Febrero

¿Tlenon okijtosnek Jesús ipan tlaxelojli tlen aman tikitstokej? Ika inomachtijkauan yemelak notlasojtlaskiaj, hasta kinektoskiaj mikiskej inpampa imikniuan. ITlajtol toTajtsin techmachtia ika tlasojtlalistli melak ueyi kijtosneki. Miyekej kijtouaj ika melak kinuelitaj yejuin tlaxeloltin itech Biblia: “Dios yejua tetlajsojtlalistli” (1 Juan 4:8); “Xkintlajsojtla oksekimej no ijki ken tejua timotlajsojtla” (Mat. 22:39); “Tla melauak nentetlajsojtlaj nenkitlapojpoluiskej yejuan mechchiuilia tlen xkuajli” (1 Ped. 4:8), niman “On yejuan tetlajsojtla xkaman tlami itetlajsojtlalis” (1 Cor. 13:8). Yejuin tlaxeloltin niman okseki tlen onka ipan Biblia, kijtouaj ika melak noneki matikteititikan ika titetlasojtlaj. Pampa tlasojtlalistli ualeua itech Jehová, san tlaltikpakchanejkej akin yejua kinmaka iespíritu yemelak notlasojtlaj (1 Juan 4:7). Ika yejon, Jesús okijto ika akin inomachtijkauan yeskiaj, yemelak notlasojtlaskiaj. Miyekej yokitakej akinomej yemelak kitekichiuiliaj toTajtsin pampa, ijkon ken okijto Jesús, yejuamej yemelak notlasojtlaj. w23.03 27, 28 párrs. 5-8

¿Tlenon uelis tikchiuas tla ouijtika tikita tikintlapopoluis oksekimej? Uelis tikitas ipan Biblia akinomej otetlapopoluijkej niman akinomej xotetlapopoluijkej. Noijki uelis tikitas kenon Jesús okintlapopolui oksekimej (Luc. 7:47). Jesús xsan kitaya kenon oksekimej nopopolouayaj, yejua kitaya tlen kuajli kichiuayaj. Noijki, Jesús xkichiuaya ken fariseos akin kinemiliayaj ika más kuajkualtin katkaj niman kinchikoitayaj oksekimej (Luc. 18:9). Tla yotimomachti yejuin, kanaj uelis timotlajtoltis: “¿Tlenon nikimitilia oksekimej: tlen kuajli kichiuaj noso kenon nopopolouaj?”. Tla tikita ika xueli tiktlapopoluiya yakaj, uelis tikijkuilos nochi tlen yejua kuajli kichiua niman uelis timotlajtoltis: “¿Tlenon kichiuaskia Jesús? ¿Yejua kitlapopoluiskia?”. Tla tikchiua nochi yejuin, uelis mitspaleuis xpatla ken titlanemilia. Tikmatstokej ika ouijtika tiktlapopoluis yakaj akin melak yomitsyolkoko. San ika, tla timokojtilia titetlapopoluis, sakin tikitas ika más tiknektos titetlapopoluis. w22.04 23 párr. 6

Ipan amoxtli Apocalipsis kijtoua ika itlauelikniuan toTajtsin yeskiaj kentla yolkamej. Apocalipsis kijtoua ika ipan mar “ouajkis sen xkuajli yolki yejuan kipiyaya chikome itsontekon niman majtlaktli ikuakuauuan” (Apoc. 13:1). Sakin kijtoua ika “okse xkuajli yolki uajkistiu ijtik on tlaltikpaktli” niman “itlajtol kakistiya ken itlajtol sen dragón” niman “kichiuaya ma uetsi tlitl ipan tlajli” (Apoc. 13:​11-13). Sakin noteneua se “xkuajli yolki [ . . . ] chichiltik” niman ipan yeuatiaya se siuatl tlakapajpatlaketl. Yejuin yeyimej yolkamej kinneskayotiaj itlauelikniuan toTajtsin, akin melak youejkauj kualixnamiktiuej. Ika yejon, melak noneki matikmatikan akinomej itlauelikniuan Jehová (Apoc. 17:​1, 3). Melak noneki kuajli tikasikamatiskej akinomej kinneskayotiaj yolkamej tlen noteneua ipan Apocalipsis pampa ompa miyekan kinteneua yejon yolkamej. w22.05 8, 9 párrs. 3, 4

Sekimej tokniuan akin kualoj niman iueuentsitsintin noyolkokouaj pampa kinemiliaj ika xkuajli kitekichiuilijtokej Jehová. Tla kemantika toyolkokouaj pampa xueli tiktekichiuiliaj Jehová ijkon ken tejuamej tiknekiskiaj, matotlajtoltikan: “¿Tlenon kineki Jehová manikchiua?”. Yejua san kineki matikchiuakan nochi tlen tiuelij para tiktekichiuiliskej. Matikitakan tlenon ipan nochiua se tokniuj siuatl akin kipiya 80 xiuitl. Yejua noyolkokoua pampa xok ueli kitekichiuilia Jehová ken ijkuak kipiaya 40 xiuitl. Yejua kinemilia ika nochi tlen kichiua xkiyolpaktia Jehová. San ika, yejon xmelauak pampa yejuin toknitsin desde ijkuak kipiaya 40 xiuitl chikauak kuajtekichiuilijtiuj Jehová niman aman ika ikipiya 80 xiuitl ok ijkon kichiujtika. Tla tokojtiliaj chikauak tiktekichiuiliskej Jehová, yejua techijlis: “¡Sanoyej kuajli! Tejua tikuajli tekitketl” (noijki xkita Mateo 25:​20-23). Melak tiyolpakiskej tla san titlanemiliaj itech tlen kema uelis tikchiuaskej. w22.04 10 párr. 2; 11 párrs. 4-6

