Enero

¿Tleka Timoteo ueliya kitekichiuiliaya Jehová? Pampa yejua kichiuaya tlen kuajli (Filip. 2:​19-22). Tlen okijto apóstol Pablo techititia ika Timoteo yolyemanki katka, yolmelajki katka, tekitki katka niman kuajli kichiuaya itekiyo. Noijki melak kintlasojtlaya tokniuan niman nochipa kinekiya kinpaleuis. Ika yejon, Pablo melak kitlasojtlaya Timoteo niman okimakak seki tekitl. Jehová noijki techtlasojtlas niman techmakas seki tekitl ipan tlanechikojli tla kita ika tikchiuaj tlen kuajli niman tlen yejua kuelita (Sal. 25:9; 138:6). Matikijlikan Jehová matechpaleui matikitakan tlenon noneki tikpatlaskej. Noijki, matotlajtoltikan: “¿Noneki más niteasikamatis? ¿Noso noneki ninokojtilis niman ijkon xnimantsin nikualanis imiuan oksekimej niman niknektos nikintlapopoluis?”. Tla tiknekij tikmatiskej tlenon noneki tikpatlaskej, uelis tiktlajtoltiskej se akin kuajli iuan touikaj (Prov. 27:6). w22.04 23 párrs. 4, 5

Jehová kineki nochipa matiyolpakikan. Biblia kijtoua ika akin noyekanaj ika iespíritu Jehová melak yolpakij (Gál. 5:22). Tejuamej melak tiyolpakij ijkuak titenojnotsaj niman ijkuak tikinpaleuiyaj tokniuan pampa tikmatij ika akin kitemakaj tlen kipiyaj melak yolpakij (Hech. 20:35). Ipan tlaxelojli tlen aman tikitstokej, apóstol Pablo otechijli itlaj tlen techpaleuis nochipa matiyolpakikan. Kachtopa, okijto ika melak tiyolpakiskej tla tikmakaj Jehová nochi tlen tiuelij. Niman yejuin itlaj tlen tinochimej noneki tikchiuaskej (Mat. 22:​36-38). Ika ome, okijto ika xnoneki totlatlantoskej imiuan tokniuan. Matiktlasojkamachilikan Jehová tla xtikualoj, tla yotechmachti noso tla itlaj ueli tikchiuaj. Niman tla tikitaj ika se tokniuj más ueli itlaj kichiua ipan ikalpan Jehová, matiyolpakikan pampa yejuin tokniuj nokojtilia kitekichiuilis Jehová niman pampa xnoueyimati ika tlen ueli kichiua. w22.04 10 párrs. 1, 2

Ajsis tonajli ijkuak gobiernos kinpopoloskej nochi tlaneltokiltin xmelajkej, niman yejon miyekej kinmojkatlachialtis (Apoc. 18:​8-10). Ijkuak kipopoloskej Ueyixtika Babilonia kanaj panos tlen xkuajli niman miyekej melak nomojtiskej. San ika, akin tiktekichiuiliaj Jehová melak tiyolpakiskej. ¿Tleka? Kachtopa, pampa yejuin tlakapajpatlaketl, akin itlauelikniuj Jehová, kipopoloskej. Niman ika ome, pampa tikmatstoskej ika sa achijtsin poliui ijkuak toTajtsin techmakixtis. Daniel okijto: “On tlamachilistli más miyekiyas”. Niman melauak tlen okijto, pampa aman itikimasikamatij teotlajtoltin tlen inochiujtokej (Dan. 12:​4, 9, 10). Pampa yejuin teotlajtoltin melak kuajli inochiujtokej, techpaleuiya melak matiktlakaitakan Jehová niman iTlajtoltsin (Is. 46:10; 55:11). Kuakon, mojmostla matomachtikan Biblia niman matikinpaleuikan oksekimej manouikakan iuan Jehová. Tla ijkon tikchiuaj, chikauis totlaneltok niman Jehová techtlajpiyas niman techpaleuis matinemikan ika toyojlo (Is. 26:3). w22.07 6, 7 párrs. 16, 17

Amoxtli Apocalipsis kijtoua ika iTekiuajyo toTajtsin itlayekantika ne iluikak niman ika Satanás okuajtlakalkej nikan ipan tlaltikpaktli (Apoc. 12:​1-9). Ompa noijki kijtoua ika ne iluikak melak yolpakij, san ika, akin nemij nikan ipan tlaltikpaktli melak tlajyouiyaj. ¿Tleka? Pampa Satanás inpan notlauelkixtijtika itekipanojkauan Jehová akin nemij ipan tlaltikpaktli (Apoc. 12:​12, 15, 17). Tla kuajli tikasikamatij tlenon panos ika tlayekapan, techpaleuis matimelajkanemikan ijkuak techixnamikis Satanás (Apoc. 13:10). Apóstol Juan okijto kenon toTajtsin techteochiuas ika tlayekapan niman noijki okijto kenon toTajtsin kinpopolos itlauelikniuan. Ipan kachtopa itlaxelol Apocalipsis kijtoua ika nochi tlen ompa noteneua san itlaj kineskayotia (Apoc. 1:​1, TNM). w22.05 8 párrs. 1-3

