”Faoga Khömi”

1, 2. (a) Hadia zalua ba ginötöda andre niwaʼö Yehowa? (b) Hadia wanofu-nofu nifatunöda ba duho daʼa? (Faigi gambara ba wamobörö wamahaʼö.)

IMANE Yehowa wa ba ginötöda andre, ”Dafulu niha, hadia lira fefu, li niha baero, zondraʼu ahe mbaru niha Yehuda si hasamösa, ba sangumaʼö: ’Faoga khömi, me no marongo, wa lö aefa-aefa khömi Lowalangi!’” (Zakh. 8:23, NW ) ”Niha Yehuda” eluahania niha nibayoini Lowalangi. Lafotöi ira ”ndraono Gizaraʼeli khö Lowalangi”. (Gal. 6:16) ’Niha si dafulu’ eluahania niha si so fanötöna sauri ba gulidanö sagötö faʼara. Aboto ba dödöra wa no ifahowuʼö ngawawa nibayoini andre Yehowa ba laʼila wa no sambua töi sebua wefao khöra ba wamosumange yaʼia.

² Simane Zakharia, imane Yesu wa ha sambalö teʼosambuaʼö nono mbanua Lowalangi. Imane wangumaʼö wa niha sanötöna sauri ba zorugo lafotöi ira ”rorogöfö gubalo si lö atoto”, niha sanötöna sauri ba gulidanö lafotöi ira ”biri-biri böʼö”. Hizaʼi, imane Yesu wa tobali ira ”sambawa nikubaloi” ba ”samösa gubalo” niʼoʼöra. (Luk. 12:32; Yoh. 10:16) Börö me so dombua ngawawa andrö, tola manö so zanofu-nofu: (1) Hadia moguna laʼila döi niha nibayoini ira biri-biri böʼö andrö? (2) Hewisa zindruhunia gamuata niha nibayoini? (3) Hewisa dödögu na so ba gotalua ndra talifusöda si manga roti ba samadu agu ba ginötö Wanörö Tödö faʼamate Yesu? (4) Hadia moguna aombö dödögu na itugu ato zi manga roti ba samadu agu ba ginötö Wanörö Tödö faʼamate Yesu? So wanema linia ba duho daʼa.

HADIA MOGUNA TAʼILA DÖI NIHA SI NO MUBAYOINI?

3. Hana wa lö taʼila haniha zi 144.000 andrö?

³ Hadia moguna laʼila döi niha nibayoini ira biri-biri böʼö andrö? Löʼö. Hadia mbörö? Börö me lö tatu na latema luora ma löʼö. Hewaʼae no ifili ira Lowalangi weʼamöi ba zorugo, awena latema luora na lö faröi ira. Iʼila Satana daʼö, ba iʼogunaʼö ’zamaʼeleʼö faya’ ba ”wamaelungu” yaʼira. (Mat. 24:24) Fatua lö ifaduhuʼö khöra Yehowa wa yaʼira andrö no niha si lö faröi, tebai lamane dödöra wa ha sambalö latema luora.^[1] Ibeʼe wamontandro safuria khöra Yehowa fatua lö mate ira mazui fatua lö tebörögö ”wamakao sabölö-bölö”.​—Fam. 2:10; 7:3, 14.

4. Hewisa wa tola ’fao’ mbiri-biri tanö böʼö khö ndra niha nibayoini na tebai muʼila döira?

⁴ Hewisa wa tola ’fao’ mbiri-biri tanö böʼö khö ndra niha nibayoini na tebai muʼila döira? Imane Sura Niʼamoniʼö wa dafulu niha ”zondraʼu ahe mbaru niha Yehuda si ha samösa, ba sangumaʼö: Faoga khömi, me no marongo, wa lö aefa-aefa khömi Lowalangi”. Ha samösa niha Yehuda nitötöi ba ayati Zura Niʼamoniʼö andre. Tobali, ngawua wehede ”khömi” eluahania tenga ha samösa. Ba daʼö taʼila wa so ngawawa niha niʼamoniʼö niʼamaedolagö niha Yehuda. No aboto ba dödö biri-biri tanö böʼö wa fao ira ba ngawawa andrö ba wamosumange Yehowa. Lö moguna laʼila döi niha si fao ba ngawawa andrö hegöi ba wanara lahera. Iʼombakhaʼö khöda Sura Niʼamoniʼö wa ha Yesu Zolohe yaʼita, ba ha yaʼia niʼoʼöda.​—Mat. 23:10.

HEWISA ZINDRUHUNIA GAMUATA NIHA NIBAYOINI?

