Noviembre

Akin tiktekichiuiliaj Jehová xtitlauijuikaltiaj. San ika, tla xtotlajpiyaj uelis tikijtoskej tlen uelis kinyolkokos oksekimej. Noijki, matotlajpiyakan maka tikinyolkokoskej akin oksekan ualeuaj. Niman noijki, maka matikijtokan itlaj tlen uelis kinyolkokos noso kinpinaujtis oksekimej. Xkinyolchikaua oksekimej. Maka xtetejteneua, yej xkimijli oksekimej tlen kuajli kichiuaj. Maka matikchiuakan ijkon ken israelitas akin san kijtouayaj tlen xkuelitayaj. Biblia kijtoua ika pampa majtlaktli ichtakatlachixkej xkuajli otlajtokej itech tlajli tlen kinmakaskiaj, israelitas noijki “opejkej tlamach kijtouiliaj Moisés” (Núm. 13:​31–14:4). Tla tejuamej tikimijliaj tokniuan tlen kuajli kichiuaj, yejuamej noijki yolpakiskej. Kuakon, nochipa xkimijli tokniuan tlen kuajli kichiuaj. w22.04 8 párrs. 16, 17

Jehová yokinuajpaleuijtia miyekej telpokamej para kuajli iuan manouikakan. Kuakon, kuajli xmatsto ika Jehová noijki kipaleuis mokoneuj itech matlaneltoka tla yejua kineki (1 Cor. 3:​6, 7). Niman tla tikita ika mokoneuj xmás kineki nomachtis Biblia, xmatsto ika Jehová kitlajpiyas niman kipaleuis (Sal. 11:4). Niman ijkuak mokoneuj kinekis oksejpa nomachtis, kuajli xmatsto ika Jehová ompa kichiatos niman kipaleuis (Hech. 13:​48, TNM; 2 Crón. 16:9). Noijki, Jehová uelis mitspaleuis xyolchikaua mokoneuj ijkuak nonekis (Prov. 15:23). Noso noijki uelis kitekitiltis se tokniuj para kipaleuis mokoneuj niman kititis ika kitlasojtla. Niman ijkuak uejueyiyaskej, Jehová uelis kinpaleuis makilnamikikan tlen otikinmachti ijkuak kokonej katkaj (Juan 14:26). Jehová melak mitsteochiuas tla tikinmachtia mokoneuan ika tlen tikijtoua niman ika tlen tikchiua. w22.04 21 párr. 18

Satanás melak kualantok pampa xok uelis yas iluikak. Ika yejon, melak kintlaueltoka tokniuan tlapejpeniltin akin tekiuajtiskej iuan Jesús. Yejuin tokniuan ika yolchikaualistli kijtouaj ika kineltokaj Jesucristo (2 Cor. 5:20; Efes. 6:​19, 20). Ipan 1918, sekimej tokniuan akin kipiayaj ueyi tekitl ipan ikalpan Jehová, okintlajtolchijchiuilijkej niman okintsajkej. Miyekej okinemilijkej ika yokinteltilijkaj intekiyo itekipanojkauan Jehová (Apoc. 11:​3, 7-11). San ika, ipan marzo de 1919, okiskej niman okinkauilijkej makichiuakan intekiyo, yejuamej oksejpa opeuj tenojnotsaj. Biblia kijtoua ika desde ijkuakon, Satanás “okuajkixtij ikamak sen ueyi río” (Apoc. 12:15). ¿Tlenon kijtosneki yejuin? Ika Satanás opeuj más kintlaueltoka tokniuan. Ika yejon, tinochimej noneki titlaxikoskej niman titlaneltokaskej itech Jehová (Apoc. 13:10). w22.05 5, 6 párrs. 14-16

Apóstol Juan okitak ipan se tlatlachalistli ome grupos akin kipaleuiyaj iTekiuajyo Jehová niman noijki okitak kenon kiseliaj nemilistli tlen xkeman tlamis niman miyek tlateochiualistin. Uan kachtopa grupo xmiyekej, san 144,000. Maski yejuamej san tlaltikpakchanejkej, okintlapejpenijkej para yaskej iluikak niman ijkon iuan tekiuajtiskej Jesús niman iuan tlayekanaskej ipan tlaltikpaktli (Apoc. 5:​9, 10; 14:​3, 4). Juan kita ika yejuin grupo nemi iuan Jesús ipan tepetl Sion, tlen onka iluikak (Apoc. 14:1). Yejon 144,000 yokinuajtlapejpenijtiajkej desde ijkuak nemiyaj apóstoles hasta aman (Luc. 12:32; Rom. 8:17). San ika, Juan okijlikej ika ipan itlamiyan tonaltin sekimej tlapejpeniltin ok nemiskiaj ipan tlaltikpaktli (Apoc. 12:17). Kuakon, ijkuak panotos ueyi tlajyouilistli, yejuin tlapejpeniltin yaskej iluikak niman onnosentlaliskej imiuan oksekimej tlapejpeniltin akin iompa nemij. Ijkon, yejuin 144,000 tekiuajtiskej iuan Jesús ipan iTekiuajyo toTajtsin (Mat. 24:31; Apoc. 5:​9, 10). w22.05 16 párrs. 4, 5

