Febrero

Jesús melak teikneliaya, niman pampa miyekej okimachilijkej ken kintlasojtlaya, okiselijkej iTlajtol toTajtsin. Kuakon, tla tokojtiliaj tikchiuaskej ken Jesús, melak kuajli tikinpaleuiskej akin tikinnojnotsaj. Tla tiknekij tikimasikamatiskej akin tikinnojnotsaj, noneki matikitakan tlen kinemiliaj niman kimachiliaj, niman matikinchiuilikan ken tiknekiskiaj matexchiuilikan (Mat. 7:12). Matiknemilikan tlen inpan panotok. Maka nochimej san noijki tlemach matikimijlikan, matikitakan tlenon kinemiliaj tlaltikpakchanejkej niman sakin matikimijlikan tlen noneki. Melak kuajli tla tikintlajtoltiaj niman ijkon uelis tikmatiskej tlenon kimachiliaj (Prov. 20:5). Ijkon, sa no yejuamej techijliskej tleka kinekij kikakiskej itech toTajtsin. Ijkuak itikmatij yejon, uelis tikinpaleuiskej itech tlen kinpoloua, ijkon ken okichiuj Jesús (uelis tikitas 1 Corintios 9:19-23). w19.03 20 párr. 2; 22 párrs. 8, 9

Ijkuak Adán iuan Eva okikuajkej tlakilyotl ipan jardín de Edén, okiteititijkej ika xkitlasojkamatiyaj tlen Jehová okichiujka ipampa. Tinochimej uelis tikteititiskej ika xtikuelitaj tlen yejuamej okitlapejpenijkej kichiuaskej. Ijkuak toapolaktiaj, tikititiaj Jehová ika tikneltokaj ika yejua kinamiki kijtos tlen kuajli niman tlen xkuajli. Noijki tikititiaj ika tiktlasojtlaj niman itech titlaneltokaj. Sakin ijkuak yotoapolaktijkej, mojmostla noneki matikchiuakan tlen Jehová kineki niman maka tlen tejuamej tiknekij. Tikmatstokej ika ouijtika, san ika, miyekej tlaltikpakchanejkej nochi xiujtin kichiuaj tlen Jehová kineki. Tejua noijki uelis ijkon tikchiuas, tla timomachtia Biblia, imiuan timosentlalia tokniuan niman tla tikinnojnotsa oksekimej tlen yotiuel itech moTajtsin iluikakchane (Heb. 10:24, 25). Ijkuak tiktlapejpenis tlen tikchiuas, xkaki tlen Jehová mitsijlia ipan iTlajtol niman itech ikalpan (Is. 30:21). Kuakon, kuajli tinemis (Prov. 16:20). w19.03 6, 7 párrs. 17, 18

Jehová techmaka miyek tlen ika tikchikauaj totlaneltokil. Xnemili, tikseliaj miyek tlen tepaleui ipan tlanechikoltin, revistas niman páginas tlen tikpiyaj ipan Internet. ¿Xmelak ika kemantika melak yotechpaleui se discurso, se tlamachtijli ipan se revista noso se programa tlen onka ipan JW Broadcasting niman otiknemilijkej ika yejon tlen tiknekiyaj tijkakiskej? Kuakon, ¿kenon uelis tiktlasojkamachiliskej Jehová ipampa nochi tlen yotechmakak? (Col. 3:15). Uelis nochipa tiktlasojkamachiliskej ijkuak tikchiuiliskej teoyotl. Noijki, tikititiaj Jehová ika tiktlasojkamachiliaj ijkuak tikchipauaj niman tikitaj ika nochi kuajli maonia ipan kajli kampa tikueyichiuaj. Ika yejon, titlapaleuiyaj ijkuak nochipaua niman noyektlalia Kajli kampa Tosentlaliaj. Noijki, akin ipan tlanechikojli kikuij aparatos de audio niman video, noneki kuajli kitekitiltiskej. Ijkuak tiktlajpiyaj Kajli kampa Tosentlaliaj, kichiua ika mauejkaui niman maka manoyektlali pampa ijtlakaui. Ijkon, tikpiyaskej tomintsin niman uelis nochijchiuas niman noyektlalis okseki kaltin kampa nosentlaliaj iteixpantijkauan Jehová ipan nochi tlaltikpaktli. w19.02 18 párrs. 17, 18

Job otlanemili itech tlen kualtsin okichijchiuj Jehová (Job 26:7, 8). Otlamojkaitak ijkuak otlanemili itech tlaltikpaktli, iluikak, moxtli niman ken tlakomoni, maski okijto ika kimatiya san achijtsin itech nochi tlen Jehová okichijchiuj. Noijki, okitlasojkaitak tlen Jehová kimachtiaya, ika yejon, okijto: “Nochipa niktlakamati ileyes niman itlanauatiluan” (Job 23:12). Pampa kimojkaitaya niman kitlakaitaya, okichiuj makitlasojtla niman makineki makiyolpakti. Yejon okichiuj mayolmelajkanemi. Ken Job, noneki titlanemiliskej itech tlen Jehová yokichijchiuj. Ipan yejuin tonajli, melak miyek tikmatij itech tlen toTajtsin yokichijchiuj xijkon ken ijkuak Job nemiya. Noijki, tikpiyaj nochi Biblia, tlen techpaleuiya matikixmatikan toTajtsin. Nochi tlen ompa tomachtiskej techpaleuis matikmojkaitakan niman matiktlakaitakan Jehová. Yejon techpaleuis matiktlasojtlakan niman matiktlakamatikan niman nochi yejuin kichiuas matiknekikan matiyolmelajkanemikan (Job 28:28). w19.02 5 párr. 12

