijtoya (Job 1:13-21). Sakin, yeyimej tlakamej, akin kijtouayaj iuan nouikayaj Job, okitatoj niman ijkon kiyolseuiskej, san ika, xkuajli ken okinotskej, yejuamej okijlikej ika toTajtsin kimakatoya tlen kinamikiya (Job 2:11; 22:1, 5-10). Maski ijkon, Job oyolmelaujkanen. Ijkuak otlan tlatlatalistli, Jehová okiokpamakak tlen achtopa kipiaya niman tlen okipolojka, niman noijki okichiuj manemi okseki 140 xiuitl (Sant. 5:11). Itech yejon xiujtin, yejua nochipa okitekichiuili Jehová ika nochi iyojlo. w18.02 6 párr. 16; 7 párr. 18

Tlaltikpakchanejkej akin ijkon kichiuaj melak kinekij makinueyikaitakan niman makinueyichiuakan. Se ixtlamatki ijkin otlajto itech se akin noueyimati: “Ipan iyojlo onka se pitentsin tlaixpan kampa sa no yejua ixpan notlakuanketsa”. Nemij akin kijtouaj ika timoueyimatis melak xtikuelitas niman hasta akin noueyimatij xkuelitaj ijkuak kimitaj oksekimej ijkon kichiuaj. Kuajli tikmatij ika Jehová xkuelita ueyimatilistli. Ipan Biblia noijtoua ika kintlauelita “ixtololojtin tlen noueyimatij” (Prov. 6:16, 17). Ueyimatilistli xtechkauilia matonisiuikan itech toTajtsin niman se tlen kiteititia Diablo (Sal. 10:4; 1 Tim. 3:6). Teajman ika hasta sekimej itekipanojkauan toTajtsin yolmelaujkej noijki yonoueyimatkej. Uzías se itech yejuamej. Yejuin tekiuaj itech Judá yolmelaujki katka ixpan toTajtsin miyek xiujtin, san ika, Biblia kijtoua: “Nimantsin ijkuak opeuj kipiya ueyilistli, iyojlo onoueyimat niman okijtlako, niman xok oyolmelaujkanen itech iTajtsin Jehová ijkuak okalak ipan iteopan Jehová niman ijkon kitlatis tlen ajuiyak”. Seki xiujtin sakin, tekiuaj Ezequías noijki onoueyimat, san ika, xouejkauj (2 Crón. 26:16; 32:25, 26). w18.01 28 párrs. 4, 5

Ipan Biblia tiknextiaj neskayomej tlen kiteititiaj ika itekipanojkauan Jehová kitemakayaj itech tlen kipiayaj. Kemantika, kitemakayaj ijkuak itlaj yononemilijka nochiuas (Éx. 35:5; 2 Rey. 12:4, 5; 1 Crón. 29:5-9). Ipan kachtopa siglo, akin kichiuayaj ken Cristo okimatkej ika imikniuan nonekiya makinpaleuikan pampa onkatka se apistli ipan Judea. Biblia kijtoua ika nochimej inseselti otlapaleuijkej ika tlen kipiayaj (Hech. 11:27-30). Nochi yejon tlen kitemakayaj miyekan ualeuaya. Ipan kachtopa siglo, sekimej akin kichiuayaj ken Cristo okinemakakej tlen kipiayaj, ken tlaltin noso kaltin, niman okimitkilijkej tomin apóstoles. Niman yejuamej, okinxexelouilijkej nochimej akin kinpolouaya (Hech. 4:34, 35). Oksekimej kixelojtiayaj seki intomintsin niman yonomatkaj kitemakayaj yejuin, ijkon kipaleuiayaj ken noueyichiua toTajtsin. Ijkon tej, maski tla kipiayaj miyek tomin noso ka, nochimej akin kichiuayaj ken Cristo kitemakayaj san kech ueliyaj (Luc. 21:1-4). w18.01 18 párr. 7; 19 párr. 9

