”Miʼege-ege Awö Zege-ege”

1, 2. Hana wa moguna tatutunö lala wameʼe fondrara dödö ba niha si göna abula dödö börö waʼamate? (Faigi gambara ba wamobörö wamahaʼö.)

IMANE Susi, ”No arakhagö döfi mate nonoma matua, afökhö sibai dödöma ba tefakao waʼaurima.” Imane samösa talifusöda ira matua wa tebai ”itutunö hewisa waʼafökhö nirasoinia” me no aefa mate woʼomonia ba zi lö mudöna-döna. Ato sibai niha zanaögö faʼafökhö simane daʼö. Ba mbanua niha Keriso iadaʼa, ato ndra talifusöda si lö omasi na mate niha niʼomasiʼöra fatua lö alua Hamagedo. Te so niha niʼomasiʼömö si no mate mazui öʼila wa so niha si göna abula dödö börö waʼamate. Na alua daʼö, te manofu ndraʼugö, ’Hewisa enaʼö niha si göna abula dödö börö waʼamate, lasöndra wondrara dödö?’

² So ösa niha zangumaʼö wa inötö zi tola mamadöhö fefu zokho. Hizaʼi, hadia simane daʼö zalua? Imane samösa ira alawe lakha mbanua, ”Moloʼö si no irai urasoi, si tola mamadöhö zokho yaʼia daʼö hewisa lala wangogunaʼönia inötö.” Moguna ginötö hegöi fondrorogö si fao faʼebolo dödö ba wamadöhö zokho si so ba mboto. Simanö göi, moguna ginötö hegöi fondrorogö si fao faʼebolo dödö ba wamadöhö faʼafökhö si so ba dödöda. Sindruhunia, hadia zanolo niha si göna abula dödö enaʼö alö waʼafökhö nirasoira börö waʼamate?

YEHOWA NO ”LOWALANGI WONDRARA DÖDÖ”

3, 4. Hana wa tola faduhu dödöda wa iʼila Yehowa waʼafökhö nirasoida börö waʼamate?

³ Amada Yehowa safönu faʼomasi si oföna sibai mameʼe khöda fondrara dödö niʼogunaʼöda. (Baso II Korindro 1:3, 4.) Yaʼia andre duma-duma sebua sangoromaʼö wa irasoi hadia nirasoi niha böʼö ba ifabuʼu ba niha, ”Yaʼo, yaʼodo zondrara tödömi.”​—Yesaya 51:12; Zinunö 119:50, 52, 76.

⁴ Amada sebua faʼomasi no irai göi irasoi hewisa me mate niha niʼomasiʼönia, simane samosumange yaʼia sotöi Aberahamo, Izaʼaki, Yakobo, Moze, hegöi Razo Dawido. (IV Moze 12:6-8; Mataiʼo 22:31, 32; Halöwö Zinenge 13:22) Iforomaʼö khöda Sura Niʼamoniʼö wa ibalo-baloi Yehowa ginötö ba wanusugi niha si lö faröi andre. (Yobi 14:14, 15) Ba ginötö daʼö, lasöndra waʼomuso dödö hegöi larasoi waʼalöfökhö soʼahonoa. No irai göi irasoi Yehowa hewisa waʼafökhö me mate Nononia siaʼa. Iwaʼö Sura Niʼamoniʼö wa Yesu andrö no ”faʼomuso dödö” khö Lowalangi. (Gamaedola 8:22, 30) Tebai takhalaigö hewisa waʼafökhö nirasoi Yehowa me iʼila mate Nononia ba waʼamate safökhö.​—Yohane 5:20; 10:17.

5, 6. Hewisa wameʼe Yehowa fondrara dödö khöda?

⁵ Tola sindruhu-ndruhu faduhu dödöda wa hasambalö itolo ita Yehowa. Daʼö mbörö wa lö aiwö ita ba wangandrö ba tatutunö khönia waʼafökhö hegöi faʼabu dödö nirasoida. Tatu omuso sibai dödöda börö me taʼila wa aboto ba dödö Yehowa hadia nirasoida ba ibeʼe khöda wondrara dödö soguna khöda! Hizaʼi, hewisa wamaluania daʼö?

⁶ Sambua lala nifalua Yehowa ba wondrara tödöda yaʼia daʼö iʼogunaʼö gehehania. (Halöwö Zinenge 9:31) No ifabuʼu Yesu wa hasambalö ibeʼe Amada waʼabölö moroi ba gehehania niʼamoniʼö ba niha sangandrö khönia. (Luka 11:13) Imane Susi, nitutunö ba wamobörö, ”Asese matuhi danö khö Yehowa ba maʼandrö enaʼö ibeʼe khöma wondrara dödö. Ero na mafalua daʼö, faʼohahau dödö sindruhu moroi khö Lowalangi zondrorogö tödö hegöi fangera-ngerama.”​—Baso Filifi 4:6, 7.

