Noviembre

Ijkuak tiktekichiuiliaj Jehová, uelis tikchiuaskej matechmakakan tlen Adán niman Eva okipolojkej niman noijki uelis tinemiskej nochipa. Adán niman Eva okitlapejpenijkej xkitekichiuiliskej Jehová pampa xkitlasojtlayaj. Maski ijkon, toTajtsin okinkauili mauejkauikan manemikan, makinpiyakan inkoneuan niman san yejuamej makinyekanakan. Pampa xokitlakamatkej Jehová, nimantsin ones ika Adán niman Eva xtlamachilisejkej katkaj ika tlen inpan onochiuj. Inkoneuj akin yenkuiyotl okimikti ikniuj, niman xouejkauj ika nochimej tlaltikpakchanejkej opeuj kichiuaj tlen xkuajli niman san intech tlanemiliayaj (Gén. 4:8; 6:11-13). San ika, Jehová ikimatstoya kenon kinpaleuis ikoneuan Adán niman Eva akin kinekiskiaj kitekichiuiliskej (Juan 6:38-40, 57). Jehová melak teijyouiya niman tetlasojtla, ¿xmelak? Ijkuak más tikixmatstias, melak tiktlasojtlas. Xtiknekis titlajtlakos ijkon ken Adán niman Eva, tiknekis timosentemakas itech. w19.03 2 párr. 3; 4 párr. 9

Matikteititikan ika tajmanaj inpampa oksekimej. Matikyejyekokan matikasikamatikan tlauejli tlen kixnamiktokej tochanejkauan niman tokniuan. Matajmanakan intech telpokamej, akin kualoj, ueuentsitsintin niman akin yomik se inchanejkauj. Matikintlajtoltikan kenon nemij niman kuajli matijkakikan tlen technankiliaj. Matikimasikamachiltikan ika yemelak tikasikamatij tlen inpan panotok. Niman matikyejyekokan matikinpaleuikan hasta kampa tiuelij. Ijkuak tikchiuaj yejuin, tikteititiaj ika yemelak titetlasojtlaj (1 Juan 3:18). Ijkuak tikyejyekoskej tikinpaleuiskej oksekimej, noneki titeasikamatiskej. ¿Tleka? Pampa xnochimej ijkon kimixnamikij tlauejli. Sekimej nochi kijtouaj tlen inpan onochiuj, san ika, sekimej ka. Kuakon, ijkuak tikinpaleuiskej, maka matikintlajtoltikan tlen uelis kinpinaujtis (1 Tes. 4:11). Ijkuak yakaj techijlis tlen kimachilia, hasta uelis xtikneltokiliskej. San ika, noneki tikasikamatiskej ika yejua ijkon nomachilia. Kuakon, noneki matijkakikan niman maka nimantsin matitlajtokan (Mat. 7:1; Sant. 1:19). w19.03 17 párr. 18; 19 párr. 19

¿Tomojtiaj ijkuak tikteijliaj tlen melauak itech Biblia? Kachtopa matomachtikan itech Nehemías, akin tekitiya itech se tekiuaj akin ueyixtika. Yejua melak onajman ijkuak okikak ika yoijtlakaujkaj itepanuan niman ipuertas Jerusalén (Neh. 1:1-4). Uelis tiknemiliskej kenon melak onomojti ijkuak tekiuaj okitlajtlanili makijli tleka melak najmantoya. Achto ika kinankilis, Nehemías okichijtiuets se teoyotl. Melak otepaleui tlen Nehemías okichiuj pampa tekiuaj melak okipaleui ikalpan toTajtsin (Neh. 2:1-8). Ineskayo Nehemías techmachtia ika melak noneki matikchiuakan teoyotl achto ika titlanankiliskej. Aman matitlanemilikan noijki itech Jonás. Ijkuak Jehová okinauati makinnojnotsati akin chantiyaj Nínive, melak onomojti niman hasta ocholoj oksekan (Jon. 1:1-3). San ika, ika itlapaleuilis toTajtsin, Jonás okichiuj yejon tekitl niman itlajtoluan melak okinpaleui akin chantiyaj ipan yejon ueyi kalpan (Jon. 3:5-10). Ineskayo Jonás techmachtia ika Jehová uelis techpaleuis matiktekichiuilikan maski melak matomojtikan. w19.01 11 párr. 12

Ijkuak tipeuaj tikchiuaj tlen kijtoua Biblia, sekimej tochanejkauan noso akin imiuan touikaj xok ijkon technotsaj. ¿Tleka? Jesús techpaleuiya matikasikamatikan yejuin ijkuak okichiuj teoyotl inpampa inomachtijkauan, yejua okijto: “Xkinchipauili innemilis itechkopa on tlen melauak. Motlajtol yejua tlen melauak” (Juan 17:17). “Xkinchipauili innemilis” noijki uelis kijtosnekis “oksekan xkintlali” noso “xkinxelo”. Ijkuak tipeuaj tikchiuaj tlen kijtoua Biblia, techxelouaj intech tlaltikpakchanejkej akin xkitlakamatij toTajtsin pampa aman tiktlakamatij okseki tlanauatiltin niman toyekanaj ika tlen kijtoua Biblia. Tejuamej xtiknekij toxeloskej intech tochanejkauan niman intech akin imiuan touikaj, san ika, sekimej kanaj totech noxelouaj noso hasta techtlauelitaj pampa xok ijkon titlaneltokaj. Yejuin xtechmojkatlachialtia, pampa Jesús okijto: “Se kipias itlauelikniu sa no iuan ichanchanekauan” (Mat. 10:36). San ika, Jesús kuajli otechijli ika tla tijkouaj tlen melauak, melak miyek tlateochiualistin tikseliskej xijkon ken tlen tikpoloskej. w18.11 6 párr. 11