Maski miyek ueli tikchiuaj, san kipiya kampa ontlami tlen ueli tikchiuaj ika tokojtilis. Yejuin se tlamachtijli tlen nochimej noneki tiueliskej. Matitlanemilikan itech apóstol Pablo. Maski yejua miyek ueliya kichiuaya, xueliya kichiuaya nochi tlen kinekiya. Ijkuak okijli toTajtsin tlen kajmanaya, toTajtsin okinankili: “Nopoder más kuajli noteititia ijkuak se tlakatl xkojtik”. Pablo nimantsin okasikamat tlen okijlikej niman okijto ika ijkuak xkojtik katka kuakon kikojtiliayaj (2 Cor. 12:7-10). ¿Tlenon okijtosnek? Pablo kasikamatiya ika xueliya miyek kichiuas san iselti, nonekiya yakaj akin ueyixtika makipaleui. Niman iespíritu santo toTajtsin ueliskia kimakas kojtilistli ijkuak nomachiliskia xkojtik. Niman xsan yejon. Noijki kipaleuiaya makichiua tlen nion xkeman kichiuaskia san ika ikojtilis. Tejuamej noijki ijkon topan nochiua. Kuajli tikmatstokej ika tikojtikej yeskej ipampa ikojtilis toTajtsin. w18.01 9 párrs. 8, 9

Tajtin nonekis makitakan tlen ikalpan Jehová yokimijkuilouili tajtin ijkuak se inkoneuj kijtoua ika kineki noapolaktis. Yejuin kinpaleuis kuajli makimititikan ika ueyi kijtosneki niman kuajkui tlateochiualistin tiyes se iteixpantijkauj Jehová akin yonosentemakak niman yonoapolakti. Tajtin kipiyaj ueyi tekitl niman noijki se tlateochiualistli ika kimiskaltiskej inkoneuan itech “melajkatlalilistli de innemilis niman ikan machtilistli” tlen ualeua itech Jehová (Efes. 6:4). Xsan noneki kinmachtiskej tlen kijtoua Biblia, noijki noneki kinpaleuiskej kuajli makineltokakan tlen ueltiuej. Tekoneuan noneki kipiyaskej chikauak intlaneltokil tlen makinyolmapeua manosentemakakan itech Jehová niman makitekichiuilikan ika nochi inyojlo. Makinpaleui nemokoneuan iTlajtol Jehová, iespíritu santo niman tlen nenkichiuaj ken tajtin niman ijkon manochiuakan tlamachilisejkej itech makixtilistli. w17.12 22 párrs. 17, 19

Daniel ikipiaya kanaj 100 xiuitl niman itlamiskia inemilis. ¿Oksejpa yoliuiskia? Kema. Itlamiyan amoxtli Daniel, tikitaj ika Jehová kuajli okijli yejon teotlajtoketl: “San ika tejua, xuiya kampa nochi tlami. Tejua timoseuis” (Dan. 12:13). Yejuin ueuentsin teotlajtoketl kimatstoya ika mijkatsitsintin noseuijtokej niman ika ipan tlalkontli xonka “tlanemilijli nion tlaixmatilistli nion tlamachilistli” (Ecl. 9:10). San achijtsin poliuiya ika mikis, san ika xompa tlamiskia nochi. ToTajtsin yokijlika ika tlayekapan ipan nochiuaskia itlaj melak kuajli. Tlajtojli tlen okimakakej teotlajtoketl Daniel noijki kijtoua tlajtoltin itech tlaxelojli tlen aman tikitstokej. Xokijlikej ipan katlejua tonajli nochiuaskia yejuin. Yejua mikiskia niman noseuiskia. San ika, tlajtoltin “timokuiteuas niman tikselis tlen motlatki yes” kijtosnekiyaj ika tlayekapan kiyolitiskiaj. ¿Kemanon? “Ipan itlamiyan tonaltin”, yeskia miyek xiujtin sakin ika yomijka. Nueva Biblia al Día ijkin kitlajtolkuepa tlen okijlikej: “Itlamiyan tonaltin mitskuiteuaskej itech motlalkon niman ijkon tikselis motlaxtlauil”. w17.12 7 párrs. 17, 18

Jehová okinnauati tlayekankej itech Israel makixkopinakan itlanauatiluan itech melajkayotl. Tlen kachtopa nonekiya kichiuaskiaj yejua kuajli kitaskej tlen yemelak opanok. Sakin, ijkuak kitaskiaj tla kikneliskej noso ka yejon tlakatl akin otemikti, kipiaya kuajli kitaskej tleka ijkon okichiuj, kenon tlanemiliaya niman kenon nemiya. Tla kinekiyaj kiteititiskej imelajkayo Jehová, kipiaya kitaskej tla otemiktijka pampa tetlauelitaya niman tla tekokosnekiya (Núm. 35:20-24). Niman noijki, tla kinkakiyaj teixpantijkej, nonekiya omemej yeskej niman ijkon uelis nesis ika akin otemikti melauak yejua itlajtlakol. Ken tikitaj, sakin ika kimatiyaj tlen yemelak opanoka, tlayekankej nonekiya tlanemiliskej ipan yejon tlaltikpakchane, niman xsan itech tlen okichiujka. Nonekiya kipiyaskej tlamachilistli, yejuin kijtosneki, kipiyaskej tlen kinpaleuiskia makitakan tlen xnimantsin nesi niman ijkon kasikamatiskej tleka onochiuj. San ika, noijki melak nonekiya Jehová makinmaka iespíritu santo niman ijkon ueliskiaj kiteititiskej itlamachilis, iteiknelilis niman imelajkayo (Éx. 34:6, 7). w17.11 16 párrs. 13, 14

