Diciembre

Jesús ueli techasikamati akin titlajtlakolejkej ijkuak tikixnamikij miyek tlauejli, niman yejon melak kualtsin tlen kichiua. Ijkuak onen ipan tlaltikpaktli opak imiuan akin pakiyaj niman ochokak imiuan akin chokayaj (Rom. 12:15). Se neskayotl, ijkuak 70 inomachtijkauan onokuepkej, melak pakiyaj pampa melak kuajli okinkakej kampa otenojnotsatoj, niman “Espíritu Santo sanoyej okipaktij Jesús” (Luc. 10:17-21). Noijki, ijkuak omik Lázaro okimitak ika akin kitlasojtlayaj melak najmanayaj, niman yejua noijki “sanoyej onajman” (Juan 11:33). Maski Jesús xtlajtlakole katka, yejua melak okimasikamat niman okimikneli akin tlajtlakolejkej. ¿Tleka ijkon okichiuj? Pampa tetlasojtla. Yejua melak kintlasojtlaya tlaltikpakchanejkej (Prov. 8:31). Pampa ijkon okimachili, okichiuj makineki kimasikamatis kenon tlanemiliaj. Apóstol Juan kijtoua: “Kimatstikatka tlinon onkaj ipan inyojlo on tlakamej” (Juan 2:25). w19.03 20 párrs. 1, 2

Satanás okikuili Job nochi tlen kipiaya: itomin, itlakeualuan niman tlen kuajli kinemiliayaj itech. Noijki okinmiktili majtlaktli ikoneuan akin melak kintlasojtlaya. Sakin, okichiuj ika ipan nochi itlalnakayo makinpiya uejueyimej tsotsomej. Pampa melak najmanaya niman noyolkokouaya, isiuauj okijli maka sa matlajyouijto, makiuijuikalti toTajtsin niman mamiki. Job okinek mikis, san ika, oyolmelajkanen. Kuakon, Satanás sejneka okitlatlatak. Okitekitilti yeyimej akin iuan nouikaya Job, okitlajpalotoj seki tonaltin, san ika, nion xokiyolchikaujkej. Yejuamej san okitlatlakakitijkej niman san okitejteneujkej. Okijlikej ika toTajtsin kitlajyouiltijtoya niman ika toTajtsin nion xkajmanaya tla yolmelajkanemi noso ka. Hasta okijlikej ika yejua xkuajli tlen kichiuaya niman ika kinamikiya nochi tlen ipan nochiujtoya (Job 1:13-22; 2:7-11; 15:4, 5; 22:3-6; 25:4-6). w19.02 4 párrs. 7, 8

Seki tlen techmojtia, techpaleuiya. Pampa melak kuajli tla tomojtiaj xtikchiuaskej tlen xkuelita Jehová. Tla Adán niman Eva nomojtiskiaj kichiuaskej tlen xkuajli, kitlakamatiskiaj Jehová. San ika, pampa xokichiujkej, oixtlapojkej, kijtosneki, kuajli okasikamatkej ika tlajtlakolejkej katkaj niman ika kinpanoltiliskiaj inkoneuan tlajtlakojli niman mikilistli. Pampa okitakej noso okasikamatkej ika tlen okichiujkej xkuajli katka, opinaujkej pampa xkipiayaj intlaken niman onotlapachojkej (Gén. 3:7, 21). Melak kuajli tla techmojtia tikyolkokoskej Jehová. San ika, maka matikmakasikan mikilistli. ¿Tleka? Pampa toTajtsin yotechmakak itlaj tlen techpaleuis matinemikan nochipa. Tla titlajtlakouaj niman toyolkuepaj ika nochi toyojlo, yejua techtlapopoluis pampa titlaneltokaj ika ikoneuj omik topampa. Tikititiskej ika titlaneltokaj itech, tla tosentemakaj niman toapolaktiaj (1 Ped. 3:21). w19.03 5, 6 párrs. 12, 13

Israelitas kipiayaj melak miyek tlen ika tetlasojkamachiliskiaj. Jehová yokintlajyouiltijka egipcios niman ijkon kimakixtis ikalpan. Niman noijki yokimakixtijka ikalpan ijkuak okinmikti soldados egipcios ipan mar Rojo. Yejuamej okitlasojkamachilijkej toTajtsin ika se tlakuikajli. San ika ¿kech ouejkauj okiteititijkej ika tetlasojkamachiliayaj? Ijkuak okixnamijkej tlen ouijtika, okilkaujkej tlen toTajtsin okichiujka inpampa niman okiteititijkej ika xtetlasojkamachiliayaj (Sal. 106:7). Biblia kijtoua ika israelitas “opejkej tlamach kijliaj Moisés niman Aarón”, kijtosnekiya ika kitejteneujtoyaj Jehová (Éx. 16:2, 8). Jehová melak okiyolkoko yejon niman sakin okijto ika nochimej mikiskiaj ipan tlaluaktli, sa Josué niman Caleb makisaskiaj (Núm. 14:22-24). w19.02 17 párrs. 12, 13

