Octubre

Tinochimej uelis tokuikatiskej niman titlanankiliskej ipan tlanechikoltin. Sekimej pinauij nokuikatiskej niman nomojtiaj tlanankiliskej. ¿Noijki ijkon mopan nochiua? Tla kema, xkita tlenon yokinpaleui oksekimej tokniuan. Sekimej xok pinauij nokuikatiskej pampa nokojtiliaj nokuikatiskej ika nochi inyojlo. Xkilnamiki ika tokuikatiaj ipan tlanechikojli pampa ijkon tikueyichiuaj Jehová. Ika yejon, melak mitspaleuis tla timomachtia tlen nopanoltis ipan tlanechikoltin, timomajmachtia tlakuikaltin tlen tokuikatiskej niman tikita kenon yejon tlakuikaltin noijki tlajtouaj itech tlen nopanoltis ipan tlanechikojli. Noijki mitspaleuis tla ijkuak timokuikatia tikaktiuj tlen tikijtojtiuj niman xsan tijkaki ken timokuikatia. Miyekej tokniuan nomojtiaj tlanankiliskej. ¿Tlenon uelis mitspaleuis? Xmokojtili nochipa titlanankilis. Xkilnamiki ika akin kachtopa tlanankilia xnoneki uejkauis. Niman maka keman xkilkaua ika Jehová kineki matikchiuakan nochi tlen tiuelij. Jehová kuelita ijkuak kita ika tejuamej tokojtiliaj titlanankiliskej maski tomojtiaj. w22.04 7, 8 párrs. 12-15

Tlajtojli “nechpaleuiya” kijtosneki yakaj akin notlaloua konpaleuiya akin kineki makipaleuikan. San matikonnemilikan kenon Jehová notlaloua para konpaleuis yakaj akin kixnamiktika tlen ouijtika. Yejuin techititia ika Jehová yemelak kinektika techpaleuis. Tla Jehová touan nemi, uelis titlaxikoskej niman noijki uelis tiyolpakiskej. ¿Kenon techpaleuiya Jehová? Libro de Isaías technankilia yejon. Miyekej teotlajtoltin tlen Isaías okimijkuilo, kinpaleuiya itekipanojkauan toTajtsin akin nemij ipan yejuin tonaltin. Noijki, Isaías miyekpa tlajtoua itech Jehová niman kinkui tlajtoltin tlen nimantsin ueli tikinmasikamatij. Matikonteneuakan yejuin, ipan capítulo 30 melak kualtsin techijlia kenon Jehová kitlajpiya ikalpan. Ompa kijtoua ika Jehová 1) kuajli techkaki niman kinnankilia toteoyouan, 2) techyekana niman 3) techteochiua aman niman techteochiuas ika tlayekapan. w22.11 8 párrs. 2, 3

Jesús okimijli tokniuan akin chantiyaj Esmirna niman Filadelfia ika xnonekiya nomojtiskej ijkuak kintlaueltokaskiaj. Niman okimijli ika tla yejuamej tlaxikouayaj, Jehová kinteochiuaskia (Apoc. 3:10). Yejuin techmachtia ika noneki tikmatstoskej ika techtlaueltokaskej niman ika noneki titlaxikoskej (Mat. 24:​9, 13; 2 Cor. 12:10). Ipan amoxtli Apocalipsis kijtoua ika kintlaueltokaskiaj itekipanojkauan toTajtsin ipan “itonal toTeko” noso ipan yejuin tonaltin (Apoc. 1:10). Ipan capítulo 12 kijtoua ika ijkuak opeuj tlayekana iTekiuajyo toTajtsin, “ne iluikak onochiu sen nouijsokilistli”. Noijki kijtoua ika “Miguel [noso Jesucristo] iuan iángeles onouijsokkej iuan on dragón iuan iángeles” (Apoc. 12:​7, 8). Niman ¿kenon otlamito? Okintlankej itlauelikniuan Jehová niman okinuajtlakalkej nikan ipan tlaltikpaktli, kampa aman melak tetlajyouiltiaj (Apoc. 12:​9, 12). w22.05 5 párrs. 12, 13

Jehová nochipa kichiua tlen kuajli. ¿Tleka? Pampa yejua xtechikoita. Jehová xsan kitlapopoluiya yakaj akin kualtsin nesi, akin kipiya tomin noso akin kipiya se ueyi tekitl. ToTajtsin nochimej kintlapopoluiya (1 Sam. 16:7; Sant. 2:​1-4). Noijki, xakaj uelis kichiualtis noso kitlaxtlauilis Jehová para makitlapopolui. Maski kajmana noso kikualania tlen yakaj kichiua, yejua kachtopa kuajli kinemilia tla kitlapopoluis noso ka (Éx. 34:7). Kuajli tikitaj, ika san Jehová kuajli kichiua itekiyo ken juez pampa kuajli techixmatstika niman kimatstika tlen topan nochiujtika (Deut. 32:4). Akin okijkuilojkej Tlajkuiloltin ika Hebreo kuajli kimatstoyaj ika xnemiya okse akin matetlapopolui ijkon ken Jehová. Miyekej ixtlamatkej kijtouaj ika yejuin tlakamej miyekpa okitekitiltijkej se tlajtojli ika hebreo tlen okiteititi ika Jehová otetlapopolui, niman yejuin tlajtojli xkeman okikuikej para kijtoskej ika se tlakatl okitlapopolui okse tlakatl. Yejuin techititia ika san Jehová kuajli kitlapopoluiya akin yemelak yonoyolkuep. w22.06 4, 5 párrs. 10, 11