Miyekej san kitstoskej tlen kichiuaj itekipanojkauan Jehová akin yolmelajkanemij. Niman itlauelikniuan toTajtsin melak kualaniskej ijkuak kitaskej ika xkinekij kinpaleuiskej gobiernos. Biblia kijtoua ika ijkuakon Gog de Magog, noso miyekej kalpamej, kimixnamikiskej itekipanojkauan toTajtsin ipan nochi tlaltikpaktli (Ezeq. 38:​14, 15). ¿Tlenon kichiuas Jehová ijkuak kitas ika ikixnamiktokej ikalpan? Yejua kijtoua: “Melak nikualanis” (Ezeq. 38:​18, 21-23, TNM). Ipan Apocalipsis capítulo 19 kijtoua ika Jehová kuajtitlanis iKoneuj niman ijkon makipaleui ikalpan niman makinpopolo itlauelikniuan. Niman, ijkuak Jesús tlaixnamikis, noijki kipaleuiskej “miyekej iluikaksoldados”, kijtosneki iluikaktekitkej niman 144,000 tlapejpeniltin (Apoc. 17:14; 19:​11-15). Niman ¿tlenon panos ipan yejon guerra? Kinmiktiskej niman kinpopoloskej nochimej akin kixnamikij Jehová (Apoc. 19:​19-21). w22.05 17 párrs. 9, 10

Sakin ika Adán niman Eva otlajtlakojkej, Jehová okimijli inkoneuan ika kichiuaskia itlaj inpampa. Niman tlen okimijli tiknextiaj ipan Génesis 3:15: “Nikchiuas para tejua iuan on siuatl xmotlauelita. Niman nikchiuas para mouejkakoneuan niman iuejkakoneuan on siuatl ma notlauelitakan. Se iuejkakoneu mitskuatepaxos niman tejua tikotstlankechis”. Yejuin se teotlajtojli tlen kachtopa onoijto ipan Biblia. Niman melak ueyi kijtosneki. ¿Tleka ijkon tikijtouaj? Pampa nochi Biblia tlajtoua itech Génesis 3:15. Niman nochi libros tlen kinpiya Biblia notlajtolnamikij iuan yejuin teotlajtojli. ¿Niman itech tlenon tlajtoua yejuin teotlajtojli? Kijtoua ika toTajtsin kuajtitlanis akin techuajmakixtis niman ijkon kipopolos Diablo niman akin kitekichiuiliaj. Ijkuak tlamis nochiuas yejuin teotlajtojli, nochimej itekipanojkauan Jehová melak yolpakiskej. Tla kuajli tomachtiaj Biblia, techpaleuis matikitakan kenon yejuin teotlajtojli inochiujtika niman kenon noijki techpaleuis. w22.07 14 párrs. 1-3

Xtlajtlanilikan Jehová tlamachilistli niman ijkon uelis nenkinpaleuiskej nemokoneuan makitlasojtlakan ika nochi inyojlo (Sant. 1:5). San Jehová uelis mechpaleuis. ¿Tleka? Pampa Jehová noijki tajtli niman san yejua akin más youejkauj nemi (Sal. 36:9). Noijki, kuajli nenkimatstokej ika nochi tlen techijlia ipan Biblia melak techpaleuiya (Is. 48:17). Jehová kineki ika mokoneuan noijki makitlasojtlakan, ika yejon, yomechmakak Biblia. Niman ikalpan noijki yonechinmakak miyek amatlajkuiloltin tlen ika uelis nenkinpaleuiskej nemokoneuan (Mat. 24:45). Ken ipan jw.org uelis nenkinextiskej tlen mechpaleuis, uelis nenkalakiskej kampa kijtoua TLAMACHTILTIN ITECH BIBLIA > NAMIKTILISTLI NIMAN FAMILIA. Noijki, ipan jw.org, nenkinextiskej videos tlen mechpaleuis kuajli xkinmachtikan nemokoneuan (Prov. 2:​4, 5). w22.05 27 párrs. 4, 5

Xakaj tetlapopoluiya ijkon ken Jehová. Kachtopa, pampa yejua nochipa kinektok techtlapopoluis. Ika ome, pampa yejua kuajli techixmatstok niman kimatstok tla yemelak yotoyolkuepkej. Niman ika yeyi, pampa ijkuak Jehová techtlapopoluiya kilkaua tlen xkuajli otikchiujkej. Ika yejon, ijkuak techtlapopoluiya oksejpa kuajli iuan touikaj niman xok techajmana tlen otikchiujkej. Pampa titlajtlakolejkej, miyekpa tikijtoskej noso tikchiuaskej tlen Jehová xkuelita. San ika, tlen kijtoua Perspicacia para comprender las Escrituras, volumen 1, página 209, melak techyolchikaua. Ompa kijtoua: “Jehová kimatstok ika itekipanojkauan tlajtlakolejkej. Kuakon, ijkuak nopopoloskej xnoneki melak najmanaskej pampa yejua kimasikamati (Sl 103:​8-14; 130:3). Niman tla yejuamej nokojtiliaj nochipa kichiuaskej tlen Jehová kintlajtlanilia, nochipa yolpakiskej (Flp 4:​4-6; 1Jn 3:​19-22)”. w22.06 7 párrs. 18, 19

Niman Satanás xsan kichiua ika gobiernos matechtlauelitakan. Yejua noijki kichiua ika miyekej makinmojti tlen uelis kijtoskej inchanejkauan ijkuak kimatiskej ika yejuamej aman iteixpantijkauan Jehová. Miyekej más kinmojtia yejuin xijkon ken tla san kintlajyouiltiskiaj. Yejuamej melak kintlasojtlaj inchanejkauan niman kuelitaskiaj makixmatikan niman makitlasojtlakan Jehová. Kuakon, ijkuak inchanejkauan xkuajli tlajtouaj itech Jehová noso itech tokniuan, yejon melak kinyolkokoua. Kemantika tochanejkauan akin melak techtlauelitayaj peua nomachtiaj. San ika ¿tlenon uelis tikchiuaskej tla se tochanejkauj melak kualani niman xok kineki technotsas? ¡Melak kualtsin tlen kijtoua Salmo 27:10! Tla nochipa tikilnamikij ika Jehová techtlasojtla, xtomojtiskej ijkuak techtlauelitaskej niman kuajli tikmatstoskej ika tla titlaxikouaj, Jehová techteochiuas. San Jehová uelis techyolseuis, techmakas tlen techpoloua niman kichikauas totlaneltok. w22.06 16, 17 párrs. 11-13