Ipan Apocalipsis capítulo 21, kijtoua ika yejon 144,000 yeskiaj kentla se “yenkuik [ . . . ] ueyikalpan Jerusalén”. ¿Kenon tlachijchiujtli yejuin ueyikalpan? Biblia kijtoua ika “kampa peua icimiento itepanchinan on ueyikalpan, onkatkaj majtlaktli uan ome temej. Niman ipan cada tetl tlajkuilolnestikatka sen itoka de on majtlaktli uan ome iapóstoles on Borreguito” (Apoc. 21:​10-14; Efes. 2:20). Yejuin yenkuik kalpan melak kualtsin. Iojui kampa melak nouijtilo tlachijchiujtli ika oro, 12 puertas tlen kinpiya tlachijchiujtli ika perlas, itepanuan kinpiya kualtsitsintin temej niman yejuin kalpan melak kualtsin tlatemachiujtli (Apoc. 21:​15-21). San ika, Juan okitak ika itlaj poliuiya. Yejua kijtoua: “Nion sen tiopan xonikitak ipan on ueyikalpan, pampa toTEKO Dios yejuan nochi ueli kichiua niman on Borreguito, sano yejuamej tiopan. On ueyikalpan xkipoloua tonaltsintli nion metstli para kitlauiluiyaj, pampa iueyilis Dios kitlauiluiya, niman on Borreguito yejua itlauil on ueyikalpan” (Apoc. 21:​22, 23). Akin nemiskej ipan “yenkuik [ . . . ] ueyikalpan Jerusalén” uelis yaskej hasta kampa Jehová nemi (Heb. 7:27; Apoc. 22:​3, 4). w22.05 17, 18 párrs. 14, 15

Pampa Jehová otexchijchiuj techijlia tlenon noneki tikchiuaskej niman techtlajtlakolmaka, san ika, noijki melak techtlasojtla (Sal. 100:3; Is. 33:22). Ika yejon, tla tikchiuaj se tlajtlakojli niman yemelak toyolkuepaj, yejua kinektok techtlapopoluis (Sal. 86:5). Jehová techyolseuiya ika tlen okijkuilo teotlajtoketl Isaías, yejua okijto: “Maski nemotlajtlakoluan sanoyej tekuik ken itlaj yestli chichilti, nejua nikchipauas istak ken itlaj nieve” (Is. 1:18). Tinochimej titlajtlakolejkej, ika yejon, tikchiujtikisaj noso tikijtojtikisaj itlaj tlen oksekimej kinyolkokoua (Sant. 3:2). Maski ijkon, uelis tikinpiyaskej akin kuajli imiuan touikaskej, san noneki totlapopoluijtiaskej (Prov. 17:9; 19:11; Mat. 18:​21, 22). Jehová kineki matikintlapopoluikan akin techyolkokouaj (Efes. 4:32). Niman melak techpaleuis tla ijkon tikchiuaj. Noijki, tikchiujtoskiaj ijkon ken Jehová pampa yejua nochipa techtlapopoluiya (Is. 55:7). w22.06 8 párrs. 1, 2

Melak miyek tlen tiuelij ijkuak tikitaj tlen kichiuaj oksekimej itekipanojkauan Jehová. Matontlanemilikan itech Jesús. Maski tejuamej titlajtlakolejkej uelis tikchiuaskej ijkon ken yejua okichiuj (1 Ped. 2:21). Tla tokojtiliaj tikchiuaskej ken Jesús, melak kuajli tiktekichiuiliskej Jehová. Biblia kinteneua miyekej tlakamej niman siuamej akin okichiujkej tlen kuajli maski tlajtlakolejkej katka. Ika yejon, tla tikitaj tlen yejuamej okichiujkej, melak techpaleuis. Matitlanemilikan itech tekiuaj David. Jehová okijto: “Nejua nikixmati [ . . . ] sen tlakatl yejuan sanoyej nechpaktia” (Hech. 13:22). Matikilnamikikan ika David melak otlajtlako, maski ijkon, miyek tlen techmachtia. ¿Tleka? Pampa onoyolkuep ika nochi iyojlo. Ika yejon, Jehová okitlapopolui (Sal. 51:​3, 4, 10-12). w22.04 13 párrs. 11, 12

