Noviembre

Miyekej akin kimitaj ika tlamachilisejkej ipan yejuin tlaltikpaktli melak kipijpinaujtiaj tlen kijtoua Biblia itech timoueyimatis. Kijtouaj ika tla tiknemiliaj ika oksekimej más uejueyixtokej xken tejuamej, kuakon, texchiuiliskej ken kinekiskej. San ika ¿yemelak yejon? ¿Kenon yotlamitoj akin noueyimatij ken Satanás? ¿Tikitaj ika yolpakij? ¿Yolpakij imiuan inchanejkauan? ¿Nouikaj imiuan akin yemelak kintlasojtlaj? ¿Kuajli nouikaj iuan toTajtsin? ¿Katlejua tikitaj más tepaleui: tlamachilistli tlen kisa ipan yejuin tlaltikpaktli, noso tlamachilistli tlen onka ipan iTlajtol toTajtsin? (1 Cor. 3:19). Melak xkuajli onkisaj akin kichiuaj tlen kijtouaj “tlamachilisejkej” ipan yejuin tlaltikpaktli. Yejuamej yeskiaj kentla se pajxalojketl akin yopoliuj niman kitlajtoltia okse pajxalojketl akin noijki yopoliuj. Matikitakan kenon Jesús kimitaya akin yeuejkaui noijki kimitayaj ken “tlamachilisejkej”, yejua okijto: “Yejuamej ken on ciegos yejuan kinyekanaj oksekimej ciegos. Tla sen ciego kiyekanas okse ciego, nochimej on omemej onxiniskej ne kampa uejkatlan” (Mat. 15:14). Yemelak tej, toTajtsin kita ika tlamachilistli tlen kisa ipan yejuin tlaltikpaktli, melak xkuajli. w19.05 24, 25 párrs. 14-16

Ipan yejuin xiujtin tlen kemach opanokej, melak miyekej yopeuj kikuaj pan niman konij vino ijkuak noilnamiki imikilis Cristo. ¿Noneki tajmanaskej pampa ijkon panoua? Ka. “ToTEKO kimixmatstikaj yejuan melauak iyaxkauan” (2 Tim. 2:19). Ijkuak noilnamiki imikilis Cristo, nopoua kechmej kikuaj pan niman konij vino, san ika, tokniuan akin tlapouaj xkimatij tla yemelak tlapejpeniltin. Yejuin san Jehová kimatstika. Ika yejon, xnochimej akin kikuaj pan niman konij vino yemelak tlapejpeniltin. Sekimej akin kikuayaj pan niman koniyaj vino, aman xok ijkon kichiuaj. Niman oksekimej kinemiliaj ika tekiuajtiskej iuan Cristo ne iluikak pampa kipiyaj se kokolistli tlen kichiua ijkon makinemilikan. Kuakon, xkuajli tikmatij kechmej tlapejpeniltin ok nemij ipan tlaltikpaktli. Ok nemiskej tlapejpeniltin nochiuiyan ipan tlaltikpaktli ijkuak Jesús uajlas niman ijkon kinuikas. Melauak ika Biblia kijtoua ika itlamiyan tonaltin ok nemiskej sekimej tlapejpeniltin ipan tlaltikpaktli (Apoc. 12:17). San ika, xkijtoua kechmej ok nikan nemiskej ijkuak peuas ueyi tlajyouilistli. w20.01 29, 30 párrs. 11-13

Jesús okiteneuj se tlamachtijli kampa otlajto itech se tekoneuj akin okitlalkauijka itaj niman okinenpoloto nochi tlen kipiaya. Ika yejon tlamachtijli okiteititi ika Jehová melak techtlasojtla (Luc. 15:11-32). Ipan yejon tlamachtijli, tajtli xkeman okinemili tla ikoneuj xok nokuepaskia. Niman ijkuak ikoneuj onokuep, yejua melak kuajli okiseli. Tla tejuamej yotiktlalkauijkej toTaj Jehová niman yotoyolkuepkej, kuajli matikmatstokan ika yejua kinektika oksejpa techselis. ToTaj Jehová kiyektlalis nochi tlen okijtlako Adán. Ijkuak Adán xotetlakamat, toTajtsin okijto ika kintlapejpeniskia ken ikoneuan 144,000 tlaltikpakchanejkej akin tekiuajtiskiaj niman teopixkej yeskiaj iuan iKoneuj. Jesús niman akin iuan tekiuajtiskej kinpaleuiskej tlaltikpakchanejkej akin tetlakamatkej maka ok makipiyakan tlajtlakojli ipan yenkuik tlaltikpaktli. Sakin, ijkuak sa ika tlami kintlatlataskej tlaltikpakchanejkej, Jehová kinmakas akin melajkanemiskej se nemilistli tlen xkeman tlamis. Ijkuakon, toTaj Jehová melak yolpakis pampa kitas ika ipan tlaltikpaktli san nemij ikoneuan akin xok kipiyaj tlajtlakojli. ¿Xmelak ika kualtsin yes? w20.02 6, 7 párrs. 17-19