Ijkuak Jesús nemiya ipan tlaltikpaktli, miyekej okijtokej ika melak tlakuaya niman tlauaniya, ika kitekichiuiliaya Diablo, ika xkitlakaitaya tonajli sábado niman hasta okijtouilijkej ika yokiuijuikaltijka toTajtsin (Mat. 11:19; 26:65; Luc. 11:15; Juan 9:16). Maski ijkon, Jesús xkeman okintlauelnankili. Matikchiuakan ijkon ken Jesús, ijkuak yakaj techtlauelnotsas maka matiktlauelnankilikan (1 Ped. 2:​22, 23). Kemantika noijki tikualanij ijkuak techtlauelnotsaj (Sant. 3:2). Ika yejon, ¿tlenon techpaleuis maka matitetlauelnankilikan? Maka nimantsin matikualanikan ijkuak yakaj techuajtlauelnankilis kampa titenojnotsaj. Matikitakan tlenon kichiua se tokniuj tlakatl akin itoka Sam, yejua kijtoua: “Ijkuak yakaj nechtlauelnotsa, niknemilia ika yejua noijki noneki kimatis tlen kijtoua Biblia niman ika uelis nopatlas”. Sekimej techualajuaj pampa kanaj ipan yejon tonajli itlaj kinkualanijtoya. Ijkuak yakaj ijkon texchiuilis, matiknotsakan Jehová niman matiktlajtlanilikan matechpaleui matitetlakaitakan niman maka matitetlauelnankilikan. w22.04 6 párrs. 8, 9

Tatajtin uelis kinpaleuiskej inkoneuan manonisiuikan itech Jehová tla imiuan nomachtiaj Biblia (2 Tim. 3:​14-17). Aman tej, Biblia techijlia tlenon uelis kichiuaskej telpokamej niman ijkon más ueliskej itech Jehová. Ipan amoxtli Proverbios, nesi kenon se tajtli tlajtoua iuan ikoneuj niman kijlia makita tlen toTajtsin okichijchiuj niman ijkon uelis más kixmatis Jehová niman ikualneskayouan (Prov. 3:​19-21). Tatajtin, ¿xmelak ika nenyolpakij ijkuak nemonpaxalouaj imiuan nemokoneuan kampa melak tlakualtsinkan? Ijkuak nenkinuikaskej nemokoneuan kampa melak tlakualtsinkan, xkinpaleuikan makitakan ikualneskayouan Jehová ijkuak nenkitaskej tlen kualtsin okichijchiuj (Rom. 1:20). Jesús okimititi inomachtijkauan tlen toTajtsin okichijchiuj para kinmachtis. Sejpa, okintlajtlanili makimitakan kakalomej niman xochimej tlen intoka lirios (Luc. 12:​24, 27-30). Okinmachti ika inTajtsin iluikakchane nochipa techmaka tlen techpoloua. Niman ijkon ken nochipa kintlakualtia kakalomej niman kualtsin kintlakentia xochimej, Jehová noijki kintlakualtia niman kintlakentia itekipanojkauan. w23.03 20, 21 párrs. 1-4

Matiktlasojkamachilikan Jehová pampa ueli tiknotsaj itechkopa iKonetsin. Itechkopa Jesús techmaka tlen tiktlajtlaniliaj. Kuakon, tla tiktekitiltiaj itoka iKonetsin Jehová ipan toteoyouan, yejua techkakis, technankilis niman techtlapopoluis (Rom. 5:1). Biblia kijtoua ika Jesús “sen ueyi tlayekanki tiopixki” niman “noseuijtikaj iyekmakopa on trono kampa on toueyi Dios tlamandaroua” (Heb. 8:1). Noijki Biblia kijtoua ika “tikpiyaj totepantlajtojkau yejuan techpaleuis” niman “in totepantlajtojkau yejua JesuCristo” (1 Juan 2:1). Melak tiktlasojkamachiliaj Jehová ika otechmakak “sen ueyi tlayekanki tiopixki” akin techiknelia, techasikamati niman akin “topampa tlajtojtikaj” (Rom. 8:34; Heb. 4:15). Tla Jesús xmikiskia topampa, tejuamej xueliskia tiknotsaskiaj toTajtsin. ¡Melak tiktlasojkamachiliaj Jehová ika okitemakak isenteKonetsin topampa! w22.07 23 párrs. 10-12

Yakaj akin uelis itech titlaneltokas nochipa kichiua tlen kijtoua niman xtekajkayaua (Sal. 15:4). Niman oksekimej kimatstokej ika uelis kinpaleuis niman ika uelis kijliskej tlen kimajmana. Tejuamej tiknekij ika tokniuan ijkon matechitakan. Tejuamej xuelis tikinchiualtiskej oksekimej totech matlaneltokakan. Yejuin yeskia kentla tomin: ouijtika tiktlanis niman uelis san totoka tikpolos. Tejuamej uelis titlaneltokaskej itech Jehová pampa yotechititi ika “nochipa kichiua on tlen kiprometeroua” (Sal. 33:4). Niman yejua kineki matikimititikan tokniuan ika kema uelis totech tlaneltokaskej (Efes. 5:1). Melak tiktlasojkamachiliaj Jehová pampa yotechinmakak melak miyekej tokniuan akin techtlasojtlaj niman uelis intech titlaneltokaskej. Tinochimej melak noneki matokojtilikan para tikimititiskej tokniuan ika uelis totech tlaneltokaskej. Tla tikteititiaj ika titetlasojtlaj, tiyolyemankej, kuajli titlanemiliaj, tiyolchipaujkej niman ika ueli san toselti toteltiaj titlapaleuiskej para ipan tlanechikojli nochimej intech matitlaneltokakan. Matikchiuakan ijkon ken toTajtsin Jehová niman matikimititikan oksekimej ika kema uelis totech tlaneltokaskej. w22.09 8 párrs. 1, 2; 13 párr. 17