Jesús okimijli inomachtijkauan ika xnonekiya noueyimatiskej, san ika, noijki okimijli ika xnonekiya kinemiliskej ika xtlaj ika tepaleuijkej. Yejua ijkin okimijli: “Hasta on tsontli ipan nemotsontekon nochi onkaj tlapouajli cada se” (Mat. 10:30). Tlen okijto noijki melak techyolseuiya niman más tla tiknemiliaj ika Jehová xtechtlasojtla. Noijki techilnamiktia ika Jehová kineki techpaleuis niman ika melak techtlasojtla. Kuakon, maka matiknemilikan ika xuelis tinemiskej ipan yenkuik tlaltikpaktli noso ika xtechmelaua matiktekichiuilikan Jehová, pampa yejua yotechijli ika kema uelis ompa tinemiskej ika toyojlo. Ikipiya kanaj 15 xiuitl, se revista La Atalaya ijkin okijto: “Maka matiknemilikan ika melak tiuejueyixtokej pampa, tla ijkon tikchiuaj, uelis toueyimatiskej. San ika, noijki maka matiknemilikan ika xtlaj ika titepaleuijkej pampa, tla ijkon tikchiuaj, uelis tiknemiliskej ika xakaj techtlasojtla. Noneki toitaskej san ken kinamiki. Ika yejon, matiknemilikan tlen kuajli tikchiuaj niman tlen xmás ueli tikchiuaj”. w22.05 24, 25 párrs. 14-16

¿Tlenon uelis tikchiuaskej tla tiknekij san sekan tikueyichiuaskej Jehová imiuan tokniuan? Noneki tokojtiliskej niman ijkon imiuan tiyolseujtoskej (Mat. 5:9; Rom. 12:18). Ijkuak tokojtiliaj más kuajli touikaskej imiuan tokniuan, tikualtsintiliaj ikalpan Jehová. Matikilnamikikan ika nochimej tokniuan akin nemij ipan ikalpan Jehová yejua akin okinuajuikak (Juan 6:44). Matikonnemilikan kenon Jehová melak yolpaki ijkuak kita ika tokojtiliaj kuajli touikaskej niman tiyolseujtoskej imiuan tokniuan, akin yejua melak kintlasojtla (Is. 26:3; Ageo 2:7). ¿Tlenon noneki tikchiuaskej tla tiknekij matechpaleui nochi tlen Jehová techmaka? Noneki kuajli titlanemiliskej itech tlen tomachtiaj ipan iTlajtol toTajtsin. Tla tomachtiaj niman titlanemiliaj, techpaleuis matikinpiyakan kualneskayomej tlen kichiuas matotlasojtlakan “ken iknitin” (Rom. 12:10). w22.11 12, 13 párrs. 16-18

Ijkuak tejuamej tikasikamatij ika Jehová yotechtlapopolui hasta tiuajyolseuij. Noijki, xok más techajmana tlen otikchiujkej niman oksejpa tiyolpakij. Ijkuak se tlaltikpakchane techtlapopoluiya kuajli tomachiliaj, san ika, ijkuak Jehová techtlapopoluiya más kuajli tomachiliaj niman tiyolpakij (Hech. 3:19). ¿Tleka? Pampa ijkuak techtlapopoluiya, oksejpa kuajli iuan touikaj. Yejua kilkaua nochi tlen xkuajli otikchiujkej. Ijkuak Jehová yakaj kitlapopoluiya, yejua xok kilnamiktijtok tlen xkuajli okichiuj nion xkitlajyouiltia ipampa tlen okichiuj (Is. 43:25). Biblia kijtoua ika Jehová sajnoye uejka kitlalia totlajtlakoluan “ijkon ken uejka ikisayan tonaltsintli hasta kampa ikalakiyan” (Sal. 103:12). Ijkuak Jehová techtlapopoluiya melak tiyolpakij niman más kuajli tikueyichiuaj (Sal. 130:4). Jehová kinektika kintlapopoluis akin okichiujkej se ueyi tlajtlakojli. Noijki, melak kuajli techixmatstok pampa yejua otexchijchiuj. Niman kuajli kichiua itekiyo ken juez, ika yejon, ijkuak kinemilia tla yakaj kitlapopoluis noso ka, kachtopa kita nochi tlen opanok. w22.06 5 párrs. 12-14

Jehová yotechijli ika ajsis se tonajli ijkuak xok tikualoskej, xok tajmanaskej niman xok timikiskej (Apoc. 21:​3, 4). Niman kinpaleuis akin yolyemankej makikuepakan se xochitlalpan yejuin tlaltikpaktli (Sal. 37:​9-11). Maski aman ueli iuan touikaj, ipan yejon tonajli uelis más kuajli iuan touikaskej. ¡Melak kualtsin tlen kichiuas toTajtsin! San ika ¿kenon tikmatij ika toTajtsin yemelak kichiuas tlen yotechijli? Pampa yejua nochipa kichiua tlen kijtoua. Ika yejon, uelis itech titlaneltokaskej niman itech tiktlaliskej toyojlo (Sal. 27:14). ¿Niman kenon tikteititiaj ika itech tiktlaliaj toyojlo? Tla ika toyojlo tikchiaj nochi tlen yokijto kichiuas niman tla xtosiaujkauaj (Is. 55:​10, 11). Kuakon, nochipa matimelajkanemikan itech Jehová niman kuajli matikmatstokan ika yejua kinteochiuas “on yejuan melauak kitejtemouaj”. w22.06 20 párr. 1; 25 párr. 18