Jesús xokichiuj se tlakuajli ika miyek tlemach pampa kinekiya ika oksekimej makiueyiteneuakan. Ka, okimijli inomachtijkauan makilnamikikan san sejpa ipan se xiuitl niman ika xmiyek nonekiya, okimijli makichiuakan ijkon ken noneki (Juan 13:15; 1 Cor. 11:23-25). Ijkon okiteititi ika xnoueyimatiya. Melak techyolpaktia ika toTekiuaj iluikakchane melak yolyemanki (Filip. 2:5-8, TNM). ¿Kenon uelis tiyolyemankej yeskej ken Jesús? Ijkuak tikitaj tlenon kinpoloua oksekimej niman sakin tlen tejuamej techpoloua (Filip. 2:3, 4). Matikilnamikikan tlenon okichiuj Jesús ijkuak sa achijtsin poliuiya ika kimiktiskiaj. Maski kimatstoya ika melak tlajyouiskia ijkuak kimiktiskej, melak onajman inpampa tlen kimachiliayaj inomachtijkauan. Yejua ika, ipan yejon yeuajli, opeuj kinmachtia, kinyolchikaua niman kinyolseuiya (Juan 14:25-31). Okiteititi ika melak najmanaya inpampa oksekimej xijkon ken itech. Melak kuajli techmachtia kenon tiyolyemankej yeskej. w19.01 21 párrs. 5, 6

¿Melak timomojtia ijkuak tiknemilia timomateketsas ipan tlanechikojli? Tla kema, xsan tejua ijkon timomachilia. Timiyekej tomojtiaj ijkuak titlanankiliaj. Kuajli tla tikmachilia yejon, pampa kijtosneki ika tiyolyemanki niman ika tikimita oksekimej uejueyixtokej xijkon ken tejua. Niman Jehová melak kuelita ijkuak se yolyemanki (Sal. 138:6; Filip. 2:3). San ika, Jehová noijki kineki ika xueyichiua niman xkinyolchikaua mokniuan ipan tlanechikoltin (1 Tes. 5:11). Yejua mitstlasojtla niman tla mitspoloua, mitsyolchikauas. Matikitakan seki itlajtolyekanalisuan Biblia. ITlajtol toTajtsin techilnamiktia ika tinochimej topopolouaj ijkuak titlajtouaj (Sant. 3:2). Jehová kimatstika ika topopolouanij niman tokniuan noijki kimatstokej yejon (Sal. 103:12-14). Yejuamej tochanejkauan akin nemij ipan ikalpan toTajtsin niman techtlasojtlaj (Mar. 10:29, 30; Juan 13:35). Kasikamatij ika kemantika xtikijtouaj ijkon ken tiknekiskiaj. w19.01 8 párr. 3; 10, 11 párrs. 10, 11

Ipan yejuin tonaltin ouijtika ijkon tikchiuas, san ika, kema uelis tikchiuas. Jehová kineki xyolpaki niman xnemi ika moyojlo. Ika itlapaleuilis Jehová, uelis kuajli tonkisas ipan monemilis, niman xsan aman ika titelpochtli noijki ijkuak tiueyiyas. Matitlajtokan itech tlenon okinpaleui israelitas niman ijkon makinotlatkitikan Tlajli tlen yokimijlikaj kinmakaskiaj. Ijkuak israelitas ikalakiskiaj ipan yejon Tlajli, toTajtsin xokinnauatij mauelikan kuajli mateixnamikikan noso mateuisokikan (Deut. 28:1, 2). Yejua okimijli makichiuakan tlen kinnauatiaya niman itech matlaneltokakan (Jos. 1:7-9). Kanaj miyekej tlaltikpakchanejkej kinemiliskiaj ika yejuin xtepaleuiskia. San ika, yejon melak okinpaleui, pampa miyekpa okintlankej cananeos ika itlapaleuilis Jehová (Jos. 24:11-13). Kema, noneki titlaneltokaskej niman ijkon uelis tiktlakamatiskej toTajtsin. Tla tikpiyaj yejon tlaneltokijli, nochipa kuajli tonkisaskej. Yeuejkaui niman aman, yonoitak ika yejuin melauak. w18.12 25 párrs. 3, 4

Ipan yejuin tonajli, sekimej yokikaujkej tlen melauak pampa xokuelitakej kenon onoijto ika noneki nasikamatis se tlaxelojli itech Biblia. Oksekimej kanaj okineltokakej tlen kijtouaj akin kixnamikij tlen melauak noso akin xkuelitaj tlen tikneltokaj. Ika yejon, sekimej yokikaujkej Jehová niman tlanechikojli (Heb. 3:12-14). Melak kuajli yeskia tla nochipa tlaneltokatoskiaj itech Jesús ijkon ken okichiuj Pedro, itlatitlankauj Cristo. Oksekimej ika yolik okikaujtiakej tlen melauak, kanaj nion xokitakej ika ijkon inpan nochiujtoya. Akin ika yolik kikaujtiuej tlen melauak yeskiaj kentla se barco tlen yolik kitlalkauijtiuj itempan mar. Biblia kijtoua ika yejuamej kipolouaj “on ojtli” (Heb. 2:1). Yejuamej, kanaj xkinemilijtoyaj kikauaskej tlen melauak, san ika, ika yolik okikajkaujtiajkej ika nouikaj iuan Jehová, niman sakin, kuajli okitlalkauijkej. w18.11 9 párrs. 5, 6