Ijkuak opeuj tomachtiaj Biblia, otikixmatkej seki tlen melauak tlen kualtsin. Kachtopa, otikixmatkej ika Jehová yejua akin otexchijchiuj niman tlenon kichiuas ipampa tlaltikpakchanejkej. Noijki yotomachtijkej ika toTajtsin okuajtitlan ikonetsin ipan tlaltikpaktli niman ijkon mamikiki ken se tlaxtlauijli tlen techmakixtiskia itech tlajtlakojli niman mikilistli. Niman noijki yotomachtijkej ika iTekiuajyo toTajtsin kipopolos nochi tlajyouilistli niman ika uelis tinemiskej nochipa ipan tlaltikpaktli ika yolseuilistli niman pakilistli (Juan 3:16; Apoc. 4:11; 21:3, 4). Kemantika, nopatla ken tikasikamatij se teotlajtojli noso se texto itech Biblia. Ijkuak yejon panoua, melak noneki matikxelokan tiempo tomachtiskej niman titlanemiliskej itech yenkuik tlamachtijli (Hech. 17:11). Xsan noneki tikasikamatiskej tleka tlen yenkuik xsan noijki ken tikasikamatiyaj yeuejkaui, noijki noneki kuajli matikitakan nochi tlamachtijli itech tlen aman tikasikamatij. Tla tikchiuaj yejuin, techpaleuis mamiyekiya tlamachtiltin tlen melauak itech Biblia ipan tonemilis. w17.06 12, 13 párrs. 15, 16

Melak noneki matotlajpiyakan ijkuak itlaj topan panotos tlen ueliskia kichiuas matiknekikan xtikintlakamatiskej itlanauatiluan Jehová. Se neskayotl, melak tepaleui ika akin yopeujkej kistinemij nimantsin matlajtokan itech tlenon xkichiuaskej ijkuak kinekiskej noititiskej ika notlasojtlaj niman ijkuak kinekiskej san inselti nokauaskej (Prov. 22:3). Akin kichiuaj ken Cristo noijki uelis kixnamikiskej tlen uelis kichiuas makichiuakan tlen xkuajli ijkuak yejuamej uejka nemij itech inchan ipampa intekiyo noso pampa tekitij iuan se tlakatl noso se siuatl (Prov. 2:10-12, 16). Kipiya melak totlajpiyaskej ijkuak tajmantoskej noso ijkuak tomachiliskej xtikojtikej. Ueliskia melak tiknekiskej yakaj matechyolchikaua niman hasta tikseliskej matechyolseui maski san akinon. Tla kemantika topan panoua itlaj ken yejuin, matiktlajtlanilikan Jehová niman tokniuan matechpaleuikan (Sal. 34:18; Prov. 13:20). w17.11 26 párrs. 4, 5

Ixpan Jehová se ueyi tlajtlakojli katka ijkuak se israelita temiktiaya. Tla yejuin panouaya, se ichanejkauj tlakatl akin okimiktijkej, akin noixmatiya ken “akin tetlakuepiltis ipampa yestli”, kipiaya ika kimiktis akin otemikti (Núm. 35:19). Ijkon, yejon temiktijketl kitlaxtlauaya ika inemilis yejon yestli tlen okitoyauj. Tetlakuepiltijketl ipampa yestli nonekiya totoka kichiuas yejuin niman ijkon xtsokuilouiskia Tlajli tlen toTajtsin yokijtoka kinmakas, pampa Jehová yokijtoka ika tiktoyauas iyesyo oksekimej “kijtlakoua tlajli”. Niman yotlanauatijka: “Xkipiya ika nenkijtlakoskej tlajli kampa nennemij” (Núm. 35:33, 34). ¿Tlenon panouaya ijkuak se israelita kimiktiaya yakaj maski xkinekiya? Maski ijkon, temiktijketl kipiaya tlajtlakojli pampa okitoyauj iyesyo se akin xtlaj okichiuili (Gén. 9:5). San ika, pampa xsan okinek okichiuj, Jehová kitekauiliaya makiknelikan. Akin otemikti ueliskia cholos ipan se kalpan kampa nopaleuiayaj, ompa akin tetlakuepiltia ipampa yestli xueliskia kimiktis. San ika, xueliskia kisas itech yejon kalpan hasta ijkuak mikiskia ueyi teopixki (Núm. 35:15, 28). w17.11 9 párrs. 3-5