Apóstol Pablo kinpatiojkaitaya ikniuan niman kiteititiaya ika tlen kijtouaya intech. Yejua nochipa kitlasojkamachiliaya toTajtsin inpampa ikniuan ipan iteoyouan. Niman ipan cartas tlen okintitlanili, ompa okijkuilo kenon melak kinpatiojkaitaya. Ipan Romanos 16:1-15, okinteneuj 27 ikniuan. Okilnamik ika Prisca niman Áquila “mikiskiaj” ipampa niman okijto ika Febe “miyekej yokimpaleuij”, hasta yejua noijki okipaleui. Tikitaj ika Pablo okijto tlen kuajli yokichiujkaj ikniuan akin nochikauayaj kitekichiuiliskej toTajtsin (Rom. 16:1-15). Yejua kimatstoya ika ikniuan nopopolouayaj. Maski ijkon, yejua okitak tlen kuajli kichiuayaj. Kuakon, ijkuak tokniuan okipoujkej carta ipan tlanechikojli, yejon tokniuan kanaj melak opajkej ijkuak okikakej tlen Pablo kijtouaya intech. Niman melak kuajli onouikakej. ¿Tikchiuaj ken Pablo niman tikimijliaj tokniuan ipan tlanechikojli tlen kuajli kijtouaj niman kichiuaj? w19.02 16 párrs. 8, 9

¿Kijtosneki ika tla tiyolmelajkanemij xkeman titlajtlakoskej? Ka, xyejon kijtosneki. Jehová xsan kitstika ijkuak topopolouaj. ITlajtol techijlia: “NoTEKO, tla tejua xtitechtlapojpoluiliskia totlajtlakoluan, xakaj ueliskia makisaskia” (Sal. 130:3). Yejua kimatstika ika pampa titlajtlakolejkej topopolouaj, niman techtlapopoluiya (Sal. 86:5). Noijki, Jehová kimatstika tlen xueli tikchiuaj niman xkichia matikchiuakan tlen xtiuelij (Sal. 103:12-14). Tlasojtlalistli techpaleuis matiyolmelajkanemikan. Noneki san Jehová tiktlasojtlaskej niman san yejua itech timelajkanemiskej, kijtosneki masentetl. Tla ijkuak techtlatlataj, tikititiaj Jehová ika tiktlasojtlaj, kuakon tiyolmelajkanemij (1 Crón. 28:9; Mat. 22:37). Tikmatij ika itlanauatiluan toTajtsin melajkej niman tikpatiojkaitaj tikyolpaktiskej toTajtsin. Pampa tiktlasojtlaj Jehová, xsan tikchiuaj tlen tiknemiliaj ijkuak itlaj tiktlapejpeniaj tikchiuaskej. Ijkon tikteititiaj ika tiyolmelajkanemij. w19.02 3 párrs. 4, 5

Nochipa ijkuak tikitaj kenon tepaleuij tikchiuaskej tlen kuajli, chikaui totlaneltokil (Sant. 1:2, 3). Kuajli tomachiliaj pampa tikmatstokej ika Jehová yolpaki topampa niman techita ken ikoneuan, niman yejuin techyolmapeua nochipa matikyolpaktikan (Prov. 27:11). Nochipa ijkuak tikixnamikij tlatlatalistin, uelis tikteititiskej ika tiktekichiuiliaj Jehová ika nochi toyojlo (Sal. 119:113). Tejuamej, tiktlasojtlaj Jehová ika nochi toyojlo niman tiknektokej tiktlakamatiskej itlanauatiluan niman tikchiuaskej tlen kineki (1 Rey. 8:61). Tinochimej topopolouaj, pampa tinochimej titlajtlakolejkej. Ijkuak ijkon panos, matikilnamikikan tlen ipan onochiuj tekiuaj Ezequías. Yejua onopopolo, san ika, onoyolkuep niman ok okitekichiuili Jehová ika nochi iyojlo (Is. 38:3-6; 2 Crón. 29:1, 2; 32:25, 26). Kuakon, matikmapeuakan nochi tlen ika Satanás kijtlakos totlamachilis. Matiktlajtlanilikan Jehová matechpaleui matikpiyakan se toyojlo tlen “matlamachilise niman matetlakamati”. Niman nochipa matimelajkanemikan itech Jehová (1 Rey. 3:9; Sal. 139:23, 24). w19.01 18, 19 párrs. 17, 18