Tinochimej kipiya ika totlajtoltiskej: “¿Kenon ninopatlatika? ¿San seki yonikpatlak? ¿Kuajli nesi ika nikchiua ken Cristo?”. Melak noneki matikasikamatikan yejuin. Ipan Mateo 12:43-45, onka se neskayotl tlen Jesús okijto niman techijlia tlenon noneki tikchiuaskej. Yejuin neskayotl kuajli techasikamachiltia itlaj: xsan noneki tijkixtiskej xkuajkualtin tlanemililtin; aman noneki tijkalaktiskej ipan totlamachilis tlanemililtin tlen kuelita toTajtsin. ¿Uelis tikpatlaskej tonemilis? ITlajtol toTajtsin technankilia: “Xmotlakentikan ika on yenkuik nemilistli. Xmelajkanemikan ken Dios yolmelajki niman yolchipauak” (Efes. 4:24). Ken tikitaj, kema uelis tikpatlaskej tonemilis, san ika, ouijtika. Xsan noneki tikpopoloskej tlen xkuajli tikileuiyaj niman xok tikchiuaskej tlen xkuajli. Kipiya ika kuajli tikyenkuiliskej toyojlo niman totlamachilis. Yejuin kijtosneki tikpatlaskej tlen tikileuiyaj, tlen tikchiuaj niman tlen tiknemiliaj. Ika yejon, noneki nochipa tokojtilijtoskej. w19.06 9, 10 párrs. 6, 7

Jehová okititi Lot ika kikneliaya pampa okintitlanili iluikaktekitkej makimakixtitij yejua niman ichanejkauan. San ika, Lot nion xnotlasiuitiaya. Iluikaktekitkej ononek kimatilanaskej niman kinpaleuiskej ichanejkauan niman ijkon makisakan (Gén. 19:15, 16). Sakin, iluikaktekitkej okijlikej ika nonekiya yas kampa tepeyoj. San ika, Lot xotlakak, yejua okitlajtlanili Jehová makikauili mauiya ipan se kalpan tlen nisiuj onkatka (Gén. 19:17-20). Jehová okikak ika ijyouilistli niman okikauili ompa mauiya. San ika, Lot sakin onomojti nokauas ipan yejon kalpan niman oyaj kampa tepeyoj. Kema, oyaj kampa toTajtsin kachtopa okijlika mauiya (Gén. 19:30). ¡ToTajtsin melak okijyoui Lot! Ijkon ken Lot, kanaj se tokniuj noijki kitlapejpenia tlen xkuajli niman ipampa yejon kanaj miyek tlauejli kipiya. Tla yakaj ijkon ipan nochiua, ¿tlenon tikchiuaskej? Kanaj tiknekiskiaj tikixkoijliskej ika kipixkatika tlen okitokak, pampa yejon tlen melauak (Gál. 6:7). San ika, kanaj uelis tiktejtemoskej kenon tikpaleuiskej. Uelis tikpaleuiskej ijkon ken Jehová okipaleui Lot. w19.06 20, 21 párrs. 3-5

Ijkuak totlauelikniuan xok techkauiliaj matikueyichiuakan Jehová, kinekij matomojtikan niman ijkon maka sa matiktekichiuilikan Jehová. Kanaj techtlajtolchijchiuiliskej, kintitlaniskej policías matlatejtemotij tochan, texchiualtiskej matiuiyan imixpan tekiuajkej noso hasta ueliskej kintsakuaskej sekimej tokniuan. Kinekij matomojtikan ijkuak tikitaskej kenon kintsakuaj sekimej tokniuan. Tla tokauiliaj matechmojti tlen kichiuaj, kanaj xok tiknekiskej tikueyichiuaskej Jehová. San ika, xtiknekij tikchiuaskej ken akin noteneuaj ipan Levítico 26:36, 37. Tejuamej xtomojtiskej, nochipa tiknektoskej tiktekichiuiliskej toTajtsin ken yeuejkaui niman xkeman tiknekiskej tijkauaskej toTajtsin. Melak titlaneltokaj itech Jehová niman xkeman tomojtiskej (Is. 28:16). Tiktlajtlaniliaj Jehová matechyekana. Ika itlapaleuilis tikmatstokej ika nion tekiuajkej akin melak kojtikej xueliskej kichiuaskej maka sa matiktekichiuilikan toTajtsin. Ijkuak techtlaueltokaj, xtomojtiaj, yej techpaleuiya más matiktekichiuilikan Jehová. w19.07 9, 10 párrs. 6, 7

Maski tla tikitaj ika xakaj kineki techkakis, maka matiknemilikan ika xakaj kinekis nomachtis. Matikilnamikikan ika Jesús okijto ika titenojnotsas kentla tikimajsis michimej. Akin michajsij melak uejkauij kinextiaj se michin. Miyekpa onmichajsij ika tlayoua noso ika kualkan, niman kemantika noneki uejka kontejtemoskej (Luc. 5:5). Noijki ijkon, sekimej tokniuan uejkauij ika kintejtemojtinemij akin ueliskej kinmachtiskej, niman kanaj miyekan yauej. Niman pampa ijkon kichiuaj, uelij kiminextiaj akin kinektokej techkakiskej. ¿Ueliskia tontenojnotsaskej ijkuak kema tikiminextiskej tlaltikpakchanejkej noso tiaskej kampa uelis tikiminextiskej? ¿Tleka noneki maka matosiaujkauakan ijkuak yakaj tikmachtijtoskej? Matikitakan se, pampa xsan noneki tikpaleuiskej makixmati tlen temachtia Biblia niman makitlali ipan iyojlo. Noijki noneki tikpaleuiskej makixmati niman makitlasojtla Jehová, akin okichijchiuj Biblia. w19.07 18, 19 párrs. 14, 15