Se tokniuj chanti Australia kijtoua: “Nomontaj kixnamikiya tlen melauak. Ijkuak tikonnotsayaj pampa tikmatisnekiyaj kenon nemiya, noueuentsin niman nejua tiktlajtlaniliayaj Jehová matechpaleui ika maka tiktlauelnankiliskej. Xtiknekiyaj tiuejkauiskej titlajtoskej, pampa yejon kichiuaya chikauak matitlajtokan itech tlen tikneltokaj, kuakon, san tiktemachiuayaj kech iuan titlajtlatoskiaj”. Ijkuak imiuan tokualaniaj, uelis kichiuas maka kuajli matomachilikan, pampa melak tikintlasojtlaj niman nochipa tiknekij tikinyolpaktiskej. San ika, matikilnamikikan ika kachtopa noneki timelajkanemiskej itech Jehová, niman xtotlasojtlalis tlen tikmachiliaj itech tochanejkauan. Tikchiuaskej yejuin, uelis kinpaleuis tochanejkauan makitakan ika tikchiuas noso xtikchiuas tlen kijtoua Biblia uelis kichiuas matikpiyakan noso matikpolokan tonemilis. Maski san kenon, matikilnamikikan ika xuelis tikchiualtiskej yakaj makitekichiuili Jehová. Tlen kema uelis tikchiuaskej, yejua tikimititiskej kenon yotechpaleui pampa tiktlakamatij. Pampa toTajtsin kintlasojtla, kineki ika yejuamej noijki mauelikan makitlapejpenikan itech yejuin: kitekichiuiliskej noso ka (Is. 48:17, 18). w17.10 15, 16 párrs. 15, 16

Xsan noneki tikijliskej yakaj ika tiktlasojtlaj. Kemantika, tlen panotika kitlajtlani itlaj matikchiuakan. Se neskayotl, tla se tokniuj xkipiya tlakuajli noso itlaken, noneki okseki itlaj tikchiuaskej ipampa, xsan tlajtoltin tlen teyolchikauaj (Sant. 2:15, 16). Noijki ijkon, pampa tiktlasojtlaj Jehová niman oksekimej, xsan tiktlajtlaniliaj Jehová makintitlani akin tenojnotsaskej, noijki titekitij nochi kech tiuelij ipan tenojnotsalistli (Mat. 9:38). Apóstol Juan okijto ika kipiya titetlasojtlaskej “ika tlen tikchiuaj niman tlen melauak”. Kuakon, kijtotika ika totlasojtlalis maka makipiya “ome ixayak” (Rom. 12:9; 2 Cor. 6:6). Yejuin kijtosneki ika xuelis san tikteititiskej ika titetlasojtlaj tla xyemelak tikmachiliaj, yeskia kentla totlaliliskiaj okse toxayak. Tla ijkon tikchiuaj, totlasojtlalis xmelauak yes, ken itlaj tlen xtlaj kijtosneki. w17.10 8 párrs. 5, 6

Tla tiknekij ika iTlajtol toTajtsin matechpaleui, kipiya ika nochipa tikamapouaskej, niman tla tiuelij mamojmostla. Yemelak ika timiyekej melak miyek tekitl tikpiyaj, san ika, xkipiya ika itlaj tijkauiliskej matechtelti ika tikamapouaskej, nion tlen kipiya ika tikchiuaskej (Efes. 5:15, 16). Uelis tikpouaskej Biblia ika kualkan, ika tonajli noso ika tlayoua. Tomachiliaj ijkon ken akin okijkuilo Biblia: “¡Melak niktlasojtla motlanauatil! Itech nitlanemilia nochi tonajli” (Sal. 119:97). Aman tej, xsan noneki tikamapouaskej Biblia. Noneki kuajli titlanemiliskej itech tlen ompa tikamapouaj (Sal. 1:1-3). San ijkon tiueliskej tikchiuaskej ipan tonemilis nochi tlamachilistli tlen tiknextiaj ipan iTlajtol toTajtsin. Tla tikpouaskej ipan amatl noso ipan se aparato, tlen melak tiknekij yejua ika maajsi ipan toyojlo. w17.09 24 párrs. 4, 5