Sa no tejuamej topaleuiyaj ijkuak titlanankiliaj ipan tlanechikoltin (Is. 48:17). ¿Kenon? Kachtopa, tla tiknemiliaj tomateketsaskej, noneki melak kuajli tomachtiskej achto ika tiaskej ipan tlanechikojli. Tla kuajli tomachtiaj, kuajli tikasikamatiskej Biblia. Niman tla kuajli tikasikamatij Biblia, tikchiuaskej ipan tonemilis tlen tomachtiaj. Ika ome, ijkon melak tikuelitaskej tinemiskej ipan tlanechikojli, pampa tikmatstoskej itech tlenon tlajtotoskej. Niman ika yeyi, pampa ijkuak titlanankilis nonekis timokojtilis, tlen tikijtoskej nokauas ipan totlamachilis. Jehová kuelita matikijtokan tlen tikneltokaj. Kuajli matikmatstokan ika yejua techkaki niman kipatiojkaita ijkuak tokojtiliaj titlanankiliskej ipan tlanechikojli (Mal. 3:16). Kiteititia ika kipatiojkaita tlen tikchiuaj pampa melak techteochiua (Mal. 3:10). Yotikasikamatkej ika melak tepaleui tla titlanankiliaj. w19.01 8 párr. 3; 9, 10 párrs. 7-9

Ijkuak tikitaj kenon techpaleuiya Jehová, tikasikamatij ika Jehová melak tlamachilise. Jehová xsan techmaka miyek tlanauatiltin, ika ijyouilistli techijlia matoyekanakan ika tlasojtlalistli. Yejua kineki matoyekanakan ika itlajtolyekanalisuan niman kineki matiktlauelitakan tlen xkuajli. Tikitaj ika ijkon temachtia itech tlen kijtoua Tlamachtijli ipan tepetl, ompa Jesús okiteneuj tlenon uelis kichiuas matitlajtlakokan (Mat. 5:27, 28). Pampa Jesús tekiuaj itech iTekiuajyo toTajtsin, ok techmachtijtos ipan yenkuik tlaltikpaktli niman ijkon matikitakan tlenon kuajli niman tlenon xkuajli, ijkon ken yejua kita (Heb. 1:9). Noijki, techpaleuis kuajli matikpiyakan totlalnakayo niman totlamachilis. Xnemili: xok keman tiknekis tikchiuas tlajtlakojli niman xok titlajyouis ika titlajtlakole. Aman kema, tikpiyaskej yejon kualtsin tlamakaualistli tlen toTajtsin okijto (Rom. 8:21). Melauak, xkeman tikpiyaskej tlamakaualistli itech nochi. San uelis tikpiyaskej melauak tlamakaualistli tla tikchiuaj ijkon ken toTajtsin kichiua (1 Juan 4:7, 8). w18.12 23 párrs. 19, 20

Israelitas kinkauiliayaj makikauakan insiuauj tla kinextiliayaj “itlaj tlen xkinamiki”. ¿Tlenon katka yejon “tlen xkinamiki”? Tlanauatijli xtlaj kijtoua. San ika, kijtosnekiya itlaj tlen tepinajti noso itlaj tlen melak xkuajli katka, xkiteneujtoya itlaj tlen xueyi kijtosneki (Deut. 23:14). Teajman ika ijkuak Jesús onen ipan tlaltikpaktli miyekej judíos kinkauayaj insiuauan “maski san itlaj ikatsin” (Mat. 19:3). Tejuamej xtiknekij ijkon tikchiuaskej. Ipan tonaltin ijkuak nemiya Malaquías, miyekej tlakamej kinkauayaj insiuauan ixpan tekiuajkej, kanaj pampa sakin kinekiyaj nonamiktiskej iuan okse siuatl akin ichpochtli katka niman akin xkiueyichiuaya toTajtsin. Malaquías okijto tlenon kinemiliaya Jehová itech yejon. Okijkuilo: “Nejua niktlauelita ijkuak nokauaj akin yononamiktijkej” (Mal. 2:14-16). Yejuin notlajtolnamikiya iuan tlen kijtoua iTlajtol toTajtsin ijkuak kachtopa tlakatl niman siuatl ononamiktijkej, tlakatl “nosentlalis iuan isiuauj, niman nochiuaskej san se tlalnakayotl” (Gén. 2:24). Jesús okiteititi ika noijki ijkon tlanemiliaya ken itaj ijkuak okijto: “Ma ka yakaj tlakatl kixelos on tlen Dios okinsentlalij” (Mat. 19:6). w18.12 11 párrs. 7, 8

Sekimej tokniuan uelij más kitekichiuiliaj Jehová. Yejuamej noijki ijkon tlanemiliaj ken teotlajtoketl Isaías. Ijkuak Jehová otetlajtolti: “¿Akinon niktitlanis, niman akinon yas topampa?”, Isaías otenankili: “¡Nikan ninemi! ¡Nejua xnechtitlani!” (Is. 6:8). ¿Tiueliskiaj niman tiknektoskiaj titlapaleuiskej ipan ikalpan Jehová? Jesús okijto yejuin itech tenojnotsalistli niman tikinmachtis oksekimej: “Yejua ika, tej, xtlajtlanilikan iTeko on tlakilyotl más ma kinuajtitlani on pixkakej para ma pixkakij” (Mat. 9:38). ¿Uelis titlapaleuiskej ken precursores kampa nonekij tenojnotskej? ¿Noso uelis tikpaleuiskej yakaj ijkon makichiua? Miyekej tokniuan kitaj ika ijkuak tlapaleuiyaj ken precursores kampa nonekij tenojnotskej, ijkon kiteititiaj ika kitlasojtlaj Jehová niman ika kintlasojtlaj tlaltikpakchanejkej. ¿Onka okseki tlen uelis tikchiuaskej ipan itekiyo toTajtsin? Tla tikchiuaj, melak tipakiskej. w18.08 27 párrs. 14, 15