Yopanok miyek xiuitl ika tekiuajkej melak kitlaueltokaj ikalpan Jehová. ¿Tleka? Kanaj kitaj ika yotikchiujkej itlaj tlen xkuajli, san ika xmelak, yejuamej techtlaueltokaj pampa yotiktlapejpenijkej “achtoj tiktlakamatiskej Dios” (Hech. 5:29). Kanaj techpijpinaujtiaj, techtsakuaj noso hasta techuisokij. San ika, Jehová techpaleuiya maka matotlakuepiltikan, niman matiyolseujtokan ijkuak techixnamikiskej. Matiknemilikan tlenon techmachtiaj yeyimej telpokamej hebreos akin okinuikakej Babilonia: Hananías, Misael niman Azarías. Ika tlakaitalistli niman ika yemanki tlajtojli, okijlikej tleka xkiueyichiuaskiaj tlamachijchiuajli ika oro tlen yejua okichijchiujka. Yejuamej okiselijkej tlen toTajtsin kitekauiliskia mapano (Dan. 3:1, 8-28). ¿Kenon uelis ijkon tikchiuaskej ken yeyimej hebreos ijkuak techtlatlataj? Matiyolyemankej niman matikneltokakan ika Jehová techtlajpiyas (Sal. 118:7). Niman, ijkuak yakaj kiteijlis ika tikchiuaj tlen xkuajli, matiknankilikan ika kuajli tlajtojli niman tlakaitalistli (1 Ped. 3:15). Noijki, maka itlaj matijkauilikan makijtlako itech ken touikaj iuan toTajtsin iluikakchane. w19.02 10, 11 párrs. 11-13

Tla titlanemiliaj itech tlamachialistli tlen tikpiyaj pampa Jesús onotemakak topampa, yejon techpaleuis melak matiyolchikauikan (Juan 3:16; Efes. 1:7). Ipan yejon semanas ijkuak xiajsi ika noilnamikis imikilis Cristo, kinamiki matikteititikan ika tiktlasojkamatij tlaxtlauijli. Ipan yejon tonaltin, matikitakan tlaxeloltin tlen tlajtoua itech iTlakualis toTeko niman kuajli matitlanemilikan itech tleka omik Jesús. Kuakon, ijkuak tosentlaliskej ipan yejon tonajli, tikasikamatiskej tlenon kijtosneki pan niman vino. Ijkuak tikasikamatij tlen Jesús niman Jehová yokichiujkej topampa, noijki kenon techpaleuiya niman kinpaleuiya tochanejkauan, totlamachialis chikauis niman melak techyolchikauas matitlaxikokan hasta ijkuak tlapopoliuis (Heb. 12:3). Melak tiktlasojkamatij ika ok kiteititia yejuin kualneskayomej aman ika topampa tlajtoua ken ueyi teopixki ipan iluikak (Heb. 7:24, 25). Tla tiknekij tiktlasojkamatiskej yejuin, noneki nochipa matikilnamikikan imikilis ken yejua otlanauati (Luc. 22:19, 20). w19.01 22 párr. 8; 23, 24 párrs. 10, 11

Jehová techkauilia tinochimej matikueyichiuakan. Ijkuak titlanankiliaj, ijkon tikueyichiuaj Jehová ika se “uentli” niman xyakaj topampa uelis kitemakas yejon uentli (Heb. 13:15). ¿Techtlajtlanilia Jehová tinochimej san noijki ijkon matitlanankilikan? Ka. Totlanechikoluan san noijki ken ijkuak titlakuaj imiuan akin touikaj. Tla sekimej tokniuan technotsaj matitlakuatij inchan niman kichiaj matikitkikan itlaj, ¿tlenon tikchiuaskej? Kanaj achijtsin tomojtiskej, san ika, kanaj tokojtiliskej tikitkiskej itlaj tlen nochimej makuelilikan. Ipan tlanechikoltin, Jehová yejua akin technotsa, yokitlali mesa niman ompa yokitlali miyek tlemach tlen uelik (Sal. 23:5; Mat. 24:45). Yejua kuelita itlaj matikitkikan, tlen tiueliskej tikitkiskej. Kuakon, kuajli matomachtikan niman matitlanankilikan nochi kech tiueliskej. Ijkon, xsan titlakuaskej ipan imesa Jehová, noijki titlapaleuiskej ika oksekimej noijki ompa matlakuakan. w19.01 8 párr. 3; 13 párr. 20