¿Tikuelitaskiaj matechmachtikan niman ijkon chikauak tiktekichiuiliskej Jehová? Kuakon, kanaj uelis tiaskej ipan Tlamachtijli tlen kiseliaj Akin Tenojnotsaj itech iTekiuajyo toTajtsin. Ipan yejuin tlamachtijli, kinmachtiaj tokniuan akin chikauak kitekichiuilijtokej Jehová niman ijkon ikalpan toTajtsin uelis melak kintekitiltis. Akin kinekij kiseliskej yejuin tlamachtijli noneki kinektoskej yaskej maski san kanon kintitlaniskej ijkuak tlamiskej intlamachtil. ¿Tikuelitaskiaj tiaskej niman noijki ijkon tiktekichiuiliskej Jehová? (1 Cor. 9:23). Pampa tiitekipanojkauan Jehová, tejuamej tiktemakaj tlen tikpiyaj, tikchiuaj tlen kuajli, titeikneliaj niman titetlasojtlaj. Mojmostla tikitaj kenon titepaleuiskej. Nochi yejuin kichiua matipakikan niman matiyolseujtokan (Gál. 5:22, 23, TNM). Maski melak nopatla tlen toseselti tikixnamikij, uelis melak tipakiskej tla tikuelitaj tiktemakaskej ijkon ken Jehová niman tla nochipa iuan titekitij (Prov. 3:9, 10). w18.08 27 párrs. 16-18

Kanaj yakaj uelis tetlajtoltis: “¿Onka itlaj tlen makikauili se tokniuj makikaua ixnamik niman oksejpa manonamikti?”. Jesús kuajli okijto tlenon kinemiliaya ijkuak yakaj kikaua ixnamik: “San akinon yejuan noxotonis iuan isiuau niman nonamiktis iuan okse siuatl, yejua siuapajpatla. Yejua tlajtlakoua itech ika on achtoj isiuau. Niman no tla se siuatl noxotonis iuan iueuentsin, niman nonamiktis iuan okse tlakatl, yejua tlakapajpatla” (Mar. 10:11, 12; Luc. 16:18). Kuajli nesi ika Jesús kitlakaitaya namiktilistli niman kinekiya ika oksekimej noijki ijkon makichiuakan. Akin kikauaya ixnamik, maski nion xkikajkayauaya, niman iuan okse nonamiktiaya, kuakon, kichiujtoya auilnemilistli. Yejuin ijkon pampa ixpan toTajtsin, xtlami namiktilistli ijkuak yakaj kikaua ixnamik. Yejua kita ika “on omemej” ok san “se tlalnakayotl”. Noijki Jesús okijto ika tla yakaj kikauaya isiuauj, yejon isiuauj ueliskia auilnemis. ¿Tleka? Pampa ipan yejon tonajli siuatl akin yokikaujkej kinekiskia oksejpa nonamiktis niman ijkon kipiyas tlen kipoloua. Niman tla yejua oksejpa nonamiktiaya, kuakon, kichiujtoskia auilnemilistli. w18.12 11 párrs. 8, 9

Habacuc melak okipaleui ken ononojnots iuan Jehová pampa okichiuj makipiya yolseuilistli. Kuakon, yejua kuajli okijto ika kichiaskia yejon tonajli ijkuak toTajtsin kipaleuiskia. Yejon xsan itlaj tlen okimachilijtiuets pampa sakin okimelajkaijto: “Ika yolseuilistli nikchia mayejko tonajli ijkuak onias tlajyouilistli” (Hab. 3:16). ¿Tlenon tiuelij itech tlen okichiuj Habacuc? Kachtopa, ika nochipa noneki tikchiuiliskej teoyotl Jehová, maski san tlenon tikixnamiktoskej. Ika ome, ika noneki tijkakiskej tlen techijlia Jehová ipan iTlajtol niman itechkopa ikalpan. Ika yeyi, ika noneki titlamachiaskej itech Jehová, noneki tikneltokaskej ika ijkuak nonekis, kipopolos tlen kichiua matitlajyouikan. Tla tikchiuaj nochi yejuin, tikpiyaskej yolseuilistli tlen techpaleuis matitlaxikokan ijkon ken Habacuc. Tlen tikchiaj manochiua tlayekapan techpaleuis matitlamachiakan, niman yejuin kichiuas matinemikan ika toyojlo maski tikpiyaskej tlaueltin. Noijki, tlen tikchiaj manochiua techpaleuis matikneltokakan ika toTajtsin iluikakchane techpaleuis (Rom. 12:12). w18.11 15, 16 párrs. 11, 12

Matikitakan tlenon noneki tiknemiliskej itech tikintlajkaliskej oksekimej, kijtosneki, tikchiuaskej ika oksekimej matlajtlakokan noso makikajkauakan ika kitekichiuiliaj Jehová. ¿Tlenon kinemilia Jehová itech yejuin? Jesús okijto: “San akinon yejuan kitlajkalis ipan tlajtlakojli semej yejuamej in pipitikej yejuan nechneltoka kiselis iueyi tlauel Dios. Más kuajli yeskia, ijkuak xe kichiua on tlajtlakojli, ikechtlan kipilouiliskiaj se tetl yejuan imetl on molino, niman kontlajkaliskiaj ne ipan on mar” (Mar. 9:42). Kuajli nesi ika Jesús kita ika melak xkuajli tikintlajkalis oksekimej. Niman, pampa Jesús kichiua ken itaj, kuajli tikmatstokej ika Jehová noijki ijkon kita ijkuak yakaj xkajmana ika uelis tetlajkalis ipampa tlen kichiua (Juan 14:9). ¿Titlanemiliaj ijkon ken Jehová niman Jesús? ¿Tlenon tikteititiaj ika tlen tikchiuaj? Matiknemilikan ika ken tikuelitaj totlakentiskej noso ken tokualnextiaj kichiua ika sekimej tokniuan maka kuajli manomachilikan noso kichiua ika makinemilikan tlen xkuajli. ¿Tlenon tikchiuaskej? ¿Techmapeuas tlasojtlalistli tlen tikmachiliaj inpampa maka matotlakentikan ken tikuelitaj? w18.11 24, 25 párrs. 9, 10