Evangelios kuajli kijtouaj tlenon kinemilia Jehová itech yejuin. Jehová kuajli okitak akinomej uelis kiskaltiskej ikoneuj nikan ipan tlaltikpaktli. Okitlapejpeni se tlakatl niman se siuatl akin xmiyek kipiayaj (Lev. 12:8; Luc. 2:24). Biblia kijtoua ika ijkuak Jesús onemiko, María okitekak ipan se kuexomatl pampa xkipiayaj kanon ueliskiaj noseuiskiaj (Luc. 2:7). Tla Jehová kinekiskia, yejua ueliskia kitejtemos kampa melak kualtsin niman ijkon ompa matlakati ikoneuj. San ika, Jehová kinekiya ika ikoneuj manoskalti imiuan akin kachtopa kichiuayaj tlen yejua kineki. Ijkuak tomachtiaj yejuin, tikasikamatij tlenon kinemilia Jehová itech yejon tlemach tlen uelis tikpiyaskej. Miyekej tajtin nokojtiliaj kinmakaskej inkoneuan nochi tlen melak kuajli, maski yejuin uelis kichiuas maka kuajli manouikakan iuan Jehová. San ika, kuajli tikitaj ika Jehová kineki ika nochimej makipiyakan chikauak intlaneltokil. ¿Tejuamej noijki ijkon titlanemiliaj? ¿Tlenon nesi itech tlen tikchiuaj? w18.11 24 párrs. 7, 8

Pakilistli ualeua itech Jehová. Ika yejon, yejua kineki matipakikan, niman techmaka miyek tlemach tlen kichiua matiyolpakikan (Deut. 12:7; Ecl. 3:12, 13). San ika, ipan yejuin tonaltin kemantika uelis onias itlaj tlen kichiuas maka matiyolpakikan. ¿Tleka? Miyek onka tlen kichiua maka matiyolpakikan: kanaj tikpolouaj totekiyo, kanaj techkaua toixnamik, kanaj miki se tochanejkauj noso kanaj kikixtiaj tochanejkauj itech tlanechikojli. Noijki uelis kichiuas maka matipakikan ijkuak tikpiyaj tlauejli imiuan tochanejkauan, ijkuak techpijpinaujtiaj akin imiuan titekitij noso akin imiuan tomachtiaj, ijkuak techtlaueltokaj noso ijkuak techtsakuaj pampa tiktekichiuiliaj Jehová. Noso kanaj peua tikualoj, kanaj tikpiyaj se kokolistli tlen xueli techkaua noso kanaj melak tajmanaj. San ika, matikilnamikikan ika Jesús, “akin melak paki niman akin san yejua Ueyi Tlanauatijketl”, kineki kinyolseuis tlaltikpakchanejkej niman kinpaleuiya mapakikan (1 Tim. 6:15; Mat. 11:28-30). Ipan Tlamachtijli ipan Tepetl, Jesús okiteneuj seki tlemach tlen uelis techpaleuis matiyolpakikan maski tikpiyaskej miyek tlaueltin ipan yejuin tlaltikpaktli kampa tlayekana Satanás. w18.09 17, 18 párrs. 1-3

Sekimej xkintekiyomaka kikajkauaskej tlen miyekej kuajchiujtiuej ijkuak kimatij ika yejuin xkiyolpaktia toTajtsin (Prov. 23:23). San ika, oksekimej melak kintekiyomaka. Yejuamej kimajmana kenon nomachiliskej inchanejkauan, akin imiuan tekitij niman akin imiuan nouikaj. Niman kanaj melak kintekiyomaka kikajkauaskej yejuin tla kampa yejuamej chantij melak kinueyichiuaj inchanejkauan akin yomijkej. Tla tikitaj tlenon okichiujkej sekimej tokniuan akin okipixkej yolchikaualistli, uelis techpaleuis matikchiuakan tlen noneki. Sekimej melak kichiuayaj naualyotl. ¿Tlenon okichiujkej akin opeuj kichiuaj ken Cristo niman chantiyaj Éfeso? Biblia kijtoua: “Okuajkikej inlibros niman okintlatijkej teixpan. Ijkuak okipojkej kech valerouayaj nochi on kech libros, valerouayaj kanaj ompoajli uan majtlaktli mil tomin tlachijchiutin ikan plata” (Hech. 19:19, 20). Yejon tokniuan akin yolmelaujkanemiyaj okinejkej kikauaskej inamoxuan tlen melak patiojkej katkaj, niman Jehová melak okinteochiuj. w18.11 7 párrs. 15, 16

Ijkuak kalpan Israel san kemach yopanoka itech atentli Jordán, Josué okitak se tlakatl akin kimapixtoya se espada. Katka “intlayekankauj akin tlaixnamikij ipampa Jehová”. Kema, yejua okinmanauito israelitas (Jos. 5:13-15). Kuajli yokijlikaj Josué tlenon nonekiya kichiuas niman ijkon kinoyaxkatis Jericó. Ijkuak san kemach okijlikej yejon, kanaj Josué xkasikamatiya tleka ijkon kijliayaj makichiua. Matiknemilikan yejuin, toTajtsin okijli ika nochimej tlakamej akin tlaixnamikiyaj nonekiya makinchiuilikan circuncisión. Kuakon, tikitaj ika yejuin tlakamej xueliskiaj teixnamikiskej ipan yejon tonaltin. (Gén. 34:24, 25; Jos. 5:2). Kanaj akin tlaixnamikiyaj notlajtoltiayaj: “¿Kenon uelis titlauisokiskej niman tikinpaleuiskej tochanejkauan tla yejon totlauelikniuan techualixnamikij?”. San ika, opanok itlaj tlen miyekej xkichiayaj. Intlauelikniuan xokimixnamijkej, akin chantiyaj Jericó melak nomojtiayaj. Biblia kijtoua: “Jericó kuajli tsauktoya inpampa israelitas; xakaj kisaya nion xakaj kalakiya” (Jos. 6:1). Kuajli tikmatstokej ika yejuin tlen opanok, okichiuj ika israelitas melak matlaneltokakan itech itlayekanalis Jehová. w18.10 23 párrs. 5-7

