Enero

Ijkuak Moisés nemiya Egipto, yejua xyolyemanki katka. Yejua nimantsin kualaniya, se tonajli hasta okimikti se tlakatl pampa yejua okinemili ika xkuajli tlen kichiujtoya. Moisés okinemili ika toTajtsin kuelitaskia tlen okichiuj. Jehová okipaleui Moisés cuarenta xiuitl niman ijkon okasikamachilti ika tla kinekiya kinyekanas israelitas xsan nonekiya mayolchikauak, nonekiya yolyemanki yes. Niman tla kinekiya yolyemanki yes, nonekiya matetlakamati niman mayolkuajli. Moisés melak kuajli ouel niman melak kuajli ken otlayekan (Éx. 2:11, 12; Hech. 7:21-30, 36). Ipan yejuin tonajli, tajtin niman tlayekankej melak kuajli tla ijkon kichiuaj ken Moisés. Tla tejua titlayekana maka nimantsin xkualani ijkuak xmitstlakaitaskej. Xkasikamati ika noijki timopopoloua (Ecl. 7:9, 20). Xtlakamati Jehová niman xchiua ijkon ken yejua mitsnauatia niman xteititi ika tiyolkuajli (Prov. 15:1). Tajtin niman tlayekankej akin ijkon kichiuaj kiyolpaktiaj Jehová, tlapaleuiyaj maonia yolseuilistli niman kuajli kiteititiaj tlenon kijtosneki tiyolyemanki yes. w19.02 8 párr. 1; 10 párrs. 9, 10

¿Tleka oteikneli Jesús? Pampa okimitak tlaltikpakchanejkej ken “borregos yejuan xkipiyaj intlajpixkau”. Kanaj okitak ika sekimej xkipiayaj tomin niman noneki melak tekitiskej niman ijkon kipiyaskej tlen kikuaskej. Kanaj oksekimej yomijka se inchanejkauj. Jesús kuajli kimasikamatiya pampa kanaj yejua noijki okixnamik yejuin. Najmanaya intech oksekimej niman okichiuj makineki kinyolseuis (Is. 61:1, 2). ¿Kenon uelis tikchiuaskej ken Jesús? Aman tlaltikpakchanejkej noijki ken “borregos yejuan xkipiyaj intlajpixkau” niman kipiyaj miyek tlauejli. San ika, tejuamej tikpiyaj tlen kinpoloua: tlajtojli itech iTekiuajyo toTajtsin (Apoc. 14:6). Kuakon, tikchiuaj noijki ken toTemachtijkauj niman titenojnotsaj itech kuajli tlajtoltin pampa tikimikneliaj akin yolyemankej niman akin xkipiyaj tomin (Sal. 72:13). Tikimikneliaj tlaltikpakchanejkej niman tiknekij tikinpaleuiskej. w19.03 21, 22 párrs. 6, 7

Tiktlasojtlaj Jehová pampa miyek tlen techmaka, techmachtia itech niman techijlia tlen kineki kichiuas (Juan 8:31, 32). Yotechmakak tlanechikojli niman ijkon ika techyekana niman techpaleuiya. Techpaleuiya matikixnamikikan nochi tlauejli tlen tikpiyaj niman yotechijli ika nochipa kuajli tinemiskej ika tlayekapan (Apoc. 21:3, 4). Ijkuak titlanemiliaj kenon yotechititi ika melak techtlasojtla itech nochi tlen yokichiuj topampa, tipeuaj noijki melak tiktlasojtlaj niman tomojtiaj tikyolkokoskej. Yejon tlen noneki matechmojti. Tla nochipa tikilnamiki kenon mitspaleuiya itlayekanalis Jehová, mitspaleuis melak xtlasojtla niman noijki nochipa tiknektos tikintlakamatis itlanauatiluan. Kuakon, maski san tlenon mitstekiuiltis Satanás, xkichiuas maka sa xtekichiuili Jehová. Ijkuak tinemis mil xiuitl niman tiknemilis ijkuak otimoapolakti, uelis tikijtos: “Melak kuajli tlen oniktlapejpeni”. w19.03 6 párr. 14; 7 párr. 19

Nochimej pakij ijkuak ipan se familia nochimej noititiaj ika tetlasojkamachiliaj. Ijkuak akin yononamiktijkej noititiaj ika notlasojkamachiliaj, melak kuajli nemij niman kinpaleuiya manotlapopoluikan. Teueuentsin akin kipatiojkaita isiuatsin xsan kita tlen kuajli kijtoua niman kichiua, noijki kitlasojkamachilia, niman kiueyiteneua (Prov. 31:28). Niman tesiuauj kijlia iueuentsin tlenon kuelita itech. Tajtin, ¿kenon uelis nenkinmachtiskej nemokoneuan matetlasojkamachilikan? Xkilnamikikan ika yejuamej kichiuaskej tlen kitaskej nenkichiuaj niman tlen nenkijtouaj. Xkintlasojkamachilikan ijkuak itlaj kichiuaskej nemopampa. Noijki, xkimititikan makijtokan tlaxtlaui ijkuak oksekimej itlaj kichiuaskej inpampa. Xkinpaleuikan makasikamatikan ika ijkuak tetlasojkamachiliskej noneki kisas itech inyojlo niman ika intlajtoluan melak uelis tepaleuis. w19.02 17 párrs. 14, 15