Itech tonaltin tlen kiteneua Biblia, miyekej auilnemiyaj ijkuak kinueyichiuayaj tajtsitsintin tlen xmelajkej (Os. 4:13, 14). Miyekej kuelitayaj kinueyichiuaskej okseki tajtsitsintin pampa kuelitayaj auilnemiskej. ¿Pakiyaj pampa ijkon kichiuayaj? Ka. David okijto ipan Salmo 16:4 ika akin kinueyichiuaj okseki tajtsitsintin “kimiyekiliaj inajmankayo”. Noijki hasta kinuentlaliayaj inkoneuan inpampa yejon tajtsitsintin xmelajkej (Is. 57:5). Jehová melak kitlauelitaya yejuin (Jer. 7:31). Ipan yejuin tonaltin, miyekej tlaneltokiltin tlen xmelajkej noijki kitekauiliaj maauilnemilo, niman hasta kitekauiliaj ika omemej tlakamej noso omemej siuamej manonamiktikan noso manotekakan. San ika, ijkon ken yeuejkaui, noijki inpan nochiua tlen xkuajli (1 Cor. 6:18, 19). Kinemiliaj ika uelij kichiuaj tlen kinekij, san ika, “kimiyekiliaj inajmankayo”. Kanaj tejua yotikitak ika yejuin yemelak ijkon panoua. Ika yejon, telpochtli, xkaki moTajtsin iluikakchane. Xkasikamati ika kuajli tonkisas tla tiktlakamati. Maka xkilkaua ika melak miyek tlen xkuajli mopan nochiuas tla tikchiua tlen xkuajli niman ika xuejkauis tikpiyas yejon pakilistli tlen ueliskia tikmachilis (Gál. 6:8). w18.12 27, 28 párrs. 16-18

Tla se tokniuj auilnemi, ixnamik uelis kijtos tlen kichiuas. Jesús okijto ika akin okikajkayaujkej uelis kijtos tla kikauas niman ueliskia oksejpa nonamiktis (Mat. 19:9). San ika, noijki ueliskia kitlapopoluis. Tla kitlapopoluiya xkichiujtos tlen xkuajli. Oseas oksejpa iuan ochantik Gómer. Aman, Gómer xok keman auilnemiskia iuan okse tlakatl. Oseas ouejkauj ika “xiuan onotekak” iuan Gómer (Os. 3:1-3, nota, Traducción del Nuevo Mundo ika inglés 2013). Sakin, Oseas oksejpa iuan onotekak. Yejuin techititia ika Jehová okinek oksejpa kiselis ikalpan Israel niman oksejpa iuan nouikas (Os. 1:11; 3:4, 5). Nikan tiuelij ika tla akin okikajkayaujkej kijtoua ok nemis iuan ixnamik, niman oksejpa iuan noteka, kiteititia ika yokitlapopolui ixnamik akin okikajkayaujka (1 Cor. 7:3, 5). Tla ijkon panoua, xok uelis kikauas ixpan tekiuajkej. Aman nonekis omemej makipatiojkaitakan innamiktilis ijkon ken Jehová kipatiojkaita. w18.12 13 párr. 13

Ijkuak tomachtijtoskej, melak kuajli tla titlanemiliaj itech kenon itlanemililuan toTajtsin techpaleuis ijkuak tiktlapejpeniskej itlaj ika tlayekapan. Niman ijkon, tla nimantsin nonekis itlaj tiktlapejpeniskej, itikmatiskej tlenon tikchiuaskej. Matiknemilikan tlenon ipan onochiuj José. Isiuauj Potifar okijli iuan manoteka, san ika, yejua nimantsin okimapeuj. Ijkon okiteititi ika yejua yotlanemilijka ika Jehová kineki ika akin yononamiktijkej mamelajkanemikan (Gén. 39:8, 9). Noijki matikilnamikikan kenon José okinankili yejuin siuatl: “¿Tleka nikchiuas yejuin tlen melak xkuajli niman nitlajtlakos ixpan toTajtsin?”. Yejuin techititia ika yejua tlanemiliaya ken Jehová. Aman matiknemilikan tlenon tejuamej uelis tikixnamikiskej. Matiknemilikan ika se akin iuan titekitij techititia ika techuelita noso tikseliaj se mensaje kampa tlajtoua itech auilnemilistli noso se tlaixkopinajli kampa uajnesi ika yakaj auilnemi. Nimantsin uelis tikmapeuaskej tla amantsin tiknemiliaj kenon Jehová kita yejuin, tla titlanemiliaj ken yejua niman tla kuajli tikijtouaj tlenon tikchiuaskej ijkuak tikixnamikiskej yejuin. w18.11 25 párrs. 13, 14

Miyekej ixtlamatkej kijtouaj ika tlen okijto Habacuc ipan tlaxelojli 18, kijtosneki ika Habacuc tsijtsikuiniskia niman nopapalakachoskia pampa yolpakiya ika tlen kichiuaskia iTajtsin. ¿Xmelak ika tlen okichiuj melak techpaleuiya? Jehová xsan yotechijli tlenon kualtsin kichiuas ika tlayekapan, yejua techmelajkaijlia ika tekititika niman ijkon kichiuas tlen yokijto. Kema, amoxtli Habacuc techmachtia itlaj tlen melak ueyi kijtosneki: kipiya ika titlaneltokaskej itech Jehová (Hab. 2:4). ¿Tlenon techpaleuis nochipa itech matitlaneltokatokan? Noneki melak kuajli iuan touikaskej. Kuakon, noneki tikchiuaskej yeyi tlemach. Kachtopa, noneki nochipa tikchiuiliskej teoyotl Jehová niman tikijliskej nochi tlen techajmana niman tlen techtekipachoua. Ika ome, noneki kuajli tikitaskej tlenon techijlia ipan iTlajtol niman tikchiuaskej ken techyekana ikalpan. Niman ika yeyi, ika tlaneltokijli niman ijyouilistli noneki tikchiaskej yejon tonajli ijkuak techpaleuis. Yejon tlen okichiuj Habacuc. Maski melak najmanaya ijkuak okipeualti iamox, ijkuak otlan okiteititi ika aman pakiya niman ika tlaneltokaya itech toTajtsin. Matikchiuakan ken yejua okichiuj niman ijkon noijki tikmachiliskej kenon toTajtsin technapaloua ika tlasojtlalistli. San yejua akin uelis techyolseuis ipan yejuin tlaltikpaktli tlen melak xkuajli. w18.11 17 párrs. 18, 19