¿Tleka melak noneki ika tinochimej matiyolmelajkanemikan? Pampa Satanás yokixnamik Jehová niman noijki yotechixnamik. Yejon xkuajli iluikaktekitketl okitsojkuiloti itokayo Jehová. Oteasikamachilti ika toTajtsin xkuajli ken tlayekana, san itech tlanemilia niman xmelajki noyekana. Teajman ika Adán niman Eva okipaleuijkej Satanás niman okixnamijkej toTajtsin (Gén. 3:1-6). Ijkuak nemiyaj Edén, miyekpa ueliskiaj kichikauaskej intlasojtlalis tlen kimachiliayaj itech Jehová. San ika, ijkuak Satanás oteixnamik, tlasojtlalistli tlen yejuamej kimachiliayaj itech Jehová xok sentetl katka. Ika tlayekapan, ijkuak nemiya Job, onoijto yejuin: ¿Nemiskiaj akin mayolmelajkanemikan itech Jehová pampa kitlasojtlaj? Kijtosneki, ¿tlaltikpakchanejkej ueliskej yolmelajkanemiskej? (Job 1:8-11). Tikmatstokej ika tlajtlakole katka niman nopopolouaya, ijkon ken tejuamej. San ika, toTajtsin kitlasojtlaya pampa yolmelajkanemiya. w19.02 3, 4 párrs. 6, 7

Jesús okinek kiteititis kenon miyekej melak kipatiojkaitaj tlen melauak itech iTekiuajyo toTajtsin. Ika yejon, yejua okiteneuj se tlakatl akin kitejtemojtinemiya “on perlas”. Ijkuak kinextia “se yejuan sanoyej patioj”, nimantsin yauj niman “kinamaka nochi tlen kipia” niman ijkon kikouas (Mat. 13:45, 46). Noijki ijkon, tejuamej melak tikpatiojkaitaj tlen melauak itech iTekiuajyo toTajtsin niman okseki tlamachtiltin itech Biblia. Nimantsin tijkauaj okseki tlemach niman ijkon tikpiyaskej nochi yejon. Tla nochipa tikpatiojkaitaj, xkeman tiknemakaskej (Prov. 23:23). San ika, teajman ika sekimej itekipanojkauan toTajtsin xok kipatiojkaitaj tlen melauak niman hasta yokikaujkej. ¡Maka keman ijkon matikchiuakan! Noneki tikchiuaskej tlen technauatia Biblia kampa techijlia matinejnemikan ipan tlen melauak (3 Juan 2-4). Yejuin kijtosneki ika noneki kachtopa tikchiuaskej tlen melauak niman noneki tikteititiskej ipan tonemilis ika tiktlakamatij. w18.11 9 párr. 3

Jehová noijki okimijli maka kixnamikiskej Jericó. Yejuamej nonekiya kiyeualoskej yejon ueyi kalpan san sejpa ipan se tonajli, niman yejon nonekiya kichiuaskej chikuasen tonajli. Niman ipan tonajli chikome, nonekiya kiyeualoskej chikometipan. Kanaj akin tlaixnamikiyaj kinemiliayaj ika tla ijkon kichiuayaj kipoloskiaj tiempo niman siauiskiaj. San ika, toTajtsin Jehová, akin kiyekanaya kalpan Israel, kuajli kimatstoya tlen kichiujtoya. Nochi yejon tlen opanok okichiuj ika israelitas melak matlaneltokakan itech Jehová, niman yejuamej xok ononek kimixnamikiskej akin tlauijsokiyaj ipampa Jericó (Jos. 6:2-5). ¿Tlenon tiuelij itech yejuin tlen opanok yeuejkaui? Ikalpan toTajtsin kemantika kipatla ken nochiua itlaj, niman kanaj xtikasikamatij tleka. Matiknemilikan yejuin, kanaj yeuejkaui xtikasikamatiyaj tleka ikalpan toTajtsin otechijlika ika uelis tiktekitiltiskej tocelular noso totableta niman ijkon ika tomachtiskej, ika titenojnotsaskej niman ika uelis tijkuiskej ipan tlanechikoltin. San ika, kanaj aman tikitaj ika melak techpaleuiya ika ijkon tikchiuaj. Ijkuak tikitaj tlenon kualtsin panoua ijkuak itlaj nopatla, kuakon, totlaneltokil chikaui niman melak kuajli touikaj imiuan oksekimej tokniuan. w18.10 23 párrs. 8, 9

Pampa miyek nochiaya itech Mesías, galileos melak kinekiyaj ika Jesús manochiua intekiuaj. Uelis tiknemiliskej ika kitayaj ken se kuajli tlayekanketl: yejua kuajli tlajtouaya teixpan niman kipiaya kojtilistli tlen ika kinpajtiaya akin kualouayaj niman hasta kintlakualtiaya akin apismikiyaj. Ijkuak yokintlakualtijka kanaj 5,000 tlakamej, okitak ika “kinekiyaj kiteuilanaskej para kitlaliskej inrey”, kuakon “onejkuanij niman iselti oyaj ne ipan on tepetl” (Juan 6:10-15). Uajmostla, ipan okse itenko mar tlen onka Galilea, kanaj xok melak kinekiyaj kichiuaskej tlen yokinemilijkaj. Kuakon, Jesús okimijli nochimej akin ompa nemiyaj ika yejua ouajlaka ipan tlaltikpaktli pampa okinpaleuiko ipan intlaneltokil, xokinmakako tlen kinpolouaya ipan innemilis. Okimijli: “Ma ka xtekitikan ika on tlakuajli yejuan saniman tlami, yej xtekitikan ika on tlakuajli yejuan kisa itech Dios yejuan kitemaka nemilistli para nochipa” (Juan 6:25-27). w18.06 4 párrs. 4, 5