Ika yejuin tlajtoltin, Job okiteasikamachilti ika maski san tlenon ipan panoskia, yejua yolmelajkanemiskia. Yejua otlaxiko, niman tejuamej noijki noneki ijkon tikchiuaskej. ¿Tlenon okijtosnek Satanás totech ijkuak okitlatlatak Job? Yejua kijtoua ika xmelak tiktlasojtlaj Jehová, ika tijkauaskej tiktekichiuiliskej ijkuak tikpolosnekiskej tonemilis niman ika xtiyolmelajkej (Job 2:4, 5; Apoc. 12:10). ¿Kenon tomachiliaj ika tlen okijto? ¿Xmelak ika techyolkokoua? Matiknemilikan itech yejuin: Jehová melak tlaneltoka totech hasta kikauilia Satanás matechtlatlata niman ijkon uelis tikteititiskej ika tiyolmelajkanemij niman ika Satanás se tlakajkayaujketl. ToTajtsin techijlia ika techpaleuis matiyolmelajkanemikan (Heb. 13:6). ¡Se ueyi tlateochiualistli ika toTajtsin matlaneltoka totech! ¿Tikitaj tleka melak noneki matiyolmelajkanemikan? Pampa ijkon tikteijliaj ika xmelauak tlen Satanás kijtoua niman tikpaleuiyaj itoka toTajtsin niman ken yejua tlayekana. w19.02 5 párrs. 9, 10

Jesús okimijli inomachtijkauan tlapejpeniltin itech tlatlatalistin tlen kixnamikiskiaj. Sakin, okimijli mayolchikauikan ijkon ken yejua (Juan 16:1-4a, 33). Opanok miyek xiuitl, inomachtijkauan ok kixkopinayaj iyolmelajkanemilis niman ok najmanayaj inpampa oksekimej. Okinejkej tlajyouiskej niman ijkon kinpaleuiskej oksekimej (Heb. 10:33, 34). Ipan yejuin tonajli, noijki tiyolchikaujkej ken Jesús. ¿Kenon? Ijkuak tikinpaleuiyaj tokniuan pampa kintlaueltokaj ipampa intlaneltok. Kemantika, sekimej kintsakuaj maski xitlaj okichiujkej. Ijkuak ijkon panos, matikchiuakan nochi tlen tiueliskej, tikchiuaskej teoyotl niman inpampa matitlajtokan imixpan tekiuajkej noso ipan tribunales (Filip. 1:14; Heb. 13:19). Noijki, tikteititiaj ika tiyolchikaujkej ijkuak xtijkajkauaj titenojnotsaj “ikan yolchikaualistli” (Hech. 14:3). Ijkon ken Jesús, kuajli yotikijtokej titenojnotsaskej itech Tekiuajyotl maski matechixnamikikan niman matechtlaueltokakan. w19.01 22, 23 párrs. 8, 9

¿Tlenon uelis tikchiuaskej niman ijkon ijkuak titlanankiliskej makinyolchikaua tokniuan? Melak noneki matomachtikan nochi tlen noitas ipan tlanechikoltin. Tla tikxelouaj tiempo niman ijkon kuajli tomachtiaj, yejon techpaleuis matoyolchikauakan titlanankiliskej (Prov. 21:5). ¿Kenon uelis kuajli tomachtiskej tlen tikitaskej ipan tlanechikojli? Kachtopa, noneki matiktlajtlanilikan Jehová iespíritu santo (Luc. 11:13; 1 Juan 5:14). Sakin, matikxelokan seki minutos niman ijkon tikitaskej itech tlenon tlajtos yejon tlamachtijli. Matikitakan kenon itoka yejon tlamachtijli, matikimitakan subtítulos, tlaixkopinaltin niman recuadros. Kuakon, matipeuakan matikimitstiakan párrafos niman matikpouakan nochi tlaxeloltin tlen tiueliskej. Matitlanemilikan itech yejon tlamachtijli, niman kuajli matikitakan kampa tiknekiskej titlanankiliskej. Tla kuajli tomachtiaj, melak techpaleuis niman xtomojtiskej titlanankiliskej (2 Cor. 9:6). w19.01 9 párr. 6; 11, 12 párrs. 13-15

Pampa toTajtsin okichiuj ika Habacuc makijkuilo tlen kajmanaya, tiuelij yejuin: xkipiya ika tomojtiskej tikijliskej tlen techajmana niman tlen xtikasikamatij. Niman hasta toTajtsin techijlia matikijlikan tlen techajmana (Sal. 50:15; 62:8). Habacuc tlaneltokaya itech Jehová, akin iuan nouikaya niman akin iTajtsin katka. Ika yejon, yejua okinek kinotsas. Habacuc xokiyejyeko san iselti kiyektlalis tlen kixnamiktoya niman xsan noyolkokojtinemiya, okijli toTajtsin tlen kimachiliaya niman tlen kajmanaya. Tejuamej uelis tikchiuaskej ken yejua. Jehová, akin kikaki toteoyouan, techijlia matikititikan ika itech titlaneltokaj niman matikijlikan tlen techajmana (Sal. 65:2). Tla ijkon tikchiuaj, tikitaskej kenon Jehová kinnankilis toteoyouan. Tikmachiliskej kenon technapaloua ika tlasojtlalistli ijkuak techyolseuiya niman techyekana (Sal. 73:23, 24). Yejua techpaleuis matikasikamatikan kenon kita tlen tikixnamiktokej, maski san katlejua tlauejli tikpiyaskej. Ijkuak tikchiuiliaj teoyotl Jehová, kuajli nesi ika itech titlaneltokaj. w18.11 13 párr. 2; 14 párrs. 5, 6

