Nisura Mareko
10 Moroi ba daʼö, mofanö ia ba irugi nola danö Yudea yefo Nungo Nidanö Yoridano. Ifuli zui laʼondrasi ia niha. Simane si toʼölö ifalua, ibörögö wamahaʼö yaʼira.+ 2 Laʼondrasi ia ira Farizaiʼo ba wanandraigö yaʼia. Manofu ira hadia tola ifabali* woʼomonia niha.+ 3 Itema lira, ”Hadia goroisa Moze khömi?” 4 Latema linia, ”Itehegö Moze ba niha wamazökhi sura wabalisa moloʼö huku ba wamabali foʼomonia.”+ 5 Hizaʼi, imane Yesu, ”Wa isura daʼö Moze+ börö waʼabeʼe högömi.+ 6 Ba wamobörö, ’Ifazökhi niha Lowalangi tobali ira matua ba ira alawe.+ 7 Andrö iröi dania namania niha awö ninania,+ 8 ba ha sambua boto ira’,+ tenga saʼae darua, hizaʼi ha sambua. 9 Tobali, hadia zi no iʼosambuaʼö Lowalangi tebai ifabali niha.”+ 10 Me no larugi nomo, labörögö wanofu ira nifahaʼönia sanandrösa ba daʼö. 11 Imane khöra, ”Na so zamabali foʼomonia ba mangowalu zui ia ba niha böʼö, no sohorö niha andrö+ ba faröi ia khö woʼomonia. 12 Na so ndra alawe samabali foʼomonia ba mangowalu ia ba niha böʼö, no sohorö daʼö.”+
13 Aefa daʼö, ibörögö so niha solohe khönia iraono side-ide enaʼö itufa högöra. Hizaʼi, mofönu ndra nifahaʼönia.+ 14 Me iʼila daʼö Yesu, mofönu ia ba imane khö ndra nifahaʼönia, ”Mifaʼamöi khögu ndraono andrö. Böi mitaha ira, börö me simane yaʼira zangokhögö Famatörö Lowalangi.+ 15 Sindruhu niwaʼögu, niha si lö manema Famatörö Lowalangi simane iraono side-ide andre, tebai tefaʼamöi ira ba daʼö.”+ 16 Aefa daʼö, italagui ndraono andrö itufa högöra ba wamahowuʼö yaʼira.+
17 Me itohugö wofanö Yesu, samösa ndra matua si fagohi ba wangondrasi Yesu, ituhi danö ba manofu ia, ”He Samahaʼö Si Sökhi, hadia zinangea ufalua enaʼö usöndra waʼauri si lö aetu?”+ 18 Itema linia Yesu, ”Hana wa öwaʼö si sökhi ndraʼo? Lö si sökhi baero Lowalangi.+ 19 Aboto ba dödöu goroisa: ’Böi bunu niha,+ böi ohorö,+ böi anagö,+ böi böbögö khö nawöu zi lö duhu,+ böi falimo,+ ba fosumange namau awö ninau.’”+ 20 Imane niha andrö, ”He Samahaʼö, no ufalua daʼö iʼotarai me ide-idedo.” 21 Ifaigi ia Yesu si fao faʼahakhö dödö imane, ”So sambua zi lö nifaluamö. Famawa haratomö ba kefe daʼö beʼe ba niha si numana ba so girö-giröu ba zorugo. Aefa daʼö, aine oʼö ndraʼo.”+ 22 Abu sibai dödö niha daʼö me irongo niwaʼö Yesu. Mofanö ia si fao faʼabu dödö börö me ebua haratonia.+
23 Ifakhölö ia Yesu ba zi fasuinia. Imane khö ndra nifahaʼönia, ”Afökhö ba niha sebua kefe wogamö Famatörö Lowalangi andrö!”+ 24 Hizaʼi, tokea ndra nifahaʼönia me larongo daʼö. Andrö imane khöra Yesu, ”He yaʼami iraonogu, afökhö sibai weʼamöi ba Wamatörö Lowalangi andrö! 25 Aoha ba gondra wanörö tögi walölöwa moroi na ikhamö Wamatörö Lowalangi niha si kayo.”+ 26 Itugu tokea ira ba lamane khönia,* ”Na simanö, haniha saʼae niʼorifi?”+ 27 Ifaigi ira Yesu ba imane khöra, ”Na ba niha tebai, hizaʼi na ba khö Lowalangi tenga simane daʼö. Börö me lö si tebai khö Lowalangi.”+ 28 Imane khönia Fetero, ”No maröi fefu hadia ia ba maʼoʼö ndraʼugö.”+ 29 Imane Yesu, ”Sindruhu niwaʼögu, haniha zondröi omonia, talifusönia matua, talifusönia alawe, inania, amania, ononia, nowinia na börö ndraʼo hegöi turia somuso dödö andrö,+ 30 hasambalö isöndra 100 winaeta ba götö daʼa, yaʼia daʼö omo, talifusö matua, talifusö alawe, ina, ono hegöi nowi, si fao fanandraigö.+ Ba isöndra waʼauri si lö aetu ba götö* si so miföna. 31 Ato dania zi oföna tobali safuria, ba safuria tobali si oföna.”+