Kanaj xok tiknekij totlajtlakoltijtoskej ipampa tlen xkuajli otikchiujkej yeuejkaui. Tla ijkon topan nochiua, ¿tleka xtomachtiaj kenon melak techpaleuiya ika Jesús omik topampa? Tla tomachtiaj itech yejuin, tla itech titlanemiliaj niman tikchiuaj teoyotl, xok sajnoye tajmanaskej ipampa tlen xkuajli otikchiujkej. Hasta xok totlajtlakoltijtoskej itech itlaj kampa toTajtsin yotechtlapopolui. ¿Kenon noijki techpaleuiya tlen okichiuj Pablo? Matikitakan. Sekimej tokniuan kanaj okikaujkej intekiyo kampa miyek tomin kitlaniyaj niman ijkon más kuajli tenojnotsaskej. Tla tejuamej ijkon yotikchiujkej, ¿uelis tikilkauaskej nochi tlen yotijkaujkej? (Núm. 11:4-6; Ecl. 7:10). Uelis tikijtoskej ika tlen yotikchiujkej ipampa Jehová noso tlen yotikixnamijkej noijki itlaj “tlen nokaua tlakuitlapan”. Yemelak, ijkuak tikilnamikij kenon Jehová yotechteochiuj niman yotechpaleui, más tiknisiuiyaj. San ika, maka san ijkon matokauakan, maka matiknemilikan ika miyek yotikchiujkej (1 Cor. 15:58). w19.08 3 párrs. 5, 6

Uelis tiknotsaskej Jehová ika tetlakaitalistli maski san kemanon niman maski san kanon pampa yejua nochipa kipiyas tiempo niman ijkon techkakis. Ijkuak tikasikamatij ika Jehová kinkaki toteoyouan, más tiktlasojtlaj. Se salmista okijto: “Nejua niktlajsojtla toTEKO pampa yejua okak noueyikatsajtsilis” (Sal. 116:1). ToTaj Jehová xsan kinkaki toteoyouan, yejua noijki kinnankilia. Apóstol Juan okimelajkaijto: “Tikneltokaj ikan nochi toyojlo, ika Dios san tlinon tiktlajtlaniliskej ken yejua kineki, yejua techkakis” (1 Juan 5:14, 15). Melauak, Jehová xnochipa technankilia ken tejuamej tiknekiskiaj. Yejua kimatstika tlenon melauak techpaleuis, ika yejon, kemantika xtechmaka tlen tiktlajtlaniliaj, noso kemantika techijlia matitlamachiakan (2 Cor. 12:7-9). Jehová techmaka tlen techpoloua. Jehová kinmakatika ikoneuan tlen kinpoloua, yejua kichiua ken kinnauatia nochimej tajtin (1 Tim. 5:8). Kimatstika ika tinochimej tiknekij tikpiyaskej tlenon tijkuaskej, tlenon ika totlakentiskej niman kanon tichantiskej. San ika, yejua xkineki melak matajmanakan ipampa nochi yejon (Mat. 6:32, 33; 7:11). Kema, pampa yejua techtlasojtla, hasta yokitak maka itlaj matechpolo ika tlayekapan. w20.02 5 párrs. 10-12

Xnochimej tlapejpeniltin noixmatij ken “tekitketl” yolmelauak niman tlamachilise (Mat. 24:45-47). Ijkon ken ipan kachtopa siglo, aman Jehová niman Jesús noijki san achijtsitsintin tlapejpeniltin kintekitiltijtokej niman ijkon makinmachtikan oksekimej itekipanojkauan. Ipan kachtopa siglo, san achijtsitsintin tlapejpeniltin okijkuilojkej Tlajkuiloltin ika Griego. Ipan yejuin tonaltin, noijki san sekimej tlapejpeniltin kinmakatokej itekipanojkauan Jehová tlen kinpoloua niman ijkon machikaui intlaneltokil. ToTajtsin yokijto ika kinmakas miyekej itekipanojkauan se nemilistli tlen xkeman tlamis nikan ipan tlaltikpaktli, niman noijki yokijto ika san achijtsitsintin yaskej iluikak niman ijkon tekiuajtiskej iuan Jesús. ToTajtsin kinteochiuas nochimej itekipanojkauan, kema, kiteochiuas on “judío” niman noijki on “majtlaktli tlakamej” (Zac. 8:23, TNM). San ika, Jehová nochimej kintlajtlanilia makitlakamatikan niman mamelajkanemikan. Nochimej noneki mayolyemankej niman san sekan makiueyichiuakan toTajtsin. Noijki noneki manokojtilikan niman ijkon maonia yolseuilistli ipan tlanechikojli. Sa achijtsin poliui ijkuak toTajtsin kipopolos nochi tlen xkuajli ipan tlaltikpaktli. Yejua ika, tinochimej matiktekichiuilijtokan Jehová niman matokauilikan matechyekana Cristo. w20.01 31 párrs. 15, 16

Xuelis tikinchiualtiskej tochanejkauan makiselikan tlen melauak itech toTajtsin. San ika, kema uelis tikinpaleuiskej makikakikan iTlajtol toTajtsin (2 Tim. 3:14, 15). Matikchiuakan tlen kuajli. Miyekpa, tochanejkauan más kitaj tlen tikchiuaj xijkon ken tlen tikijtouaj. Maka matosiaujkauakan. Jehová techititia ika yejua xnosiaujkaua. Yejua miyekpa kinpaleuiya tlaltikpakchanejkej makikakikan iTlajtol niman makiselikan nemilistli (Jer. 44:4). Apóstol Pablo okijli Timoteo nochipa makinpaleuijto oksekimej pampa san ijkon nomakixtiskia niman kinmakixtiskia akin kikakiskiaj (1 Tim. 4:16). Pampa tikintlasojtlaj tochanejkauan, tiknekij makimatikan tlen Biblia temachtia. w19.08 14 párr. 2; 16 párrs. 8, 9