David xsan onouikak imiuan akin telpokamej katkaj ijkon ken yejua. ¿Tikilnamiki kenon itoka katka akin melak kuajli nouikaya iuan David? Itoka katka Jonatán. Yejuamej melak kualtsin nouikayaj, niman yejon kuajli tikitaj itech tlen kijtoua Biblia. San ika ¿tikmatstoya ika Jonatán kitlantiaya David kanaj 30 xiuitl? Kuakon, ¿tleka melak kuajli nouikayaj? Pampa yejuamej tlaneltokayaj itech toTajtsin, notlakaitayaj niman kipatiojkaitayaj kualneskayomej tlen kipiayaj, ken yejon yolchikaualistli tlen okiteititijkej ijkuak okimixnamijkej akin kitlauelitayaj toTajtsin (1 Sam. 13:3; 14:13; 17:48-50; 18:1). Ijkon ken David niman Jonatán, uelis tiyolpakiskej tla touikaj imiuan akin kitlasojtlaj Jehová niman akin itech tlaneltokaj. Se tokniuj itoka Kiera, akin uejkaujtipan yokitekichiuili toTajtsin, kijtoua: “Melak miyekej imiuan ninouika, ualeuaj itech nochi tlaltikpaktli, ninouika imiuan akin tlatlamantikej niman akin oksekan onoskaltijkej”. Tla tejua ijkon tikchiua, tikitas kenon iTlajtol toTajtsin niman espíritu santo kichiuaj san sekan matinemikan imiuan nochimej tokniuan. w18.12 26 párrs. 11-13

Tlajtojli auilnemilistli (ika griego, pornéia), kijtosneki nochi xkuajli auilnemilistli tlen yakaj kichiua iuan okse akin xiuan nonamiktia. Ken ijkuak yakaj noteka iuan se akin xyejua ixnamik, ijkuak yakaj auilnemi pampa kitlaxtlauiliaj, ijkuak se tlakatl niman siuatl notekaj maski xinonamiktiaj, ijkuak omemej tlakamej noso siuamej notekaj niman ijkuak auilnemij iuan yolkamej. Matiknemilikan ika se tlakatl akin yononamikti auilnemi, isiuauj uelis kijtos tla kikauas noso ka. Tikitaj ika Jesús xokijto ika tla se akin yononamikti auilnemi, aman ixnamik kipiya ika kikauas. Se neskayotl, se tesiuauj uelis kijtos tla ok nemis iuan iueuentsin maski okikajkayauj. Kanaj ok kitlasojtla, niman kinektika kitlapopoluis niman kineki san sekan manopaleuikan niman ijkon kichikauaskej innamiktilis. Melauak, tla kikaua niman xok nonamiktia, kipiyas seki tlaueltin. ¿Akinon uelis kimakas tlen kipolos niman iuan akinon notekas? ¿Tlenon kichiuas tla san iselti nomachilia? ¿Kenon nomachiliskej ikoneuan? (1 Cor. 7:14). Kuajli nesi ika akin okikajkayaujkej niman kineki kikauas ixnamik, kixnamikis tlen ouijtika. w18.12 12 párrs. 10, 11

Jehová kitlauelita tlen xmelajki niman tlen xkuajli (Is. 61:8). Maski yejua kimatstok ika kemantika techtekiyomaka tikchiuaskej tlen kuajli ipampa totlajtlakol, technauatia matiktlauelitakan tlen xkuajli ijkon ken yejua kitlauelita. Tla titlanemiliaj itech tleka kitlauelita tlen xkuajli, yejon techpaleuis matiktlauelitakan ken yejua kitlauelita, niman noijki techpaleuis matikpiyakan chikaualistli niman ijkon uelis tikmapeuaskej. Tla tiktlauelitaj tlen xkuajli ijkon ken Jehová, noijki techpaleuis matikasikamatikan okse tlemach. Tikasikamatiskej ika seki tlemach xkuajli, maski Biblia xkiteneua. Se neskayotl, ipan yejuin tonaltin miyekej nijtotiaj lap dance, yejuin itlaj tlen tsokuiltik. Sekimej kijtouaj ika yejuin xsan noijki ken iuan yakaj timotekas, ika yejon, xkitaj tla xkuajli. San ika ¿ijkon kita Jehová? Matikilnamikikan ika yejua kitlauelita nochi tlen xkuajli. Kuakon, matiuelikan matoteltikan niman matiktlauelitakan tlen Jehová kitlauelita niman ijkon xtitlajtlakoskej (Rom. 12:9). w18.11 25 párrs. 11, 12

Pablo, itlatitlankauj Cristo, yexpa okiteneuj yejuin tlaxelojli ipan iamatlajkuiloluan (Rom. 1:17; Gál. 3:11; Heb. 10:38). Maski san katlejua tlauejli tikixnamikiskej, tla titlaneltokaj itech toTajtsin, tikitaskej kenon Jehová kichiua tlen yokijto. Jehová techijlia matitlanemilijtokan itech tlen tikchiaj manochiua tlayekapan, yejua xkineki san matitlanemilijtokan itech tlen amantsin tikixnamiktokej. Amoxtli Habacuc techmachtia itlaj akin tinemij itlamiyan tonaltin. Jehová kimijlia akin yolmelaujkej niman akin itech tlaneltokaj ika kinmakas nemilistli. Ika yejon, matikchikaujtokan totlaneltokil itech Jehová maski tikixnamikiskej tlauejli noso ajmantli. Jehová techmelajkaijlia itechkopa Habacuc ika yejua touan nemis niman ika techpaleuis. Ika tlasojtlalistli techtlajtlanilia itech matitlaneltokakan niman matikchiakan yejon tonajli ijkuak iTekiuajyo peuas kiyekanas tlaltikpaktli. Ijkuak ijkon panos, ipan yejuin tlaltikpaktli san nemiskej akin pakiskej niman yolseujkej yeskej, niman nochimej kiueyichiuaskej toTajtsin (Mat. 5:5; Heb. 10:36-39). w18.11 16 párrs. 15-17

