2 Moze
29 ”Daʼa nifaluamö ba wangamoniʼö yaʼira tobali ere sangai halöwö khögu: Halö sageu zawi si matua sawuyu-wuyu ba dua ngaʼeu mbiri-biri si matua si lö fökhö,+ 2 simanö göi roti sowulo-wulo si lö mufaruka ragi, roti si hulö galadanga si no mufaruka fanikha hizaʼi lö mufaruka ragi, ba roti sanifi-nifi si no mufagule fanikha+ hizaʼi lö mufaruka ragi. Fazökhi roti andrö moroi ba hamo gandru si sökhi, 3 ba beʼe daʼö ba zi sambua raga-raga. Aefa daʼö, ohe raga-raga+ andrö awö zawi hegöi biri-biri si dua ngaʼeu.
4 ”Kaoni Gaʼaroni hegöi iraononia matua enaʼö möi ira ba mbawandruhö nose waʼowulo+ ba waʼö khöra wemondri.+ 5 Fonukha+ Gaʼaroni faoma baru sebua, baru sanau si lö taʼio, nukha gere* hegöi balu-balu dötöʼa. Öfandroli wamöbö ba mbotonia mböbö löwi+ nukha gere. 6 Fasa khönia mböbö högö hegöi tandra wolulu faʼauri niʼamoniʼö ba mböbö högö andrö.+ 7 Aefa daʼö, halö wanikha famataro*+ ba duwagö ba högönia ba wamataro yaʼia.+
8 ”Waʼö ba ndraononia enaʼö lafahatö ira ba fonukha ira faoma baru sebua+ 9 hegöi balu-balu högö. Fasa göi mböbö löwi ba mbaru sebua khö Gaʼaroni hegöi khö ndraononia matua. Yaʼira dania zi tobali ere, ba daʼö gamakhoita si lö tebulö irugi zi lö aetu.+ Simane daʼa wamataromö Aʼaroni hegöi iraononia enaʼö tobali ere.*+
10 ”Aefa daʼö, ohe zawi si matua föna nose waʼowulo enaʼö latufa tangara högö zawi+ andrö ira Aʼaroni hegöi iraononia matua. 11 Taba zawi daʼö föna Yehowa, ba mbawandruhö nose waʼowulo.+ 12 Koe faoma turumö ndro zawi andrö ba fagule ba dandru naha wanunu sumange.+ Faduwa zi toröi ndronia barö naha wanunu sumange.+ 13 Halö fefu dawö+ waliʼa zawi andrö, tawö si so ba gate, buania si dombua hegöi tawö. Tunu fefu daʼö ba naha wanunu sumange enaʼö numalö miyawa zimbo.+ 14 Hizaʼi tunu nagolenia, uli hegöi si taʼunönia baero nose. Daʼö zumange fameta horö.
15 ”Aefa daʼö, halö sageu mbiri-biri si matua enaʼö latufa tangara högö mbiri-biri daʼö+ ira Aʼaroni hegöi iraononia matua. 16 Taba mbiri-biri daʼö ba tefeʼö ndronia ba zi fasui naha wanunu sumange.+ 17 Tatawi mbiri-biri daʼö ba sasai mbetuʼa+ awö gahenia. Faʼoli zi no mutatawi andrö fabaya högönia. 18 Tunu mbiri-biri andrö maʼasageu ba naha wanunu sumange enaʼö numalö miyawa zimbo. Daʼö zumange nitunu khö Yehowa sangomusoiʼö tödönia.+ Daʼö zumange nitunu ba galitö khö Yehowa.
19 ”Aefa daʼö, halö zi sageu mbiri-biri si matua enaʼö latufa tangara högö mbiri-biri daʼö+ ira Aʼaroni hegöi iraononia matua. 20 Taba mbiri-biri daʼö ba halö maʼifu ndronia. Aefa daʼö, fagule ba dalinga kambölö, ba duru sebua tanö ba gambölö, ba tuturu kahe sebua ba gambölö Gaʼaroni hegöi iraononia matua. Tefeʼö ndronia ba zi fasui naha wanunu sumange. 21 Aefa daʼö, halö maʼifu ndro moroi ba naha wanunu sumange ba maʼifu wanikha famataro.+ Tefeʼö khö Gaʼaroni, khö ndraononia matua hegöi ba mbarura. Falua daʼa enaʼö teʼamoniʼö Gaʼaroni, iraononia matua hegöi barura.+
22 ”Halö dawö mbiri-biri andrö, iʼonia sotawö, tawö waliʼa, tawö si so ba gate, buania si dombua awö dawönia+ hegöi ahe kambölö, börö me biri-biri famataro daʼa.+ 23 Halö göi roti si lö mufaruka ragi ba raga-raga si so föna Yehowa, yaʼia daʼö sambua roti sowulo-wulo, sambua roti niʼogaladanga nifaruka fanikha, ba sambua roti sanifi-nifi. 24 Beʼe daʼö fefu ba danga Gaʼaroni hegöi iraononia matua ba fazaule-zaule föna Yehowa si tobali sumange nifazaule. 25 Halö ba dangara ba tunu daʼö ba naha wanunu sumange, ba dete zumange nitunu. Daʼö zumange nitunu ba galitö khö Yehowa. Hua zumange andrö möi fangomuso dödö Yehowa.
