2 Moze
12 Aefa daʼö, imane Yehowa khö Moze hegöi Aʼaroni ba danö Miserai, 2 ”Böröta mbaŵa dania khömi mbaŵa daʼa ba ndröfi daʼa.+ 3 Fatunö ba ndraono Gizaraʼeli maʼafefu, ’Ba ngaluo si 10 ba mbaŵa daʼa, mifili sageu mbiri-biri+ soguna ba nösi nomomi. Sageu mbiri-biri ero sambua omo. 4 Hizaʼi, na lö ato ami ba nomo ba lö ahori miʼa mbiri-biri si sageu, mibeʼe ösa ba zi falazi omo khömi. Mibagi-bagi mbiri-biri daʼö ba nomomi moloʼö faʼato niha ba hawaʼoya laʼa ero samösa. 5 Tola mifili mbiri-biri mazui nambi, hizaʼi si matua, lö mofökhö+ ba si döfi faʼebua. 6 Lö tola löʼö mifaliaro irugi ngaluo si 14 ba mbaŵa daʼa.+ Ero sambua omo ba gotalua ndraono Gizaraʼeli maʼafefu, lataba gurifö daʼö ba zi tanö owi.*+ 7 Mifagule maʼifu ndronia ba gambölö, ba gabera hegöi ba högö mbawandruhö nomomi, yaʼia daʼö nahiami wemanga biri-biri andrö.+
8 ”’Ba zi bongi daʼö, miʼa nagolenia ba mifaga ömi.+ Miʼa fabaya roti si lö mufaruka ragi+ ba sayu safeto.+ 9 Lö tola löʼö mifaga fabaya högö, ahe awö galakhaö. Böi miʼa ataha ba böi mirino ba nidanö aukhu. 10 Tebai mitenagö irugi mahemolu sihulö wongi. Na so zi töra hasambalö mitunu.+ 11 Mihenaigö mifake mböbö löwi hegöi sandralami fatua lö miʼa, ba migogohe ziʼo. Mitaʼi-taʼi wemanga börö me Owasa Fasa daʼö khö Yehowa. 12 Bongi daʼö, uʼanöröi danö Miserai maʼasagörö ba ubunu fefu nono siaʼa ba danö Miserai, he niha hegöi urifö.+ Uhuku ba uhori dania fefu lowalangi niha Miserai.+ Yaʼo Yehowa. 13 Do si no mufagule ba högö mbawandruhö, daʼö zi tobali tandra ba nomomi. Na uʼila ndro ba högö mbawandruhö andrö, utaluʼi nomo daʼö. Lö göna ami fanguhuku ba lö mate ami na uhuku danö Miserai.+
14 Yaʼami hegöi ngaʼötömi lö tola löʼö mitörö tödömi ngaluo daʼö ba mifalua gowasa khö Yehowa. Daʼö gamakhoita si lö tebulö sagötö faʼara. 15 Miʼa roti si lö mufaruka ragi sagötö zi fitu hari.+ Ba ngaluo siföföna, mitiboʼö fefu ragi si so ba nomomi. Na so zi manga gö si no mufaruka ragi sagötö zi fitu hari andrö, hasambalö nibunu. 16 Ba ngaluo siföföna, hasambalö mifalua gangowuloa niʼamoniʼö, simanö göi ba ngaluo si fitu. Tebai mohalöwö ami ba zi dua hari daʼö.+ Tola mihenaigö gömi ndrohu-ndrohu niʼa ero samösa.
17 ”’Ba ngaluo daʼö, lö tola löʼö mifalua Gowasa Roti si Lö Mufaruka Ragi,+ börö me ba ngaluo daʼö uheta ami* moroi ba danö Miserai. Lö tola löʼö miʼowasaini ngaluo daʼö, yaʼami hegöi ngaʼötömi. Daʼö gamakhoita si lö tebulö sagötö faʼara. 18 Mibörögö wemanga roti si lö mufaruka ragi ba mbongi ngaluo si 14 ba mbaŵa siföföna, irugi ba mbongi ngaluo si 21 ba mbaŵa daʼö.+ 19 Tebai so ragi ba nomomi sagötö zi fitu hari andrö. Na so niha si manga gö si no mufaruka ragi hasambalö mibunu,* he iraono Gizaraʼeli hegöi si fatewu.+ 20 Böi miʼa gofu hadia zi no mufaruka ragi. Gofu hezo toröi ami, ha roti si lö mufaruka ragi zi tola miʼa.’”
21 Iʼanemaiʼö ikaoni ndra sondröniaʼö ndraono Gizaraʼeli+ Moze ba imane khöra, ”Mifili gurifö sawuyu-wuyu* soguna ba nösi nomomi zamösana, ba mitaba gurifö daʼö tobali sumange Wasa. 22 Aefa daʼö, miʼungugö samböbö danömö hiso* ba ndro si no mitaneʼö ba karawa. Mifagule daʼö ba högö mbawandruhö nomomi, ba gambölö hegöi ba gabera. Tebai so zi möi baero irugi sihulö wongi. 23 Tohare dania Yehowa ba wanguhuku niha Miserai. Na iʼila Yehowa ndro si no mifagule ba högö mbawandruhö nomomi, ba gambölö, ba gabera hegöi tanö yawa, italuʼi nomomi andrö ba lö itehegö na so zi mate ba nösi nomomi.+
24 ”Lö tola löʼö mitörö tödömi zalua andrö. Moguna khömi gamakhoita daʼa irugi zi lö aetu ofeta ba ngaʼötömi.+ 25 Na mirugi dania danö nifabuʼu Yehowa khömi simane si no iwaʼö, lö tola löʼö miʼowasaini ngaluo daʼö.+ 26 Na lasofu iraonomi, ’Hadia geluaha gowasa daʼa?’+ 27 Mimane wangumaʼö, ’Daʼa Gowasa Fasa khö Yehowa börö me italuʼi nomoda ba lö ibunu nösi nomoda me ibunu nösi nomo niha Miserai.’”