Ipan kachtopa siglo, sekimej kuelkakiyaj kikakiskej tlen temachtiaya Jesús, san ika, sakin okikaujkej tlen melauak. Se neskayotl, sejpa Jesús okichiuj se milagro niman ijkon okintlakualti akin imiuan kistinemiya. Sakin, yejon tlaltikpakchanejkej iuan oyajkej hasta okse itempan mar tlen onka Galilea. San ika, ompa Jesús okimijli itlaj tlen melak okinmojkatlachialti, yejua okijto: “Tla nemejuamej xnenkikuaj nonakayo niman xnenkonij noyesyo, xnennemiskej para nochipa”. Yejuamej xokitlajtoltijkej tlenon kijtosnekiya, yejuamej okijtokej: “Yejua in tlen kijtoua sanoyej ouijtikaj para tikseliskej. ¿Akinon uelis kiselis in temachtijli?”. Kuakon, “miyekej on yejuan kuikatinemiyaj onokuepkej, niman xok iuan okistinenkej” (Juan 6:53-66). Teajman ika sekimej yokikaujkej tlen melauak. Sekimej ijkon yokichiujkej pampa xokuelitakej tlenon okichiuj noso okijto se tokniuj akin miyekej kixmatij. Oksekimej okinkualani ika okinnotskej niman okimijlikej tlen kijtoua Biblia, noso kanaj onokualanijkej iuan se tokniuj. w18.11 9 párrs. 3-5

Tla ikalpan toTajtsin itlaj kipatla niman tejuamej xtikasikamatij, matikilnamikikan kenon Cristo okinyekan yeuejkaui itekipanojkauan toTajtsin, ken ijkuak nemiya Josué niman ijkuak nemiyaj itlatitlankauan Cristo. Yejua melak kuajli okinyekan niman ijkon kintlajpiyas, kinchikauilis intlaneltokil niman kichiuas san sekan manemikan (Heb. 13:8). “Tekitketl” yolmelauak niman tlamachilise nochipa techijlia tlen noneki tikchiuaskej ijkuak kinamiki (Mat. 24:45). Ijkuak tikitaj kenon Cristo techyekana, tikasikamatij ika kineki techpaleuis matikpiyakan chikauak totlaneltokil. Cristo xsan kineki techpaleuis matikpiyakan chikauak totlaneltokil. Noijki techpaleuiya nochipa matikchiujtokan tekitl tlen melak ueyi kijtosneki ipan yejuin tonaltin: tenojnotsalistli (Mar. 13:10). w18.10 25 párrs. 13-16

Melak kuajli tikteititiaj ika ueli toteltiaj ijkuak oksekimej texchiuiliaj tlen xkuajli. Yejon kuajli tikitaj ipan 2 Samuel 16:9-13. Simeí, se ichanejkauj tekiuaj Saúl, okiuijuikalti niman okixnamik David, niman noijki ijkon okinchiuili itekipanojkauan. David ueliskia kiteltis Simeí, san ika, yejua okijyoui tlen xkuajli kichiuiliaya. ¿Kenon David sa no yejua ouel onotelti? Tlajtoltin tlen nesij achto ika peuas Salmo 3 techititia ika David okijkuilo yejon salmo ijkuak ikoneuj Absalón kinekiya kimiktis. Tlaxeloltin pitentsitsintin 1 niman 2 notlajtolnamikij ika tlen kijtoua 2 Samuel tlaxelojli ueyi 16. Ipan Salmo 3:4 tikitaj ika David melak tlaneltokaya. Yejua okijto: “Chikauak niknotsas Jehová, niman yejua nechuajnankilis”. Tejuamej noijki uelis tikchiuaskej teoyotl ijkuak techixnamikiskej. Niman Jehová techmakas iespíritu santo niman ijkon titlaxikoskej. ¿Uelis tiknemiliskej kampa nonekis sa no tejuamej toteltiskej noso tiktlapopoluiskej yakaj akin texchiuilia tlen xkinamiki? ¿Tikneltokaj ika Jehová kita ika titlajyouiyaj niman ika yejua techpaleuis? w18.09 6 párrs. 16, 17