Xnochipa noneki matiteiknelikan. Se neskayotl, Jehová okinauati Saúl makinmikti amalequitas niman inyolkauan, san ika, Saúl xokimikti tekiuaj. Kanaj okinemili ika yejua teiknelijtoya, san ika, Jehová xok okiseli ken tekiuaj ipan Israel pampa xokitlakamat (1 Sam. 15:3, 9, 15). Jehová yejua Teyolkuitijketl akin melajki. Yejua kimati tlen onka ipan inyojlo tlaltikpakchanejkej, niman kimati kemanon xkipiya ika teiknelis (Lam. 2:17; Ezeq. 5:11). Xok uejkauis, kinpopolos nochimej akin xkinekij kitlakamatiskej (2 Tes. 1:6-10). Ijkuak yejkos yejon tonajli, ijkuakon xnonekis makimikneli akin xokitlakamatkej. Kema, yejua kinpopolos niman ijkon kinmakixtis niman kimititis ika kimiknelia itekitkauan akin xokikaujkej. Melauak, xtotekiyo tikijtoskej akinon kimelaua Jehová makipopolo noso makimakixti. Tejuamej noneki tikchiuaskej nochi tlen tiueliskej ika tikinpaleuiskej tlaltikpakchanejkej aman. w17.09 10, 11 párrs. 10-12

Timoteltis moselti, se kualneskayotl tlen ualeua itech toTajtsin. Jehová kuajli kiteititia yejuin kualneskayotl. San ika, pampa titlajtlakolejkej noneki melak tokojtiliskej toteltiskej toselti. Pampa tlaltikpakchanejkej xnoteltiaj inselti, kipiyaj miyek tlaueltin. Yejuin kichiua ika maka makichiuakan tlen noneki niman maka kuajli makichiuakan tekitl kampa nomachtiaj noso kampa tekitij. Noijki akin xnoteltiaj inselti, teuijuikaltiaj, tlauanij, kichiuaj tlen xkuajli, kikauaj imixnamik, ueyi tomin notlaneuiyaj, xkikajkauaj tlen teijtlako, kintsakuaj ipan cárcel, ijtlakaui intlamachilis, nomauaj ika kokolistli pampa auilnemij niman koneuatiaj maski xkinekiyaj (Sal. 34:11-14). Niman aman melak miyekej xok kipiyaj yejuin kualneskayotl. Ipan xiuitl 1940 tlaixmatkej onomachtijkej itech timoyektlalis moselti, san ika, aman yonoitak ika tlaltikpakchanejkej xok ijkon inselti noyektlaliaj ken yeuejkaui. Yejuin xtechmojkatlachialtia pampa Biblia yokijtoka ika tlaltikpakchanejkej xnoteltiskiaj inselti, niman yejuin kiteititiskia ika tinemij ipan “itlajtlankan on tonajli” (2 Tim. 3:1-3). w17.09 3 párrs. 1, 2

Ijkuak tikpiyaj “yolseuilistli” tlen techmaka toTajtsin, totlanemililuan niman toyojlo xtlaj kinmajmana. Kuajli tikmatstokej ika Jehová techtlajpiya niman kineki kuajli matikisatij ipan tonemilis (1 Ped. 5:10). Tikmatiskej yejuin, “kejeuas” toyojlo, kijtosneki techtlajpiyas niman ijkon ajmantli niman mojkayotl maka matechtlanikan. Xok uejkauis, tlaltikpakchanejkej kitaskej se ueyi tlajyouilistli ken xkeman panoua (Mat. 24:21, 22). Xtikmatij tlenon topan nochiuas toseselti, maski ijkon, xkipiya ika melak techajmanas yejon. Maski xtikmatij nochi tlen kichiuas Jehová, kema tikmatstokej akinon yejua. Aman ika yotikilnamijkej tlenon okichiuj yeuejkaui ipampa itekitkauan, yotikitakej ika Jehová nochipa kichiuas tlen yokijto, maski san tlenon panos. Niman kemantika kichiua tlen nion xtikchiayaj. Nochipa ijkuak Jehová kichiuas itlaj topampa, uelis tikmachiliskej “yolseuilistli” tlen yejua techmaka, tlen kipanauiya nochi tlanemililtin. w17.08 12 párrs. 16, 17