ABOTO GÖI BA DÖDÖ YESU HADIA NIRASOIDA

7, 8. Hana wa tola faduhu dödöda wa hasambalö ibeʼe khöda wondrara dödö Yesu?

⁷ Me so Yesu ba gulidanö, moʼahonoa woloʼönia mbua-mbua si sökhi moroi khö Namania ba lala wehedenia hegöi ba nifaluania. (Yohane 5:19) Ifatenge Yesu ba gulidanö Yehowa, ba wameʼe fondrara dödö ba niha si no ”arasa tödö” hegöi ’fefu zabu tödö’. (Yesaya 61:1, 2; Luka 4:17-21) Laʼila niha wa aboto ba dödö Yesu wanandraigö nitaögöra ba omasi ia itolo ira.​—Heberaiʼo 2:17.

⁸ Me awuyu-wuyu Yesu, te so niha sahatö khönia hegöi ösi nomonia si no mate. Duma-dumania, te awuyu-wuyu ndröfi Yesu me mate namania sotöi Yosefo, si tenga amania sindruhu.a (Faigi nisura ba gahe zura.) Khalaigö hewisa waʼabua ba niha sawuyu-wuyu soʼameʼegö tödö niha böʼö ba wondrorogö enaʼö anau gölönia ba wanaögö abula dödö andrö hegöi ba wameʼe fondrara dödö khö ninania ba ira talifusönia.

9. Hewisa wangoromaʼö Yesu wa irasoi hadia nirasoi niha böʼö me mate Lazaro?

⁹ Sagötö fanuriaigönia, iforomaʼö Yesu wa sindruhu-ndruhu aboto ba dödönia niha ba irasoi hadia nirasoira. Duma-dumania, ba ginötö mate zi fahuwu khönia sotöi Lazaro, fao ia ba waʼafökhö nirasoi Maria hegöi Marata. Irasoi sibai hadia nirasoira, irege ibörötaigö meʼe ia hewaʼae sindruhunia iʼila wa tola ifuli isusugi Lazaro andrö.​—Yohane 11:33-36.

10. Hewisa wa tola faduhu dödöda wa aboto ba dödö Yesu hadia nirasoida iadaʼa?

¹⁰ Hewisa wa möi fanoloda wehede fondrara dödö moroi khö Yesu ba götö föna? Itutunö Sura Niʼamoniʼö wa lö si tebulö Yesu. Imane, ”Yesu Keriso andrö, ba yaʼi-yaʼia manö, he menewi, ba he maʼökhö, ba he irugi zi lö aetu.” (Heberaiʼo 13:8) Lafotöi ia ’Salawa sangorifi’ börö me itehegö taʼokhögö waʼauri si lö aetu. Ba aboto göi ba dödö Yesu gabula dödöda zamösana ba ”iʼila itolo nitandraigö andrö”. (Halöwö Zinenge 3:15; Heberaiʼo 2:10, 18) Andrö, tola faduhu dödöda wa irasoi Yesu waʼafökhö nirasoi niha böʼö. Aboto ba dödönia gabula dödöra ba ibeʼe khöra wondrara dödö ’ba ginötö si tefaudu’.​—Baso Heberaiʼo 4:15, 16.

’FONDRARA DÖDÖ MOROI BA DAROMALI’

11. Hadia ayati Zura Niʼamoniʼö sabölö mameʼe khömö fondrara dödö?

¹¹ Waö-waö sanandrösa ba waʼabu dödö nirasoi Yesu me mate Lazaro awena sambua moroi ba ayati tanö böʼö si möi fondrara dödöda niʼilada ba Daromali Lowalangi. Lö tokea ita ba daʼö, börö me ”hadia ia sa nisura föna, ba ba wamahaʼö yaʼita tesura ia, enaʼö so khöda wanötöna andrö, moroi ba waʼebolo dödö andrö ba moroi ba wondrara dödö andrö, nirongoda ba Zura”. (Roma 15:4) Na örasoi waʼabu dödö börö waʼamate, tola ösöndra wondrara dödö sameʼe khömö faʼahono dödö moroi ba Zura Niʼamoniʼö, simane:

• ”Ahatö Yehowa ba zi no arasa tödö ba itolo zi no atata era-era.”​—Zinunö 34:19, 20.

• ”Ba waʼoya ngawalö waʼabu dödögu andrö, ba iʼokafui dödögu [Yehowa] fondrara tödö andrö khöu.”​—Zinunö 94:19.