26 ”Aefa daʼö, halö döla doto mbiri-biri famataro andrö+ nibeʼe sumange soguna khö Gaʼaroni. Fazaule-zaule föna Yehowa si tobali sumange nifazaule, ba daʼö dania dana khöu. 27 Moroi ba mbiri-biri famataro+ nibeʼe sumange soguna khö Gaʼaroni hegöi iraononia, heta* döla doto moroi ba zumange nifazaule andrö awö gahe si no muʼamoniʼö si no mufazaule. 28 Fefu daʼö tobali okhöta Gaʼaroni hegöi ngaʼötönia börö me niʼamoniʼö. Daʼö nibeʼe ndraono Gizaraʼeli si tobali tana niʼamoniʼö.+ Daʼö dana khö Yehowa si no muʼamoniʼö moroi ba zumange fangatulö.+ Moguna gamakhoita daʼa ba ndraono Gizaraʼeli irugi zi lö aetu.
29 ”Ngaʼötö Gaʼaroni+ dania zamake baru niʼamoniʼö+ khönia na mubayoini ira ba mufataro tobali ere. 30 Fitu hari lafake mbaru daʼö ngaʼötö Gaʼaroni si tobali fangalinia si möi ba nose waʼowulo, ba wangai halöwö ba naha niʼamoniʼö.+
31 ”Rino nagole mbiri-biri famataro andrö ba zi sambua naha niʼamoniʼö.+ 32 Aʼaroni zi manga nagole mbiri-biri daʼö faoma iraononia matua+ hegöi roti si so ba raga-raga ba mbawandruhö nose waʼowulo. 33 Yaʼira zi manga sumange daʼö si no labeʼe sumange fangatulö ba wamataro yaʼira tobali ere* hegöi ba wangamoniʼö yaʼira. Hizaʼi, tebai laʼa daʼö niha si lö mutehegö* börö me niʼamoniʼö zumange andrö.+ 34 Na so roti mazui nagole mbiri-biri famataro si toröi ofeta moluo, hasambalö ötunu.+ Tebai laʼa daʼö börö me niʼamoniʼö.
35 ”Falua fefu daʼö khö Gaʼaroni hegöi ba ndraononia simane si no uwaʼö khöu. Horigö zi fitu ngaluo ba wamataro yaʼira tobali ere.*+ 36 Ero maʼökhö, beʼe zawi si matua tobali sumange fameta horö ba wangatulöʼö yaʼami hegöi ba wangamoniʼö naha wanunu sumange. Tefeʼö wanikha ba naha wanunu sumange ba wangamoniʼö yaʼia.+ 37 Ba zi fitu hari, beʼe zumange ba wangamoniʼö naha wanunu sumange. Moguna öʼamoniʼö naha wanunu sumange andrö enaʼö tobali naha wondrege niʼamoniʼö.+ Niha sohalöwö ba naha wanunu sumange göi enaʼö teʼamoniʼö.
38 ”Ero maʼökhö beʼe zumange ba naha wanunu sumange andrö dua ngaʼeu mbiri-biri si matua si döfi faʼebua.+ 39 Beʼe mbiri-biri si sageu ba zihulö wongi, ba si sageu tö andrö tanö owi.*+ 40 Na öbeʼe mbiri-biri si sageu, beʼe göi arakhagö saliter* nagu tobali sumange nibadu ba 2,2 liter* hamo darigu si no mufaruka ba zi saliter fanikha zaitu. 41 Beʼe göi mbiri-biri si sageu tö andrö ba zi tanö owi,* öfaogö zumange nibadu awö gö simane ba zihulö wongi. Beʼe daʼö tobali sumange nitunu ba galitö khö Yehowa si möi fangomuso dödönia. 42 Daʼö zumange nitunu si lö mamalö-malö mifalua föna Yehowa ofeta ba ngaʼötömi, ba mbawandruhö nose waʼowulo, nahia si möi yaʼo ba wahuhuosa khöu.+
43 ”Möi ndraʼo ba daʼö ba wamalukhaisi iraono Gizaraʼeli. Teʼamoniʼö nahia daʼö faoma lakhömigu.+ 44 Uʼamoniʼö dania nose waʼowulo andrö hegöi naha wanunu sumange. Uʼamoniʼö göi Gaʼaroni awö ndraononia matua+ enaʼö tola mohalöwö ira khögu tobali ere. 45 Toröi ndraʼo ba gotalua ndraono Gizaraʼeli ba Lowalangira ndraʼo.+ 46 Ba daʼö dania laʼila haniha zindruhunia Lowalangira Yehowa sangeheta yaʼira ba danö Miserai enaʼö toröi ndraʼo ba gotaluara.+ Yaʼo Yehowa Lowalangira.