Aman matikitakan okse itlaj tlen kuajli techititia ika Jehová techtlasojtla. Juan 3:16 kijtoua: “Dios sanoyej okintlajsojtlak on tlaltikpaktlakamej hasta okitemakak isenteKonetsin para nochi on akin kineltokas xpoliuis, yej kipias yenkuik nemilistli para nochipa”. Noijki tikitaj ika Jesús melak otechtlasojtlak pampa okitemakak inemilis topampa. ITlajtol toTajtsin kuajli techijlia ika nion tlauejli nion tlajyouilistli xuelis techxeloskej “itech itetlajsojtlalis Cristo” (Rom. 8:35, 38, 39). Kemantika tikixnamikij tlaueltin tlen kichiua matisiauikan noso maka sa matechyolpakti tiktekichiuiliskej Jehová. San ika, tla tikilnamikij kenon Cristo techtlasojtla, tikpiyaskej kojtilistli niman ijkon uelis titlaxikoskej (2 Cor. 5:14). “Itetlajsojtlalis Cristo” techyolchikaua niman kichiua matiknekikan nochipa tiktekichiuiliskej Jehová. Techpaleuiya matitlaxikokan ijkuak tlaixpoliui, ijkuak techtlaueltokaj, ijkuak panoua tlen xtikchiayaj noso ijkuak melak tajmanaj. w18.09 14 párrs. 8, 9

Tla tiknekij tinejnemiskej ipan tlen melauak, noneki tikseliskej niman tikchiuaskej nochi tlen Jehová techmachtia. Noneki tikitaskej tlen melauak itech Biblia ken itlaj tlen melak ueyi kijtosneki ipan tonemilis, niman noneki tikchiuaskej ken kijtouaj itlajtolyekanalisuan Biblia. David kuajli yokijtoka ika nejnemiskia ipan tlen melauak. Tejuamej noijki noneki tikchiuaskej yejon. Tla xijkon tikchiuaj, kanaj uelis tipeuaskej titlanemiliskej itech nochi tlen otijkaujkej ipampa tlen melauak, noso hasta kanaj oksejpa tiknekiskej tikpiyaskej tlen otijkaujkej. Maka keman ijkon matikchiuakan. Tikmatstokej ika tejuamej xuelis tikijtoskej katlejua tlamachtiltin tikinseliskej niman katlejua xtikinseliskej, pampa noneki tinejnemiskej ipan “nochi tlen melauak” (Juan 16:13). Tla xtiknekij tijkauaskej tlen melauak, noneki kuajli matiktekitiltikan totiempo. Tla xtotlajpiyaj, peuas melak tijkuiskej totiempo ipan tlen ika toyolpaktiaj, ipan tlen tikuelitaj tikchiuaskej, ipan Internet noso ipan televisión. Maski xtlajtlakojli tikchiuaskej yejuin tlemach, uelis kichiuas maka kuajli matijkuikan totiempo niman hasta xok uelis toselti tomachtiskej noso tikchiuaskej okseki tlen toTajtsin kineki. w18.11 10 párrs. 7, 8

Ijkuak itlaj nopatla niman nion xtikchiayaj, kanaj toyolkokouaj niman tiajmankamikij (Prov. 12:25). Niman kemantika kanaj hasta xtiuelij tikneltokaj ika nopatlas tonemilis. ¿Tlenon techpaleuis matikpiyakan yolseuilistli ijkuak ijkon topan nochiuas? (Sal. 131:1-3). Ipan yejuin tonaltin, kanaj topan nochiua tlen melak ouijtika. Tla tikixnamiktokej yejon, uelis tikitaskej kenon iyolseuilis toTajtsin kitlajpiya totlamachilis (Filip. 4:6, 7). Ijkon tej, matiknotsakan Jehová ijkuak tikixnamikiskej tlen ouijtika. Kuakon, iyolseuilis toTajtsin techpaleuis matitlaxikokan niman nochipa chikauak matiktekichiuilijtokan toTajtsin. Jehová techyolseuiya ika iespíritu ijkuak techyekana ika tlaxeloltin tlen techpaleuiyaj nochipa matiktekichiuilijtokan. Iespíritu santo toTajtsin uelis kichiuas matinemikan ika yolseuilistli, san ika, noijki uelis kichiuas matiknextikan tlaxeloltin itech Biblia tlen techpaleuis matikasikamatikan tlen ueyi kijtosneki ipan tonemilis (Juan 14:26, 27). w18.10 27 párr. 2; 28 párrs. 5, 8