¿Kenon uelis tiyolyemankej yeskej ken Pablo? Kachtopa, maka matiknekikan ika oksekimej melak matechueyikaitakan pampa miyek yotikchiujkej ika itlapaleuilis Jehová. Ika ome, noneki matotlajtoltikan: “¿Kenon nikimita akin nikinnojnotsa? ¿Nikinchikoita sekimej tlaltikpakchanejkej?”. Ipan nochi tlaltikpaktli, iteixpantijkauan Jehová kintejtemouaj akin kinekij kikakiskej tlen melauak. Sekimej hasta nokojtiliaj ueliskej intlajtol niman kimasikamatiskej akin miyekej kinchikoitaj. Tokniuan xkeman nomachiliaj uejueyixtokej. Yejuamej kiyejyekouaj kimasikamatiskej nochimej tlaltikpakchanejkej niman ijkon kinpaleuiskej makixmatikan kuajli tlajtoltin itech Tekiuajyotl. w18.09 5 párrs. 9, 11

Romanos okimiktijkej Judas. Ipan yejon tonaltin nochimej judíos, Judas niman noijki akin melak kitlauelitayaj tekiuaj, kinekiyaj mayejko Mesías, pampa kichiayaj manochiua se ueyi tlayekanketl ipan política niman ijkon makinmakixti itech itlayekanalis Roma, niman makichiua ika kalpan judío oksejpa maueyixto (Luc. 2:38; 3:15). Miyekej kineltokayaj ika Mesías kitlaliskia se tekiuajyotl ipan kalpan Israel. Kuakon ijkuak ijkon panoskia, melak miyekej judíos akin oksekan yonochantitoyaj ueliskiaj uajnokuepaskej inkalpan. Xsan yejon, sejpa, Juan Teapolaktijketl okitlajtolti Jesús “tla yejua melauak Cristo” noso nonekiskia “kichaskej okse” (Mat. 11:2, 3). Kanaj Juan kimatisnekiya tla uajlaskia okse tlakatl akin kichiuaskia nochi tlen kinekiyaj judíos. Ijkuak Jesús yoyoliujka, omemej inomachtijkauan okinextijkej ipan ojtli tlen teuikaya Emaús niman okijlikej ika Mesías xokichiujka tlen yejuamej kinemiliayaj (Luc. 24:21). Niman sakin, oksekimej itlatitlankauan okitlajtoltijkej Jesús: “ToTeko, ¿ipan in tonaltin tikmanauis yejua in país de Israel para oksejpa iselti noyekanas?” (Hech. 1:6). w18.06 4 párrs. 3, 4

Melak noneki matotlajpiyakan ijkuak tijkakiskej tlen kijtouaj itech ikalpan Jehová. Matikilnamikikan ika totlauelikniuj Satanás “kinteixpanuiaya on tokniuan” (Apoc. 12:10). Jesús okijto ika akin techtlauelitaskiaj techtlajtolchijchiuiliskiaj niman kijtoskiaj tlen xmelauak (Mat. 5:11). Tla nochipa tikilnamikij yejuin, xtechmojkatlachialtis ijkuak kitejteneuaskej ikalpan Jehová. ¿Tikuelita tikintitlanilis correos niman mensajes akin imiuan timouika? Ijkuak itlaj tikita ipan noticias noso itlaj tijkaki, ¿tikneki nimantsin tikteijlijtiuetsis ijkon ken akin kitemaka noticias? Ijkuak tiknekis tiktitlanis se correo noso se mensaje, xmotlajtolti: “¿Kuajli nikmatstika ika yejuin melauak? ¿Kuajli yonikitak tla yemelak ijkon opanok?”. Tla xkuajli tikmati, kanaj titekajkayaujtoskia. Kuakon, tla xtikmati ika tlen otijkak melauak, maka xtitlani. ¡Xpopolo! w18.08 3 párr. 3; 4 párrs. 6, 7

