2 Moze

28 ”Kaoni gaʼamö Aʼaroni+ awö ndraononia+ sotöi Nadabi ba Abihu,+ Eleazari hegöi Itamari.+ Fasambua ira moroi ba ndraono Gizaraʼeli enaʼö tobali ira ere sangai halöwö khögu.+ 2 Fazökhi mbaru niʼamoniʼö khö gaʼamö Aʼaroni, si sökhi ba soadu khönia.+ 3 Kaoni fefu niha sonekhe si no ubeʼe faʼatua-tua.+ Andrö khöra wamazökhi baru Gaʼaroni enaʼö tola muʼamoniʼö ia tobali ere khögu.

4 ”Moguna lafazökhi mbalu-balu dötöʼa,+ nukha gere,*+ baru sanau si lö taʼio,+ baru sebua sokota-kota, böbö högö+ hegöi böbö löwi.+ Akha lafazökhi mbaru niʼamoniʼö andre khö gaʼau Aʼaroni hegöi khö ndraononia, enaʼö tola mohalöwö ira khögu tobali ere. 5 Lafazökhi daʼö moroi ba mbana anaʼa, bana sobalau, nukha si ungu laʼa-laʼa,* bana soyo,* ba nukha si sökhi.

6 ”Tefazökhi nukha gere* moroi ba nukha si sökhi si no landrandra, bana anaʼa, bana sobalau, nukha si ungu laʼa-laʼa* hegöi bana soyo. Moguna lasuzi daʼö fefu.+ 7 Enaʼö so dombua mbalu-balu galisi nifakhai ba mbalö tanö yawa si dombua ba nukha gere* andrö. 8 Fazökhi mböbö löwi+ ba nukha gere* andrö moroi ba gama-gama daʼö, yaʼia daʼö nukha si sökhi si no landrandra, bana anaʼa, bana sobalau, nukha si ungu laʼa-laʼa* hegöi bana soyo. Labeʼe daʼö ba nukha gere enaʼö fandroli wamöbö yaʼia.

9 ”Halö dombua gara una+ ba haogö wanura töi ndraono Gizaraʼeli ba daʼö,+ 10 daönö motöi ira ba gara si sambua, ba daönö tö ba gara si sambua, moloʼö haniha zi oföna tumbu. 11 Samösa duka gara weremata, isura döi ndraono Gizaraʼeli ba gara si dombua andrö, simane na musura döi ba laeduru.*+ Ba gara daʼa moguna lafodane-dane anaʼa. 12 Lafasa gara si dombua andrö ba mbalu-balu galisi nukha gere* si tobali famasugi ba dödö ndraono Gizaraʼeli,+ enaʼö iʼangalisigö döira Aʼaroni na iʼondrasi Yehowa. 13 Fazökhi göi dane-dane moroi ba ganaʼa 14 ba dua rozi rate nifazökhi moroi ba ganaʼa si sökhi. Landrandra wamazökhi rate daʼö simane sinali.+ Fakhai rate daʼa ba dane-dane moroi ba ganaʼa andrö.+

15 ”Tatugöi samösa zanuzi ba wamazökhi balu-balu dötöʼa fangetuʼö huku.+ Fagölö wamazökhi yaʼia simane famazökhi nukha gere,* ba laʼogunaʼö nukha si sökhi si no landrandra, bana anaʼa, bana sobalau, nukha si ungu laʼa-laʼa* hegöi bana soyo.+ 16 Foʼöfa sagi mbalu-balu dötöʼa andrö na öfodua kali wamatöʼö, salito waʼanau hegöi faʼebolonia.* 17 Beʼe ba mbalu-balu dötöʼa andrö gara feremata si no mufodane-dane. Faʼanö tobali öfa ngenoli. Ba ngenoli siföföna: kara mira, tofa, ba zamurudi. 18 Ba ngenoli si dua: kara firusi, safiro, ba yasibi. 19 Ba ngenoli si tölu: kara lesema,* aki, ba kazubu. 20 Ba ngenoli si öfa: kara kirisoli, kara una, ba gioko. Ero sambua kara mufodane-dane anaʼa. 21 Faʼoya gara daʼö 12 ngawua, sambua gara ero samösa ndraono Gizaraʼeli. Sura döi ero sambua kara simane na musura döi ba laeduru. Ero sambua töi, daʼö zosalahini si 12 mado ndraono Gizaraʼeli.

