Diciembre

Tla xtoteltiaj niman san totoka titlajtojtiuetsij, uelis panos tlen xkuajli. Kanaj tikixmatij yakaj akin chanti kampa tokniuan xkinkauiliaj makiueyichiuakan Jehová. ¿Kuajli yeskia tla tikijliaj matechijli kenon kiueyichiuaj Jehová ipan yejon kalpan? Yemelak ika tiknekij tikasikamatiskej yejon pampa tikintlasojtlaj tokniuan niman tiknekij tikmatiskej kenon nemij. Noijki tikuelitaskiaj tikinteneuaskej ipan toteoyouan. San ika, yejuin itlaj tlen xnoneki tikmatiskej, ika yejon, noneki toteltiskej niman xtiktlajtoltiskej yejon. Tla tikchiualtiaj matechijli, tikteititijtoskiaj ika xtiktlasojtlaj yejon tokniuj nion tokniuan akin ompa chantij. Tla techijliaj tlen xnoneki tikmatiskej, uelis panos tlen melak xkuajli. Noijki, nion se tokniuj akin chanti kampa xkinkauiliaj makiueyichiuakan Jehová, xkiteijliskia kenon tenojnotsaj ompa niman kenon kitekichiuiliaj toTajtsin. w20.03 21, 22 párrs. 11, 12

ToTajtsin xkinekiya matimikikan, kinekiya nochipa matinemikan. San nonekiya ika Adán niman Eva makitlakamatikan Jehová, yejua okimijli yejuin: “On kojtli yejuan temachistia on tlen kuajli niman on tlen xkuajli, maka tikuas itlakyo, pampa ipan on tonajli ijkuak tikuas itlakyo, xmatstia ika ika onkaj timikis” (Gén. 2:16, 17). San ika, Satanás okitekitilti se kouatl niman okijli Eva tlen kijtoua tlaxelojli tlen aman tikitstokej. Teajman ika Eva okineltokak yejon tlakajkayaualistli niman okikua itlakilyo yejon kojtli. Sakin, iueuentsin noijki okikua (Gén. 3:6). Ijkon, tlajtlakojli niman mikilistli opeuj kimijtlakoua tlaltikpakchanejkej (Rom. 5:12). Ijkon ken toTajtsin yokijtoka, Adán niman Eva omijkej. Niman Satanás xokikajkauj ika tekajkayaua itech mikilistli. Sakin, okijto okseki tlen xmelauak itech mikilistli. Opeuj kichiua manoneltoka ika ijkuak yakaj miki, ialma xmiki niman oksekan yauj. Hasta aman melak miyekej ijkon yokinkajkayaujkej (1 Tim. 4:1). w19.04 14, 15 párrs. 3, 4

Kokonej xikuajli kimatij tlenon uelis kimijtlakos. Ika yejon, akin tenajnauiltia nimantsin ueli kikajkayaua se konetl. Tlen ika kikajkayaua melak kitlajyouiltia, uelis kijlis ika yejua kipiya tlajtlakojli, ika xakaj kipiya ika kijlis tlen panoua, ika xakaj kikakis nion xakaj kineltokilis tla kijtoua tlen opanok, noso ika ijkon kichiuilia pampa kitlasojtla. Panos miyek xiuitl, niman konetl kinemilijtos ika yemelak tlen kijliaya. Konetl noskaltijtias niman nochipa kinemilis ika tsokuiltik, ika xtlaj ika tepaleui niman ika xkinamiki yakaj makitlasojtla. Itech nochi tlen yotikitakej, xtechmojkatlachialtia ika ijkuak yakaj kinajnauiltiaj uejkaui tlajyouiya. Kuajli tikitaj ika tinemij sa itlamiyan tonaltin, tlaltikpakchanejkej xtetlasojtlaj nion xteikneliaj, niman “xkuajkualtin tlakamej niman tlakajkayajkej” más ijtlakaujtiuj inyojlo (2 Tim. 3:1-5, 13). w19.05 15 párrs. 7, 8

¿Kenon otechmachti Jesús? Kachtopa, ika tlen kijtouaya. Yejua temachtiaya tlen melauak itech toTajtsin, okiteititi tleka tinemij niman otemachti ika san iTekiuajyo toTajtsin uelis kiyektlalis tlen techtlajyouiltia, ika yejon, tlen kijtouaya kipiaya kojtilistli (Luc. 24:19). Jesús noijki otemachti ika tlen okichiuj. Okimititi inomachtijkauan kenon kipiya ika nemiskej (Juan 13:15). ¿Kemanon otemachti Jesús? Ijkuak otenojnotstinen ipan tlaltikpaktli (Mat. 4:23). Noijki okinmachti inomachtijkauan sakin ika oyoliujka. Matikilnamikikan ika ouajnonexti imixpan kanaj 500 inomachtijkauan niman okiminauati matemachtikan (Mat. 28:19, 20; 1 Cor. 15:6). Pampa Jesús yejua akin kiyekana tlanechikojli, okinmachti inomachtijkauan maski yonokuepka ne iluikak. Xkita yejuin, kanaj ipan xiuitl 96, itechkopa apóstol Juan okinyolchikauj tokniuan tlapejpeniltin niman noijki okinnojnots (Col. 1:18; Apoc. 1:1). w19.05 3 párrs. 4, 5