¿Tlenon melak kintlajyouiltia miyekej tlaltikpakchanejkej? Tlakajkayaualistli. Se tlakajkayaualistli kijtosneki tikijtos itlaj tlen tikmatstok ika xmelauak. Diablo yejua akin kachtopa otekajkayauj. Jesucristo okitokayoti “intaj on yejuan tlakajkayauaj” (Juan 8:44). ¿Kemanon okijto kachtopa tlakajkayaualistli? Yejua otekajkayauj yeuejkaui ipan Xochitlalpan Edén. Adán niman Eva yolpakiyaj ipan yejon kualtsin xochitlalpan tlen toTajtsin okinchijchiuilijka. ToTajtsin okimijlika maka kikuaskej tlakilyotl itech “kojtli tlen tetlalnamiktia” ika san Jehová kinamiki kijtos tlen kuajli niman tlen xkuajli. Tla yejuamej kikuayaj, kuakon, mikiskiaj. Maski Satanás kimatstoya yejuin, yejua okitekitilti se kouatl niman ijkon makijli Eva: “Xnenmikiskej”. Yejon kachtopa tlakajkayaualistli tlen onoijto. Satanás noijki okijto: “Pampa toTajtsin kimatstika ika ijkuak nemejuamej nenkikuaskej, ipan yejon tonajli nemixtlapouiskej niman nemochiuaskej ken toTajtsin, nenkixmatiskej tlen kuajli niman tlen xkuajli” (Gén. 2:15-17; 3:1-5). w18.10 6 párrs. 1, 2

Tla tiknekij tiyolchipaujkej yeskej, noneki machipauak totlamachilis niman maka matikileuikan tlen tsokuiltik. Yejuin melak noneki matikchiuakan tla tiknekij ika Jehová makiyolpakti tlen tikchiuaj ipampa (2 Cor. 4:2; 1 Tim. 1:5). Biblia kijtoua ika nion se tlaltikpakchane xuelis kitas toTajtsin niman ok nemis. Kuakon, ¿tleka okijto Jesús ika akin yolchipaujkej “kitaskej toTajtsin”? (Éx. 33:20). Ipan griego, tlajtojli “tikitas” kijtosneki “tiknemilis, tikasikamatis niman tikixmatis”. Kuakon, akin kitaj toTajtsin, yejuamej kuajli kixmatij niman kipatiojkaitaj ikualneskayouan (Efes. 1:18). Noijki tikitaj toTajtsin ijkuak tikasikamatij tlenon kichiua topampa niman ijkon techpaleuis (Job 42:5). Noijki uelis tikitaskej toTajtsin tla titlanemiliaj ipan yejon tlateochiualistin tlen kinmakas akin nokojtiliaj chipaujkej yeskej niman akin yolmelaujkanemij. w18.09 20 párrs. 13, 15, 16

Jehová techteochiua ijkuak tikchiuaj tlen tikmatstokej ika kuajli. Kema, noneki tomachtiskej niman ijkon titlamachilisejkej yeskej, san ika, xsan noneki miyek tikmatiskej. Tikteititiaj ika titlamachilisejkej ika tlen tikchiuaj. Biblia kijtoua ika hasta tsikamej kiteititiaj tlamachilistli. Kema, yejuamej kiteititiaj tlamachilistli pampa ijkuak xopantlaj kisentlaliaj tlen kikuaskej (Prov. 30:24, 25). Cristo yejua “itlamatkilis Dios” niman nochipa kichiua tlen kiyolpaktia iTaj (1 Cor. 1:24; Juan 8:29). ToTajtsin kimatstok ika xsan noijki kijtosneki tikmatiskej tlenon tikchiuaskej niman melauak tikchiuaskej. ToTajtsin techteochiuas tla tejuamej tiyolyemankej, tla tikteititiaj ika titlamachilisejkej niman tla tikchiuaj tlen tikmatstokej ika kuajli (Mat. 7:21-23). Kuakon, nochipa matitekititokan niman ijkon tinochimej uelis tiktekichiuiliskej Jehová ika yolyemanilistli ipan tlanechikojli. Melauak ika noneki tiempo niman ijyouilistli niman ijkon tikchiuaskej tlen tikmatstokej ika kuajli. San ika, tla tikchiuaj, tikteititiskej ika tiyolyemankej niman tipakiskej ipan yejuin tonaltin niman ika tlayekapan. w18.09 7 párr. 18

Ijkuak Jehová otexchijchiuj, yejua kinekiya matochiuakan itekipanojkauan. Niman maski titlajtlakolejkej, akin tiyolmelaujkanemij itech toTajtsin uelis mojmostla iuan titekitiskej. Se neskayotl, tejuamej titekitij iuan toTajtsin ijkuak titenojnotsaj niman ijkuak titemachtiaj (1 Cor. 3:5-9). Se ueyi tlateochiualistli ika toTajtsin akin nochi ueli kichiua niman akin otexchijchiuj yotechtlapejpeni matikchiuakan yejuin tekitl, tlen melak ueyi kijtosneki. Aman tej, xsan titekitij iuan toTajtsin ijkuak titenojnotsaj. Titekitij iuan toTajtsin ijkuak tikinpaleuiyaj tochanejkauan niman tokniuan, ijkuak kuajli titeseliaj, ijkuak titlapaleuiyaj ipan tekitl tlen kichiua ikalpan toTajtsin ipan nochi tlaltikpaktli niman ijkuak tikchiuaj okseki ipan itekiyo Jehová (Col. 3:23). San ika, noneki matikilnamikikan ika tinochimej titlatlamantikej. Sekimej itiuejueyimej niman sekimej san titelpokamej, sekimej tikualoj niman sekimej ka, sekimej melak tiuelij itlaj tikchiuaj niman sekimej xtiuelij yejon. Melak nopatla tlen tikixnamikij. Kuakon, xkipiya ika tiknemiliskej tla san achijtsin noso miyek tikchiuaj ipampa Jehová ijkuak tikitaj tlen oksekimej kichiuaj. w18.08 23 párrs. 1, 2