Jesús kimasikamatiya akin nomachiliayaj kentla se akatl tlen yokuelpachiuj noso kentla ikuayekatsin ikpatl tlen kitlaliaj ipan se lámpara niman tlen iseujtika. Ika yejon, yejua okimasikamat, kualtsin okiminnots niman okiteititi ijyouilistli (Mar. 10:14). Yemelak, tejuamej xtiuelij titeasikamatij niman titemachtiaj ijkon ken Jesús. San ika, kema uelis tikimasikamatiskej akin tikinnojnotsaj itech toTajtsin. Matikitakan kenon uelis tikinnojnotsaskej, kemanon uelis tikomintlajpaloskej niman kech noneki tiuejkauiskej. Ipan yejuin tonaltin, akin kipiyaj tomin, akin tekitij ipan política niman akin tlayekanaj ipan tlaneltokiltin melak tekajkayauaj niman tetlajyouiltiaj. Ika yejon, miyekej tlaltikpakchanejkej najmanaj niman kimachiliaj ika san yokinkaujkej (Mat. 9:36). Miyekej tlaltikpakchanejkej xok yakaj itech tlaneltokaj niman kimachiliaj ika xkeman itlaj kualtsin inpan panos. Ika yejon, noneki matikitakan kenon tikinnojnotsaskej niman tlenon tikimijliskej. Noneki tikteititiskej ika titetlasojtlaj niman ika titeikneliaj. Miyekej xsan techkakij pampa kuajli tikixmatstokej Biblia, noijki techkakij pampa kitaj ika tikintlakaitaj niman ika yemelak tiknekij tikinpaleuiskej. w18.09 31 párrs. 13, 14

¿Kenon tikteititiaj ika tiknekij tikixmatiskej toTajtsin niman ika tiknekij matechyekana? Tikteititiaj yejon ijkuak tomachtiaj Biblia, ijkuak tiktlakamatij itlanauatiluan niman ijkuak kachtopa tikchiuaj ipan tonemilis tlen yejua kineki. Tla tikchiuaj yejuin, tiyolpakiskej niman kuajli tikmatstoskej ika kichiuas tlen yejua yokijto (Tito 2:13, TNM). Tla tiknekij nochipa tiyolpakiskej, noneki kuajli touikaskej iuan Jehová. Apóstol Pablo okijkuilo: “Nochipa xpakikan itech toTeko. Oksejpa nikijtoua: ¡Xpakikan!” (Filip. 4:4). Aman tej, noneki tikpiyaskej tlamachilistli tlen ualeua itech toTajtsin niman ijkon iuan touikaskej (Prov. 3:13, 18). Tla tiknekij nochipa tiyolpakiskej, noneki nochipa matikchiujtokan tlen tiuelij ipan Biblia. Jesús otemachti yejuin ijkuak okijto: “Tla nenkimatij yejuin tlemach, nenpakiskej tla nenkichiuaj” (Juan 13:17, TNM; Sant. 1:25). Yejuin melak noneki matikchiuakan tla tiknekij tikpiyaskej chikauak totlaneltokil niman tla tiknekij nochipa tiyolpaktoskej. w18.09 18 párrs. 4-6

Epafras kuajli kimixmatstoya tokniuan, niman melak najmanaya inpampa. Maski noijki najmanaya pampa noijki okitsajkaj ijkon ken Pablo, yejua nochipa kitaya kuajli manemikan tokniuan (Filem. 23). Yejua kinpaleuiaya niman ijkon kimititiaya ika kintlasojtlaya niman ika najmanaya inpampa. Epafras kichiuaya teoyotl inpampa tokniuan niman hasta kinteneuaya ika intoka, tejuamej noijki uelis ijkon tikchiuaskej. Ijkuak ijkon tikchiuaj, toteoyouan melak tepaleuiyaj (2 Cor. 1:11; Sant. 5:16). Matiknemilikan akinomej uelis tikinteneuaskej ijkuak tikchiuaskej teoyotl. Ijkon ken Epafras, miyekej tokniuan kinteneuaj akin nemij ipan intlanechikol noso oksekimej akin kixnamiktokej tlen ouijtika, akin kanaj xkimatij tlenon kichiuaskej noso kanaj kixnamiktokej tlatlatalistin. Noijki uelis tikchiuaskej teoyotl inpampa tokniuan akin yomik se inchanejkauj, inpampa akin omakiskej kampa otlaixpoliuj noso kampa onka guerra, niman uelis tiktlajtlaniskej inpampa akin xkipiyaj tomintsin. Melak miyekej tokniuan kinekij matikchiuakan teoyotl inpampa. w18.09 5 párrs. 12, 13