Tla tejua san moselti tikimiskaltia mokoneuan pampa xtikpiya moueuentsin noso pampa moueuentsin xkitekichiuilia Jehová, kuajli xmatsto ika tlen tikchiua kinpaleuiya oksekimej. Maka xmosiaujkaua tla tikita ika mokoneuj xmás kineki nomachtis Biblia. Xkilnamiki ika noneki tiempo para tikmachtis. Ijkuak tejua tiktoka se iyoltsin naranja noso mandarina, xtikmati tla noskaltis niman tla tlatlakiltis. Maski ijkon, nochipa tikatekiya (Mar. 4:​26-29). Noijki ijkon, maski xtikmati tla mokoneuj kitekichiuilis Jehová, xmokojtili xpaleui makichikaua itlaneltok. w22.04 20 párrs. 16, 17

Salomón kuajli kitekichiuiliaya Jehová niman kasikamatiya ika xnochi ueliya kichiuaya, ika yejon, ijkuak telpochtli katka niman kemach yopeujka tekiuajti, okitlajtlanili Jehová makiyekana (1 Rey. 3:​7-9). Noijki, kimatstoya tlenon inpan nochiua akin noueyimatij. San ika, sakin okilkauj tlen okijkuilojka pampa opeuj noueyimati niman xok nochipa kitlakamatiya Jehová. Jehová okijto yeuejkaui tlenon xnonekiya kichiuaskej nochimej tekiuajkej hebreos. Yejua okijto: “Xkimpiyas miyekej siuamej para ijkon xkitlalkauis iojui toTEKO” (Deut. 17:17). Salomón xokitlakamat yejuin tlanauatijli pampa okinpix 700 isiuauan niman 300 itlakpasiuauan (1 Rey. 11:​1-3). Kanaj yejua kinemiliaya ika xtlaj ipan nochiuaskia. San ika, sakin otlajyoui pampa okitlalkaui Jehová (1 Rey. 11:​9-13). w22.05 23 párr. 12

Aman, nochimej melak noneki makitlapejpenikan tlenon tikchiuaskej. Tla kipaleuiskej Jehová akin san yejua kimelaua tlayekanas, noso kipaleuiskej Satanás, itlauelikniuj toTajtsin. Sa no yejuamej noneki kitlapejpeniskej tla kinekij nochipa nemiskej noso ka (Mat. 25:​31-33, 46). Ipan ueyi tlajyouilistli, nochimej itekipanojkauan Jehová akin itech melajkanemiskej, kintlaliliskej se neskayotl niman ijkon xkinpopoloskej (Apoc. 7:14; Ezeq. 9:​4, 6). Niman, nochimej akin kipiyaskej ineskayo on xkuajli yolki, kinpopoloskej (Apoc. 14:​9-11). Melak kuajli tla tejua itikpaleuijtika iTekiuajyo Jehová. Tikmatstokej ika aman tikneki tikinpaleuis oksekimej para noijki ijkon makichiuakan. Ompa kijtoua kenon kinteochiuaskej akin melajkanemij itech Jehová. Tla kuajli tomachtiaj amoxtli Apocalipsis, techpaleuis más kuajli matiktekichiuilikan Jehová niman matikinyolchikauakan oksekimej para noijki makipaleuikan iTekiuajyo Jehová. w22.05 15 párrs. 1, 2

Ijkuak tikixnamiktoskej tlen ouijtika, ¿akinon noneki tijkakiskej, Jehová noso totlauelikniuan? San Jehová. Niman yejon tlen okichiuj Job, yejua kuajli okikak Jehová ijkuak okinots. Ijkuak yejua tlajyouijtoya, Jehová kanaj ijkin okijli: “Nejua melak nikojtik niman nikitstika nochi tlen mopan nochiujtika. ¿Tiknemilia ika xuelis nimitspaleuis?”. Job onoyolyemanili niman okitlasojkamachili Jehová, niman okinankili: “Achtoj, san nikakiya mitsteneuaj, pero aman, nimitsita ikan nixtololojuan” (Job 42:5). Ijkuak Job ijkin okijto kanaj yejua ok yeuatikatka ipan tlikonextli niman melak kinkokouaya itsotsouan. Maski Job ijkon ipan nochiujtoya, Jehová okijli ika melak kitlasojtlaya niman kitlasojkamatiya tlen kichiujtoya (Job 42:​7, 8). Aman, miyekej noijki techuijuikaltiaj niman kijtouaj ika tejuamej xtlaj ika titepaleuiyaj. Miyekej xkinekij kuajli matlajtokan totech noso itech ikalpan Jehová. San ika, tlen ipan onochiuj Job techititia ika Jehová kineltoka ika tejuamej uelis itech timelajkanemiskej ijkuak tikixnamikiskej miyek tlen ouijtika. w22.06 23, 24 párrs. 15, 16