Pampa yejua toTaj, uelis kuajli tikmatstoskej ika Jehová kichiuas tlen kintlajtlanilia tatajtin ipan 1 Timoteo 5:8. Tla tikneltokaj ika Jehová techtlasojtla niman ika kintlasojtla tochanejkauan, kuajli tikmatstoskej ika yejua techmakas tlen ika topanoltiskej (Mat. 6:​31-33). Jehová techtlasojtla niman kinektok techteochiuas niman techmaka tlen techpoloua. Ijkuak Jehová okichijchiuj tlaltikpaktli xsan okitlali tlen nonekiya. Yejua noijki okitlali tlen kualtsin pampa kinekiya ika toyojlo matinemikan (Gén. 2:9). Niman tla xmás itlaj topiliaj, san ika, xtechpoloua tlen tikuaskej, matiktlasojkamachilikan Jehová pampa mojmostla techmaka tlen tikuaskej (Mat. 6:11). Sa achijtsin poliui ijkuak Jehová techteochiuas niman ijkuak kichiuas melak matipakikan. Kuakon, tla aman xmiyek tikpiyaj tlen ika tipakiskej, maka sajnoye matajmanakan (Is. 65:​21, 22). w22.06 15 párrs. 7, 8

Tinochimej noneki tikchikauaskej totlaneltok, niman xsan akin kemach nomachtijtokej Biblia. Apóstol Pablo okijto ika tla tikchiuaj tlen tomachtijtiuej, techpaleuis matikmatikan “on tlen kuajli niman on tlen xkuajli”. Pampa aman nochiua miyek tlen xkuajli, kanaj kemantika ouijtika tikitaj tiktlakamatiskej Jehová. San ika, Jesús techpaleuijtika pampa kichikaujtika totlaneltokil ika iTlajtoltsin toTajtsin, Biblia. Ijkon ken Jesús, tejuamej noijki yotikteititijkej ika tiktlakaitaj itoka toTajtsin (Juan 17:​6, 26). Ipan 1931 ototokayotijkej iteixpantijkauan Jehová. Ijkon otikteititijkej ika tikpatiojkaitaj itoka Jehová niman ika tiknekij ika nochimej makixmatikan (Is. 43:​10-12). Noijki, ipan Traducción del Nuevo Mundo onotlali itoka toTajtsin nochiuiyan kampa nonekiya yas. w22.07 11 párrs. 11, 12

¿Tlenon okseki tlen melauak yotiuelkej ipan Biblia? Tlen kualtsin kichiuas iTekiuajyo toTajtsin. Jesús okijto ika tlen melauak itech iTekiuajyo toTajtsin yeskia kentla se tesoro. Yejua okijto: “Sen tlakatl yejuan kinokauilia [iTekiuajyo] Dios ma kimandaro, nesi ken sen tlakatl yejuan okinextij sen tesoro ipan sen tlajli kampa iyantikatka. Ijkuak okinextij on tesoro, oksejpa ompa okiyan. Niman ikan pakilistli oyaj ichan, niman okinamakato nochi tlen kipiya. Kemaj okou on tlajli kampa okinextij on tesoro” (Mat. 13:44). Yejuin tlakatsintli xkitejtemojtinemiya se tesoro. San ika, ijkuak okinexti, okinemakak nochi tlen kipiaya niman ijkon uelis kikouas tlajli kampa onkatka yejon tesoro. ¿Tleka okinemakak nochi tlen kipiaya? Pampa kimatstoya ika yejon se tesoro tlen melak patioj katka. Maski yejuin tlaltikpaktli miyek tlen techtekiuiltia, xitlaj ueli techyolpaktia ijkon ken techyolpaktia tiktekichiuiliskej Jehová niman ijkon ken techyolpaktia tikmatiskej ika tikpiyaj se tlamachialistli: ika uelis nochipa tinemiskej ipan yejuin tlaltikpaktli kampa tekiuajtitos iTekiuajyo toTajtsin. Tejuamej tijkajkauaj nochi tlen xkuajli pampa tiknekij kuajli touikaskej iuan Jehová. Melak tiktlasojkamatij ika Jehová kinektok iuan matouikakan. Noijki melak techyolpaktia tiktlakamatiskej Jehová pampa yejon tlen yejua kiyolpaktia (Col. 1:10). w22.08 15 párr. 8; 17 párrs. 9, 12

Ijkuak ijkin ipan onochiuj José, xtlaj onkatka se tlanauatijli kampa kijtouaya ika toTajtsin xkuelita ijkuak yakaj auilnemi. Matikilnamikikan ika Jehová okinmakak Moisés tlanauatiltin 200 xiuitl sakin ika ijkin ipan opanok José, se tlanauatijli ijkin kijtouaya: “Maka iuan xmoteka yejuan xmosiuau noso xmoueuentsin” (Éx. 20:14). Kuakon, ¿tleka José kimatstoya ika Jehová xkuelita ijkuak yakaj auilnemi? Pampa kimatstoya ika Jehová okimakak Adán san se isiuauj. Niman kanaj yokitekakilijka ika Jehová okpa okipaleui ibisabuela Sara ijkuak omemej tekiuajkej kinekiyaj iuan notekaskej (Gén. 2:24; 12:​14-20; 20:​2-7). Ijkuak José otlanemili itech nochi yejuin, okitak tlenon kuelita niman tlenon xkuelita toTajtsin. José melak kitlasojtlaya Jehová, ika yejon, kinektoya kichiuas tlen Jehová kuelita. w22.08 26 párrs. 1, 2

