Efeso
6 He yaʼami iraono, miʼoʼö li zatuami me daʼö zomasi Lowalangi, daʼö sa zatulö. 2 ”Fosumange namau awö ninau”, daʼö goroisa siföföna si fao amabuʼula li: 3 ”Enaʼö ohahau dödöu* ba anau nosou ba gulidanö.” 4 Yaʼami ira ama, böi miʼandrö wönu ndraonomi. Miʼebuaʼö ira ba mibeʼe wotu si fao fanuturu lala moroi khö Yehowa.
5 Yaʼami sawuyu, miʼoʼö li zokhö yaʼami ba gulidanö andre si fao faʼataʼu, fanizi-nizi ba famosumange soroi ba dödö, simane foloʼömi Keriso, 6 tenga ha ba zanehe niha enaʼö omuso dödöra, hizaʼi simane sawuyu Keriso samalua somasi Lowalangi soroi ba dödö. 7 Mihalö halöwö zokhö yaʼami soroi ba dödö, hulö na khö Yehowa, tenga ba niha, 8 börö me miʼila wa dozi niha latema zulö moroi khö Yehowa ba ngawalö zi sökhi nifaluara, he sawuyu, he niʼefaʼö. 9 Baero daʼö yaʼami sokhö, simane daʼö göi mifalua khö zawuyumi, böi mifetaʼu ira, börö me faoma so Zokhö yaʼami ba zorugo, ba lö ebua dödö zambuana ia.
10 Ba gafuriata, böi miböhöli wangalui faʼabölö moroi khö Lowalangi, börö me sahöli-höli dödöda waʼabölönia andrö. 11 Miʼogunaʼö fefu wangöna ba wasuwöta moroi khö Lowalangi, enaʼö tola abeʼe ami ba wolawa faʼonekhe Gafökha, 12 tenga sa fasöndrata ba niha wasöndratada, no fasöndrata ba wolawa samatörö, wolawa ira sondröniaʼö, wolawa ira samatörö ulidanö sogömi-gömi andre, wolawa malaʼika si lö sökhi ba dalu mbanua. 13 Andrö, mihalö fefu wangöna ba wasuwöta andrö moroi khö Lowalangi, enaʼö tola milawa na baŵa si lö sökhi, ba lö tebulö ami me no miʼasiwai fefu zinangea mifalua.
14 Ba miʼabeʼeʼö ami, miʼogunaʼö mböbö löwi zindruhu andrö, ba baru siʼöli* waʼatulö dödö, 15 ba miʼogunaʼö mbadagahe tandra wa no mifaʼanö ami ba wanuriaigö turia somuso dödö sanandrösa ba waʼatulö. 16 Baero daʼö, mihalö mbaluse sebua yaʼia daʼö famati enaʼö tola mitaha nono wana soʼalitö andrö khö Zatana.* 17 Mitema dakula siʼöli fangorifi, ba föda eheha, yaʼia daʼö taromali Lowalangi. 18 Fefu ngawalö wangandrö ba foʼangaröfili, böi miböhöli wamalua yaʼia ero inötö si fao fanuturu lala moroi ba geheha niʼamoniʼö. Böi miförö ba böi miböhöli wangandrö salahi niha niʼamoniʼö. 19 Miʼangandrö salahigu enaʼö tola ubokai mbawagu ba wahuhuosa ba lö ataʼu ndraʼo wangombakha si tobini niʼamoniʼö andrö sanandrösa ba duria somuso dödö, 20 nituriaigögu me no tobali ndraʼo tenge-tenge si no murate, enaʼö barani ndraʼo fahuhuo sanandrösa ba daʼö, simane sinangeania.
21 Tikhiko, talifusö niʼomasiʼö si lö faröi ba wangai halöwö Zoʼaya, ifatunö khömi fefu zalua khögu hegöi turiagu. 22 Ufatenge ia khömi enaʼö miʼila hewisa ndraʼaga, ba enaʼö tola irara dödömi.
23 Yaʼami ira talifusö, yamitema waʼohahau dödö, faʼomasi ba famati moroi khö Namada Lowalangi, ba Soʼaya yaʼita Yesu Keriso. 24 Yafao khömi waʼasökhi dödö sebua dozi sangokhögö faʼomasi sindruhu khö Zoʼaya yaʼita Yesu Keriso.