Maski ipan ikalpan Jehová tikinpiyaj melak miyekej tokniuan, kanaj kemantika san toselti tomachiliaj, toyolajmanaj noso tiknemiliaj ika xtlaj ika titepaleuiyaj niman hasta tiknemiliaj ika xakaj uelis techpaleuis maka ijkon matitlanemilikan. Jehová xkineki ijkon matomachilikan. Matikitakan kenon okipaleui teotlajtoketl Elías. Yejua okpa okitlajtolti: “¿Tlinon tikchijtikaj nikan Elías?” (1 Rey. 19:​9, 13). Yejua ijkon okitlajtolti Elías pampa kinekiya makijli kenon nomachiliaya. Yejua kuajli okikak niman okititi ika iuan nemiya niman ika yejua melak kojtik. Noijki okijli ika ok nemiyaj miyekej israelitas akin kitekichiuilijtoyaj (1 Rey. 19:​11, 12, 18). Elías kanaj hasta ouajyolseuj ijkuak okijli Jehová nochi tlen kimachiliaya. Noijki, Jehová okimakak Elías más tekitl: okijli makitlapejpeniti Hazael ken tekiuaj de Siria, Jehú ken tekiuaj de Israel niman Eliseo ken teotlajtoketl (1 Rey. 19:​15, 16). Niman yejuin tekitl okipaleui Elías maka san matlanemilijto itech tlen xkuajli kixnamiktoya. Niman xsan yejon, Jehová noijki okimakak se iamigo, Eliseo. w22.08 8 párr. 3; 9 párr. 5

¿Tejua yotitlapaleuijka ijkuak onochijchiuj noso onoyektlali se Kajli kampa tosentlaliaj? Tla kema, kanaj tikilnamiki kenon melak otiyolpak ijkuak otiaj ipan kachtopa tlanechikojli tlen onochiuj ipan yejon kajli. Kanaj hasta otipajkachokak niman xouel otimokuikati. Yejuin Kaltin kampa tosentlaliaj kiueyichiuaj Jehová. San ika, xsan tikinchijchiuaj yejuin kaltin, tejuamej tikchiuaj itlaj okse tlen más kiueyichiua Jehová: tikinyolchikauaj akin ompa nosentlaliaj. Apóstol Pablo otlajto itech yejuin ijkuak okijkuilo tlaxelojli tlen aman tikitstokej. Tlen okichiuj apóstol Pablo techpaleuis matikmatikan kenon tikinyolchikauaskej tokniuan. Yejua nochipa okimasikamat tokniuan. Tla tejuamej noijki ijkon tikchiuaj, uelis tikinpaleuiskej tokniuan machikaujto intlaneltok itech Jehová (1 Cor. 11:1). w22.08 20 párrs. 1, 2

Tla se tokniuj kineki kichiuas tlen melajki ixpan Jehová, xnoneki tekajkayauas ijkuak tlanemakas. Noijki, akin kitlasojtla imelajkayo Jehová xkuelita ijkuak kita kenon sekimej kitechiuiliaj tlen xkuajli. Niman xsan yejon, ijkuak itlaj kitlapejpenia, nochipa tlanemilia itech Jehová niman kitlajtlanilia makipaleui. Biblia kijtoua ika nochi melajkayotl ualeua itech Jehová (Jer. 50:7). Niman, ¿san akinon uelis techijlis tlenon kuajli niman tlenon xkuajli? San toTajtsin Jehová, akin otexchijchiuj. Yejua nochipa kimatstok tlenon kuajli, xijkon ken tejuamej (Prov. 14:12; Is. 55:​8, 9). San ika ¿uelis tikintlakamatiskej itlanauatiluan tlen melajkej? Kema, pampa matikilnamikikan ika toTajtsin otexchijchiuj ijkon ken yejua (Gén. 1:27). Niman tikuelitaj tikchiuaskej tlen yejua technauatia. Tejuamej melak tiktlasojtlaj toTajtsin, ika yejon, tiknekij tikchiuaskej ijkon ken yejua (Efes. 5:1). w22.08 27 párrs. 5, 6

Ijkuak melak tajmanaj, kemantika tiktejtemouaj tlenon tikchiuaskej niman ijkon achijtsin tikilkauaskej tlen topan panotika. Xtlaj tlenon tla ijkon tikchiuaj, san ika, noneki totlajpiyaskej maka tikchiuaskej itlaj tlen Jehová kitlauelita (Efes. 5:​10-12, 15-16). Pablo okintitlanili se carta tokniuan akin chantiyaj Filipos niman okimijli ika nochipa makinemilikan tlen “melajki”, tlen “chipauak”, tlen “tepaktia” niman tlen “kipiya yekteneualistli” (Filip. 4:8). Maski Pablo xtlajtotoya itech tlen ika toyolpaktiaj, tlen okijto techpaleuiya matiktlapejpenikan tlen kuajli. Kuakon, ijkuak tijkakiskej se tlakuikajli, ijkuak tikitaskej se película, ijkuak tikamapouaskej se libro noso ijkuak tiktauiltiskej se videojuego, matikitakan tla kipiya tlen “melajki”, tla “chipauak”, tla kipaktia Jehová niman tla “kipiya yekteneualistli”. Tla ijkin tikchiuaj, tikmatiskej tla Jehová kuelita noso xkuelita tlen tiknekij tikchiuaskej. Matikilnamikikan ika tejuamej nochipa tiknekij tikintlakamatiskej itlanauatiluan Jehová (Sal. 119:​1-3). w22.10 9 párrs. 11, 12