Teotlajtojli tlen uajlauj ipan Daniel 12:2 kijtoua ika yoliuiskej. Kachtopa tikijtouayaj ika yejuin teotlajtojli kiteneujtoya tlen ipan opanok ikalpan Jehová. Itekipanojkauan Jehová chikauak tenojnotstoyaj, san ika, ipan 1918 okinteltilijkej intekiyo. Ika yejon, tikijtouayaj ika yejuamej kentla oksejpa oyoliujkej pampa sakin oksejpa opeuj chikauak tenojnotsaj. San ika, aman tikasikamatij ika ijkuak yejuin teotlajtojli kijtoua “oksejpa yoliuiskej”, kinteneujtika nochimej akin yoliuiskej ipan yenkuik tlaltikpaktli. ¿Tleka ijkon tikijtouaj? Pampa ika tlajtojli hebreo ipan Job 17:16 niman Daniel 12:​2, kitekitiltia sa no yejua tlajtojli. Kitekitiltia tlajtojli “tlalkuechtli” ijkuak kijtoua ika kinyolitiskej oksekimej. Ika yejon, ueli tikijtouaj ika Daniel 12:2 kinteneujtika akin yoliuiskej nikan ipan tlaltikpaktli sakin ika yotlan ueyi tlajyouilistli niman sakin ika yopanok Armagedón. Aman tej, ¿tlenon kijtosneki Daniel 12:2 ijkuak kijtoua ika sekimej yoliuiskej “para nochipa nemiskej”? Kijtosneki ika akin kitlakamatiskej Jehová niman Jesús ipan 1,000 xiuitl kiseliskej nemilistli tlen xkeman tlamis. Kuakon, akin yoliuiskej noneki kinektoskej kixmatiskej Jehová noso tla ikixmatiyaj, noneki kinektoskej más kixmatiskej niman ijkon uelis nochipa nemiskej (Juan 17:3). w22.09 21, 22 párrs. 6, 7

Yejuin xkijtosneki ika Jehová kineki matitlaneltokakan intech oksekimej maski xtikimixmatij. Ka, yejua techtlajtlanilia matitlaneltokakan intech akin kiteititiaj ika uelis intech titlaneltokaskej. ¿Xmelak ika ijkuak yakaj kemach tikixmatij xueli tikijtouaj ika itiktlakaitaj? Ka, pampa xtikixmatij. Noijki ijkon panoua, ijkuak yakaj kemach tikixmatij xuelis tikijtoskej ika itech titlaneltokaj. Kuakon, tla tiknekij titlaneltokaskej intech tokniuan, kuajli matikimixmatikan, imiuan matitlajtokan ipan tlanechikoltin, imiuan matitenojnotsakan, matikimijyouikan niman matikinkauilikan matechititikan ika uelis intech titlaneltokaskej. Ijkuak kemach tikixmati se tokniuj, kanaj xtikneki tikijlis nochi tlen tiknemilia. San ika, tla más yotikixmat, tikitas ika peuas más itech titlaneltokas niman tikijlis tlen tikmachilia (Luc. 16:10). Niman, ¿tlenon uelis tikchiuas tla xok titlaneltoka itech se tokniuj? Xkauili mapano tiempo niman maka xnemili ika xok uelis itech titlaneltokas. Noso tla tikita ika sekimej kichiuaj tlen xmás kuajli, maka xnemili ika xok yakaj uelis itech titlaneltokas. w22.09 4 párrs. 7, 8

Se tlayekanketl akin itoka Miqueas, okimachili ika sekimej tlayekankej okichiuilijkej tlen melak xkuajli. Maski ijkon, yejua okiteititi ika kipiaya kuajli tlamachilistli niman onokojtili xok kinemilis tlen xkuajli. Miyekpa kinotsaya Jehová niman kitlajtlaniliaya iespíritu santo para uelis tlaxikos. Noijki, kitejtemouaya tlen ueliskia kipaleuis ipan toamatlajkuiloluan. ¿Tlenon mitsmachtia tlen ipan onochiuj tokniuj? Ika tla tikmachilia ika se tokniuj omitsyolkoko, maka nimantsin xkualani nion maka xnemili tlen xkuajli, pampa tejua xtikmati tleka yejon tokniuj ijkon okijto noso tleka ijkon okichiuj. Kuakon, xkijli Jehová nochi tlen tikmachilia niman xkijli mamitspaleui xkasikamati yejon tokniuj. Maka xnemili ika yejon tokniuj kinekiya mitsyolkokos niman xtlapopolui (Prov. 19:11). Xkilnamiki ika Jehová kitstika nochi tlen mopan panotika, niman mitspaleuis xtlaxiko (Ecl. 5:8). w22.11 21 párr. 5