Jehová okijli Habacuc ika sa achijtsin poliuiya ika itlaueluan popoliuiskiaj. Kema, toTajtsin kijlitoya Habacuc: “Xtlamachia niman notech xtlaneltoka. Nejua nimitsnankilis maski nesis ika ninouejkaua”. Jehová okilnamikti ika yejua yokitlalijka se tonajli ijkuak kichiuaskia tlen yokijtoka niman okijli matlamachixto. Ijkuak ajsiskia yejon tonajli, teotlajtoketl kuelitaskia tlen nochiuaskia. Tla tikchiaj yejon tonajli ijkuak Jehová techpaleuis niman tla kuajli tijkakij tlen techijlia, kuakon, itech titlaneltokaskej niman tikpiyaskej yolseuilistli maski tikixnamikiskej tlaueltin. Jesús okijto maka san matiknemilijtokan kemanon niman tlen tonajli uelis itlaj panos tla toTajtsin ok xitlaj kijtoua (Hech. 1:7). Matikneltokakan ika Jehová kimatstok kemanon kinamiki nokalaktis. Ika yejon, nochipa matitlaxikokan, matitlamachixtokan ika yolyemanilistli niman tlaneltokijli niman maka matosiaujkauakan. Aman ika xiyejko yejon tonajli, kuajli matiktekitiltikan totiempo niman chikauak matiktekichiuilikan Jehová (Mar. 13:35-37; Gál. 6:9). w18.11 16 párrs. 13, 14

Pedro okimachtijkej ika akin xjudíos, xchipaujkej katkaj niman yejua nochipa ijkon okineltokak. San ika, kemach ipan yopanoka seki tlemach tlen okichiuj makipatla ken tlanemiliaya. Se neskayotl, okitak se tlatlachalistli (Hech. 10:9-16). Ijkon ken Pedro, kipiya ika toixtlaloskej niman tikinkakiskej oksekimej tla techijliaj ika ok titechikoitaj. ¿Tlenon okse tlemach uelis tikchiuaskej? Tla titetlasojtlaj ika nochi toyojlo, xok titechikoitaskej (2 Cor. 6:11-13). ¿San tiknekij tosentlaliskej imiuan akin noijki tlajtouaj ken tejuamej noso akin ualeuaj kampa tejuamej tiualeuaj? Tla ijkon tikchiuaj, matikyejyekokan noijki tosentlaliskej imiuan tokniuan akin oksekan ualeuaj niman tlamantikej. Uelis tikinnotsaskej touan matenojnotsakan, touan matlakuakan noso touan manosentlalikan (Hech. 16:14, 15, TNM). Ika yolik, ueyiyas totlasojtlalis niman xok titechikoitaskej. Aman matikitakan okse tlemach tlen uelis kichiuas matitechikoitakan san ipampa tlen tikitaj. w18.08 9 párrs. 3, 6; 10 párr. 7

Sekimej Teixpantijkej kichiuaj seki tlemach tlen kiteititia ika xnokojtiliaj kimapeuaskej tlen xkuajli nochiua ipan tlaltikpaktli. Se neskayotl, ijkuak yauej ipan se iluitl, nijtotiaj niman kichiuaj tlen xkipiya kichiuaskej akin kitekichiuiliaj toTajtsin. Kitlaliaj ipan redes sociales intlaixkopinaluan niman kijtouaj tlen xkijtoskiaj akin chikauak intlaneltokil. Kuakon, uelis kimijtlakoskej akin nokojtiliaj nemiskej ken kitlajtlani Jehová (1 Ped. 2:11, 12). Yejuin tlaltikpaktli kichiua ika manotejtemo “on xkuajli eleuilistli yejuan tonakayo kipia, niman on tlen xkuajli yejuan tikixpakaitaj, niman nochi on tlajtlamach tlen tikpiaj yejuan kichiua para yejua ika ma titoueyimatikan” (1 Juan 2:16). San ika, tejuamej tiiyaxkauan Jehová, niman yejua technauatia “ma tikajkauakan nochi tlen xkuajli niman nochi eleuilistli yejuan onkaj ipan in tlaltikpaktli”, niman noijki “techmachtia ma titonauatikan kuajli, ma tiyolmelajkanemikan niman ma tiyeknemikan ipan in tlaltikpaktli” (Tito 2:12). Nochi tlen tikchiuaj ipan tonemilis, ken titlajtouaj, ken titlakuaj niman ken titlaonij, ken totlakentiaj niman ken tokualnextiaj, niman ken titekitij, kipiya ika kuajli kimititis akin techitaj ika yemelak yotosentemakakej itech Jehová. w18.07 25 párrs. 13, 14

Tla nochipa tikonitstokej Jehová, xtijkauiliskej ika tlen kichiuaj oksekimej matechajmankamikti noso makijtlako ken touikaj iuan Jehová. Yejuin melak noneki kuajli makimatstokan akin tlayekanaj ipan ikalpan toTajtsin, ijkon ken Moisés. Melauak ika tinochimej noneki tokojtiliskej tiktlakamatiskej Jehová niman ijkon timakisaskej (Filip. 2:12). Tla tikpiyaj se tekitl ipan ikalpan toTajtsin, noijki miyek notlajtlanis totech (Luc. 12:48). Tla yemelak tiktlasojtlaj Jehová, xitlaj uelis techxelos itech “itetlajsojtlalis Dios” (Sal. 119:165; Rom. 8:37-39). Ipan yejuin ouijtika tonaltin, kuajli matikonitstokan akin yeuatika ipan itrono ne iluikak niman ijkon uelis tikmatiskej tlenon kineki matikchiuakan (Sal. 123:1). Maka keman tijkauiliskej ika tlen kichiuaj oksekimej makijtlako ken touikaj iuan toTajtsin. w18.07 16 párrs. 19, 20