Akin xyolmelajkej ijkuak yoltoyaj sekimej okichiujkej tlen melak xkuajli. Yejuamej nonekis nokojtiliskej kichiuaskej nochi tlen Jehová kuelita. Ika yejon, ijkuak tlayekantos iTekiuajyo toTajtsin, tikpiyaskej miyek tekitl pampa nochimej tikinmachtiskej. Akin makisaskej ipan Armagedón niman on “yolmelajkej” akin yoliuiskej, kinmachtiskej nochimej akin xyolmelajkej. ¿Tlenon noneki kichiuaskej akin xyolmelajkej tla kinekij ika toTajtsin makimijkuilo intoka ipan amoxtli tlen kijtoua akinomej kipiyaskej nemilistli? Noneki kuajli iuan nouikaskej niman itech nosentemakaskej. Jesús niman tlapejpeniltin, akin yeskej ken jueces, kitstoskej kenon nopatlatiuej akin xyolmelajkej (Apoc. 20:4). Tla yakaj xkineki nopatlas, kipopoloskej maski tla kipiya 100 xiuitl (Is. 65:20). Jehová niman Jesús kimatij tlenon tikpiyaj ipan toyojlo, ika yejon, xakaj kikauiliskej makijtlako yejuin tlaltikpaktli (Is. 11:9; 60:18; 65:25). w22.09 17 párrs. 11, 12

Ijkuak ipan yejuin tlaxelojli kijtoua “tekiuajkej”, tlajtotika itech nochimej gobiernos akin kinyekanaj tlaltikpakchanejkej. Akin tikchiuaj ken Cristo noneki tikintlakamatiskej yejuin gobiernos pampa yejuamej techtlajpiyaj, kichiuaj manotlakamatikan tlanauatiltin tlen yokintlalijkej niman kemantika hasta kipaleuiyaj ikalpan Jehová (Apoc. 12:16). Ika yejon, Biblia techijlia matikintlaxtlauilikan impuestos niman matikintlakaitakan (Rom. 13:7). San ika, yejuin tekiuajkej uelij tlayekanaj pampa Jehová kinkauilia. Niman ijkon tikijtouaj pampa ijkuak tekiuaj romano Poncio Pilato kiyolkuitijtoya Jesús niman okijli ika yejua ueliskia kichiuas makimakixtikan noso makimiktikan, Jesús okinankili: “Xtikpiyaskia itlaj tekiuajyotl noka nejua tla Dios xmitsmakaskia” (Juan 19:11). Ijkon ken Pilato, nochimej gobiernos niman políticos akin aman nemij, xuelij tlayekanaj ijkon ken Jehová tlayekana. w22.10 13 párr. 6

Jehová okichiuj ika David makijkuilo itech kenon nemiskiaj israelitas ijkuak tekiuajtiskia se tekiuaj akin tlamachilise yeskia niman akin kichiuaskia tlen kuajli (Sal. 37:​10, 11, 29). Ijkuak tikinnojnotsaj oksekimej itech Xochitlalpan, miyekpa tikinpouiliaj Salmo 37:11. Niman melak kuajli tla ijkon tikchiuaj pampa Jesús noijki okiteneuj yejuin texto ipan Tlamachtijli ipan Tepetl. Yejon techititia ika yejuin tlajtoltin nochiuaskej ika tlayekapan (Mat. 5:5). San ika, tlen okijkuilo tekiuaj David noijki okiteititi kenon nemiskiaj israelitas ipan itonaluan Salomón. Ipan yejon tonaltin, israelitas ika inyojlo nemiyaj pampa chantiyaj ipan se “tlajli kampa sanoyej tlatlaki[ya] niman xitlaj poliui[ya]”. ToTajtsin okimijlika: “Tla nenkintlakamatij noleyes, [ . . . ] nejua nikchiuas para nemoyolika xnemikan. Niman ijkuak nenkochiskej xitlaj nenkimakajsiskej, pampa nejua nemechmanauis ipan on país” (Lev. 20:24; 26:​3, 6). Nochi yejuin onochiuj ijkuak tekiuajtitoya Salomón (1 Crón. 22:9; 29:​26-28). Kuakon, uelis tikijtoskej ika tlen kijtoua Salmo 37:​10, 11, 29 yonochiuj niman noijki nochiuas ika tlayekapan. w22.12 10 párr. 8

Matikchiuakan tlen ikalpan toTajtsin techijlia. Biblia techijlia: “On nouijsokilistli kuajli kinemiliaj kenijki nochiuas, niman on tetlanilistli kisa intech miyekej tetlakanonotskej” (Prov. 24:6). ¿Kenon techpaleuiya yejuin texto kuajli matitenojnotsakan niman matitemachtikan? Ijkuak titenojnotsaj, xtikchiuaj ijkon ken tejuamej tikuelitaj, yej tokojtiliaj tikchiuaskej ken techijlia ikalpan toTajtsin. ¿Niman kenon techpaleuiya ikalpan toTajtsin? Ipan tlanechikoltin miyek tiuelij ijkuak tokniuan kinpanoltiaj tlamachtiltin. Noijki, miyek tiuelij ijkuak tokniuan panouaj niman techititiaj kenon titenojnotsaskej niman titemachtiskej. Niman noijki techinmaka amatlajkuiloltin niman videos tlen uelis tikimititiskej akin tikinnojnotsaj para más makasikamatikan tlen kijtoua Biblia. Melak tiktlasojkamachiliaj Jehová pampa ipan Biblia techijlia tlen melak techpaleuiya. ¡San xkonnemili kenon tinemiskiaj tla xtikpiyaskiaj Biblia! Kuakon, nochipa matikselikan on tlamachilistli tlen Jehová kineki techmakas (Prov. 3:​13-17). w22.10 22, 23 párrs. 18, 19