Xkintejtemo moamigos akin kitlasojtlaj Jehová. Moamigos uelis mitspaleuiskej más machikaui motlaneltok (Prov. 13:20). Se tokniuj tlayekanketl akin itoka Julien kijtoua: “Ijkuak nitelpochkonetl katka opeuj kuajli ninouika imiuan akin nitenojnotsaya. Onikitak ika noamigos melak yolpakiyaj ijkuak tenojnotsayaj niman nejua noijki niknekiya ijkon niyolpakis. Noijki onikitak ika san ninouikaya imiuan notelpochikniuan, ika yejon, opeuj nikintejtemoua noamigos akin más iuejueyimej katkaj pampa yejuamej noijki ueliskiaj nechpaleuiskej”. ¿Niman tla tikita ika ipan motlanechikol nemi yakaj akin uelis mitsijtlakos? Ipan kachtopa siglo, apóstol Pablo kimatstoya ika ipan tlanechikojli nemiyaj sekimej akin xchikaujtoya intlaneltokil. Ika yejon, okijli Timoteo maka melak imiuan manosentlali (2 Tim. 2:​20-22). Melak tiktlasojkamatij pampa ueli touikaj iuan Jehová. Kuakon, matokojtilikan kuajli touikaskej iuan Jehová niman maka matikchiuakan itlaj tlen kichiuas maka sa iuan matouikakan. w22.08 5, 6 párrs. 13-15

Tejuamej xtikchiuaj ken akin kintlauelitaj itlanauatiluan toTajtsin, ka, tejuamej tokojtiliaj tiktlasojtlaskej ken tlanemilia Jehová niman tikintlasojtlaskej itlanauatiluan. ¿Kenon tikchiuaj yejuin? Ijkuak tikitaj kenon nemij akin tetlakamatij niman akin xtetlakamatij. San matikitakan kenon nemij nochimej akin xkinekij kintlakamatiskej itlanauatiluan Jehová niman noijki matikitakan kenon tejuamej melak kuajli tinemij pampa tikintlakamatij itlanauatiluan Jehová (Sal. 32:​8, 10). Maski Jehová kinekiskia ika nochimej makipiyakan melauak tlamachilistli, yejua xakaj kichiualtia makiseli. San ika, kema kijtoua tlenon inpan nochiuas akin xkinekij kiseliskej tlamachilistli tlen techmaka (Prov. 1:​29-32). Yejua kimijlia: “Nenkiseliskej nemotlaxtlauil”. Akin xtetlakamatij noyolkokouaj, kixnamikij miyek tlen xkuajli niman sakin kinpopoloskej. San ika, akin kikakij niman kitlakamatij tlen Jehová kinnauatia, yejua ijkin kimijlia: “On yejuan kinekis nechkakis, nochipa iyolika nemis niman xnemis ikan nemojtijli” (Prov. 1:33). w22.10 21 párrs. 11-13

¿Tlenon kijtosneki tiktlakaitas Jehová? Kijtosneki xtiknekis tikchiuas tlen yejua kitlauelita (Prov. 16:6). Ika yejon, tokojtiliaj tiktlakamatiskej tlen Jehová technauatia ipan Biblia, tikchiuaj tlen kuajli niman xtikchiuaj tlen xkuajli (2 Cor. 7:1). Tla tikchiuaj tlen Jehová kitlasojtla niman xtikchiuaj tlen yejua kitlauelita, melak tiyolpakiskej (Sal. 37:27; 97:10; Rom. 12:9). Kanaj yakaj kimatstok ika san Jehová kimelaua kijtos tlenon kuajli niman tlenon xkuajli, san ika, xsan noneki kimatstos, noijki noneki kintlakamatis itlanauatiluan (Rom. 12:2). Tlen tikchiuaj kiteititis tla yemelak tikneltokaj ika tlen Jehová technauatia techpaleuiya (Prov. 12:28). David kimatstoya ika tla kitlakamatiya Jehová, melak kipaleuiskia, yejua ika, ijkin okijli Jehová: “Tejua tinechititis on ojtli yejuan teuika ipan nemilistli. Onkaj miyek pakilistli tejua motech. On pakilistli xkaman tlamis ne mouan” (Sal. 16:11). w22.10 8 párrs. 9, 10

Jesús xkeman onoueyimat. Ijkuak xiuajlaya nikan ipan tlaltikpaktli, yejua melak okipaleui iTaj ne iluikak. Colosenses 1:16 kijtoua ika “itechkopa Cristo, Dios okichijchiu nochi tlen onkaj ne iluikak niman nikan ipan tlaltikpaktli”. Nesi ika ijkuak onoapolakti okilnamik nochi tlen okichiuj ne iluikak iuan iTaj (Mat. 3:​16, TNM; Juan 17:5). Maski okilnamik yejon, xkeman onoueyimat niman xkeman okiteititi ika melak ueyixtoya. Niman noijki okimijli inomachtijkauan: “Xoniuajlaj para nechtekichiuiliskej, yej para nitetekichiuilis, niman niktemakas nonemilis para nikmakixtis miyek tlakatl” (Mat. 20:28). Noijki okijto: “Nejua yejuan niiKoneu Dios xueli nikchiua itlaj noselti”. Ken tikitaj, Jesús melak yolyemanki katka. ¿Xmelak ika tejuamej noijki tiknekij tiyolyemankej yeskej ijkon ken yejua? w22.05 24 párr. 13