Aman melak ouijtika tikpiyas tlen ika timopanoltis. Miyekej tokniuan tekitij nochi tonajli niman ijkon kinmakaskej inchanejkauan tlen kikuaskej niman tlen ika notlakentiskej. Oksekimej melak uejkauij niman ijkon ajsiskej kampa tekitij niman nokuepaskej inchan. Niman seki tekitl tlen kichiuaj tokniuan melak tesiauiti. Ijkuak tlami tonajli, yejuin tokniuan melak siaujtokej niman ouijtika kimachiliaj nomachtiskej. Maka keman matikilkauakan ika tinochimej kipiya ika tomachtiskej iTlajtol toTajtsin niman amatlajkuiloltin, san ika, kipiya ika tomachtiskej ken kinamiki. San uelis kuajli touikaskej iuan Jehová niman tikpiyaskej nemilistli tlen xkeman tlamis tla kuajli tomachtiaj (1 Tim. 4:15, 16). Sekimej tokniuan mojmostla saniman nokuiteuaj niman ijkon nomachtiskej, pampa ijkuakon inpan inchan xakaj najnauati niman xtlaj kakisti, niman más kuajli tlanemiliaj pampa yonoseuijkej. Oksekimej nomachtiaj ika tlayoua, kitaj kanon ika inyojlo uelis nomachtiskej niman tlanemiliskej. w19.05 26 párrs. 1, 2

Xuelis nimantsin topatlaskej. Kanaj nonekis melak tokojtilijtoskej miyek xiuitl (2 Ped. 1:5). Noneki tokojtilijtoskej niman ijkon tikpatlaskej tonemilis. Kachtopa noneki tikchiuaskej teoyotl. Noneki tiktlajtlaniskej san noijki tlen okitlajtlan salmista, akin okijto: “Ay Dios, xnechmaka se noyojlo yejuan chipauak. Xnechmaka sen nekilistli yejuan yenkuik niman yejuan nochipa kinekis mitstlakamatis” (Sal. 51:10). Matikselikan ika noneki tikpatlaskej toyojlo niman totlamachilis. Noijki noneki tiktlajtlaniliskej Jehová matechpaleui. Ika ome, noneki titlanemiliskej. Mojmostla matikpouakan Biblia niman matitlanemilikan itech tlen noneki tikpatlaskej (Salmo 119:59; Heb. 4:12; Sant. 1:25). Kuajli matikitakan tla noijki yopeuj titlanemiliaj ken tlaltikpakchanejkej. Noneki tikitaskej kanon topopolouaj niman tokojtiliskej xok ijkon tikchiuaskej. w19.06 8 párr. 1; 10 párrs. 10, 11; 12 párr. 12

Ijkuak itlaj tiktlapejpeniskej tikchiuaskej, matikijtokan kemanon tikchiuaskej niman maka matikpatlakan. Maka matiknemilikan ika ajsis se tonajli ijkuak melak kuajli tikchiuaskej yejon, pampa kanaj xkeman ajsis yejon tonajli (Ecl. 11:4). Matiktekitiltikan totiempo niman tokojtilis ipan tlemach tlen ueyi kijtosneki niman maka ipan tlemach tlen xueyi kijtosneki (Filip. 1:10). Tla tiuelij, matikitakan kemanon uelis tikchiuaskej tlen yotiknemilijkej ijkuak xakaj nion itlaj uelis techpasolos. Matikimijlikan oksekimej ika tiknekij tikchiuaskej itlaj. Kanaj uelis tikseuiskej toteléfono noso kanaj tokojtiliskej xtikitaskej ijkuakon correos electrónicos noso redes sociales. Uelis tikijtoskej ika ijkuak tikchiuaj tlen tikijtouaj, kentla tajsiskiaj kampa tiknekiyaj. Kemantika se ojtli tsauktika, san ika, pampa tiknekij tajsiskej kampa yotiknemilijkej, tikajsij okse ojtli tlen san no ompa techuikas kampa tiknekij tajsiskej. Kuakon, tla tiknemiliaj tlenon panos ijkuak tikchiuaskej tlen yotikijtokej, tiknektoskej titlaxikoskej maski tikixnamikiskej tlen ouijtika (Gál. 6:9). w19.11 30 párrs. 17, 18

¿Tlenon noneki mitsyolmapeuas xmoapolakti? Tejua melak kuajli yotimomachti Biblia, ika yejon, miyek yotiuel itech Jehová: yotiuel kenon yejua niman yotikasikamat tleka kichiua seki tlemach. Nochi yejuin yoajsik ipan moyojlo niman aman melak tiktlasojtla Jehová, yejon tlasojtlalistli tlen tikmachilia noneki mitsyolmapeuas xmoapolakti. Tlen yotiuel ipan Biblia niman tlen aman tikneltoka, noijki mitsyolmapeuas xmoapolakti. Xkilnamiki tlen okijto Jesús ijkuak otechnauati matitenojnotsakan (Mat. 28:19, 20, TNM). Jesús okijto ika akin noapolaktiaj noneki noapolaktiskej “ipampa itoka toTajtsin niman ipampa teKoneuj niman ipampa espíritu santo”. Yejuin kijtosneki ika noneki tikneltokas tlen kijtoua Biblia itech Jehová, itech iKonetsin, Jesús, niman itech espíritu santo. Yejuin tlen temachtia Biblia kipiya kojtilistli niman uelis ajsis hasta ipan moyojlo. w20.03 9 párrs. 8, 9