“¿Kech uejkauis?”. Yejuin tlen okijtokej teotlajtokej Isaías niman Habacuc, akin yolmelaujkej katkaj (Is. 6:11; Hab. 1:2). Niman Jesucristo noijki ijkon okijto ijkuak okitak kenon akin inuan nemiya xkipiayaj tlaneltokijli (Mat. 17:17). Kuakon, tikitaj ika xkipiya ika titlamojkaitaskej tla tejuamej kemantika noijki tikijtouaj yejuin. Uelis pampa topan nochiujtika tlen xkinamiki, titlajyouijtokej pampa yotiueuentsintiakej noso ipampa se kokolistli. Noijki kanaj melak tokuaajmanaj pampa tonaltin tlen ipan tinemij “sanoyej xkuajli”, niman nochi melak ouijtika (2 Tim. 3:1). Noso uelis techajmanas tikitaskej kenon melak kichiuaj tlen xkuajli akin techyeualouaj. Maski san kenon, techyolchikaua tikmatiskej ika akin yeuejkaui okitekichiuilijkej Jehová okijtokej tlen kinemiliayaj niman Jehová xokualan ipampa yejon. San ika ¿tlenon uelis techpaleuis ijkuak tikixnamikij tlen ouijtika? Santiago, se inomachtijkauj Cristo, technankilia yejuin ika tlajtoltin itech tlaxelojli tlen aman tikitstokej. w17.08 3 párrs. 1-3

Jesús xokimijli inomachtijkauan ika makitejtemokan nouikaskej iuan akin nemij ipan iluikak san pampa kinekij kuajli makisatij. Se ken tikteititiskej ika tiyolmelaujkej, yes ijkuak tiktekitiltiaj tlen tikpiyaj ika tikpaleuiskej tenojnotsalistli ipan nochi tlaltikpaktli tlen Jesús okijto nochiuas (Mat. 24:14). Ipan India, se ichpokatsin kipiaya se cajita kampa kontlajkaltiaya itomintsin. Hasta xok nokouiliaya ajauiltin. Ijkuak yejon cajita okitemilti, okitemakak itomintsin ika manopaleui tenojnotsalistli. Okse tokniuj, ipan yejon país, kipiya cocos ipan itlal niman miyek okintemakak ipan Kajli kampa Tlajtolkuepaj ika malayálam. Kijtoua ika, pampa tokniuan kinpoloua, kita ika melak kuajli kinmakas cocos niman xtemakas tomin tlen ika makinkouakan. Ijkon teititiaj tlamachilistli. Noijki ijkon, tokniuan chanejkej Grecia miyekpa kintlayokoliaj akin tlapaleuiyaj Betel, aceite de oliva, queso niman okseki tlakuajli. w17.07 8, 9 párrs. 7, 8

Ijkuak israelitas nemiyaj Babilonia noyolajmanayaj. Kuakon, kinekiyaj makinyolseuikan. San ika, toTajtsin yokijtoka ika Ciro, tekiuaj itech Persia, kinmakixtiskia itech Babilonia. Kuakon yejua okinotlatkiti Babilonia niman okijto: “Jehová toTajtsin iluikakchane yonechinmakak nochi tekiuajyomej itech tlaltikpaktli niman yonechnauati manikchijchiuili se kajli ipan Jerusalén, tlen onka ipan Judá. Nochimej akin nemij nemotsajlan itech nochi ikalpan, manemi Jehová inTajtsin inuan, niman matlejkokan” (2 Crón. 36:23). Yejuin melak okinyolseui israelitas ijkuak ok chantiyaj ipan Babilonia. Jehová xsan okiyolseui san sekan nochi ikalpan, noijki okinyolseui inseselti. Noijki ijkon panoua ipan yejuin tonajli. ToTajtsin “kinpajtia akin noyolajmanaj; yejua kinpajtilia kampa onokokojkej” (Sal. 147:3). Kema, Jehová kinpaleuiya akin xkuajli nomachiliaj: akin kualoj noso noyolkokouaj. Yejua kinektika techyolseuis niman kipopolos tlen techyolkokoua (Sal. 34:18; Is. 57:15). Yejua techmaka tlamachilistli niman chikaualistli tlen ika uelis tikixnamikiskej san katlejua tlatlatalistli (Sant. 1:5). w17.07 18 párrs. 4, 5