Aefa daʼö, latuhi danö iraono Gizaraʼeli. 28 Ba laʼoʼö fefu daʼö. Lafalua simane sibai niʼoroiʼö Yehowa khö Moze hegöi Aʼaroni.+
29 Me talu mbongi, ibunu fefu nono siaʼa Yehowa ba danö Miserai,+ iʼotarai ba nono Waraʼo siaʼa si dadao ba dadaoma waʼarazo ofeta ba nono siaʼa ba niha niʼoloiʼö si no lakuru, simanö göi ziaʼa nono gurifö.+ 30 Bongi daʼö, maoso Waraʼo hegöi ira sohalöwö khönia awö niha Miserai maʼafefu. Lö ara, terongo wangeʼesi sabölö-bölö ba zi sagörö tanö Miserai, börö me dozi omo so zi mate.+ 31 Bongi daʼö, iʼanemaiʼö ifakaoniʼö Moze hegöi Aʼaroni andrö Faraʼo.+ Imane khöra, ”Miʼofanö! Miheta ami ba soigu, he yaʼami simanö göi ndraono Gizaraʼeli. Mifosumange manö Yehowa, moloʼö somasi ami.+ 32 Miʼohe fefu khömi nambi, biri-biri hegöi sawi, moloʼö somasi ami.+ Hizaʼi, miʼandrö khö Lowalangi enaʼö ifahowuʼö ndraʼo.”
33 Iʼanemaiʼö lafofanö ndraono Gizaraʼeli ira niha Miserai.+ Lamane, ”Na lö mofanö ami, hasambalö si mate ndraʼaga fefu!”+ 34 Ba mofanö ndraono Gizaraʼeli, labeʼe ba galisira hamo darigu si lö mufaruka ragi, simanö göi karawa naha wamaruka tarigu si no labukusi ba lembe. 35 Simane niwaʼö Moze, laʼandrö iraono Gizaraʼeli ba niha Miserai gama-gama nifazökhi moroi ba ganaʼa hegöi firö, simanö göi mbaru.+ 36 Sökhi dödö niha Miserai ba ndraono Gizaraʼeli ibeʼe Yehowa irege labeʼe manö gofu hadia ia niʼandröra. Ba lahalö harato* niha Miserai.+
37 Ba mofanö ndraono Gizaraʼeli moroi ba Ramese+ numalö ba Zukhota.+ So mato 600.000 ndra matua sanörö tanö, baero ndraono.+ 38 Oya sibai laʼohe nambi, biri-biri awö zawi. Ba so göi niha si fao khöra moroi ba ngawalö soi.*+ 39 Me ba dalu lala so ira, labogö öra hamo darigu tobali roti sowulo-wulo, niʼohera moroi ba Miserai. Lö nifaruka ragi ba roti daʼö, börö me lö ladöna-döna wofanöra moroi ba Miserai. Ba lö fakhamö göi lafaʼanö zoguna khöra ba lala.+
40 Iraono Gizaraʼeli saheta moroi ba Miserai,+ fatewu ira ba soi böʼö sagötö zi 430 fakhe.+ 41 Ba zi maʼökhö daʼö ba gangohorita ndröfi si 430, ahori mofanö fefu nono mbanua* Yehowa moroi ba danö Miserai, hulö ngawawa zaradadu. 42 Bongi daʼö, lafalua gowasa fanörö tödö me iheta ira Yehowa ba danö Miserai. Lafalua daʼö iraono Gizaraʼeli khö Yehowa götö-götö waʼara.+
43 Aefa daʼö imane Yehowa khö Moze hegöi Aʼaroni, ”Daʼa gamakhoita sanandrösa ba Wasa: Tebai laʼa zumange Wasa ira niha si fatewu.+ 44 Na so zawuyumi si no miʼöli, hasambalö misuna.+ Awena dania tola iʼa zumange andrö. 45 Niha si fatewu hegöi niha si manga gazi tebai fao ira wemanga. 46 Bakha ba nomo miʼa. Tebai miʼohe baero maʼifu nagole ba böi mifatö zara dölania.+ 47 Fefu ndraono Gizaraʼeli lö tola löʼö lafalua Gowasa Fasa. 48 Na omasi niha si fatewu si toröi ba gotaluami laʼowasaini Wasa khö Yehowa, fefu ndra matua ba nösi nomora enaʼö lasuna. Awena dania tola ifalua Gowasa Fasa andrö ba tobali ia simane iraono Gizaraʼeli. Hizaʼi, niha si lö nisuna tebai iʼa zumange ba Gowasa Fasa.+ 49 Moguna gamakhoita daʼa ba ndraono Gizaraʼeli hegöi ba niha si fatewu si toröi ba gotaluara.”+
50 Ba laʼoʼö daʼö fefu iraono Gizaraʼeli. Lafalua simane sibai niʼoroiʼö Yehowa khö Moze hegöi Aʼaroni. 51 Ba ngaluo daʼö, iheta fefu ndraono Gizaraʼeli Yehowa ba danö Miserai, hulö ngawawa zaradadu.