Jehová xsan okintitlanka iluikaktekitkej niman ijkon makijlitij Lot ika kipopoloskiaj Sodoma, yejua noijki okintitlanka niman ijkon makipaleuitij mamakisa (Gén. 19:12-14, 17). Noijki ijkon, kanaj nonekis tikijliskej se tokniuj ika tlen kichiujtika uelis melak kijtlakos. Maski tla tikitaj ika yolik kichiua tlen Jehová kijlia ipan iTlajtol, noneki tikijyouiskej. Matikchiuakan ken yejon omemej iluikaktekitkej. Maka matosiaujkauakan niman maka matiktlalkauikan. Matiktejtemokan kenon tikpaleuiskej (1 Juan 3:18). Ueliskia tikijtoskej ika kanaj nonekis tikmatilanaskej, ijkon tikpaleuiskej makichiua tlen kijtoua Biblia Jehová san ueliskia kitaskia tlen xkuajli kichiuaya Lot, san ika, xijkon okichiuj. Sakin, Jehová okichiuj ika apóstol Pedro makiteneua Lot ken se tlakatl yolmelajki (Sal. 130:3). ¿Uelis tikimitaskej oksekimej ijkon ken Jehová okitak Lot? Tla tikitaj tlenon kuajli kichiuaj tokniuan, xtikmachiliskej tla ouijtika tikimijyouiskej. Niman yejuamej más kinokauiliskej matikinpaleuikan. w19.06 21 párrs. 6, 7

Tla xok techkauiliaj matikueyichiuakan Jehová, kanaj totlajtoltiskej tla nonekis tonchantiskej kampa kema matechkauilikan. Xakaj uelis kitlapejpenis yejuin topampa. Sekimej tokniuan kanaj kinpaleuis tla nomachtiaj tlen okichiujkej tokniuan akin onenkej ipan kachtopa siglo ijkuak okintlaueltokakej. Inomachtijkauan Jesús akin nemiyaj Jerusalén oyajkej oksekan itech Judea niman Samaria, niman sekimej hasta oyajkej Fenicia, Chipre niman Antioquía (Mat. 10:23; Hech. 8:1; 11:19). San ika, Pablo otenojnots kampa kintlaueltokayaj (Hech. 14:19-23). ¿Tlenon tiuelij itech nochi yejuin? Ika akin kinyekanaj inchanejkauan noneki yejuamej kitlapejpeniskej tlenon kichiuaskej. San ika, kachtopa noneki kinotsaskej Jehová niman kuajli tlanemiliskej itech inchanejkauan, noneki kinemiliskej kenon kinpaleuis niman kenon kimijtlakos tla oksekan onchantij. Xkipiya ika tikintejteneuaskej oksekimej ipampa tlen kichiuaj. w19.07 10 párrs. 8, 9

Jesús otechnauati: “Xuiyan niman xkinmachtikan tlaltikpakchanejkej ipan nochi kalpamej” (Mat. 28:19, TNM). Xsan noneki tikititiskej akin tikmachtijtokej tlenon kintlajtlanilia Jesús inomachtijkauan, noneki tikpaleuiskej makimati kenon yemelak kichiuas ken Cristo. Tla tikitaj ika nokojtilia kichiuas tlen kijtoua Biblia, noneki matikpaleuikan. Sekimej akin nomachtijtokej nimantsin kipatlaj ken tlanemiliaj niman kikajkauaj tlen xkuajli kichiuayaj, kemantika san panoua seki metstin. San ika, oksekimej más uejkauij. Tlen ipan onochiuj se misionero ne Perú techititia ika melak kuajli tla xtosiaujkaujtiuetsij. Yejua kijtoua: “Yonikmachtijka Raúl ipan ome libros. San ika, sanken xkuajli nemiya. Melak kipiaya tlauejli iuan isiuauj, tlauijuikaltiaya niman inkoneuan xkitlakaitayaj. San ika, yejua miyekpa uajlaya tlanechikoltin, ika yejon, nikomintlajpalouaya. Ijkuak yopanoka yeyi xiuitl ika onikixmatka Raúl, yejua opeuj nopatla niman ouel onoapolakti”. w19.07 15 párr. 3; 19 párrs. 15-17

Matikitakan tlenon ipan nochiujtoya Pablo ijkuak okintlajkuilouili filipenses. Yejua tsauktoya Roma ipan se kajli. Kuakon, xueliya ontenojnotsaya. Maski ijkon, yejua kinnojnotsaya akin kontlajpalouayaj niman kijkuilouaya cartas tlen kintitlaniliaya tlanechikoltin. Pablo kimatstoya ika ijkon ken Jesús, nonekiya nochipa nokojtilijtos. Ika yejon, Pablo okijto ika tejuamej kentla totlalojtoskiaj ipan se ojtli (1 Cor. 9:24-27). Akin notlalouaj melak kinekij tetlaniskej niman nokojtiliaj xontlachiaskej oksekan. Se neskayotl, akin notlalouaj kemantika kanaj panouaj kampa onka miyek tiendas noso okseki itlaj. ¿Xmelak ika nion se akin notlaloua noteltis niman ijkon kitas tlen kinemakaj ipan tiendas? Xakaj ijkon kichiuaskia pampa nochimej kinekij tetlaniskej. Tejuamej noijki totlalouaj niman xkipiya ika oksekan tontlachixtiaskej. Ijkon ken Pablo, tla san tiknemiliaj ika titetlaniskej niman tla tokojtiliaj, kuakon, kema titetlaniskej. w19.08 3 párr. 4; 4 párr. 7

