2 Moze
17 Ba mofanö fefu ndraono Gizaraʼeli moroi ba Danö si Mate Sini.+ Iʼotarai daʼö, lafawuʼa-wuʼa ira sagötö wofanöra ba lala, simane niwaʼö Yehowa.+ Ba gafuriata, larugi Rafidi ba lafazökhi nosera ba daʼö,+ hizaʼi lö hadöi öra idanö.
2 Börö daʼö fasoso ndraono Gizaraʼeli khö Moze+ ba lamane, ”Beʼe öma nidanö.” Ba imane Moze, ”Hana wa fasoso ami khögu? Hana wa lö miböhöli wanandraigö Yehowa?”+ 3 Ba owökhi sibai dödö ndraono Gizaraʼeli ba lö laböhöli watahisa* khö Moze+ ba lamane, ”Hadia geluaha wa öheta ndraʼaga ba danö Miserai? Enaʼö mate ndraʼaga ba waʼowökhi dödö? Hasambalö mate ndraʼaga, iraonoma hegöi uriföma.” 4 Ba muʼao Moze khö Yehowa, ”Hadia zinangea ufalua khö ndra niha daʼa? Lö ara tö, ba latebu ndraʼo faoma kara!”
5 Imane Yehowa khö Moze, ”Ofanö ba ohe khöu ösa ndra sondröniaʼö iraono Gizaraʼeli, ba miʼowaö-waö föna niha sato. Ba ohe göi ziʼo niʼogunaʼöu me öbözi Nungo Nidanö Nilo.+ 6 Ba mosindro ndraʼo dania ba dete gara sebua si so ba Horebi. Bözi gara daʼö ba kalua dania nidanö. Ba labadu dania nidanö andrö iraono Gizaraʼeli.”+ Ba ifalua daʼö Moze föna ndra sondröniaʼö iraono Gizaraʼeli. 7 Ifotöi Moze nahia daʼö Masa*+ ba Meriba*+ börö me fasoso khönia ndraono Gizaraʼeli ba latandraigö Yehowa.+ Lamane, ”Hadia sindruhu fao khöda Yehowa?”
8 Ba tohare niha Gamaleki,+ lasuwö ndraono Gizaraʼeli ba Rafidi.+ 9 Imane Moze khö Yosua,+ ”Fili mato hadauga ndra matua ba milawa niha Gamaleki. Mosindro ndraʼo mahemolu ba zuzu hili, ba ugogohe ziʼo Lowalangi sindruhu.” 10 Ifalua Yosua niwaʼö Moze+ ba ilawa niha Gamaleki. Möi ba zuzu hili Moze, Aʼaroni, ba Huri.+
11 Me ifazawa dangania Moze, iraono Gizaraʼeli zi möna. Hizaʼi me ibeʼe tou dangania, niha Gamaleki zi möna. 12 Me ibörögö marase Moze, lahalö gara ira Aʼaroni faoma Huri ba lafedadao ia ba dete gara andrö. Ba latuwu danga Moze, samösa ba gabera ba samösa ba gambölö irege lö adada dangania ofeta aekhu luo. 13 Kala niha Gamaleki ba mbawa wöda Yosua awö zi fao khönia.+
14 Imane Yehowa khö Moze, ”Sura wehede daʼa ba mbuku si tobali famasugi ba dödö: ’Uhori dania niha Gamaleki ba gulidanö,* ba lö itörö tödö niha ira saʼae.’+ Fatunö göi khö Yosua.” 15 Aefa daʼö, ifazökhi Moze sambua naha wanunu sumange ba ibeʼe töi Yehowa-nisi.* 16 Imane Moze, ”Börö me molawa niha Gamaleki ba wamatörö Yehowa,*+ andrö wa isuwö ia Yehowa hegöi ngaʼötönia.”+