Ijkuak tontenojnotsaj, noneki nochipa matiteasikamatikan niman matitetlakaitakan. Ika yejon, noneki kuajli matikimixmatikan. Ijkuak titenojnotsaj techajchan, tlaltikpakchanejkej xtexchiatokej pampa xotechnotskej matikintlajpalotij. Kuakon, melak noneki matikintlajpalotij ijkuak ueliskej touan nonojnotsaskej (Mat. 7:12). Matiknemilikan yejuin, ¿san kualkantsin nokuiteuaj itlamiyan semana noso ijkuakon noseuiyaj niman kochij? Tla ijkon, uelis kachtopa tiaskej kampa tojlan nojuitilo noso titenojnotsaskej iuan carritos, noso uelis tikomintlajpaloskej akin itikmatstokej ika yonokuiteujkej. Miyekej melak tekimikij, kuakon, kuajli yes tla xtiuejkauij. Uelis tikchiuaskej yejuin ijkuak kemach tipeuaj tikontlajpalouaj (1 Cor. 9:20-23). Ijkuak tlaltikpakchanejkej kitaj ika tikasikamatij ika melak miyek tekitl kipiyaj, kinektoskej techkakiskej ijkuak oksejpa tiaskej. Tla tikpiyaj kualneskayomej tlen ualeua itech iespíritu santo toTajtsin, kuakon, yemelak titekititoskej iuan toTajtsin. Jehová hasta uelis techtekitiltis niman ijkon yakaj matikpaleuikan makixmati tlen melauak (1 Cor. 3:6, 7). w18.09 32 párrs. 15-17

¿Tleka uelis tiyolpakiskej tla tiyolyemankej? Miyekej tlaltikpakchanejkej melak tlauelejkej katkaj niman teixnamikiyaj. San ika, pampa yokixmatkej tlen melauak kijtoua Biblia, aman yonopatlakej, yokiselijkej se “nemilistli yejuan yenkuik”. Aman yejuamej teikneliaj, tetlasojtlaj, yolyemankej, kuajli tenotsaj niman teijyouiyaj (Col. 3:9-12). Niman aman yejuamej kuajli nouikaj imiuan oksekimej niman yolpakij. Noijki, iTlajtol toTajtsin kijtoua ika yejuamej “kiseliskej tlaltikpaktli” (Sal. 37:8-10, 29). ¿Tlenon okijtosnek Jesús ijkuak okijto ika akin yolyemankej “kiseliskej tlaltikpaktli”? Tlapejpeniltin kiseliskej tlaltikpaktli ijkuak yejuamej nochiuaskej teopixkej niman tekiuajkej (Apoc. 20:6). Niman akin xyaskej iluikak, akin melak miyekej, kiseliskej tlaltikpaktli ijkuak yejuamej chantiskej ipan xochitlalpan ika yolseuilistli, ika pakilistli niman ika se nemilistli tlen xkeman tlamis. w18.09 19 párrs. 8, 9

Jehová yejua akin melak kuajli techkaki (Gén. 18:32; Jos. 10:14). Matikitakan tlen techmachtia Éxodo 32:11-14. Maski Jehová xnonekiya ijkon kichiuas, yejua okikauili Moisés makijli tlen kajmanaya. ¿Tijkakiskiaj ika ijyouilistli akin yonopopolo niman tikchiuaskiaj tlen techijlia? Jehová kinkaki ika ijyouilistli akin kichiuiliaj teoyotl niman tlaneltokaj. Matotlajtoltikan: “Tla Jehová melak yolyemanki niman kinkaki tlaltikpakchanejkej ijkon ken okinkak Abrahán, Raquel, Moisés, Josué, Manóah, Elías, niman Ezequías, ¿xkinamikiskia noijki ijkon manikchiua? ¿Uelis nikinkakis tokniuan niman nikchiuas tlen kuajli kijtouaj niman ijkon nikimititis ika nikintlakaita? ¿Nemi yakaj ipan tlanechikojli noso nikpiya se nochanejkauj akin noneki manijkaki? ¿Uelis itlaj nikchiuas?” (Gén. 30:6; Juec. 13:9; 1 Rey. 17:22; 2 Crón. 30:20). w18.09 6 párrs. 14, 15

Pampa techyeualouaj akin san itech tlanemiliaj, kemantika uelis techtekiyomakas tiktemakaskej tlen tikpiyaj. San ika, Jesús okinteneuj ome tlanauatiltin tlen ueyi kijtosnekij. Se, technauatia matiktlasojtlakan Jehová ika nochi toyojlo, tonemilis, totlamachilis niman tochikaualis. Okse, technauatia matikintlasojtlakan oksekimej ijkon ken tejuamej totlasojtlaj (Mar. 12:28-31). Akin kitlasojtlaj Jehová, kixkopinaj. Jehová niman Jesús kuelitaj kitemakaskej tlen kipiyaj, niman techyolchikauaj matikimixkopinakan, pampa yejuin kichiuas melak matipakikan. Tla tochikauaj tikmakaskej toTajtsin niman tlaltikpakchanejkej tlen tikpiyaj, tikueyichiujtoskej Jehová niman tikinpaleuijtoskej oksekimej, niman tejuamej noijki techpaleuis. Tikmatstokej ika tokojtiliaj tiktemakaskej tlen tikpiyaj niman titepaleuiskej. Niman melak kuajli ika ijkon tikchiuaj iuan tokniuan (Gál. 6:10). Tla nochipa ijkon tikchiuaj, tlaltikpakchanejkej techtlasojkamachiliskej niman techtlasojtlaskej, niman tejuamej melak tipakiskej. w18.08 22 párrs. 19, 20