Noneki tikilnamikiskej ika tla yakaj yokixelo tiempo niman ijkon techmelajkatlalis, kanaj kijtosneki ika xsan achijtsin otopopolojkej ken tejuamej tiknemiliayaj. Niman kanaj kachtopa xtikseliskej matechpaleuikan. Kanaj tiktejteneuaskej akin texchikajkanotsa noso xtikuelitaskej kenon techijlia. San ika, tla tiyolyemankej, tikchiuaskej ijkon ken otechijli. Akin yolyemanki kitlasojkamati ijkuak kichikajkanotsaj noso ijkuak itlaj kijliaj. Matitlanemilikan itech yejuin. Matiknemilikan ika tinemij ipan Kajli kampa Tosentlaliaj niman titlajtlajtojtokej imiuan sekimej tokniuan. Kuakon, se tokniuj oksekan techuika niman san ichtaka techijlia ika achijtsin onokauj tlakuajli ipan totlan. Maski tipinauij, tiktlasojkamachiliaj pampa otechijli. Hasta tiknekiskiaj ika nimantsin matechijlianij. Noijki ijkon kipiya ika tiktlasojkamatiskej ijkuak se tokniuj noyolchikauas texchikajkanotsas noso itlaj techijlis. Maka matikitakan ken yakaj akin techtlauelita, matikitakan ken yakaj akin techtlasojtla (Prov. 27:6; Gál. 4:16). w19.09 5 párrs. 11, 12

Jehová yokinnauati nantin makinyekanakan inkoneuan. Tlen kichiuaj nantin uelis kinmachtis inkoneuan tlen xkeman kilkauaskej (Prov. 22:6). Matikitakan tlen nantin uelis nomachtiskej itech María, inan Jesús. María kuajli kixmatiya iTlajtol toTajtsin. Melak kitlakaitaya Jehová niman melak kuajli iuan nouikaya. Okinokauili makiyekana maski yejon okichiuj melak manopatla inemilis (Luc. 1:35-38, 46-55). Matikitakan tlen nantin uelis kichiuaskej ijkon ken okichiuj María. Kachtopa, xmomachtikan Biblia niman xkijlikan Jehová tlen mechajmana niman ijkon nochipa kuajli iuan nemouikaskej. Ika ome, xnektokan nenkipatlaskej tlen noneki niman ijkon uelis nenkiyolpaktiskej toTajtsin. w19.09 18 párrs. 17-19

Apóstol Juan okipix se tlatlachalistli. Yejua okitak ika kinnauatiaj iluikaktekitkej makiteltikan “on naui ajakatl yejuan onkaj ipan in tlaltikpaktli” hasta ijkuak kintlaliliskej sa ika nochi sello se grupo kampa nemij itekipanojkauan toTajtsin (Apoc. 7:1-3). Ipan yejon grupo nemij on 144,000 tlapejpeniltin akin tekiuajtiskej iuan Jesús ne iluikak (Luc. 12:32; Apoc. 7:4). Sakin, Juan okitak okse grupo niman okijto: “Onikitak ouajnonextijkej nixpan sanoyej miyek tlakatl yejuan xakaj ueliya kipouaya yejuan oualejkej de nochi naciones, tribus, razas niman yejuan tlajtouaj oksesekneka tlajtoltin. Yejuamej in sanoyej tojlamej majmaniyaj ixpan on trono niman ixpan on borreguito” (Apoc. 7:9-14). San matikonnemilikan kenon melak oyolpak Juan ijkuak okitak ika melak miyekej tlaltikpakchanejkej kitekichiuilijtoskiaj Jehová. Kuajli tikmatstokej ika yejuin tlatlachalistli okichikauili itlaneltokil Juan. Niman tejuamej noijki melak kichikaua totlaneltokil pampa yejuin tlatlachalistli nochiujtika ipan yejuin tonaltin. Tikitaj ika melak miyekej tlaltikpakchanejkej yopeujkej kiueyichiuaj Jehová, niman yejuamej kichiaj makisaskej itech “on temojtij tlajyouilistli” niman nemiskej ipan se tlaltikpaktli kampa xok keman mikiskej. w19.09 26 párrs. 2, 3

Matikonnemilikan ika tekiuajkej kemach yokonijtokej: “Onkaj yolseuilistli niman xakaj nion itlaj uelis techmiktis”. Kanaj yejon tekiuajkej melak noueyimatiskej pampa kinemiliskej ika xok nochiua tlen xkuajli ipan tlaltikpaktli. Kinekiskej techtlaneltokiltiskej ika yejuamej kimatij tlen kichiujtokej. San ika, xueliskej kiteltiskej tlen sakin nochiuas. “On ueyixtikaj Babilonia” kipopoloskej (Apoc. 17:5, 15-18). “Dios sano yejua kintlalilis ipan inyojlo para kichiuaskej on tlen yejua kineki”. ¿Tlenon kineki toTajtsin? Yejua kineki kinpopolos nochi religiones tlen xmelajkej. ToTajtsin kitlalis yejuin tlanemilijli ipan inyojlo yejon “majtlaktli ikuakuauuan” tlen kipiya “on xkuajli yolki [...] chichiltik”. Yejuin “majtlaktli kuakuautli” kijtosnekij nochi yejon tekiuajkej akin kipaleuiyaj “on xkuajli yolki”, tikteneujtokej Naciones Unidas (Apoc. 17:3, 11-13; 18:8). Ijkuak yejuin tekiuajkej peuaskej kimixnamikiskej religiones tlen xmelajkej, kuakon, kijtosnekis ika ipeuas “on temojtij tlajyouilistli” noso ueyi tlajyouilistli. Yejuin nochijtiuetsis ipan nochi tlaltikpaktli niman melak temojmojti yes. w19.10 14 párrs. 1, 3