Ne iluikak noijki melak yolpakiskej ijkuak kitaskej ika yokipopolojkej “Ueyixtikaj Babilonia”. San ika, onka itlaj okse tlen más kinyolpaktis (Apoc. 19:​1-3). Ipan Apocalipsis kijtoua ika más yolpakiskej “ijkuak nonamiktis on Borreguito”. Yejua xnonamiktis achto peuas Armagedón, maski yejon 144,000 inemiskej ne iluikak (Apoc. 21:​1, 2). Yejua nonamiktis ijkuak yopanok Armagedón, ijkuak yokinpopolojkej nochimej itlauelikniuan toTajtsin (Sal. 45:​3, 4, 13-17). ¿Iuan akinon “nonamiktis on Borreguito”? Ijkon ken ijkuak nonamiktia se tlakatl niman se siuatl, Jesús kentla noijki nonamiktiskia imiuan yejon 144,000. ¿Tlenon kijtosneki yejuin? Ika yejuamej san sekan peuaskej tekiuajtiskej mil xiuitl ipan yejuin tlaltikpaktli (Apoc. 20:6). w22.05 17 párrs. 11-13

Jesús okijto ika kitlaliskia se “tekitketl” yolmelauak niman tlamachilise akin techmakaskia tlen ika tikchikauaskiaj totlaneltokil ipan itlamiyan tonaltin (Mat. 24:45). ¿Akinon yejuin “tekitketl”? Se grupo kampa nemij tokniuan tlapejpeniltin. Yejuamej techmakaj tlen ika tikchikauaskej totlaneltokil ijkuak noneki. Yejuin grupo xtexchiualtia matiktekichiuilikan Jehová pampa yejuamej kuajli kimatstokej ika san Jesucristo yejua “tlayekanketl niman temachtijketl” ipan ikalpan toTajtsin (2 Cor. 1:24; Is. 55:4). Desde 1919, yejuin “tekitketl” kinuajkixtijtiuj miyek amatlajkuiloltin tlen kinpaleuiya miyekej tlaltikpakchanejkej manonisiuikan itech toTajtsin niman makichikauakan intlaneltok. Ipan 1921, okikixti ika inglés libro El Arpa de Dios tlen ika otemachti tlen melauak. Sakin okinkixtijtia okseki libros. ¿Tejua katlejua libro omitspaleui xkixmati niman xtlasojtla Jehová? w22.07 10 párrs. 9, 10

San Jehová yejua akin más kuelita kitemakas tlen kipiya. Jehová nochipa mitsmakas más, xijkon ken tlen tejua tikmaka (Mar. 10:​29, 30). Maski tinemij ipan itlamiyan tonaltin, Jehová kichiuas ika moyojlo xnemi. Ijkuak timoapolaktis, peuas tiktekichiuilis toTajtsin Jehová niman uelis nochipa ijkon tikchiuas. Más tiktlasojtlatias Jehová niman, ijkon ken yejua, nochipa tinemis. Ijkuak timosentemakas niman timoapolaktis, tejua uelis tikmakas Jehová itlaj tlen melak patioj. Jehová yomitsmakak nochi tlen kualtsin tikpiya niman yejua okichiuj mapano nochi tlen kualtsin mopan yonochiuj. Niman tejua uelis tikmakas Jehová, akin okichijchiuj iluikak niman tlaltikpaktli, itlaj tlen yejua xkipiya. Tla tejua itech timelajkanemi niman nochipa tiktekichiuilia, kentla tiktlayokolijtoskia itlaj tlen yejua xkipiya (Job 1:8; 41:11; Prov. 27:11). Melak kuajli tla ijkon tikchiua ipan monemilis. w23.03 6 párrs. 16, 17

Tla tejua titelpochtli noso tiichpochtli, kanaj kemantika tiknekis timotekas iuan yakaj niman kanaj sekimej uelis mitschiualtiskej xauilnemi. Niman Satanás kineki xchiua tlen tikileuiya. ¿Tlenon mitspaleuis tla xtikneki tikchiuas tlen Satanás kineki? (1 Tes. 4:​3, 4). Xnotsa Jehová, xkijli kenon timomachilia niman xtlajtlanili mamitspaleui (Mat. 6:13). Xkilnamiki ika Jehová kinektika mitspaleuis niman ika xkeman mitstejteneuas (Sal. 103:​13, 14). Xkilnamiki ika xsan moselti tinemi, motaj noso monan uelis mitspaleuiskej. Ika yejon, maski kemantika tepinajti noso ouijtika tlen tikmachilia, noneki tikimijlis. Tla tikamapoua moBiblia niman itech titlanemilia, tiktlapejpenis tlen kuajli niman melak tikyolpaktis Jehová. Tla tikasikamati kenon tlanemilia Jehová, xok san timoyekanas ika tlanauatiltin. Tla ijkon titlanemilia, kijtosneki ika ichikaujtok motlaneltokil. w22.08 5 párrs. 10-12

Tokniuan akin kinyekanaj inchanejkauan kimatstokej ika melak noneki kinmakaskej inchanejkauan tlen kinpoloua. Tla tejua tikinyekana mochanejkauan, kanaj mitsajmana kenon tikinmakas tlen kinpoloua, kenon tiktlaxtlauas renta noso kenon tiktlaxtlauas mokal. Niman kanaj otiknemili ika tla mitskixtiaj kampa titekiti, xok ueliskia tiknextis okse tekitl. Noso, kanaj otiknemili ika xueliskia tinemis san ika achijtsin. Satanás melak kuelita ijkuak miyekej nomojtiaj ika yejuin, pampa uelis kichiuas maka sa makitekichiuilikan Jehová. Satanás kineki matiknemilikan ika Jehová xnajmana topampa. Niman ika yejua xtechpaleuis tla kemantika xtiuelij tikinmakaj tochanejkauan tlen kinpoloua. Tla peua titlanemiliaj ijkon ken Satanás kineki, uelis tiknemiliskej ika melak noneki titekitiskej maski maka matikchiuakan seki tlen Biblia kijtoua. w22.06 15 párrs. 5, 6