Jehová kinselia nochimej akin kimojkaitaj niman kichiuaj tlen melajki. Yejua xkita tla oksekan tiualeuaj, tla kenon titlachiaj, noso tla sejneka titlajtouaj (Gál. 3:26-28, TNM; Apoc. 7:9, 10). Kanaj tinochimej tikmatstokej yejuin. San ika, tla otitlakatkej ipan se kalpan noso tla tochanejkauan techikoitaj, ¿tikmachiliaj ika kemantika ok tiknekij titechikoitaskej? Maski Pedro okinpaleuijka oksekimej makasikamatikan ika toTajtsin xtechikoita, sakin yejua okiteititi ika ok techikoitaya (Gál. 2:11-14). Kuakon, ¿kenon uelis xtitechikoitaskej san ipampa tlen tikitaj? Kipiya ika toixtlaloskej niman tikitaskej ipan Biblia tla tikchiujtokej tlen ompa technauatia, yejon techpaleuis matikitakan tla ok titechikoitaj (Sal. 119:105). Noijki, uelis tiktlajtoltiskej se akin iuan touikaj tla kita ika ok titechikoitaj (Gál. 2:11, 14). Kanaj tejuamej xueli tikitaj tla ok titechikoitaj. w18.08 9 párrs. 5, 6

Matotlajtoltikan: “¿Kitaj oksekimej ika yemelak nimelajkanemi itech toTajtsin? ¿Nikyejyekoua ika oksekimej manechixmatikan ken se iteixpantijkauj Jehová?”. ToTajtsin melak kiyolkokoskia tla tipinauiskiaj tikimijliskej oksekimej ika tiiyaxkauan toTajtsin (Sal. 119:46; Mar. 8:38). Teajman ika sekimej Teixpantijkej kixkopinaj “tlaltikpaktlakamej” niman kuakon san noijki nesij ken akin xkitekichiuiliaj toTajtsin (1 Cor. 2:12). Akin kichiuaj ken yejon “tlaltikpaktlakamej” akin xkitekichiuiliaj Jehová, san tlanemiliaj itech tlen yejuamej kinekij (Efes. 2:3). Se neskayotl, maski melak miyekpa yotechilnamiktijkej matotlakentikan niman matokualnextikan ken kinamiki, sekimej xkichiuaj. Kitlaliaj tlakentli tlen inpan tetstitiuj niman tlen xkuajli kintlapachoua, niman hasta ijkon yauej tlanechikoltin. Oksekimej kitekij intson noso notsonmelauaj ijkon ken akin xkitekichiuiliaj toTajtsin (1 Tim. 2:9, 10). Kuakon, ijkuak nemij imiuan oksekimej, xnesij akinomej iteixpantijkauan Jehová niman akinomej ka (Sant. 4:4). w18.07 24, 25 párrs. 11, 12

¿Tleka uelis tikijtoskej ika tikniujtin? Kachtopa, pampa tinochimej tiualeuaj itech Adán (Hech. 17:26). Okse, pampa ijkon ken okijto Jesús, inomachtijkauan ikniujtin pampa kitaj Jehová ken inTaj iluikakchane (Mat. 12:50). Niman noijki, aman yonochiujkej ichanejkauan toTajtsin, niman san sekan nemij ipampa intlaneltokil niman intlasojtlalis. Ika yejon, ipan inamatlajkuiloluan, itlatitlankauan Cristo miyekpa okinteneujkej ken imikniuan akin noijki tlaneltokayaj ken yejuamej (Rom. 1:13; 1 Ped. 2:17; 1 Juan 3:13). Sakin ika kuajli okiteititi ika noneki toitaskej ken ikniujtin, Jesús kuajli okijto ika melak noneki tiyolyemankej yeskej (Mat. 23:11, 12). Itlatitlankauan Jesús kemantika noueyimatiyaj niman yejon kinxelouaya. Noijki, tlaltikpakchanejkej noueyimatiyaj ipampa inuejkachanejkauan. Miyekej Judíos noueyimatiyaj pampa ualeuayaj itech Abrahán. San ika, xkinamikiya ijkon manoueyimatikan, pampa Juan Teapolaktijketl okimijli: “Hasta in temej Dios uelis kinkuepas tekoneuan itech Abraham” (Luc. 3:8). w18.06 10 párrs. 8, 9

Ijkuak tikixnamikij tlen techajmankamiktia noso ijkuak xtiuelij touikaj iuan yakaj, ¿tikteltiaj tlen tikchiuaj niman noijki tlen tikijtouaj? (Prov. 10:19; Mat. 5:22). Tla oksekimej techkualaniaj, matijkauilikan ika Jehová makimititi ikualankayo (Rom. 12:17-21). Yejuin tiuelij tikchiuaj ijkuak tikonitstokej toTajtsin niman ijkuak tikchiaj ika yejua makichiua tlen nonekis ijkuak yejua kitas ika noneki. Tla xtikchiuaskiaj yejuin niman san tejuamej totlakuepiltiskej, kuakon, kentla xtiktlakaitaskiaj Jehová. Ijkuak Jehová techmaka yenkuik tlanauatiltin itechkopa ikalpan, noneki nimantsin tikchiuaskej tlen technauatiaj. Xtiktejtemoskej tikchiuaskej ken yeuejkaui tikchiuayaj (Heb. 13:17). Noijki, noneki totlajpiyaskej maka tikchiuaskej okseki tlen xijkuiliujtika (1 Cor. 4:6). Tla ijkon tikchiuaj, tikteititiskej ika kuajli tikonitstokej Jehová. w18.07 15, 16 párrs. 17, 18