Melak techyolpaktia tikmatiskej ika ikalpan Jehová ueyixtiuj. Niman tikmatij ika yejuin kiteititia ika itekipanojkauan toTajtsin kipetlanaltijtokej intlauil. Ipan 2017, otikiminmachtijkej itech Biblia ipantsin majtlaktli millones tlaltikpakchanejkej. Noijki, millones akin kuelitaj kikakiskej iTlajtol toTajtsin touan onosentlalijkej ijkuak otikilnamijkej imikilis Cristo, niman ouelkej kenon toTajtsin melak otechtlasojtlak ijkuak okitemakak iKoneuj niman ijkon techmakixtis (1 Juan 4:9). Akin tinemij ipan ikalpan Jehová titlajtouaj melak miyek tlajtoltin. San ika, yejuin xtechteltia san sekan matikueyichiuakan toTajtsin iluikakchane (Apoc. 7:9). Maski san katlejua tlajtojli matitlajtokan noso maski san kanon matichantikan, uelis tipetlaniskej intlajkotian tlakamej (Filip. 2:15). Ken ueyixtiuj ikalpan Jehová, ken san sekan touikaj niman ika titlatlachixtokej kichiua matikueyichiuakan Jehová. w18.06 21 párrs. 1-3

Jesús xokikajkauj tlen kijtojtoya, ika yejon, nion xokinek otlakua. Tlajtos itech tlen kichiuas iTaj niman tenojnotsas kentla itlakual katkaj, kinnojnotsayaj nochimej, maski se siuatl akin samaritana katka (Juan 4:32-34). Santiago niman Juan xokasikamatkej tlen Jesús kinmachtisnekiya. Ijkuak inomachtijkauan kistinemiyaj iuan Jesús ipan ueyikalpan Samaria, okitejtemojkej noseuiskej yejon yeuajli ipan se pitentsin kalpan. San ika, samaritanos xokinejkej kinseliskej, kuakon, Santiago niman Juan okijtokej tla ueliskiaj kitlajtlaniskej mauajtemo tlitl itech iluikak niman ijkon makipopolo yejon pitentsin kalpan. San ika, Jesús chikauak okinmelajkatlali (Luc. 9:51-56). Tla Santiago niman Juan kinchiuiliskiaj yejon ipan Galilea, kampa yejuamej ualeuayaj, ¿kanaj ijkon kualaniskiaj? Kanaj tlen xkuajli kinemiliayaj itech oksekimej okichiuj melak makualanikan. Sakin, Juan, itlatitlankauj Cristo, okinnojnotsato samaritanos niman miyekej okikakej. Kanaj opinauj ijkuak okilnamik tlen okitlajtlanilijka Jesús (Hech. 8:14, 25). w18.06 10, 11 párrs. 12, 13

Tla nochipa titlajkosalijtokej “ika on tlen melauak” itech Biblia, kuakon tikchiuaskej tlen techmachtia niman nochipa tikijtoskej tlen melauak. ¿Tleka xkipiya titekajkayauaskej? Pampa Satanás yejon tlen melak kuajli kitekitiltia. Akin tekajkayaua sa no yejua noijtlakoua niman noijki kimijtlakoua oksekimej (Juan 8:44). Ika yejon, maski titlajtlakolejkej, tikchiuaj nochi tlen tiuelij niman ijkon xkeman titekajkayauaskej (Efes. 4:25). Niman melauak ika kemantika ouijtika tikchiuas. Abigail, akin kipiya 18 xiuitl, kijtoua: “Kanaj xnochipa tikitas ika tepaleui tikijtos tlen melauak, pampa kemantika tla titekajkayaua uelis mitspaleuis ijkuak xok tikmatis tlenon tikchiuas”. Kuakon, ¿tleka xtitekajkayauaj? Victoria, se ichpochtli akin kipiya 23 xiuitl, techijlia: “Ijkuak tikijtoua niman tikmanauiya tlen melauak, uelis san tlemach mitschiuiliskej. San ika, melak miyek tlateochiualistin tikinpiyas: uelis melak motech titlaneltokas, melak nisiuj timomachilis itech Jehová, niman akin mitstlasojtlaj mitstlakaitaskej”. Kuajli tikmatstokej ika melak mitspaleuis tla nochipa kuajli titlajkosalijtika ika cinturón itech tlen melauak. w18.05 28 párrs. 3, 5

Noneki melak titlatlachixtoskej pampa tlen ouijtika tikixnamikij aman ok melak ijtlakaujtias. ToTajtsin kichiuas tlen yokijto ijkuak nonekis (Mat. 24:42-44). Ika yejon, noneki ika aman matitlamachixtokan niman nochipa matitlatlachixtokan. Mojmostla matikpouakan iTlajtol toTajtsin niman nochipa matikchiuakan teoyotl (1 Ped. 4:7). Matikchiuakan ijkon ken kichiuaj tokniuan akin tlatlatlachixtokej niman kipetlanaltitokej intlauil. Ipan toamatlajkuiloluan uelis tomachtiskej itech yejuin tokniuan. Melak matitekichiujtokan ipan itekiyo Jehová, matikchiuakan tlen kuajli inpampa oksekimej niman matikintlajpalotij tokniuan. Ijkon, melak tipakiskej niman xtikmachiliskej kenon panotiuej tonaltin (Efes. 5:16). Maski miyekpa topopolouaj, Jehová techkauilia matiktekichiuilikan. Niman, pampa kineki matitlatlachixtokan niman matiktekichiuilijtokan, techmaka “tetlayokoliltin”, yejuin kijtosneki, tlayekankej (Efes. 4:8, 11, 12). Ika yejon, ijkuak techontlajpalos se tlayekanketl, kuajli matijkakikan niman matopaleuikan itech tlen techijlia. w18.06 24, 25 párrs. 15-18