Ipan Biblia, Jehová techijlia: “[¡Nejua] nitetlasojtla niman niteiknelia! Xnimantsin nikualani. Sanoyej nitetlasojtla, niman nochipa nikchiua on tlen nikijtoua” (Éx. 34:6). Yejua noijki kineki manochiua “nochi on tlen melajki” (Is. 61:8). Jehová noyolkokoua ijkuak kita kenon titlajyouiyaj niman sa kinektika maajsi yejon tonajli ijkuak kipopolos nochi tlen techtlajyouiltia (Jer. 29:11). ¡Tejuamej noijki sa tiknektokej mayejko yejon tonajli! Ika yejon, melak tiktlasojtlaj Jehová. Noijki tiktlasojtlaj tlen melauak pampa melak techpaleuiya. San se matikonteneuakan itech kenon melak techpaleuiya. Ipan Biblia kijtoua ika tikpiyaj se tlamachialistli. Ijkon ken se teposcadena noso ancla kimelajkapiya se barco, totlamachialis tlen onka ipan Biblia techmelajkapiya niman techyolseuiya ijkuak tikixnamikij tlen ouijtika. Ipan tlaxelojli tlen aman tikitstokej, apóstol Pablo kiteneujtoya tlamachialistli tlen kiseliskej tokniuan tlapejpeniltin. Yejuamej kichiaj yaskej iluikak. San ika, yejuin tlaxelojli noijki kinpaleuiya nochimej akin kichiaj nemiskej ipan se kualtsin xochitlalpan (Juan 3:16). Melak techyolpaktia ika tinochimej tikpiyaj se kualtsin tlamachialistli. w22.08 14, 15 párrs. 3-5

Tla tiknekij yakaj itech titlaneltokaskej, kachtopa noneki tiktlasojtlaskej. Ipan 1 Corintios capítulo 13 kijtoua tlenon tikchiuaj ijkuak titetlasojtlaj. Tlen ompa noteneua techpaleuiya más matitlaneltokakan intech oksekimej (1 Cor. 13:​4-8). Ken ipan tlaxelojli 4 kijtoua ika “on yejuan tetlajsojtla tlajtlamach kimijyouilia oksekimej niman yolyemanki”. Jehová techijyouiya ijkuak tikchiuaj se tlajtlakojli. Ika yejon, tejuamej noijki noneki tikimijyouiskej tokniuan tla kemantika techijliaj noso texchiuiliaj itlaj tlen techkualania noso tlen techyolkokoua. Niman ipan tlaxelojli 5 kijtoua ika “on yejuan tetlajsojtla xsan kuajkualani, niman xsa konelnamiktikaj on tlen oksekimej itlaj xkuajli okichiuilijkej”. Tejuamej noijki xtiknekij san tikonilnamiktoskej tlen xkuajli otexchiuilijkej tokniuan. Eclesiastés 7:9 kijtoua ika xnoneki nimantsin tikualaniskej. Ika yejon, melak noneki matikimitakan tokniuan ijkon ken Jehová kimita. Jehová kintlasojtla tokniuan niman xsan kinpouilijtiuj kechpa nopopolouaj. Kuakon, tejuamej noijki matikchiuakan ijkon ken Jehová (Sal. 130:3). Maka san matikitstokan kenon nopopolouaj, yej matikitakan nochi tlen kuajli kichiuaj (Mat. 7:​1-5). w22.09 3, 4 párrs. 6, 7

Amoxtli Daniel techijlia tlenon kachtopa panoskia itlamiyan tonaltin. Daniel 12:1 kijtoua ika Miguel noso Jesucristo, “kinmanauiya” itekipanojkauan toTajtsin. Yejuin teotlajtojli opeuj nochiua ipan 1914, ijkuak Jesús opeuj tekiuajti ipan iTekiuajyo toTajtsin. Daniel noijki okijlikej ika Jesús kinpaleuiskia itekipanojkauan toTajtsin ijkuak “on tlajyouilistli yes kenon yejuan xkaman oonyak desde ijkuak opeu onokej on naciones”. ¿Katlejua tlajyouilistli noteneujtika? Ueyi tlajyouilistli tlen noteneua ipan Mateo 24:21. Jesús kinmakixtis itekipanojkauan toTajtsin itlamiyan ueyi tlajyouilistli noso ijkuak peuas Armagedón. Amoxtli Apocalipsis kintokayotia ken “sajnoye miyek tlakatl” akin Jesús kinmakixtis ipan “temojtij tlajyouilistli” (Apoc. 7:​9, 14). w22.09 21 párrs. 4, 5

