Nisura Yohane
15 ”Yaʼodo döla nagu sindruhu ba Amagu zohalöwö. 2 Itiboʼö fefu ndraha si lö mowua ba ihaogö ndraha sowua enaʼö itugu oya mbuania.+ 3 No muhaogö ami börö daromali nifaʼemagu khömi.+ 4 Böi tebulö wa ha sambua ami khögu ba simanö göi ndraʼo khömi. Tebai mowua ndraha nagu na lö fakhai ia ba döla. Simanö göi ami, tebai mowua na lö teʼosambuaʼö ami ba khögu.+ 5 Yaʼodo döla nagu ba daha ami fefu. Na lö tebulö ia ba khögu, lö göi tebulö ndraʼo khönia, daʼö mbörö wa oya mbuania.+ Na lö yaʼo, lö hadöi si tola mifalua. 6 Niha samabali yaʼia ba khögu, amaedola ndraha soköli ba nitiboʼö ia. Aefa daʼö, laʼowuloi ba latunu ba galitö. 7 Na lö faröi ami ba khögu, ba mitanö ba dödömi wehedegu, miʼandrö gofu hadia zomasi ami ba tebeʼe khömi.+ 8 Tefolakhömi Namagu na lö tebulö waʼoya mbuami ba miforomaʼö wa nifahaʼögu ami.+ 9 No uʼomasiʼö ami simane fangomasiʼö Nama yaʼo.+ Yalötebulö ami ba waʼomasigu. 10 Na miʼoʼö goroisagu, ba lö tebulö ami ba waʼomasigu andrö. Hulö simane yaʼo me ufalua goroisa Nama ba lö tebulö ndraʼo ba waʼomasinia.
11 ”Uwaʼö khömi daʼa, enaʼö omuso dödömi simane faʼomuso dödögu, ba sindruhu-ndruhu omuso dödömi.+ 12 Yaʼe goroisagu: Miʼomasiʼö nawömi simane fangomasiʼögu yaʼami.+ 13 Lö hadöi sangokhögö faʼomasi sabölö ebua moroi ba waʼomasi niha sanehegö nosonia salahi zi fahuwu khönia.+ 14 Si fahuwu khögu ami na miʼoʼö goroisagu.+ 15 Lö saʼae ukaoni ami sawuyu, börö me lö iʼila sawuyu hadia nifalua zokhö yaʼia. Hizaʼi, ukaoni ami si fahuwu börö me no ufatunö khömi fefu nirongogu moroi khö Nama. 16 Tenga yaʼami zamili yaʼo, hizaʼi yaʼo zamili yaʼami. Ufataro ami enaʼö lö tebulö waʼoya mbuami yaʼia daʼö bua si lö tebulö, hadia enaʼö niʼandrömi khö Nama ba döigu, hasambalö ibeʼe khömi.+
17 ”Uwaʼö khömi daʼö enaʼö faoma miʼomasiʼö nawömi.+ 18 Na fatiu dödö niha gulidanö khömi, mitörö tödömi wa no oföna fatiu dödöra khögu fatua lö fatiu dödöra khömi.+ 19 Na moroi ba gulidanö ami, tatu laʼomasiʼö ami börö me tana khöra. Tenga tana khö niha gulidanö ami iadaʼa,+ ba no ufili ami moroi ba gulidanö. Andrö wa fatiu dödöra khömi.+ 20 Mitörö tödömi hadia zi no irai uwaʼö: Lö abölö ebua zawuyu moroi khö zokhö yaʼia. Na lafakao ndraʼo, ba lafakao göi ami dania.+ Na laʼoʼö niwaʼögu, ba laʼoʼö göi niwaʼömi dania. 21 Hizaʼi lafalua dania khömi fefu daʼa börö döigu, börö me lö aboto ba dödöra zamatenge yaʼo.+ 22 Na lö si möido ba na lö si fahuhuo ndraʼo khöra, tatu lö hadöi horöra.+ Lö laʼila fabuʼa iadaʼa ba horöra andrö.+ 23 Dozi si fatiu tödö khögu ba fatiu göi dödönia khö Namagu.+ 24 Na lö irai ufalua menaʼö halöwö si lö irai lafalua niha böʼö, tatu lö horöra ba daʼö.+ Hizaʼi, iadaʼa no laʼila ndraʼo ba fatiu göi dödöra khögu hegöi khö Namagu. 25 Wa alua daʼö enaʼö itörö niwaʼö ba Goroisa Moze khöra: ’Fatiu dödöra khögu lö börö.’+ 26 Na tohare dania zanolo nifatengegu khömi moroi khö Nama, yaʼia daʼö eheha niʼamoniʼö+ sangombakha sindruhu si otarai Nama, eheha andrö zamaduhuʼö yaʼo.+ 27 Ba yaʼami göi, lö tola löʼö mifaduhuʼö ndraʼo+ börö me no fao ami khögu iʼotarai ba wamobörö.