Biblia kijtoua ika mikilistli totlauelikniuj (1 Cor. 15:​25, 26). Maski san tiknemiliaj ika uelis timikiskej noso se akin melak tiktlasojtlaj uelis mikis, melak tomojtiaj niman tajmanaj. Niman yejon ueliskia más tiknemiliskej tla tikualoj noso tla yakaj akin tiktlasojtlaj kualo. ¿Tleka tomojtiaj ijkuak titlanemiliaj itech yejon? Pampa Jehová otexchijchiuj para nochipa matinemikan (Ecl. 3:11). San ika, tla tikmakasij timikiskej, uelis techpaleuis pampa ijkon kanaj kuajli totlakualtiskej, tikchiuaskej ejercicio, xtikchiuaskej itlaj tlen uelis kichiuas matimikikan, tiaskej kampa doctor niman tikoniskej noso tiktoloskej medicina ijkuak nonekis. Satanás kimatstok ika melak tiktlasojkaitaj tonemilis. Ika yejon, kijtoua ika tiknektoskej san tlenon tikchiuaskej pampa xtiknekij timikiskej. Hasta uelis tijkajkauaskej ika touikaj iuan Jehová (Job 2:5). ¡San ika xmelauak tlen kijtoua! Biblia kijtoua ika Satanás kipiya “poder para temiktis”, ika yejon, kuelita ijkuak tejuamej tikmakasij timikiskej para más techmojtis niman kichiuas matiktlalkauikan Jehová (Heb. 2:​14, 15). w22.06 18 párrs. 15, 16

Ijkuak techtlaueltokaskej, kanaj san uelis tosentlaliskej por grupos. Ika yejon, melak noneki kuajli matouikakan imiuan tokniuan. Matikixnamikikan Satanás, niman maka matikimixnamikikan tokniuan. Matikintlapopoluikan tokniuan, niman tla tikpiyaj se tlauejli iuan se tokniuj, nimantsin iuan matoyolseuikan (Prov. 19:11). Nochipa xkitsto kenon uelis tikinpaleuis tokniuan (Tito 3:14). Tokniuan akin nemij ipan se grupo más kuajli nouikaskej tla san sekan kipaleuiyaj se tokniuj siuatl akin tlajyouiya. Yejuamej melak notlasojtlaj ken ikniujtin (Sal. 133:1). Melak miyekej tokniuan kitekichiuiliaj Jehová maski tekiuajkej xkinkauiliaj. Sekimej tokniuan yokintsajkej. Matiktlajtlanilikan Jehová makinpaleui yejuin tokniuan niman noijki makinpaleui inchanejkauan. Noijki matikchiuakan teoyotl inpampa tokniuan akin kinpaleuiyaj tokniuan akin tsauktokej maski yejuamej noijki ueliskia kintsakuaskej. Yejuamej kinyolchikauaj nochipa matlaneltokakan itech Jehová, kinmakaj tlen kinpoloua niman kominpaleuiyaj ipan tribunales (Col. 4:​3, 18). Nochipa matikilnamiktokan ika uelis tikinpaleuiskej tokniuan akin kintlaueltokaj tla tikchiuaj teoyotl inpampa (2 Tes. 3:​1, 2; 1 Tim. 2:​1, 2). w22.12 26, 27 párrs. 15, 16

Kokonej nochipa kichiuaj tlen kimituiliaj intajuan. Kemantika tatajtin nopopolouaj, san ika, kuajli tikmatstokej ika kema uelis kichiuaskej tlen kinmachtiaj inkoneuan (Rom. 3:23). Se tajtli okijto: “Kokonej yeskiaj kentla ichkatl, nochi kichichinaj. Niman ijkuak yejuamej kitaj ika xtikchiuaj tlen tikinmachtiaj, yejuamej techixkoijliskej”. Kuakon, tla tikneki ika mokoneuan makitlasojtlakan Jehová, kachtopa tejua noneki tikimititis ika melak tiktlasojtla. Onka miyek ken uelis nenkinmachtiskej nemokoneuan makitlasojtlakan Jehová. Matikitakan tlen kijtoua Andrew, akin kipiya 17 xiuitl niman yonoapolakti. Yejua kijtoua: “Notajuan onechmachtijkej ika melak noneki maniknotsa Jehová. Ijkuak inikochiskia, notaj nochipa nouan kichiuaya teoyotl maski nejua yonikchiujka. Ika yejon, nochipa niknotsa Jehová. Niman ijkuak niknotsa, nikita ken se notaj akin melak nechtlasojtla”. Tatajtin, xkilnamikikan ika tla nemejuamej nenkitlasojtlaj Jehová, nemokoneuan noijki kitlasojtlaskej. w22.05 28 párrs. 7, 8