Yejon kijtosneki ika tokayomej tlen ijkuiliujtokej ipan “amamoxtli yejuan kijtoua akinomej kipiyaj on yenkuik nemilistli para nochipa” uelis kinpopoloskej. Kentla Jehová san okimijkuilo ika lápiz (Apoc. 3:5). Noneki tokojtiliskej hasta ijkuak Jehová makijkuilo totokayo ika lapicero. Ipan kachtopa grupo itech akin ompa nestika intoka nemij akin yokintlapejpenijkej para tekiuajtiskej iuan Cristo ne iluikak. Apóstol Pablo okimijli tokniuan akin chantiyaj Filipos ika intoka tokniuan tlapejpeniltin, noso akin yokinnotskej para tekiuajtiskej iuan Cristo, inestika ipan “amamoxtli kampa onkaj intoka on yejuan kipiyaj nemilistli para nochipa” (Filip. 4:3). San ika, yejuamej noneki nochipa melajkanemiskej para xkinpopoloskej intoka ipan yejon amoxtli. Niman ijkuak kintlaliliskej “sello” achto ika mikiskej noso achto ika yejkos ueyi tlajyouilistli, intoka xok keman popoliuis ipan amoxtli tlen kijtoua akinomej kipiyaskej nemilistli (Apoc. 7:3). w22.09 15 párrs. 3, 5, 6

¿Kemantika ijkon yotikmachilijka? San matikonnemilikan ika yakaj texchijchiuilia se tlakuajli tlen melak tikueliliaj. San ika, pampa tijsiuij noso pampa itlaj techajmantikaj, san tiktojtolojtiuetsij noso san totoka tikuajtiuetsij. Ijkuak tiualixuij, tikitaj ika ueliskia san yolik tikuajtiaskiaj niman tikuelilijtiaskiaj. Tla xtotlajpiyaj, noijki uelis ijkon topan panos ijkuak tikamapouaskej toBiblia. Tla san totoka tikamapouaj, xtikitaskej tlen Jehová kineki techijlis. Kuakon, san yolik matikamapoujtiakan toBiblia niman matikonnemilijtiakan tlen panotoya, tlen kijtotoyaj niman matiknemilijtiakan kenon uelis techpaleuis tlen tikamapoujtokej. Tla ijkon tikchiuaj, melak tiyolpakiskej. Jesús yokinauati “tekitketl” yolmelauak niman tlamachilise matechmaka tlen ika tikchikauaskej totlaneltok. Niman yejuin “tekitketl” nochipa techmakatika tlen noneki (Mat. 24:45). Nochi tlen techmaka “tekitketl” nokixtia itech Biblia (1 Tes. 2:13). w22.10 7, 8 párrs. 6-8

Biblia okijto ika ipan itlamiyan tonaltin nemiskiaj miyekej akin tepijpinaujtiskiaj (2 Ped. 3:​3, 4). Yejuamej noyekanaj ika “ineleuilis yejuan xchipauak” (Jud. 7, 17, 18). ¿Tlenon noneki tikchiuaskej tla xtiknekij tiyeskej ijkon ken akin tepijpinaujtiaj? Maka matosentlalikan imiuan akin xtlaj kuelitaj (Sal. 1:1). Yejuin kijtosneki ika xnoneki tikinkakiskej akin kixnamikij ikalpan toTajtsin nion xnoneki tikamapouaskej tlen yejuamej kijkuilouaj. Tla xtotlajpiyaj, uelis peuas titetejteneuaskej niman tiknemiliskej ika tlen Jehová techijlia itechkopa ikalpan xmás kuajli niman ika xtepaleui. Tla xtiknekij ijkon topan manochiua, matotlajtoltikan: “¿Xmás nikuelita ijkuak itlaj technauatia ikalpan toTajtsin? ¿San nikitstok kenon nopopolouaj akin techyekanaj?”. Tla tikitaj ika kema ijkon tikchiuaj, nimantsin matopatlakan. Niman tla topatlaj, melak tikyolpaktiskej Jehová (Prov. 3:​34, 35). w22.10 20 párrs. 9, 10

Yejon espíritu okipaleui Ezequiel makinnojnotsa judíos akin “yoltechikajkej” katkaj niman akin “tsontekonchikajkej” katkaj. Jehová okijli: “Nejua nikchiuas para tejua no xmoyoltechikaua niman xmotsontekonchikaua para tikinmixnamikis yejuamej, ijkon ken yejuamej noyoltechikauaj para mitsixnamikij. Nejua más nimitstsontekonchikauas ken chikauak on tetl diamante niman ken chikajkej on temej. Yejua ika tej, maka xmomojti ijkuak mitsitaskej ikan tlauejli” (Ezeq. 3:​8, 9). Jehová kentla kijliskia Ezequiel: “Maka xmajmana tla xkinekij mitskakiskej, nejua nimitspaleuis niman nimitskojtilis”. Ijkuak Jehová ijkon yokijlika Ezequiel, iespíritu toTajtsin okuikak Ezequiel kampa nonekiya tenojnotsas. Ezequiel okijkuilo: “Ipoder toTEKO yejuan onkatka nopan, sanoyej kipiyaya fuerza”. Teotlajtoketl Ezequiel ouejkauj se semana para kasikamatis tlen nonekiya kiteijlis (Ezeq. 3:​14, 15). Sakin, Jehová okijli mauiya “ipan on ixtlauatl” niman ompa iespíritu toTajtsin ipan okalak (Ezeq. 3:​23, 24). Aman Ezequiel iueliskia tenojnotsas. w22.11 4, 5 párrs. 8, 9