Ijkuak Pablo okiteneuj yejuin tlajtoltin xsan kijtosnekiya ika noneki tikinmakaskej oksekimej tlemach tlen patioj. Noijki uelis tikinyolchikauaskej, tikinnojnotsaskej ika tlen kijtoua Biblia niman tikinpaleuiskej (Hech. 20:31-35). Ika tlen Pablo okijto niman okichiuj, otechmachti ika melak ueyi kijtosneki tiktemakaskej totiempo, tokojtilis, totlasojtlalis niman tiknektoskej titepaleuiskej. Ixtlamatkej akin kitaj kenon toyekanaj noijki yokitakej ika ijkuak tiktemakaj tlen tikpiyaj melak tipakij. Se amatlajkuilojli kijtoua ika miyekej tlaltikpakchanejkej okijtokej ika melak oyolpakej ijkuak okichiujkej itlaj inpampa oksekimej. Ixtlamatkej kijtouaj ika ijkuak titepaleuiyaj, tomachiliaj ika toyojlo. Kuakon, miyekej ixtlamatkej kijtouaj ika tla tiknekij tipakiskej niman xtikualoskej, matitepaleuikan maski xtechtlaxtlauiliskej. Tlen yejuamej yokijtokej xtechmojkatlachialtia, pampa toTajtsin Jehová akin otexchijchiuj, yotechijlika ika tla tikuelitaj titetlayokoliskej tipakiskej (2 Tim. 3:16, 17). w18.08 22 párrs. 17, 18

Ipan se teotlajtojli itech Jesús, Isaías okijto: “Xteyolkuitis ipampa tlen ixtololojuan kitaj, xtechikajkanotsas san ipampa tlen inakasuan kikakij. Yejua kiyolkuitis akin yolyemanki ika melajkayotl” (Is. 11:3, 4). Yejuin tlajtoltin melak techyolchikauaj. ¿Tleka? Pampa tinemij ipan se tlaltikpaktli kampa melak nochikoitalo. Tinochimej techpoloua se akin matechyolkuiti ika melajkayotl, niman Jesús ijkon kichiuas, yejua xkeman teyolkuitis san ipampa tlen kitas. Mojmostla itlaj tiknemiliaj intech oksekimej. San ika, pampa titlajtlakolejkej, ouijtika tikimitaj oksekimej ijkon ken Jesús kimita. Tejuamej nimantsin itlaj tiknemiliaj intech oksekimej san ipampa tlen tikitaj. Ika yejon, Jesús otechnauati yejuin: “Ma ka xtetlajtlakolmakakan san isijkapan. Yej san xtlajtlakolmakakan yakaj tla melauak nenkimatij ika okichiu tlen xkuajli”. Kuakon, Jesús kineki matikchiuakan ijkon ken yejua kichiua niman maka matitetlajtlakolmakakan noso matitechikoitakan san ipampa tlen tikitaj. w18.08 8 párrs. 1, 2

ToTajtsin xtechuajnotsa ijkon ken okichiuj iuan Jesús. San ika, techyekana ika iTlajtol, Biblia. Noijki, espíritu santo kiyekana tekitketl akin melajkanemi makichikaua totlaneltokil, ika amatlajkuiloltin, ipan Internet, ika videos niman audios (Luc. 12:42). ¿Xmelak ika tikpiyaj miyek tlen ika uelis tikchikauaskej totlaneltokil? Maka keman matikilkauakan tlen Jehová okijli iKoneuj ijkuak onen ipan tlaltikpaktli. Itlajtoluan tlen onka ipan Biblia matechpaleui matikneltokakan ika yejua kimati kenon tlayekanas. Matikmatstokan, ika kiyektlalis nochi tlen texchiuiliskej Satanás niman akin xkuajkualtin. Kuajli matijkakikan itlajtol Jehová. Tla ijkon tikchiuaj, uelis tikixnamikiskej maski san tlenon. Biblia techilnamiktia yejuin: “Nemejuamej noneki nenkipiyaskej ijyouilistli chika nentlajyouiyaj para uelis nenkichiuaskej on tlinon Dios kineki, niman ijki uelis nenkiseliskej on tlen yejua omechprometerouilij” (Heb. 10:36). w19.03 13 párrs. 17, 18

Moisés uejkaujtipan yokinyekanka israelitas, san ika, aman yeskia Josué akin kinyekanaskia. Kuakon, kanaj notlajtoltiaya tla israelitas kinokauiliskiaj makinyekana (Deut. 34:8, 10-12). Se amoxtli tlen tlajtoua itech Josué 1:1, 2, kitetomilia ika ipan se kalpan melak miyek panoua tlen ouijtika ijkuak kalaki se yenkuik tekiuaj. Kijtoua ika yeuejkaui ijkon panouaya niman ika hasta aman ijkon panoua. Xtechmojkatlachialtia ika Josué nomojtiaya. San ika, yejua otlaneltokak itech Jehová niman xonouejkauj kichiua tlen toTajtsin okinauati (Jos. 1:9-11). Pampa Josué otlaneltokak itech ToTajtsin, yejua nochipa okipaleui. Kema, toTajtsin okitekitilti se iluikaktekitketl akin okinyekan Josué niman israelitas. Uelis tiknemiliskej ika yejuin iluikaktekitketl katka akin kitokayotiaj “Tlajtojli”, isenteKoneuj toTajtsin (Juan 1:1; Éx. 23:20-23). Jehová okinpaleui israelitas makiselikan tlen onopatlak niman makitlakamatikan Josué, akin aman kinyekantoya. w18.10 22, 23 párrs. 1-4