Ijkon ken totlalnakayo chikaui ijkuak titlakuaj, totlaneltokil noijki chikaui ijkuak tomachtiaj niman titlanemiliaj itech iTlajtol toTajtsin. Niman yejon tlen techmachtia ijkuak Ezequiel okitak yejon amatlajkuilojli mimiltik ipan se tlatlachalistli. Jehová kineki matixuikan ika iTlajtol, noso kuajli matikasikamatikan. ¿Niman kenon uelis ijkon tikchiuaskej? Tla tiknotsaj toTajtsin, tla tomachtiaj iTlajtol niman tla titlanemiliaj itech tlen tomachtiaj. Kachtopa, tiknotsaj toTajtsin pampa tiknekij kuajli tikasikamatiskej tlen yejua kineki techijlis. Sakin, tikpouaj Biblia. Niman sa ika tlami, toteltiaj pampa tiknekij titlanemiliskej itech tlen yotomachtijkej. ¿Kenon techpaleuis tla ijkon tikchiuaj? Tla titlanemiliaj itech tlen tomachtiaj, más kuajli tikasikamatiskej iTlajtol toTajtsin. ¿Tleka melak noneki matikamapouakan Biblia niman itech matitlanemilikan? Pampa tla ijkon tikchiuaj, techpaleuis matitenojnotsakan itech iTekiuajyo toTajtsin, niman tla ika tlayekapan nonekis tikteijliskej tlen inpan nochiuas akin xkinekij kitlakamatiskej toTajtsin, noijki techpaleuis. Noijki, ijkuak titlanemiliaj itech tlen kualtsin kichiua Jehová, más iuan touikaj. w22.11 6, 7 párrs. 16, 17

Jesús okijto ika nochimej inomachtijkauan niman nochimej tlaltikpakchanejkej kimatiskiaj akinomej yemelak kitekichiuiliaj Jehová pampa yejuamej yemelak notlasojtlaskiaj. Melak kualtsin kenon nochimej tokniuan ipan tlanechikojli yemelak notlasojtlaj pampa tlaltikpakchanejkej xuelij ijkon kichiuaj. San ika, tikmatstokej ika iteixpantijkauan Jehová noijki tlajtlakolejkej (1 Juan 1:8). Ika yejon, ijkuak más tikimixmatij tokniuan, kanaj uelis más tikitaskej kenon nopopolouaj (Rom. 3:23). Teajman ika sekimej xok kitekichiuiliaj Jehová pampa san okitakej kenon nopopolouayaj tokniuan. ¿Tleka akin yemelak kichiuaskiaj ken Cristo notlasojtlaskiaj? ¿Kenon Jesús okimititi inomachtijkauan ika kintlasojtlaya? ¿Kenon uelis titetlasojtlaskej ijkon ken Jesús otetlasojtlak? Melak kuajli yeskia tla akin itiiteixpantijkauan Jehová noijki totlajtoltiaj yejuin pampa techpaleuis más matitetlasojtlakan, niman ijkuak sekimej nopopoloskej, uelis tikimititiskej ika tikintlasojtlaj (Efes. 5:2). w23.03 26, 27 párrs. 2-4

Pampa tinemij ipan itlamiyan tonaltin, uelis tikixnamikiskej tlen ouijtika ipan tlanechikojli, niman yejon ueliskia kichiuas maka matimelajkanemikan itech Jehová. Ika yejon, nochipa matikteititikan ika tikpiyaj kuajli tlamachilistli. Tla tiknemiliaj ika se tokniuj otexchiuili tlen xkuajli, maka san matitlauelmiktokan. Niman tla techmelajkatlaliaj, maka matiktlauelkakikan niman matokojtilikan matopatlakan, maski kanaj otipinaujkej ijkuak otechmelajkatlalijkej. Niman tla kemantika ikalpan toTajtsin kipatla itlaj ipan motlanechikol noso mitspatiliaj motekiyo, ika nochi moyojlo xtetlakamati niman xmokauili mamitsyekana. Tejua uelis titlaneltokas itech Jehová niman itech ikalpan ijkuak tikixnamikis tlen ouijtika. Niman uelis ijkon tikchiuas tla xnimantsin tikualani, kuajli titlanemilia, niman titlanemilia ijkon ken Jehová tlanemilia. Xtlajtlanili Jehová mamitspaleui niman maka xmoxelo intech tokniuan. Tla ijkon tikchiua, Satanás xuelis mitsxelos itech Jehová nion itech ikalpan (Sant. 4:7). w22.11 24, 25 párrs. 14-16