Tla tikneki timoapolaktis, noneki timoyolkuepas itech motlajtlakoluan (Hech. 2:​37, 38). Niman yemelak timoyolkuepas kijtosneki xok tikchiuas tlen yeuejkaui xkuajli tikchiuaya. ¿Xok tikchiua tlen Jehová kitlauelita, xok tiauilnemi, xok tipoki nion xok titeuijuikaltia? (1 Cor. 6:​9, 10; 2 Cor. 7:1; Efes. 4:29). Xmokojtili para maka sa ijkon tikchiuas. Tla tikneki yakaj mamitspaleui noso yakaj mamitsijli tlenon uelis tikchiuas, xtlajto iuan akin mitsmachtia Biblia noso imiuan tokniuan tlayekankej. Tla titelpochtli niman ok tichanti imiuan motajuan, xkimijli mamitspaleuikan xkajkaua tlen xmitskauilia xmoapolakti. Noijki melak noneki nochipa xchikaujto motlaneltok. Niman uelis ijkon tikchiuas tla tiauj tlanechikoltin niman titlanankilia (Heb. 10:​24, 25). Niman ijkuak timochiuas tenojnotsketl, xmokojtili miyekpa xtenojnotsa. w23.03 10, 11 párrs. 14-16

Ipan Génesis 3:​14, 15 noteneua se “kouatl” niman iuejkakoneuan yejon “kouatl”. Niman Biblia techijlia akinomej. Kachtopa matitlajtokan itech “kouatl”. Yejuin “kouatl” xueliskia yeskia se yolki pampa xkasikamatiskia tlen Jehová okijli ipan xochitlalpan Edén, ka, yejon “kouatl” melak tlamachilise. Kuakon, ¿akinon yejon “kouatl”? Biblia kijtoua ipan Apocalipsis 12:9 ika “on kouatl yejuan desde yeuejkaui nemi, itoka diablo noso Satanás”. Ijkuak Biblia kitekitiltia tlajtojli iuejkakoneuan tlajtojtika intech akin tlanemiliaj niman kichiuaj ijkon ken intaj. Kuakon, ¿akinomej iuejkakoneuan “kouatl”? Nochimej iluikaktekitkej niman tlaltikpakchanejkej akin kixnamikij Jehová niman ikalpan, ijkon ken kichiua Satanás. Ken iluikaktekitkej akin xokitlakamatkej toTajtsin ipan itonaluan Noé niman tlaltikpakchanejkej akin kichiuaj ken intaj, Diablo (Gén. 6:​1, 2; Juan 8:44; 1 Juan 5:19; Jud. 6). w22.07 15 párrs. 4, 5

Apóstol Pablo melak kintlasojtlaya tokniuan. Yejua kimasikamatiya niman kimikneliaya akin kixnamiktoyaj tlen ouijtika pampa yejua noijki yokixnamijka tlen ouijtika. Sejpatsin otlan itomintsin niman ononek tekitis para kikouas tlen kikuaskia niman tlen kikuaskiaj akin imiuan nemiya (Hech. 20:34). Yejua kinchijchiuaya kajkaltin. Ijkuak oajsik Corinto otekit iuan Áquila niman Priscila, akin noijki kinchijchiuayaj kajkaltin. San ika, “cada sábado” kinnojnotsaya judíos niman griegos. Niman ijkuak Silas niman Timoteo ompa oajsikej, Pablo “san ika nokauaya kiteijliaya on temachtijli” (Hech. 18:​2-5). Ken tikitaj, yejua kachtopa kinekiya kitekichiuilis Jehová. Pablo kuajli tekitiya para tlakuas, san ika, noijki chikauak kitekichiuiliaya Jehová. Ika yejon, ueliya kinyolchikauaya tokniuan niman ueliya kimijliaya ika xnonekiya itlaj makintsakuili para kitekichiuiliskej Jehová. w22.08 20 párr. 3

ToTajtsin kineki ika ipan nochi tlaltikpaktli manoteijli nochi tlen kichiuas iTekiuajyo (1 Tim. 2:​3, 4). Niman yejua yokitlapejpeni iKoneuj para makiyekana yejuin tekitl. Ika yejon, kuajli matikmatstokan ika ijkuak Jehová tlapopolos, yejua melak yolpakis pampa kuajli onochiuj itekiyo (Mat. 24:​14, TNM). ¿Kenon tikmatij ika Jesús techyekana ijkuak titenojnotsaj? Achto yas iluikak, onosentlali imiuan sekimej inomachtijkauan ipan se tepetl ne Galilea niman okimijli: “Nejua yonechmakakej nochi tekiuajyotl para nitlamandaros ne iluikak niman nikan ipan in tlaltikpaktli”. Niman sakin okimijli: “Xuiyan niman xkinmachtikan tlaltikpakchanejkej ipan nochi kalpamej” (Mat. 28:18; Mat. 28:​19, TNM). Ika yejon, tikijtouaj ika Jesús okitekitlalijkej para matechyekana ijkuak titenojnotsaskej. Kuajli tikmatstokej ika, ipan yejuin tonaltin, yejua techyekantika ijkuak titenojnotsaj. w22.07 8 párrs. 1, 3; 9 párr. 4