Ijkuak yakaj kitlapopoluis, Jehová kita tla akin otlajtlako kimatstoya ika xkuajli tlen kichiujtoya. Ijkuak yakaj kichiua itlaj tlen kimatstika ika toTajtsin xkuelita, yejua kichiujtika se tlajtlakojli. Niman Jehová kanaj xkitlapopoluis (Mar. 3:29; Juan 9:41). San ika, kemantika itlaj tikchiujtikisaj niman sakin tikitaj ika xkuajli tlen otikchiujkej. Ijkuak ijkon panoua, ¿Jehová uelis techtlapopoluis? Kema. Jehová noijki kita tla akin otlajtlako yemelak yonoyolkuep. Yemelak timoyolkuepas kijtosneki tikpatlas ken titlanemilia niman tlen tikchiua. Noijki, yakaj akin yonoyolkuep kajmana tlen xkuajli okichiuj niman noyolkokoua pampa xokichiuj tlen kuajli. Niman najmana pampa kimatstoya ika xchikaujtoya itlaneltok ijkuak otlajtlako. w22.06 6 párrs. 15-17

Totlauelikniuan kijtouaj tlen xkuajli intech tokniuan akin tlayekanaj ipan ikalpan Jehová (Sal. 31:13). Sekimej tokniuan yokintsajkej pampa yokintlajtolchijchiuilijkej niman kimijtouiliaj ika yokichiujkej tlen melak xkuajli. Ipan kachtopa siglo noijki ijkon opanok. Apóstol Pablo okitlajtolchijchiuilijkej niman okitsajkej. Ijkuak apóstol Pablo tsauktoya Roma, sekimej tokniuan okitlalkauijkej (2 Tim. 1:​8, 15; 2:​8, 9). Kanaj Pablo melak xkuajli onomachili ijkuak okitlalkauijkej. Yejua miyek yokixikojka tlen ouijtika niman hasta okinek mikis inpampa (Hech. 20:​18-21; 2 Cor. 1:8). ¡Maka keman matikchiuakan ijkon ken akin okitlalkauijkej Pablo! Ika yejon, xtechmojkatlachialtia ika Satanás más kimixnamiki niman kintlaueltoka tokniuan akin techyekanaj. Satanás kineki ika yejuamej makitlalkauikan Jehová niman tejuamej matomojtikan (1 Ped. 5:8). Nochipa xkinpaleui tokniuan akin tlayekanaj (2 Tim. 1:​16-18). w22.11 16, 17 párrs. 8-11

Kanaj yejuin xkuajli tlakatl akin nemiya inakastlan Jesús niman onoyolkuep achto mikis judío katka. Judíos kiueyichiuayaj san se toTajtsin, san ika, akin xjudíos katkaj tlaneltokayaj itech miyekej tajtsitsintin (Éx. 20:​2, 3; 1 Cor. 8:​5, 6). Tla yejuin xkuajkualtin tlakamej xjudíos yeskiaj, yejuin tlakatl tetlajtoltiskia tlen kijtoua tlaxelojli tlen aman tikitstokej. Noijki, matikilnamikikan ika Jesús xmás kinnojnotsaya akin xjudíos katkaj pampa yejua okuajtitlankej para makinpaleuiki judíos “yejuan ixpolijtokej” niman xokuajtitlankej para makinpaleuiki akin xjudíos katkaj (Mat. 15:24). Niman toTajtsin yokimijlika israelitas ika yejua kinyolitiskia akin yomijkej. Kanaj yejuin tlakatl akin yonoyolkuepka kimatstoya yejuin, ika yejon, okijli Jesús makilnamiki ijkuak tekiuajtiskia pampa kimatstoya ika Jehová kiyolitiskia Jesús niman ijkon matekiuajti ipan iTekiuajyo toTajtsin. Yejuin tlakatl noijki kimatstoya ika toTajtsin ueliskia kiyolitis. Tla yejuin xkuajli tlakatl akin onoyolkuep judío katka, kuakon kimatstoya ika Jehová okitlalijka Adán iuan Eva ipan se xochitlalpan. Ika yejon, ijkuak Jesús okiteneuili se xochitlalpan, kanaj yejon tlakatl okinemili ika yejuin Xochitlalpan oniaskia nikan ipan tlaltikpaktli niman ika melak kualtsin yeskia (Gén. 2:15). w22.12 8, 9 párrs. 2, 3

Tejuamej xueliskia titenojnotsaskiaj tla espíritu santo xtechpaleuiskia. ¿Tleka? Pampa Satanás techixnamiki para matijkajkauakan ika titenojnotsaj (Apoc. 12:17). Sekimej ueliskia kinemiliskej ika Satanás melak kojtik niman ika xuelis tiktlaniskej. San ika, yejon xmelauak. ¿Tleka? Pampa ijkuak titenojnotsaj, tikteititiaj ika tiktlanij Satanás niman ika xtechmomojtia (Apoc. 12:​9-11). Niman pampa iespíritu santo toTajtsin techpaleuijtika niman tikyolpaktijtokej Jehová (Mat. 5:​10-12; 1 Ped. 4:14). Iespíritu santo toTajtsin noijki uelis techpaleuis matikixnamikikan tlen ouijtika ijkuak titenojnotsaskej (2 Cor. 4:​7-9). Kuakon, ¿tlenon noneki tikchiuaskej tla tiknekij ika toTajtsin nochipa matechmaka iespíritu santo? Noneki nochipa tiktlajtlaniliskej ipan teoyotl niman kuajli tikmatstoskej ika Jehová techkakis. w22.11 5 párrs. 10, 11