Tlen uelis kichiuaskej tokniuan tlayekankej. Tlayekankej, xkinpaleuikan tokniuan makimatikan tlenon kichiuaskej ijkuak san totoka itlaj panos. Kuajli xkitakan ika nochimej tokniuan akin nemij ipan nemotlanechikol makimatstokan tlenon noneki kichiuaskej niman ijkon uelis makisaskej. Niman noijki xkitakan ika nochimej makipiyakan nemonúmero de teléfono. San ika ¿tlenon uelis tikchiuas tejua? Tla kampa nisiuj tichanti itlaj panoua, xkintlajtolti tlayekankej kenon uelis titepaleuis. Kanaj ueliskia tikinseuis tokniuan akin xok kipiyaj inchan noso tokniuan akin tlapaleuiyaj kampa tlaixpoliui. Noso kanaj noijki ueliskia tikominkauilis tokniuan tlen kikuaskej noso okseki tlen kinpoloua. Niman tla uejka nokaua kampa tlaixpoliui, noijki ueliskia titepaleuis. ¿Kenon? Tla tikchiua teoyotl inpampa tokniuan niman tla tiktemaka motomintsin niman ijkon tokniuan makinpaleuikan (2 Cor. 1:​8-11; 8:​2-5). Niman tla tiuelis tias kampa tlaixpoliui, xkintlajtolti tlayekankej kenon uelis titepaleuis. Tla mitsnotsaj, mitsmachtiskej para más kuajli titepaleuis ijkuak nonekis niman kampa nonekis. w22.12 24 párr. 8; 25 párrs. 11, 12

Se Biblia ijkin okitlajtolkuep yejuin tlaxelojli tlen aman tikitstokej: “Tlatlatalistli tlen nemejuamej nenkipiyaj noijki kipiyaj oksekimej tlaltikpakchanejkej”. Yejuin tlajtoltin okimijlikej tokniuan akin chantiyaj Corinto. Sekimej tokniuan akin ompa chantiyaj auilnemiyaj, tlauaniyaj niman sekimej kinuelitayaj san no insiuaikniuan noso intlakaikniuan (1 Cor. 6:​9-11). ¿Xmelak ika maski yejuin tokniuan yonoapolaktijkaj, ok nonekiya noxijxikoskej iuan on tlen xkuajli kileuiayaj? Kema, pampa maski nochimej tlapejpeniltin katkaj, yejuamej ok tlajtlakolejkej katkaj. Ika yejon, uelis tiknemiliskej ika kemantika ononek noxijxikoskej iuan on tlen xkuajli kinekiyaj kichiuaskej. Yejuin techyolchikaua pampa tikitaj ika tokniuan noijki onoxijxikojkej iuan on tlen xkuajli kileuiayaj niman ouelkej omelajkanenkej. Kuakon, matikchiuakan ijkon ken kijtoua 1 Pedro 5:9: “Xmelajkanemikan ipan nemotlaneltok. No ijki xmatstiakan ika nochiuiyan imanian in tlaltikpaktli on nemokniuan no ijki ken nemejuamej tlajyouiyaj”. w23.01 12 párr. 15

Jesús okitlajtlanili Jehová makinpaleui inomachtijkauan (Juan 17:11). ¿Tleka yejon techpaleuiya matiyolchikauikan? Pampa Jehová más kojtik xijkon ken totlauelikniuan (1 Juan 4:4). Niman yejua nochi kitstika. Kuajli tikmatstokej ika tla titlaneltokaj itech Jehová, xmás tomojtiskej niman tiyolchikaujkej yeskej. ¿Tipinaui tikijtos ika tiiteixpantijkauj Jehová? ¿Xtikmati tla ipeuas titenojnotsas noso tla itimoapolaktis pampa mitsmojtia tlen ueliskia kijtoskej motechkopa? Maka mamitsmojti tlen ueliskia kijtoskej, tejua xmokojtili xtekichiuili Jehová. Xtlajtlanili Jehová mamitspaleui niman mamitsyolchikaua niman ijkon tikchiuas tlen yejua kineki. Ijkuak tikitas ika Jehová kinnankilia moteoyouan, más tiyolchikauak yes (Is. 41:​10, 13). w23.01 29 párr. 12; 30 párr. 14

Fariseos xika inyojlo kipouayaj iTlajtol toTajtsin. ¿Kenon tikmatij? Pampa Jesús okintlajtolti tla xkeman kipouanij tlen kijtoua iTlajtol toTajtsin (Mat. 12:​1-7). Ijkuak ijkon opanok, fariseos okimijlikaj inomachtijkauan Jesús ika yejuamej xokitlakamatkej tlanauatijli kampa kijtouaya ika xnonekiya tekitiskej sábado. Ijkuak Jesús okinnankili, okinteneuili ome neskayomej tlen uajnestiuej ipan Biblia niman se tlaxelojli itech Oseas. Ijkon, Jesús okiteititi ika fariseos xteikneliayaj niman ika xkasikamatiyaj tleka onotemakak yejon tlanauatijli. Yejuin tlakamej kiamapouayaj iTlajtol toTajtsin, san ika, xtlaj ika kinpaleuiaya. ¿Tleka? Pampa melak noueyimatiyaj niman san kiamapouayaj para tetejteneuaskej. Yejon fariseos xkuajli kasikamatiyaj tlen kiamapouayaj ipan iTlajtol toTajtsin pampa xika inyojlo kiamapouayaj (Mat. 23:23; Juan 5:​39, 40). Ipan Mateo 19:​4-6, noijki tikitaj ika Jesús okintlajtolti fariseos tla xkeman kiamapouayaj tlen kijtoua iTlajtol toTajtsin. Maski yejuamej miyekpa yokipoujkaj kenon otlachijchiuj toTajtsin, yejuamej xtlanemiliayaj ijkon ken Jehová tlanemilia itech namiktilistli. Tlen okijto Jesús techmachtia ika ijkuak tikpouaskej Biblia, noneki ika toyojlo tikchiuaskej. Maka matikchiuakan ijkon ken fariseos, yej matoyolyemanilikan niman matijkauilikan Jehová matechmachti. w23.02 12 párrs. 12, 13

