Fama’ele’ö

7 Aefa daʼö, uʼila daöfa malaʼika si zizio ba zi öfa watalinga danö. Lataha zi öfa nangi ba gulidanö enaʼö lö hadöi angi sanöröi tanö, asi, mazui töla geu. 2 Ba uʼila malaʼika tanö böʼö moroi ba gatumbukha si möi miyawa. Iʼohe wamotandro moroi khö Lowalangi sauri. Ba muʼao ia khö ndra malaʼika si daöfa andrö si no tetehegö ba wamakiko ulidanö ba asi 3 imane, ”Böi fakiko gulidanö, asi, mazui töla geu irege awai mabeʼe wamotandro ba gangango ndra sawuyu andrö khö Lowalangida.”

4 Urongo wa so 144.000 waʼato zanema famotandro andrö moroi ba mado ndraono Gizaraʼeli.

9 Aefa daʼö, uʼila ngawawa zato sibai si tebai iʼerai niha moroi ba ngawalö soi, mado, banua, hegöi li. No lafake mbaru sebua safusi ba mozizio ira föna dadaoma hegöi föna Nono Mbiri-biri, ba no lagogohe mbulu nohi. 10 Lö laböhöli weʼao lamane, ”No matema wangorifi moroi khö Lowalangima, si dadao ba dadaoma andrö, ba moroi ba Nono Mbiri-biri.”

11 Mozizio fefu ndra malaʼika, ira satua sokubaloi, hegöi kerubi si daöfa, lafasui dadaoma andrö. Mangalulu ira föna dadaoma ba lafosumange Lowalangi 12 lamane, ”Yaduhu! Khö Lowalangida fefu lakhömi, fanuno, faʼatua-tua, fangandrö saohagölö, sumange, kuaso, ba faʼabölö irugi zi lö aetu. Yaduhu.”

13 So samösa zatua sokubaloi sanofu khögu, ”Haniha zamake nukha sebua safusi andrö? Hezo moroi ira?” 14 Iʼanemaiʼö utema linia, ”Ha yaʼugö zangila Pa.” Imane khögu, ”Yaʼira andrö si no teʼorifi moroi ba wamakao sabölö-bölö. No lasasai nukhara sebua ba laʼafusiʼö ba ndro Nono Mbiri-biri. 15 Daʼö mbörö wa so ira föna dadaoma Lowalangi. Lafalua halöwö niʼamoniʼö khönia bongi maʼökhö ba gosalinia. Si dadao ba dadaoma andrö zolumöʼö yaʼira. 16 Lö saʼae olofo ira mazui owökhi dödöra. Lö saʼae ikhozi ira haga luo mazui sino siriri-riri, 17 börö me ikubaloi ira Ono Mbiri-biri andrö sahatö ba dadaoma. Iʼohe ira ba gumbu nidanö fangorifi. Ba iʼosi Lowalangi fefu daŵa hörö andrö ba höröra.”