Jehová kimixmati akin kitekichiuiliaj ika inyojlo niman kijkuiloua intokayo ipan “amoxtli tlen tetlalnamiktia”. Tla tiknekij ika totokayo maonia ipan “amoxtli tlen tetlalnamiktia” tlen kipiya Jehová, noneki tikchiuaskej seki tlemach. Malaquías okijto ika noneki tikmojkaitaskej toTajtsin niman titlanemiliskej ipan itokayo. Tla tikueyichiuaj itlaj noso yakaj okse, Jehová kipopolos totokayo itech “amoxtli tlen tetlalnamiktia” (Éx. 32:33; Sal. 69:28). Kuakon, tosentemakaskej xsan kijtosneki tikijliskej Jehová ika tikchiuaskej tlen kineki niman toapolaktiskej. San sejpa tosentemakaj niman toapolaktiaj, niman yejon nimantsin panotikisa. Ijkuak tikijtouaj ika tinemij iuan Jehová niman tiktekichiuiliaj, kijtosneki ika tiktlakamatij ipampa tlen mojmostla tikchiuaj (1 Ped. 4:1, 2). w18.07 23, 24 párrs. 7-9

San ika, yejuin xsan ijkon panos. Noneki mojmostla tokojtilijtiaskej. Uelis tikpiyaskej chikauak totlaneltokil tla xtijkajkauaj okseki tikixmatiskej niman tla tokojtiliaj okseki tikasikamatstiaskej. Ika yejon, nochipa techyoleuaj mojmostla matikpouakan Biblia (Sal. 1:1-3). ¿Tokojtilijtokej tikchiuaskej yejon? Tikpouaskej mojmostla Biblia techpaleuis kuajli matikasikamatikan itlanauatiluan niman itlajtolyekanalisuan toTajtsin. Tlasojtlalistli, yejua tlanauatijli tlen melak ueyi kijtosneki intech akin kichiuaj ken Cristo. Jesús okimijli akin kitokayaj: “Tla nemotlajsojtlaj semej iuan oksekimej, nochi tlakatl kitas ika nennotemachtijkauan” (Juan 13:35). Santiago akin itlakpaikniuj katka Jesús, okitokayoti yejon tlanauatijli ken “yejuan más ueyi kijtosneki” (Sant. 2:8). Niman Pablo okijto: “Tla se tlakatl tetlajsojtla, yejua kichiua nochi tlen tlanauatia on tlanauatijli” (Rom. 13:10). Ipan Biblia tlasojtlalistli melak ueyi kijtosneki, pampa “Dios yejua tetlajsojtlalistli” (1 Juan 4:8). w18.06 19 párrs. 14, 15

Maski israelitas okixnamijkaj Jehová, Moisés yejua akin melak okualan. Pampa xonotelti, otlajtotikis niman xokinemili tlenon ueliskia panos. Ipampa tlen oksekimej kichiuayaj, Moisés okilkauj ika nonekiya konitstos Jehová. Ijkuak kachtopa okualankej israelitas pampa xonkatka atl, Moisés okichiuj tlen kuajli (Éx. 7:6). San ika, kanaj aman yosiaujka niman yoajmankamijka pampa yopanoka miyek xiujtin ika kiyekanaya yejon kalpan tlen xkinekiya tetlakamatis. Kanaj melak otlanemili ipan tlen kimachiliaya niman xokinemili kenon kitlakaitas Jehová. Tla se teotlajtoketl ken Moisés okilkauj ika nonekiya konitstos Jehová niman otlajtlako, tejuamej noijki uelis topan nochiuas yejon. Ijkon ken yejua, tejuamej sa achijtsin poliui ika tikalakiskej ipan yenkuik tlaltikpaktli tlen toTajtsin yotechijli techmakas (2 Ped. 3:13). Xtiknekij tikpoloskej yejuin ueyi tlateochiualistli. San ika, tla tiknekij tikseliskej, noneki nochipa tikonitstoskej Jehová niman nochipa tikyejyekoskej tikchiuaskej tlen yejua kineki (1 Juan 2:17). w18.07 15 párrs. 14-16

Satanás xuelis texchiualtis matikchiuakan itlaj tlen xtiknekij tikchiuaskej (Sant. 1:14). Miyekej tlaltikpakchanejkej xkitaj ika kichiuaj tlen Satanás kineki. San ika, ijkuak kixmatij tlen melauak, noneki kitlapejpeniskej akinon kitekichiuiliskej (Hech. 3:17; 17:30). Tla kuajli yotikijtokej tiktlakamatiskej toTajtsin, kuakon Satanás xuelis kichiuas maka sa matiyolmelaujkanemikan (Job 2:3; 27:5). Onka okseki tlemach tlen Satanás niman xkuakualtin espíritus xuelij kichiuaj. Xnemili yejuin, Biblia xkanaj kijtoua tla uelij kitaj tlenon tikpiyaj ipan totlamachilis noso ipan toyojlo. San Jehová niman Jesús uelij kichiuaj yejuin (1 Sam. 16:7; Mar. 2:8). Tla tikchiuaj nochi tlen tiuelij niman ijkon titlajtoskej niman tikchiuaskej ken Jehová kineki, uelis tikmatstoskej ika Jehová xkeman kikauilis ika Diablo matexchiuili itlaj tlen xuelis noyektlalis (Sal. 34:7). Noneki tikixmatiskej totlauelikniuj, san ika, xkipiya ika melak tikmakasiskej. Niman maski titlajtlakolejkej, uelis tiktlaniskej pampa Jehová techpaleuiya. Tla tikmapeuaj noso xtokauiliaj matechyekana Diablo, yejua techtlalkauis (Sant. 4:7; 1 Ped. 5:9). w18.05 26 párrs. 15-17