Ijkuak chikaujtias totlaneltokil, ueyixtias ken tikinpatiojkaitaj tlajtolyekanalistin. San noijki ken tlen inpan nochiua kokonej. Ijkuak pitentsitsintin, xkasikamatij ika mitsijtlakos timouikas imiuan akin kichiuaj tlen xkuajli, niman tajtin noneki kinnajnauatiskej niman ijkon kintlajpiyaskej (1 Cor. 15:33). San ika, ijkuak ueyixtiuej, yolik peuaj tlanemiliaj niman noyekanaj ika tlajtolyekanalistin tlen onka ipan Biblia, niman yejon tlen kinpaleuiya ijkuak kitlapejpeniaj akinomej inuan nouikaskej (1 Cor. 13:11; 14:20). Noijki ijkon, ijkuak titlanemiliaj ipan itlajtolyekanalisuan toTajtsin, totlamachilis peua tlanemilia ken tlanemilia toTajtsin niman kuakon totlamachilis noyektlalia niman kuajli techyekana. Tikpiyaj nochi tlen techpaleuis matiktlapejpenikan tlen kiyolpaktia Jehová. ¿Tleka ijkon tikijtouaj? Pampa tlanauatiltin niman tlajtolyekanalistin tlen onokej ipan Biblia kipaleuiyaj akin kichiua ken Cristo “ma ueltiu niman ma noyektlalijtiu para kichiuas nochi tlen kuajli” (2 Tim. 3:16, 17). w18.06 19 párr. 14; 20 párrs. 16, 17

Jesús okiteititi ika se samaritano ueliskia kinmachtis judíos tlenon kijtosneki yemelak tikintlasojtlas oksekimej (Luc. 10:25-37). Ijkuak sa achijtsin poliuiya ika yas iluikak, Jesús okinnauati inomachtijkauan matenojnotsakan ipan “Judea, niman Samaria, niman nochiuiyan ipan in tlaltikpaktli” (Hech. 1:8). San ueliskiaj kichiuaskej tla kipatlayaj tlen xkuajli kinemiliaya intech oksekimej niman xnoueyimatiyaj. Jesús otlajto itech kualneskayomej tlen kipiayaj akin xjudíos katkaj, ijkon okinyektlali inomachtijkauan ijkuak kinnojnotsaskiaj akin ualeuaj itech okseki ueyi kalpamej. Se neskayotl, kuajli otlajto itech se “capitán romano” (Mat. 8:5-10). Niman ipan kalpan Nazaret otetomili ika Jehová okinpaleuijka akin xjudíos katkaj, ken siuakauajli akin chantiya Sarepta, se kalpan fenicio, niman noijki Naamán akin kipiaya lepra niman chantiya Siria (Luc. 4:25-27). Noijki, Jesús xsan okinojnots se siuatl samaritana, yejua onokauj ome tonajli ipan Samaria pampa miyekej kikakisnekiyaj itech tlen tenojnotsaya (Juan 4:21-24, 40). w18.06 10 párrs. 10, 11

Pablo, itlatitlankauj Cristo, okijto ika akin kichiuaj ken Cristo kentla soldados akin tlauisoktoskiaj. Tikmatstokej ika xtouisokij inuan tlaltikpakchanejkej, touisokij iuan espíritus. Totlauelikniuan yejuamej Satanás niman xkuakualtin espíritus. Maski xueli tikimitaj, yejuamej yemelak nemij niman melak youelkej tlaixnamikij. Nesiskia ika xuelis titetlaniskej, niman telpokamej yejuamej akin melak ouijtika kitaj. San ika ¿yemelak ijkon? ¿Ueliskej telpokamej kintlaniskej yejuin xkuakualtin espíritus? Kema ueliskej, niman ikichiujtokej. ¿Kenon uelij tetlanij? Pampa yejuamej kitlajtlaniliaj toTajtsin Jehová makinmaka kojtilistli. Noijki, pampa yejuamej kichiuaj ken se soldado akin kuajli tlaixnamiki, kuajli yokinotlalilijkej “nochi on armas” tlen ualeuaj itech toTajtsin (Efes. 6:10-12). Ijkuak otlajto itech yejon “armas”, Pablo kanaj kinemilijtoya tlen kinotlaliliayaj soldados romanos (Hech. 28:16). w18.05 27 párrs. 1, 2

Tlen melak ueyi kijtosneki tlen techititia ika noneki titenojnotsaskej yejua pampa ijkon tikueyichiuaj Jehová niman tikchipauaj itokayo (Juan 15:1, 8). Yemelak ika xtiueliskej tikchiuaskej ika itokayo toTajtsin melak machipaui pampa itokayo Jehová ikuajli chipauak. San ika, matikitakan tlenon okijto teotlajtoketl Isaías: “Jehová akin kinyekana akin tlaixnamikij... yejua Akin kipiya nenkichipaujkaitaskej” (Is. 8:13). Ijkon tej, se ken uelis tikchipauaskej itokayo toTajtsin yejua tla tikitaj ken itlaj melak ueyixtika xijkon ken oksekimej tokayomej, niman ijkuak tikinpaleuiyaj oksekimej tlaltikpakchanejkej makasikamatikan ika itokayo chipauak. Se neskayotl, ijkuak tikteijliaj kenon kualtsitsintin ikualneskayouan Jehová niman itech nochi tlen yokijto kichiuas ipampa tlaltikpakchanejkej, titlapaleuiyaj ika oksekimej makitakan ika tlen kijtoua Satanás itech Jehová san tlakajkayaualistin (Gén. 3:1-5). Noijki tikchipauaj itokayo ijkuak tikyejyekouaj tikinpaleuiskej akin tikinnojnotsaj kampa tichantij niman ijkon makitakan ika Jehová kimelaua kiselis “ueyilistli, tetlakaitalistli, niman poder” (Apoc. 4:11). w18.05 18 párrs. 3, 4