Uelis tikteititiskej ika tikintlasojtlaj tokniuan tla tokojtiliaj kuajli imiuan touikaskej. Tejuamej tikyejyekouaj titetlapopoluiskej ijkon ken Jehová kichiua. Matitlanemilikan itech yejuin: tla Jehová okitekauili ika iKonetsin mamiki ipampa totlajtlakoluan, ¿xnoneki nimantsin tikintlapopoluiskej tokniuan ijkuak itlaj texchiuiliaj? Tejuamej xtiknekij tikchiuaskej ijkon ken on xkuajli tlakeuajli akin Jesús okiteneuj. Iteko okitlapopolui niman okijli ika xok nonekiya kitlaxtlauilis tlen kuikiliaya, san ika, yejon xkuajli tlakeuajli xokinek kitlapopoluis okse tlakeuajli akin xmiyek kuikiliaya (Mat. 18:​23-35). Ika yejon, tla yotimokualani iuan se tokniuj, ¿tleka xtikyejyekoua iuan timoyolseuis achto nopanoltis Conmemoración? (Mat. 5:​23, 24). Tla ijkon tikchiua, tikteititis ika melak tiktlasojtla Jehová niman Jesús. w23.01 29 párrs. 8, 9

Tlayekankej uelis kimatiskej tlenon kinpoloua tokniuan tla kintlajtoltiaj, san ika, noneki notlajpiyaskej maka itlaj kintlajtoltiskej tlen ueliskia kichiuas mapinauikan (Prov. 20:5). Ueliskia notlajtoltiskej: “¿Tokniuan kipiyaj tlen kikuaskej noso tlen ika nopajtiskej, noso okseki tlen noneki? ¿Ueliskia kinkixtiskej kampa chantij noso kampa tekitij? ¿Kanaj nonekis matikinpaleuikan makichiuakan tlen tekiuaj kintlajtlanilia niman ijkon uelis kinpaleuis?”. Jehová tinochimej techtlajtlanilia matikinyolchikauakan tokniuan niman matikinpaleuikan (Gál. 6:10). Ijkuak se tokniuj akin kualo kita ika tiknekij tikyolchikauaskej niman tikpaleuiskej, yejua melak kitlasojkamati. Kokonej ueliskia itlaj kijkuilouiliskej se tokniuj ipan se amatsintli noso kichijchiuiliskej se dibujito niman ijkon kiyolchikauaskej. Telpokamej ueliskia kontlakouiliskej se tokniuj siuatl, noso kipaleuiskej ika itlaj okse. Oksekimej tokniuan ueliskiaj kitlakualchijchiuiliskej se tokniuj akin kualo. Tlayekankej kipiyaj miyek tekitl, niman más ijkuak uajnesi se ueyi kokolistli, ika yejon, sekimej tokniuan kinchijchiuiliaj se amatsintli kampa kimijliaj ika melak kitlasojkamatij tlen kichiuaj. Melak kuajli tla tikchiuaj tlen kijtoua yejuin tlaxelojli: “Xmoyoleuakan iuan cada se, niman xmoyolchikauakan ikan tlaneltoktli iuan oksekimej ijki ken nenkichiuaj” (1 Tes. 5:11). w22.12 22 párr. 2; 23 párrs. 5, 6

Maski saduceos kuajli kixmatiyaj on makuijli libros tlen ika peuayaj Tlajkuiloltin ika Hebreo, xkinekiyaj kichiuaskej tlen ompa ueliyaj. Matikilnamikikan tlen Jesús okimijli saduceos ijkuak okitlajtoltijkej itech yoliuilistli. Jesús okintlajtolti: “¿Xe nenkimomachtiaj iamamox Moisés kampa okijkuiloj ika Dios nemiya ijtik on tlakotepajsojli, niman okinots Moisés niman ijkin okijlij: ‘Nejua niiDios Abraham, niiDios Isaac, niman niiDios Jacob’?” (Mar. 12:​18, 26). Kanaj saduceos miyekpa yokinamapoujkaj yejon tlaxeloltin, san ika, tlen Jesús okintlajtolti okiteititi ika xkinekiyaj tlaneltokaskej itech yoliuilistli (Luc. 20:38). ¿Tlenon tiuelij itech tlen Jesús okintlajtolti saduceos? Ika ijkuak tikamapouaskej Biblia, noneki kuajli tikitstiaskej tlenon techmachtia se tlaxelojli noso tlenon techmachtia tlen ipan opanok akin ompa noteneua. Onka seki tlaxeloltin tlen uelis nimantsin tiknextiliskej tlen techmachtia, san ika, xsan yejon tiknekij tikchiuaskej. Noneki más tiktejtemouiliskej tlen uelis techmachtis, kentla tiktejtemoskiaj se tesoro pampa melak noneki tokojtiliskej para uelis tiknextiskej. w23.02 11 párrs. 9, 10