Jehová okimijli israelitas tlenon ueliskia kichiuaskej para maka itlaj inpan nochiuas kampa chantij niman kampa tekitij (Éx. 21:​28, 29; Deut. 22:8). Tla se israelita kimiktiaya yakaj maski xkinekiya, melak xkuajli tlen kichiuiliayaj (Deut. 19:​4, 5). Noijki, Tlanauatijli tlen okimakakej Moisés kijtouaya ika tla itlaj kichiuiliayaj se koneuatsin niman kikokouayaj ikonetsin akin xiuajnemiya, nonekiya tlatlaxtlauas noso hasta ueliskia kimiktiskiaj (Éx. 21:​22, 23). Biblia kuajli kijtoua ika Jehová kineki matotlajpiyakan para maka tiktechiuiliskej tlen xkuajli noso para maka topan manochiua tlen xkuajli. Uelis tikititiskej toTajtsin ika tikpatiojkaitaj tonemilis tla totlajpiyaj para maka itlaj topan nochiuas kampa titekitij noso kampa tichantij. Tla tikpiyaj itlaj tlen tlateki, ken cuchillos noso machetes, noso itlaj tlen uelis teijtlakos, ken cloro, medicamentos, pajtli para tlayojli, pajtli para kimichimej noso para okse yolkatsin, noneki tikimejyeuaskej kampa kokonej xuelis kontilanaskej. Niman tla xok tikintekitiltiskej, noneki tikitaskej kenon tikintlajkaliskej. Noijki noneki totlajpiyaskej ijkuak titlatlatiskej, ijkuak itlaj tikposoniskej niman ijkuak tikintekitiltiskej aparatos tlen tekitij ika electricidad. Noijki, maka matitlanejnemiltikan tla yotikonikej alcohol noso tla xkuajli otikochkej noso tla yotiktolojkej se medicina tlen ueliskia kichiuas maka kuajli matitlanejnemiltikan. Niman noijki xnoneki tikitstiaskej toteléfono ijkuak titlanejnemiltiskej. w23.02 21, 22 párrs. 7-9

Jehová yolkuajli, teasikamati, teijyouiya niman kita tlen kuajli kichiuaj akin kinmachtia (Sal. 130:3). Matikilnamikikan ika yejua otechtlayokoli totsontekon, ika yejon, kimatstok kenon tlachijchiujtli. Kuakon, yejua xkeman techtlajtlaniliskia matikchiuakan itlaj tlen kimatstok ika xtiueliskiaj (Sal. 139:14). Niman yejua kineki nochipa itlaj yenkuik matiuelikan niman matiyolpakikan ijkuak ijkon tikchiuaskej. Ika yejon, desde aman noneki sajnoye matiknekikan tomachtiskej iTlajtol toTajtsin (1 Ped. 2:2). ¿Tlenon uelis mitspaleuis? Xkita tlenon más uelis tikchiuas, niman mojmostla xmomachti Biblia (Jos. 1:8). Jehová mitspaleuis xkuelita tikamapouas niman timomachtis Biblia. Tejuamej xsan tomachtiaj pampa tiknekij miyek tiueliskej. Tejuamej tomachtiaj pampa tiknekij tikixmatiskej Jehová, tiktlasojtlaskej niman itech titlaneltokaskej (1 Cor. 8:​1-3). Ijkuak más timomachtis itech Jehová, noijki xtlajtlanili mamitspaleui más xtlaneltoka (Luc. 17:5). Tikitas ika yejua mitspaleuis más xtlaneltoka. w23.03 10 párrs. 11, 13

Jesús kinekiya ika inomachtijkauan makichiuakan tlen yejua okinnauatijteuj hasta ijkuak tlapopoliuiskia. Jesús okinnauati matenojnotsakan niman makiteijlikan on kuajli tlajtoltin “ne Jerusalén, niman imanian Judea, niman Samaria, niman nochiuiyan ipan in tlaltikpaktli” (Hech. 1:​6-8). Melak ueyi tekitl okinmakakej. San ika, tla nochipa chikauak tenojnotsayaj, melak kuajli kitekitiltiskiaj intiempo hasta ijkuak tlapopoliuiskia. Tla tiknekij sa no tejuamej toitaskej, noneki tikitaskej kenon tiktekitiltiaj totiempo. ¿Niman tleka melak noneki matikchiuakan yejuin? Pampa ijkon ken kijtoua Eclesiastés 9:​11, “nochimej ajsi tonajli ijkuak kiseliaj tlen kuajli noso xkuajli”. Hasta ueliskia san totoka timiktiuetsiskiaj. ¿Kenon uelis kuajli tiktekitiltiskej totiempo? Tla nochipa tikchiuaj tlen Jehová kuelita niman tla tikchiuaj nochi tlen techpaleuis más kuajli iuan matouikakan (Juan 14:21). Matikchiuakan ijkon ken techijlia yejuin tlaxelojli itech Biblia: “Xmelajkanemikan ipan nemotlaneltok. Maka xkauilikan itlaj ma mechejkuani itech nemotlaneltok. Nochipa xchiuakan itekiu toTEKO ikan nochi nemoyojlo” (1 Cor. 15:58). Tla ijkon tikchiuaj, ijkuak tomikiliskej noso ijkuak yejkos tonajli ijkuak toTajtsin tlapopolos, xtajmanaskej pampa tikmatstoskej ika chikauak otiktekichiuilijkej Jehová ijkuak tiueliyaj (Mat. 24:13; Rom. 14:8). w23.02 18, 19 párrs. 12-14