Kachtopa tlen techititia ika noneki xtejtemo tiktekichiuilis toTajtsin yejua pampa ijkon tikititia Jehová ika melak tiktlasojkamachilia ika mitstlasojtla niman noijki nochi tlen yokichiuj mopampa. Telpokatl niman ichpokatl, xnemili ipan nochi tlen Jehová yomitsmakak: monemilis, Biblia, tlanechikojli, ika youel yotikixmat niman se tlamachialistli tlen melak kualtsin ika tlayekapan. Tla kachtopa tiktejtemoua tiktekichiuilis toTajtsin ipan monemilis, xsan tikititis Jehová ika tiktlasojkamachilia, noijki melak kuajli iuan timouikas. Ijkuak timokojtilia tikchiuas tlen yotiknemili ipan itekiyo toTajtsin, mitspaleuiya xchiua tlen kuajli niman Jehová kita. Yejuin noijki kichikaua ken iuan timouika. Apóstol Pablo kuajli okijto: “Dios yolmelajki. Yejua xkelkauas nemotekiu nion on tetlajsojtlalistli yejuan onenkititijkej” (Heb. 6:10). Maski se melak pitentsin, uelis kitejtemos kenon chikauak kitekichiuilis toTajtsin. ¿Tleka xtiknemilia tlenon uelis tikchiuas tlen tikitas ueyi kijtosneki niman tipeua titekiti itech yejon? (Filip. 1:10, 11). w18.04 26 párrs. 5, 6

Akin chantiyaj kampa tlanauatiayaj romanos melak noueyimatiyaj pampa kitlajpiayaj tlanauatiltin, melajkayotl niman tlamakaualistli. San ika, ikojtilis niman iueyilis yejon tekiuajyotl ouel onopix inpampa intekiyo tlakeualtin. Oajsik tonajli ijkuak 30% itech nochimej akin ompa chantiyaj tlakeualtin katkaj. Tikmatstokej ika titlakeuajli noso titlamakauajli yes yejua itlaj tlen kinajmanaya akin xuejueyixtoyaj, niman noijki akin kichiuayaj ken Cristo akin ompa chantiyaj. Apóstol Pablo ipan iamatlajkuiloluan miyekpa otlajto itech tlamakaualistli. San ika, yejua xkitejtemouaya tlen kinekiyaj tlaltikpakchanejkej, akin kinekiyaj kiyektlaliskej kenon nemiyaj niman noijki política. Pablo niman oksekimej akin kichiuayaj ken Cristo nokojtiliayaj kinpaleuiskej tlaltikpakchanejkej makixmatikan kuajli tlajtoltin itech iTekiuajyo toTajtsin niman kenon ueyi kijtosneki tlaxtlauijli tlen okichiuj Jesús. Pablo okimijli imikniuan itech akinon ualeua melauak tlamakaualistli. w18.04 8 párrs. 1, 2

Ipan yeuajli ijkuak imikiskia, Jesús okijli Pedro yejuin tlajtoltin tlen yotikonpoujkej. Pedro katka se akin kinyekanaya tokniuan ipan tlanechikojli tlen onkatka ipan kachtopa siglo (Gál. 2:9). Yolchikaualistli tlen okiteititi ipan Pentecostés niman ipan okseki tonaltin melak okinyolchikauj imikniuan. Sakin ika yokitekichiuili toTajtsin miyek xiuitl, okintlajkuilouili niman ijkin okimijli: “Itechkopa Silvano, akin nikita ken se tokniuj yolmelaujki, yonimechtlajkuilouili ika achijtsin tlajtoltin tlen ika nimechyolchikauas niman ika nochi noyojlo nimechijlis ika yejuin tlen melauak iueyiteiknelilis toTajtsin. Xmelajkanentokan itech yejuin” (1 Ped. 5:12, TNM). Itech miyek xiujtin, iamatlajkuiloluan Pedro melak yokinyolchikauj miyekej akin kichiuaj ken Cristo. Niman aman, ijkuak tikchiaj manochiua tlen Jehová okijto techmakas, melak techpoloua yejon yolchikaualistli (2 Ped. 3:13). w18.04 17 párrs. 12, 13

Nochimej kinekij kipiyaskej tlamakaualistli. Pampa kinekij kipiyaskej, nosentlaliaj niman ontetsajtsiliaj, niman hasta teixnamikij niman tlauisokij. San ika, yejuin xkichiua makipiyakan tlen kinekiyaj, miyekpa san kichiuaj maonia tlajyouilistli niman ika sekimej mamikikan. Ijkon, oksejpa nesi ika melauak yejon tlajtoltin tlen toTajtsin okichiuj makijkuilo tekiuaj Salomón: “Tlakatl yokinyekan tlaltikpakchanejkej niman ijkon matlajyouikan” (Ecl. 8:9). Ipan tlaxelojli tlen aman tikistokej, Santiago, se inomachtijkauj Jesús, okijto tlenon noneki tikchiuaskej niman ijkon yemelak tipakiskej niman tinemiskej ika toyojlo. Jehová yejua akin okitemakak yejon tlanauatijli tlen “ajsitika”, niman ika yejon, yejua akin melak kuajli kimati tlenon noneki niman ijkon tipakiskej niman tinemiskej ika toyojlo. Okinmakak Adán niman Eva nochi tlen nonekiya niman ijkon mayolpakikan, niman noijki okinmakak melauak tlamakaualistli. w18.04 3 párrs. 1-3