Xakaj kipiya miyek tlen patioj ijkon ken Jehová, pampa nochi itlatki (1 Crón. 29:11, 12). San ika, Jehová melak kuelita kinmakas nochimej tlen kipiya. Melak tiktlasojkamatij ika tikseliaj miyek tlen patioj tlen ualeua itech toTajtsin. ¿Katlejua seki yejon? Se, iTekiuajyo toTajtsin, ome, totenojnotsalis niman yeyi, tlen melauak tiknextiaj ipan iTlajtol. San ika, tla xtotlajpiyaj ika yolik uelis tikilkauaskej ika melak tlasojti yejon tlen patioj. Noneki nochipa matikilnamikikan ika melak tlasojti niman matikueyilikan totlasojtlalis itech yejon. Pampa tiknekiyaj matechyekana iTekiuajyo toTajtsin, miyekej ononek tikpatlaskej miyek tlemach ipan tonemilis (Rom. 12:2). San ika, xompa tlami nochi, noneki matikitakan ika totlasojtlalis itech Tekiuajyotl maka itlaj kipopolos, itlaj ken tlasojtlalistli ipampa tlemach tlen patioj noso ileuilistli itech auilnemilistli (Prov. 4:23; Mat. 5:27-29). w17.06 9 párr. 1; 10 párr. 7

Jehová xokijli Job tleka tlajyouijtoya. Pampa Jehová kinekiya kipaleuis makasikamati ika yejua melak pitentsin xijkon ken yejua. Okimachti Job ika onka tlen melak ueyi kijtosneki xijkon ken tlaueltin tlen kixnamiktoya (Job 38:18-20). Itlajtoluan Jehová okipaleuijkej Job makipatla ken tlanemiliaya. Ijkuak melak yotlajyouijka Job, ¿kanaj chikauak ken okinots Jehová? Ka. Niman nion Job xijkon okimachili. Job okasikamat niman okitlasojkaitak itlajtolpaleuilis Jehová. Niman hasta okijto: “Ika yejon ninotlajtolkuepa itech tlen onikijto, niman ninoyolkuepa ipan tlalpoktli niman tlikonextli” (Job 42:1-6). Sakin ika Job okikak itlajtolpaleuilis Jehová niman okipatlak ken tlanemiliaya, Jehová okichiuj ika makimatikan oksekimej ika Job okiyolpakti pampa itech oyolmelaujkanen (Job 42:7, 8). w17.06 24, 25 párrs. 11, 12

San ika ¿kenon uelis tikmatiskej tla tikitaj tekitl ken kinamiki? Uelis totlajtoltiskej: “¿Melak nechyolpaktia notekiyo niman xueyi nikita itekiyo Jehová noso nion achijtsin xnechpaktia?”. Tla titlanemiliaj itech yejuin, uelis techpaleuis kuajli matikitakan tlenon yemelak tiktlasojtlaj. Jesús otechmachti tlenon noneki kachtopa yes ipan tonemilis. Se tonajli, yejua okintlajpaloto ome siuamej ikniujtin, María niman Marta. Kuakon Marta nimantsin opeuj kichijchiua tlakuajli, san ika, María onotlali nisiuj itech Jesús niman kikaktoya tlen temachtijtoya. Niman Marta hasta okualan pampa María xkipaleuijtoya. Jesús okijli Marta tlajtoltin itech tlaxelojli tlen aman tikitstokej (Luc. 10:38-42). Nikan Jesús otemachti tlen ueyi kijtosneki. Tla tiknekij maka matechtsakuili tlen techpoloua niman tikteititiskej ika tiktlasojtlaj Cristo, noneki tiktlapejpeniskej “tlen más kuajli”. Yejuin kijtosneki ika ken touikaj iuan Jehová noneki nochipa yes tlen melak ueyi kijtosnekis ipan tonemilis. w17.05 23 párrs. 9, 10

Jehová yokinmakak tajtin tekitl ika makinmachtikan inkoneuan tlen melauak. Xokinmakak yejon tekitl inabuelos noso yakaj okse (Prov. 1:8; 31:10, 27, 28). San ika, kanaj tajtin xuelij tlajtojli tlen tlajtouaj kampa chantij aman niman noneki makinpaleuikan maajsikan ipan inyojlo inkoneuan. Ijkuak tajtin kitlajtlanij makinpaleuikan, xkichiuaj pampa xkinekij kichiuaskej intekiyo ika kinmachtiskej inkoneuan. Yejuamej kema kinekij kinmachtiskej inkoneuan itech Jehová ika yejon kitlajtlanij makinpaleuikan (Efes. 6:4). Se neskayotl, tajtin uelis kintlajtoltiskej tlayekankej ipan tlanechikojli itech tlenon uelis kichiuaskej ijkuak kiueyichiuaskej toTajtsin ken familia. Noijki uelis kitlajtlaniskej makinpaleuikan ika inkoneuan makinnextikan akin iuan nouikaskej. Yejuamej noijki uelis kinnotsaskej oksekimej familias imiuan makiueyichiuakan Jehová ken familia kemantika niman ijkon kinpaleuiskej inkoneuan. Noijki, miyekej telpokamej nomachtiaj itech oksekimej ijkuak imiuan yauej ontenojnotsaj niman san sekan kichiuaj itlaj (Prov. 27:17). w17.05 13 párrs. 17, 18