Akin yolmelajkej, noso akin okichiujkej tlen kuajli ijkuak yoltoyaj, “yoliskej [ . . . ] para kipiyaskej nemilistli yejuan para nochipa” pampa intoka inestos ipan amoxtli tlen kijtoua akinomej kipiyaskej nemilistli. Yejuin kijtosneki ika “on yejuan okichijkej tlen kuajli”, akin noteneuaj ipan Juan 5:​29, sa no yejuamej on “yolmelajkej” akin noteneuaj ipan Hechos 24:15. Niman ijkin tikijtouaj pampa Romanos 6:7 kijtoua: “Ijkuak se miki, nomanauiya de ipoder on tlajtlakojli”. Ijkuak akin yolmelajkej mikij, intlajtlakoluan popoliuij, san ika, Jehová xkilkaua kenon itech omelajkanenkej (Heb. 6:10). San ika, ijkuak yoliuiskej nonekis nochipa melajkanemiskej para xkipopoloskej intoka ipan amoxtli tlen kijtoua akinomej kipiyaskej nemilistli. w22.09 17 párr. 13; 18 párr. 15

Teotlajtoketl Daniel okiteititi ika kema ueliskia itech tlaneltokaskej. ¿Kenon tikmatij? Pampa ijkuak okuikakej Babilonia nimantsin opeuj itech tlaneltokaj. Niman ijkuak Jehová okipaleui Daniel makijli tekiuaj Nabucodonosor tlen okitemik, más miyekej okimatkej ika ueliskia itech tlaneltokaskej (Dan. 4:​20-22, 25). Seki xiujtin sakin, Daniel okiteijli tlen kijtosnekiya tlajtoltin tlen onesikoj ipan tepantli kampa chantiya tekiuaj akin tlayekantoya Babilonia (Dan. 5:​5, 25-29). Ijkuakon oksejpa okiteititi ika ueliskia itech tlaneltokaskej. Sakin, Darío akin ualeuaya Medopersia niman akin kipaleuiayaj, okitakej ika Daniel “kuajli kichiuaya itekiu” niman ika xtekajkayauaya (Dan. 6:​3, 4). Melak techpaleuis tla totlajtoltiaj: “¿Notech tlaneltokaj oksekimej?”. Ijkuak tikteititiaj ika oksekimej uelis totech tlaneltokaskej, tikueyiteneuaj Jehová. w22.09 8, 9 párrs. 2-4

Tla nochipa tikintlakamatij itlanauatiluan Jehová, kuajli onkisas tlen tikchiuaskej. ¿Tleka ijkon tikijtouaj? San matikonnemilikan yejuin, ¿tlenon panoskia tla seki bancos más patioj yeskia intomin xijkon ken okseki bancos? Nochimej nopopoloskiaj. Noso, ¿tlenon panoskia tla nochimej doctores tepajtiskiaj san ijkon ken yejuamej kinemiliaj niman xkichiuaskiaj ijkon ken yokinmachtijkej? Kanaj sekimej akin kinpajtiaj mikiskiaj. Yejuin techititia ika ijkuak tikintlakamatij tlanauatiltin, kuajli onkisa totekiyo. Noijki ijkon, itlanauatiluan Jehová melak techpaleuiyaj. Jehová kinteochiua akin nokojtiliaj kitlakamatiskej. Yejua kijtoua: “On yolmelajkej tlakamej kinmakaskej on kuajli tlajli, para ipan chantiskej nochipa” (Sal. 37:29). ¡San xkonnemili kenon tinemiskej ijkuak nochimej kintlakamatiskej itlanauatiluan Jehová! Ijkuakon melak tiyolpaktoskej, tiyolseujtoskej niman san sekan tinemiskej. Jehová kineki xnemi ipan yejon kualtsin tlaltikpaktli. Kuajli tikitaj ika tla tiktlasojtlaj tlen melajki, kuajli tonkisaskej. w22.08 27, 28 párrs. 6-8

Ijkuak tikixnamikij tlen ouijtika uelis kichiuas maka matimelajkanemikan itech Jehová nion itech ikalpan. ¿Tlenon uelis techpaleuis ijkuak tikixnamikiskej tlen ouijtika? Nochipa matikpiyakan kuajli tlamachilistli, matitlatlachixtokan niman matimelajkanemikan ipan totlaneltok. ¿Tlenon kichiua yakaj akin nochipa kipiya kuajli tlamachilistli? Xnimantsin kualani, kuajli tlanemilia niman nokojtilia tlanemilis ijkon ken Jehová tlanemilia. Tla ijkon tikchiuaj, xnimantsin tiknemiliskej tlen xkuajli. Kanaj ijkuak tiknemiliaj ika se tokniuj otexchiuili tlen xkuajli, yakaj akin kipiya se tekitl ipan tlanechikojli. Kanaj yejon tokniuj xkinekiya mitsyolkokos (Rom. 3:23; Sant. 3:2). Maski ijkon, omitsyolkoko tlen omitschiuili. Niman kanaj hasta timotlajtoltia: “Tla yejon tokniuj ijkon onexchiuili, ¿yemelak ninemi ipan ikalpan toTajtsin?”. San ika, yejon tlen Satanás kineki matiknemilikan (2 Cor. 2:11). Tla ijkon titlanemiliaj, ueliskia tiktlalkauiskej Jehová niman ikalpan. Kuakon, xmotlajpiya para maka peuas tiknemilis tlen xkuajli. w22.11 20 párrs. 1, 3; 21 párr. 4