Ijkuak opeuj tikintlakamatij itlanauatiluan toTajtsin, opeuj topatlaj niman opeuj tikneltokaj tlen kijtoua Biblia. Tochanejkauan kanaj xuelij kineltokaj tleka ijkon opeuj tikchiuaj. Kanaj yokitakej ika xok imiuan tiiluipanouaj niman ika xok tokalaktiaj ipan política. Niman kanaj sekimej yopeujkej techtlauelitaj (Mat. 10:35, 36). San ika, xkipiya ika tiknemiliskej tla xkeman nopatlaskej. Tla xok tokojtiliaj tikinpaleuiskej makasikamatikan tlen tikneltokaj, kuakon, kijtosneki yotiknemilijkej ika xkinnamiki makiselikan nemilistli tlen xkeman tlamis. San ika, xtejuamej totekiyo tikijtoskej yejon. Jehová yokitekitlali Jesús niman ijkon yejua makita akinomej kiseliskej noso xkiseliskej nemilistli (Juan 5:22). Tla tikimijyouiyaj tochanejkauan, kanaj sakin kinekiskej kikakiskej iTlajtol toTajtsin. Noneki kuajli tikinnotsaskej, san ika, noneki tikchiuaskej ken yotikijtokej maski tikixnamikiskej tlen ouijtika (1 Cor. 4:12b). Kanaj tochanejkauan xnimantsin kasikamatiskej ika melak tiknekij tiktekichiuiliskej Jehová. w19.08 17 párrs. 10, 13; 18 párr. 14

Ijkuak tiuelij tikxikouaj se tlauejli, timiyekej yotikijtokej ika xtitlaxikoskiaj tla san tejuamej tikixnamikiskiaj. Kanaj ijkon otikijtokej ijkuak otikxikojkej se kokolistli noso ijkuak otomijkatijkej. Tikmachiliaj ika san ouel otikixnamijkej yejon pampa iespíritu santo Jehová otechmakak “on ueyi poder” (2 Cor. 4:7-9). Melak tiknekij ika espíritu santo matechpaleui. ¿Tleka? Pampa tiknekij tikxikoskej nochi tlen xkuajli nochiua ipan yejuin tlaltikpaktli (1 Juan 5:19). Noijki, kipiya ika tikimixnamikiskej “on xkuajkualtin espíritus” (Efes. 6:12). Iespíritu santo Jehová techkojtilia niman ijkon matikchiuakan tlen noneki maski tikpiyaskej miyek tlauejli. Apóstol Pablo kinemiliaya ika “ipoder Cristo” kipaleuijtoya makitekichiuili Jehová maski kipiaya miyek tlauejli (2 Cor. 12:9). w19.11 8 párrs. 1-3

Biblia uelis kuajli mitsititis tlen yemelak okichiuj Jesús mopampa. Xchiua tlen noneki niman ijkon tiktlasojtlas Jesús. Tla ijkon tikchiua, más tiktlasojtlas Jehová. Ijkin panoua pampa Jesús kuajli techititia kenon iTaj. Kuakon, ijkuak más tiuelis itech Jesús, más kuajli tikixmatis Jehová niman más tiktlasojtlas. San xkonnemili kenon Jesús melak kimikneliaya akin xakaj kintlasojtlaya, ken akin xkipiayaj tomin, akin kualouayaj niman akin xkojtikej katkaj. Noijki xtlanemili itech tlen Jesús mitsijlia, niman xkita kenon melak kuajli tinemis tla tiktlakamati (Mat. 5:1-11; 7:24-27). Melak tiktlasojtlas Jesús tla titlanemilia itech tlen okichiuj mopampa. Yejua okitemakak inemilis niman ijkon Jehová uelis techtlapopoluis (Mat. 20:28). Tla tikasikamati ika Jesús onotemakak mopampa, uelis kichiuas xmoyolkuepa niman xchiua tlen noneki niman ijkon Jehová mamitstlapopolui (Hech. 3:19, 20; 1 Juan 1:9). Niman, tla melak tikintlasojtla Jehová niman Jesús, melak tiknekis timouikas imiuan akin nemij ipan ikalpan Jehová. w20.03 5, 6 párrs. 10-12

Se tokniuj uelis kinemilis ika san yejua uelis kuajli kichiuas se tekitl. Noso se tokniuj siuatl kanaj kinemilis ika iueuentsin más kuajli uelis kichiuas se tekitl xijkon ken okse tokniuj. Tla yemelak tiyolyemankej, xijkon titlanemiliskej. Matikitakan tlenon tiuelij itech tlen okichiuj Moisés ijkuak oksekimej okiselijkej okseki tekitl. Moisés kipatiojkaitaya ika okitlapejpenijkaj makinyekana israelitas. San ika ¿tlenon okichiuj ijkuak Jehová okinmakak iespíritu oksekimej israelitas niman ijkon makipaleuikan ika itekiyo? Moisés xokualan (Núm. 11:24-29). Noijki Moisés okiteititi ika yolyemanki katka ijkuak okitekauili ika oksekimej makipaleuikan kinyolkuitiskej israelitas (Éx. 18:13-24). Pampa nemiyaj oksekimej jueces, nimantsin noyektlaliayaj tlaueltin niman israelitas xnonekiya uejkaujtipan tlamachixtoskej. Moisés más kajmanaya ika israelitas kuajli manemikan xijkon ken kiselis okseki tekitl. ¡Melak kuajli tlen okichiuj Moisés! Matikilnamikikan ika Jehová xsan kita tlen uelij tikchiuaj niman ijkon techtekitiltis, yejua más kita tla tiyolyemankej. w19.09 5, 6 párrs. 13, 14