Xnemili ika tias uejka ipan autobús kampa nochiuas itlaj tlen ueyi kijtosneki. Ijkuak tajsi kampa notelketsaj autobuses, tikimita miyek autobuses. Tikneki titlejkos se tlen mitsuikas kampa tiauj. Kuajli tikmatij, ika xtitlejkos ipan se autobús tlen oksekan mitsuikas. Telpokamej ijkon ken yejon tlaltikpakchanejkej akin nemij kampa notelketsaj autobuses. Pampa noneki miyek kitlapejpeniskej ipan innemilis, kemantika yejuin kinajmankamiktia. San ika, tla kuajli kimatij kanon kinekij yaskej, yejuin kinpaleuis makitlapejpenikan tlen kinuikas kampa kinamiki ajsiskej. Telpokamej noneki makitejtemokan kiyolpaktiskej Jehová. Yejuin kijtosneki kitaskej tlen yejua kinemilia ipan nochi tlen kichiuaskej ipan innemilis, ken itech tlen nomachtiskej, tlen ipan tekitiskej niman itech inchanejkauan. Noijki kijtosneki nokojtiliskej kichiuaskej tlen yokinemilijkej ipan itekiyo toTajtsin. Telpokamej akin kachtopa kitejtemouaj kitekichiuiliskej Jehová uelis kuajli kimatstoskej ika yejua kinteochiuas niman ika kuajli onkisaskej ipan innemilis. w18.04 25 párrs. 1-3

Jefté okichiuj tlen okijto niman okititlan ichpoch ne Siló niman ijkon ompa matekiti nochi inemilis ipan tabernáculo (Juec. 11:30-35). Maski ouijtika okitak Jefté, san ika, kanaj ichpoch yejua akin melak ouijtika okitak yejuin. Maski ijkon, yejua okinek kichiuas tlen itaj yokijtoka (Juec. 11:36, 37). Yejuin okijtosnek ika xkeman ueliskia nonamiktis nion kinpiyas ikoneuan. Xok kinpiyaskiaj inchanejkauan niman xok kimilnamikiskiaj. Kema, yemelak nonekiya makiyolseuikan niman makiyolchikauakan. Biblia techijlia: “Niman onomatkej kichiuaj yejuin ipan Israel: Sejse xiuitl, ichpokamej itech Israel yayaj konyolchikauayaj ichpoch Jefté akin galaadita, naui tonajli ipan se xiuitl” (Juec. 11:39, 40). Ipan yejuin tonajli, akin kichiuaj ken Cristo niman xnonamiktiaj niman nokojtiliaj miyek kichiuaskej ipan itekiyo toTajtsin kinnamiki noijki matikimijlikan ika kuajli tlen kichiuaj niman matikinyolchikauakan (1 Cor. 7:32-35). w18.04 17 párrs. 10, 11

Miyekej iluikaktekitkej oteixnamijkej iuan Satanás. Ijkuak ok xpanouaya apachiuilistli, Satanás ouel okichiuj ika sekimej iluikaktekitkej maauilnemikan iuan siuamej. Biblia kiteneua yejuin tlen opanok ika se neskayotl tlen kijtoua ika itech “nochi on yexkantipan kech onkatkaj sitlalimej ne ipan cielo”, se dragón “okintejchiuilan se parte” (Gén. 6:1-4; Apoc. 12:3, 4). Ijkuak iluikaktekitkej okinkaujkej ichanejkauan Jehová, okimapeujkej niman onokauilijkej makinyekana Satanás. San ika, maka matiknemilikan ika yejuamej ijkon ken tlaltikpakchanejkej akin kichiuaj tlen xkuajli niman xakaj kinyekana. Satanás yokichijchiuj se tekiuajyotl tlen kixkopinasneki iTekiuajyo toTajtsin, niman sa no yejua yonochiuj tekiuaj. Yejua yokintlali xkuakualtin espíritus ken tekiuajkej, yokinmakak tlanauatijkayotl niman yokinkuep tlanauatijkej itech nochi tlaltikpaktli (Efes. 6:12). Satanás kitekitiltia itekiuajyo, niman ika yejuin kinyekana tekiuajkej ipan tlaltikpaktli. w18.05 23 párrs. 5, 6

Jehová se kuajli tajtli niman techtlasojtla, ika yejon, kemantika techyektlalia. David kipatiojkaitaya ika Jehová kiyektlaliaya. Yejua tlanemiliaya itech itlanemililuan toTajtsin, nokojtiliaya tlanemilis ken yejua niman nokauiliaya ika itlanemililuan toTajtsin makiyektlalikan. Tla tejua noijki ijkon tikchiua, ueyiyas tlasojtlalistli tlen tikmachilia itech toTajtsin niman tiknektos tiktlakamatis. Noijki timochiuas ken yakaj akin kipiya chikauak itlaneltokil. Se tokniuj akin itoka Christin okijto: “Ijkuak ninomachtia niman nitlanemilia itech tlen nikpoua, nikmachilia ika Jehová onechijkuilouili yejon”. Tla tikpiya chikauak motlaneltokil, Jehová mitsmakas tlaixmatilistli niman tlamachilistli tlen noneki niman ijkon tikitas tlaltikpaktli niman tlen ipan nochiuas ika tlayekapan ijkon ken yejua kita. Ijkon kichiuas pampa kineki xmati tlenon melak ueyi kijtosneki ipan tonemilis, kineki xtlapejpeni tlen kuajli niman maka mamitsmojti tlen panos ika tlayekapan (Is. 26:3). w18.12 26 párrs. 9, 10