2 Moze
18 No irongo Yetero ere Midiano andrö, ama matua Moze+ fefu nifalua Lowalangi khö Moze hegöi ba nono mbanuania Izaraʼeli, hewisa wangeheta Yehowa iraono Gizaraʼeli ba danö Miserai.+ 2 Samuza inötö, iwaʼö Moze khö woʼomonia enaʼö ifuli ia ba nomo namania. Yetero zondrorogö Sifora foʼomo Moze 3 ba darua nononia matua.+ Töi ziaʼa Geresomo,*+ börö me no iwaʼö Moze, ”No tobali ndraʼo niha si fatewu ba soi böʼö,” 4 töi ziakhi Eliezeri,* börö me iwaʼö, ”Lowalangi namagu zanolo yaʼo, sangefaʼö yaʼo moroi ba wöda Waraʼo.”+
5 Börö daʼö, mofanö Yetero ama matua Moze fao ira woʼomo Moze awö ndraononia, möi ira ba nose Moze ba danö si mate, yaʼia daʼö ba hili nifili Lowalangi sindruhu.+ 6 Ba ifaʼoheʼö goroisania Yetero+ khö Moze wa möi ira dania wamalukhaisi yaʼia. Iʼohe woʼomo Moze hegöi iraononia si darua. 7 Iʼanemaiʼö ifalukhaisi namania matuania Moze, mangalulu ia ba faʼuma ira. Me no faoma lasofu duriara zamösana, awena möi ira ba nose.
8 Itutunö Moze khö namania matuania fefu nifalua Yehowa khö Waraʼo hegöi ba niha Miserai börö ndraono Gizaraʼeli,+ hadia manö wamakao nitöröra sagötö fofanöra ba lala,+ ba hewisa wanolo Yehowa yaʼira. 9 Omuso dödö Yetero ba ngawalö nifalua Yehowa ba ndraono Gizaraʼeli me iʼefaʼö ira moroi ba danö Miserai.* 10 Imane Yetero, ”Nisuno Yehowa sangefaʼö yaʼami ba Miserai hegöi khö Waraʼo. Iʼefaʼö ndraono Gizaraʼeli ba danga niha Miserai samatörö yaʼia. 11 Awena aboto ba dödögu iadaʼa wa abölö Yehowa moroi ba lowalangi tanö böʼö,+ börö nifaluania ba niha Miserai sasiliyawa ba nono mbanuania.” 12 Aefa daʼö, ibeʼe zumange nitunu Yetero hegöi sumange tanö böʼö khö Lowalangi. Tohare Gaʼaroni ba fefu zondröniaʼö iraono Gizaraʼeli fao ira manga khö nama matua Moze föna Lowalangi sindruhu.
13 Mahemolunia, modadao Moze simane si toʼölö ba wangai halöwö tobali sanguhuku ba soi daʼö. Lö laböhöli wamalukhaisi Moze iʼotarai sihulö wongi ofeta bongi. 14 Me iʼila Yetero hadia manö nifalua Moze, andrö wa manofu ia, ”Hana wa simane daʼa? Möi niha ba daʼa wangondrasi yaʼugö iʼotarai sihulö wongi ofeta bongi, ba hana wa ha yaʼugö zohalöwö?” 15 Imane Moze khö namania matuania, ”Börö me lö laböhöli weʼamöi khögu ba daʼa wangandrö fanuturu lala moroi khö Lowalangi. 16 Na so gabula dödö ba gotalua zi darua niha, ba möi ira khögu. Aefa daʼö, uʼosisiʼö gamadöniwara andrö enaʼö uʼila haniha zatulö ba gotaluara. Ufatunö khöra gangetula hegöi huku moroi khö Lowalangi sindruhu.”+
17 Ba imane Yetero khö Moze, ”Ambö baga nifaluamö andre. 18 Marase ndraʼugö ba marase göi niha si fao khöu, börö me talafo abua khöu noro daʼa, ba tebai öʼohe samösa. 19 Fondrondrongo niwaʼögu ba ifahowuʼö ndraʼugö Lowalangi.+ Yaʼugö zalahi ndraono Gizaraʼeli si fahuhuo khö Lowalangi sindruhu+ ba yaʼugö zamaʼema abula dödöra khö Lowalangi sindruhu.+ 20 Fahaʼö ira ba gamakhoita hegöi ba huku Lowalangi,+ ba fatunö göi khöra lala sinangea latörö ba hadia zinangea lafalua. 21 Hizaʼi, fili ndra matua Gizaraʼeli satua-tua,+ sangataʼufi Lowalangi, si tola mufaduhusi tödö, ba si lö mangalui hare ba zi lö atulö.+ Fataro ira tobali kumandru zi saribu, kumandru zi daotu, kumandru zi lima wulu, ba kumandru zi dafulu.+ 22 Yaʼira zangetuʼö huku ba niha na so zalua khöra. Khöu lafuli na so gabula dödö sebua,+ ba na so gabula dödö side-ide, yaʼira samösa zangetuʼö. Beʼe khöra ösa noromö enaʼö aoha khöu ba lö marase ndraʼugö.+ 23 Na öfalua daʼö ba na tefaudu moloʼö oroisa Lowalangi khöu, lö marase ndraʼugö ba mangawuli fefu niha si fao faʼomuso dödö.”
24 Fao dödö Moze ba wehede namania matuania ba iʼanemaiʼö ifalua. 25 Ifili Moze ndra matua satua-tua ba ndraono Gizaraʼeli ba ifataro ira tobali kumandru zi saribu, kumandru zi daotu, kumandru zi lima wulu ba kumandru zi dafulu. 26 Yaʼira zangetuʼö huku ba niha na so zalua khöra. Na so gabula dödö sebua ba latouʼö khö Moze,+ ba na so gabula dödö side-ide, yaʼira samösa zangetuʼö. 27 Aefa daʼö, möi ifasao baero namania matuania+ Moze ba mangawuli namania matuania ba soinia.