Ijkon ken Jehová, Jesús noijki kineki matipakikan. Miyekej kichiuaj tlen kuajli ijkuak kinmakaj itlaj. Melauak ika xnochimej kiseliaj tlen ika toyojlo tikinmakaj. San ika, ijkuak se kema kitlasojkamati, yejua noijki kinekis kitemakas tlen kipiya. Kuakon, maski tikitaskej ika tlaltikpakchanejkej xkitlasojkamatij tlen tikchiuaj, nochipa matiktemakatokan tlen tikpiyaj. Xtikmatij tlenon uelis panos tla tiktemakaj tlen tikpiyaj. Aman tej, akin tetlatlayokoliani xkichia ika noijki itlaj makimakakan. Jesús okijto: “Ijkuak tikpias itlaj iluitl, xkinnotsa on yejuan mayankej, on yejuan makokoxkej noso ikxitlajkomej, on yejuan koxomej niman on yejuan ciegos. Niman Dios mitstiochiuas pampa [...] yejuamej xueliskej mitskuepiliskej” (Luc. 14:13, 14). Biblia kijtoua: “Akin kuelita tetlayokolis kiteochiuaskej”. Noijki kijtoua: “Paki se akin kiteititia ika kasikamati akin xtlaj kipiya” (Prov. 22:9; Sal. 41:1). Kema, tikinpaleuiyaj oksekimej pampa yejon melak techyolpaktia. w18.08 21, 22 párrs. 15, 16

Ipan yejuin tonaltin, melak ouijtika tikitas tla itlaj yemelak. ¿Tleka? Pampa miyekpa xnochi kuajli techijliaj, noso miyek tlen techijliaj xmelauak niman noijki pampa titlajtlakolejkej. ¿Tlenon uelis techpaleuis? Tlajtolyekanalistin tlen onokej ipan iTlajtol toTajtsin. Se neskayotl, se tlajtolyekanalistli techmachtia ika akin tlanankilia ijkuak xikuajli kikaki tlenon opanok, yejua xtlamachilise niman tepinajti (Prov. 18:13). Okse tlajtolyekanalistli techilnamiktia ika xkipiya nochi tikneltokaskej tla xtikmatij tla yemelak ijkon (Prov. 14:15). Niman noijki tiuelij ika maski yotiuejkaujkej tiktekichiuilijtokej Jehová, xkipiya topaleuiskej san ipan totlamachilis. Itlajtolyekanalisuan Biblia techtlajpiyaj pampa techmachtiaj matikitakan tla itlaj yemelak ijkon opanok niman kuajli matitetlajtoltikan pampa ijkon tikasikamatiskej tlen yemelak niman tikchiuaskej tlen kuajli. w18.08 7 párr. 19

Ijkuak toapolaktiaj, tikteititiaj ixpan oksekimej ika aman tonemilis iyaxka Jehová niman ika tiknektokej tiktlakamatiskej. Jesús noijki okichiuj yejuin ijkuak onoapolakti, pampa ijkon kentla kijlitoskia iTaj: “Nikchiuas tlen tejua tikneki, noTajtsin, melak nechyolpaktia” (Sal. 40:7, 8). ¿Kenon onomachili Jehová ijkuak Jesús onoapolakti? Biblia kijtoua: “Nimantsin on iluikak otlapou, niman yejua okitak iEspíritu Dios uajtemouaya ken itlaj paloma ipan. Kemaj okakistik se tlajtojli ne iluikak yejuan okijtoj: ‘Yejua in yejua notlajsojkaKonetsin yejuan itech nipaktikajʼ” (Mat. 3:16, 17). Jehová melak okiyolpakti ijkuak okitak ika iKoneuj, akin maski iyaxka katka, kinektoya san yejua kitekichiuilis. Noijki ijkon, Jehová melak kiyolpaktia ijkuak itech tosentemakaj, niman yejua techteochiuas (Sal. 149:4). w18.07 23 párrs. 4, 5

Ijkuak okijto “matimechkixtilikan”, kanaj yejua noteneujtoya niman kiteneujtoya Aarón. Tlen okijto kuajli okiteititi ika xkitlakaitstoya Jehová, akin okichiuj yejon milagro. Nesi ika kema ijkin opanok ipampa tlen kijtoua Salmo 106:32, 33: “Yejuamej okikualanijkej ijkuak nemiyaj Meribá kampa onkatka atl, niman inpampa, Moisés okixnamik tlen xkuajli. Yejuamej okikualanijkej, niman yejua xokinemili tlen okijto ika ikamak” (Núm. 27:14). Moisés xokitlakaitak Jehová ken kinamikiya. Yejua okijli Moisés niman Aarón: “Nemejuamej onenkixnamijkej tlen onemechnauatij” (Núm. 20:24). Kuajli tikitaj ika okichiujkej se ueyi tlajtlakojli. Yeuejkaui, Jehová yokimijlika miyekej israelitas ika xkalakiskiaj Canaán pampa xokitlakamatkaj (Núm. 14:26-30, 34). Kuakon, kinamikiya ika Jehová noijki ijkon makichiuili Moisés: xkikauiliskia makalaki ipan Tlajli tlen yokimijlikaj kinmakaskej. w18.07 14 párrs. 9, 12; 15 párr. 13

Tla se tokniuj xkoni alcohol pampa xkikauilia itlamachilis, maski technamikiskia tiktlapejpeniskej tikoniskej alcohol, ¿xmelak ika xtikchiuaskiaj pampa xtiknekij ika tokniuj oksejpa ompa mauetsi? Kema, ijkon tikchiuaskiaj. Nemij tokniuan akin melak tlauaniyaj ijkuak xkitekichiuiliayaj Jehová, san ika, aman kuajli yokijtokej ika nion achijtsin xkoniskej alcohol. Tikmatstokej ika xtiknekij tikchiuaskej oksejpa mapeua makoni alcohol niman matlajyoui (1 Cor. 6:9, 10). Ika yejon, tla tiktekiuiltiliaj alcohol se tokniuj niman xkiselia, xtikititiskiaj ika tiktlasojtlaj tla tikchiualtiaj makoni. Matikitakan ineskayo Timoteo. Ijkuak kipiaya 20 xiuitl, pampa xkinekiya kintlajkalis judíos akin kinnojnotsaskia, okinek kinochiuilis circuncisión, itlaj tlen melak tekoko. Ijkon okiteititi ika noijki tlanemiliaya ken Pablo, itlatitlankauj Cristo (Hech. 16:3; 1 Cor. 9:19-23). ¿Niman tejuamej? ¿Noijki tiknektokej tikchiuaskej tlen ouijtika niman ijkon tikinpaleuiskej oksekimej? w18.06 18, 19 párrs. 12, 13