5. Hadia wamangelama sinangea laʼangeraigö ira niha nibayoini, ba hadia mbörö?

⁵ Moguna lahaogö woʼangeraigö ira niha nibayoini wamangelama nisura ba I Korindrö 11:27-29. (Baso.) Hadia geluaha ayati daʼa? Na lö larorogö wahuwusara khö Yehowa ba faröi ira, eluahania ”tenga sinangea” ira ba wemanga roti hegöi ba wamadu agu Fanörö Tödö faʼamate Yesu. (Heb. 6:4-6; 10:26-29) Famangelama andrö tobali famasugi ba dödö khö ndra niha nibayoini wa tebai faröi ira na omasi latema ”luo zi möna andrö, ba nikaoni Lowalangi niha, moroi si yawa, ba khö Keriso Yesu”.​—Fil. 3:13-16.

6. Hewisa zindruhunia gamuata niha Keriso nibayoini?

⁶ Imane Faulo ba niha Keriso nibayoini, ”Yaʼo nikuru andre, ba khö Zoʼaya, enaʼö mitörö zinangea lala nikaoni andrö, me no mukaoni ami.” Hewisa wamaluara daʼö? Itutunö Faulo, ”Ya aʼoi so wa lö fayawa ami, awö waʼasökhi dödö, awö waʼebolo dödö, mibologö dödömi khö nawömi, miʼomasiʼö ia; miʼoigö dödömi, enaʼö lö tebulö wahasara dödö, enaʼö faböʼö ami, famaböbö faʼatulö andrö.” (Ef. 4:1-3) Moguna geheha niʼamoniʼö moroi khö Yehowa ba wanolo ono mbanuania, enaʼö so khöra wangide-ngideʼö, tenga enaʼö so wayawasa. (Kol. 3:12) Lö ba dödö niha nibayoini wangumaʼö wa abölö tohude ira moroi ba niha böʼö. Aboto göi ba dödöra wa lö abölö oya geheha nibeʼe Yehowa khöra moroi ba nono mbanuania tanö böʼö. Ba lö lamane dödöra wa abölö abakha waʼaboto ba dödöra Zura Niʼamoniʼö moroi ba niha tanö böʼö. Lö irai lawaʼö ba zi samösa niha wa no tebayoini niha andrö ba tola ibörögö wemanga roti hegöi ba wamadu agu ba Wanörö Tödö faʼamate Yesu. Tobali, so khöra wangide-ngideʼö hegöi faʼaboto ba dödö wa ha Yehowa zi tola mamili haniha zi möi ba zorugo.

7, 8. Hadia zi tebai latötöna ira niha Keriso si no labayoini ba hadia mbörö?

⁷ Hewaʼae na no tefili niha nibayoini weʼamöi ba zorugo, lö latötöna enaʼö lafosumange ira niha böʼö. (Ef. 1:18, 19; baso Filifi 2:2, 3.) Lö laʼombakhaʼö göi ba niha wa no ibayoini ira Yehowa. Börö daʼö, lö ahöli-höli dödö niha nibayoini na so zi lö iʼanemaiʼö faduhu dödö wa no tebayoini ira. Aboto ba dödöra wa no ifahaʼö ita Sura Niʼamoniʼö, enaʼö böi alio tafaduhusi tödö na so niha sangumaʼö wa no ibeʼe khönia Lowalangi halöwö si sökhi. (Fam. 2:2) Börö me lö itötöna enaʼö lafosumange ia niha böʼö, tatu manö lö omasi idunö-dunö ba niha wa no tebayoini ia. Lö göi faʼasiliawa khönia irege idunö-dunö ba niha hadia manö halöwö nifaluania dania ba zorugo.​—I Kor. 1:28, 29; baso I Korindro 4:6-8.

⁸ Lö lamane ira niha Keriso nibayoini wa ha khö nawöra si no tebayoini manö tola fahuwu ira. Lö laʼalu-alui niha Keriso si no tebayoini tanö böʼö ba wodunö-dunö halöwö nifaluara dania mazui owulo ira ba woʼabakhaiʼö ba dödöra nösi Zura Niʼamoniʼö. (Gal. 1:15-17) Na lafalua daʼö, lö hadöi fahasara dödö ba gangowuloa ba no latandrawaisi geheha niʼamoniʼö, si möi fanolo nono mbanua Lowalangi ba wanöndra faʼohahau dödö hegöi fahasara dödö.​—Baso Roma 16:17, 18.

HEWISA NDRAʼUGÖ KHÖRA?