32 Aefa daʼö, mofanö Yesu hegöi ira nifahaʼönia numalö ba Yeruzalema, ba fönara iʼagö Yesu. Ahöli-höli dödö ndra nifahaʼönia, hizaʼi ibörögö ataʼu niha soloʼö yaʼira. Ifuli zui iʼohe zinengenia si 12, fabali ira ba niha sato. Ibörögö ifatunö khöra hadia manö zalua khönia dania imane,+ 33 ”Numalö ita ba Yeruzalema, ba tebeʼe dania Nono niha ba danga gafalo gere hegöi sangila amakhoita. Laʼetuʼö huku famunu khönia ba labeʼe ia ba danga soi böʼö. 34 Laʼoʼaya ia, ladiloi, laleasi ba labunu. Hizaʼi, tesusugi ia ba ngaluo si tölu.”+
35 Laʼondrasi ia ira Yakobo ba Yohane, ono Zebedaiʼo+ lamane khönia, ”He Samahaʼö, omasiga na öʼoʼö gofu hadia niʼandröma.”+ 36 Imane khöra, ”Hadia zomasi ami ufalua khömi?” 37 Latema linia, ”Tehegö khöma modadao ba zingamö ba lakhömimö, samösa ba gambölöu ba samösa ba gaberau.”+ 38 Hizaʼi imane khöra Yesu, ”Lö aboto ba dödömi hadia niʼandrömi. Hadia tola mibadu nösi mako andrö nibadugu, mazui tebayagö ami idanö simane nitörögu?”+ 39 Lamane khönia, ”Tola.” Aefa daʼö imane khöra Yesu, ”Mibadu sa dania nösi mako andrö khögu ba tebayagö ami idanö simane nitörögu.+ 40 Hizaʼi, tenga yaʼo zotatugöi haniha zi dadao ba gambölö hegöi ba gaberagu. No ihenaigö daʼö Amagu ba niha si no itatugöi.”
41 Me larongo daʼö ira nifahaʼönia si dafulu, mofönu ira khö Yakobo ba Yohane.+ 42 Hizaʼi, ikaoni ira Yesu imane, ”No miʼila wa mamatörö razo ba nono mbanuara ba gulidanö andre. Simanö göi ndra samatörö, laʼogunaʼö kuasora ba wamatörö ono mbanuara.+ 43 Hizaʼi, tebai simane daʼö ami. Haniha zomasi ebua ba gotaluami, yatobali ia enonimi+ 44 ba haniha zomasi tobali siföföna, yatobali ia sawuyumi. 45 Simane Ono niha, tenga si möi mangoni, no si möi enoni+ ba sameʼe nosonia höli zato.”+
46 Aefa daʼö, ofeta ira ba Yerikho. Me mofanö Yesu hegöi ira nifahaʼönia moroi ba Yerikho ba fao göi niha sato, so samösa zauʼa sangandrö-ngandrö sadaka si dadao ba zinga lala, töinia Batimaiʼo (ono Dimaiʼo).+ 47 Me irongo wa niha sanörö lala andrö Yesu, banua Nazareta, ibörögö muʼao ia imane, ”He Yesu, Maʼuwu Dawido,+ hakhösi tödö ndraʼo!”+ 48 Ibörögö mofönu khönia niha enaʼö ihonogö ia. Hizaʼi, itugu ebua linia weʼao, ”He Yesu, Maʼuwu Dawido, hakhösi tödö ndraʼo!” 49 Tebato Yesu ba imane, ”Mikaoni ia ba daʼa.” Ba lakaoni niha sauʼa andrö lamane, ”Böi ataʼufi! Ozizio, ikaoni ndraʼugö.” 50 Manaoka ia, itiboʼö mbarunia tanö baero, ba möi ia khö Yesu. 51 Aefa daʼö, isofu khönia Yesu, ”Hadia zomasiʼö ufalua khöu?” Itema linia sauʼa andrö, ”He Rabuni,* omasido uʼila niha.” 52 Aefa daʼö imane Yesu, ”Ofanö. No ifadöhö ndraʼugö famatimö.”+ Iʼanemaiʼö tola iʼila niha+ ba iʼoʼö Yesu ba lala.