Ijkuak yakaj tikixmati akin xiteixpantijkauj Jehová, ¿tlenon tikmati itech? Kanaj xmiyek tikmati. Kanaj san tikmatstok kenon itoka, kenon tlachia niman okseki tlemach. San ika, xijkon panoua ijkuak tikixmati se iteixpantijkauj Jehová. Tikmatstok ika yejua kitlasojtla Jehová niman ika toTajtsin okitak itlaj tlen kualtsin ipan iyojlo niman okuajuikak ipan ikalpan (Juan 6:44). Niman maski ualeua itech okse país niman, xijkon chanti ken tejua, itikmatstok miyek itech niman yejua noijki miyek kimatstok motech. Se neskayotl, tejua nimantsin tikmati ika san noijki tlajtoua ken tejua: tlajtoua “chipauak tlajtojli” itech tlen melauak. Kijtosneki ika nenomemej nenkimatij ika nentlaneltokaj itech toTajtsin, nenkitlakamatij itlanauatiluan toTajtsin niman sa no yejua tlamachialistli nenkipiyaj ika tlayekapan, niman okseki itlaj. Yejuin itlaj tlen melak noneki matikmatikan itech se tlaltikpakchane, pampa yejuin techpaleuiya matitlaneltokakan itech niman kuajli iuan matouikakan. w18.12 21 párrs. 9, 10

Cristo okiyekan grupo akin tlayekanaya ipan nochi tlanechikoltin niman ijkon makiteasikamachilti ika tokniuan akin xjudíos katkaj xnonekiya nochiuiliskej circuncisión (Hech. 15:19, 20). Maski yopanoka seki xiujtin ika onoijtoka yejon, miyekej tokniuan judíos ok kinchiuiliayaj inkoneuan circuncisión. Kanaj totlajtoltiaj: “Tla imikilis Jesús okipopolo Tlanauatijli, ¿tleka okitekauili ika sekimej ok makiteijlikan ika nonekiya nochiuiliskiaj circuncisión?” (Col. 2:13, 14, TNM). Sekimej kintekiyomaka nimantsin kitlakamatiskej tlen yenkuik notetomilia ipan ikalpan toTajtsin. Tokniuan judíos okintekiyomakak kasikamatiskej ika xok nonekiya nochiuiliskej circuncisión, niman opanok miyek tiempo (Juan 16:12). Yejuamej yokitsontekontlalijkaj ika circuncisión kineskayotiaya ika nouikayaj iuan toTajtsin (Gén. 17:9-12). Oksekimej kinmojtiaya tla okintlaueltokakej pampa aman tlamantikej yeskiaj (Gál. 6:12, TNM). San ika, sakin Cristo okseki okimijli itech yejuin ika amatlajkuiloltin tlen okijkuilo Pablo (Rom. 2:28, 29; Gál. 3:23-25). w18.10 24, 25 párrs. 10-12

Caifás okintitlan soldados makajsikan Jesús ijkuak itlayoua katka. Jesús kimatiya ika panoskia yejon. Yejua ika, ijkuak sa ika tlami otlakua inuan itlatitlankauan, okintlajtlanili makitejtemokan seki espadas. San nonekiskia ome espadas niman ijkon kimititis se ueyi tlamachtijli (Luc. 22:36-38). Ipan yejon yeuajli, Pedro okikualani tlen kichiuilijtoyaj Jesús, kuakon, ika se espada okikoko se tlakatl akin noijki teuan okajsito Jesús (Juan 18:10). San ika, Cristo okijli Pedro: “Xkejeua moespada kampa otikxikopin, pampa nochimej yejuan temiktiaj ikan espada, no yejua ika mikiskej” (Mat. 26:52, 53). Tlen okinmachti notlajtolnamikiya ika tlen yokijtoka ipan se teoyotl: ika inomachtijkauan xkipiya ika nouikaskej ken tlaltikpakchanejkej (Juan 17:16). Nonekiya kikauiliskej ika toTajtsin makiyektlali tlen kichiua matitlajyouikan. Yejua ika, tejuamej nochipa tiyolseujkej niman san sekan tinemij. Uelis tikmatstoskej ika Jehová kiyolpaktia kitas kenon ikalpan san sekan nemi xijkon ken yejuin tlaltikpaktli (Sof. 3:17). w18.06 7 párrs. 13, 14, 16

