2 Moze
6 Imane Yehowa khö Moze, ”Öʼila dania hadia nifaluagu khö Waraʼo.+ Börö waʼabölögu, ufaso ia enaʼö itehegö mofanö ami, ba me no iʼila waʼabölögu, awena itehegö mofanö ami moroi ba soinia.”+
2 Ba imane nasa Lowalangi khö Moze, ”Yaʼo Yehowa. 3 Me mböröta, asese tobali ndraʼo Lowalangi Fondrege Zabölö+ khö Gaberahamo, Izaʼaki, ba Yakobo. Hizaʼi lö ufatunö khöra+ zindruhunia sanandrösa ba döigu, yaʼia daʼö Yehowa.+ 4 No göi fawuʼu li ndraʼo ba wameʼe khöra tanö Ganaʼana. Ba daʼö toröi ira mböröta tobali niha si fatewu.+ 5 Iadaʼa, no urongo wangarö-ngarö ndraono Gizaraʼeli si no tobali sawuyu niha Miserai. Lö olifu ndraʼo mbuʼusa ligu.+
6 ”Börö daʼö fatunö ba ndraono Gizaraʼeli, ”Yaʼo Yehowa. Uʼefaʼö dania ami moroi ba halöwö sabeʼe ba moroi ba wangosawuyu niha Miserai.+ Uʼorifi ami faoma taʼiogu safönu faʼabölö* ba ubeʼe hukuma sabua+ ba niha Miserai. 7 Tobali ami ono mbanuagu ba Lowalangimi ndraʼo.+ Awena dania aboto ba dödömi haniha Lowalangimi Yehowa sangefaʼö yaʼami moroi ba wangosawuyu niha Miserai. 8 Uʼohe dania ami ba danö si no ufabuʼu si no möido ba hölu* khö Gaberahamo, Izaʼaki, ba Yakobo. Ubeʼe dania khömi danö andrö.+ Yaʼo Yehowa.’”+
9 Ifatunö fefu daʼö Moze ba ndraono Gizaraʼeli. Hizaʼi, lö faduhu dödöra börö me laʼosawuyu ira ba no afatö dödöra.+
10 Ba fahuhuo Yehowa khö Moze, 11 ”Aeʼe falukhaisi Waraʼo razo Miserai, ba fatunö khönia wa lö tola löʼö itehegö mofanö ndraono Gizaraʼeli moroi ba soinia.” 12 Hizaʼi imane Moze khö Yehowa, ”Iraono Gizaraʼeli manö ba lö lafondrondrongo wehedegu.+ Hewisa dania wa ifondrondrongo wehedegu Faraʼo, mendrua manö me fadöʼö-döʼö ndraʼo na fahuhuo?”*+ 13 Sakali tö ifatunö Yehowa khö Moze faoma Aʼaroni hadia zinangea lafaʼema ba ndraono Gizaraʼeli hegöi khö Waraʼo razo Miserai, enaʼö itehegö aheta ndraono Gizaraʼeli ba danö Miserai.
14 Daʼa döi-töi ndra matua si no irai tobali sondröniaʼö mado ndraono Gizaraʼeli: Ba mado Rubeno yaʼia daʼö Hanokhi, Falu, Hezerono, ba Karemi.+ Daʼö ngaʼötö Rubeno, ono siaʼa khö Gizaraʼeli.+
15 Ba mado Zimeoni yaʼia daʼö Yemueli, Yamini, Ohada, Yakhino, Sohara, ba Saulo, ono ndra alawe Ganaʼana.+ Daʼö ngaʼötö Zimeoni.
16 Daʼa döi-töi nono Lewi+ moloʼö waö-waö ngaʼötöra: Ono Lewi yaʼia daʼö Gereso, Kahati, ba Merari.+ Faʼanau noso Lewi 137 fakhe.
17 Moloʼö waö-waö ngaʼötö, ono Gereso yaʼia daʼö Libini ba Simeʼi.+
18 Ono Gahati yaʼia daʼö Ameramo, Yisihara, Heberona, ba Usieli.+ Faʼanau noso Gahati 133 fakhe.
19 Ono Merari yaʼia daʼö Maheli ba Musi.
Daʼö ngaʼötö Lewi moloʼö waö-waö ngaʼötöra.+
20 Mangowalu Gameramo khö Yokhebe, akhi namania.+ Ba tumbu nono khö Yokhebe yaʼia daʼö Aʼaroni ba Moze.+ Faʼanau noso Gameramo 137 fakhe.
21 Ono Yisihara yaʼia daʼö Kora,+ Nefegi, ba Sikhiri.
22 Ono Gusieli yaʼia daʼö Mizaeli, Elisafa,+ ba Sitiri.
23 Mangowalu Gaʼaroni khö Gelizabe ono Gaminadabi. Elizabe andrö akhi Nahaso.+ Ba tumbu khönia Nadabi, Abihu, Eleazari, ba Itamari.+
24 Ono Gora yaʼia daʼö Asiri, Elikana, ba Abiazafi.+ Daʼö ngaʼötö Gora.+
25 Mangowalu Geleazari+ ono Gaʼaroni khö nono Wutieli. Ba tumbu khöra nono sotöi Fineha.+
Daʼö döi-töi ndra sondröniaʼö ba nösi nomo zatua ira matua ba mado Lewi moloʼö ösi nomora.+
26 Daʼö waö-waö ngaʼötö Gaʼaroni faoma Moze. Imane khöra Yehowa, ”Miheta fefu ndraono Gizaraʼeli moroi ba Miserai simane ngawawa zaradadu.”+ 27 Moze andre faoma Aʼaroni zangondrasi Faraʼo razo Miserai, enaʼö tola laheta ndraono Gizaraʼeli ba danö Miserai.+
28 Me fahuhuo Yehowa khö Moze ba Miserai, 29 imane Yehowa, ”Yaʼo Yehowa. Fatunö khö Waraʼo razo Miserai fefu zi no uwaʼö khöu.” 30 Ba imane Moze khö Yehowa, ”Fadöʼö-döʼö ndraʼo na fahuhuo.* Hewisa wa ifondrondrongo wehedegu Faraʼo?”+