Xtikmatij tlenon kijtoskej tekiuajkej ijkuak kimixnamikiskej religiones tlen xmelajkej. Kanaj kijtoskej ika religiones melak nokalaktiaj ipan política niman kichiuaj ika maonia tlauejli ipan tlaltikpaktli. Noso kanaj kijtoskej ika religiones melak yonotomintijkej niman ika melak miyek tlemach kipiyaj (Apoc. 18:3, 7). Noijki, uelis tikijtoskej ika ijkuak tekiuajkej kimixnamikiskej religiones, xkijtosneki tla kinmiktiskej akin ompa nemij. Nesi ika tekiuajkej kinpopoloskej religiones. Ijkuak yejon religiones yopopoliujkej, akin ompa nemiyaj kasikamatiskej ika intlayekankauan san okinkajkayaujkej niman kanaj kijtoskej ika yejuamej xompa teuan nemiyaj. Tikmatstokej ika xmelak uejkauis ijkuak kipopoloskej Ueyixtika Babilonia (Apoc. 18:10, 21). Jehová yokijto ika kichiuas maka “miyek tonaltin” mauejkaui “on temojtij tlajyouilistli” pampa kineki mamakisakan “on yejuan yokintlapejpenij” niman xkineki mapopoliui religión tlen melauak (Mar. 13:19, 20). w19.10 15 párrs. 4, 5

Nantin, kanaj nemotajuan nimantsin kualaniyaj niman mechtlaueltsajtsiliayaj. Kuakon, kanaj nemejuamej nenkinemiliayaj ika ijkon nonekiya nenkimiskaltiskej nemochanejkauan. Niman maski yonenuelkej kenon Jehová kineki xkintlajpiyakan nemokoneuan, kanaj nenkimachiliskej ouijtika xnimantsin nenkualaniskej, niman más ijkon nenkimachiliskej ijkuak nensiaujtoskej niman ijkuak nemokoneuan xmechtlakamatiskej (Efes. 4:31). Ijkuak ijkon nenkimachiliskej, xnotsakan Jehová (Sal. 37:5). Sekimej nantin ouijtika kimachiliaj kimititiskej inkoneuan ika melak kintlasojtlaj. Yejuin ijkon panoua pampa ijkuak pipitikej katkaj, intajuan xokimititijkej ika kintlasojtlaj. San ika, yejuamej xkipiya ika noijki ijkon kichiuaskej. Nantin akin kinokauiliaj Jehová makinyekana nonekis kimititiskej inkoneuan ika melak kintlasojtlaj. Kanaj ouijtika kitaskej kipatlaskej tlen kichiuaj, san ika, uelis kichiuaskej. Niman ijkon, yejuamej niman inchanejkauan más yolpakiskej. w19.09 18 párrs. 19, 20

Akin kiueyichiua toTajtsin niman melak notekimiktia niman ijkon notomintis kentla kinekiskia kitekichiuilis ome iteko. Xsan Jehová kiueyichiujtika. Itlamiyan kachtopa siglo, tokniuan akin nemiyaj Laodicea noueyimatiyaj pampa kipiayaj tomin niman xitlaj kinpolouaya. San ika, ixpan Jehová niman Jesús yejon tokniuan ixpoliujtoyaj, kinamikiya makimiknelikan, xkipiayaj tomin niman xtlachiayaj, niman tetsotsoltikej katkaj. Jesús xokimajuak tla pampa yejon tokniuan kipiayaj tomin, yejua okimajuak pampa melak kitlasojtlayaj tomin niman xok kuajli nouikayaj iuan Jehová (Apoc. 3:14-17). Tla tikmachiliaj ika peua tiknekij tikpiyaskej miyek tlemach, nimantsin noneki matoyektlalikan (1 Tim. 6:7, 8). Tla xnimantsin toyektlaliaj, toyojlo xeliujtos niman Jehová xkuelitas ken tikueyichiuaskej, pampa kineki san yejua matikueyichiuakan (Deut. 4:24). w19.10 27 párrs. 5, 6

Tlajtojli ika griego tlen notlajtolkuepa ken “okinmapeuj” kijtosneki “okinuikak”. Lucas, akin okijkuilo amoxtli Hechos, okitekitilti se tlajtojli ika griego tlen san noijki kijtosneki niman ijkon kiteneuas se barco tlen kinokauilia makuika ajakatl (Hech. 27:15). Kuakon, ijkuak apóstol Pedro okijto ika espíritu santo “okinuikak” akin okijkuilojkej Biblia, kentla okonteneuj tlen panoua iuan barcos, ijkon okijto se ixtlamatki itech Biblia. Pedro okijtosnek ika ijkon ken ajakatl kuika barco niman ijkon maajsi kampa noneki, espíritu santo okinyekan teotlajtokej niman akin okijkuilojkej Biblia niman ijkon kuajli makichiuakan intekiyo. Sa no yejua ixtlamatki akin otikteneujkaj okijto: “Teotlajtokej kentla okinpatlaujkej invelas”. Jehová okinpaleui ijkuak okinmakak “ajakatl”, kijtosneki, espíritu santo. Niman akin okijkuilokej Biblia onokauilijkej makinyekana espíritu santo. Ijkon ken ijkuak kualtsin ajakatok kichiua ika barco tlen onka itlajkotian mar maajsi ne itenpan mar, ipan yejuin tonaltin espíritu santo techpaleuiya matikxikokan tlauejli niman ijkon uelis tajsiskej ipan yenkuik tlaltikpaktli tlen toTajtsin yotechijli techmakas. w19.11 9 párrs. 7-9