Ipan kachtopa siglo, Diótrefes kinnexikolitaya akin tlayekanayaj ipan tlanechikojli. Pampa kinekiya san yejua makitlakaitakan, opeuj kintejteneua apóstol Juan niman oksekimej tokniuan tlayekankej (3 Juan 10). Maski xkeman tikchiuaskiaj ken Diótrefes, kanaj uelis peuas tiknexikolitaskej se tokniuj akin kimakaj se tekitl tlen tejuamej tiknekiyaj ipan tlanechikojli. Niman kanaj más ijkon tikmachiliskiaj tla tikitaj ika noijki tiueliskiaj tikchiuaskej yejon tekitl, noso hasta más kuajli tikchiuaskiaj. Nexikojli yeskia kentla se xiujtli tlen melak teijtlakoua. Ijkuak nexikojli noneluayotia ipan toyojlo, melak ouijtika tikuiuitlas noso tijkixtis. Noskaltia tla toueyimatij, tla titetlauelitaj niman tla titsotsokamej. Ijkuak titenexikolitaj, xueli titetlasojtlaj, xueli titeikneliaj niman xkuajli touikaj imiuan oksekimej. Tla tikitaj ika nexikojli yopeuj itsmolini ipan toyojlo, noneki tikixtijtiuetsiskej. w20.02 15 párrs. 6, 7

Apóstol Pablo okijtosnek ika melak tlajyouijtoya pampa kajmanaya tlen kixnamiktoya. Okijto ika katka kentla “sen tlajyouilistli” tlen Satanás kitekitiltiaya niman ika kitlajyouiltiaya. Kanaj Satanás niman idemonios xokikalaktilijkaj yejon uitstli, kema, kanaj xyejuamej akin kimakatoyaj yejon tlajyouilistli. San ika, ijkuak yejon xkuajkualtin espíritus okitakej ika Pablo kipiaya yejon “uitstli”, uelis tikijtoskej ika kanaj más kikalaktiliayaj niman ijkon más matlajyoui. ¿Tlenon okichiuj Pablo? Kachtopa, Pablo kinekiya ika Jehová makikixtili yejon “uitstli”. Okijto: “Yexpa yoniktlajtlanilij toTEKO para ma nechkixtili on tlajyouilistli”. Maski melak okitlajtlan yejon, xokis yejon uitstli. ¿Kijtosneki ika Jehová xokinnankili iteoyouan? Ka, xyejon tlen kijtosneki. Jehová kema okinankili. Maski xokikixtili yejon tlauejli, okimakak kojtilistli niman ijkon matlaxiko. Niman Jehová okijli: “Nopoder más kuajli noteititia ijkuak sen tlakatl xkojtik” (2 Cor. 12:8, 9). Pampa toTajtsin okipaleui, Pablo ouel onen ika iyojlo (Filip. 4:4-7). w19.11 9 párrs. 4, 5

San Jehová kinamiki matikueyichiuakan pampa yejua akin otexchijchiuj niman otechmakak tonemilis (Apoc. 4:11). San ika, ouijtika ijkon tikchiuas. Maski tiktlasojtlaj niman tiktlakaitaj Jehová, onka tlen uelis techyoltilanas niman xtechkauilis matikueyichiuakan ken kinamiki. Biblia kijtoua ika ijkuak yemelak tiktlasojtlaj Jehová, san yejua tikueyichiuaj. Kuakon, xtiknekij yakaj noso itlaj okse tikueyichiuaskej (Éx. 34:14). Tikueyichiuaj Jehová ipampa tlen yotiuelkej itech. Melak tikuelitaj ikualneskayouan, tlen melak kualtsitsintin. Tikmatstokej tlen kuelita niman tlen xkuelita, niman noijki ijkon titlanemiliaj. Tikasikamatij tlenon kineki matikchiuakan niman tikintlakamatij itlanauatiluan. Melak tipakij ika techkauilia iuan matouikakan (Sal. 25:14). Nochi tlen tiuelij itech Jehová, akin otexchijchiuj, kichiua melak nisiuj itech matinemikan (Sant. 4:8). w19.10 26 párrs. 1-3

Aman, tokniuan kixnamikij miyek tlemach tlen melak ouijtika. Se neskayotl, miyekej tlajyouiyaj pampa tlaixpoliui kampa chantij. Tla ijkon nochiua, kanaj uelis tikinseliskej tochan yejuin tokniuan. Oksekimej kanaj uelis tepaleuiskej ika intomintsin. San ika, tinochimej uelis tiktlajtlaniliskej Jehová makinpaleui. Tla tikmatij ika se tokniuj najmana, kanaj xtikmatiskej tlenon tikijliskej noso tlenon tikchiuaskej. San ika, tinochimej uelis titlapaleuiskej. Uelis iuan tonojnotsaskej, uelis tijkakiskej ijkuak technojnotstos niman uelis tikteneuiliskej se tlaxelojli tlen tejuamej techyolchikaua (Is. 50:4). Melak kuajli tla tinemij imiuan toamigos ijkuak melak noneki. Noneki ika aman matokojtilikan melak kuajli imiuan touikaskej tokniuan. Xsan touikaskej imiuan tokniuan hasta ijkuak kipopoloskej tlen xkuajli ipan tlaltikpaktli, tejuamej nochipa imiuan touikaskej. w19.11 7 párrs. 18, 19