Jesús niman itajuan ononek yaskej Egipto sakin ijkuak iiluikaktekitkauj Jehová okijli José ika tekiuaj Herodes kinekiya kimiktis Jesús. Yejuamej onokaujkej ompa hasta ijkuak omik Herodes (Mat. 2:13, 14, 19-21). Miyek xiuitl sakin, inomachtijkauan Jesús “ochojcholojkej ne ika miyekan ipan iregión Judea niman ne ika Samaria” pampa okintlaueltokakej (Hech. 8:1). Jesús kimatiya ika miyekej inomachtijkauan nonekiskia kikauaskej inchan. Ika yejon, yejua okijto: “Ijkuak mechtlauelitaskej niman [...] mechtlajyouiltiskej ipan se pueblo, xuiyan ipan okse” (Mat. 10:23). Niman melak miyekej itech akin kikauaj inchan iteixpantijkauan Jehová. Sekimej akin kikauaj inchan cholouaj noso nemij kampa nemij oksekimej akin noijki okikaujkej inchan, kampa tetejteneuayaj, tlauaniyaj, nauiltiayaj ika tomin, tlachtekiyaj niman auilnemiyaj. San ika, yejuamej okikuikej tiempo ika kichikauaskej intlaneltokil itech tlen melauak, niman miyekej opeuj tekitij ken precursores. Yejuamej kinoilnamiktiayaj ika ajsiskia tonajli ijkuak xok keman nemiskiaj kampa nemij akin kikauaj inchan, ijkon ken ijkuak israelitas oajsik tonajli ijkuak xok onenkej ipan tlaluaktli. Yejuin okinpaleui makipiyakan kuajli tlanemilijli (2 Cor. 4:18). w17.05 3, 4 párrs. 2-5

Pampa ok tinemij ipan tlaltikpaktli kampa nochiua tlen xkuajli, uelis tikchiaskej topan manochiua tlen xkinamiki. Kemantika, ipan tlanechikojli uelis tikitaskej ika topan noso ipan yakaj nochiujtika itlaj tlen tiknemiliaj ika xkinamiki. San ika, maka matechtlajkali yejuin. Maka keman matijkauakan Jehová, matiktlajtlanilikan itlapaleuilis niman matitlaneltokakan itech. Matikilnamikikan ika pampa titlajtlakolejkej, kanaj xkuajli tikasikamatij tlen panotok, niman kanaj xtikmatij nochi. Maka matikijtokan tlen xkuajli itech oksekimej, pampa yejuin san kichiuas maueyiya tlen panotok. Ijkon tej, maka matitlaneltokakan san totechkopa. Niman tlen melak noneki, maka matijkauakan Jehová niman matikchiakan yejua makiyektlali tlen panotok. Ijkuak ijkon tikchiuaskej, Jehová kiselis tlen tikchiuaj niman techteochiuas. Kuajli matikmatstokan ika Jehová, “akin teyolkuitijketl ipan nochi tlaltikpaktli”, nochipa kichiuas tlen melajki, “pampa nochi iojuiuan melaktikej” (Gén. 18:25; Deut. 32:4). w17.04 20 párr. 17

¿Kuakon tlenon inpan nochiuas akin xkinekiskej nopatlaskej niman kipaleuiskej tlen panotok hasta ijkuak yejkos ueyi tlajyouilistli? Jehová yokijto kinpopolos nochimej xkuakualtin tlaltikpakchanejkej (Sal. 37:10). Ipan yejuin tonajli, miyekej youelkej kiyanaj tlen xkuajli kichiuaj niman miyekpa xtlaj kinchiuiliaj (Job 21:7, 9). San ika, Biblia techilnamiktia: “Ixtololojuan toTajtsin kitstokej nochi iojuiuan tlakatl, niman Yejua kita nochiuiyan kampa nejnemi. Xonka tlayoualyotl nion tilauak tlaseualyotl kampa akin kichiuaj tlen xkuajli uelis niyanaskej” (Job 34:21, 22). Kuakon xtlaj uelis niyanas ixpan Jehová. Yejua ueli kita nochi tlen kichiujtokej akin xkuakualtin. Sakin ijkuak yopanok Armagedón, yejuamej xok nemiskej. Niman xok keman tikimitaskej (Sal. 37:12-15). w17.04 11 párr. 5