Kemantika toyolajmanaj pampa tikpiyaj miyek tlauejli. San ika, xkipiya ika san nochipa intech titlanemilijtoskej pampa ijkon kanaj tikilkauaskej tlen toTajtsin yokijto kichiuas topampa (Apoc. 21:3, 4). Tla melak toyolajmanaj, kanaj tikmachiliskej ika xok tikojtikej niman xok uelis tiktekichiuiliskej Jehová. Matikitakan kenon se tokniuj akin chanti Estados Unidos ueli kichikaua itlaneltokil maski noneki kitlajpiyas iueuentsin akin melak kualo. Yejua okijkuilo: “Tlen tikixnamiktokej kichiua ika kemantika melak matisiauikan niman matajmanakan, san ika, xtikilkauaj tlen yokijto Jehová kichiuas topampa. Melak niktlasojkamati nochi tlen Jehová techmaka niman ijkon matiyolchikaujkej niman machikaujto totlaneltokil. Yemelak ika tiknekij matechyolchikauakan. Techpaleuiya maka matosiaujkauakan niman matitlaxikokan”. Tlen okijto tokniuj techititia ika uelis tiyolpakiskej niman xtoyolajmanaskej. ¿Tlenon techpaleuis? Tikilnamikiskej ika Satanás kitekitiltia tlen tikixnamikij niman ijkon kitas tla timelajkanemij, tikneltokaskej ika Jehová techyolseuis niman tikpatiojkaitaskej tlen Jehová techmaka niman ijkon machikaui totlaneltokil. w19.11 16 párrs. 9, 10

Tokniuan tlayekankej melak noneki makichiuakan tlen kijtoua Biblia. Tokniuan tlayekankej kimatstokej ika xkipiya ika kiteijliskej tlen tokniuan kimijliaj niman tlen oksekimej xnoneki kimatiskej. Tla kiteijliaj, tokniuan xok intech tlaneltokaskej niman xok kintlakaitaskej. Tlayekankej xuelis kiteijlitinemiskej tlen xmelauak (1 Tim. 3:8). Kema, yejuamej xkipiya ika tekajkayauaskej nion tetejteneuaskej. Tla se tlayekanketl kitlasojtla isiuatsin, xkijlis tlen xnoneki kimatis. Se tokniuj siuatl uelis kipaleuis iueuentsin akin tlayekanketl nochipa makitlakaitakan. ¿Kenon? Tla xkichiualtia makijli tlen yejua nion oksekimej xnoneki kimatiskej. Tla ijkon kichiua, xsan kipaleuiya iueuentsin, noijki kiteititia ika kintlakaita tokniuan akin itech tlaneltokaj iueuentsin. San ika, tlen más ueyi kijtosneki, kiyolpaktia Jehová pampa kichiua ika tokniuan ipan tlanechikojli kuajli manouikakan niman kuajli manemikan (Rom. 14:19). w20.03 22 párrs. 13, 14

Ipan xiuitl 1512 i.x.x. 1, ijkuak “okitelketskej on tabernáculo” ikxitlan tepetl Sinaí, Moisés okichiuj tlen Jehová okitlajtlanilijka niman ijkon kintlapejpenis Aarón iuan ikoneuan ken teopixkej. Israelitas ononechikojkej niman ijkon kitaskej kenon teopixkej kemach ika sejpa kinuentlaliskiaj yolkamej (Éx. 40:17; Lev. 9:1-5). ¿Kenon okiteititi Jehová ika kinseliaya akin okintlapejpenijkaj? Ijkuak Aarón niman Moisés okinteochiujkej israelitas, Jehová okuajtitlan tlitl niman okitlati on uentli tlen “onkatka ipan on tlaixpan” (Lev. 9:23, 24). Melak temojkatlachialti kenon Jehová okiteititi ika kinseliaya Aarón iuan ikoneuan ken teopixkej. Ijkuak israelitas okitakej ika toTajtsin kinpaleuiskia, okasikamatkej ika yejuamej noijki nonekiya kinpaleuiskej. Yejuin tlen onochiuj yeuejkaui melak techpaleuiya, pampa yejon teopixkej akin onenkej yeuejkaui kixneskayotia okse itlaj tlen melak ueyi kijtosneki. ¿Itech tlenon titlajtotokej? Aman nemij 144,000 teopixkej akin tekipanoskej iuan Cristo ne iluikak (Heb. 4:14; 8:3-5; 10:1). Kuajli tikitaj ika Jehová kiteochiujtika ikalpan. w19.11 23 párrs. 13, 14; 24 párr. 16

Ijkuak apóstol Pablo nemiya ne Corinto, onokaujka imiuan Áquila niman Priscila “para san sekan tekitiyaj” pampa “sano yejua tekitl” kipiayaj, yejuamej kichijchiuayaj “kaltin de tela”. Ijkuak okijto ika tekitiya “ikan tonajli niman yeuajli”, xkijtosnekiya ika nochipa tekititoya. Ipan tonajli sábado, yejua kominnojnotsaya judíos, akin noijki xtekitiyaj ipan yejon tonajli (Hech. 13:14-16, 42-44; 16:13; 18:1-4). Maski Pablo nonekiya tekitis, yejua nochipa tenojnotsaya itech “on kuajli tlajtojli” (Rom. 15:16; 2 Cor. 11:23). Okinyolchikauj oksekimej noijki matenojnotsakan. Áquila niman Priscila ijkon okichiujkej, yejuamej okipaleuijkej “ipan itekiu Cristo Jesús” (Rom. 12:11; 16:3). Pablo okimijli corintios: “Nochipa xchiuakan itekiu toTEKO” (1 Cor. 15:58; 2 Cor. 9:8). Niman noijki okijkuilo: “Yejuan xkinekis tekitis, maka ma tlakua” (2 Tes. 3:10). w19.12 5 párrs. 12, 13