Yejuamej kitemakayaj yejuin uentli pampa kitlasojtlayaj Jehová. Akin kitemakaya yejon uentli, ichanejkauan niman teopixkej kikuayaj inakayo yejon yolki tlen okiuentlalijkaj. San ika, xnonekiya nochi kikuaskej pampa seki itlatki katka Jehová. ¿Katlejua? Jehová kitaya ika nochi “on chauak” tlen kipiaya yolki yejon tlen más kuajli katka. Noijki okijtoka ika nonekiya kimakaskej iriñones yolki niman okseki tlen kipiaya, pampa nochi yejon melak kipatiojkaitaya (Lev. 3:6, 14-16). Kuakon, Jehová melak yolpakiya ijkuak se israelita kimakaya nochi yejon niman noijki “on chauak” tlen kipiaya yolki. Akin kichiuaya yejuin kiteititiaya ika melak kinekiya kimakas Jehová tlen melak kuajli. Noijki ijkon, Jesús melak okitlasojtlak Jehová niman okimakak tlen más kuajli, kema, yejua chikauak okitekichiuili Jehová (Juan 14:31). Jesús kiyolpaktiaya kichiuas tlen Jehová kinekiya (Sal. 40:8). ¡San xkonnemili kenon yolpakiya Jehová ijkuak kitaya kenon melak kuajli kitekichiuiliaya iKonetsin! w19.11 22, 23 párrs. 9, 10

ITlajtol toTajtsin kijtoua ika ijkuak Jehová yotekitka chikuasen “tonajli”, yejua okikajkauj ika tlachijchiua ipan tlaltikpaktli (Gén. 2:2). San ika, Jehová kuelita tekitis, ika yejon, yejua ok tekititika (Juan 5:17). Ipampa yejon tlanauatijli itech sábado, israelitas tekitiyaj chikuasen tonajli niman noseuiayaj ipan “on ika chikome tonajli”, ipan amoxtli Génesis tikitaj ika Jehová noijki ijkon okichiujka. ToTajtsin okimijlika israelitas: “On tonaltin [sábados] nochipa onyaskej ken sen neskayotl para nemejuamej niman nejua” (Éx. 31:12-14). Xakaj nonekiya tekitis, nion kokonej, tlakeualtin nion yolkamej (Éx. 20:10). Yejuin kichiuaya ika israelitas más kuajli makiueyichiuakan Jehová. San ika, ijkuak Jesús nemiya ipan tlaltikpaktli, miyekej tlayekankej ipan tlaneltokijli yokitlalijkaj okseki tlanauatiltin itech sábado. Kijtouayaj ika xakaj kipiaya ika kitejtekis “itlakyo on trigo” noso kipajtis se kokoxki (Mar. 2:23-27; 3:2-5). Yejuamej xtlanemiliayaj ken Jehová, niman Jesús ijkon okijto. w19.12 3, 4 párrs. 8, 9

Tla tikchiuaj ken Jehová, uelis tikinpiyaskej ikualneskayouan. Pampa David kuajli kixmatiya iTajtsin iluikakchane, okinpaleui oksekimej tlaltikpakchanejkej ijkon ken toTajtsin kinpaleuiskia. David melak kuajli onouikak iuan toTajtsin, ika yejon, israelitas melak okitlasojtlakej. ToTajtsin miyekpa okiteneuj David niman ijkon kimititis oksekimej tekiuajkej ika David katka se kuajli tlakatl (1 Rey. 15:11; 2 Rey. 14:1-3). ¿Tlenon techmachtia yejuin? Ika noneki tikchiuaskej ken Jehová. Ijkuak tikchiuaj ken Jehová, tikteititiaj ika tiikoneuan (Efes. 4:24). Xkeman ajsis tonajli ijkuak xok nonekis tomachtiskej itech Jehová (Ecl. 3:11). San ika, maka matikilkauakan ika xsan noneki miyek tikmatiskej itech toTajtsin Jehová, noneki tikchiuaskej tlen tiueltiuej. Kema, tla tikchiuaj tlen tiueltiuej niman tla tikchiuaj ken toTajtsin, yejua technisiuis (Sant. 4:8). Ipan iTlajtol, yejua techmelajkaijlia ika xkeman kinkauas akin kitejtemouaj. w19.12 20 párr. 20; 21 párrs. 21, 23

Jacob kintlasojtlaya nochimej ikoneuan, san ika, más kitlasojtlaya José akin kipiaya 17 xiuitl. Ikniuan José xokuelitakej yejon. Yejuamej opeujkej kinexikolitaj José niman melak okitlauelitakej. Kuakon, yejuamej okinemakakej ken se tlakeuajli niman okijlikej intaj ika se yolki okimiktijka ikoneuj akin melak kitlasojtlaya. Pampa yejuamej otenexikolitakej, inchanejkauan xok ika inyojlo nemiyaj niman melak okiyolkokojkej intaj (Gén. 37:3, 4, 27-34). Nexikojli melak xkuajli. Akin tenexikolitaj kichiuaj “tlen xkuajli keleuiya intlalnakayo”, niman yejuin uelis kichiuas maka manemikan kampa tlanauatis iTekiuajyo toTajtsin (Gál. 5:19-21). Miyekpa, nexikojli kipeualtia tlauejli, kichiua ika miyekej manokuajkualanikan niman maka kuajli manouikakan. Ijkuak tikitaj tlenon okichiujkej ikniuan José, kuajli tikasikamatij ika akin tenexikolitaj xkuajli nouikaj imiuan oksekimej niman kipiyaj tlauejli imiuan inchanejkauan. Maski tejuamej xkeman tikchiuaskiaj ken yejuamej, maka keman matikilkauakan ika toyojlo uelis techkajkayauas niman uelis kichiuas matitenexikolitakan. w20.02 14 párrs. 1-3

