1 Korindro
6 Na faʼudu ami, hana wa miʼohe föna zanguhuku enaʼö niha baero zanguhuku yaʼami, hana wa tenga niha niʼamoniʼö? 2 Hadia lö aboto ba dödömi wa niha niʼamoniʼö zanguhuku ulidanö? Na yaʼami zanguhuku ulidanö andre, hadia tebai miʼasiwai gamadöniwa side-ide? 3 Hadia lö aboto ba dödömi wa yaʼita göi zanguhuku ira malaʼika? Tobali hana wa lö miʼasiwai manö gabula dödö salua iadaʼa? 4 Na so gabula dödö salua iadaʼa sinangea mufatunö, hadia mibaliʼö sanguhuku yaʼami niha niʼositengagö ba mbanua niha Keriso? 5 Uwaʼö daʼö ba wangailasi yaʼami. Hadia lö hadöi ba gotaluami si so faʼatua-tua si tola mangatulöʼö fatötöisa ba gotalua ndra talifusö? 6 Hana wa milawa dalifusömi föna zanguhuku ba föna niha baero?
7 Sindruhunia no kala ami na miʼohe gamadöniwami andrö föna zanguhuku. Hana wa lö mitaha dödömi na lafatörö khömi zi lö atulö? Hana wa lö mitehe na lalimo ami? 8 Yaʼami sindruhunia zi lö atulö ba solimo talifusömi andrö!
9 Hadia lö aboto ba dödömi wa niha si lö atulö tebai tefaʼamöi ba Wamatörö Lowalangi? Böi telimo ami. Niha sohorö,* sanömba adu, sohoröni donga zodonga, ira matua niʼogunaʼö ba wohorö, ira matua sohoröni ira matua, 10 sanagö, samaʼuʼu, tuka mabu, sangoʼaya, ba sorabu, tebai tefaʼamöi ba Wamatörö Lowalangi. 11 So ba gotaluami me föna zamalua simane daʼö. Iadaʼa no tesasai ami, teʼamoniʼö, ba no tefaduhuʼö ami ba döi Zoʼaya yaʼita Yesu Keriso si fao eheha niʼamoniʼö moroi khö Lowalangida.
12 Moloʼö yaʼo, fefu hadia ia tola mufalua. Hizaʼi lö fefu oi moguna. Hewaʼae na moloʼö yaʼo tola ufalua fefu hadia ia, lö utehe iʼosawuyu ndraʼo hadia ia. 13 Ba mbetuʼa numalö gö, ba betuʼa andrö ba no naha gö. Hizaʼi, iheta fefu daʼö Lowalangi. Tenga ba wamalua fohorö-horö* mboto andrö, hizaʼi ba wamalua halöwö Zoʼaya, ba Soʼaya zondrorogö boto. 14 Lowalangi zanusugi Soʼaya, ba yaʼia zanusugi yaʼita dania ba waʼabölönia.
15 Hadia lö aboto ba dödömi wa botomi andrö ndroto-ndroto Keriso? Hadia uhalö ndroto-ndroto Keriso ba uʼosambuaʼö ba zohorö-horö? Tatu löʼö! 16 Hadia lö aboto ba dödömi wa ha sambua boto niha sorudu ba zohorö-horö andrö? No irai iwaʼö Lowalangi, ”Ha sambua boto ira.” 17 Sindruhunia, niha si hasara tödö ba khö Zoʼaya, ha sambua lala wangera-ngerara. 18 Miʼaliokö wanimba amuata wohorö!* Lö itaʼunöisi mboto horö tanö böʼö, hizaʼi fohorö itaʼunöisi mboto. 19 Hadia lö miʼila wa botomi andrö osali geheha niʼamoniʼö si so ba waʼaurimi, nitemami moroi khö Lowalangi? Mendrua manö me tenga khömi mbotomi, 20 noa sa ebua mege mbölimi. Andrö miʼogunaʼö mbotomi ba wamolakhömi Lowalangi.