Ijkuak Jehová okichijchiuj Adán iuan Eva, okintlalili ipan inyojlo makinekikan kinpiyaskej inkoneuan. San ika ¿akinon noneki kijtos tla akin yononamiktijkej kinpiyaskej inkoneuan niman kemanon kinpiyaskej? Ipan seki kalpamej, kinemiliaj ika akin kemach yononamiktijkej noneki nimantsin kinpiyaskej inkoneuan. Kanaj inchanejkauan noso oksekimej ijkon kimijliaj makichiuakan. Jethro, se tokniuj akin ualeua Asia, kijtoua: “Ipan tlanechikojli, sekimej akin kinpiyaj inkoneuan, nochipa kimijlitokej akin yononamiktijkej noijki makinpiyakan inkoneuan”. Jefri, se tokniuj akin noijki ualeua Asia, kijtoua: “Sekimej kimijliaj akin xkinpiyaj inkoneuan ika xakaj kintlajpiyas ijkuak ueuentsintiaskej”. San ika, akin yononamiktijkej yejuamej akin noneki kitlapejpeniskej tla kinpiyaskej inkoneuan noso ka (Gál. 6:5). Melauak ika iminamigos niman inchanejkauan kinekij mayolpakikan, san ika, nochimej noneki kilnamikiskej ika san teueuentsin iuan isiuatsin kinamiki kijtoskej tla kinpiyaskej inkoneuan (1 Tes. 4:11). w19.12 22 párrs. 1-3

¿Xueli tikitaj Jehová ken toTaj? Sekimej kanaj kinemiliaj ika toTajtsin nion xkinpatiojkaita. Ometlamatij tla toTajtsin, akin nochi ueli kichiua, kita tlen topan nochiua. San ika, toTajtsin melak techtlasojtla niman xkineki ijkon matiknemilikan. Yejua akin otechmakak tonemilis niman kineki iuan matouikakan. Apóstol Pablo okimelajkaijto yejuin ijkuak nemiya Atenas, niman noijki okijto ika Jehová “xuejka nemi cada se de tejuamej” (Hech. 17:24-29). ToTajtsin kineki matiknotsakan ijkon ken se konetsintli kinotsa itaj akin melak kitlasojtla. Kanaj sekimej xuelij kitaj Jehová ken se Tajtli pampa intaj xmás noso xkeman okintlasojtlak. Se tokniuj siuatl okijto: “Notaj melak nechtlajyouiltiaya. Ika yejon, ijkuak onipeuj ninomachtia Biblia, ouijtika nikitaya ninonisiuis itech toTajtsin iluikakchane”. ¿Ijkon tomachiliaj ken yejuin tokniuj? Tla kema, maka matajmanakan. Ajsis tonajli ijkuak tikitaskej Jehová ken se Tajtli akin melak techtlasojtla. w20.02 3 párrs. 4, 5

Jesús otechititi ika Jehová kipatiojkaita tlen tikchiuaj ipan itekiyo, maski tejuamej tikitaj ika san achijtsin tikchiuaj pampa yotiueuentsintiakej (Sal. 92:12-15; Luc. 21:2-4). Ika yejon, matokojtilikan tikchiuaskej tlen kema tiuelij. Uelis tikinnojnotsaskej oksekimej itech Jehová, uelis tikchiuaskej teoyotl inpampa oksekimej tokniuan niman noijki uelis tikinyolchikauaskej mamelajkanemikan. Maski xmiyek tiuelij tikchiuaj ipan itekiyo, Jehová más kipatiojkaita ika tiknektokej tiktlakamatiskej (1 Cor. 3:5-9). Melak tiktlasojkamatij pampa tikueyichiuaj toTajtsin Jehová, akin melauak kinpatiojkaita itekipanojkauan. Jehová otexchijchiuj niman ijkon matikchiuakan tlen yejua kineki, ika yejon, melak tiyolpakij pampa tiktekichiuiliaj (Apoc. 4:11). Kanaj tlaltikpakchanejkej techitaj ika xtitepaleuijkej, san ika, Jehová xijkon techita (Heb. 11:16, 38). Ijkuak melak toyolajmantoskej pampa tikualoj, pampa xtikpiyaj tomin noso pampa yotiueuentsintiakej, matikilnamikikan ika xitlaj uelis “techxelos itech itetlajsojtlalis Dios” (Rom. 8:38, 39). w20.01 18 párr. 16; 19 párrs. 18, 19