Maski nochimej akin noteneuaj ipan tlaxelojli tlen aman tikitstokej okixnamijkej miyek tlen ouijtika, nochipa omelajkanenkej itech Jehová (Heb. 11:​36-40). Yejuamej xsan nenka otlaxikojkej. Maski xokitakej nochi tlen toTajtsin okijto kichiuas, nochipa itech okitlalijkej inyojlo. Niman pampa kuajli kimatstoyaj ika kiyolpaktijtoyaj Jehová, kineltokayaj ika ajsiskia se tonajli ijkuak kitaskiaj tlen yejua yokijto kichiuas (Heb. 11:​4, 5). Tlen okichiujkej, noijki techpaleuiya matiktlalikan toyojlo itech Jehová. Aman, melak yotlaixpoliuj (2 Tim. 3:13). Niman Satanás mojmostla kintlatlata itekipanojkauan toTajtsin. Maski san tlenon matikixnamikikan, nochipa chikauak matiktekichiuilikan Jehová, niman matiktlalikan toyojlo “itech on Dios yejuan yoltikaj” (1 Tim. 4:10). w22.06 25 párrs. 17, 18

Tejuamej tiknekij kuajli tiktekichiuiliskej Jehová, ika yejon, totlajpiyaj para maka tikualoskej (Mar. 12:30). Xtikchiuaj tlen uelis kijtlakos totlalnakayo (Rom. 12:1). San ika, maski melak matotlajpiyakan, ajsis se tonajli ijkuak tikualoskej. Maski ijkon, tokojtiliaj totlajpiyaskej pampa tiknekij tikititiskej toTajtsin ika tiktlasojkamatij ika otechmakak tonemilis. Tla itiuejueyimej noso tikualoj, kanaj melak tajmanaj pampa xok ueli tikchiuaj tlen achto tikchiuayaj. San ika, yejon xkijtosneki tla xok noneki totlajpiyaskej. ¿Tleka? Pampa maski itiuejueyimej noso tikualoj, ok uelis tikueyichiuaskej Jehová, ijkon ken tekiuaj David. ¡Niman melak techyolchikaua tikmatiskej ika toTajtsin techtlasojtla niman techpatiojkaita maski titlajtlakolejkej! (Mat. 10:​29-31). Yejua melak techtlasojtla, ika yejon, kuajli yotechijli ika techyolitis tla timikij (Job 14:​14, 15). Kuakon, aman ika tiyoltokej, matotlajpiyakan. w23.02 20, 21 párrs. 3-5

Tla yopanok Armagedón, ¿nestos intoka akin nemij ipan on ika ome grupo ipan amoxtli tlen kijtoua akinomej kipiyaskej nemilistli? Kema (Apoc. 7:14). Jesús okijto ika yejuamej kipiyaskej nemilistli tlen xkeman tlamis (Mat. 25:46). San ika, akin makisaskej ipan Armagedón xnimantsin kinmakaskej nemilistli tlen xkeman tlamis. Niman ijkuak Jesús tekiuajtitos Mil xiuitl, yejua “kimpiyas ken borreguitos, niman kinuikas kampa meya atl yejuan kitemaka nemilistli”. Akin nochipa kitlakamatiskej Cristo niman nochipa melajkanemiskej itech Jehová, xok keman popoliuis intoka ipan amoxtli tlen kijtoua akinomej kipiyaskej nemilistli (Apoc. 7:​16, 17). San ika, akin kentla chivos, kinpopoloskej ipan Armagedón. Jesús okijto ika yejuamej popoliuiskej (Mat. 25:46). Niman apóstol Pablo okijto ika “kincastigaroskej ikan mikilistli para nochipa” (2 Tes. 1:9; 2 Ped. 2:9). w22.09 16 párrs. 7, 8

Tlen kualtsin okichijchiuj Jehová kinpaleuiya familias kuajli manomachilikan niman mayolpakikan, niman yejon kinpaleuiya más kuajli manouikakan. Jehová okichijchiuj kampa melak tlakualtsinkan niman ompa uelis tikchiuaskej tlen tejuamej tikuelitaj. Miyek familias kuelitaj yaskej apan, mar, kampa tlaxoxojkan, kampa kojyo noso kampa tepeyoj. Ipan yenkuik tlaltikpaktli, tatajtin niman inkoneuan yolpakiskej ika tlen Jehová okichijchiuj ijkon ken xkeman yolpakiyaj. Xok tikinmakasiskej yolkamej, nion yolkamej xok techmakasiskej (Is. 11:​6-9). Tikpiyaskej miyek tiempo para tikitaskej nochi tlen toTajtsin okichijchiuj niman melak techyolpaktis (Sal. 22:26). San ika, tatajtin, maka xchiakan hasta maajsi yejon tonajli, desde aman xkinpaleuikan nemokoneuan makitakan tlen Jehová okichijchiuj niman itech mauelikan. Tla desde aman nenkitekitiltiaj tlen okichijchiuj toTajtsin para nenkinmachtiskej nemokoneuan itech Jehová, xmatstokan ika yejuamej nomachiliskej ken tekiuaj David, akin okijto: “¡Xnemi okse dios ken tejua noTEKO! ¡Xakaj ueli kichiua on uejueyi tlajtlamach ken tejua tikchiua!” (Sal. 86:8). w23.03 25 párrs. 16, 17