Se tonajli, Jehová okikuili Moisés seki espíritu santo niman okinmakak sekimej tlayekankej israelitas akin nemiyaj “iyeualkan on tabernáculo”. Sakin, Moisés okitekakili ika omemej tlayekankej akin xoyajkaj kampa onkatka tabernáculo noijki okiselijkej espíritu santo niman opeujkej tlajtouaj ken teotlajtokej. ¿Tlenon okichiuj Moisés ijkuak Josué okijli maka makinkauili mateotlajtokan? Moisés xokinnexikolitak, yejua melak oyolpak pampa yejon omemej tlakamej noijki okiselijkaj se kualtsin tekitl (Núm. 11:24-29). ¿Tlenon tiuelij itech Moisés? Matikonnemilikan ika se tokniuj tlayekanketl melak kuelita kichiuas se tekitl tlen okimakakej. Tla tokniuj tlayekanketl yolyemanki, xkinemilis tla xok kipatiojkaitaj, yejua ika iyojlo kimajmachtis okse tokniuj. w20.02 15 párr. 9; 17 párrs. 10, 11

Ijkuak tikpiyaj se kokolistli, uelis melak xkuajli tomachiliskej. Kanaj tipinauiskej pampa oksekimej kitaj ika xok miyek tiuelij tikchiuaj noso pampa noneki yakaj matechpaleui. Niman, maski sekimej xkimatij tla tikualoj, kanaj tipinauij pampa xok tiuelij tikchiuaj tlen yeuejkaui tikchiuayaj. Ijkuak ijkon titlajyouiyaj, Jehová techyolchikaua. ¿Kenon kichiua? Jehová yokintlali ipan Biblia kualtsitsintin tlajtoltin tlen techilnamiktiaj ika yejua techpatiojkaita maski tikualoj (Sal. 31:19; 41:3). Yejon kualtsitsintin tlajtoltin techpaleuiskej matikixnamikikan tlen xkuajli tikmachiliaj pampa tikualoj. Kuajli matikmatstokan ika Jehová kimati tlenon tikixnamiktokej. Matiktlajtlanilikan matechpaleui matikitakan tlen topan nochiua ken kinamiki. Matomachtikan Biblia niman ijkon uelis tikinnextiskej kualtsitsintin tlajtoltin tlen Jehová ompa yokintlali. Kuajli matikimitakan tlaxeloltin kampa techititiaj ika Jehová melak kinpatiojkaita itekipanojkauan. Tla ijkon tikchiuaj, tikitaskej ika yejua kintlasojtla akin nochipa kitekichiuiliaj (Sal. 84:11). w20.01 15, 16 párrs. 9, 10, 12

Isaac kipiaya melak miyek tlemach, ika yejon, filisteos kinexikolitayaj (Gén. 26:12-14). Filisteos hasta “okintemiltijkej ikan tlajli nochi” pozos kampa Isaac kimatlitiaya iyolkauan (Gén. 26:15, 16, 27). Nemij miyekej tlaltikpakchanejkej akin kichiuaj ijkon ken filisteos niman kinnexikolitaj akin más kipiyaj tomin xijkon ken yejuamej. Xsan kinekij kipiyaskej tlen oksekimej kipiyaj, noijki hasta kinekiskiaj makipolokan. Judíos akin tlayekanayaj ipan tlaneltokiltin melak okinexikolitakej Jesús pampa kitayaj ika miyekej tlaltikpakchanejkej kitlasojtlayaj (Mat. 7:28, 29). Jesús ouajlaka ipan tlaltikpaktli pampa toTajtsin okuajtitlanka niman temachtiaya tlen melauak. Maski ijkon, tlayekankej ipan tlaneltokiltin okitlajtolchijchiuilijkej pampa kinekiyaj maka sa makitlakaitakan (Mar. 15:10; Juan 11:47, 48; 12:12, 13, 19). ¿Tlenon tiuelij itech yejuin? Ika noneki tokojtiliskej maka tikinnexikolitaskej akin melak kintlasojtlaj ipan tlanechikojli pampa miyek tlen kuajli kichiuaj. Yej noneki tokojtiliskej tikchiuaskej ken yejuamej (1 Cor. 11:1). w20.02 15 párrs. 4, 5