Uelis tijkixtiskej nexikojli itech toyojlo tla tiyolyemankej niman tla tiyolpakij san ika tlen tikpiyaj. Kema, tla ijkon tikchiuaj, nexikojli xuelis noneluayotis ipan toyojlo. Tla tiyolyemankej, xtiknemiliskej ika melak tiuejueyixtokej niman ika kinamiki matikpiyakan miyek tlemach xijkon ken oksekimej (Gál. 6:3, 4). Akin yolpaki san ika tlen kipiya kuajli nemi niman xsan kitstika tla oksekimej miyek kipiyaj xijkon ken yejua (1 Tim. 6:7, 8). Tla tiyolyemankej niman tiyolpakij san ika tlen tikpiyaj, tipakiskej ijkuak tikitaskej ika yakaj kiselia itlaj tlen kuajli. Melak noneki matikpiyakan iespíritu santo Jehová tla tiknekij tijkixtiskej nexikojli itech toyojlo, pampa yejon techpaleuis matiyolyemankej niman matiyolpakikan san ika tlen tikpiyaj (Gál. 5:16; Filip. 2:3, 4). Iespíritu toTajtsin techpaleuiya matikitakan tlenon onka ipan totlamachilis niman ipan toyojlo. ToTajtsin techpaleuis matiknemilikan tlen kuajli niman maka sa matiknemilikan tlen teijtlakoua (Sal. 26:2). w20.02 15 párrs. 8, 9

Otikijli Jehová ika itech timosentemaka, niman yejua kichia xchiua ijkon ken otikijli. Yejua ika, nisiuj xnemi itech tlanechikojli. Akin nemij ipan tlanechikojli yeskej ken mochanejkauan. Tla nochipa tiauj tlanechikoltin, melak kuajli imiuan timouikas. Mojmostla xpoua Biblia niman xtlanemili itech (Sal. 1:1, 2). Noneki tikxelos tiempo niman ijkon itech titlanemilis. Ijkon, nochi tlen tikamapouas, ajsis ipan moyojlo. Noijki noneki tikchiuas itlaj tlen kijtoua Biblia, kampa kijtoua: “Nochipa xchiuakan oración” (1 Tes. 5:17). Tla ijkon tikchiua, más timonisiuis itech Jehová. Noijki, kachtopa xtejtemo iTekiuajyo toTajtsin (Mat. 6:33, TNM). ¿Kenijki uelis tikchiuas? Tla melak tikpatiojkaita titenojnotsas. Tla nochipa titenojnotsa, chikaujtos motlaneltokil. Maski titlajyouis “achijtsin nikan ipan in tlaltikpaktli”, nochi yejon tlen tikijyouis san panos (2 Cor. 4:17). Tla timosentemaka itech Jehová niman timoapolaktia, melak tipakis ipan yejuin tonaltin niman noijki tikpiyas “on yejuan melauak nemilistli” ika tlayekapan. Melauak ika nonekis tikchiuas noso tijkauas seki tlemach, san ika, melak miyek tikselis xijkon ken tlen tijkauas (1 Tim. 6:19). w20.03 13 párrs. 19-21

Tla akin tikmachtiaj xnokojtilia nopatlas, nonekis tiknemiliskej tla ok tikonmachtiskej. ¿Tlenon techpaleuis matikmatikan tlenon tikchiuaskej? Matotlajtoltikan: “¿Nesi ika nopatlatiuj maski kixnamiki tlen ouijtika? ¿Nokojtilia kichiuas tlen youel?” (Mat. 28:20). Teajman ika miyekej akin tikinmachtiaj Biblia tlanemiliaj ken israelitas akin onenkej ipan itonaluan Ezequiel. Jehová okijli ika israelitas kuelkakiyaj tlen kijtouaya Ezequiel. Itlajtoluan katkaj kentla se kualtsin tlakuikajli tlen tlajtoua itech tlasojtlalistli niman tlen kitlakuika akin melak kualtsin nokuikatia. San ika, Jehová noijki okijli ika maski miyekej kikakiskiaj itlajtoluan, xakaj kichiuaskia tlen kimijliskia (Ezeq. 33:32, TNM). Kanaj ouijtika tikitaskej tikijliskej yakaj ika xok tikmachtiskej. San ika, matikilnamikikan ika “xok tikpiyaj miyek tiempo”. Yejua ika, kuajli tla xok tikmachtiaj akin xkineki nopatlas, más kuajli tla tikmachtiaj akin yemelak kiteititia ika kineki kipiyas se nemilistli tlen xkeman tlamis (Hech. 13:48, TNM). w20.01 6 párr. 17; 7 párr. 20

Miyekej religiones noso tlaneltokiltin xkiteijliaj ika Biblia kijtoua ika akin kitlakamatij toTajtsin nochipa nemiskej ipan tlaltikpaktli (2 Cor. 4:3, 4). Kema, miyekej religiones uan kijtouaj ika kitlakamatij Cristo kiteijliaj ika nochimej akin kichiuaj tlen kuajli yaskej ne iluikak ijkuak mikiskej. San ika, ipan xiuitl 1879, Nomachtijkej itech Biblia, akin opeujkej kikixtiaj revista tlen aman noixmati ken Amatl Tekakistilijketl, tlamantik tlen kineltokayaj. Yejuamej kasikamatiyaj ika toTajtsin kuajkuis se xochitlalpan niman ika miyekej tlaltikpakchanejkej chantiskej nikan ipan tlaltikpaktli, niman xyaskej iluikak. Maski ijkon, xniman ouel okasikamatkej akinomej nokauaskiaj ipan yejuin tlaltikpaktli. Nomachtijkej itech Biblia noijki okasikamatkej ika Biblia kijtoua ika sekimej makisaskiaj itech “tlaltikpaktli” niman ijkon tekiuajtiskej iuan Jesús ne iluikak (Apoc. 14:3). Ipan yejuin grupo nemiskiaj 144,000 tlapejpeniltin akin chikauak kitekichiuiliskiaj Jehová chika nemiskiaj ipan tlaltikpaktli. w19.09 27 párrs. 4, 5