Tlen tikchiaj ika tlayekapan melak kualtsin: Jehová yotechijli ika uelis nochipa tinemiskej. Sekimej itekipanojkauan kichiaj nemiskej iluikak kampa xok keman mikiskej (1 Cor. 15:​50, 53). San ika, más miyekej kichiaj nochipa nemiskej ipan tlaltikpaktli kampa ika inyojlo nemiskej niman xok kualoskej (Apoc. 21:​3, 4). Maski tla tiaskej iluikak noso tokauaskej ipan tlaltikpaktli, tinochimej tiktlasojkaitaj tlen tikchiaj ika tlayekapan. Tejuamej uelis kuajli tikmatstoskej ika yemelak nochipa tinemiskej pampa Jehová yejua akin ijkon techijlia (Rom. 15:13). Niman tikmatstokej ika Jehová nochipa kichiua tlen kijtoua (Núm. 23:19). Niman noijki kuajli tikmatstokej ika Jehová kineki niman uelis kichiuas nochi tlen yokijto. ToTajtsin iluikakchane melak techtlasojtla niman kineki itech matitlaneltokakan. Tla nochipa tikilnamiktokej tlen Jehová yokijto techmakas, uelis titlaxikoskej niman tiyolpakiskej ijkuak tikixnamikiskej tlen ouijtika. w22.10 24 párrs. 1-3

Pampa xkitlakamatiyaj, Isaías okijto ika Jehová kitekauiliskia inpan manochiua tlen xkuajli (Is. 30:​5, 17; Jer. 25:​8-11). Niman kema inpan onochiuj tlen xkuajli pampa okinuikakej Babilonia. San ika, noijki nemiyaj sekimej judíos akin kichiuayaj tlen kuajli, niman teotlajtoketl Isaías okijto ika se tonajli Jehová kichiuaskia ika oksejpa manokuepakan Jerusalén (Is. 30:​18, 19). Niman kema onochiuj tlen Isaías okijto, pampa Jehová okimakixti ikalpan. San ika, xnimantsin okichiuj. Isaías okijto: “ToTEKO mechcha, para mechiknelis”. Yejuin techititia ika nonekiya panos tiempo para Jehová kimakixtis ikalpan. Opanok 70 xiuitl hasta ijkuak Jehová okitekauili ika sekimej judíos manokuepakan Jerusalén (Is. 10:21; Jer. 29:10). Ijkuak judíos nemiyaj Babilonia, melak najmanayaj, san ika, ijkuak onokuepkej Jerusalén, melak oyolpakej. w22.11 9 párr. 4

Aman, ipan miyekej países, tokniuan noijki kintlaueltokaj ijkon ken okintlaueltokakej apóstoles ipan kachtopa siglo pampa tenojnotsayaj itech Jesús. Miyekpa, tekiuajkej “okinnauatijkej para maka más tenojnotsaskej nion temachtiskej ikan itokatsin Jesús” (Hech. 4:​18-20; 5:​27, 28, 40). San ika, yejuamej kimatstoyaj ika yakaj akin más ueyixtika okinnauati matenojnotsakan niman matemachtikan itech Jesús (Hech. 10:42). Ika yejon, Pedro iuan Juan okiteijlikej ika yejuamej niman oksekimej apóstoles xkintlakamatiskiaj tekiuajkej, yej kitlakamatiskiaj toTajtsin. Noijki okijtojkej ika xkikajkauaskiaj ika temachtiskiaj itech Jesús (Hech. 5:29). Tlen okijtojkej niman tlen okichiujkej apóstoles melak techpaleuiya. Aman itikmatij tlenon noneki tikchiuaskej ijkuak tekiuajkej techtlaueltokaskej. Biblia kijtoua ika ijkuak yokinuisojkaj apóstoles, yejuamej “ouajkiskej ne imixpan on más uejueyi tekiuajkej ipan on Sanedrín ikan paktli, pampa Dios okinkauilij okimpijpinauijkej pampa kineltokayaj Jesús”. Niman noijki kijtoua ika xokikajkaujkej ika tenojnotsaj (Hech. 5:​41, 42). w22.10 12, 13 párrs. 2-4

Ijkuak yakaj peua nomachtia itech Jehová, peua nomachtia “tlen semi xouijtikaj de itemachtiluan Dios”, ijkon ken okijto apóstol Pablo ipan icarta tlen okomintitlanili tokniuan hebreos. Yejua xkijtotoya ika yejon xueyi kijtosneki, yejua kijtojtoya ika yejon yeskia kentla leche tlen koni se konetsintli (Heb. 5:12; 6:1). San ika, yejua noijki okinyolchikauj tokniuan manomachtikan tlen ouijtika itech iTlajtol toTajtsin. ¿Tiknektika timomachtis tlen más ouijtika itech Biblia? ¿Tiknektika más timomachtis itech Jehová niman itech tlen kineki kichiuas? Sekimej melak ouijtika kitaj nomachtiskej. ¿Niman tejua? ¿Omitsmachtijkej ipan escuela titlaamapouas niman timomachtis? ¿Tikuelitaya timomachtis? ¿Noso mitstlatsiuitiayaj libros niman hasta aman ok mitstlatsiuitiaj? Tla kema, xsan tejua ijkon mopan panoua. San ika, Jehová uelis mitspaleuis. Yejua nochi kuajli kichiua niman melak kuajli temachtia. w23.03 9, 10 párrs. 8-10