22 ”Fazökhi rate moroi ba ganaʼa si sökhi simane sinali, ba fasa ba mbalu-balu dötöʼa.+ 23 Fazökhi göi dombua laeduru anaʼa ba beʼe laeduru si dombua andrö ba watalinga si dombua ba mbalu-balu dötöʼa. 24 Beʼe bakha mbalö rate anaʼa si dua rozi ba laeduru si dombua si no mufasa ba watalinga si dombua ba mbalu-balu dötöʼa. 25 Fakhai mbalö rate anaʼa ba dane-dane anaʼa si no mufasa ba mbalu-balu galisi nukha gere, irege föna nukha gere* so mbalu-balu dötöʼa. 26 Fazökhi dua rozi laeduru anaʼa ba beʼe daʼö ba watalinga si dombua tanö tou ba mbalu-balu dötöʼa, tanö bakhania, yaʼia daʼö si faoma fatahö ba nukha gere.*+ 27 Fazökhi dua rozi tö laeduru anaʼa tanö föna nukha gere,* yaʼia daʼö tanö tou mbalu-balu galisi si dombua, yawa mböbö löwi nukha gere sahatö ba wamakhainia.+ 28 Enaʼö sökhi wameʼe balu-balu dötöʼa andrö, beʼe bakha ba laeduru si so ba nukha gere* zinali sobalau moroi ba laeduru si so ba mbalu-balu dötöʼa. Börö daʼö, yawa mböbö löwi so mbalu-balu dötöʼa ba lö tegilo ia ba nahania.

29 ”Na möi Gaʼaroni ba nahia niʼamoniʼö, hasambalö ifake mbalu-balu dötöʼa fangetuʼö huku si no tesura töi ndraono Gizaraʼeli. Ifake daʼö Aʼaroni ba dötöʼania. Balu-balu dötöʼa andrö zi tobali famasugi ba dödö föna Yehowa. 30 Beʼe Gurimi faoma Tumimi*+ bakha ba mbalu-balu dötöʼa daʼö. Enaʼö lö aefa ba dötöʼa Gaʼaroni na möi ia iʼondrasi Yehowa. Na möi Gaʼaroni wangondrasi Yehowa, lö tola löʼö iʼohe Gurimi faoma Tumimi niʼogunaʼö ba wangalui angetula huku ba ndraono Gizaraʼeli.

31 ”Fazökhi mbaru sanau si lö taʼio niʼogunaʼö ba narö nukha gere,* nifazökhi moroi ba mbana sobalau fefu.+ 32 Mutölaʼö mbagi mbaru sanau si lö taʼio daʼö. Tuka zanoso zanagu bagi mbaru si no mutölaʼö andrö ba mufazökhi ia simane famazökhi bagi mbaru wasuwöta faböi alio asika. 33 Fazökhi göi mbunga-bunga niʼobua dalimo nifazökhi moroi ba mbana sobalau, nukha si ungu laʼa-laʼa* hegöi bana soyo ba gahe mbaru sanau si lö taʼio. Beʼe riti-riti anaʼa ba gotaluania. 34 Beʼe sambua riti-riti anaʼa ba sambua dalimo, fasoli wameʼe ba gahe mbaru sanau si lö taʼio. 35 Hasambalö ifake mbaru sanau si lö taʼio daʼö Aʼaroni na mangai halöwö ia. Na möi ia bakha ba naha niʼamoniʼö wangondrasi Yehowa mazui na möi ia baero, enaʼö terongo li riti-riti andrö faböi mate ia.+

36 ”Fazökhi mbala högö si takile moroi ba ganaʼa si sökhi. Haogö wanura fehede daʼa ba mbala högö andrö simane na musura ba laeduru: ’Yehowa andrö niʼamoniʼö.’+ 37 Böbö mbala högö andrö tanö föna mböbö högö+ faoma sinali sobalau. Tebai muʼefasi. 38 Bala högö andrö enaʼö ba gangango Gaʼaroni so. Khönia tezofu-zofu na so zamalua sala ba ngawalö niʼamoniʼö+ nifasambua ndraono Gizaraʼeli si tobali sumange niʼamoniʼö. Tebai aheta mbala högö andrö ba gangangonia enaʼö itemaʼö ndraono Gizaraʼeli Yehowa.

39 ”Fazökhi mbaru sebua sokota-kota nisoso moroi ba nukha si sökhi, böbö högö moroi ba nukha si sökhi hegöi böbö löwi nisoso.+

40 ”Fazökhi göi mbaru sebua, böbö löwi hegöi balu-balu högö si sökhi ba soadu+ ba ndraono Gaʼaroni.+ 41 Beʼe daʼö fefu khö gaʼamö Aʼaroni hegöi ba ndraononia. Faduwa wanikha ba högöra,*+ fataro ira,*+ ba amoniʼö ira tobali ere sangai halöwö khögu. 42 Fazökhi göi zarewa sadogo-dogo* moroi ba nukha si sökhi enaʼö tebalu zaila ira.+ Faʼanaunia iʼotarai löwi-löwi irugi waha. 43 Akha ifake daʼö Aʼaroni hegöi iraononia na möi ira ba nose waʼowulo, mazui na lafahatö ira ba naha wanunu sumange ba wangai halöwö niʼamoniʼö, faböi lafalua zala ba mate ira. Daʼa gamakhoita si lö tebulö khö Gaʼaroni ofeta ba maʼuwunia fefu.