Aman matikitakan kenon Satanás techixnamiki pampa xkineki matiyolmelaujkanemikan itech Jehová. Se neskayotl, uelis kitekitiltis ikojtilis niman kichiuas ika tekiuajkej maka sa matechkauilikan matitenojnotsakan. Noijki ijkon, uelis kichiuas ika akin imiuan titekitij noso tomachtiaj matechpijpinaujtikan pampa tiknekij toyekanaskej ijkon ken toTajtsin technauatia (1 Ped. 4:4). Noijki uelis kichiuas ika tochanejkauan matechijlikan maka matiakan tlanechikoltin, maski kanaj kinemiliaj ika ijkon techpaleuijtokej (Mat. 10:36). ¿Kenon uelis tikxikoskej nochi yejuin? Kachtopa, noneki matikasikamatikan ika yejuin panos, pampa Satanás nochipa techixnamiktika (Apoc. 2:10). Ika ome, maka matijkauilikan ika yejuin tlaueltin makichiua matikilkauakan tlen ueyi kijtosneki: ika Satanás kijtoua ika san tiktekichiuiliaj toTajtsin ijkuak techpaleuiya niman ika tijkauaskej ijkuak tikixnamikiskej tlen ouijtika (Job 1:9-11; 2:4, 5). Niman, ika yeyi, matiktlajtlanilikan Jehová matechmaka kojtilistli niman ijkon titlaxikoskej. Matikilnamikikan ika yejua xkeman techkauas (Heb. 13:5). w18.05 26 párr. 14

Maski kemantika uelis tikitaskej ika tlajtoltin tlen tikteijliaj xnoneluayotia ipan inyojlo tlaltikpakchanejkej, xkipiya ika tikilkauaskej ika melak ueyi kijtosneki totekiyo ika tiktokaj xinachtli. Melauak ika miyekej tlaltikpakchanejkej xtechkakij, san ika, kema kitaj tlen tikchiuaj. Kitaj ika nochipa kuajli totlakentiaj, titetlakaitaj niman nochipa tipaktiuej. Uelis panos ika sakin sekimej kipatlaskej tlen xkuajli kinemiliayaj totechkopa ipampa tlen kuajli tikchiuaj. Sergio niman Olinda, kijtouaj: “Ouejkauj ika xok tiayaj kampa plaza pampa otikualokaj. Ijkuak oksejpa otokuepkej, tlaltikpakchanejkej techtlajtoltiayaj tlenon topan onochiujka niman techijliayaj ika otechtemojkaj”. Biblia techijlia: “Maka manoseui moma”. Kema ijkon, tla nochipa tiktokatokej xinachtli itech Tekiuajyotl, titlapaleuijtoskej ika nochimej kalpamej makikakikan kuajli tlajtoltin (Mat. 24:14, TNM). Niman melak techyolpaktis tikmatiskej ika Jehová kiyolpaktia tlen tikchiuaj, pampa yejua kintlasojtla akin “kipiaj kuajli intlakilyo” (Luc. 8:15). w18.05 16 párrs. 16-18

Ijkuak tlaltikpakchanejkej otlajtlakojkej, Jehová okiteititi ika yejua toTajtsin akin teyolchikaua. Maski san kemach okixnamijkaj ipan Edén, yejua okijto se teotlajtojli tlen, ijkuak nasikamatiskia, kinyolchikauaskia inkoneuan Adán. Tiknextiaj yejuin teotlajtojli ipan Génesis 3:15 niman kijtoua ika yejkos tonajli ijkuak kipopoloskej Satanás niman nochi tlen xkuajli kichiua (1 Juan 3:8; Apoc. 12:9). Noé onen ipan tonaltin ijkuak tlaltikpakchanejkej xkinekiyaj kinisiuiskej toTajtsin, niman san yejua niman ichanejkauan kiueyichiuayaj Jehová. Kanaj Noé onajman pampa nochiuiyan kitaya ika tlauisokiyaj niman auilnemiyaj (Gén. 6:4, 5, 9, 11; Jud. 6). San ika, Jehová okijli Noé ika kipopoloskia yejon tlaltikpaktli tlen xkuajli katka niman okijli tlenon kichiuas niman ijkon makisaskej ichanejkauan (Gén. 6:13-18). Yejon kanaj melak okiyolchikauj. w18.04 15 párrs. 1, 2

Tla xsajnoye titenotskej noso xtikmatij tlenon tikijtoskej, xkipiya tiknemiliskej ika xuelis tikinyolchikauaskej oksekimej. Melauak, xouijtika tikchiuas. Se neskayotl, ijkuak tiktlajpalouaj se tokniuj, uelis tikyejyekoskej tiktlajpaloskej ika pakilistli. Tla yejua xotechuetskili, kanaj pampa kixnamiktika se tlauejli niman kipoloua yakaj iuan tlajtos. Kanaj melak tikpaleuiskej kuajli manomachili tla tijkakij tlen techijlia (Sant. 1:19). Tinochimej uelis tikinpaleuiskej akin noneki makinyolchikauakan. Tekiuaj Salomón okijkuilo: “Se tlajtojli tlen noijtoua ijkuak noneki, ¡melak kuajli!”. Niman noijki okijto: “Ixtololojtin tlen petlanij teyolpaktiaj; se kuajli tlajtojli kinchikaua omiyomej” (Prov. 15:23, 30). Pablo okiteititi ika tokuikatiskej san sekan tlakuikaltin itech Tekiuajyotl noijki uelis kichiuas kuajli matomachilikan (Hech. 16:25; Col. 3:16). Toyolchikauaskej melak noneki aman ika tikitaj ika iyejkotika ijkuak tlapopoliuis (Heb. 10:25). w18.04 23 párr. 16; 24 párrs. 18, 19