Nisura Mataiʼo
4 Aefa daʼö, idönisi Yesu eheha Lowalangi weʼamöi ba danö si mate, ba daʼö itandraigö+ ia Afökha.+ 2 Me no fuasö ia 40 ngaluo ba 40 wongi, irasoi waʼolofo. 3 Tohare Gafökha ba wanandraigö+ yaʼia imane, ”Na ono Lowalangi ndraʼugö, hede ba gara andre enaʼö tobali roti.”* 4 Itema linia Yesu imane, ”So ba zura, ’Tenga ha ba gönia auri niha, hizaʼi ba ngawalö li si otarai mbawa Yehowa.’”*+
5 Aefa daʼö, iʼohe ia Afökha ba mbanua niʼamoniʼö,+ ba mbumbu gosali.+ 6 Imane, ”Na ono Lowalangi ndraʼugö, fazaumbaʼö si tou. Börö me so ba zura, ’Ifatenge ndra malaʼikania ba lataya ndraʼugö faoma tangara, enaʼö lö tetutu gaheu ba gara.’”+ 7 Itema linia Yesu, ”So göi ba zura, ’Böi tandraigö Yehowa* Lowalangiu.’”+
8 Aefa daʼö, iʼohe ia Afökha ba hili salawa sibai ba iforomaʼö khönia fefu wamatörö ba gulidanö awö lakhöminia.+ 9 Imane, ”Ubeʼe khöu daʼa fefu asala ötuhi danö ba mangalulu ndraʼugö khögu hewaʼae ha sakali manö.” 10 Itema linia Yesu, ”Betaʼögö Satana! Börö me so ba zura, ’Ha khö Yehowa* Lowalangiu mangalulu ndraʼugö ba öfosumange ia,+ ba ha khönia öbeʼe halöwö niʼamoniʼö.’”+ 11 Awena iröi ia Afökha,+ ba tohare ndra malaʼika ba wanolo yaʼia.+
12 Me no irongo wa no laraʼu Yohane,+ mangawuli Yesu ba Galilaia.+ 13 Me no iröi Nazareta, mofanö ia ba Gafanauma.+ Ba daʼö toröi ia ba zinga nasi ba mbanua Zebuloni ba Nafetali, 14 enaʼö itörö niwaʼö Yesaya samaʼeleʼö, yaʼia daʼö, 15 ”He tanö Zebuloni ba tanö Nafetali, sara lala manö ofeta ba nasi, yefo Nidanö Yoridano, ba Galilaia si toröi soi böʼö! 16 Niha si so ba zogömi-gömi laʼila haga, ba tumbu haga ba niha si göna lumö waʼamate.”+ 17 Iʼotarai daʼö, ibörögö manuriaigö Yesu, ”Mifalalini gera-erami, börö me no ahatö Wamatörö Lowalangi ba zorugo.”+
18 Me itörö zinga Nasi Galilaia, iʼila darua zi fatalifusö, yaʼia daʼö Simoni nifotöi Fetero+ ba Andrea. No lafazaumba ndriala börö me si fagai ba nasi ira.+ 19 Imane khöra, ”Aine, miʼoʼö ndraʼo. Ubaliʼö ami samaʼuʼu niha.”+ 20 Iʼanemaiʼö laröi halöwöra ba laʼoʼö ia.+ 21 Iʼotarai daʼö, mofanö ia ba iʼila darua zi fatalifusö tanö böʼö, yaʼia daʼö Yakobo ba Yohane,+ ono Zebedaiʼo. Lahaogö-haogö ndrialara ba dundraha, fao göi namara Zebedaiʼo, ba ikaoni ira Yesu.+ 22 Ba ginötö daʼö göi, laröi dundraha hegöi amara ba laʼoʼö Yesu.
23 Aefa daʼö, mofanö ia itöröi Galilaia+ ba wamahaʼö niha ba nahia waʼowulo,*+ ituriaigö duria somuso dödö sanandrösa ba Wamatörö Lowalangi, ba ifadöhö fefu ngawalö wökhö awö ngawalö waʼatebai mboto.+ 24 Tehöngö duriania ba zi sagörö tanö Siria. Laʼohe khönia niha sofökhö awö zangarö-ngarö,+ nifakao malaʼika si lö sökhi,+ saniri,+ ba sombuyu-mbuyu töla. Ifadöhö ira fefu. 25 Börö daʼö, ato niha zoloʼö yaʼia. So moroi ba Galilaia, Dekafoli,* Yeruzalema, Yudea, ba yefo Nidanö Yoridano.