Teotlajtoketl Habacuc okixnamik tlen ouijtika niman nesi ika oajsik se tonajli ijkuak okinemili ika Jehová xkinekiya kipaleuis. Kuakon, okijli nochi tlen kimachiliaya. Jehová okinankili iteoyouj Habacuc (Hab. 2:​2, 3). Habacuc oksejpa oyolpak pampa otlanemili itech kenon Jehová yokimakixtijka ikalpan. Yejua okineltokak ika Jehová kitlasojtlaya niman ika kipaleuiskia matlaxiko ijkuak kixnamikiskia tlen ouijtika (Hab. 3:​17-19, TNM). ¿Tlenon tiueli itech Habacuc? Ijkuak tikpiyas se tlauejli, xnotsa Jehová, xkijli nochi tlen tikmachilia niman itech xmopaleui. Uelis kuajli tikmatstos ika Jehová mitspaleuis xtlaxiko. Niman ijkuak tikitas kenon mitspaleuiya Jehová, motlaneltok más chikauis. Tla tejua timokojtilia tikchikauas motlaneltok, mitspaleuis maka xtlalkaui Jehová maski tikpiyas miyek tlaueltin (1 Tim. 6:​6-8). w22.11 15 párrs. 6, 7

Jesús niman on xkuajkualtin tlakamej akin iuan pilkatoyaj, imiktoyaj (Luc. 23:​32, 33). Yejuin omemej tlakamej kipijpinaujtijtoyaj Jesús (Mat. 27:44; Mar. 15:32). San ika, se tlakatl xok ijkon okichiuj, niman okijli Jesús: “Jesús, xnechelnamiki ijkuak peuas titlamandaros ken Rey”. Niman Jesús okinankili ika tlen kijtoua tlaxelojli tlen aman tikitstokej (Luc. 23:​39-42). Tlen Jesús okijli yejuin xkuajli tlakatl kipiya ika techtlanemililtis itech kenon tichantiskej ipan Xochitlalpan. Ijkuak titlanemiliaj itech kenon israelitas melak yolseujtoyaj ijkuak tekiuajtitoya Salomón, techpaleuiya matitlanemilikan itech kenon yes ijkuak Jesús tekiuajtitos. Biblia kijtoua ika Jesús “más ueyixtikaj xken Salomón”. Kuakon, uelis kuajli tikmatstoskej ika ijkuak Jesús niman akin iuan tekiuajtiskej tlayekanaskej ipan tlaltikpaktli, melak kualtsin tinemiskej (Mat. 12:42). “Oksekimej borregos” noneki ueliskej tlen noneki kichiuaskej niman ijkon uelis chantiskej ipan Xochitlalpan (Juan 10:16). w22.12 8 párr. 1; 9 párr. 4

Isaías techijlia ika Jehová kuajli techkakis ijkuak tiknotsaskej niman ika nimantsin technankilis. Isaías noijki okijto: “Ijkuak mechkakis, nimantsin mechnankilis”. Yejuin tlajtoltin tlen okijto Isaías, techilnamiktia ika toTajtsin ika nochi iyojlo kinektok kinpaleuis akin kitlajtlaniliaj makinpaleuikan. Tla nochipa tikilnamiktokej yejuin, titlaxikoskej ika pakilistli. Jehová toseselti techkaki ijkuak tiknotsaj. ¿Tleka ijkon tikijtouaj? Ijkuak peua Isaías capítulo 30, Jehová kiminotsa nochimej itekipanojkauan. San ika, ika tlajtojli hebreo tikitaj ika ipan tlaxelojli 19 kijtoua ika Jehová kinnotstoya inseselti itekipanojkauan. Ika tlajtojli hebreo, Isaías ijkin okimijli: “tejua xok tichokas”, “yejua mitsiknelis”, “yejua mitsnankilis”. Jehová melak tetlasojtla. Yejua toseselti techpaleuiya niman toseselti techkaki (Sal. 116:1; Is. 57:15). w22.11 9 párrs. 5, 6

Melak tiyolpakiskej niman tiyolseuiskej tla titenojnotsaj niman titemachtiaj tlen melauak maski techtlaueltokaj. Ipan kachtopa siglo, tekiuajkej judíos okimijlikej apóstoles maka sa matenojnotsakan, san ika, yejuamej xokintlakamatkej, yej okitlakamatkej toTajtsin niman itech omelajkanenkej. Yejuamej nochipa otenojnotskej niman yejon melak okinyolpakti (Hech. 5:​27-29, 41, 42). Kuakon, nochipa matitenojnotsakan ijkon ken apóstoles, san matikilnamikikan ika ijkuak tekiuajkej xtechkauiliskej matitenojnotsakan, nonekis más totlajpiyaskej. Tla tokojtiliaj ijkon tikchiuaskej, tiyolseuiskej pampa tikyolpaktijtoskej Jehová niman tikinpaleuijtoskej oksekimej mamakisakan. Kuajli matikmatstokan ika uelis tiyolseujtoskej maski tikixnamikiskej miyek tlen ouijtika. Nochipa matikilnamiktokan ika ijkuak topan nochiuas tlen xkuajli, san uelis techpaleuis yolseuilistli tlen san Jehová ueli kitemaka. Ijkuak onias se ueyi kokolistli, ijkuak sa totoka itlaj panos noso ijkuak techtlaueltokaskej, matitlaneltokakan itech Jehová. Nochipa matinemikan ipan ikalpan toTajtsin niman matitlanemilikan itech nochi tlen toTajtsin yokijto techmakas ika tlayekapan. Tla ijkon tikchiuaj, toTajtsin akin kitemaka yolseuilistli touan nemis (Filip. 4:9). w22.12 21 párrs. 17, 18