Jesús xokimijli inomachtijkauan san manemikan itech itlasojtlalis, okimijli ompa manentokan. ¿Tleka? Pampa akin kitokaskiaj nonekiskia tlaxikoskej nochi xiujtin niman ijkon nemiskej ken akin yemelak kichiuaj ken Cristo. Jesús kuajli okiteititi ika noneki titlaxikoskej ijkuak miyekpa okitekitilti tlajtojli xnentokan ipan Juan 15:4-10. ¿Kenon tikteititiaj ika tiknekij tinentoskej itech itlasojtlalis Cristo niman tiknekij matechseli? Tla tiktlakamatij itlanauatiluan. Yejuin kijtosneki ika Jesús techtlajtlanilia matiktlakamatikan. San ika, san techtlajtlanilia tlen yejua noijki kichiua, pampa noijki okijto: “Ijkon ken nejua yoniktlakamat itlanauatiluan noTaj niman ninentika itech itlasojtlalis”. Kuajli nestika ika yejua otechititi kenon tikchiuaskej (Juan 13:15, TNM). Ijkuak tikchiuaj tlen Jesús otechnauati ika matitenojnotsatij, noijki tikititiaj toTajtsin ika tiktlasojtlaj. ¿Tleka? Pampa tlen Cristo techtlajtlanilia sa noijki tlen kitlajtlani iTaj (Mat. 17:5; Juan 8:28, TNM). Pampa tikintlasojtlaj, Jehová niman Jesús noijki xkikajkauaj ika techtlasojtlaj. w18.05 18, 19 párrs. 5-7

Ijkuak titelpochtli, noneki tiktlapejpenis tlenon timomachtis, kanon titekitis niman okseki ken yejuin. Tla kuajli tikmatstika tlenon tikneki ipan monemilis, kuakon xouijtika tikitas tiktlapejpenis tlenon tikchiuas. Tla nimantsin tiknemilia tlenon tikchiuas niman tiktejtemoua tikchiuas tlen kuajli, kuakon nimantsin tikselis tlateochiualistin. Ipan tlanechikoltin tlen onka nochiuiyan ipan tlaltikpaktli, nemij melak miyekej telpokamej akin kinnamiki matikimijlikan ika kuajli kichiuaj pampa kitekichiuiliaj Jehová ika nochi inyojlo niman kitejtemojtokej kenon chikauak kitekichiuiliskej. Yejuamej noijki melak yolpakij ipan innemilis. San ika, noijki youelkej ika noneki kikauiliskej Jehová makinyekana itech nochi tlen kinekij kichiuaskej niman itech ken nemiskej iuan ichanejkauan. Tekiuaj Salomón oteyolchikauj: “Xtlaneltoka itech Jehová ika nochi moyojlo”. Niman noijki okijto: “Itech nochi moojuiuan xkauili mamitsyekana, niman yejua mitspaleuis xyolmelaujkanemi” (Prov. 3:5, 6). Jehová melak kinpatiojkaita telpokamej akin kichiuaj ken Cristo. Yejua melak kintlasojtla, niman ika yejon, kintlajpiya, kinyekana niman kinteochiua. w18.04 26 párr. 7; 27 párr. 9

Apóstol Juan okinyekan tokniuan ipan tlanechikojli ipan kachtopa siglo. Nochi tlen okijkuilo itech ken otenojnots Jesús yokinyolchikauj itech miyek xiujtin akin kichiuaj ken Cristo niman ok techyolchikaua. Se neskayotl, evangelio tlen yejua okijkuilo san ompa ijkuiliujtika ika Jesús okijto ika tlasojtlalistli se kualneskayotl tlen kinneskayotiskia akin yemelak inomachtijkauan (Juan 13:35). Yeyi amatlajkuiloltin tlen okimijkuilo kuajkui tlamachtiltin tlen melak techpaleuiyaj. Se neskayotl, ijkuak tikmachiliaj ika xtlaj ika titepaleuiyaj pampa miyek ken otopopolojkej, ¿xmelak ika techyolseuiya tikmatiskej ika iyesyo tlen topampa okitemakak Jesús “techchipauilia nochi totlajtlakoluan”? (1 Juan 1:7). Niman tla toyojlo nochipa techtlajtlakolmakatika, ¿xmelak ika ajsi ipan toyojlo tikmatiskej ika “Dios más nochi kimati xken toyojlo”? (1 Juan 3:19, 20). Juan san yejua akin okijkuilo ika “Dios yejua tetlajsojtlalistli” (1 Juan 4:8, 16). Niman ipan ika ome niman ika yeyi iamatlajkuilol kimijlia ika kuajli kichiuaj tokniuan akin “kitlakamatij on temachtijli yejuan melauak” (2 Juan 4; 3 Juan 3, 4). w18.04 18 párrs. 14, 15