Tla tiyolyemankej, tijkauiliskej ika iTlajtol toTajtsin maajsi ipan toyojlo. Ijkuak tikamapouaskej Biblia, maka matoueyimatikan niman maka matiknemilikan kenon nopopolouaj oksekimej. Tla xtoueyimatij niman tla xsan tikitstokej kenon nopopolouaj oksekimej ijkuak tikamapouaj Biblia, más titeikneliskej niman titetlasojtlaskej. Ken tikimitaj oksekimej niman tlen intech tikijtouaj, kiteititia tla Biblia yemelak techpaleuijtika. Pampa fariseos xkinokauiliayaj makinpaleui Biblia, kintlajtlakolmakayaj akin xkipiayaj tlajtlakojli (Mat. 12:7). Kuakon, matikitakan tlenon tiknemiliaj niman tlenon tikijtouaj intech oksekimej. Matitlanemilikan itech yejuin: ¿Nochipa titlajtouaj itech tlen oksekimej kuajli kichiuaj, noso san tikitstokej tlen xkuajli kichiuaj? ¿Tiknektokej titetlapopoluiskej, noso san titetejteneuaj niman titetlauelitstokej? Ken tikinnankiliskej yejuin tlajtoltilistin, kiteititis tla Biblia techpaleuijtika itech tlen tiknemiliaj, tlen tikmachiliaj niman tlen tikchiuaj (1 Tim. 4:​12, 15; Heb. 4:12). w23.02 12, 13 párrs. 13, 14

Matitlanemilikan itech José de Arimatea, se tlakatl akin judíos melak kitlakaitayaj. Yejua teuan katka ipan Sanedrín, kampa nemiyaj akin uejueyixtoyaj intech judíos. San ika, ijkuak Jesús tenojnotstinemiya, yejua nomojtiaya kijtos ika tlaneltokaya itech Jesús. Juan kijtoua ika “José san ichtaka inomachtijkau katka Jesús, pampa kinmakasiya on hebreos” (Juan 19:38). Maski yejua kuelitaya tlen temachtiaya Jesús, xkijtouaya ika tlaneltokaya itech iKoneuj toTajtsin pampa kanaj kimojtiaya ika judíos maka sa makitlakaitakan. Maski ijkon, Biblia kijtoua ika sakin ika omik Jesús, José “onoyolchikau, niman oyaj itech Pilato para okitlajtlanilij imikatlalnakayo Jesús” (Mar. 15:​42, 43). Aman nochimej ikimatstoyaj ika José tlaneltokaya itech Jesús. ¿Mitsmojtia tlen oksekimej uelis kijtoskej motechkopa ijkon ken José de Arimatea? w23.01 30 párrs. 13, 14

Siuatekiuaj de Saba okitekakili ika israelitas nemiyaj ika inyojlo niman ika melak kualtsin chantiyaj. Niman maski yejua uejka chantiya, oyaj Jerusalén pampa kinekiya kitas tla melauak tlen okijlijkaj (1 Rey. 10:1). Sakin ika okitak kenon tlayekanaya Salomón, okijli tlen yonoteneuj tlakpak. Tlen opanok ijkuak tekiuajtitoya Salomón, techititia ika Jehová kichiuas ika tlaltikpakchanejkej noijki kuajli manemikan ijkuak Jesús tekiuajtis ipan tlaltikpaktli. Jesús más ueyixtika xijkon ken Salomón. Salomón tlajtlakole katka. Miyekpa onopopolo niman ipampa yejon, israelitas melak otlajyouijkej. San ika, Jesús xtlajtlakole niman xkeman nopopoloua (Luc. 1:32; Heb. 4:​14, 15). Cristo yokiteititi ika xkeman tlajtlakos niman ika xkeman kichiuas itlaj tlen ueliskia kimijtlakos akin kinyekanas. ¡Melak tiktlasojkamachiliaj toTajtsin ika okitlali Jesús ken toTekiuaj! w22.12 10, 11 párrs. 9, 10