• ”Ba yaʼia, Soʼaya yaʼita, Yesu Keriso ba Lowalangi, Amada, si no mangomasiʼö yaʼita, ba si no mameʼe fondrara dödö khöda, si lö aetu, awö wanötöna, si sökhi, ba waʼebua dödö, ba yamurara dödömi ba yamuʼaʼaroʼö.”​—II Tesalonika 2:16, 17.b—Faigi nisura ba gahe zura.

BANUA NIHA KERISO NO UMBU WONDRARA DÖDÖ SEBUA

12. Hewisa wameʼeda fondrara dödö ba niha böʼö?

¹² Niha si göna gabula dödö börö waʼamate tola lasöndra wondrara dödö ba mbanua niha Keriso. (Baso I Tesalonika 5:11.) Hewisa wangaroʼömö hegöi wameʼemö fondrara dödö ba niha ’sarasa tödö’? (Gamaedola 17:22) Törö tödömö wa ’so ginötönia fahuhuo ba so ginötönia lö hede-hede’. (Zangombakha 3:7) Samösa ira alawe lakha mbanua sotöi Dalene, itutunö wa si göna gabula dödö börö waʼamate moguna latutunö wangera-ngera hegöi nirasoira. Börö daʼö, lala sabölö moguna öfalua yaʼia daʼö öhaogö öfondro-ndrongo ba böi taba dalu huhuora. Imane Junia sangokhögö talifusö ira matua si no mamunu yaʼia samösa, ”Hewaʼae ambö aboto ba dödömö gabula dödöra, hizaʼi sabölö moguna yaʼia daʼö omasiʼö örasoi hadia nirasoira.”

13. Hadia zinangea tatörö tödöda sanandrösa ba gabula dödö börö waʼamate?

¹³ Moguna tatörö tödöda wa fefu ita lö fagölö-gölö worasoida hegöi wanaögöda abula dödö. Itaria, lö aoha khöda ba wanutunö hawaʼabua waʼafökhö nirasoida. Imane Taromali Lowalangi, ”Tödö zangila safökhö khönia; ba tebai ihalö khönia niha böʼö waʼomuso dödö zamösana.” (Zangombakha 14:10) Hewaʼae na itutunö si samösa niha hadia nirasoinia, itaria lö aboto ba dödö niha böʼö hadia nirasoinia.

14. Hadia zi tola tawaʼö ba wondrara tödö niha si göna abula dödö börö waʼamate?

¹⁴ Tola manö abua khöda ba wotatugöi hadia zinangea tawaʼö ba niha si göna abula dödö börö waʼamate. Hizaʼi, imane Sura Niʼamoniʼö wa ”lela zatua-tua ba no dalu-dalu”. (Gamaedola 12:18) Ato zi no manöndra ngawua wehede fondrara dödö si so ba brosur Bila Seseorang yang Anda Kasihi Meninggal.c (Faigi nisura ba gahe zura.) Si toʼölönia, lala sabölö sökhi si tola öfalua yaʼia daʼö ”miʼege-ege awö zege-ege”. (Roma 12:15) Gaby, si no mate woʼomonia ira matua, iwaʼö wa itaria hatö feʼe zi tola ifalua ba wanutunö hadia nirasoinia. Imane nasa, ”Terara dödögu börö me fao ndra awögu ba weʼe. Ba ginötö daʼö, urasoi wa tenga ha yaʼodo samösa zorasoi abula dödögu andre.”

15. Hewisa wameʼeda fondrara dödö ba niha böʼö na abua khöda wamalua daʼö? (Faigi göi kotak ”Fehede Fondrara Dödö Sameʼe Faʼahono Dödö”.)

¹⁵ Na abua khömö ba wotatugöi hadia niwaʼömö ba wondrara dödö niha böʼö, te aoha khömö ba wamaʼoheʼö kartu, e-mail, SMS, mazui sura. Tola öʼadogoiʼö wanutunö ayati Zura Niʼamoniʼö si möi fondrara dödö, mbua-bua si sökhi niʼokhögö niha si no mate andrö si tebai öʼolifugö mazui ötutunö hadia zi sökhi si no irai mifalua. Imane Junia, ”Ebua sibai mbua nitemagu me utema zura sadogo-dogo samarou tödögu mazui me lakaoni ndraʼodo ira talifusöda si sara lala wamati enaʼö uʼogunaʼö ginötögu ba wariawösa khöra. Moroi ba nifaluara urasoi wa laʼomasiʼö ba laʼameʼegö tödö ndraʼo.”

