Ba Mbanua Niha Keriso ba Roma
15 Yaʼita sabölö, moguna tatolo zambö faʼabölö+ ba wanaögö abula dödö ba böi ha taʼomusoiʼö dödöda samösa.+ 2 Dataʼomusoiʼö dödö nawöda ba tafalua zi sökhi ba wamarou tödöra.+ 3 Keriso manö lö iʼomusoiʼö dödönia samösa+ simane niwaʼö ba zura, ”Utaögö wangoʼaya moroi ba niha sangoʼaya yaʼugö.”+ 4 Fefu hadia ia nisura me föna, tesura ia ba wamahaʼö yaʼita.+ Nisura andrö zameʼe khöda fondrara dödö enaʼö anau gölöda+ irege so khöda wanötöna.+ 5 Lowalangi sameʼe khöda faʼanau gölö ba fondrara dödö, yaʼiʼamualagö khöda gera-era hegöi amuata si fagölö simane niʼokhögö Keriso Yesu, 6 irege so khömi wahasara dödö+ ba ha sambua li* ba wamolakhömi Lowalangi, yaʼia daʼö Ama Zoʼaya yaʼita Yesu Keriso.
7 Börö daʼö, faoma mitemaʼö nawömi+ simane fanemaʼö Keriso yaʼami+ enaʼö tefolakhömi Lowalangi. 8 Omasi ndraʼo uʼombakhaʼö khömi wa no tobali sangai halöwö ba niha nisuna+ andrö Keriso ba wangoromaʼö wa sindruhu-ndruhu wehede Lowalangi, ba iʼaroʼö mbuʼusa li Lowalangi khö ndra tuara,+ 9 enaʼö niha moroi ba soi böʼö tola lafolakhömi Lowalangi börö waʼahakhö dödönia.+ Tefaudu daʼa ba ayati sangumaʼö, ”Daʼö mbörö wa ufaduhuʼö ndraʼugö ba ngawalö soi, ba manunö ndraʼo ba wanuno töimö.”+ 10 Imane ayati tanö böʼö, ”Yaʼami soi böʼö, miʼomusoiʼö dödömi wefao ba nono mbanuania.”+ 11 Imane zui ayati tanö böʼö, ”Misuno Yehowa* dozi soi; yalasuno ia dozi mado ba gulidanö.”+ 12 Imane göi Yesaya, ”So dania samösa moroi ba ngaʼötö Gizaʼi+ samatörö fefu soi,+ khönia manötöna dania fefu soi.”+ 13 Lowalangi wanötöna andrö, yaʼibeʼe khömi waʼomuso dödö ba faʼohahau dödö börö me faduhu dödömi khönia irege afönu wanötönami ba waʼabölö geheha niʼamoniʼö.+
14 Yaʼami ira talifusö, faduhu dödögu wa no fahöna khömi waʼasökhi, faʼaboto ba dödö ba faoma miʼamenesi* nawömi. 15 So ösa zinangea uwaʼö khömi, ba lö alawödo wanura yaʼia ba wamasugi ba dödömi börö me no iforomaʼö khögu Lowalangi waʼasökhi dödönia sebua,* 16 irege tobali ndraʼo enoni Keriso Yesu ba sanuriaigö turia somuso dödö moroi khö Lowalangi ba soi misa.+ Oya sa nifaluagu ba halöwö niʼamoniʼö+ andre enaʼö tobali ira sumange niʼamoniʼö khö Lowalangi börö gehehania andrö.
17 Omuso dödögu me no tobali ndraʼo soloʼö khö Keriso Yesu ba ufalua halöwö moroi khö Lowalangi. 18 Lö ututunö danö böʼö baero nifalua Keriso khögu enaʼö so woloʼö ba soi fefu. Oroma nifaluania andrö ba wehede hegöi ba gamuatagu, 19 si fao ngawalö dandra hegöi sahöli-höli dödö+ ba waʼabölö geheha Lowalangi. No uforege wanuriaigö turia somuso dödö sanandrösa khö Keriso+ iʼotarai ba Yeruzalema numalö ba zi fasui Provinsi Iliriku. 20 Lö utohugö halöwö si no labörögö niha böʼö, börö me uʼodödögö wanuriaigö turia somuso dödö ba niha si lö irai mamondrongo töi Keriso. 21 Simane niwaʼö ba zura, ”Niha si lö irai mamondrongo sanandrösa khönia, laʼila ia dania. Niha si lö irai mamondrongo, aboto ba dödöra.”+
22 Daʼö mbörö wa tetaha weʼamöigu khömi ba zi hauga kali. 23 Iadaʼa, lö hadöi nahia si lö niʼondrasigu ba mbanua andre, ba no hauga fakhe uʼera-era wamalukhaisi yaʼami. 24 Ba wofanögu dania ba Spanyol, utötöna wa falukha ndraʼo khömi, ba na no aefa fariawö ita, tola fao ndraʼo khömi ba lala. 25 Iadaʼa, mofanö ndraʼo ba Yeruzalema ba wangai halöwö soguna ba niha niʼamoniʼö,+ 26 börö me omasi ndra talifusö ba Makedonia hegöi ba Nakhaya wameʼe tolo-tolo ba niha niʼamoniʼö si numana ba Yeruzalema.+ 27 Omuso dödöra wamalua daʼö, ba sindruhunia sa moʼömö ira wamalua. Börö me no labeʼe khöra gö wamati ira niha niʼamoniʼö, andrö göi moʼömö ira wameʼe soguna ba niha niʼamoniʼö.+ 28 Uʼohe dania dolo-tolo andrö ba utatugöi enaʼö latema daʼö ira niha niʼamoniʼö, aefa daʼö utörö khömi na möido ba Spanyol. 29 Faduhu dödögu na tohare ndraʼo dania, fahöna wolohegu khömi howu-howu moroi khö Keriso.
30 Yaʼami ira talifusö, börö me fagölö-gölö mamati ita khö Zoʼaya yaʼita Yesu Keriso, ba taʼokhögö waʼomasi moroi ba geheha niʼamoniʼö, simane yaʼo uʼandrö khömi enaʼö miforege wangandrö salahigu khö Lowalangi,+ 31 enaʼö teʼefaʼö ndraʼo+ moroi ba niha si lö mamati si so ba Yudea, ba enaʼö latemaʼö halöwö nifaluagu ba niha niʼamoniʼö si so ba Yeruzalema,+ 32 na itehegö Lowalangi, uʼondrasi ami si fao faʼomuso dödö, ba faoma taʼokafui dödö nawöda. 33 Yafao khömi Lowalangi waʼohahau dödö andrö.+ Yaduhu.