2 Moze
7 Imane Yehowa khö Moze, ”Iadaʼa, no ubaliʼö ndraʼugö simane Lowalangi* khö Waraʼo. Gaʼamö Aʼaroni zi tobali samaʼeleʼö dania, si fahuhuo salahimö.+ 2 Fatunö khö gaʼamö Aʼaroni fefu zi no uwaʼö khöu, ba yaʼia dania zi fahuhuo khö Waraʼo. Ba gafuriata, itehegö mofanö ndraono Gizaraʼeli moroi ba soinia. 3 Ba utehegö dania khö Waraʼo tobali sabeʼe högö,*+ ba oya uforomaʼö dania dandra sahöli-höli dödö ba Miserai.+ 4 Hizaʼi, lö ifondrondrongo dania wehedemö Faraʼo. Ba uʼogunaʼö waʼabölö dangagu ba wolawa Miserai, ba uheta dania nono mbanuagu iraono Gizaraʼeli moroi ba daʼö simane ngawawa zaradadu, ba abölö-bölö ubeʼe wanguhuku ba Miserai.+ 5 Ba ginötö uʼogunaʼö waʼabölögu* ba wolawa niha Miserai ba uheta ndraono Gizaraʼeli ba daʼö, awena dania aboto ba dödöra haniha zindruhunia Yehowa.”+ 6 Ba ifalua daʼö Moze hegöi Aʼaroni. Lafalua simane sibai niwaʼö Yehowa. 7 Me laʼondrasi Waraʼo, faʼalawa ndröfi Moze 80 fakhe+ ba Aʼaroni 83 fakhe.
8 Imane Yehowa khö Moze hegöi Aʼaroni, 9 ”Na iʼandrö khömi Faraʼo wamalua tandra sahöli-höli dödö, waʼö khö Gaʼaroni enaʼö ihalö ziʼonia ba ifazaumba föna Waraʼo. Tobali dania ulö sesolo ziʼo daʼö.”+ 10 Möi Moze hegöi Aʼaroni wamalukhaisi Faraʼo ba lafalua fefu niwaʼö Yehowa. Ifazaumba ziʼonia Aʼaroni föna Waraʼo ba föna ndra sohalöwö khönia. Ba tobali ulö sesolo ziʼo daʼö. 11 Ba mohede Waraʼo ba niha sagatua-tua hegöi si no toʼölö ba gelemu. Ba lafalua göi zimane daʼö si fakelemu ba Miserai+ börö waʼabeʼe gelemura.+ 12 Lafazaumba tou ziʼora zamösana ba tobali ulö sesolo. Hizaʼi, ulö* khö Gaʼaroni zanölö ulö* andrö khöra fefu. 13 Hewaʼae simanö, lö tebulö waʼabeʼe högö*+ Waraʼo. Lö ifondrondrongo wehede Moze hegöi Aʼaroni simane niwaʼö Yehowa.
14 Imane Yehowa khö Moze, ”Atulö wa sabeʼe högö+ Waraʼo. Lö itehegö mofanö nono mbanuagu. 15 Mahemolu sihulö wongi möi Waraʼo ba Nungo Nidanö Nilo. Baloi ia ba daʼö enaʼö falukha ami ba ohe ziʼo si tobali ulö andrö.+ 16 Ömane khönia, ’Yehowa Lowalangi niha Heberaiʼo zamatenge yaʼo ba wamatunö daʼa khöu:+ ”Tehegö mofanö nono mbanuagu enaʼö lafosumange ndraʼo ba danö si mate.” Hizaʼi, lö manö ötehegö irugi iadaʼa. 17 Börö daʼö imane Yehowa, ”Na öʼila dania daʼa, awena aboto ba dödöu haniha Yehowa andrö.+ Ubözi Nungo Nidanö Nilo faoma siʼo daʼa, ba tobali do fefu nidanönia. 18 Ba mate fefu giʼa si so ba Nungo Nidanö Nilo ba aböu oboula. Tebai labadu ira niha Miserai nidanö Nilo andrö.”’”
19 Imane Yehowa khö Moze, ”Waʼö khö Gaʼaroni, ’Halö ziʼomö ba fazawa gamaudu nidanö ba Miserai,+ yawa ba dete nungo nidanö, mbombo, baʼa nidanö,+ ba fefu naha nidanö. Tobali do nidanönia.’ Fefu nidanö ba Miserai tobali do hegöi idanö si so ba geu faoma ba gara.” 20 Laʼanemaiʼö lafalua niwaʼö Yehowa andrö ira Moze hegöi Aʼaroni. Föna Waraʼo ba föna zohalöwö khönia, ifazawa ziʼonia Aʼaroni ba ibözi Nungo Nidanö Nilo. Fefu nidanö ahori tobali do.+ 21 Mate fefu giʼa si so ba Nungo Nidanö Nilo,+ ba ibörögö aböu oboula nidanö andrö. Tebai labadu ira niha Miserai nidanö si otarai ba daʼö,+ ba fefu nidanö ba Miserai tobali do.
22 Ba lafalua göi zimane daʼö ira segebua elemu ba Miserai, laʼogunaʼö waʼabölöra si tobini.+ Börö daʼö, lö tebulö waʼabeʼe högö* Waraʼo ba lö ifondrondrongo wehede Moze hegöi Aʼaroni, simane niwaʼö Yehowa.+ 23 Mangawuli Waraʼo ba gödo razo khönia, ba lö ibeʼe dödönia fefu zalua andrö. 24 Lakhao danö ira niha Miserai ba zi fasui Nungo Nidanö Nilo ba wangalui idanö si tola mubadu, börö me tebai saʼae mubadu Nidanö Nilo. 25 Ibaliʼö do Nungo Nidanö Nilo andrö Yehowa fitu hari waʼara.