16. Hadia lala sabölö tefaudu ba wameʼe fondrara dödö ba niha böʼö?

¹⁶ Fangandröda tola möi fondrara dödö khö ndra talifusöda si göna abula dödö börö waʼamate. Tola mangandrö ita salahira mazui fao ita khöra ba wangandrö. Hewaʼae abua wamalua daʼa börö me tola ibörötaigö meʼe ndraʼugö, hizaʼi fangandrö soroi ba dödö nifaluamö tola tobali fondrara dödö sebua daʼö. Ifuli itörö tödö Dalene imane, ”Itaria ba ginötö möi ndra talifusöda ira alawe ba wondrara tödögu, uʼandrö khöra enaʼö lalau mangandrö. Me awena labörögö wangandrö, si toʼölönia aetu-aetu dalu wangandröra. Hizaʼi me no ara maʼifu, ibörögö laʼila lafaʼoli niwaʼöra ba sindruhu-ndruhu moroi ba dödö wangandröra andrö. Famatira saro, faʼomasira hegöi foʼameʼegöra tödö, sindruhu-ndruhu möi fangaʼaroʼö wamati.”

BÖI MAMALÖ BEʼE WONDRARA DÖDÖ

17-19. Hana wa moguna böi mamalö tabeʼe wondrara dödö?

¹⁷ Lö taʼila tatatugöi hawaʼara awena alö waʼabu dödö zi samösa niha börö waʼamate. Ba ginötö mate niha niʼomasiʼöra, ato zi fahuwu khöra hegöi ösi nomora zameʼe fondrara dödö. Hizaʼi, sindruhunia na no aefa lafuli ira ba lala waʼaurira si toʼölö, moguna nasa wondrara dödö ba niha si göna abula dödö börö waʼamate andrö. Andrö, moguna tabeʼe ginötöda wa wanolo yaʼira. ”Sindruhu si fahuwu, ba no fadoro iʼomasiʼö nawönia; ba ba wamakao, ba tumbu ia si fatalifusö.” (Gamaedola 17:17) Moguna tarara dödö niha si göna abula dödö börö waʼamate sagötö moguna khöra daʼö.​—Baso I Tesalonika 3:7.

¹⁸ Törö tödömö wa so ginötönia tola manö atage zi samösa niha börö gabula dödö nitaögönia. Tola manö alua daʼa börö me itörö tödönia ginötö wangowalu mazui faʼamate niha niʼomasiʼönia, musik, koda, nifaluara, mazui hua, li, hegöi musim ero röfi. Tola manö abua khö zi samösa ira alawe hegöi ira matua lakha mbanua ba wamalua hadia ia na awena mate woʼomora, simane ba weʼamöi ba kebaktian mazui ba Wanörö Tödö. Itutunö samösa talifusöda ira matua imane, ”Ba wamaigigu, abua khögu ba ataʼudo na itörö tödögu ginötö wangowalugu iʼotarai me no aefa mate woʼomogu. Hizaʼi, so ösa ndra talifusöda sangaʼasogö angowuloa side-ide si fao khö ndra niha si fahatö khögu irege lö urasoi wa ha yaʼo-yaʼo.”

¹⁹ Törö tödömö wa niha si göna abula dödö börö waʼamate, moguna khöra wamarou dödö tenga balazi so gangowuloa si tohude. Imane Junia, ”Sasesenia, fanolo hegöi fariawösa nibeʼe niha böʼö hewaʼae na tenga ba ginötö si tohude, tola ebua sibai mbuania. Sökhi sibai zalua simane daʼö, ba oya wondrara dödö si tola tatema.” Sindruhusa wa tebai taheta fefu gabula dödö mazui falöʼawö-awöra, hizaʼi tola tarara dödöra na tafalua khöra daʼö. (I Yohane 3:18) Imane Gaby, ”Sindruhu-ndruhu uʼandrö saohagölö khö Yehowa börö waʼomasi ndra satua sokubaloi si fao khögu ba waʼabu dödö nirasoigu. Latolo ndraʼodo ba worasoi faʼomasi Yehowa ba zi fasuigu.”

20. Hana wa no umbu wondrara dödö sebua mbuʼusa li Yehowa?

²⁰ Terara sibai dödöda börö me taʼila wa Yehowa, Lowalangi wondrara dödö, sindruhu-ndruhu ihori fefu gabula dödö na alua wanusugi. (Yohane 5:28, 29) No ifabuʼu Lowalangi wa ”ifakiko waʼamate, si lö mamalö-malö; ba iʼosi Soʼaya Yehowa daŵa hörö ba mbawa niha, idozigö”. (Yesaya 25:8) Aefa daʼö, lö hadöi niha ’sege-ege awö zege-ege’. Fefu niha si so ba gulidanö ’laʼomusoiʼö dödöra awö zomuso tödö’.​—Roma 12:15.