2 Korindro

6 Börö me falulu fohalöwö ndraʼaga khö Lowalangi, maʼandrö enaʼö böi mibaliʼö zaya-zaya gölö waʼasökhi dödö sebua si no mitema moroi khö Lowalangi. 2 Imane, ”Me inötö omasi ndraʼo ufahowuʼö ndraʼugö, ufondrondrongo niwaʼöu. Me luo wangorifi utolo ndraʼugö.” Iadaʼa ginötö wamahowuʼö yaʼita. Iadaʼa ginötö wangorifi andrö.

3 Ba ngawalö hadia ia, lö omasiga mafobörö wangala ba niha, enaʼö lö teʼoʼaya halöwö nifaluama khö Lowalangi. 4 Hizaʼi, ba ngawalö hadia ia, omasiga maforomaʼö wa sangai halöwö ndraʼaga khö Lowalangi. Mataögö ngawalö wanandraigö, famakao, faʼambö soguna, ba faʼatosasa. 5 Laböbözi ndraʼaga, labeʼe ba gurunga, lafaʼuʼu, maforege wohalöwö, asese lö mörö, ba asese lö manga. 6 Matörö lala sohau-hau ba mafaudugö waʼaurima ba waʼaboto ba dödö, faʼebolo dödö, faʼasökhi dödö, maʼoʼö niwaʼö geheha niʼamoniʼö, lö mamini tödö ba waʼomasi, 7 matörö zindruhu na fahuhuo, maʼodaligö waʼabölö Lowalangi, maʼogunaʼö wangöna satulö ba gambölö* hegöi ba gabera.* 8 Lafosumange ndraʼaga ba laʼoʼaya, laböbögö zi lö duhu ba lasuno göi, labaliʼö ndraʼaga si falimo sindruhunia sa lö falimo, 9 laʼosilömangilagö ndraʼaga sindruhunia laʼila, hulö zi mate sindruhunia sa sauri, labaliʼö ndraʼaga nihuku sindruhunia lö si mate, 10 lawalinga sabu tödö sindruhunia somuso tödö, lawalinga si numana sindruhunia ato niha si no mafoʼokhöta, lawalinga niha si löʼö sindruhunia ahori so fefu.

11 Yaʼami ira talifusö ba Gorindro, lö nibiniʼöma khömi wangombakha ba no maʼeboloʼö wamokai tödöma khömi. 12 Lö mabiniʼö wangomasiʼö yaʼami, hizaʼi mibiniʼö waʼomasimi khöma. 13 Fahuhuo ndraʼo khömi hulö ba nonogu samösa, mifalua göi simane daʼö khöma. Miʼeboloʼö göi wamokai tödömi.

14 Böi mifaogö ami ba niha si tenga si sara lala wamati.* Hadia faböbö ira waʼatulö zi lö atulö? Mazui, hadia fagölö ira haga zogömi-gömi? 15 Hadia tola fao Keriso khö Mbeliali?* Mazui, hadia fagölö ira niha samati zi lö mamati? 16 Hadia so gamakhaita nose Lowalangi ba nomo nadu? Osali Lowalangi sauri ita, simane niwaʼö Lowalangi, ”Toröi ndraʼo khöra ba uʼiagö gotaluara. Tobali ndraʼo Lowalangira ba banuagu ira.” 17 ”’Andrö, miheta ami khöra ba mifabali ami,’ iwaʼö Yehowa, ’ba böi mibabaya saʼae zi raʼiö.’” ”’Awena dania utema ami.’” 18 ”’Tobali ndraʼo Amami, ba onogu matua ami ba onogu alawe,’ iwaʼö Yehowa Fondrege Zabölö.”