Kemantika yejuin ouijtika tikchiuas. ¿Tleka? Pampa kemantika tikchiuaj tlen xkuajli pampa titlajtlakolejkej (Efes. 4:​31, 32). Kuakon, maka san matitlamatstokan, yej matokojtilikan topatlaskej. Sekimej melak tlauelejkej noso nimantsin tetlauelitaj ijkuak itlaj kinchiuiliaj, hasta Biblia kijtoua ika sekimej nimantsin kualanij (Prov. 29:22). Maski tla yotoapolaktijkej, ok nonekis tokojtilijtoskej para xtikchiuaskej tlen xkuajli (Rom. 7:​21-23). Matikijlikan Jehová kanon ouijtika tikitaj topatlaskej, niman kuajli matikmatstokan ika yejua techkakis niman techpaleuis (1 Juan 5:​14, 15). Maski Jehová xkichiuas se milagro para techpatlas niman ijkon nochipa matikchiuakan tlen kuajli, kema techpaleuis matoxijxikokan iuan on tlen xkuajli tikchiuasnekij (1 Ped. 5:10). ¿Tlenon noneki tikchiuaskej tla yotiktlajtlanilijkej toTajtsin matechpaleui? Xsan noneki tikchiaskej matechpaleui Jehová, tejuamej noijki noneki totlajpiyaskej. Xnoneki tikchiuaskej tlen ueliskia kichiuas oksejpa matikchiuakan ken yeuejkaui tikchiuayaj. Niman maka san matiknemilijtokan tlen xkuajli tiknekiskiaj tikchiuaskej (Filip. 4:8; Col. 3:2). w23.01 10 párrs. 7, 9, 10

Uelis tikteititiskej ika titetlasojtlaj tla nochimej tikinnojnotsaj. Tejuamej tikinnojnotsaj akin oksekan ualeuaj, akin uejueyixtokej, akin xmás uejueyixtokej niman noijki akin kinopiliaj intomintsin niman akin xmás kinopiliaj. Ijkuak ijkon tikchiuaj, tikpaleuijtokej Jehová pampa yejua “kineki nochi tlakatl ma makisa niman ma kimati on tlen melauak” (1 Tim. 2:4). Noijki uelis tikteititiskej ika tiktlasojtlaj Jehová niman Jesús tla tikintlasojtlaj tokniuan. ¿Kenon uelis tikteititiskej ika tikintlasojtlaj tokniuan? Tla titajmanaj inpampa niman tla tikinpaleuiyaj ijkuak kixnamikij tlen ouijtika. Noijki tla tikinyolseuiyaj ijkuak nomijkatiaj, tla tikomintlajpalouaj ijkuak kualoj niman tla tokojtiliaj tikinyolchikauaskej ijkuak tikitaskej ika melak najmanaj (2 Cor. 1:​3-7; 1 Tes. 5:​11, 14). Tikmatstokej ika “ioración on yolmelajki tlakatl yejuan ikan nochi iyojlo kichiua, sanoyej kipiya poder”, ika yejon, noijki tikchiuaj teoyotl inpampa tokniuan (Sant. 5:16). w23.01 28, 29 párrs. 7, 8

Akin kalchijchiua, ajsi se tiempo ijkuak más kuajli kinchijchiua kaltin. Tla tejuamej tokojtiliaj tikinyolchikauaskej tokniuan, ajsis se tiempo ijkuak más tiueliskej titeyolchikauaskej. ¿Kenon uelis tikinyolchikauaskej tokniuan? Matikimijlikan kenon sekimej itekipanojkauan Jehová otlaxikojkej, ijkon yejuamej uelis kitaskej ika noijki uelis tlaxikoskej (Heb. 11:​32-35; 12:1). Nochipa matikitakan tlen kuajli kichiuaj oksekimej niman maka teuan matokamauisokikan. Tla ijkon tikchiuaj, nochipa onias yolseuilistli ipan tlanechikojli (Efes. 4:3). Noijki matikimijlikan tokniuan tlen tiuelij ipan Biblia, matikimititikan kenon uelis nomachtiskej niman matikinpaleuikan akin xok más kuajli nouikaj iuan Jehová. Tejuamej noijki uelis ijkon tiyolpakiskej tla tikinyolchikauaj tokniuan. Se kajli sakin ijtlakaui, san ika, ijkuak tikinyolchikauaj tokniuan yejon nochipa uelis kinpaleuis. w22.08 22 párr. 6; 25 párrs. 17, 18