9. Hana wa moguna taʼangenanöi laguda khö ndra talifusöda si manga roti ba samadu agu ba Wanörö Tödö faʼamate Yesu? (Faigi kotak ”Faʼomasi Andrö, ’Lö Ilau zi Lö Moadu.’”)

⁹ Hewisa ndraʼugö khö ndra talifusöda si no mubayoini? Imane Yesu khö ndra nifahaʼönia, ”Si fatalifusö ami fefu.” Itohugö nasa wangumaʼö, ”Ba samaliʼö salawa yaʼia, ba niʼide-ideʼö dania, ba sangide-ngideʼö yaʼia ba nibaliʼö salawa.” (Mat. 23:8-12) Börö daʼö, fasala na tasuno-suno sibai zi samösa niha hewaʼae na yaʼia andrö niha Keriso nibayoini. Me idunö-dunö khöda Sura Niʼamoniʼö sanandrösa khö ndra satua sokubaloi, ifarou ita ba woloʼö famatira. Lö ifarou ita enaʼö tabaliʼö zi samösa niha tobali sondröniaʼö yaʼita. (Heb. 13:7) Sindruhu sa wa no iwaʼö khöda Sura Niʼamoniʼö wa so niha ”nifodua winaeta zumangera”. Andrö wa iwaʼö daʼö börö me yaʼira ”sangehaogö fangai halöwöra” ba ”zi so halöwö fahuhuosa ba famahaʼö”, tenga börö me no tebayoini ira. (I Tim. 5:17) Na talafo tasuno-suno ba taʼameʼegö tödö sibai niha nibayoini, hulö na taʼailasi ira. Tola manö nasa tumbu ba dödöra waʼasiliawa. (Rom. 12:3) Tatu manö, lö omasi ita na teʼala ndra talifusöda niha Keriso nibayoini!​—Luk. 17:2.

10. Hewisa wangoromaʼöu wa öʼosinangegö niha Keriso nibayoini?

¹⁰ Hewisa wangoromaʼöda wa taʼosinangegö niha nibayoini Yehowa? Lö tasofu-sofu khöra hewisa me tebayoini ira. Ha yaʼira zangila daʼö, tenga sinangea taʼila. (I Tes. 4:11; II Tes. 3:11) Lö göi tamane wa no tebayoini woʼomora, satuara, mazui ösi nomora tanö böʼö. Tenga moroi ba nösi nomonia isöndra luonia zi samösa niha. (I Tes. 2:12) Böi tabeʼe wanofu si tola mangafökhöiʼö tödöra. Duma-dumania, böi tasofu khö dalifusöda hewisa dödönia na auri ia ba gulidanö sagötö faʼara hewaʼae lö fao ia khö woʼomonia. Faduhu dödöda wa ba gulidanö si bohou, ’iʼabusoiʼö fefu zauri somasi niha’ Yehowa.​—Zin. 145:16.

11. Hewisa wa terorogö wamatida na lö ’tasuno niha ba zi so ira’?

¹¹ Na lö taʼalawaʼö niha nibayoini moroi ba niha tanö böʼö, no tarorogö wamatida. Hadia mbörö? Iʼombakhaʼö khöda Sura Niʼamoniʼö wa tola manö so ”dalifusö faya” ba gangowuloa, sangumaʼö wa no tebayoini ira. (Gal. 2:4, 5; I Yoh. 2:19) Te so ösa niha nibayoini si no faröi. (Mat. 25:10-12; II Fet. 2:20, 21) Hewaʼae yaʼira andrö niha nibayoini, niha si tehöngö, mazui niha si no arara ba wamosumange Yehowa, lö ’tasuno ira’ ba lö tatara lahera. Hadia mbörö? Na faröi ira mazui laröi gangowuloa, lö taya wamatida khö Yehowa mazui lö taböhöli ba wamosumange yaʼia.​—Yud. 16.

HADIA MOGUNA AOMBÖ DÖDÖDA BA WAʼATORA?

12, 13. Hana wa lö moguna aombö dödöda ba waʼato niha zi manga roti ba samadu agu ba Wanörö Tödö faʼamate Yesu?

¹² Itugu alö waʼoya niha nibayoini si manga roti ba samadu agu ba Wanörö Tödö faʼamate Yesu ba zi haʼuga fakhe. Hizaʼi, barö-barö daʼa, itugu monönö zui waʼatora ero röfi. Hadia moguna aombö dödöda? Löʼö. Datafaigi hadia mbörö.