¿Tlenon uelis tikchiuaskej tla kampa tichantij onka se ueyi kokolistli? Matikintlakamatikan tekiuajkej ijkuak techijliskej matomapajpakakan, maka melak matikinnisiuikan oksekimej, matotlalilikan cubrebocas niman matokauakan tochan tla tikualoj. Tla xsan tikauilmatij nochi yejuin, tikteititiskej ika tikpatiojkaitaj tonemilis tlen toTajtsin yotechmakak. Ijkuak panoua itlaj tlen xakaj kichiaya, kanaj toamigos, kanaj akin tikimixmatij noso ipan noticias uelis techijliskej itlaj tlen xmelauak. Ijkuak ijkon panos, maka nochi matikneltokakan. San matikneltokakan tlen tekiuajkej niman tlapajtikej kijtouaj (Prov. 14:15). Noijki, noneki tiktlakamatiskej Grupo akin Tlayekana niman sucursales ijkuak techijliskej itlaj itech totlanechikoluan noso itech totenojnotsalis. Uelis intech titlaneltokaskej pampa yejuamej kuajli nomachtiaj achto itlaj kitlapejpeniskej. Tla tikchiuaj tlen techijliaj, techpaleuis maka matikualokan niman maka matikinmauakan oksekimej. Niman kanaj yejon kichiuas kuajli matlajtokan itech iteixpantijkauan Jehová (1 Ped. 2:12). w23.02 23 párrs. 11, 12

Ijkuak israelitas okinotlatkitijkej tlajli tlen Jehová yokimijlika kinmakas, miyekan onochantitoj. Israelitas sejsemoyajtoyaj, ika yejon, kanaj xok más noitayaj niman ueliskia xok najmanaskej inpampa oksekimej israelitas akin oksekan chantiyaj. San ika, Jehová miyekpa kinsentlaliaya niman ijkon kikakiskej niman nomachtiskej iTlajtol (Deut. 31:​10-12; Neh. 8:​2, 8, 18). San xkonnemili kenon nomachiliaya se israelita ijkuak ajsiya Jerusalén niman kitaya kenon miyekej ichanikniuan akin miyekan ualeuayaj yonosentlalijkaj para san sekan kiueyichiuaskej toTajtsin. Jehová ijkin kinsentlaliaya israelitas pampa kinekiya san sekan manemikan. Sakin, ipan kachtopa siglo, ipan tlanechikoltin nemiyaj tlakamej niman siuamej akin melak tlatlamantikej katkaj, sekimej xchanikniujtin katkaj, tlajtouayaj tlatlamantik tlajtoltin, sekimej kipiayaj tomin niman sekimej xmás kipiayaj tomin. San ika, san sekan kiueyichiuayaj Jehová. Niman akin kemach peuayaj yayaj tlanechikojli, ueliyaj kasikamatiyaj Biblia pampa tokniuan kinmachtiayaj niman imiuan nosentlaliayaj (Hech. 2:42; 8:​30, 31). w23.02 3 párr. 7

Jehová kimijlia nochimej akin kitlakamatij ika kinmakas “nemilistli yejuan para nochipa” (Rom. 6:23). Ijkuak titlanemiliaj itech tlen Jehová yotechijli techmakas, más tiktlasojtlaj. Matitlanemilikan itech yejuin: Jehová melak techtlasojtla, ika yejon, techmakas nemilistli para nochipa niman ijkon uelis nochipa nisiuj itech tinemiskej. Pampa Jehová yotechijli ika techmakas nemilistli tlen xkeman tlamis, techpaleuiya matikixnamikikan tlen ouijtika. Maski tla totlauelikniuan techijliskej ika techmiktiskej, tejuamej xtijkajkauaskej ika tiktekichiuiliskej Jehová. ¿Tleka? Pampa tikmatstokej ika tla timikij niman itech otimelajkanenkej, yejua oksejpa techmakas tonemilis niman uelis nochipa tinemiskej (Juan 5:​28, 29; 1 Cor. 15:​55-58; Heb. 2:15). Tikmatstokej ika Jehová uelis kichiuas nochipa matinemikan pampa itech ualeua nemilistli niman nochipa nemi (Sal. 36:9). Biblia techititia ika Jehová nochipa yonen niman nochipa nemis (Sal. 90:2; 102:​12, 24, 27). w22.12 2 párrs. 1-3

Akin tiktekichiuiliaj Jehová kuajli tikmatstokej ika tikixnamikiskej tlen ouijtika. Tikmatstokej tlen Biblia kijtoua, ika “para se kalakis kampa Dios tlamandaroua noneki kijyouis miyek tlajtlamach” (Hech. 14:22). Niman noijki kuajli tikmatstokej ika san ipan yenkuik tlaltikpaktli xok tikpiyaskej tlauejli pampa ompa “xok onyas mikilistli, nion chokistli, nion ajmantli, nion kokolistli” (Apoc. 21:4). Maski Jehová kitekauilia matikpiyakan tlauejli, techpaleuiya matitlaxikokan. Matikitakan tlen Pablo okimijli tokniuan akin chantiyaj Roma. Kachtopa okiteneuj seki tlen yejua kixnamiktoya niman seki tlen kixnamiktoyaj tokniuan. Sakin ijkin okimijli: “Ipan nochi in, tikmatstokej ika titetlanij nochipa itechkopa Cristo yejuan otechtlajsojtlak” (Rom. 8:​36, 37). Yejuin kijtosneki ika Jehová uelis techpaleuis ijkuak tikixnamiktokej se tlauejli. w23.01 14 párrs. 1, 2