2 Moze
30 ”Fazökhi naha wanunu sumange moroi ba geu akasia+ ba wanunu sumange somuhua.+ 2 Niʼoʼöfa sagi wamazökhi, faʼanau ba faʼebolonia 44,5 sentimeter* ba 89 sentimeter* waʼalawa. Fakhai fefu dandrunia ba naha wanunu sumange andrö.+ 3 Foʼuli naha wanunu sumange andrö faoma anaʼa si sökhi, yaʼia daʼö gamaudu tanö yawa awö zinga hegöi tandrunia. Fazökhi göi lesi-lesi moroi ba ganaʼa ba zi fasui tanö yawa. 4 Fazökhi zi hulö galadanga anaʼa ba naha wanunu sumange andrö tanö tou lesi-lesi, faoma fatambai öbeʼe, dombua galadanga ero fatambai. Ba daʼö mubeʼe dania geu famabeania. 5 Fazökhi mbea-bea andrö moroi ba geu akasia ba foʼuli ia faoma anaʼa. 6 Fedadao naha wanunu sumange andrö föna nukha mbaʼa-baʼa Nahia Wondrege Niʼamoniʼö irege fahatö ia ba zinga dawöla Famaduhuʼö.+ Uforomaʼö dania ndraʼo khöu yawa ba dete lagö-lagö dawöla andrö.+
7 ”Ero sihulö wongi na mufaʼanö wandru,+ itunu zumange somuhua+ Aʼaroni+ ba naha wanunu sumange+ enaʼö numalö miyawa zimbo. 8 Na itunu wandru ba zi tanö owi,* ifuli zui itunu zumange somuhua. Lö iböhöli Aʼaroni hegöi ngaʼötönia ba wameʼe sumange somuhua khö Yehowa. 9 Böi beʼe zumange somuhua si lö tefaudu moloʼö huku+ ba naha wanunu sumange andrö. Böi beʼe ba daʼö zumange nitunu, sumange niʼa* hegöi sumange nibadu. 10 Sakali ba zi döfi, iʼamoniʼö naha wanunu sumange andrö Aʼaroni.+ Ifagule maʼifu ndro gurifö nibeʼe sumange fameta horö ba dandru naha wanunu sumange.+ Ifalua daʼa ero röfi götö-götö waʼara. Ba wamaigi Yehowa, fondrege niʼamoniʼö naha wanunu sumange andrö.”
11 Imane Yehowa khö Moze, 12 ”Ero öfalua wamasuraʼö töi hegöi fangerai hawaʼato nono matua Gizaraʼeli,+ moguna labeʼe höli salahi nosora zamösana khö Yehowa. Na löʼö, göna ira famakao ba ginötö mufasuraʼö döira. 13 Fefu niha si no mufasuraʼö töi enaʼö labeʼe önö gram wirö* moloʼö suʼa-suʼa waʼabua niʼogunaʼö ba nahia niʼamoniʼö.+ Firö si önö gram daʼö niʼamualagö khö Yehowa.+ 14 Sameʼe buala khö Yehowa yaʼia daʼö fefu nono matua si no mufasuraʼö töi si töra 20 fakhe.+ 15 Niha si kayo tebai latöraigö wameʼe, ba niha si numana tebai laʼambösi wameʼe. Dozi ira labeʼe önö gram wirö* mbuala khö Yehowa ba wangöhöli* nosora. 16 Owuloi gefe firö nibeʼe ndraono Gizaraʼeli ba wangöhöli nosora, ba ogunaʼö daʼö ba wotuhini halöwö nifalua ba nose waʼowulo. Daʼö höli salahi nosomi enaʼö lö tebulö itörö tödö Yehowa ndraono Gizaraʼeli.”
17 Imane zui Yehowa khö Moze, 18 ”Fazökhi mbaʼa moroi ba tembaga awö duwu-tuwunia,+ aefa daʼö beʼe ba gotalua nose waʼowulo faoma naha wanunu sumange. Foʼösi mbaʼa daʼö faoma idanö.+ 19 Ba daʼö isasai dangania Aʼaroni hegöi ahenia. Simane daʼö göi ndraononia matua.+ 20 Lafalua daʼö fatua lö möi ira bakha ba nose waʼowulo mazui fatua lö lafahatö ira ba naha wanunu sumange, ba wangai halöwö hegöi ba wanunu sumange khö Yehowa. Na lö lafalua daʼö, ba mate ira. 21 Lasasai danga awö gahera faböi mate ira. Daʼö gamakhoita si lö tebulö ifalua Aʼaroni awö ngaʼötönia irugi zi lö aetu.”+
22 Aefa daʼö, imane Yehowa khö Moze, 23 ”Halö ngawalö zomuhua fondrege zi sökhi, önö kilogram* gitö emuri, tölu kilogram* kuli mani, tölu kilogram zarango, 24 ba önö kilogram* mbunga lawang, lasuʼa moloʼö suʼa-suʼa waʼabua niʼogunaʼö ba nahia niʼamoniʼö.+ Halö göi arakhagö öfa liter* wanikha zaitu. 25 Moroi ba daʼö, fazökhi wanikha famataro* niʼamoniʼö nihaogö famaruka.*+ Daʼö wanikha famataro niʼamoniʼö.
26 Ötefeʼö wanikha daʼö ba nose waʼowulo,+ ba dawöla Famaduhuʼö, 27 ba meza awö gama-gamania, naha wandru awö gama-gamania, naha wanunu sumange somuhua, 28 naha wanunu sumange nitunu awö gama-gamania hegöi baʼa nidanö awö duwu-tuwunia. 29 Amoniʼö fefu daʼö enaʼö tobali fondrege niʼamoniʼö.+ Niha sombambaya gama-gama daʼö enaʼö teʼamoniʼö.+ 30 Ogunaʼö wanikha daʼö ba wamataro Aʼaroni+ hegöi iraononia matua,+ ba amoniʼö ira tobali ere sangai halöwö khögu.+
31 ”Fatunö ba ndraono Gizaraʼeli, ’Fanikha famataro andrö tobali niʼamoniʼö ia khögu götö-götö waʼara.+ 32 Tebai muʼogunaʼö wanikha daʼö ba mboto niha ba böi fazökhi zimane daʼö famaruka. Niʼamoniʼö wanikha daʼö. Böi tebulö niʼamoniʼö ia ba wamaigimi. 33 Niha samazökhi fanikha somuhua simane daʼö, ba na ibeʼe ba niha si lö mutehegö,* hasambalö labunu ia.’”*+
34 Aefa daʼö, ifuli zui fahuhuo Yehowa khö Moze, ”Halö ngawalö zomuhua andre:+ gitö rasamala, uli geʼoi somuhua, gitö galabanu, ba sindruhu gumöyö. Enaʼö fagölö-gölö fefu waʼoya. 35 Fazökhi ngawalö zomuhua+ andrö nihaogö famaruka,* ba nönö nasio+ ba wamazökhi sumange somuhua niʼamoniʼö ba si sökhi. 36 Tutu ösa tobali hamo ba beʼe ösa hamo daʼö föna Wamaduhuʼö ba nose waʼowulo, ba gamaudu nifalukhaisigu yaʼugö dania. Enaʼö fondrege niʼamoniʼö ia ba wamaigimi. 37 Böi fazökhi khöu zumange somuhua simane daʼö famaruka soguna khöu samösa.+ Enaʼö niʼamoniʼö daʼö ba wamaigimi khö Yehowa. 38 Na so zamazökhi sumange somuhua simane daʼö ba wangago huania, hasambalö labunu ia.”*