Jesús okijto ika uelis tikasikamatiskej Biblia tla melak kuajli titlanemiliaj itech tlen tikamapouaj (Mat. 24:15). ¿Kenon uelis tikchiuaskej yejuin? Noneki titlanemiliskej itech kenon tlen tikamapoujtokej notlajtolnamiki iuan okseki tlaxeloltin itech Biblia. Noijki noneki tikitaskej tlen xnimantsin nasikamati. Niman ijkon ken Jesús okijto, tla kuajli titlanemiliaj itech tlen tikamapouaj ipan Biblia, tikinmasikamatiskej teotlajtoltin tlen ompa uajnestiuej. Tla ijkon tikchiuaj, Biblia melak techpaleuis. Jehová kinpaleuiya itekipanojkauan matlanemilikan itech tlen kiamapouaj. Ika yejon, noneki tikchiuiliskej teoyotl niman tiktlajtlaniliskej matechpaleui. San ika, xsan noneki tikchiuaskej teoyotl. Noijki noneki san yolik tikpouaskej Biblia niman tikitaskej kenon tlen tikamapoujtokej notlajtolnamiki ika tlen yotiuelkaj. Tla tomachtiaj, uelis tikasikamatiskej tlen kijtoua Biblia niman noijki tikitaskej kenon uelis tikchiuaskej tlen tiuelij (Heb. 5:14). Tla kuajli titlanemiliaj ijkuak tikamapouaj Biblia, más kuajli tikasikamatiskej. w23.02 10 párrs. 7, 8

Xkonnemili ika se moamigo mitstlayokolia se kajli. Achijtsin yotlapalkis niman kipiya seki tlen yoijtlakauj. Maski ijkon, yejuin kajli melak patioj. ¿Xmelak ika tikpatiojkaitaskiaj niman tiktlajpiyaskiaj yejuin kajli? Noijki ijkon, Jehová yotechtlayokoli itlaj tlen melak patioj: tonemilis. Jehová melak kipatiojkaita tonemilis hasta okitemakak iKonetsin para mamiki topampa (Juan 3:16). Itech Jehová “kisa nochi nemilistli” (Sal. 36:9). Yejon tlen kijtosnekiya apóstol Pablo ijkuak okijto: “Yejua otechmakak tinochimej tijyo, tonemilis, niman nochi tlajtlamach” (Hech. 17:​25, 28). Yejua ika, uelis tikijtoskej ika tonemilis se itetlayokolil toTajtsin. Yejua techtlasojtla niman techmaka nochi tlen noneki para tiyoltoskej (Hech. 14:​15-17). San ika, Jehová xkichiuas matiyoltokan ika milagros. Yejua kineki sa no tejuamej matotlajpiyakan para maka matikualokan niman para machikaujto totlaneltokil (2 Cor. 7:1). w23.02 20 párrs. 1, 2

¡Melak tiktlasojkamachiliaj Jehová pampa otechtlayokoli Biblia! Ompa Jehová techijlia tlenon uelis tikchiuaskej ijkuak tikixnamikiskej tlen ouijtika. Noijki techijlia ika kualtsin tinemiskej ika tlayekapan. Niman melak ueyi kijtosneki ika ipan Biblia Jehová techititia kenon yejua. Ijkuak titlanemiliaj itech tlen kualtsin kichiua Jehová, más tiktlasojtlaj. Noijki, tiknekij itech tonisiuiskej niman iuan touikaskej (Sal. 25:14). Jehová kineki ika tlaltikpakchanejkej makixmatikan. Yeuejkaui, Jehová okichiuj ika sekimej tlakamej matlatemikikan, makinpiyakan tlatlachalistin niman hasta okintekitilti iluikaktekitkej niman ijkon techijlis kenon yejua (Núm. 12:6; Hech. 10:​3, 4). San ika, tla xnoijkuiloskia tlen okitemijkej yejon tlakamej, tlatlachalistin tlen okipixkej noso tlen okijtojkej iluikaktekitkej, tejuamej xueliskia tomachtiskiaj itech yejuin. Ika yejon, Jehová okinnauati sekimej tlakamej makijkuilokan “ipan sen amamoxtli” tlen yejua kinekiya matikmatikan. Uelis kuajli tikmatstoskej ika Jehová okichiuj kuajli manoijkuilo tlen kinekiya matikmatikan pampa “iojui sanoyej melajki” (Sal. 18:30). w23.02 2 párrs. 1, 2

Xchiua tlen más kichikauas motlaneltok (Efes. 3:16). ¿Tlenon uelis tikchiuas? Kanaj uelis san moselti timomachtis nochi semanas niman mojmostla tikamapouas moBiblia (Sal. 1:​2, 3). Noso kanaj uelis más miyekpa tikchiuas teoyotl niman tikijlis Jehová nochi tlen tikmachilia. Noso kanaj uelis más kuajli tiktekitiltis motiempo niman más kuajli tiktlapejpenis tlen ika timoyolpaktis (Efes. 5:​15, 16). Ijkuak tikinpaleuiya oksekimej, más chikaui motlaneltok. ¿Kenon uelis titepaleuis? Tla ipan motlanechikol nemij tokniuan akin iueuentsitsintin noso akin kualoj, uelis tikomintlakouilis noso tikinpaleuis mauelikan makintekitiltikan inteléfonos noso intabletas. Noijki uelis tikimititis oksekimej ika tikintlasojtla tla tikimijlia tlen kualtsin kichiuas toTajtsin (Mat. 9:​36, 37). Noijki xkita tla uelis más chikauak tiktekichiuilis Jehová ipan ikalpan. w22.08 6 párrs. 16, 17