Xkonnemili kenon melak ouijtika tikitaskiaj titlajtoskej iuan se tekiuaj akin yeuejkaui nemiya, ken akin tlayekanaya Persia. Nion xtiknemiliskiaj tikalakiskej kampa nemi tekiuaj tla yejua xtechijlia matikalakikan, pampa tla ijkon tikchiuaskiaj, tekiuaj tlanauatiskia matechmiktikan. Melak tiyolpakij pampa Jehová xken tekiuajkej akin nemiyaj Persia. Jehová kinektika matiknotsakan maski san kemanon. Xkineki matomojtikan ijkuak tiknotsaskej. Maski tikixmatij Jehová ken toTlachijchiujkauj, akin nochi ueli kichiua noso ken toTeko, yejua techijlia ika ijkuak tiknotsaskej, uelis tikijliskej: toTaj noso toTajtsin (Mat. 6:9). ¿Xmelak ika techyolpaktia pampa Jehová kineki iuan matouikakan? Kinamiki matiknotsakan Jehová ken “toTaj” noso “toTajtsin” pampa yejua akin otechmakak tonemilis (Sal. 36:9). Yejua toTaj niman noneki matiktlakamatikan. Tla tikchiuaj tlen technauatia, melak techteochiuas (Heb. 12:9). Uelis techmakas se nemilistli tlen xkeman tlamis, uelis yes ne iluikak noso nikan ipan tlaltikpaktli. w20.02 2 párrs. 1-3

Tiknekij ika akin tikmachtiaj Biblia machikaui itlaneltokil (Efes. 4:13). Ijkuak yakaj peua touan nomachtia, kanaj san kineki kitas kenon Biblia uelis kipaleuis ipan inemilis. San ika, ijkuak más kitlasojtlatias Jehová, peuas kinemilis kenon uelis kinpaleuis oksekimej, ken tokniuan akin nemij ipan totlanechikol (Mat. 22:37-39). Noneki tikitaskej kemanon uelis tikijliskej ika tinochimej akin tiktekichiuiliaj Jehová tikuelitaj tiktemakaskej totomintsin niman ijkon tikpaleuiskej ikalpan Jehová. Matikititikan akin tikmachtiaj kenon kinyektlalis tlaueltin. Matikonnemilikan ika se tonomachtijkauj, akin yopeuj tenojnotsa, techijlia ika se tokniuj okiyolkoko. ¿Tlenon tikchiuaskej? Xtikijliskej akinon kipiya tlajtlakojli, yej tikititiskej tlenon kijtoua Biblia makichiua. Uelis tikijliskej ika uelis kitlapopoluis tokniuj noso, tla xueli kilkaua tlen opanok, uelis iuan tlajtos niman ijkon oksejpa kuajli nouikaskej (uelis tikitas Mateo 18:15). Matikpaleuikan makiyektlali tlenon uelis kijtos. w20.01 5, 6 párrs. 14, 15

Tikteititiaj ika tiktlasojkamatij ika Jehová techtlapopoluiya ijkuak ipan teoyotl tiktlajtlaniliaj matechtlapopolui, ijkuak tikseliaj ken techmelajkatlalia niman ijkuak tokojtiliaj xok tikchiuaskej sa no yejua tlajtlakojli. Ijkuak tikchiuaj yejuin, oksejpa tiyolseuij. Melak techyolpaktia tikmatiskej ika Jehová “nemi nisiu para kinyoltlalia on yejuan sanoyej noyolkokouaj” niman ika kinmakixtia “on yejuan xok kipiyaj tlamachalistli” (Sal. 34:18). Aman ika tinemij ipan sa itlamiyan tonaltin, miyekixtias tlen kichiua matoyolajmanakan. Ijkuak melak tajmanaskej noso totekipachoskej, nimantsin matikijlikan Jehová matechpaleui. Nochipa matomachtikan Biblia. Matikchiuakan ken Ana, apóstol Pablo niman tekiuaj David. Matiktlajtlanilikan Jehová matechpaleui matikmatikan tleka tajmanaj (Sal. 139:23). Matijkauilikan Jehová matechpaleui niman matikneltokakan ika kiyektlalis tlen tejuamej xtiuelij tikyektlaliaj. Tla ijkon tikchiuaj, tomachiliskej ken salmista akin okikuikatili Jehová: “Ijkuak ajmantli nechyolajmanaya, otinechyolchikauj niman otinechyolseui” (Sal. 94:19, TNM). w20.02 24 párr. 17; 25 párrs. 20, 21

Jehová okitekitilti iespíritu santo niman ijkon kintlalis itlanemililuan ipan intlamachilis itekipanojkauan akin okijkuilojkej Biblia. Ijkuak tikpouaj iTlajtol toTajtsin niman itech titlanemiliaj, kuakon, itlamachtiluan toTajtsin kalakij ipan totlamachilis niman toyojlo. Yejuin itlanemililuan toTajtsin techpaleuiyaj matinemikan ijkon ken toTajtsin kineki (Heb. 4:12). San ika, tla tiknekij kuajli matechpaleui espíritu santo, noneki nochipa tomachtiskej Biblia niman titlanemiliskej itech tlen tikpouaj. Tla ijkon tikchiuaj, iTlajtol toTajtsin techpaleuis matiknemilikan niman matikchiuakan tlen kuajli. Noijki noneki tikueyichiuaskej toTajtsin imiuan itekipanojkauan (Sal. 22:22). Ipan totlanechikoluan onka iespíritu Jehová (Apoc. 2:29). Ipan tlanechikoltin tikchiuaj teoyotl niman tiktlajtlaniliaj toTajtsin matechmaka iespíritu, tokuikatiaj tlakuikaltin tlen nokixtiaj itech iTlajtol toTajtsin niman tikinkakij tlamachtiltin tlen kitemakaj tokniuan akin yokintekitlalijkej ipampa espíritu santo. Tla tiknekij kuajli ika topaleuiskej yejon espíritu, noneki tiaskej tlanechikoltin niman titlanankiliskej. w19.11 11 párrs. 13, 14