¹³ ’Aboto ba dödö Yehowa dana khönia andrö.’ (II Tim. 2:19) Lö sangila haniha zindruhunia niha nibayoini andrö, hewaʼae so dalifusöda sangerai-ngerai hawaʼato niha si manga roti ba samadu agu ba Wanörö Tödö faʼamate Yesu. Ha Yehowa zangila. Ba gotaluara andrö, so manö zangumaʼö wa no tebayoini ira, sindruhunia sa löʼö. Duma-dumania, so zi toʼölö wemanga roti hegöi ba wamadu agu. Hizaʼi, ba gafuriatania laböhöli. So göi zofökhö fangera-ngera ba lawalingagö fao ira khö Keriso wamatörö ba zorugo. Andrö, lö taʼila hawaʼato zindruhunia niha nibayoini zi tosai ba gulidanö.

14. Hadia niwaʼö Zura Niʼamoniʼö sanandrösa ba waʼato niha nibayoini zi so ba gulidanö na tebörö wamakao sabölö-bölö?

¹⁴ So niha nibayoini ba zi sagörö ulidanö na tohare Yesu wolohe yaʼira ba zorugo. Imane Sura Niʼamoniʼö wa ”ifatenge malaʼikania [Yesu], telau dorofe sebua li, ba laʼowuloi khönia nitutuyunia andrö, moroi ba zi fasui, iʼotarai wondrege danö, numalö ba wondregenia tanö sa”. (Mat. 24:31) Ifatunö nasa Sura Niʼamoniʼö wa ba ngaluo safuria, so ösa niha Keriso nibayoini ba gulidanö. (Fam. 12:17) Hizaʼi, lö nifatunönia hawaʼato ira zi toröi ba gulidanö na tebörögö wamakao sabölö-bölö.

15, 16. Hadia zinangea aboto ba dödöda sanandrösa ba zi 144.000 nifili Yehowa?

¹⁵ Yehowa zangai angetula hawaʼara ifili niha nibayoini. (Rom. 8:28-30) Ibörötaigö Yehowa wamili niha nibayoini me no aefa tesusugi Yesu. Fefu niha Keriso ba ndröfi si föföna no tebayoini. Ngaotu fakhe aefa daʼö, so zi lö moloʼö khö Keriso hewaʼae lamane wa yaʼira andrö niha Keriso. Hewaʼae simanö, ibayoini niha Keriso sindruhu si lö atoto Yehowa. Hulö simane niwaʼö Yesu, yaʼira andrö tanömö zi sökhi ba gotalua danömö ndruʼu. (Mat. 13:24-30) Ba ngaluo safuria, lö ibato wofili niha si 144.000 Yehowa.^[2] Tobali, na ifili ira Lowalangi fatua lö awai wamakao sabölö-bölö, tatu manö lö aombö dödöda ba gangetula Yehowa. (Yes. 45:9; Dan. 4:35; baso Roma 9:11, 16.)^[3] Moguna taʼangenanöi enaʼö lö mokökö ita simane nifalua sohalöwö khö zokhö kabu nagu sanandrösa ba luo nibeʼenia khö zafuria mohalöwö.​—Baso Mataiʼo 20:8-15.

¹⁶ Lö fefu niha nibayoini ba zorugo tobali ’sawuyu si lö faröi; ba satua-tua’. (Mat. 24:45-47) Simane me döfi si föföna, iadaʼa lö ato niʼogunaʼö Yehowa hegöi Yesu ba wameʼe gö, mazui ba wamahaʼö niha sato. Me döfi si föföna, lö ato moroi ba gotalua niha Keriso nibayoini niʼogunaʼö ba wanura Kitab-Kitab Yunani Kristen. Ba ginötö andre göi, tenga fefu niha Keriso si no mubayoini niʼogunaʼö ba wameʼe ’go nono mbanua Lowalangi na inötö wemanga’.

17. Hadia wamahaʼö si tola tahalö moroi ba duho daʼa?

¹⁷ Hadia wamahaʼö si tola tahalö moroi ba duho daʼa? No ihalö gangetula Yehowa ba wamaeʼe faʼauri si lö aetu ba gulidanö ba nono mbanuania, hegöi faʼauri ba zorugo ba niha si fao mamatörö awö Yesu. Ibeʼe luora Yehowa, he ba ”niha Yehuda” hegöi ba zi ”dafulu niha”, ba iʼandrö khöra enaʼö laʼoʼö goi-goi si fagölö ba böi faröi ira. Moguna so khöra wangide-ngideʼö. Moguna faoma lafosumange Yehowa ba so khöra wahasara dödö hegöi faʼohahau dödö. Börö me itugu ahatö waʼatua danö, böi taböhöli wamosumange Yehowa ba teʼosambuaʼö ita ba woloʼö Keriso.